Ўзбекистон Республикаси Вазирлар Маҳкамасининг 28.04.2021 й. 248-сон "Ижтимоий ҳимояга муҳтож айрим тоифадаги фуқароларга нафақа тайинлаш бўйича давлат хизматлари кўрсатишнинг маъмурий регламентини тасдиқлаш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

28.04.2021 й.

N 248

ИЖТИМОИЙ ҲИМОЯГА МУҲТОЖ

АЙРИМ ТОИФАДАГИ ФУҚАРОЛАРГА

НАФАҚА ТАЙИНЛАШ БЎЙИЧА ДАВЛАТ

ХИЗМАТЛАРИ КЎРСАТИШНИНГ МАЪМУРИЙ

РЕГЛАМЕНТИНИ ТАСДИҚЛАШ ТЎҒРИСИДА

Аҳолини ижтимоий ҳимоя қилиш соҳасида давлат хизматлари кўрсатиш тизимини янада такомиллаштириш ҳамда аҳолининг ижтимоий ҳимояга муҳтож қатламларига ёрдам кўрсатиш соҳасидаги фаолиятга ахборот-коммуникация технологияларини жорий қилиш мақсадида Вазирлар Маҳкамаси ҚАРОР ҚИЛАДИ:

1. Ижтимоий ҳимояга муҳтож айрим тоифадаги фуқароларга нафақа тайинлашни давлат хизматлари марказлари ва Ўзбекистон Республикаси Ягона интерактив давлат хизматлари портали (кейинги ўринларда - ЯИДХП) орқали амалга ошириш тартиби жорий этилсин.

2. Ижтимоий ҳимояга муҳтож айрим тоифадаги фуқароларга нафақа тайинлаш бўйича давлат хизматлари кўрсатишнинг маъмурий регламенти 1-иловага мувофиқ тасдиқлансин ва 2021 йил 1 августдан бошлаб амалга киритилсин.

3. 2021 йил 1 июлга қадар:

Ўзбекистон Республикаси Соғлиқни сақлаш вазирлиги Ахборот технологиялари ва коммуникацияларини ривожлантириш вазирлиги, Адлия вазирлиги ҳамда Молия вазирлиги ҳузуридаги бюджетдан ташқари Пенсия жамғармаси билан биргаликда 18 ёшгача ногиронлиги бўлган болалар ва одамнинг иммунитет танқислиги вирусини келтириб чиқарадиган касалликка (ОИВ инфекциясига) чалинган 18 ёшгача бўлган шахсларнинг маълумотлар базасини яратсин;

Ўзбекистон Республикаси Ахборот технологиялари ва коммуникацияларини ривожлантириш вазирлиги Молия вазирлиги ҳузуридаги бюджетдан ташқари Пенсия жамғармаси ахборот тизимининг ЯИДХП, Соғлиқни сақлаш вазирлиги ва Ўзбекистон Республикаси Адлия вазирлигининг "ФҲДЁ электрон архиви" ахборот тизимлари билан интеграция қилинишини таъминласин.

4. Ўзбекистон Республикаси Ахборот технологиялари ва коммуникацияларини ривожлантириш вазирлиги Ўзбекистон Республикаси Адлия вазирлиги ҳузуридаги Давлат хизматлари агентлиги билан биргаликда 2021 йил 1 августдан:

ушбу қарорга мувофиқ давлат хизматлари ЯИДХП орқали жорий этилишини таъминласин;

ЯИДХПда давлат хизматлари кўрсатилишининг ҳар бир босқичида мурожаатлар кўриб чиқилишини кузатиб бориш тартибини жорий этсин.

5. Ўзбекистон Республикаси Адлия вазирлиги ҳузуридаги Давлат хизматлари агентлиги ушбу қарорда белгиланган вазирликлар ва идоралар томонидан давлат хизматлари кўрсатилишининг белгиланган тартиби бажарилиши борасидаги фаолияти устидан, шу жумладан, ЯИДХП орқали доимий назорат ўрнатсин.

6. Ўзбекистон Республикаси Адлия вазирлиги давлат хизматлари марказларининг ходимлари иштирокида нафақа тайинлаш бўйича давлат хизматларини кўрсатишнинг самарадорлиги ва натижадорлиги даражасини оширишга йўналтирилган ўқув семинарлари ташкил этилиши ҳамда ўтказилишини таъминласин.

7. Вазирлар Маҳкамасининг "Фуқароларнинг давлат пенсия таъминоти тўғрисида"ги Ўзбекистон Республикаси Қонунига ҳамда Ўзбекистон Республикасининг Меҳнат кодексига ўзгартиш ва қўшимчалар киритиш ҳақида"ги Ўзбекистон Республикаси Қонунини амалга ошириш учун зарур бўлган норматив-ҳуқуқий ҳужжатларни тасдиқлаш ҳақида" 2011 йил 7 апрелдаги 107-сон қарорига (Ўзбекистон Республикаси ҚТ, 2011 й., 4-сон, 27-модда) 2-иловага мувофиқ ўзгартириш ва қўшимчалар киритилсин.

8. Ўзбекистон Республикаси Молия вазирлиги бошқа манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари - иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси адлия вазири Р.Қ. Давлетов зиммасига юклансин.

Ўзбекистон Республикасининг Бош вазири                                  А. Арипов

Вазирлар Маҳкамасининг

2021 йил 28 апрелдаги

248-сон қарорига

2-ИЛОВА

Вазирлар Маҳкамасининг "Фуқароларнинг давлат

пенсия таъминоти тўғрисида"ги Ўзбекистон Республикаси

Қонунига ҳамда Ўзбекистон Республикасининг Меҳнат

кодексига ўзгартиш ва қўшимчалар киритиш ҳақида"ги

Ўзбекистон Республикаси Қонунини амалга ошириш

учун зарур бўлган норматив-ҳуқуқий ҳужжатларни

тасдиқлаш ҳақида" 2011 йил 7 апрелдаги 107-сон

қарорига киритилаётган ўзгартириш

ва қўшимчалар

1. 1-банд қуйидаги таҳрирда баён қилинсин:

"1. Қуйидагилар:

Ногиронлиги бўлган 18 ёшгача болалар, одамнинг иммунитет танқислиги вирусини келтириб чиқарадиган касалликка (ОИВ инфекциясига) чалинган 18 ёшгача бўлган шахслар ҳамда 18 ёшдан катта болаликдан ногиронлиги бўлган шахсларга нафақа тайинлаш ва тўлаш тартиби тўғрисидаги низом 1-иловага мувофиқ;

Давлат пенсиясини тайинлаш учун зарур бўлган иш стажига эга бўлмаган шахсларга, ёшидан қатъи назар иш стажига эга бўлмаган I ва II гуруҳ ногиронлиги бўлган шахсларга ҳамда болаликдан ногиронлиги бўлган фарзанди бор (бўлган) оналарга нафақалар тайинлаш ва тўлаш тартиби тўғрисидаги низом 2-иловага мувофиқ тасдиқлансин.".

2. 1-иловада:

а) илованинг номи қуйидаги таҳрирда баён қилинсин:

"Ногиронлиги бўлган 18 ёшгача болалар, одамнинг иммунитет танқислиги вирусини келтириб чиқарадиган касалликка (ОИВ инфекциясига) чалинган 18 ёшгача бўлган шахслар ҳамда 18 ёшдан катта болаликдан ногиронлиги бўлган шахсларга нафақа тайинлаш ва тўлаш тартиби тўғрисидаги низом";

б) 1 ва 2-бандлар қуйидаги таҳрирда баён қилинсин:

"1. Ушбу Низом ногиронлиги бўлган 18 ёшгача болалар, одамнинг иммунитет танқислиги вирусини келтириб чиқарадиган касалликка (кейинги ўринларда - ОИВ инфекцияси) чалинган 18 ёшгача бўлган шахслар ҳамда 18 ёшдан катта болаликдан ногиронлиги бўлган шахсларга ҳар ойлик нафақалар (кейинги ўринларда - нафақа) тайинлаш ва тўлаш тартибини белгилайди.

Нафақа Ўзбекистон Республикаси фуқароларига, шунингдек, Ўзбекистон Республикасида доимий яшайдиган хорижий фуқароларга ва фуқаролиги бўлмаган шахсларга берилади.

2. Нафақа олиш ҳуқуқига тиббий хулоса мавжуд бўлган тақдирда ногиронлиги бўлган 18 ёшгача болалар (кейинги ўринларда - ногиронлиги бўлган бола), касалликнинг босқичидан қатъи назар ОИВ инфекциясига чалинган 18 ёшгача бўлган шахслар, шунингдек, тиббий-ижтимоий эксперт комиссиялари (кейинги ўринларда - ТИЭК) томонидан болаликдан I ва II гуруҳ ногиронлиги бўлган деб эътироф этилган 18 ёшдан катта шахслар (кейинги ўринларда - 18 ёшдан катта болаликдан ногиронлиги бўлган шахс) эгадирлар.";

в) 4 ва 5-бандлар қуйидаги таҳрирда баён қилинсин:

"4. Нафақа қонун ҳужжатларида белгиланган миқдорда тайинланади. Бунда ОИВ инфекциясига чалинган 18 ёшгача бўлган шахсларга нафақа қонун ҳужжатларида ногиронлиги бўлган болалар учун белгиланган миқдорда тайинланади..

Нафақани тайинлаш давлат хизматлари марказларига мурожаат қилиш ёки давлат хизматларидан электрон тарзда фойдаланиш учун Ўзбекистон Республикаси Ягона интерактив давлат хизматлари порталида (кейинги ўринларда - ЯИДХП) рўйхатдан ўтиш орқали Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг туман (шаҳар) бўлимлари (кейинги ўринларда - Пенсия жамғармаси бўлими) томонидан амалга оширилади ҳамда нафақани етказиб бериш (топшириш) ваколати юкланган ташкилот ёки нафақа олувчининг хоҳишига кўра пул маблағлари фуқароларнинг депозит ҳисобварақларига пул ўтказиш йўли билан тижорат банкининг филиали орқали тўланади.

5. Нафақа тайинлаш тўғрисидаги мурожаат (кейинги ўринларда - мурожаат):

ОИВ инфекциясига чалинган шахс ва 18 ёшдан катта болаликдан ногиронлиги бўлган шахс томонидан;

ОИВ инфекциясига чалинган шахснинг ва муомалага лаёқатсиз деб эътироф этилган 18 ёшдан катта болаликдан ногиронлиги бўлган шахснинг ота-онаси, фарзандликка олувчиси, васийси ёки ҳомийси томонидан;

ногиронлиги бўлган боланинг, шунингдек ОИВ инфекциясига чалинган 18 ёшга тўлмаган боланинг ота-онаси, фарзандликка олувчиси, оилага тарбияга олган (патронат) тутинган ота-онаси (кейинги ўринларда - тутинган ота-она), васийси ёки ҳомийси томонидан давлат хизматлари марказлари ёки ЯИДХП орқали мурожаат қилади.";

г) қуйидаги мазмундаги 5-1-банд қўшилсин:

"5-1. Манзил-колонияларда жазони ўтаётган, озодликдан маҳрум этишга ҳукм қилинган шахсларга нафақа тайинлаш тўғрисидаги мурожаат манзил-колония маъмурияти томонидан бевосита манзил-колония жойлашган ердаги Давлат хизматлари марказига берилади";

д) 6-8-бандлар ўз кучини йўқотган деб ҳисоблансин;

е) 9-11-бандлар қуйидаги таҳрирда баён қилинсин:

"9. Нафақа тайинлашни сўраб ногиронлик белгиланган ёки касалликнинг босқичидан қатъи назар ОИВ инфекциясига чалинганлиги тўғрисидаги тиббий хулоса берилган кундан бошлаб олтмиш кун ичида мурожаат этилган бўлса, нафақа ногиронлик белгиланган ёки ОИВ инфекциясига чалинганлиги тўғрисидаги тиббий хулоса берилган кундан эътиборан тайинланади.

Қолган барча ҳолатларда нафақа мурожаат қилинган кундан бошлаб тайинланади.

18 ёшдан катта болаликдан ногиронлиги бўлган шахсга нафақа ногиронликнинг бутун даврига тайинланади. Ногиронлиги бўлган болага нафақа тиббий хулоса берилган муддатга тайинланади.

ОИВ инфекциясига чалинган шахсга нафақа у 18 ёшга тўлгунгача бўлган муддатга тайинланади.

Нафақа ТИЭКнинг маълумотида кўрсатилган ногиронлик муддати белгиланган сўнгги ой учун, давлат тиббиёт муассасасининг хулосасида кўрсатилган ногиронлик муддати белгиланган сўнгги ой учун ҳамда ОИВ инфекциясига чалинган шахсга у 18 ёшга тўлган ой учун тўлиқ миқдорда тўланади.

10. Нафақа тайинлаш рад этилган тақдирда, Пенсия жамғармаси бўлими рад этиш сабаблари кўрсатилган маълумотни тегишли Давлат хизматлари марказига ёки ЯИДХПга электрон тарзда юборади.

11. Нафақа тайинлаш ёки нафақа тайинлаш рад этилиши тўғрисидаги қарор юзасидан мурожаат қилувчи томонидан бевосита судга ёки бўйсунув тартибида юқори турувчи органга шикоят қилиниши мумкин";

ж) 12-бандга қуйидаги мазмундаги хатбоши қўшилсин:

"Нафақа тайинлаш учун Давлат хизматлари марказига ёки ЯИДХП орқали мурожаат қилинганида маълумотлар "Пенсия" ахборот тизимида сақланади.";

з) 13-банд қуйидаги таҳрирда баён қилинсин:

"13. Нафақа Пенсия жамғармаси бўлими томонидан ногиронлиги бўлган боланинг, ОИВ инфекциясига чалинган 18 ёшгача бўлган шахснинг ва 18 ёшдан катта болаликдан ногиронлиги бўлган шахснинг ёки уларнинг ота-онаси, фарзандликка олувчиси, тутинган ота-онаси, васийси ёки ҳомийсининг хоҳишига кўра доимий яшаш ёки вақтинча турган жойи бўйича тўланади.

Ўзбекистон Республикасида доимий яшайдиган чет эл фуқароси ёки фуқаролиги бўлмаган шахсга нафақа яшаш гувоҳнома (ID-картаси) амал қиладиган муддат давомида тўланади.

Нафақа олувчининг доимий яшаш ёки вақтинчалик турган жойи мавжуд бўлмаса ёхуд яшаш учун рухсатноманинг кейинги санаси ўртасида узилиш мавжуд бўлган тақдирда, Пенсия жамғармаси бўлими томонидан нафақани тўлаш доимий яшаш, вақтинчалик турган жойи бўйича рўйхатга олишнинг ёки яшаш учун рухсатноманинг янги санасидан бошлаб давом эттирилади.

Бунда нафақани тўлаш нафақа тўлаш тўхтатилган пайтдан, бироқ ўн икки ойдан ортиқ бўлмаган пайтдан бошлаб давом эттирилади";

и) 15 ва 16-бандлар қуйидаги таҳрирда баён қилинсин:

"15. Қайта тиббий текширишдан ўтказиш муддати ўтказиб юборилганда нафақаларни тўлаш "Фуқароларнинг давлат пенсия таъминоти тўғрисида"ги Ўзбекистон Республикаси Қонунининг 55-моддасида назарда тутилган тартибда амалга оширилади.

Нафақалар ногиронлик муддати белгиланган сўнгги ой учун, ОИВ инфекциясига чалинган шахсга эса у 18 ёшга тўлган ой учун тўлиқ миқдорда тўланади.

Нафақа олувчи Ўзбекистон Республикаси ҳудуди доирасида доимий яшаш учун бошқа туман (шаҳар)га кўчганда нафақани тўлаш янги яшаш жойи бўйича тегишли Пенсия жамғармаси бўлими томонидан давом эттирилади. Бундай ҳолда нафақа тўлаш илгариги яшаш жойи бўйича нафақа тўлаш тўхтатилган вақтдан бошлаб давом эттирилади. Нафақа олувчиларни ҳисобдан чиқариш ва янги яшаш жойида ҳисобга олиш тартиби, шунингдек, уларнинг йиғма жилдларини жўнатиш тартиби Ўзбекистон Республикаси Молия вазирлиги томонидан белгиланади.

18 ёшдан катта болаликдан ногиронлиги бўлган шахс, ногиронлиги бўлган бола ёхуд ОИВ инфекциясига чалинган 18 ёшга тўлмаган шахс доимий яшаш учун Ўзбекистон Республикаси ташқарисига чиқиб кетганда нафақа тўлаш тўхтатилади;

Нафақа тўлашнинг тўхтатилиши ёки қайта тикланишига олиб келадиган бошқа ҳолатлар (нафақа тайинланган шахслар тўлиқ давлат таъминотига ўтказилганда ёки "Меҳрибонлик", "Саховат", "Мурувват" уйларига ва шу кабиларга юборилганлиги ёки ундан қайтиб келганлиги сабабли тўлиқ давлат таъминотидан чиқарилганда, ногиронлиги бўлган болани тарбиялаш учун оилага қабул қилиш тўғрисидаги битим бекор қилинганда) пайдо бўлганда нафақа тўлаш тегишли ҳолатлар пайдо бўлган ойдан кейинги ойнинг биринчи кунидан бошлаб тўхтатилади ёки тикланади.

16 ёшдан катта болаликдан ногиронлиги бўлган шахс, ногиронлиги бўлган бола ёхуд ОИВ инфекциясига чалинган 18 ёшга тўлмаган шахс доимий яшаш учун Ўзбекистон Республикаси ташқарисига чиқиб кетганда нафақа тўлаш тўхтатилади;

Нафақа тўлашнинг тўхтатилиши ёки қайта тикланишига олиб келадиган бошқа ҳолатлар (нафақа тайинланган шахслар тўлиқ давлат таъминотига ўтказилганда ёки "Меҳрибонлик", "Саховат", "Мурувват" уйларига ва шу кабиларга юборилганлиги ёки ундан қайтиб келганлиги сабабли тўлиқ давлат таъминотидан чиқарилганда, ногиронлиги бўлган болани тарбиялаш учун оилага қабул қилиш тўғрисидаги битим бекор қилинганда) пайдо бўлганда нафақа тўлаш тегишли ҳолатлар пайдо бўлган ойдан кейинги ойнинг биринчи кунидан бошлаб тўхтатилади ёки тикланади.

16. 18 ёшдан катта болаликдан ногиронлиги бўлган шахс, ногиронлиги бўлган бола ёки ОИВ инфекциясига чалинган 18 ёшга тўлмаган шахс озодликдан маҳрум этишга ҳукм қилинган тақдирда, тайинланган нафақани тўлаш тўхтатилади ва жазони ўташдан озод этилгандан кейин тикланади (манзил-колонияларда жазони ўтаётган, озодликдан маҳрум этишга ҳукм қилинган шахслар бундан мустасно).";

к) 18 ва 19-бандлар қуйидаги таҳрирда баён қилинсин:

"18. ОИВ инфекциясига чалинган шахсга ва 18 ёшдан катта болаликдан ногиронлиги бўлган шахсга тайинланган нафақа унга унинг ҳақ тўланадиган ишни бажаришидан ёки бошқа турдаги даромадлар (стипендиялар, алиментлар ва шу кабилар) олишидан қатъи назар тўланади.

Ногиронлиги бўлган болага, шунингдек, ОИВ инфекциясига чалинган 18 ёшга тўлмаган болага тайинланган нафақа унга бошқа пенсиялар ва нафақалар, шу жумладан, боқувчисини йўқотганлик пенсияси ёки нафақаси олишидан қатъи назар тўланади.

Ҳар хил нафақаларнинг турларини олиш ҳуқуқига эга бўлган ОИВ инфекциясига чалинган 18 ёшдан катта шахсга ва 18 ёшдан катта болаликдан ногиронлиги бўлган шахсга унинг танлаши бўйича нафақанинг бир тури тайинланади.

Нафақага ёки "Фуқароларнинг давлат пенсия таъминоти тўғрисида"ги Ўзбекистон Республикаси Қонунига мувофиқ давлат пенсиясининг турларидан бирига ҳуқуқи бўлган ОИВ инфекциясига чалинган 18 ёшдан катта шахсга ва 18 ёшдан катта болаликдан ногиронлиги бўлган шахсга унинг ўзи танлаган нафақа ёки давлат пенсиясининг турларидан бири тайинланади.

19. Тайинланган нафақа 18 ёшдан катта болаликдан ногиронлиги бўлган шахс, ногиронлиги бўлган бола ёхуд ОИВ инфекциясига чалинган 18 ёшга тўлмаган шахс тўлиқ давлат таъминотида бўлган давр учун тўланмайди.";

л) 21-банд қуйидаги таҳрирда баён қилинсин:

"21. Ногиронлиги бўлган болага, ОИВ инфекциясига чалинган 18 ёшга тўлмаган шахсга ёки 18 ёшдан катта болаликдан ногиронлиги бўлган шахсга тегишли бўлган ва унинг вафот этиши сабабли олинмай қолган нафақа суммаси мерос таркибига киритилмайди ва унинг ота-онасига, эрига (хотинига), шунингдек, ногиронлиги бўлган бола, ОИВ инфекциясига чалинган 18 ёшга тўлмаган шахс ёки 18 ёшдан катта болаликдан ногиронлиги бўлган шахс билан у вафот этган кунда бирга яшайдиган оила аъзоларига тўланади.

Ногиронлиги бўлган бола, ОИВ инфекциясига чалинган 18 ёшга тўлмаган шахс ёки 18 ёшдан катта болаликдан ногиронлиги бўлган шахс вафот этган ой учун тўлиқ олинмай қолинган нафақа суммаси юқорида кўрсатиб ўтилган шахсларга вафот этган ой учун тўлиқ миқдорда тўланади.

Бир неча шахс мурожаат қилишганда уларга тегишли нафақа суммаси улар ўртасида тенг миқдорда тақсимланади.

Кўрсатиб ўтилган сумма, уни олиш учун ногиронлиги бўлган бола, ОИВ инфекциясига чалинган 18 ёшга тўлмаган шахс ёки 18 ёшдан катта ногиронлиги болаликдан бўлган шахс вафотидан кейин 6 ойдан кечикмай мурожаат қилинган тақдирда тўланади.

Ногиронлиги бўлган бола, 18 ёшдан катта болаликдан ногиронлиги бўлган шахсларнинг олинмай қолган нафақа суммаси ногиронлик белгиланган муддатдан ошмаган давр учун, ОИВ инфекциясига чалинган шахсларга 18 ёшдан ошмаган давр учун тўланади.";

м) 23-банддаги "ногиронга" сўзи "болаликдан ногиронлиги бўлган шахсга" сўзлари билан алмаштирилсин.

3. 2-иловада:

а) илованинг номи қуйидаги таҳрирда баён қилинсин:

"Давлат пенсияси тайинлаш учун зарур бўлган иш стажига эга бўлмаган шахсларга, ёшидан қатъи назар, иш стажига эга бўлмаган I ва II гуруҳ ногиронлиги бўлган шахсларга ҳамда болаликдан ногиронлиги бўлган фарзанди бор (бўлган) оналарга нафақалар тайинлаш ва тўлаш тартиби тўғрисида низом";

б) 1-банд қуйидаги таҳрирда баён қилинсин:

"Ушбу Низом "Фуқароларнинг давлат пенсия таъминоти тўғрисида"ги Ўзбекистон Республикаси Қонунига мувофиқ давлат пенсиясини тайинлаш учун зарур бўлган иш стажига эга бўлмаган шахсларга, ёшидан қатъи назар иш стажига эга бўлмаган I ва II гуруҳ ногиронлиги бўлган шахсларга (кейинги ўринларда - меҳнатга лаёқатсиз фуқаролар) ва болаликдан ногиронлиги бўлган фарзанди бор (бўлган) оналарга ҳар ойлик нафақалар (кейинги ўринларда - нафақа) тайинлаш ва тўлаш тартибини белгилайди";

в) 2-банднинг учинчи хатбошисидаги "болаликдан ногиронлардан" сўзлари "болаликдан ногиронлиги бўлган шахслардан" сўзлари билан алмаштирилсин;

г) 4-банд қуйидаги таҳрирда баён қилинсин:

"4. Нафақа қонун ҳужжатларида белгиланган миқдорда тайинланади. Нафақаларни тайинлаш давлат хизматлари марказларига мурожаат қилиш ёки давлат хизматларидан электрон тарзда фойдаланиш учун Ўзбекистон Республикаси Ягона интерактив давлат хизматлари порталида (кейинги ўринларда - ЯИДХП) рўйхатдан ўтиш орқали Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг туман (шаҳар) бўлимлари (кейинги ўринларда - Пенсия жамғармаси бўлими) томонидан амалга оширилади ҳамда нафақани етказиб бериш (топшириш) ваколати юкланган ташкилот ёки нафақа олувчининг хоҳишига кўра пул маблағлари фуқароларнинг депозит ҳисобварақларига пул ўтказиш йўли билан тижорат банкининг филиали орқали тўланади.";

д) 7, 10-13 ва 18-20-бандлар ўз кучини йўқотган деб ҳисоблансин;

е) 8-банд қуйидаги таҳрирда баён қилинсин:

"Болаликдан ногиронлиги бўлган фарзанди бор (бўлган) оналарга ёшга доир нафақа фарзанди ногиронлиги бўлган деб эътироф этилганлиги тўғрисида давлат тиббиёт муассасасининг тиббий хулосаси ёки Тиббий-ижтимоий эксперт комиссиясининг (кейинги ўринларда - ТИЭК) ногиронлик тўғрисидаги маълумотномаси билан тасдиқланган тақдирда тайинланади. Бунда нафақа миқдори пенсия тайинлаш учун зарур бўлган иш стажига эга бўлмаган шахслар ва меҳнатга лаёқатсиз фуқароларнинг нафақаси миқдорида белгиланади.";

ж) 17-банд қуйидаги таҳрирда баён қилинсин:

"17. Нафақа давлат хизматлари марказлари ёки ЯИДХП орқали мурожаат қилинганида Пенсия жамғармасининг бўлими томонидан тайинланади";

з) қуйидаги мазмундаги 17-1-банд қўшилсин:

"17-1. Манзил-колонияларда жазони ўтаётган, озодликдан маҳрум этишга ҳукм қилинган шахсларга нафақа тайинлаш тўғрисида манзил-колония маъмурияти томонидан бевосита манзил-колония жойлашган ердаги Давлат хизматлари марказига мурожаат қилинади";

и) 21-23-бандлар қуйидаги таҳрирда баён қилинсин:

"21. Ёшга доир нафақа тайинлашни сўраб ушбу Низомнинг 6-бандида назарда тутилган ёшга тўлгандан сўнг олтмиш кун ичида;

ногиронлик нафақасини тайинлашни сўраб ногиронлик гуруҳи белгиланганидан сўнг олтмиш кун ичида;

боқувчисини йўқотганлик нафақасини тайинлашни сўраб нафақа олиш ҳуқуқига эга бўлган шахс вафот этган кундан бошлаб олти ой ичида мурожаат этилган бўлса, нафақа уни олиш ҳуқуқи пайдо бўлган кундан эътиборан тайинланади.

Қолган барча ҳолатларда нафақа мурожаат қилинган кундан бошлаб тайинланади.

22. Нафақа тайинлаш рад этилган тақдирда Пенсия жамғармаси бўлими рад этиш сабаблари кўрсатилган маълумотни тегишли Давлат хизматлари марказига ёки ЯИДХПга электрон тарзда юборади.

23. Нафақа тайинлаш ёки нафақа тайинлаш рад этилиши тўғрисидаги қарор юзасидан мурожаат қилувчи томонидан бевосита судга ёки бўйсунув тартибида юқори турувчи органга шикоят қилиниши мумкин.";

к) 24-бандга қуйидаги мазмундаги хатбоши қўшилсин:

"Нафақа тайинлаш учун Давлат хизматлари марказига ёки ЯИДХП орқали мурожаат қилинганида маълумотлар "Пенсия" ахборот тизимида сақланади.";

л) 25-банд қуйидаги таҳрирда баён қилинсин:

"25. Нафақаларни тўлаш ҳар ойда, Пенсия жамғармаси бўлимлари томонидан белгиланган муддатларда, бироқ жорий тўлов ойидан кечикмай амалга оширилади.

Нафақалар қонун ҳужжатларида белгиланган тартибда ишончнома бўйича тўланиши мумкин.

Нафақалар ногиронлик муддати белгиланган сўнгги ой учун, меҳнатга лаёқатли бўлмаган оила аъзосининг 18 ёшга тўлган ой учун тўлиқ миқдорда тўланади.

Нафақа нафақа олувчининг хоҳишига кўра доимий яшаш ёки вақтинча турган жойи бўйича тўланади. Ўзбекистон Республикасида доимий яшайдиган чет эл фуқароси ёки фуқаролиги бўлмаган шахсга нафақа яшаш гувоҳномаси (ID-картаси) амал қиладиган муддат давомида тўланади

Доимий яшаш ёки вақтинчалик турган жойи мавжуд бўлмаса ёҳуд яшаш учун рухсатноманинг кейинги санаси ўртасида узилиш мавжуд бўлган тақдирда, Пенсия жамғармаси бўлими томонидан нафақани тўлаш доимий яшаш, вақтинчалик турган жойи бўйича рўйхатга олишнинг ёки яшаш учун рухсатноманинг янги санасидан бошлаб давом эттирилади.

Бунда нафақани тўлаш нафақа тўлаш тўхтатилган пайтдан, бироқ ўн икки ойдан ортиқ бўлмаган пайтдан бошлаб давом эттирилади.";

м) 26-банднинг иккинчи хатбошисидан "нафақа олувчининг шахсий ҳужжатлар йиғмажилди олингандан кейин шу туман (шаҳар)да" сўзлари чиқариб ташлансин;

н) 27-банд қуйидаги таҳрирда баён қилинсин:

"27. Нафақа олувчи озодликдан маҳрум этишга ҳукм этилган тақдирда тайинланган нафақани тўлаш тўхтатилади ва жазодан озод этилгандан кейин тикланади (манзил-колонияларда жазони ўтаётган, озодликдан маҳрум этишга ҳукм қилинган шахслар бундан мустасно)";

о) 31-банднинг иккинчи хатбошиси қуйидаги таҳрирда баён қилинсин:

"Нафақа олувчи вафот этган ой учун тўлиқ олинмай қолган нафақа миқдори юқорида кўрсатиб ўтилган шахсларга вафот этган ой учун тўлиқ миқдорда тўланади.".

Қонун ҳужжатлари маълумотлари миллий базаси (www.lex.uz),

2021 йил 29 апрель