Ўзбекистон Республикаси Вазирлар Маҳкамасининг 24.08.2020 й. 507-сон "Молиявий ҳисоботнинг халқаро стандартлари ва унга тушунтиришлар матнини тан олиш тартиби тўғрисидаги низомни тасдиқлаш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

24.08.2020 й.

N 507

МОЛИЯВИЙ ҲИСОБОТНИНГ

ХАЛҚАРО СТАНДАРТЛАРИ ВА УНГА

ТУШУНТИРИШЛАР МАТНИНИ ТАН ОЛИШ

ТАРТИБИ ТЎҒРИСИДАГИ НИЗОМНИ

ТАСДИҚЛАШ ҲАҚИДА

Ўзбекистон Республикаси Президентининг "Молиявий ҳисоботнинг халқаро стандартларига ўтиш бўйича қўшимча чора-тадбирлар тўғрисида" 2020 йил 24 февралдаги ПҚ-4611-сон қарори ижросини таъминлаш мақсадида Вазирлар Маҳкамаси ҚАРОР ҚИЛАДИ:

1. Қуйидагиларни назарда тутувчи Молиявий ҳисоботнинг халқаро стандартлари ва унга тушунтиришлар матнини тан олиш тартиби тўғрисидаги низом иловага мувофиқ тасдиқлансин:

Ўзбекистон Республикаси ҳудудида қўллаш учун молиявий ҳисоботнинг халқаро стандартлари ҳужжатларини экспертизадан ўтказиш;

молиявий ҳисоботнинг халқаро стандартлари ҳужжатларини экспертизадан ўтказиш бўйича экспертиза комиссиясини шакллантириш тартиби;

молиявий ҳисоботнинг халқаро стандартлари ҳужжатларини ушбу ҳужжатлардан фойдалананувчилар ва илмий жамоатчилик вакиллари билан муҳокама қилиш;

Ўзбекистон Республикаси ҳудудида молиявий ҳисоботнинг халқаро стандартлари ҳужжатларини жорий этиш тўғрисида қарор қабул қилиш.

2. Ўзбекистон Республикаси Молия вазирлиги бухгалтерлар ва аудиторларнинг республика жамоат бирлашмалари билан биргаликда халқаро экспертларни жалб қилган ҳолда, қуйидаги тадбирлар доимий равишда амалга оширилишини таъминласин:

молиявий ҳисоботнинг халқаро стандартлари ҳужжатлари матнидан давлат тили ва бошқа тилларда фойдаланишга рухсат олиш мақсадида молиявий ҳисоботнинг халқаро стандартлари фонди билан шартнома шартларини кўриб чиқиш;

молиявий ҳисоботнинг халқаро стандартлари ҳужжатларининг давлат тилидаги матнини мазкур ҳужжатлардан фойдаланувчилар, илмий жамоатчилик вакиллари билан муҳокама қилиш;

мутахассислар муҳокамалари натижасида келиб тушган таклифларни кўриб чиқиш ва зарурат бўлганда, давлат тилига таржима қилинган молиявий ҳисоботнинг халқаро стандартлари ҳужжатлари матнини қайта кўриб чиқиш;

халқаро ва маҳаллий экспертларни жалб қилган ҳолда, молиявий ҳисоботнинг халқаро стандартлари ҳужжатларини қўллаш амалиёти бўйича тизимли равишда семинар-тренинглар ўтказиш.

3. Ўзбекистон Республикаси Молия вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари - иқтисодий тараққиёт ва камбағалликни қисқартириш вазири Ж.А. Қўчқоров ва Ўзбекистон Республикаси молия вазири Т.А. Ишметов зиммасига юклансин.

Ўзбекистон Республикасининг Бош вазири                                                    А. Арипов

Қонун ҳужжатлари маълумотлари миллий базаси (www.lex.uz),

2020 йил 25 август