ВСЕ ЗАКОНОДАТЕЛЬСТВО УЗБЕКИСТАНА

ЎзР Конунчилиги / Хўжалик ва тадбиркорлик фаолиятининг умумий масалалари / Тадбиркорлик субъектларини давлат томонидан қўллаб-қувватлаш ва ҳимоя ҳилиш /

Ўзбекистон Республикаси Президентининг 20.04.2021 й. ПФ-6208-сон "Ёшларнинг тадбиркорлик фаолиятини қўллаб-қувватлаш ва бандлигига кўмаклашиш, уларни ижтимоий ҳимоя қилиш ҳамда бўш вақтини мазмунли ташкил этишга оид қўшимча чора-тадбирлар тўғрисида"ги Фармони

Функция недоступна

Данная функция доступно только для клиентов (пользователей)

Полный текст документа доступен в платной версии. По вопросам звоните на короткий номер 1172

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

20.04.2021 й.

N ПФ-6208



ЁШЛАРНИНГ ТАДБИРКОРЛИК

ФАОЛИЯТИНИ ҚЎЛЛАБ-ҚУВВАТЛАШ

ВА БАНДЛИГИГА КЎМАКЛАШИШ, УЛАРНИ

ИЖТИМОИЙ  ҲИМОЯ  ҚИЛИШ  ҲАМДА  БЎШ

ВАҚТИНИ МАЗМУНЛИ ТАШКИЛ ЭТИШГА ОИД

ҚЎШИМЧА ЧОРА-ТАДБИРЛАР ТЎҒРИСИДА


Ёшларни қўллаб-қувватлаш тизимини янада такомиллаштириш, уларнинг бандлигига кўмаклашиш, тадбиркорлик ғоя ва ташаббусларини рағбатлантириш, улар муносиб даромад олиши учун қўшимча шароитлар яратиш, бу борада олиб борилаётган ишларни янги босқичга олиб чиқиш, шунингдек, 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини "Ёшларни қўллаб-қувватлаш ва аҳоли саломатлигини мустаҳкамлаш йили"да амалга оширишга оид давлат дастури ижросини таъминлаш мақсадида:


1. Ёшларни тадбиркорликка жалб қилиш, уларни доимий иш билан банд қилиш, қўшимча даромад олиши учун қулай шарт-шароитлар яратиш бўйича қуйидаги тартиб жорий қилинсин, унга мувофиқ:

а) 2021 йил 1 майдан бошлаб:

2023 йил 1 январга қадар иш берувчиларга (бюджет ташкилотлари, давлат корхоналари, устав жамғармаси (капитали)да давлат улуши 50 фоиз ва ундан ортиқ бўлган юридик шахслар бундан мустасно) улар томонидан 25 ёшдан ошмаган ходимлар учун тўланган ижтимоий солиқ суммаси Давлат бюджетидан тўлиқ қайтариб берилади. Бунда, ижтимоий солиқ суммаси ёш ходимлар олти ой давомида узлуксиз меҳнат фаолиятини амалга ошириши шарти билан еттинчи ойдан бошлаб қайтарилади;

"Ёшлар дафтари"га киритилган ёшларга тадбиркорлик фаолиятини бошлаш ва ўзини ўзи банд қилишга зарур бўлган асбоб-ускуналар ва меҳнат қуролларини харид қилиш учун базавий ҳисоблаш миқдорининг 40 бараваридан кўп бўлмаган миқдорда "Ёшлар дафтари" жамғармалари ҳисобидан субсидия ажратилади;

"Ёшлар дафтари"га киритилган ишсиз ёшларни ишга қабул қилган тадбиркорлик субъектларига давлат мулкини ижарага олишда ижара тўловларидан 1-иловага мувофиқ имтиёзлар тақдим этилади;

б) 2021 йил 1 июндан бошлаб:

"Ёшлар дафтари"га киритилган тадбиркорлик фаолиятини бошлаш учун бино ва иншоотларни ижарага олган ёш тадбиркорларга бир йиллик ижара харажатларининг 30 фоизи, бироқ базавий ҳисоблаш миқдорининг 25 бараваригача бўлган миқдори "Ёшлар дафтари" жамғармалари ҳисобидан компенсация қилинади;

профессионал таълим ташкилотларида таҳсил олаётган "Ёшлар дафтари"га киритилган ёшларга улар ишлаб-чиқариш ёки хизмат кўрсатиш корхоналарида амалиёт ўтаган вақтида, бироқ олти ойдан кўп бўлмаган муддатда профессионал таълим ташкилотлари томонидан Давлат бюджети маблағлари ҳисобидан базавий ҳисоблаш миқдорининг икки баравари миқдорида ҳар ойлик субсидия ажратилади.


2. Молия вазирлиги (Т.А. Ишметов) икки ҳафта муддатда ўзи, йигирма олти ёшга тўлмаган фарзандлари ёки эри (хотини) профессионал таълим муассасаларида таълим олиши учун йўналтириладиган солиқ тўловчининг иш ҳақи ва бошқа даромадлари суммасини жисмоний шахслардан олинадиган даромад солиғидан озод қилишни назарда тутувчи қонун лойиҳасини Вазирлар Маҳкамасига киритсин.


3. Белгилансинки, ёшларнинг бўш вақтларини мазмунли ўтказиш учун қулай шарт-шароитлар яратиш ҳамда уларнинг ижтимоий ҳимоясини кучайтириш мақсадида:

а) 2021 йил 1 июндан бошлаб:

АТ "Халқ банки", АТ "Алоқа банк" ва "Микрокредитбанк" АТБ томонидан "Бир миллион дастурчи" лойиҳаси доирасида ўқув курсларини муваффақиятли тугатган ва сертификат олган ёшларга компьютер (шу жумладан, Ўзбекистон Республикасида ишлаб чиқарилмаган) харидлари учун базавий ҳисоблаш миқдорининг 25 бараваридан кўп бўлмаган миқдорда истеъмол кредитлари ва микроқарзлар ажратилади. Бунда, истеъмол кредитлари ва микроқарзлар бўйича фоиз тўловлари Давлат бюджетидан Ёшлар ишлари агентлигига ажратилган маблағлар ҳисобидан компенсация қилинади;

"Ёшлар дафтари"га киритилган ёшларнинг хорижий тиллар ва умумтаълим фанлари бўйича нодавлат таълим ташкилотларида ўқиш харажатларининг 50 фоизи, бироқ умумий ҳисобда базавий ҳисоблаш миқдорининг 5 бараваригача бўлган миқдори ҳамда улар бўйича миллий сертификатлар олиш учун ўтказиладиган имтиҳонларни топшириш харажатлари Ёшлар ишлари агентлигига Давлат бюджетидан ажратилган маблағлар ҳисобидан компенсация қилинади;

"Меҳрибонлик" уйлари тарбияланувчилари ҳамда "Ёшлар дафтари"га киритилган ёшларнинг ҳайдовчилик курсларида ўқиш харажатлари базавий ҳисоблаш миқдорининг 4 баравари миқдоригача ва сафарбарлик чақируви резерви хизмати бадали Давлат бюджетидан Ёшлар ишлари агентлигига ажратилган маблағлар ҳисобидан қопланади;

хусусий корхона ва ташкилотларга ишга қабул қилинган ҳамда фаолият бошлаганига олти ойдан ошмаган "Ёшлар дафтари"га киритилган ёшларни қайта тайёрлов курсларида ўқитиш билан боғлиқ бўлган харажатларнинг базавий ҳисоблаш миқдорининг 4 бараваригача бўлган қисми мазкур хусусий корхона ва ташкилотларга Давлат бюджетидан Ёшлар ишлари агентлигига ажратилган маблағлар ҳисобидан компенсация қилинади;

б) 2021 йил 1 майдан бошлаб ётоқхона билан қамраб олинмаган ва ўзига, шу жумладан ота-онаси (қонуний вакиллари)га тегишли бўлмаган уйда ижара ҳуқуқи асосида яшайдиган давлат олий таълим муассасалари талабаларининг 60 фоизига улар томонидан тўланадиган ойлик ижара тўловининг 50 фоизи Давлат бюджети ҳисобидан қоплаб берилади. Бунда:

ижара тўловининг қоплаб бериладиган қисми Тошкент шаҳрида - базавий ҳисоблаш миқдорининг 1 баравари, қолган ҳудудларда - базавий ҳисоблаш миқдорининг 0,5 бараваридан ошмаслиги лозим;

ижара тўловининг қоплаб бериладиган қисми биринчи навбатда эҳтиёжманд оила фарзандларига, ўрнак кўрсатган ва фаол талабалар учун қоплаб берилади;

олий таълим муассасалари томонидан уларнинг бюджетдан ташқари маблағлари ҳисобидан ижара ҳуқуқи асосида яшайдиган бошқа талабаларга ҳам ойлик ижара тўловининг бир қисми қоплаб берилиши мумкин.

5. АТ "Халқ банки"нинг ҳудудларда хотин-қизларни тадбиркорликка кенг жалб этиш, уларни бизнесга тайёрлаш, маслаҳат бериш ва бандлигини таъминлаш мақсадида "Юз минг тадбиркор хотин-қизлар" лойиҳасини амалга ошириш ҳамда лойиҳа доирасида қуйидагилар тўғрисидаги таклифлари маъқуллансин:

ҳудудларнинг ижтимоий-иқтисодий салоҳияти, ихтисослашуви ва бошқа хусусиятларини инобатга олиб, қиймати 33 миллион сўмгача бўлган тайёр бизнес-режалар банкини яратиш;

ўттиз ёшгача бўлган хотин-қизларнинг қизиқишларидан келиб чиққан ҳолда, мос йўналишлар бўйича (ошпазлик, қандолатчилик, сартарошлик ва бошқалар) малакали мутахассислар иштирокида маҳорат дарслари ва ўқув тренингларни ташкил этиш.


6. Ёшлар ишлари агентлигида юридик шахс мақомига эга бўлмаган Ёшларга оид давлат сиёсатини қўллаб-қувватлаш жамғармаси ташкил этилсин ва унинг даромадларини шакллантириш манбалари этиб қуйидагилар белгилансин:

Давлат бюджетидан ажратиладиган маблағлар;

Ёшлар ишлари агентлиги ва унинг ҳудудий бўлинмалари ҳузуридаги корхона, муассаса ва ташкилотлар ихтиёрида солиқлар ва бошқа мажбурий тўловлар тўланганидан кейин қоладиган соф фойданинг бир қисми;

жисмоний ва юридик шахсларнинг хайрия маблағлари, халқаро молия институтлари ва хорижий ташкилотларнинг грантлари, вақтинча бўш турган маблағларни тижорат банкларининг депозитларига жойлаштиришдан олинган даромадлар;

қонунчилик ҳужжатлари билан тақиқланмаган бошқа манбалар.

Вазирлар Маҳкамаси икки ҳафта муддатда Ёшларга оид давлат сиёсатини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисидаги низомни тасдиқлансин.


7. Молия вазирлиги (Т.А. Ишметов) 2021 йилда:

мазкур Фармонда ёшлар бандлигига кўмаклашиш ва уларнинг ижтимоий ҳимоясини кучайтириш бўйича назарда тутилган чора-тадбирларни молиялаштириш учун Ёшлар ишлари агентлигига Давлат бюджетидан қўшимча равишда 100 млрд сўм;

олий таълим муассасалари талабалари турар жой ойлик ижара тўловининг бир қисмини қоплаш учун Олий ва ўрта махсус таълим вазирлиги ҳамда тасарруфида олий таълим муассасалари бўлган вазирлик ва идораларнинг ҳисоб-китобларига мувофиқ Давлат бюджетидан қўшимча равишда маблағлар ажратсин ҳамда келгуси йил бюджет параметрларини шакллантиришда ушбу харажатларни назарда тутсин.


8. Белгилансинки, 2021 йил 1 майдан бошлаб:

деҳқон хўжалиги фаолияти билан шуғулланаётган ёшларни сектор, кластер ва фермер хўжаликлари раҳбарлари томонидан патронажга олиш тизими жорий қилинади. Бунда, сектор, кластер ва фермер хўжаликлари раҳбарлари томонидан "устоз-шогирд" тамойили асосида ёшларга ажратилган ер участкаларини ўзлаштириш, агротехник тадбирларни ўтказиш, ерлар ҳосилдорлигини ошириш, етиштирилган маҳсулотни реализация қилиш ва бошқа масалаларда ёрдам кўрсатилади;

"Ёшлар дафтари"га киритилган деҳқон хўжалиги фаолияти билан шуғулланаётган ёшларга "Ёшлар дафтари", "Темир дафтар" ҳамда "Аёллар дафтари" жамғармалари ҳисобидан уруғликлар ва кўчатларни харид қилиш учун базавий ҳисоблаш миқдорининг 8 баравари миқдоригача субсидия ажратилади.

Вазирлар Маҳкамаси (Ш.М. Ғаниев), Ёшлар ишлари агентлиги (А.З. Саъдуллаев), Ўзбекистон фермер, деҳқон хўжаликлари ва томорқа ер эгалари кенгаши (А.А. Хаитов) бир ҳафта муддатда уруғликлар ва кўчатларни харид қилиш учун субсидия олишга эҳтиёжи бор ёшларнинг рўйхатини шакллантирсин ва уларга субсидия ажратиш чораларини кўрсин.


9. Молия вазирлиги (Т.А. Ишметов) Ёшлар ишлари агентлиги (А.З. Саъдуллаев), Ахборот технологиялари ва коммуникацияларини ривожлантириш вазирлиги (Ш.М. Садиков) билан биргаликда икки ой муддатда Давлат бюджетидан тўланадиган субсидиялар, компенсациялар ва бошқа имтиёзларни ажратишнинг ошкоралигини таъминлаш, мазкур жараёнда бюрократия ва коррупция ҳолатларининг олдини олиш, фуқароларга юзага келган муаммолар тўғрисида бевосита масъул мансабдор шахсларга хабар бериш имкониятини яратиш мақсадида махсус электрон платформани ишлаб чиқсин ҳамда унинг лозим даражада ва узлуксиз ишлаши учун зарур чораларни кўрсин.


10. Ёшлар ишлари агентлиги (А.З. Саъдуллаев) 2021 йил 1 июндан бошлаб ёшларнинг тадбиркорликка бўлган қизиқиши ва билимларини оширишга оид сифатли кўрсатув ва китоблар яратишни қўллаб-қувватлаш мақсадида:

мустақил баҳоловчи ташкилотлар томонидан рейтинги юқори деб баҳоланган республика миқёсидаги 3 та телеканалдан томошабинлар учун қулай бўлган пайтни инобатга олиб, эфир вақтини сотиб олиш;

бизнес юритиш ва унда муваффақиятга эришиш йўллари бўйича сифатли видеомаҳсулотларнинг шартнома асосида тайёрланишини таъминлаш ҳамда уларни сотиб олинган эфир вақтида намойиш этиш;

ёшларга амалий қўлланма сифатида фойдаланиш учун бизнес юритиш ва унда муваффақиятга эришиш йўллари, тадбиркорлик фаолияти давомида яхши натижаларга эришиш йўлидаги ютуқ ва хавф-хатарлар ҳақида оммабоп китобларни нашр этишни ташкил қилсин.

Белгилансинки, мазкур бандда кўрсатилган тадбирлар Ёшлар ишлари агентлигига Давлат бюджетидан ажратилган маблағлар ва қонунчилик ҳужжатлари билан тақиқланмаган бошқа манбалар ҳисобидан амалга оширилади.


11. Ёшлар ишлари агентлиги (А.З. Саъдуллаев) "Ўзбекистон учун 100 та ғоя" лойиҳасини ташкил этиш ва ўтказиш ҳамда лойиҳа доирасида Ёшлар ишлари агентлиги маблағлари ҳисобидан "Ўзбекистон Республикаси Президентининг бешта ташаббус лойиҳа офиси" нодавлат нотижорат ташкилотига - биринчи босқичда 1 млрд сўм маблағларни икки ҳафта муддатда, кейинги босқичларда лойиҳанинг смета ҳужжатларига кўра, бажарилган ишлар ҳажмидан келиб чиқиб молиялаштириш чораларини кўрсин.


12. 2021 йил 1 июндан бошлаб шундай тартиб ўрнатилсинки, унга мувофиқ:

а) давлат олий таълим муассасаларига 10 тагача маҳалла фуқаролар йиғинлари бириктирилади;

б) давлат олий таълим муассасалари ректорлари томонидан:

бириктирилган маҳалла фуқаролар йиғинларида яшайдиган уюшмаган ёшларнинг маънавий дунёқарашини шакллантириш, шу жумладан уларни хорижий тиллар, компьютер саводхонлиги, спорт, маданият ва китобхонлик тўгаракларига жалб қилиш чоралари кўрилади;

талабалар ётоқхоналарида, маданият марказларида ва маҳалла фуқаролар йиғинларида ёшлар билан мунтазам равишда учрашувлар ташкил этиш, очиқ давра суҳбатлари ва маданий тадбирлар ўтказиш амалиёти жорий қилинади.


13. Қуйидагилар:

Инвестициялар ва ташқи савдо вазирлиги (А.Б. Воитов) Иқтисодий тараққиёт ва камбағалликни қисқартириш вазирлиги (А.М. Бобоев) билан биргаликда бир ҳафта муддатда республиканинг барча туман (шаҳар)ларида Ёшлар саноат ва тадбиркорлик зоналарини ташкил қилишни назарда тутувчи Ўзбекистон Республикаси Президенти қарори лойиҳасини;

Молия вазирлиги (Т.А. Ишметов) икки ой муддатда мазкур Фармондан келиб чиқиб, 2021 йилда Давлат бюджетининг қўшимча харажатларини ҳамда даромад йўқотишларини қоплаш мақсадида мос миқдорда Давлат бюджети харажатларини мақбуллаштириш ва қўшимча даромадлар манбалари бўйича аниқ таклифларни белгиланган тартибда Вазирлар Маҳкамасига киритсин.


14. Халқ таълими вазирлиги (Ш.Х. Шерматов), Туризм ва спорт вазирлиги (А.А. Абдухакимов) ёшларнинг бўш вақтини мазмунли ўтказиш учун қулай шарт-шароитлар яратиш мақсадида:

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда умумий ўрта таълим муассасаларида "Баркамол авлод" болалар мактабларининг тармоқ филиалларини ташкил этиш, марказларда замонавий тўгаракларни очиш, уларни зарур асбоб-ускуналар билан жиҳозлаш;

малакали мутахассисларни жалб қилган ҳолда умумий ўрта таълим муассасаларининг спорт заллари ва майдонларида тўгараклар очиш;

ёзги таътил даврида ёшлар ўртасида маҳаллалар, секторлар ва туманлар миқёсида спорт ҳамда ҳарбий ватанпарварлик мусобақаларини ташкил этиш чораларини кўрсин.

Белгилансинки, мазкур бандда кўрсатилган тадбирлар маҳаллий бюджет маблағлари ва қонунчилик ҳужжатлари билан тақиқланмаган бошқа манбалар ҳисобидан амалга оширилади.


15. 2021 йилнинг якунига қадар Қашқадарё вилоятида эксперимент тариқасида маданият ва санъат соҳаси вакиллари ҳамда мусиқа фани ўқитувчиларига қуйидагиларни назарда тутган ҳолда уй шароитида ёшлар учун мусиқа тўгаракларини ташкил этишга рухсат берилсин:

ушбу тўгаракларни ташкил этган шахслар маданият марказлари томонидан нота, мусиқага оид адабиётлар билан таъминланади ҳамда уларга ташкилий ва услубий жиҳатдан ёрдам кўрсатилади;

тўгаракларда таълим олганлик учун тўлов маҳаллий бюджет маблағлари ва ўқувчилар томонидан тўланади.

Бунда, тўгараклар ташкил этган шахсларнинг иш ҳақи тўловлари маданият марказлари учун белгиланган миқдорлардаги бадал тўловлари ва етмаган қисмида маҳаллий бюджетнинг қўшимча манбалари ҳисобидан тўлаб берилади.

Маданият вазирлиги (О.А. Назарбеков) Қашқадарё вилояти ҳокимлиги (З.Т. Мирзаев) билан биргаликда ушбу тажрибанинг Қашқадарё вилоятида амалга оширилишини ташкил этсин ҳамда унинг самарадорлигидан келиб чиқиб республиканинг бошқа ҳудудларида ҳам жорийэтиш бўйича 2021 йил 31 декабрга қадар Вазирлар Маҳкамасига таклиф киритсин.


16. Ички ишлар вазирлиги (П.Р. Бобожонов) Ёшлар ишлари агентлиги (А.З. Саъдуллаев) билан биргаликда бир ой муддатда Тошкент шаҳрининг жиноятчилик кўрсаткичлари юқори бўлган туман ва маҳаллаларида ёшлар билан ишлашнинг "намунали тажриба"сини ишлаб чиқсин ва амалиётга жорий қилсин. Бунда, қуйидагиларга алоҳида эътибор қаратилсин:

тарбияси оғир ёшларни аниқлаш, улар билан яқиндан ишлаш, ижтимоий мослашувига кўмаклашиш, ёшлар ўртасида назоратсизлик ва ҳуқуқбузарликларнинг профилактикасини ташкил этиш;

ижтимоий жиҳатдан хавфли аҳволда бўлган оила фарзандлари, назоратсиз ва қаровсиз қолган вояга етмаганлар, ғайриижтимоий хатти-ҳаракатларга мойиллиги бўлган ва профилактик ҳисобда турган ёшлар билан якка тартибда ишлаш;

ёшлар билан индивидуал ишлаш, ташаббускор ва ислоҳотларни амалга оширишда фаол иштирок этувчи ёш кадрлар захирасини шакллантириш.

Ички ишлар вазирлиги (П.Р. Бобожонов) ва Ёшлар ишлари агентлиги (А.З. Саъдуллаев) "намунали тажриба" натижаларидан келиб чиқиб унинг Қорақалпоғистон Республикаси, вилоятлар ва Тошкент шаҳрининг қолган барча туманларида татбиқ этилишини ташкил этсин.


17. Ёшларни ижтимоий-иқтисодий қўллаб-қувватлаш тизимини янада такомиллаштириш ва бандлигига кўмаклашишга қаратилган чора-тадбирлар режаси 2-иловага мувофиқ тасдиқлансин.

Вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари раҳбарлари чора-тадбирлар режасида белгиланган вазифаларнинг ўз вақтида ва сифатли бажарилиши учун шахсан масъул эканликлари кўрсатиб ўтилсин.


18. Ёшлар ишлари агентлиги (А.З. Саъдуллаев) манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.


19. Мазкур Фармон ижросини самарали ташкил этишга масъул ва шахсий жавобгар этиб Ёшлар ишлари агентлиги директори А.З. Саъдуллаев, бандлик ва меҳнат муносабатлари вазири Н.Б. Хусанов ҳамда молия вазири Т.А. Ишметов белгилансин.

Фармон ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазирининг ўринбосарлари Ж.А. Қўчқоров ва Б.А. Мусаев зиммасига юклансин.

Амалга оширилаётган чора-тадбирлар натижадорлиги тўғрисида 2021 йилнинг 1 сентябрь ва 31 декабрь кунига қадар Ўзбекистон Республикаси Президентига ахборот берилсин.



Ўзбекистон Республикаси Президенти                                    Ш. Мирзиёев






Ўзбекистон Республикаси

Президентининг

2021 йил 20 апрелдаги

ПФ-6208-сон Фармонига

1-ИЛОВА



"Ёшлар дафтари"га киритилган ишсиз ёшларни ишга

қабул қилган тадбиркорлик субъектларига давлат

мулкини ижарага олишда ижара тўловларидан

тақдим этиладиган имтиёзлар

РЎЙХАТИ*

"Ёшлар дафтари"га

киритилган ишчилар

сони

Давлат мулки объектининг имтиёз

қўлланиладиган энг кўп майдони


Тошкент шаҳар

(кв.м)


Нукус шаҳар

ва вилоят

марказлари

(кв.м)


Туман

марказлари

(кв.м)


Бошқа ҳудудлар

(кв.м)


I. "Ёшлар дафтари"га киритилган ишсиз ёшларни ишга қабул қилганда

умумий ижара майдонига нисбатан ижара тўловларини 50 фоиз

миқдорида тўлайдиган тадбиркорлик субъектлари бўйича

5 та


60

80

100

120

6 дан - 9 гача


100

120

140

160

10 дан - 19 гача


200

240

280

300

20 ва ундан ортиқ


250

280

300

320

II. Ишлаб чиқариш соҳасида фаолият юритаётган ва ходимлар умумий

сонининг камида 70 фоизи "Ёшлар дафтари"га киритилган ёшлар

бўлган, давлат мулки объектлари учун ижара ҳақи тўловидан

5 йилга озод этиладиган тадбиркорлик субъектлари бўйича**

10 гача


100

120

140

160

10 дан - 19 гача


140

160

180

200

20 дан - 29 гача


180

200

220

240

30 ва ундан ортиқ


220

240

260

280

           

Изоҳлар:


1. Мазкур иловада назарда тутилган имтиёзлар коэффициенти Тошкент шаҳар, Нукус шаҳар ва вилоят марказлари ҳамда бошқа ҳудудлар бўйича тегишлича ҳудудий зона коэффициенти энг юқори бўлган объектларга нисбатан қўлланилмайди.


2. "Ёшлар дафтари"га киритилган ходимлар билан меҳнат шартномаси бекор қилиниши оқибатида мазкур иловада белгиланган меъёр бузилган тақдирда, жорий ойнинг кейинги ойидан бошлаб белгиланган меъёрга мувофиқ имтиёз қўлланилади ёки бекор қилинади.


3. Ишлаб чиқариш соҳасида фаолият юритаётган ва ходимлар умумий сонининг камида 70 фоизи "Ёшлар дафтари"га киритилган ёшлар бўлган бир нечта ёш тадбиркорлик субъектлари битта давлат мулкини ижарага олиш истагини билдирган тақдирда, имтиёз ходимлар умумий сони таркибида "Ёшлар дафтари"га кирган ёшлар сони кўп бўлган тадбиркорлик субъектига берилади.


*) Мазкур иловада назарда тутилган имтиёзлар қонунчилик ҳужжатларига мувофиқ ижара тўловларидан имтиёзга эга бўлган тадбиркорлик субъектларига татбиқ қилинмайди. Тадбиркорлик субъектлари ушбу рўйхатда келтирилган имтиёзларнинг биттасидан фойдаланиши мумкин.

Тадбиркорлик субъектлари томонидан ушбу рўйхатда белгиланган майдонга нисбатан:

кам майдондан фойдаланганда, ҳақиқатда фойдаланган майдонга нисбатан имтиёз қўлланилади;

кўп майдонидан фойдаланганда, имтиёз фақат белгиланган майдон учун қўлланилади.


**) Истисно тариқасида электрон савдоларини ўтказмасдан ижарага берилади.






Ўзбекистон Республикаси

Президентининг

2021 йил 20 апрелдаги

ПФ-6208-сон Фармонига

2-ИЛОВА



Ёшларни ижтимоий-иқтисодий

қўллаб-қувватлаш тизимини янада такомиллаштириш

ва бандлигига кўмаклашишга қаратилган

ЧОРА-ТАДБИРЛАР РЕЖАСИ

Т/р

Чора-тадбирлар


Амалга ошириш

механизми


Муддати


Молиялаштириш

манбалари


Масъул вазирлик ва идоралар


1.

2023 йил 1 январга қадар иш берувчиларга (бюджет ташкилотлари, давлат корхоналари, устав жамғармаси (капитали)да давлат улуши 50 фоиз ва ундан ортиқ бўлган юридик шахслар бундан мустасно) улар томонидан 25 ёшдан ошмаган ходимлар учун тўланган ижтимоий солиқ суммаси Давлат бюджетидан тўлиқ қайтариб берилишини жорий этиш.

Бунда, ижтимоий солиқ суммаси ёш ходимлар олти ой давомида узлуксиз меҳнат фаолиятини амалга ошириши шарти билан еттинчи ойдан бошлаб қайтаришини назарда тутиш.


Вазирлар Маҳкамаси қарори лойиҳаси

2021 йил

1 май


Давлат бюджети маблағлари


Молия вазирлиги (Ишметов), Давлат солиқ қўмитаси (Кудбиев), Иқтисодий тараққиёт ва камбағалликни қисқартириш вазирлиги (Норкулов), Бандлик ва меҳнат муносабатлари вазирлиги (Хусанов)


2.

"Ёшлар дафтари"га киритилган ёшларга тадбиркорлик фаолиятини бошлашва ўзини ўзи банд қилишга зарур бўлган асбоб-ускуналар ва меҳнат қуролларини харид қилиш учун базавий ҳисоблаш миқдорининг 40 бараваридан кўп бўлмаган миқдорда "Ёшлар дафтари" жамғармалари ҳисобидан субсидия ажратилишини жорий этиш.


Вазирлар Маҳкамаси қарори лойиҳаси


2021 йил

1 май

"Ёшлар дафтари" жамғармалари


Ёшлар ишлари агентлиги (Саъдуллаев), Молия вазирлиги (Ишметов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


3.

"Ёшлар дафтари"га киритилган тадбиркорлик фаолиятини бошлаш учун бино ва иншоотларни ижарага олган ёш тадбиркорларга бир йиллик ижара харажатларининг 30 фоизи, бироқ базавий ҳисоблаш миқдорининг 25 бараваригача бўлган миқдорини "Ёшлар дафтари" жамғармалари ҳисобидан компенсация қилиш тизимини жорий этиш.


Вазирлар Маҳкамаси қарори лойиҳаси


2021 йил

1 май


"Ёшлар дафтари" жамғармалари


Ёшлар ишлари агентлиги (Саъдуллаев), Молия вазирлиги (Ишметов), Давлат активларини бошқариш агентлиги (Ортиқов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


4.

Профессионал таълим ташкилотларида таҳсил олаётган "Ёшлар дафтари"га киритилган ёшларга улар ишлаб-чиқариш ёки хизмат кўрсатиш корхоналарида амалиёт ўтган вақтида, бироқ олти ойдан кўп бўлмаган муддатда профессионал таълим ташкилотлари томонидан Давлат бюджети маблағлари ҳисобидан базавий ҳисоблаш миқдорининг икки баравари миқдорида ҳар ойлик субсидия ажратиш тизимини жорий этиш.


Вазирлар Маҳкамаси қарори лойиҳаси


2021 йил

1 июнь


Давлат бюджети маблағлари


Ёшлар ишлари агентлиги (Саъдуллаев), Молия вазирлиги (Ишметов), Бандлик ва меҳнат муносабатлари вазирлиги (Хусанов), Олий ва ўрта махсус таълим вазирлиги (Тошқулов)


5.

"Бир миллион дастурчи" лойиҳаси доирасида ўқув курсларини муваффақиятли тугатган ва сертификат олган ёшларга компьютер (шу жумладан, Ўзбекистон Республикасида ишлаб чиқарилмаган) харидлари учун базавий ҳисоблаш миқдорининг 25 бараваридан кўп бўлмаган миқдорда истеъмол кредитлари ажратиш (фоиз тўловларини Давлат бюджетидан Ёшлар ишлари агентлигига ажратилган маблағлар ҳисобидан компенсация қилиш) тизимини йўлга қўйиш.


Вазирлар Маҳкамаси қарори лойиҳаси


2021 йил

1 июнь


Давлат бюджети маблағлари


Молия вазирлиги (Ишметов), Ахборот технологиялари ва коммуникацияларини ривожлантириш вазирлиги (Садиков), Ёшлар ишлари агентлиги (Саъдуллаев), АТ "Халқ банки" (Саламов), АТ "Алоқа банк" (Ирисбекова), "Микрокредитбанк" АТБ (Бўтаев)


6.

"Ёшлар дафтари"га киритилган ёшларнинг хорижий тиллар ва умумтаълим фанлари бўйича нодавлат таълим ташкилотларида ўқиш харажатларининг 50 фоизи, бироқ умумий ҳисобда базавий ҳисоблаш миқдорининг 5 бараваригача бўлган миқдори ҳамда улар бўйича миллий сертификатлар олиш учун ўтказиладиган имтиҳонларни топшириш харажатларини Ёшлар ишлари агентлигига Давлат бюджетидан ажратилган маблағлар ҳисобидан компенсация қилиш тизимини жорий этиш.


Вазирлар Маҳкамаси қарори лойиҳаси


2021 йил

1 июнь


Давлат бюджети маблағлари


Ёшлар ишлари агентлиги (Саъдуллаев), Молия вазирлиги (Ишметов), Бандлик ва меҳнат муносабатлари вазирлиги (Хусанов), Олий ва ўрта махсус таълим вазирлиги (Тошқулов), Давлат тест маркази (Каримов), Таълим сифатини назорат қилиш давлат инспекцияси (Ташкенбаев)


7.

"Меҳрибонлик" уйлари тарбияланувчилари ҳамда "Ёшлар дафтари"га киритилган ёшларнинг ҳайдовчилик курсларида ўқиш харажатларини базавий ҳисоблаш миқдорининг 4 баравари миқдоригача ва сафарбарлик чақируви резерви хизмати бадалини Давлат бюджетидан Ёшлар ишлари агентлигига ажратилган маблағлар ҳисобидан қоплаш тизимини жорий қилиш.


Вазирлар Маҳкамаси қарори лойиҳаси


2021 йил

1 июнь

Давлат бюджети маблағлари


Ёшлар ишлари агентлиги (Саъдуллаев), Мудофаа вазирлиги (Курбонов), Молия вазирлиги (Ишметов), Халқ таълими вазирлиги (Шерматов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


8.

Хусусий корхона ва ташкилотларга ишга қабул қилинган ҳамда фаолият бошлаганига олти ойдан ошмаган "Ёшлар дафтари"га киритилган ёшларни қайта тайёрлов курсларида ўқитиш билан боғлиқ бўлган харажатларнинг базавий ҳисоблаш миқдорининг 4 бараваригача бўлган қисмини мазкур хусусий корхона ва ташкилотларга Давлат бюджетидан Ёшлар ишлари агентлигига ажратилган маблағлар ҳисобидан компенсация қилиш тизимини жорий қилиш.


Вазирлар Маҳкамаси қарори лойиҳаси


2021 йил

1 июнь


Давлат бюджети маблағлари


Ёшлар ишлари агентлиги (Саъдуллаев), Молия вазирлиги (Ишметов), Бандлик ва меҳнат муносабатлари вазирлиги (Хусанов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


9.

Олий таълим муассасаларининг ижара ҳуқуқи асосида яшаётган ҳар бир талабаси томонидан тўланадиган турар жойнинг ойлик ижара тўловларини тегишли қисмини қоплаб бериш тизимини ташкил этиш.


Амалий чора-

тадбирлар, зарур бўлса, норматив-

ҳуқуқий ҳужжат


2021 йил

1 май


Давлат бюджети маблағлари ва қонунчилик ҳужжатлари билан тақиқланмаган бошқа манбалар


Олий ва ўрта махсус таълим вазирлиги (Тошқулов), Молия вазирлиги (Ишметов), Давлат солиқ қўмитаси (Кудбиев), Ёшлар ишлари агентлиги (Саъдуллаев)


10.

"Ёшлар дафтари"га киритилган деҳқон хўжалиги фаолияти билан шуғулланаётган ёшларга "Ёшлар дафтари", "Темир дафтар" ҳамда "Аёллар дафтари" жамғармалари ҳисобидан уруғликлар ва кўчатларни харид қилиш учун базавий ҳисоблаш миқдорининг 8 баравари миқдоригача субсидия ажратиш тизимини жорий этиш.


Вазирлар Маҳкамаси қарори лойиҳаси


2021 йил

1 май

"Ёшлар дафтари", "Темир дафтар", "Аёллар дафтари" жамғармалари

Ёшлар ишлари агентлиги (Саъдуллаев), Молия вазирлиги (Ишметов), Бандлик ва меҳнат муносабатлари вазирлиги (Хусанов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


11.

Ёшларнинг муаммоларини "Ёшлар дафтари"ни юритиш орқали тизимли равишда ҳал этиш ва уларни ижтимоий қўллаб-қувватлаш бўйича тартибни белгилаш. Бунда:

"Ёшлар дафтари"ни шакллантириш;

"Ёшлар дафтари"га киритилган ёшларнинг муаммоларини тизимли равишда ҳал этиш ва уларни ижтимоий қўллаб-қувватлаш;

"Ёшлар дафтари"дан ёшларни чиқариш тартиби каби масалаларни назарда тутиш.


Вазирлар Маҳкамаси қарори лойиҳаси


2021 йил

1 май

-

Вазирлар Маҳкамаси, Ёшлар ишлари агентлиги (Саъдуллаев), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


12.

"Ёшлар дафтари" электрон платформасини яратиш ва уни амалиётга тўлиқ жорий этиш.

Ушбу платформа орқали "Ёшлар дафтари"га киритилган ёшларга оид зарур маълумотларни белгиланган тартибда йиғиш, қайта ишлаш ва таҳлил қилиш, шунингдек, уни тегишли ахборот тизимлари билан интеграция қилиш.

Электрон платформадан фойдаланиш жорий қилингунга қадар халқ депутатлари туман (шаҳар) Кенгаши қарорига асосан "Ёшлар дафтари"га киритилган ёшлар ҳақида маълумотни Ёшлар ишлари агентлиги туман (шаҳар) бўлими томонидан бериш амалиётини вақтинча жорий этиш.


Амалий чора-тадбирлар


2021 йил

1 июнь


Ёшлар ишлари агентлигига ажратилган бюджет маблағлари


Ёшлар ишлари агентлиги (Саъдуллаев), Ахборот технологиялари ва коммуникацияларини ривожлантириш вазирлиги (Садиков), Бандлик ва меҳнат муносабатлари вазирлиги (Хусанов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, тегишли вазирлик ва идоралар


13.

Ёшлар ишлари агентлигида юридик шахс мақомига эга бўлмаган Ёшларга оид давлат сиёсатини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисидаги низомни тасдиқлаш. Ушбу Жамғарма даромадларини шакллантиришнинг қўшимча манбаларини белгилаш.


Вазирлар Маҳкамаси қарори лойиҳаси


2021 йил

1 май


-

Вазирлар Маҳкамаси, Ёшлар ишлари агентлиги (Саъдуллаев), Молия вазирлиги (Ишметов)


14.

Ўзини ўзи банд қилган шахс сифатида репетиторлик фаолиятини олиб борадиган фуқароларга, ушбу фаолиятни синф хоналарида (уйдан ташқарида) кўрсатиш ҳуқуқини бериш.


Норматив-

ҳуқуқий ҳужжат


2021 йил

1 август


-

Давлат тест маркази (Каримов), Таълим сифатини назорат қилиш давлат инспекцияси (Ташкенбаев), Давлат солиқ қўмитаси (Кудбиев), Бандлик ва меҳнат муносабатлари вазирлиги (Хусанов), Халқ таълими вазирлиги (Шерматов)


15.

Маъмуржон Узоқов номидаги ёш ижрочилар республика кўрик-танловини ташкил этиш.


Амалий чора-

тадбирлар

2021 йил

октябрь-

ноябрь


Ижрочилар маблағлари


Маданият вазирлиги (Назарбеков), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари


16.

Ёш тадбиркорлар ўртасида тажриба алмашиш, ҳамкорлик ўрнатиш ва кооперация жараёнларини йўлга қўйиш мақсадида:

Наманган вилоятида "Тўқимачилик соҳаси илғор ёш тадбиркорлари форуми";

Бухоро вилоятида "Туризм соҳаси ёш тадбиркорлари форуми";

Фарғона вилоятида "Қишлоқ хўжалиги соҳаси ёш тадбиркорлари форуми";

Қашқадарё вилоятида "Чорвачилик соҳаси ёш тадбиркорлари форуми";

Тошкент вилоятида "Асаларичилик соҳаси ёш тадбиркорлари форуми";

Тошкент шаҳрида "Саноат ишлаб чиқариш соҳаси ёш тадбиркорлари форуми"ни ташкил этиш ва ўтказиш чораларини кўриш.


Амалий чора-

тадбирлар


2021-2022

йиллар


Ижрочилар маблағлари ва маҳаллий бюджетнинг қўшимча манбалари


Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Туризм ва спорт вазирлиги (Абдухакимов), Қишлоқ хўжалиги вазирлиги (Ходжаев), Ёшлар ишлари агентлиги (Саъдуллаев), тегишли вазирлик ва идоралар


                    

Изоҳ: норматив-ҳуқуқий ҳужжатлар лойиҳалари шакли ўзгартирилиши ва улар бирлаштирилиши мумкин.



Қонун ҳужжатлари маълумотлари миллий базаси (www.lex.uz),

2021 йил 21 апрель


"Халқ сўзи", 2021 йил 22 апрель



















































Время: 0.0059
по регистрации МЮ строгое соответствие
  • Все
  • действующие
  • утратившие силу
  • Русский
  • Ўзбекча
  • Оба языка
  • любая дата
  • точная дата
  • период
  • -

Свернуть поиск