Ўзбекистон Республикаси Мудофаа вазирлиги қўшинларига контракт бўйича ҳарбий хизматга номзодларни саралаш тартиби тўғрисидаги Низом (АВ томонидан 16.03.2020 й. 3226-сон билан рўйхатга олинган мудофаа вазирининг 11.02.2020 й. 130-сон буйруғига илова)

Функция недоступна

Ўзбекистон Республикаси

Адлия вазирлигида

2020 йил 16 мартда 3226-сон

билан рўйхатга олинган

Ўзбекистон Республикаси

мудофаа вазирининг

2020 йил 11 февралдаги

130-сон буйруғига

ИЛОВА

Ўзбекистон Республикаси Мудофаа вазирлиги

қўшинларига контракт бўйича ҳарбий хизматга

номзодларни саралаш тартиби тўғрисидаги

НИЗОМ

Мазкур Низом Ўзбекистон Республикаси Президентининг 2019 йил 12 сентябрдаги ПҚ-4447-сон "Ўзбекистон Республикаси фуқароларининг ҳарбий хизматни ўташ тартиби тўғрисидаги низомни тасдиқлаш ҳақида"ги қарорига мувофиқ Ўзбекистон Республикаси Мудофаа вазирлиги (бундан буён матнда Мудофаа вазирлиги деб юритилади) қўшинларига контракт бўйича ҳарбий хизматга номзодларни саралаш тартибини белгилайди.

1-БОБ. УМУМИЙ ҚОИДАЛАР

1. Ушбу Низомда қуйидаги асосий тушунчалардан фойдаланилади:

контракт бўйича ҳарбий хизмат - Қуролли Кучлар сафидаги ҳақиқий ҳарбий хизматга ихтиёрийлик асосида Мудофаа вазирлиги орқали давлат билан тузиладиган контрактга биноан кирган фуқаролар бажарадиган ҳарбий хизмат;

ҳарбий-касбий саралаш (бундан буён матнда саралаш деб юритилади) - фуқароларни (номзодларни) контракт бўйича ҳарбий хизматга қўйилган талабларга мос келишини аниқлашга қаратилган тадбирлар комплекси (интеллектуал ривожланганлик ва психоэмоционал барқарорлик даражасини психологик ўрганиш, тиббий кўрикдан ўтказиш, жисмоний имкониятларни баҳолаш, шунингдек ҳарбий хизмат учун касбий жиҳатдан муҳим бўлган бошқа сифатлар);

номзод - контракт бўйича ҳарбий хизматга кириш ҳақидаги аризаси кўриб чиқиш учун қабул қилинган Ўзбекистон Республикаси фуқароси.

2. Номзодларни контракт бўйича ҳарбий хизматга қабул қилиш учун саралаш тадбирлари ташкил қилинади.

3. Номзодларни контракт бўйича ҳарбий хизматга саралаш тадбирлари қуйидаги босқичларни ўз ичига олади:

а) дастлабки ўрганиш (ҳужжатларни йиғиш ва ўрганиш, суҳбат);

б) жисмоний тайёргарлик даражасини баҳолаш;

в) психологик ўрганиш (номзодларнинг интеллектуал ривожланганлик даражаси ва психоэмоционал барқарорлигини баҳолаш);

г) тиббий кўрик;

д) мувофиқлаштиришдан ўтказиш ёки махфий маълумотлар билан ишлаш учун рухсатнома (бундан буён матнда рухсатнома деб юритилади) расмийлаштириш (рухсатномага эга номзодлар бундан мустасно).

4. Мудофаа вазирлиги учун зарур ҳолларда илмий даража ёки илмий унвонга эга бўлган фан арбоблари, шунингдек маданият вакиллари, сўнгги беш йил давомида республика миқёсидаги спорт мусобақасининг ғолиби бўлган ёки халқаро миқёсдаги спорт мусобақасининг 1-3-ўринларидан бирини эгаллаган спортчилар истисно тариқасида саралашнинг фақатгина тиббий кўрик, мувофиқлаштиришдан ўтказиш ёки рухсатнома расмийлаштириш (рухсатномага эга номзодлар бундан мустасно) босқичларидан ўтадилар.

5. Номзодлар Ўзбекистон Республикасининг "Умумий ҳарбий мажбурият ва ҳарбий хизмат тўғрисида"ги Қонунида ҳамда Ўзбекистон Республикаси Президентининг 2019 йил 12 сентябрдаги ПҚ-4447-сон қарори билан тасдиқланган Ўзбекистон Республикаси фуқароларининг ҳарбий хизматни ўташ тартиби тўғрисидаги низомда белгиланган талабларга жавоб бериши лозим.

6. Контракт бўйича ҳарбий хизматга қабул қилишда номзод бўйининг баландлиги Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказишни ташкил этиш ва амалга ошириш тартиби тўғрисидаги низомда (рўйхат рақами 3147, 2019 йил 3 апрель) белгиланган махсус талабларга жавоб бериши шарт. Махсус талаблар мазкур Низомнинг 4-бандида назарда тутилган шахсларга татбиқ этилмайди.

7. Қуйидаги ҳолатларда саралашнинг исталган босқичида номзодни контракт бўйича ҳарбий хизматга қабул қилиш рад этилиши мумкин:

номзод мазкур Низомнинг 5 ва 6-бандларида белгиланган талабларга жавоб бермаса;

Ўзбекистон Республикаси қонунчилигига мувофиқ номзод контракт тузиш ҳуқуқига эга бўлмаса;

номзодга нисбатан жиноий иш қўзғатилган, унга нисбатан дастлабки тергов ёки суриштирув олиб борилаётган, жиноий иш судда кўрилаётган бўлса (бундай ҳолатларда номзоднинг контракт бўйича ҳарбий хизматга қабул қилиниши масаласини қайта кўриб чиқиш жиноий иш бўйича якуний қарор қабул қилинганидан сўнг амалга оширилади);

жазо чорасидан ва амнистия қўлланилганидан қатъи назар, номзод содир этган жинояти учун айблов ҳукми мавжуд бўлса;

номзод муқаддам контракт бўйича ҳарбий хизматни ўтаган ва ҳарбий хизматчининг номига доғ туширувчи хатти-ҳаракатни содир этганлиги ёки хизмат вазифасига нолойиқ бўлиб қолганлиги сабабли хизматдан бўшатилган бўлса;

номзод ўзи ҳақида била туриб нотўғри маълумотлар тақдим қилгани аниқланганда;

номзод мазкур Низомнинг 23-бандида назарда тутилган ҳужжатларни тақдим этишдан бош тортганда.

2-БОБ. САРАЛАШ ТАДБИРЛАРИНИ

ТАШКИЛ ЭТИШ

8. Номзодларни саралаш тадбирлари Мудофаа вазирлиги қўшинларида мавжуд бирламчи бўш лавозимлардан келиб чиққан ҳолда йилнинг ҳар чорагида камида бир марта ўтказилади.

9. Саралаш тадбирлари ўз вақтида ва сифатли ўтказилишини таъминлаш мақсадида Мудофаа вазирлигининг тегишли ҳарбий округлари, Тоифаланган объектларни қўриқлаш қўшинлари, Ҳаво ҳужумидан мудофаа қўшинлари ва Ҳарбий ҳаво кучлари (бундан буён матнда ҳарбий округ ва бирлашмалар деб юритилади) қўмондонларининг буйруғи билан тегишли ҳарбий округ ва бирлашмаларда доимий фаолият юритадиган Ҳарбий-касбий саралаш комиссиялари (бундан буён матнда Саралаш комиссияси деб юритилади) ташкил этилади.

10. Саралаш комиссияларининг таркиби тегишли ҳарбий округ ва бирлашмалар қўмондонларининг ўринбосарлари ва тегишли таркибий бўлинмалар мутахассислари орасидан шакллантирилади.

Ҳарбий округ ёки бирлашма қўшинлари қўмондонининг тарбиявий ва мафкуравий ишлар бўйича ўринбосари - тегишли Саралаш комиссияси раиси, ҳарбий округ ва бирлашмаларнинг ҳарбий-касбий саралаш бўлимлари бошлиқлари эса - тегишли Саралаш комиссияси котиблари ҳисобланади.

Мудофаа вазирининг буйруғига асосан Саралаш комиссиялари таркибига Мудофаа вазирлигининг бошқа мансабдор шахслари ёки мутахассислари ҳам киритилиши мумкин.

11. Саралаш комиссияси котиби томонидан саралаш тадбирларини ўтказиш бўйича режа-жадвал шакллантирилади ҳамда комиссия раиси томонидан тасдиқланади. Режа-жадвалда саралаш тадбирларини ўтказиш жойи ва вақти кўрсатилиши керак.

12. Саралаш тадбирлари ҳарбий округ ва бирлашмалар кесимида Қорақалпоғистон Республикаси, вилоятлар ва Тошкент шаҳар мудофаа ишлари бошқармалари ҳудудида қуйидагича ўтказилади:

Тошкент ҳарбий округи бўйича - Тошкент шаҳри, Тошкент ва Сирдарё вилоятларида;

Марказий ҳарбий округ бўйича - Жиззах, Самарқанд ва Навоий вилоятларида;

Жануби-ғарбий махсус ҳарбий округ бўйича - Бухоро, Сурхондарё ва Қашқадарё вилоятларида;

Шарқий ҳарбий округ бўйича - Фарғона, Андижон ва Наманган вилоятларида;

Шимоли-ғарбий ҳарбий округ бўйича - Қорақалпоғистон Республикаси ва Хоразм вилоятида;

Тоифаланган объектларни қўриқлаш қўшинлари, Ҳаво ҳужумидан мудофаа қўшинлари ва Ҳарбий ҳаво кучлари қўмондонлиги бўйича - Қорақалпоғистон Республикаси, вилоятлар ва Тошкент шаҳрида.

13. Ҳарбий округ ва бирлашмаларнинг ҳарбий-касбий саралаш бўлимлари ҳамда кадр органлари мутахассисликлар бўйича бирламчи бўш лавозимлар, номзодларни саралаш тартиби, уларга қўйиладиган талаблар, қабул кунлари ва жойи, тақдим этилиши лозим бўлган ҳужжатлар рўйхати тўғрисидаги маълумотларни ҳар чоракда камида бир марта Мудофаа вазирлиги Кадрлар бош бошқармасига тақдим қилади.

Мудофаа вазирлиги Кадрлар бош бошқармаси томонидан мазкур банднинг биринчи хатбошисида назарда тутилган маълумотлар вазирликнинг расмий веб-сайтига (www.mudofaa.uz) жойлаштирилиши таъминланади.

14. Номзодларга қулайлик яратиш мақсадида мудофаа ишлари бўйича бўлимлар ҳудудига кириш жойларида номзодларни саралаш тартиби, уларга қўйиладиган талаблар, қабул кунлари ва жойи, тақдим этилиши лозим бўлган ҳужжатлар рўйхати ҳақидаги маълумотлар қайд этилган ахборот стендлари мажбурий тартибда жойлаштирилиши лозим.

15. Саралаш тадбирлари давомида ҳарбий округлар ва бирлашмаларнинг фахрийлар кенгашлари, жамоат ташкилотлари вакиллари ва номзодларнинг яқин қариндошлари (бундан буён матнда жамоатчилик вакиллари деб юритилади) иштирок этишлари мумкин. Бунда, жамоатчилик вакиллари ёки номзодлар саралаш тадбирларини ўтказиш жараёни ва унинг натижаларидан норози бўлган тақдирда тегишли Саралаш комиссияси раисига ёзма равишда мурожаат қилишлари ва ўз таклиф ҳамда эътирозларини билдиришлари мумкин. Жамоатчилик вакиллари ва номзодларнинг мурожаатлари Ўзбекистон Республикасининг "Жисмоний ва юридик шахсларнинг мурожаатлари тўғрисида"ги Қонунида белгиланган тартибда кўриб чиқилиши лозим.

16. Муддатли ҳарбий хизматни ўтаётган ҳарбий хизматчилар орасидан контракт бўйича хизматга номзодларни кўриб чиқиш Ўзбекистон Республикаси Президентининг 2019 йил 12 сентябрдаги ПҚ-4447-сон қарори билан тасдиқланган Ўзбекистон Республикаси фуқароларининг ҳарбий хизматни ўташ тартиби тўғрисидаги низомда белгиланган тартибда амалга оширилади.

3-БОБ. НОМЗОДЛАРНИ ДАСТЛАБКИ ЎРГАНИШ

17. Контракт бўйича ҳарбий хизматга кириш истагини билдирган фуқаро доимий яшаш жойидаги мудофаа ишлари бўйича бошқармага мазкур Низомнинг 1-иловасига мувофиқ шаклдаги ариза билан мурожаат қилади. Вақтинча яшаш жойи бўйича таҳсил олаётган ёки расмий меҳнат фаолияти билан шуғулланаётган фуқаролар ушбу ҳудуддаги мудофаа ишлари бўйича бошқармага мурожаат қилишлари мумкин.

18. Номзод муқаддам контракт бўйича ҳарбий хизматни ўтаган бўлса, аризада контракт бўйича ҳарбий хизматдан бўшатилиш сабабини кўрсатиши лозим.

19. Навбатдаги саралаш тадбирлари бошланишидан ўн кун олдин мудофаа ишлари бўйича бошқармалар томонидан номзодларга саралаш тадбирларининг бошланиш вақти ва жойи ҳақида хабар берилади.

20. Саралаш комиссиясининг навбатдаги қабул куни давомида номзодлар ҳужжатларини қабул қилиш ва ўрганиш ҳамда суҳбат ўтказилади. Бунда, номзоднинг мутахассислиги мавжуд бўш лавозимларга мос келиши ҳамда тақдим этилган ҳужжатларнинг тўлиқлиги ва улардаги маълумотлар тўғрилиги ўрганилади.

21. Саралаш учун ҳозир бўлган номзод мазкур Низомнинг 6-бандида назарда тутилган талабга жавоб беришини аниқлаш мақсадида Саралаш комиссиясининг тегишли аъзоси томонидан унинг бўйи ўлчанади. Номзоднинг бўйи талабга жавоб бермаган ҳолларда, унга дастлабки ўрганиш тадбирларида иштирок этишга рухсат берилмайди.

22. Саралаш комиссияси котиби бўйга қўйилган талабларга мувофиқ келган номзоднинг ҳужжатларини комиссия кўриб чиқиши учун қабул қилади ҳамда тегишли маълумотларни мазкур Низомнинг 2-иловасига мувофиқ шаклдаги Номзодларни рўйхатга олиш журналига қайд этади ва номзодга унинг идентификациялаш рақамини - хос рақамини маълум қилади.

23. Номзод Саралаш комиссияси котибига қуйидаги ҳужжатларни тақдим этиши лозим:

биометрик паспорт ёки идентификация ID-картаси (нусхаси олиниб, асли қайтарилади);

ҳарбий гувоҳнома (нусхаси олиниб, асли қайтарилади);

туғилганлик ҳақида гувоҳнома (нусхаси олиниб, асли қайтарилади);

номзод томонидан қўлда ёки компьютерда ёзилган таржимаи ҳол;

анкета-маълумотнома.

24. Номзод тақдим этган ҳужжатлар тўлиқ ва улардаги маълумотлар тўғри бўлиши зарур.

25. Ҳужжатлар тўлиқ ва улардаги маълумотлар тўғри бўлган ҳолларда номзод шу вақтнинг ўзида сухбатдан ўтказилади.

Ҳужжатларида камчилик аниқланган номзодга ушбу камчиликни бартараф этиши ва навбатдаги қабул кунида ҳозир бўлиши Саралаш комиссияси котиби томонидан тушунтирилади.

26. Суҳбат Саралаш комиссиясининг суҳбат ўтказилишига масъул бўлган аъзоси (аъзолари) томонидан номзодга мазкур Низом талаблари, ҳарбий хизматчининг ҳуқуқ ва мажбуриятлари, ҳарбий хизматни ўташ билан боғлиқ шартлар ва имтиёзлар, хизматнинг зарарли ва хавфли жиҳатлари ҳамда касб касаллигини орттириб олиш эҳтимолини тушунтириш ҳамда номзоднинг контракт бўйича ҳарбий хизматга кириш истаги бор ёки йўқлигини аниқлаш мақсадида ўтказилади.

27. Саралаш комиссияси аъзолари томонидан номзодни дастлабки ўрганиш босқичида ўтказилган тадбирлар натижалари умумлаштирилиб, шу куннинг ўзида номзодни саралашнинг кейинги босқичига ўтказиш ёки ўтказишни рад этиш ҳақида хулоса чиқарилади.

28. Саралаш комиссияси хулосаси асосида комиссия котиби томонидан мазкур Низомнинг 2-иловасига мувофиқ шаклдаги Номзодларни рўйхатга олиш журналига тегишли ёзув киритилади ва номзодга унинг имзоси қўйилган ҳолда таништирилади.

29. Саралаш комиссияси котиби саралашнинг дастлабки ўрганиш босқичидан муваффақиятли ўтган номзодларнинг ҳужжатлари ва дастлабки ўрганиш натижаларини ягона йиғма жилдда жамлайди.

4-БОБ. НОМЗОДЛАРНИНГ ЖИСМОНИЙ

ТАЙЁРГАРЛИК ДАРАЖАСИНИ БАҲОЛАШ

30. Саралашнинг дастлабки ўрганиш босқичидан муваффақиятли ўтган номзодларнинг жисмоний тайёргарлик даражасини аниқлаш мақсадида саралашнинг навбатдаги кунида номзодларнинг жисмоний тайёргарлик даражасини баҳолаш тадбири ўтказилади.

31. Номзодларнинг жисмоний тайёргарлик даражасини аниқлаш мазкур Низомнинг 3-иловасига мувофиқ Номзодларнинг жисмоний тайёргарлик даражасини баҳолаш бўйича тадбирларни ўтказиш методикаси ва баҳолаш мезонлари асосида амалга оширилади.

32. Номзодлар томонидан машқларни бажариш бошланишидан олдин уларга машқларни бажаришга қўйиладиган талаблар, машқларни бажариш тартиби ҳамда баҳолаш мезонлари Саралаш комиссиясининг номзодлар жисмоний тайёргарлик даражасини баҳолаш бўйича масъул аъзолари томонидан тушунтирилади.

33. Номзодлар томонидан бажарилиши лозим бўлган жисмоний тайёргарлик машқлари ва уларни бажаришга қўйиладиган талаблар эркак ва аёл жинсидаги номзодлар учун алоҳида белгиланади.

34. Жисмоний тайёргарлик машқларини бажарган номзодлар шу вақтнинг ўзида Саралаш комиссияси аъзолари томонидан мазкур Низомнинг 3-иловасига мувофиқ Номзодларнинг жисмоний тайёргарлик даражасини баҳолаш бўйича тадбирларни ўтказиш методикаси ва баҳолаш мезонлари асосида баҳоланади.

35. Жисмоний тайёргарлик даражасини баҳолаш тадбирлари натижалари бўйича шу куннинг ўзида мазкур Низомнинг 4-иловасига мувофиқ шаклда қайднома расмийлаштирилади ва натижалар шу заҳоти номзодларга эълон қилинади.

Қайднома Саралаш комиссиясининг жисмоний тайёргарлик даражасини баҳолаш бўйича тадбирда иштирок этган аъзолари томонидан имзоланади ҳамда шу куннинг ўзида комиссия котибига топширилади.

36. Жисмоний тайёргарлик даражаси бўйича қониқарсиз баҳоланган номзодлар саралашнинг кейинги босқичига ўтказилмайди.

37. Қониқарсиз баҳоланган номзод жисмоний тайёргарлик даражасини баҳолаш машқларини у баҳоланган кундан бошлаб 1 йил давомида 2 маротаба навбатдаги саралаш тадбирлари давомида қайта топшириши мумкин, бироқ шу куннинг ўзида қайта топширишга йўл қўйилмайди.

5-БОБ. НОМЗОДЛАРНИ ПСИХОЛОГИК

ЎРГАНИШ

38. Саралашнинг жисмоний тайёргарлик даражасини баҳолаш босқичидан муваффақиятли ўтган номзодларнинг интеллектуал ривожланганлик даражаси ва психоэмоционал барқарорлигини аниқлаш мақсадида психологик ўрганиш ўтказилади.

39. Номзодларни психологик ўрганиш мазкур Низомнинг 5-иловасига мувофиқ методика ва баҳолаш мезонлари асосида психологик тест синовидан ўтказиш орқали амалга оширилади.

40. Психологик тестлар, уларнинг жавоблари ва жавоблар бланкалари қоида тариқасида ҳар уч йилда бир маротаба қайта ишлаб чиқилади ва Мудофаа вазирлиги томонидан тасдиқланади ҳамда ҳарбий округлар ва бирлашмаларнинг ҳарбий-касбий саралаш бўлимларига юборилади.

41. Психологик тестлар, уларнинг жавоблари ва жавоблар бланкалари Саралаш комиссияси котибида сақланади, котиб тестлар ва уларнинг жавоблари ошкор қилинмаслиги учун масъул ҳисобланади.

42. Психологик ўрганиш бошланишидан аввал номзодлар Саралаш комиссиясининг психологик ўрганиш ўтказиш бўйича масъул мутахассислари томонидан психологик ўрганишни ўтказиш тартиби, ҳар бир вазифа бўйича назарда тутилган баҳолаш мезонлари билан таништирилади ҳамда уларга тегишли тушунтиришлар берилади.

43. Психологик ўрганиш натижалари қониқарсиз бўлган номзод тест синовини у баҳоланган кундан бошлаб 1 йил давомида 2 маротаба навбатдаги саралаш тадбирлари давомида қайта топшириши мумкин, бироқ шу куннинг ўзида қайта топширишга йўл қўйилмайди.

44. Тест синовининг натижалари бўйича, у ўтказилган кундан бошлаб 2 кун ичида Саралаш комиссиясининг психологик ўрганиш тадбирларида иштирок этган аъзолари томонидан мазкур Низомнинг 6-иловасига мувофиқ шаклда қайднома расмийлаштирилади ва имзоланади ҳамда шу куннинг ўзида комиссия котибига топширилади.

Психологик ўрганиш натижалари қайднома расмийлаштирилган куннинг ўзида номзодларга эълон қилиниши лозим.

45. Саралаш комиссияси котиби томонидан номзодларнинг жисмоний тайёргарлик даражасини баҳолаш ва психологик ўрганиш тадбирларида қайд этган натижалари умумлаштирилиб, мазкур Низомнинг 7-иловасига мувофиқ шаклда баённома расмийлаштирилади.

Баённомага номзодлар томонидан жисмоний тайёргарлик даражасини баҳолаш ва психологик ўрганиш тадбирларида қайд этилган натижалар мутахассисликлар кесимида кўрсаткичларнинг пасайиб бориш тартибида киритилиши лозим.

46. Баённома Саралаш комиссиясининг ҳар бир аъзоси томонидан имзоланади ҳамда тасдиқлаш учун тегишли ҳарбий округ ва бирлашмаларнинг қўмондонларига тақдим этилади.

47. Саралаш комиссияси котиби ҳарбий округ ва бирлашмаларнинг қўмондонлари томонидан тасдиқланган баённоманинг кўчирмаси (нусхаси), у тасдиқланган кундан бошлаб 5 кун ичида номзодларга уларнинг имзоси қўйдирилган ҳолда таништирилишини таъминлаши лозим.

48. Саралаш комиссияси баённомаси тасдиқланган вақтдан бошлаб бир йил давомида ҳақиқий ҳисобланади.

49. Саралаш тадбирларидан муваффақиятли ўтган номзодларга мазкур Низомнинг 8-иловасига мувофиқ шаклда саралаш картаси тўлдирилади.

6-БОБ. НОМЗОДЛАРНИ ТИББИЙ

КЎРИКДАН ЎТКАЗИШ

50. Номзодлар соғлиғининг ҳолатига кўра контракт бўйича ҳарбий хизматни ўташга яроқли ёки яроқсиз эканлигини аниқлаш мақсадида улар тиббий кўрикдан ўтказилади.

51. Номзодларга тиббий кўрикдан ўтиш учун йўлланмалар ҳарбий округ ва бирлашмаларнинг ҳарбий-касбий саралаш бўлимлари ва ҳарбий қисмлар томонидан берилади.

52. Саралашдан муваффақиятли ўтган номзодлар гарнизон (ҳудудий) ҳарбий-тиббий комиссияларига тиббий кўрикдан ўтиш учун юборилади.

53. Тиббий кўрик Ўзбекистон Республикаси Президентининг 2018 йил 25 декабрдаги ПҚ-4076-сон қарори билан тасдиқланган Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказиш тўғрисидаги низом ҳамда Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказишни ташкил этиш ва амалга ошириш тартиби тўғрисидаги низом (рўйхат рақами 3147, 2019 йил 3 апрель) талабларига мувофиқ ўтказилади.

54. Тиббий кўрик натижаларига кўра ҳарбий хизматга яроқсиз ёки кейинчалик қайта тиббий кўрикдан ўтказиш шарти билан даволанишга муҳтож деб топилган номзодлар контракт бўйича ҳарбий хизматга қабул қилинмайди.

7-БОБ. НОМЗОДЛАРНИ КОНТРАКТ БЎЙИЧА

ҲАРБИЙ ХИЗМАТГА ҚАБУЛ ҚИЛИШ

55. Саралаш тадбирларидан муваффақиятли ўтган номзодларнинг ҳужжатларини мувофиқлаштиришдан ўтказиш ёки рухсатнома расмийлаштириш (рухсатномага эга номзодлар бундан мустасно) уларни гарнизон ҳарбий-тиббий комиссиясига тиббий кўрикдан ўтиш учун юбориш билан бир вақтда амалга оширилади.

Мувофиқлаштиришдан ўтказиш ёки рухсатнома расмийлаштиришнинг талаблари хизмат сири ҳисобланади ва ошкор қилиниши ман этилади.

56. Мувофиқлаштиришдан ўтказиш ва рухсатнома расмийлаштириш натижаларига кўра контракт бўйича ҳарбий хизматга қабул қилиниши мақсадга мувофиқ эмас деб топилган номзодлар контракт бўйича ҳарбий хизматга қабул қилинмайди.

57. Саралашнинг барча босқичларидан муваффақиятли ўтган номзодларга ҳарбий округ ва бирлашмаларнинг ҳарбий-касбий саралаш бўлимлари томонидан белгиланган намунадаги шахсий йиғмажилд расмийлаштирилади.

58. Саралашдан ўтган номзоднинг шахсий йиғмажилди контракт бўйича ҳарбий хизматга қабул қилиш ва лавозимга тайинлаш тўғрисида якуний қарорни қабул қилиш учун бўйсунув бўйича юқори турувчи кадр органига тақдим қилинади. Бунда тиббий кўрик хулосасининг амал қилиш муддати инобатга олиниши лозим.

59. Саралаш якунига кўра энг юқори натижаларга эришган номзодлар бўш лавозимлар мавжуд бўлган тақдирда контракт бўйича ҳарбий хизматга қабул қилинади.

8-БОБ. ЯКУНИЙ ҚОИДА

60. Мазкур Низом талабларининг бузилишида айбдор бўлган шахслар қонун ҳужжатларида белгиланган тартибда жавобгар бўлади.

Низомга

1-ИЛОВА

Менга Ўзбекистон Республикаси Мудофаа вазирлиги қўшинларига контракт бўйича ҳарбий хизматга номзодларни саралаш тадбирларида қатнашишга рухсат беришингизни сўрайман.

Хизматни ўташ талаблари ва шароитлари билан танишдим. Ўзбекистон Республикасининг исталган ҳудудида контракт бўйича ҳарбий хизматни ўташга тайёрман.

Ҳарбий хизмат бўйича менга маълум бўлган давлат, ҳарбий ва хизматга оид маълумотларни сир сақлашга ваъда бераман.

Синовларни __________ тилида топшираман.

Низомга

2-ИЛОВА

Номзодларни рўйхатга олиш

ЖУРНАЛИ

   

Низомга

3-ИЛОВА

Номзодларнинг жисмоний тайёргарлик даражасини

баҳолаш бўйича тадбирларни ўтказиш

МЕТОДИКАСИ

1. Номзодларнинг жисмоний тайёргарлик даражасини баҳолаш уларнинг мазкур Методикада назарда тутилган машқларни бажаришларини текшириш орқали амалга оширилади.

2. Жисмоний тайёргарлик даражасини баҳолаш тадбирлари бошланишидан олдин номзод комиссиянинг масъул аъзоларига ўзини таништиради, бунда номзод биометрик паспорти ёки идентификация ID-картаси ёхуд ҳарбий гувоҳномасини кўрсатиши лозим.

3. Жисмоний тайёргарлик даражасини баҳолаш машқларини бажариш бошланишидан олдин номзодларга машқларни бажаришга қўйиладиган талаблар, машқларни бажариш тартиби ҳамда баҳолаш мезонлари комиссия аъзолари томонидан тушунтирилади.

4. Номзодлар томонидан бажарилиши лозим бўлган жисмоний тайёргарлик машқлари ва уларни бажаришга қўйиладиган талаблар эркак ва аёл жинсидаги номзодлар учун алоҳида белгиланади.

5. Номзодлар машқларни спорт кийимида бажаришлари тавсия этилади.

6. Жисмоний тайёргарлик машқларини бажаришда номзодлар қуйидаги ёш гуруҳларига бўлинади:

а) эркак жинсидаги номзодлар:

1-гуруҳ: 28 ёшгача;

2-гуруҳ: 29 ёшдан 33 ёшгача;

3-гуруҳ: 34 ёшдан 38 ёшгача;

4-гуруҳ: 39 ёшдан 40 ёшгача бўлганлар;

б) аёл жинсидаги номзодлар:

1-гуруҳ: 25 ёшгача;

2-гуруҳ: 26 ёшдан 30 ёшгача;

3-гуруҳ: 31 ёшдан 35 ёшгача.

4-гуруҳ: 36 ёшдан 40 ёшгача бўлганлар.

7. Қуйидагилар эркак жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

тезликка оид машқ - 100 метрга югуриш;

куч ишлатиш машқи - тўсинда (турникда) тортилиш;

чидамлиликка оид машқ - 3000 метрга югуриш.

8. Қуйидагилар аёл жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

тезликка оид машқ - 100 метрга югуриш;

куч ишлатиш машқи - куч ишлатиш машқлари комплекси;

чидамлиликка оид машқ - 1000 метрга югуриш.

Жисмоний тайёргарлик машқлари қуйидаги кетма-кетликда: биринчи навбатда - тезликка оид машқлар, иккинчи навбатда - куч ишлатиш машқлари, учинчи навбатда - чидамлиликка оид машқлар бажарилади.

9. Жисмоний тайёргарлик машқларини бажариш оралиғида номзодларга дам олиш учун камида 20 дақиқа вақт берилади.

10. Жисмоний тайёргарлик машқларидан бири қониқарсиз баҳоланганда, номзодга навбатдаги машқларни бажаришга рухсат берилмайди.

Жисмоний тайёргарлик машқларини узрсиз сабабларга кўра бажармаган, шунингдек машқларни бажариши қониқарсиз баҳоланган номзодларга жисмоний тайёргарлик машқларини шу куннинг ўзида қайта топширишга рухсат берилмайди.

11. 100 метрга югуриш машқи стадионнинг югуриш йўлакчасида ёки қаттиқ қопламали текис жойларда юқори ёки қуйи стартдан қуйидагича амалга оширилади:

"Старт" командаси бўйича старт олиш чизиғига яқинлашиш;

"Диққат" командаси бўйича тананинг оғирлигини олдинда турган оёққа ўтказиш, гавда ва бошни олдинга эгиш, қўлларни тирсакка букиш;

"Олға" командаси бўйича югуришни бошлаш.

12. Қуйидагилар тўсинда (турникда) тортилиш машқига қўйиладиган талаблар ҳисобланади:

бош бармоқ поя ичкарисидан ушланади, тана бироз ростланади, тизза бўғими тўғирланади, оёқ учлари чўзилади, товонлар бирлаштирилади;

ияк тўсин (турник) поясидан ўтгунга қадар қўллар букилади;

ҳаракат тўлиқ амалга оширилиши билан дастлабки ҳолатга қайтилади (осилиш ҳолати 1-2 сония давом этиши мумкин);

оёқларни 45° га кўтаришга рухсат этилади.

Ушбу машқни бажаришда оёқларни букиш ва кериш, танани ҳаракатсиз ҳолатда эгиш ҳамда оёқлар билан силтанма ҳаракатлар қилиш тақиқланади.

13. 3000 ва 1000 метрга югуриш машқлари стадионнинг югуриш йўлакчасида ёки қаттиқ қопламали текис жойларда, умумий ёки алоҳида старт берилган ҳолда ўтказилади.

Старт ва марра чизиқлари бир жойда белгиланиши мумкин.

Бунда, югуриш ҳудудидан чиқиб кетган ёки югуришдан юриш ҳолатига ўтган иштирокчи машқни бажармаган ҳисобланади.

14. Номзод томонидан куч ишлатиш машқлари комплексини бажаришда 1 дақиқа ичида 2 та машқ узлуксиз бажарилади.

Ҳар бир машқни бажариш учун 30 сониядан вақт ажратилади.

Биринчи машқни бажариш учун ажратилган 30 сония вақт тугаганлиги эълон қилинганда, номзод дарҳол иккинчи машқни бажаришга киришади.

Қуйидагилар биринчи машқни бажаришга қўйиладиган талаблар ҳисобланади:

чалқанча ётилади;

қўллар белда, тиззалар букилмаган ҳолда оёқлар тўпиқ қисмидан бошқа одам ёрдамида ушланади;

дастлабки ҳолатдан гавда олдинга кўтарилиб, қўллар оёқ учига теккандан сўнг, дастлабки ҳолатга қайтилади.

Ушбу машқни бажариш вақтида тиззаларни букиш ва шерик томонидан оёқларни қўйиб юбориш тақиқланади.

Қуйидагилар иккинчи машқни бажаришга қўйиладиган талаблар ҳисобланади:

таяниб ётилади, қўллар елка кенглигида тиззалар букилмаган ҳолатда бўлади;

қўллар букилиб ёзилади (бунда бел ҳамда елка қисмлари биргаликда ва текис тушиб чиқиши шарт);

қўллар букилиб тана ерга нисбатан параллел ҳолатга келтирилгандан сўнг, дастлабки ҳолатга қайтилади.

Ушбу машқни бажариш вақтида қўллар чала букилиб ёзилиши, бел ва елкалар ҳар хил тушиб чиқиши, тиззаларнинг ерга тегиши тақиқланади.

15. Мазкур методикада назарда тутилган машқларни бажариш тартибини бузган номзодга шу машқ бўйича қониқарсиз баҳо қўйилади.

16. Номзоднинг жисмоний тайёргарлик даражасини якуний баҳолаш қуйидагича амалга оширилади:

"аъло" - учта машқдан "аъло" баҳоланган ёки иккита машқдан "аъло" қолган машқдан "яхши" баҳоланган бўлса;

"яхши" - учта машқдан "яхши" баҳодан паст бўлмаган ёки иккита машқдан "яхши" ёки аъло, қолган машқдан эса "қониқарли" баҳоланган бўлса;

"қониқарли" - агар баҳоларнинг иккитаси "қониқарли" бўлиб, қониқарсиз баҳо бўлмаса;

"қониқарсиз" - агар баҳолардан бири "қониқарсиз" бўлса ёки номзод, жисмоний тайёргарлик машқларнинг биттасини бажаришдан воз кечган бўлса.

17. Номзодларнинг жисмоний тайёргарлик даражасини баҳолаш мазкур Методиканинг иловасига мувофиқ амалга оширилади. Бунда, ҳар бир машқни бажарганлиги учун олган баҳолар балларга ўгирилиб, белгиланган чегаравий меъёрлардан юқори натижа кўрсатган номзодларга қўшимча рағбат баллари тақдим этилади. Умумий тўпланиши мумкин бўлган максимал балл - 195 баллни ташкил этади.

18. Номзодларнинг жисмоний тайёргарлик даражасини баҳолаш учун натижалар баллар тизимида қуйидаги жадвалдаги мезонлар бўйича белгиланади:

   

Методикага

ИЛОВА

Номзодларнинг жисмоний тайёргарлик даражасини

БАҲОЛАШ МЕЗОНЛАРИ

1. Эркак жинсидаги номзодлар учун*:

 

*) Изоҳ: Мудофаа вазирлиги қўшинлари муддатли ҳарбий хизматчилари жисмоний тайёргарлик бўйича иккинчи ёш гуруҳига доир меъёрларни бажаради.

2. Аёл жинсидаги номзодлар учун:

Низомга

4-ИЛОВА

Номзодларнинг жисмоний тайёргарлик

даражасини баҳолаш натижалари бўйича

ҚАЙДНОМА

20__ йил "____" ____________.

Низомга

5-ИЛОВА

Номзодларни психологик ўрганишни ўтказиш

МЕТОДИКАСИ

1. Номзодлар махсус хонага ўзининг биометрик паспорти ёки идентификация ID-картаси ёхуд ҳарбий гувоҳномасини кўрсатган ҳолда киритилади.

2. Тест синовлари ўтказилаётган хонага жадвал, китоб, уяли телефон, компьютер, калькулятор, телекоммуникация воситалари ва шпаргалкалар олиб кириш тақиқланади.

3. Тест синовларини ўтказишни бошлашдан аввал комиссия аъзолари номзодларга тест синовларини ўтказиш тартибини тушунтириши шарт.

4. Номзодлар барча ҳаракатларни комиссия аъзолари кўрсатмаларига мувофиқ бажаради. Мазкур кўрсатмаларга амал қилмаган номзод хонадан чиқариб юборилади ва психологик ўрганиш иштирокчилари рўйхатидан ўчирилади.

5. Номзод бериладиган саволларга жавобларни белгилаш ҳамда вазифаларни бажариш орқали тест синовларидан ўтади.

Номзодлар билан тест тадбирлари якка тартибда ёки гуруҳ бўлиб ўтказилиши мумкин. Тест гуруҳ таркибида ўтказилганда, хонада номзодлар сони 40 нафардан ошмаслиги зарур.

Тест бошлангунга қадар номзодлар соғлиғининг ҳолати суриштирилади. Ўзини ёмон ҳис қилаётганидан шикоят қилган номзодлар шу куни тест синовига қўйилмайди. Бундай ҳолларда номзодга бошқа куни қайта тест синовидан ўтиш учун рухсат берилиши лозим.

6. Психологик ўрганиш давомида номзодларга икки қисмдан иборат бўлган тест асосида вазифалар берилади. Бунда, биринчи қисмда (интеллектуал ривожланганлик даражасини ўрганиш) ҳар бир тўғри жавоб учун 1 балл бериладиган 75 та топшириқдан иборат бўлган 4 та вазифа, иккинчи қисмда (психоэмоционал барқарорлик даражасини ўрганиш) ҳар бир тўғри жавоб учун 1 балл бериладиган 99 та саволдан, шунингдек жавобларнинг самимий ёки носамимийлигини аниқлаш йўналиши бўйича бериладиган 19 та саволдан иборат сўровнома қўлланилади.

Номзодга берилган вазифаларни бажариш учун 2 соат, шунингдек ҳар бир вазифа йўриқномасини ўқиб чиқиш учун қўшимча 30 дақиқадан вақт берилади.

7. Тест саволида машқнинг ўзига хослигидан келиб чиқиб жавоб вариантлари берилиши мумкин. Номзодлар тест саволларига жавоб вариантларини белгилашда жавоблар варақасидаги вариантлардан фақат битта тўғри жавобни белгилаши лозим.

8. Тест синовларини топшириш вақтида номзоднинг хонадан чиқиши тақиқланади, номзоднинг соғлиғи ёмонлашган ҳолатлар бундан мустасно. Тест синови тугагунга қадар хонани тарк этган номзод хонага такроран киритилмайди.

9. Тест синовларини ўтказиш вақтида синовлар ўтказилаётган хонада номзодлар ҳамда комиссия аъзоларидан ташқари бошқа шахсларнинг бўлиши тақиқланади.

10. Жавоблар тўғри белгиланиши учун номзод шахсан жавобгардир. Жавобларни нотўғри белгилаган номзодларнинг эътирози кўриб чиқилмайди.

11. Номзоднинг психологик тест саволларига берган жавоблари 2 кун ичида мазкур Методиканинг иловасига мувофиқ Психологик тест натижаларини ҳисоблаш жадвали асосида комиссия аъзолари томонидан ҳисоблаб чиқилади. Бунда, умумий тўпланиши мумкин бўлган максимал балл - 174 баллни ташкил этади.

Методикага

ИЛОВА

Психологик тест натижаларини ҳисоблаш

ЖАДВАЛИ

Низомга

6-ИЛОВА

Психологик тест синовлари натижалари бўйича

ҚАЙДНОМА

20__ йил "____" ____________

Низомга

7-ИЛОВА

                 

    

      

_____-сон БАЁННОМАСИ

      

Низомга

8-ИЛОВА

Контракт бўйича ҳарбий хизматга

номзодни ҳарбий-касбий саралаш

КАРТАСИ

Ҳарбий-касбий саралаш натижалари

Психологик ўрганиш натижаси:

Жисмоний тайёргарлик даражасини баҳолаш натижаси:

Рейтинг бали ва ўрни

Ҳарбий-касбий саралаш комиссиясининг қарори

Қонун ҳужжатлари маълумотлари миллий базаси (www.lex.uz),

2020 йил 16 март

"Ўзбекистон Республикаси қонун ҳужжатлари тўплами",

2020 йил 24 март, 11-сон, 123-модда