Ўзбекистон Республикаси Вазирлар Маҳкамасининг 17.03.2020 й. 164-сон "Жисмоний тарбия-соғломлаштириш ва спорт иншооти паспортини бериш бўйича давлат хизмати кўрсатишнинг маъмурий регламентини тасдиқлаш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

17.03.2020 й.

N 164

ЖИСМОНИЙ ТАРБИЯ-СОҒЛОМЛАШТИРИШ

ВА СПОРТ ИНШООТИ ПАСПОРТИНИ БЕРИШ

БЎЙИЧА ДАВЛАТ ХИЗМАТИ КЎРСАТИШНИНГ

МАЪМУРИЙ РЕГЛАМЕНТИНИ

ТАСДИҚЛАШ ТЎҒРИСИДА

Ўзбекистон Республикаси Президентининг "Давлат хизматлари кўрсатиш миллий тизимини янада комплекс ривожлантириш чоралари ҳақида" 2019 йил 15 февралдаги ПҚ-4193-сон қарори ижросини таъминлаш, шунингдек, жисмоний тарбия ва спорт соҳасида давлат хизматлари кўрсатиш тизимини такомиллаштириш мақсадида Вазирлар Маҳкамаси ҚАРОР ҚИЛАДИ:

1. Қуйидагиларни назарда тутувчи Жисмоний тарбия-соғломлаштириш ва спорт иншооти паспортини бериш бўйича давлат хизмати кўрсатишнинг маъмурий регламенти иловага мувофиқ тасдиқлансин ва 2020 йил 20 мартдан бошлаб амалга киритилсин:

биринчи - юридик шахсларга давлат хизматлари марказлари ва Ўзбекистон Республикаси Ягона интерактив давлат хизматлари портали (кейинги ўринларда - ЯИДХП) орқали жисмоний тарбия-соғломлаштириш ва спорт иншооти паспортини бериш бўйича давлат хизматини кўрсатиш тартибини белгилаш;

иккинчи - жисмоний тарбия-соғломлаштириш ва спорт иншоотлари паспортларини расмийлаштириш ва бериш ишларини амалга ошириш;

учинчи - жисмоний тарбия-соғломлаштириш ва спорт иншоотларини уларнинг техник ва эксплуатация кўрсаткичлари ҳамда жиҳозланганлигидан келиб чиққан ҳолда, тоифаларга таснифлашнинг асосий талаблари ва меъёрларини тасдиқлаш;

тўртинчи - жисмоний тарбия-соғломлаштириш ва спорт иншооти тоифасини тасдиқлаш ва паспортини беришни рад этиш асосларини белгилаш.

2. Ўзбекистон Республикаси Жисмоний тарбия ва спорт вазирлиги бир ой муддатда:

давлат хизматини кўрсатиш учун зарур ҳужжатлар ва бошқа ҳужжатларнинг намунавий шакллари, бланкалари ишлаб чиқилишини ҳамда Ўзбекистон Республикаси Адлия вазирлиги ҳузуридаги Давлат хизматлари агентлиги билан келишган ҳолда тасдиқланишини;

Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги "Электрон ҳукумат ва рақамли иқтисодиёт лойиҳаларини бошқариш маркази" давлат унитар корхонаси билан биргаликда Қорақалпоғистон Республикаси Жисмоний тарбия ва спорт вазирлиги, вилоятлар ва Тошкент шаҳар жисмоний тарбия ва спорт бошқармаларининг ЯИДХП орқали юборилган мурожаатларни кўриб чиқиш ва қайта ишлаш учун ахборот тизимига уланишини таъминласин.

3. Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги "Электрон ҳукумат ва рақамли иқтисодиёт лойиҳаларини бошқариш маркази" давлат унитар корхонаси "Uzinfocom" давлат ахборот тизимларини яратиш ва қўллаб-қувватлаш бўйича ягона интегратор" МЧЖ билан биргаликда икки ой муддатда:

жисмоний тарбия-соғломлаштириш ва спорт иншооти паспортини бериш бўйича давлат хизматини кўрсатиш ЯИДХП орқали жорий этилишини таъминласин;

ЯИДХПда давлат хизмати кўрсатилишининг ҳар бир босқичида мурожаатларнинг кўриб чиқилишини кузатиб бориш тартибини жорий этсин.

4. Ўзбекистон Республикаси Адлия вазирлиги ҳузуридаги Давлат хизматлари агентлиги:

давлат органлари ва бошқа ташкилотлар томонидан давлат хизматлари кўрсатилишининг белгиланган тартибига риоя этилиши бўйича уларнинг фаолияти юзасидан, жумладан, ЯИДХП орқали доимий назорат ўрнатсин;

ушбу қарор билан тасдиқланган давлат хизматини кўрсатиш бўйича маъмурий регламентнинг талабларини бузганлик учун давлат органлари ва бошқа ташкилотлар мансабдор шахсларига нисбатан белгиланган тартибда маъмурий жазолар қўлласин.

5. Ўзбекистон Республикаси Жисмоний тарбия ва спорт вазирлиги бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари - Ўзбекистон Республикаси Туризмни ривожлантириш давлат қўмитаси раиси А.А. Абдухакимов, Ўзбекистон Республикаси адлия вазири Р.Қ. Давлетов ҳамда Ўзбекистон Республикаси жисмоний тарбия ва спорт вазири Д.Х. Набиев зиммасига юклансин.

Ўзбекистон Республикасининг Бош вазири                                А. Арипов

Қонун ҳужжатлари маълумотлари миллий базаси (www.lex.uz),

2020 йил 18 март