2021-2025 йилларда фуқаролик жамиятини ривожлантириш Концепцияси (ЎзР Президентининг 04.03.2021 й. ПФ-6181-сон Фармонига 1-илова)

Функция недоступна

Ўзбекистон Республикаси

Президентининг

2021 йил 4 мартдаги

ПФ-6181-сон Фармонига

1-ИЛОВА

2021-2025 йилларда фуқаролик

жамиятини ривожлантириш

КОНЦЕПЦИЯСИ

1-БОБ. УМУМИЙ ҚОИДАЛАР

2021-2025 йилларда фуқаролик жамиятини ривожлантириш концепциясининг (кейинги ўринларда - Концепция) мақсади мамлакатимизда эркин фуқаролик жамиятини янада ривожлантириш, инсон ҳуқуқлари ва қонуний манфаатларини, демократик қадриятларни ҳимоя қилиш, аҳолининг сиёсий маданияти ва ҳуқуқий онгини ошириш, давлат органлари ва нодавлат нотижорат ташкилотлари ўртасида ижтимоий шериклик муносабатларини ҳамда долзарб масалаларни ҳал этишда ҳамкорлигини кучайтириш, республикада барча соҳаларда амалга оширилаётган ислоҳотларда нодавлат нотижорат ташкилотларининг ташаббускорлиги ва фаоллигини ошириш ҳисобланади.

Концепция фуқаролик жамиятини ривожлантиришнинг устувор йўналишлари, вазифалари, ўрта ва узоқ муддатли истиқболдаги ривожланиш босқичларини белгилаб беради ҳамда соҳага оид мақсадли дастурлар ва "Йўл хариталари"ни ишлаб чиқиш учун асос бўлади.

2-БОБ. ФУҚАРОЛИК ЖАМИЯТИНИ

РИВОЖЛАНТИРИШНИНГ УСТУВОР

ЙЎНАЛИШЛАРИ

I. Фуқаролик жамиятини ривожлантиришнинг ҳуқуқий асосларини изчил такомиллаштириш.

Бу борада қуйидаги ишлар амалга оширилиши лозим:

1) "фуқаролик жамияти" ва "фуқаролик жамияти институтлари" тушунчаларининг ҳуқуқий асосларини мустаҳкамлаш ҳамда уларнинг ташкилий-ҳуқуқий шаклларини такомиллаштириш;

2) фуқаролик жамияти институтларининг ижтимоий-иқтисодий масалаларни ҳал қилиш ҳамда жамият ривожланишига қўшган ҳиссасини инобатга олган ҳолда уларнинг фаолиятини баҳолаш мезонлари ва методологиясини ишлаб чиқиш;

3) оммавий ахборот воситалари, журналистлар ва блогерлар фаолиятига оид қонун ҳужжатларини қайта кўриб чиқиш, уларни тўғридан-тўғри амал қиладиган қонун ҳужжатига унификация қилиш;

4) "Ахборот олиш кафолатлари ва эркинлиги тўғрисида"ги, "Ахборот эркинлиги принциплари ва кафолатлари тўғрисида"ги, "Ахборотлаштириш тўғрисида"ги ҳамда "Давлат ҳокимияти ва бошқаруви органлари фаолиятининг очиқлиги тўғрисида"ги қонунлар нормаларини ўзаро бирлаштирган ҳолда соҳадаги бўшлиқларни бартараф қилиш ва тўғридан-тўғри амал қиладиган қонун ҳужжатига унификация қилиш;

5) оммавий ахборот воситаларининг фаолияти йўналишлари билан боғлиқ барча давлат хизматларини электрон шаклга ўтказиш;

6) нодавлат нотижорат ташкилотларининг рўйхатга олувчи орган билан боғлиқ барча давлат хизматларини электрон шаклга ўтказиш;

7) фуқаролик жамиятини илмий-назарий ўрганувчи, унинг ривожланишини доимий таҳлил қилиб борувчи таҳлилий, илмий-ўқув лабораторияларни (ақл марказларини) ташкил этиш;

8) фуқаролик жамияти ривожланиши масалалари бўйича амалий ва фундаментал тадқиқотлар ўтказиш;

9) нодавлат нотижорат ташкилотлари ва фуқаролик жамиятининг бошқа институтлари вакилларини қайта тайёрлаш ва малакасини ошириш курсларини ташкил этиш;

10) касаба уюшмаларини давлат рўйхатидан ўтказишда уларнинг аъзолари сонига қўйилган талабни қайта кўриб чиқиш, касаба уюшмалари томонидан касбий манфаатлари билан боғлиқ бўлган, уларнинг меҳнатга оид, бошқа ижтимоий-иқтисодий ҳуқуқ ва манфаатларини ифодалаш ҳамда ҳимоя қилиш бўйича ҳуқуқларини янада кенгайтириш;

11) Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондларини маҳаллий бюджетдан молиялаштиришни ҳуқуқий тартибга солиш;

12) фуқаролик жамияти институтларининг Ахлоқ кодексларини ишлаб чиқиш ва тасдиқлаш;

13) фуқаролик жамияти институтларининг фаолиятини бевосита тартибга солувчи ҳамда уларнинг ҳуқуқлари ва қонуний манфаатларига дахл қилувчи қонуности ҳужжатларини юқори юридик кучга эга бўлган меъёрий-ҳуқуқий ҳужжат шаклига ўтказиш;

14) фуқаролик жамияти институтларини рўйхатдан ўтказиш ва хорижий манбалардан пул маблағларини олиш билан боғлиқ муносабатларни соддалаштириш, бюрократик тўсиқларни бекор қилиш;

15) Ҳуқуқ ҳимоячилари ҳақидаги декларация ва бошқа халқаро ҳужжатларни таҳлил қилиш, умумлаштириш ҳамда улар асосида ҳуқуқ ҳимоячилари фаолиятининг ҳуқуқий асосларини такомиллаштириш;

16) сиёсий партияларнинг ролини ошириш мақсадида халқ депутатлари вилоят, туман ва шаҳар Кенгашларининг маҳаллий ҳокимликлардан тўлақонли мустақиллигини таъминлаш.

II. Фуқаролик жамияти институтларига кўмак бериш ҳамда уларни давлат томонидан қўллаб-қувватлаш механизмини янада такомиллаштириш.

Бу борада қуйидаги ишлар амалга оширилиши лозим:

1) фуқаролик жамияти институтларига бюджет маблағларини аниқ ижтимоий мақсадларни кўзлаган ҳолда ажратиш механизмини ҳамда улардан фойдаланишнинг самарадорлигини аниқлаш бўйича индикаторлар ишлаб чиқиш;

2) ижтимоий йўналтирилган лойиҳаларни фуқаролик жамияти институтларига давлат гранти шаклидан аниқ йўналтирилган ижтимоий буюртма бериш орқали молиялаштириш амалиётини кенгайтириш;

3) давлат бошқаруви органлари томонидан бажарилаётган вазифа ва функцияларни фуқаролик жамияти институтлари орқали амалга ошириш миқдорини кўпайтириш;

4) Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан маблағлар ажратилишини тартибга солувчи ҳужжатларни норматив-ҳуқуқий ҳужжат сифатида қабул қилиш ва такомиллаштириш;

5) Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди ҳамда Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондларининг ташкилий тузилмасини такомиллаштириш, улар томонидан фуқаролик жамияти институтларига маблағлар ажратиш бўйича лойиҳаларни танлаш ҳамда улардан фойдаланишнинг самарадорлигини мониторинг қилишда жамоат фондининг ижрочи раҳбар органи масъулиятини ошириш;

6) "Фуқаролик жамияти асослари" фани бўйича ўқув дастурлари ва қўлланмаларини тайёрлаш, унинг асосида давлат органлари ва фуқаролик жамияти институтлари вакиллари учун доимий равишда махсус ўқув курсларини ташкил этиш;

7) Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссиясининг ролини соҳавий ва ҳудудий молиялаштиришда кенгайтириш;

8) фуқаролик жамияти институтлари билан ҳамкорликда уларнинг ҳуқуқлари ва қонуний манфаатлари ҳимоясини таъминлаш билан боғлиқ масалалар юзасидан давлат органлари раҳбарларининг жамоатчилик эшитувини Жамоатчилик палатаси ва ҳудудий жамоатчилик палаталари томонидан ҳар йили ташкил этиш амалиётини жорий этиш;

9) фуқаролик жамияти институтларини фаолиятининг самарадорлиги нуқтаи назаридан шартли гуруҳларга ажратиш мезонини ишлаб чиқиш ва уларга тоифасидан келиб чиқиб имтиёзлар белгилаш;

10) фуқаролик жамияти институтлари таъсис ҳужжатларида кўрсатилмаган ҳар қандай тадбиркорлик фаолияти тури билан шуғулланиши мумкинлигининг ҳуқуқий асосини мустаҳкамлаш;

11) фуқаролик жамияти институтлари фаолиятининг самарадорлигини ошириш, фаолият қамровини кенгайтириш, шунингдек, уларнинг молиявий таъминотини мустаҳкамлаш;

12) фуқаролик жамияти институтларининг ихтисослашувини қўллаб-қувватлаш, соҳавий нодавлат нотижорат ташкилотларининг уюшмаларини ташкил қилишни рағбатлантириш.

III. Давлат ва жамият бошқарувида фуқаролик жамияти институтларининг фаол иштирок этиши учун зарур шарт-шароитлар яратиш.

Бу борада қуйидаги ишлар амалга оширилиши лозим:

1) қонун ҳужжатлари лойиҳаларини ишлаб чиқишнинг барча босқичида, шу жумладан Вазирлар Маҳкамасига киритиш жараёнида нодавлат нотижорат ташкилотлари иштирокининг ҳуқуқий асосларини такомиллаштириш;

2) жамоатчилик назоратини амалга оширувчи фуқаролик жамияти институтлари, шу жумладан давлат органлари ҳузуридаги жамоатчилик кенгашлари томонидан мониторингни амалга оширишнинг аниқ механизмларини жорий қилиш ҳамда жамоатчилик назорати тўғрисидаги қонун ҳужжатларини бузганлик учун жавобгарликни белгилаш билан боғлиқ ҳуқуқий бўшлиқларни бартараф этиш;

3) фуқаролик жамияти институтларининг муҳим сиёсий, ижтимоий ва иқтисодий дастурлар ишлаб чиқилишида иштирок этиши ва уларнинг ижроси устидан мониторинг олиб боришнинг ҳуқуқий механизмларини яратиш;

4) ёшлар, болалар, бандлик, хотин-қизлар, нуронийлар, атроф-муҳит муаммолари билан шуғулланувчи нодавлат нотижорат ташкилотлари ташкил этилишини қўллаб-қувватлаш;

5) қонун ҳужжатлари ва давлат дастурларида белгиланган чора-тадбирларнинг ижросини барча учун очиқ бўлган онлайн кузатиб бориш тизимини жорий қилиш;

6) давлат органларининг фаолияти самарадорлигини баҳолаб бориш, давлат дастурлари ижроси ҳамда давлат органлари фаолияти юзасидан ҳисоботларни тайёрлашда нодавлат нотижорат ташкилотлари, фуқаролик жамиятининг бошқа институтларини кенг жалб этиш бўйича давлат дастурларини ишлаб чиқиш;

7) давлат органлари ҳузуридаги жамоатчилик кенгашлари томонидан ўз вазифаларини амалга оширишнинг ўзаро манфаатдор ва амалий механизмларини яратиш;

8) жамоатчилик назорати, давлат бошқаруви ва ижтимоий лойиҳаларни амалга оширишда фуқаролик жамияти институтлари иштироки даражасини ошириш, шунингдек, давлат органларининг очиқлиги ва ошкоралигини янада кенгроқ таъминлаш.

IV. Давлат ижтимоий лойиҳаларини амалга оширишда фуқаролик жамияти институтларининг иштирокини янада кенгайтириш.

Бу борада қуйидаги ишлар амалга оширилиши лозим:

1) маҳаллий бюджетлар харажатларининг йўналишларини белгилаш ва уларнинг ижросини назорат қилишда фуқаролик жамияти институтларининг иштирок этиш механизмларини жорий қилиш;

2) тасарруф этилиши тақиқланган ҳолда ижтимоий ва ҳомийлик мақсадларида доимий равишда фойдаланиш (эгалик қилиш) учун шу йўналишларда ташкил қилинган ташкилотларга ўтказилиши назарда тутилган "ижтимоий йўналтирилган мол-мулк институти"нинг ҳуқуқий асосларини жорий қилиш;

3) давлат органлари томонидан фуқаролик жамияти институтларига бюджетдан ташқари маблағлари ҳисобидан бевосита давлат ижтимоий буюртмасини бериш миқдори ва ҳажмини ошириш;

4) "давлат + фуқаролик жамияти институтлари + тадбиркорлик субъектлари" тамойили асосида ижтимоий лойиҳаларни амалга ошириш механизмини янада такомиллаштириш;

5) волонтёрлик фаолиятини йўналтириш, мувофиқлаштириш, қўллаб-қувватлаш ва рағбатлантириш, ҳисобга олиш механизмларини ишлаб чиқиш, давлат органларининг вазифа ва функцияларини волонтёрлик орқали нисбатан самарали ва тежамкор шаклда бажариш амалиётини жорий қилиш;

6) йирик корхоналарнинг корпоратив волонтёрлик фаолиятини ташкил этишда услубий, ахборот, маслаҳат ва ташкилий жиҳатдан кўмаклашиш ҳамда қўллаб-қувватлашнинг ташкилий ва ҳуқуқий асосларини мустаҳкамлаш;

7) Бирлашган Миллатлар Ташкилотининг волонтёрлик дастурида Ўзбекистон фуқароларининг иштирокини кенгайтириш;

8) БМТ Глобал кун тартибининг Барқарор ривожланиш мақсадларини изчил амалга оширишда нодавлат нотижорат ташкилотларини кенг жалб қилиш.

V. Фуқаролик жамияти институтлари фаолиятининг очиқлигини таъминлаш.

Бу борада қуйидаги ишлар амалга оширилиши лозим:

1) нодавлат нотижорат ташкилотларига ажратилган субсидиялар, грантлар ва ижтимоий буюртмалар маблағлари ишлатилиши ҳамда уларнинг ўз мол-мулки ва пул маблағларидан фойдаланиши жараёнининг ошкоралигини таъминлаш бўйича "Openness of non-governmental non-profit organizations" - "Очиқлик стандарти"ни жорий этиш;

2) давлат органлари ходимларининг фуқаролик жамияти институтлари вакиллари билан бевосита электрон алоқа воситалари орқали тезкорлик мулоқотини йўлга қўйиш;

3) фуқаролик жамияти институтлари томонидан ижтимоий аҳамиятга молик лойиҳаларни амалга ошириш жараёнида "краудфандинг институти" имкониятидан фойдаланиш механизмини яратиш;

4) волонтёрлик фаолияти ҳисобини олиб бориш ва йўналтириш имконини таъминловчи ягона интерактив портал яратиш.

3-БОБ. КОНЦЕПЦИЯНИ АМАЛГА ОШИРИШДАН

КУТИЛАЁТГАН НАТИЖАЛАР

Концепцияда белгиланган вазифаларни бажариш орқали фуқаролик жамиятини ривожлантиришда қуйидаги натижаларга эришиш назарда тутилмоқда:

фуқаролик жамияти институтлари билан самарали ҳамкорлик йўлга қўйилади;

фуқаролик жамияти институтларига ажратилган субсидиялар, грантлар ва ижтимоий буюртмаларни ишлатиш самарадорлиги, шунингдек, уларнинг ўз мол-мулки ва пул маблағларидан фойдаланиши жараёнининг ошкоралиги таъминланади;

фуқаролик жамияти илмий-назарий жиҳатдан чуқур ўрганилиб, унинг ривожланиши доимий таҳлил қилиб борилади;

фуқаролик жамияти институтлари вакилларининг ахборот-маърифий салоҳияти ва демократик кўникмалари ошириб борилади;

қонун ҳужжатлари лойиҳаларини ишлаб чиқишнинг барча босқичларида нодавлат нотижорат ташкилотларининг иштироки ҳуқуқий жиҳатдан мустаҳкамланади;

оммавий ахборот воситалари соҳасидаги ҳуқуқий база такомиллаштирилади, шунингдек, халқ депутатлари маҳаллий Кенгашларининг роли оширилади;

жамоатчилик назоратини таъсирчан амалга ошириш ишлари жадаллаштирилади;

волонтёрлик ва ҳомийлик фаолияти ривожлантирилади.

Қонун ҳужжатлари маълумотлари миллий базаси (www.lex.uz),

2021 йил 4 март