Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида Низом (ЎзР ВМ 05.04.2018 й. 264-сон қарорига илова)

Функция недоступна

Вазирлар Маҳкамасининг

2018 йил 5 апрелдаги

264-сон қарорига

ИЛОВА

Ўзгалар парваришига муҳтож бўлган ёлғиз

кексалар ва ногиронлиги бўлган шахсларнинг

рўйхатини шакллантириш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартибини белгилайди.

2. Ўзгалар парваришига муҳтож бўлган ёлгиз кексалар ва ногиронлиги бўлган шахсларнинг рўйхатини шакллантиришда ва уларни ижтимоий қўллаб-қувватлашни ташкил этишда қуйидаги асосий тамойилларга амал қилинади:

қонунийлик;

инсонпарварлик;

профилактик йўналтирилганлик;

аниқ йўналтирилганлик ва индивидуал ёндашув;

ижтимоий адолат.

3. Ўзгалар парваришига муҳтож бўлган ёлгиз кексалар ва ногиронлиги бўлган шахслар қуйидагича аниқланади:

уйма-уй юриш чоғида;

жисмоний ва юридик шахслар томонидан берилган ахборот асосида;

ижтимоий хизматларга муҳтож шахс мустақил равишда мурожаат этганда.

4. Ижтимоий қўллаб-қувватлашга муҳтож бўлган кам таъминланган оилалар рўйхатини шакллантириш ва уларни ижтимоий қўллаб-қувватлаш Ўзбекистон Республикаси Вазирлар Маҳкамасининг 2013 йил 15 февралдаги 44-сон қарори билан тасдиқланган Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисидаги Низом асосида амалга оширилади.

2-БОБ. ЎЗГАЛАР ПАРВАРИШИГА МУҲТОЖ

БЎЛГАН ЁЛҒИЗ КЕКСАЛАР ВА НОГИРОНЛИГИ

БЎЛГАН ШАХСЛАРНИНГ РЎЙХАТИНИ

ШАКЛЛАНТИРИШ ТАРТИБИ

5. Ўзгалар парваришига муҳтож бўлган ёлгиз кексалар ва ногиронлиги бўлган шахсларнинг рўйхатини шакллантириш ушбу Низомга 1-иловага мувофиқ схема бўйича амалга оширилади.

6. Туман (шаҳар) тиббий-ижтимоий хизматларни ривожлантириш бўлими фуқароларнинг ўзини ўзи бошқариш органлари билан биргаликда уйма-уй юриш чогида тўпланган ахборотга асосан ўзгалар парваришига муҳтож бўлган ёлгиз кексалар ва ногиронлиги бўлган шахсларни аниқлаб уларнинг рўйхатини тузади.

Ушбу рўйхатга ижтимоий қўллаб-қувватлашга муҳтож шахс, унинг оила аъзоси ёки ваколатли вакили мурожаати ёхуд жисмоний ва юридик шахслар томонидан берилган ахборот асосида ҳам қўшимча киритилади.

7. Ҳар ой якуни бўйича тузилган рўйхат туман (шаҳар) ҳокимлигига киритилади.

8. Туман (шаҳар) ҳокимлиги:

тақдим этилган ўзгалар парваришига муҳтож бўлган ёлғиз кексалар ва ногиронлиги бўлган шахслар тўғрисидаги рўйхатни беш иш куни мобайнида тасдиқлайди;

тасдиқланган рўйхат асосида кўрсатилаётган хизматлар тури бўйича реестр тузади ҳамда уч иш куни мобанида туман (шаҳар) тиббий-ижтимоий хизматларни ривожлангтириш бўлимига ва молия бўлимига ижро этиш учун юборади.

9. Туман (шаҳар) тиббий-ижтимоий хизматларни ривожлантириш бўлими туман (шаҳар) ҳокимлиги томонидан тасдиқланган рўйхат асосида тегишли штат бирликлари, ижтимоий хизмат харажатларининг ҳисоб-китобини беш иш куни мобайнида ишлаб чиқиб, туман (шаҳар) молия бўлимига юборади.

10. Туман (шаҳар) молия бўлими тақдим этилган рўйхатлар ва ҳисоб-китоблар асосида туман (шаҳар) тиббий-ижтимоий хизматларни ривожлантириш бўлимининг тегишли штат бирликларини ва харажатлар сметасини белгиланган тартибда кўриб чиқади ва ҳар йилнинг 1 апрелига қадар рўйхатдан ўтказади.

Йил давомида ўзгалар парваришига муҳтож бўлган ёлғиз кексалар ва ногиронлиги бўлган шахслар рўйхатига қўшимчалар киритилганда, харажатларнинг молиялаштириш манбаи аниқлангандан сўнг, уч иш куни мобайнида харажатлар сметасига ўзгартириш киритилади.

11. Туман (шаҳар) тиббий-ижтимоий хизматларни ривожлантириш бўлими рўйхатдан ўтказилган харажатлар сметаси доирасида белгиланган тартибда тегишли ижтимоий хизматлар кўрсатади.

3-БОБ. НОГИРОНЛИГИ БЎЛГАН ШАХСЛАРНИНГ

РЎЙХАТИНИ ШАКЛЛАНТИРИШ ТАРТИБИ

12. Ногиронлиги бўлган шахсларнинг рўйхатини шакллантириш ушбу Низомга 2-иловага мувофиқ схема бўйича амалга оширилади.

13. Туман (шаҳар) тиббиёт бирлашмаси участка врачи уйма-уй юриш чогида аниқлаган, касалликка чалинган шахсларга даволаш-профилактика муассасасининг тегишли мутахассисларига бир иш куни мобайнида йўлланма беради.

Ушбу йўлланмани туман (шаҳар) тиббиёт бирлашмаси участка врачи касалликка чалинган шахс, унинг оила аъзоси ёки ваколатли вакили мурожаати ёхуд жисмоний ва юридик шахслар томонидан берилган ахборот асосида ҳам касалликка чалинган шахсларга даволаш-профилактика муассасасининг тегишли мутахассисларига йўлланма бериши мумкин.

14. Даволаш-профилактика муассасасидаги тегишли мутахассис касалликка чалинган шахсни касаллик туридан келиб чиқиб, бир ой мобайнида белгиланган тартибда Тиббий-маслаҳат комиссиясига касалликка чалинган шахснинг ҳужжатларини тайёрлаб юборади.

15. Тиббий-маслаҳат комиссияси раиси ёки масъул шахси касалликка чалинган шахснинг хужжатларини касаллик турига кўра белгиланган муддатларда расмийлаштириб, туман, туманлараро, шаҳар ва ихтисослаштирилган тиббий-ижтимоий эксперт комиссияларига (кейинги ўринларда ТИЭК деб аталади) тақдим этади.

16. ТИЭКлар ҳужжатлар қабул қилинган кундан бошлаб икки ҳафта мобайнида ногиронлик гуруҳи, сабаби ва муддатини белгилайди.

ТИЭК маълумотноманинг бир қисмини ногиронлиги бўлган шахсга ёки унинг вакилига, иккинчи қисмини Молия вазирлиги ҳузуридаги бюджетдан ташқари Пенсия жамгармасига ўн кун мобайнида тақдим этади.

17. Ногиронлиги бўлган шахсларнинг кўрик ишларидаги маълумотлари уч иш куни мобайнида "ТИЭК дастури"га тегишли ТИЭК врач-эксперти ва ҳамшираси томонидан киритилади.

"ТИЭК дастури" бўйича ногиронлиги бўлган шахслар рўйхати ҳар ойда бир марта шакллантирилади.

18. Молия вазирлиги ҳузуридаги бюджетдан ташқари Пенсия жамгармасининг тегишли туман (шаҳар) бўлими томонидан ногиронлиги бўлган шахс ёки унинг ваколатли вакилининг ногиронлик пенсияси (нафақа) олиш учун аризаси ва пенсия тайинлаш тўгрисидаги ҳужжатлари тақдим этилгандан сўнг ўн кундан кечиктирмасдан пенсия тайинлаш масаласи кўриб чиқилади.

Пенсия тайинлаш рад этилган такдирда, тегишли қарор чиқарилгандан кейин беш кун мобайнида аризачига ёки унинг ваколатли вакилига пенсия тайинлаш рад этилгани ҳақида рад этиш сабаблари ва шикоят бериш тартиби кўрсатилган хабарномани беради ёки жўнатади ҳамда айни чогда барча ҳужжатларни қайтаради.

4-БОБ. ЯКУНЛОВЧИ ҚОИДА

19. Мазкур Низом талаблари бузилишида айбдор бўлган шахслар қонун ҳужжатларига мувофиқ жавоб берадилар.

Низомга

1-ИЛОВА

Ўзгалар парваришига муҳтож бўлган ёлғиз кексалар

ва ногиронлиги бўлган шахсларнинг

рўйхатини шакллантириш

СХЕМАСИ

Низомга

2-ИЛОВА

Ногиронлиги бўлган шахсларнинг

рўйхатини шакллантириш

СХЕМАСИ

Қонун ҳужжатлари маълумотлари миллий базаси (www.lex.uz),

2018 йил 5 апрель