Ўзбекистон Республикаси Вазирлар Маҳкамасининг 07.07.2020 й. 426-сон "Осиё тараққиёт банки иштирокида "Ўзбекистон Республикасида шаҳарларни ривожлантириш лойиҳаларини тайёрлашни молиялаштириш" лойиҳасини амалга ошириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

07.07.2020 й.

N 426

ОСИЁ ТАРАҚҚИЁТ БАНКИ ИШТИРОКИДА

"ЎЗБЕКИСТОН РЕСПУБЛИКАСИДА ШАҲАРЛАРНИ

РИВОЖЛАНТИРИШ ЛОЙИҲАЛАРИНИ ТАЙЁРЛАШНИ

МОЛИЯЛАШТИРИШ" ЛОЙИҲАСИНИ АМАЛГА ОШИРИШ

ЧОРА-ТАДБИРЛАРИ ТЎҒРИСИДА

Сув таъминоти ва канализация соҳасидаги инвестиция лойиҳаларининг лойиҳаолди ва лойиҳа ҳужжатларини ўз вақтида ва сифатли ишлаб чиқиш, шунингдек, Осиё тараққиёт банки билан ҳамкорликни кенгайтириш мақсадида Вазирлар Маҳкамаси ҚАРОР ҚИЛАДИ:

1. Қуйидагилар:

а) Осиё тараққиёт банки (кейинги ўринларда - ОТБ) билан Ўзбекистон Республикаси ўртасида 2019 йил 13 ноябрда "Ўзбекистон Республикасида шаҳарларни ривожлантириш лойиҳаларини тайёрлашни молиялаштириш" лойиҳасини (кейинги ўринларда - лойиҳа) амалга ошириш учун 5 йиллик имтиёзли даврни ўз ичига олган 25 йилда қайтариш шарти билан 15,0 млн АҚШ доллари миқдорида қарз бериш тўғрисида қарз битими имзоланганлиги;

б) лойиҳанинг умумий қиймати 16,76 млн АҚШ долларини, шу жумладан:

ОТБ қарзи - 15,0 млн АҚШ долларини;

лойиҳани амалга оширишда Ўзбекистон Республикасининг улуши солиқ имтиёзлари (қўшилган қиймат солиғи, давлат мақсадли жамғармаларига йиғимлар, шунингдек, Ўзбекистон Республикаси резидентлари бўлмаган юридик ва жисмоний шахсларни юридик ва жисмоний шахслардан олинадиган фойда солиғи тўлашдан озод этиш) ҳисобига - 1,76 млн АҚШ долларини;

в) лойиҳани амалга ошириш даври 4 йилни (2020-2023 йиллар) ташкил этиши маълумот учун қабул қилинсин.

2. Лойиҳа доирасида қуйидаги инвестиция лойиҳалари тайёрланади:

Тошкент вилояти шаҳар ва туманларининг ичимлик сув ва канализация тизимини реконструкция ва қуриш лойиҳаси (Фаза 3) - лойиҳа ташаббускори "Ўзсувтаъминот" акциядорлик жамияти;

Ичимлик сув ва оқова сув таъминотини ривожлантириш дастури - лойиҳа ташаббускори "Ўзсувтаъминот" акциядорлик жамияти;

Шаҳарларни комплекс ривожлантириш дастури - лойиҳа ташаббускори Инвестициялар ва ташқи савдо вазирлиги.

3. Қуйидагилар:

"Ўзбекистон Республикасида шаҳарларни ривожлантириш лойиҳаларини тайёрлашни молиялаштириш" лойиҳасининг асосий кўрсаткичлари 1-иловага мувофиқ;

"Ўзбекистон Республикасида шаҳарларни ривожлантириш лойиҳаларини тайёрлашни молиялаштириш" лойиҳаси бўйича Осиё тараққиёт банки қарзини қайтариш ва фоизларни тўлашнинг прогноз жадвали 2-иловага мувофиқ тасдиқлансин.

4. Белгилансинки:

а) "Ўзсувтаъминот" акциядорлик жамияти (кейинги ўринларда - "Ўзсувтаъминот" АЖ) ичимлик сув ва канализация соҳасидаги лойиҳаларнинг, Инвестициялар ва ташқи савдо вазирлиги ҳузуридаги Инвестиция лойиҳаларини ишлаб чиқиш маркази (кейинги ўринларда - Марказ) "Шаҳарларни комплекс ривожлантириш дастури" лойиҳасининг ўз вақтида амалга оширилиши, ОТБ қарзларидан мақсадли ва самарали фойдаланиши учун масъул бўлган ижро этувчи органлар ҳисобланади;

б) ОТБ қарзларини қайтариш ва фоизларни тўлаш билан боғлиқ харажатлар 2020 йилдан 2024 йилнинг 15 ноябрь санасигача ушбу қарорнинг 2-бандида назарда тутилган лойиҳалар бўйича олинган қарзлар ҳисобидан амалга оширилади.

Бунда, тегишли лойиҳаолди ҳужжатлари харажатлари ва Ҳукумат қарорларида назарда тутилган маблағлар (қарзни қоплаш ва фоизлар тўлаш) "Ўзсувтаъминот" АЖ, лойиҳаларнинг бошқа иштирокчилари ҳамда тегишли вилоятларнинг маҳаллий бюджетлари маблағлари ҳисобидан қопланади;

в) 2024 йилгача бўлган даврда лойиҳалар бўйича Ҳукумат қарори қабул қилинмаган тақдирда, ОТБ қарзларини қайтариш ва фоизларни тўлаш билан боғлиқ харажатлар тегишли инвестиция лойиҳаси бўйича 2024 йилдан лойиҳа ташаббускорлари учун ажратиладиган бюджет маблағлари ҳисобидан амалга оширилади.

5. Ўзбекистон Республикаси Адлия вазирлиги Ўзбекистон Республикаси ва ОТБ ўртасидаги қарз битими бўйича белгиланган тартибда юридик хулоса берсин.

6. Ўзбекистон Республикаси уй-жой коммунал хизмат кўрсатиш вазирлиги, "Ўзсувтаъминот" АЖ:

лойиҳанинг тасдиқланган параметрларига мувофиқ лойиҳа ўз вақтида ва сифатли амалга оширилишини таъминлайдиган ташкилий-техник тадбирларни амалга оширсинлар;

лойиҳани бошқариш қўлланмасида белгиланган тартибда лойиҳани амалга ошириш муддатларига қатъий риоя этилишини таъминласинлар.

7. "Ўзсувтаъминот" АЖга мазкур қарорнинг 2-бандида назарда тутилган Уй-жой коммунал хизмат кўрсатиш вазирлиги ташаббускор бўлган лойиҳаларни мувофиқлаштириш ва бошқариш вазифаси юклансин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари - инвестициялар ва ташқи савдо вазири С.У. Умурзаков ва Ўзбекистон Республикаси уй-жой коммунал хизмат кўрсатиш вазири М.Х. Салиев зиммасига юклансин.

Ўзбекистон Республикасининг Бош вазири                                 А. Арипов

Вазирлар Маҳкамасининг

2020 йил 7 июлдаги

426-сон қарорига

1-ИЛОВА

"Ўзбекистон Республикасида шаҳарларни

ривожлантириш лойиҳаларини тайёрлашни

молиялаштириш" лойиҳасининг

АСОСИЙ КЎРСАТКИЧЛАРИ

*) Лойиҳанинг якуний қиймат кўрсаткичлари батафсил лойиҳа-смета ҳужжатлари ишлаб чиқилгандан кейин ҳамда товарлар (ишлар ва хизматлар) етказиб бериш бўйича тендер савдолари натижаларига кўра белгиланади.

Вазирлар Маҳкамасининг

2020 йил 7 июлдаги

426-сон қарорига

2-ИЛОВА

"Ўзбекистон Республикасида шаҳарларни

ривожлантириш лойиҳаларини тайёрлашни

молиялаштириш" лойиҳаси бўйича Осиё тараққиёт

банки қарзини қайтариш ва фоизларни тўлаш

ПРОГНОЗ ЖАДВАЛИ

Қонун ҳужжатлари маълумотлари миллий базаси (www.lex.uz),

2020 йил 8 июль