Маҳаллий давлат ҳокимияти органлари томонидан норматив-ҳуқуқий ҳужжатлар лойиҳаларини ишлаб чиқиш, юридик-техник жиҳатдан расмийлаштириш, ҳуқуқий экспертизадан ўтказиш Қоидалари (АВ томонидан 18.11.2021 й. 3333-сон билан рўйхатга олинган адлия вазирининг 15.11.2021 й. 19-мҳ-сон буйруғига 1-илова)

Функция недоступна

Ўзбекистон Республикаси

Адлия вазирлигида

2021 йил 18 ноябрда 3333-сон

билан рўйхатга олинган

Ўзбекистон Республикаси

адлия вазирининг

2021 йил 15 ноябрдаги

19-мҳ-сон буйруғига

1-ИЛОВА

Маҳаллий давлат ҳокимияти органлари томонидан

норматив-ҳуқуқий ҳужжатлар лойиҳаларини ишлаб

чиқиш, юридик-техник жиҳатдан расмийлаштириш,

ҳуқуқий экспертизадан ўтказиш

ҚОИДАЛАРИ

Мазкур Қоидалар Ўзбекистон Республикасининг "Норматив-ҳуқуқий ҳужжатлар тўғрисида"ги Қонуни, Ўзбекистон Республикаси Президентининг 2021 йил 3 февралдаги ПФ-6155-сон "2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини "Ёшларни қўллаб-қувватлаш ва аҳоли саломатлигини мустаҳкамлаш йили"да амалга оширишга оид давлат дастури тўғрисида"ги ва 2018 йил 13 апрелдаги ПФ-5415-сон "Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида"ги фармонлари, 2018 йил 13 апрелдаги ПҚ-3666-сон "Ўзбекистон Республикаси Адлия вазирлиги фаолиятини янада такомиллаштиришга доир ташкилий чора-тадбирлар тўғрисида"ги қарори, Вазирлар Маҳкамасининг 2021 йил 22 июндаги 390-сон "Маҳаллий давлат ҳокимияти органлари фаолиятига "E-qaror" электрон тизимини жорий этиш чора-тадбирлари тўғрисида"ги қарорига мувофиқ маҳаллий давлат ҳокимияти органлари томонидан норматив-ҳуқуқий ҳужжатлар лойиҳаларини ишлаб чиқиш, юридик-техник жиҳатдан расмийлаштириш ва ҳуқуқий экспертизадан ўтказиш тартибини белгилайди.

Мазкур Қоидалар Қорақалпоғистон Республикаси Жўқорғи Кенгеси ва Вазирлар Кенгаши томонидан қабул қилинадиган норматив-ҳуқуқий ҳужжатлар лойиҳаларига нисбатан тавсиявий тусга эга.

1-БОБ. УМУМИЙ ҚОИДАЛАР

1. Мазкур Қоидаларда қуйидаги тушунчалардан фойдаланилади:

маҳаллий давлат ҳокимияти органларининг норматив-ҳуқуқий ҳужжатлари (бундан буён матнда қарор деб юритилади) - халқ депутатлари вилоят, туман, шаҳар Кенгашлари ва вилоят, туман, шаҳар ҳокимлари (бундан буён матнда маҳаллий давлат ҳокимияти органлари деб юритилади) қабул қиладиган, умуммажбурий давлат кўрсатмалари сифатида ҳуқуқий нормаларни белгилашга, ўзгартиришга ёки бекор қилишга қаратилган расмий ҳужжат;

ҳуқуқий экспертиза - қарор лойиҳасининг Ўзбекистон Республикасининг Конституцияси ва қонунларига, унга нисбатан юқорироқ юридик кучга эга бўлган бошқа норматив-ҳуқуқий ҳужжатларга, юридик-техник жиҳатдан расмийлаштиришнинг талабларига мувофиқлигини, шу жумладан қарор лойиҳасида ҳавола қилувчи нормалар қўлланилишининг асослилиги ҳамда мақсадга мувофиқлигини текшириш;

гендер-ҳуқуқий экспертиза - қарор лойиҳасини хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш принципларига мувофиқлиги юзасидан таҳлил қилиш;

коррупцияга қарши экспертиза - қарор лойиҳасида коррупциявий омилларни аниқлаш, аниқланган коррупциявий омилларни бартараф этишга қаратилган тавсиялар ишлаб чиқиш ва чоралар кўришга йўналтирилган чора-тадбирлар мажмуи;

қонунчилик техникаси - ҳуқуқ ижодкорлиги фаолиятини ташкил қилиш ва амалга ошириш учун фойдаланиладиган қоидалар, методлар, воситалар ва усуллар (инструментлар) мажмуи;

"E-qaror" электрон тизими - маҳаллий давлат ҳокимият органлари томонидан қабул қилинадиган қарор ва фармойиш лойиҳаларини ишлаб чиқиш, келишиш, юридик-техник жиҳатдан расмийлаштириш ва ҳуқуқий экспертизадан ўтказишни таъминловчи электрон тизим.

2. Ўзбекистон Республикаси "Норматив-ҳуқуқий ҳужжатлар тўғрисида"ги Қонунининг 16-моддасига мувофиқ халқ депутатлари вилоят, туман ва шаҳар Кенгашлари ҳамда вилоят, туман ва шаҳар ҳокимлари ўз ваколати доирасида қарорлар тарзида норматив-ҳуқуқий ҳужжатлар қабул қилади.

3. Қарор лойиҳасини ишлаб чиқиш, келишиш, Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳамда туман (шаҳар) адлия бўлимларида (бундан буён матнда ҳудудий адлия органлари деб юритилади) ҳуқуқий экспертизадан ўтказиш "E-qaror" электрон тизими орқали амалга оширилади.

"E-qaror" электрон тизимини четлаб ўтган ҳолда маҳаллий давлат ҳокимияти органларининг қарорлари қабул қилишга йўл қўйилмайди. Бундай ҳужжатлар юридик кучга эга эмас ҳамда у қабул қилинган пайтдан эътиборан ҳеч қандай ҳуқуқий оқибатларни келтириб чиқармайди.

4. Маҳаллий давлат ҳокимияти органининг юридик хизмати (бундан буён юридик хизмат деб юритилади) қарор лойиҳасини тегишли ҳудудий адлия органига ҳуқуқий, гендер-ҳуқуқий ва коррупцияга қарши экспертизадан ўтказиш учун киритилишини таъминлайди.

5. Қарор лойиҳаси маҳаллий давлат ҳокимияти органининг юридик хизмати томонидан Норматив-ҳуқуқий ҳужжатлар лойиҳалари муҳокамаси портали (regulation.gov.uz)га жамоатчилик муҳокамаси ўтказилиши учун жойлаштирилиши лозим.

6. Ҳуқуқий экспертиза якуни бўйича ҳудудий адлия органининг ижобий хулосаси мавжудлиги маҳаллий давлат ҳокимияти органлари томонидан қарорларни қабул қилишнинг мажбурий шарти ҳисобланади.

7. Ҳуқуқий нормаларни норматив-ҳуқуқий ҳужжат бўлмаган ҳужжатларга (хатлар, телефонограммалар, хусусий масалалар бўйича тушунтиришлар, якка тартибдаги хусусиятга эга ҳужжатлар ва бошқалар) киритилишига йўл қўйилмайди.

8. Маҳаллий давлат ҳокимияти органларининг қуйидаги ҳужжатлари ҳудудий адлия органларида ҳуқуқий экспертизадан ўтказилмайди:

а) шахсий тусдаги (лавозимга тайинлаш, бошқа лавозимга ўтказиш ёки лавозимидан озод қилиш, комиссия ва бошқа коллегиал органлар таркибини тасдиқлаш ва бошқа шу кабилар);

б) тезкор-фармойишли тусдаги (бир марталик топшириқлар);

в) муқаддам белгиланган тартибни ижро этишни ташкил этишга йўналтирилган ҳамда янги ҳуқуқий нормаларни ўз ичига олмаган, шу жумладан, бутун мазмуни бошқа органлар ва мансабдор шахсларнинг ҳужжатлари тўғрисида хабардор қилишдан иборат бўлган ҳужжатлар;

г) сессия, йиғилиш, конференцияларни чақириш тўғрисидаги ҳужжатлар;

д) лойиҳаларни кўриб чиқиш ва тасдиқлаш учун киритиш тўғрисидаги ҳужжатлар;

е) тавсия хусусиятига эга бўлган ҳужжатлар;

ё) норматив-ҳуқуқий ҳужжатларга расмий шарҳ бериш тўғрисидаги ҳужжатлар;

ж) умуммажбурий хусусиятга эга бўлмаган бошқа ҳужжатлар.

9. Ҳуқуқий экспертизадан ўтказилмайдиган ҳужжатларда умуммажбурий ҳуқуқий нормалар бўлмаслиги лозим.

10. Қарор лойиҳасида ҳатто битта умуммажбурий хусусиятга эга ҳуқуқий норма ўрнатилган бўлса ҳам, бундай лойиҳа албатта ҳудудий адлия органларида ҳуқуқий экспертизадан ўтказилиши шарт.

2-БОБ. ҚАРОР ЛОЙИҲАСИНИ "E-QAROR" ЭЛЕКТРОН

ТИЗИМИ ОРҚАЛИ ИШЛАБ ЧИҚИШ

1-§. Қарор лойиҳасини "E-qaror" электрон тизими

орқали ишлаб чиқишни ташкил этиш

11. Қарор лойиҳаси маҳаллий давлат ҳокимияти органининг масъул таркибий бўлинмаси ёки манфаатдор давлат органининг ҳудудий бўлинмаси томонидан (бундан буён матнда ишлаб чиқувчи деб юритилади) "E-qaror" электрон тизими орқали ишлаб чиқилади.

12. Ишлаб чиқувчи томонидан қарор лойиҳасини ишлаб чиқиш учун ишчи гуруҳ (комиссия) ташкил этилиши мумкин.

13. Ишчи гуруҳ (комиссия) таркибига тегишли тармоқлар ҳолати ва ривожланиши учун масъул бўлган таркибий бўлинмаларнинг, бошқа манфаатдор давлат органларининг, илмий ва бошқа ташкилотларнинг тегишли билим ва тажрибага эга бўлган вакиллари, шунингдек фуқаролар киритилиши мумкин. Бунда нодавлат ташкилотлар вакиллари, шунингдек фуқаролар ўз розилиги билан ишчи гуруҳ (комиссия) таркибига киритилади.

14. Ишлаб чиқувчи қарор лойиҳасини ишлаб чиқишда:

қонунчиликнинг ҳолатини, қарор лойиҳасининг ҳуқуқий жиҳатдан тартибга солиш предмети бўйича қўлланилиш амалиётини ўрганади;

ижтимоий муносабатларнинг муайян соҳасини ҳуқуқий жиҳатдан тартибга солишга салбий таъсир кўрсатаётган бўшлиқлар ва зиддиятларни, шунингдек ҳуқуқий жиҳатдан тартибга солишга бўлган ижтимоий эҳтиёжни, қонунчиликнинг самарадорлигига таъсир этувчи сабаблар ҳамда шарт-шароитларни аниқлайди;

ижтимоий муносабатларнинг тегишли соҳасини тартибга солувчи норматив-ҳуқуқий ҳужжатларни аниқлаш нуқтаи назаридан қонунчиликни хатловдан ўтказади;

давлат органлари ва бошқа ташкилотларнинг, шунингдек айрим фуқароларнинг таклифларини, оммавий ахборот воситаларининг материалларини, илмий ва бошқа ташкилотларнинг, олимлар ҳамда мутахассисларнинг маслаҳатлари ва тавсияларини, жамоатчилик фикрини аниқлашнинг бошқа воситалари маълумотларини умумлаштиради ҳамда улардан фойдаланади;

халқаро ҳуқуқнинг умум эътироф этилган принциплари ва нормаларини ҳисобга олади, шунингдек бошқа давлатлардаги ҳуқуқий жиҳатдан тартибга солиш борасидаги тажрибани ўрганади;

қарор лойиҳасининг ҳуқуқий жиҳатдан тартибга солиш предметига тааллуқли илмий тадқиқотлар натижаларини, оммавий ахборот воситаларидаги, Интернет жаҳон ахборот тармоғидаги мақолаларни, жисмоний ва юридик шахсларнинг мурожаатларини ўрганади;

қарорни амалга ошириш учун зарур бўладиган молиявий-иқтисодий харажатларга бўлган эҳтиёжни, уларнинг ўрнини қоплаш миқдорлари ва манбаларини белгилайди.

2-§. Қарор лойиҳасининг матнига ва тузилишига доир талаблар

15. Қарор лойиҳасининг матни лўнда, оддий ва равон тилда баён этилган бўлиши керак. Қарор лойиҳасининг матни турлича шарҳлаш ва талқин қилинишларга олиб келмаслиги керак. Қарор лойиҳасининг жумлалари расмий тил услубидан ва юридик атамалардан фойдаланилган ҳолда, умумий қабул қилинган грамматика, имло ва пунктуация қоидаларига мувофиқ тузилади.

16. Қарор лойиҳасининг матни қуйидаги талабларга мувофиқ бўлиши керак:

жумлаларнинг соддалиги ва қисқалиги;

таърифнинг аниқлиги;

баён этишнинг тизимлилиги ва кетма-кетлиги.

17. Қарор лойиҳасида, шунингдек унга илова қилинадиган ҳужжатларда қуйидагиларнинг қўлланилишига йўл қўйилмайди:

оғзаки нутқ шакллари;

давлат тилида тенг маъноли сўзлар ва тушунчалар мавжуд бўлган тақдирда, чет тиллари атамалари;

эскирган ҳамда кўп маънони англатадиган сўзлар ва иборалар, мажозий таққослашлар, сифатлашлар, киноялар;

аббревиатура ва қисқартмалар (бундан умумий қабул қилинган аббревиатура ва қисқартмалар, шунингдек қонуности ҳужжатларининг иловаларидаги ташкилотларнинг қисқартирилган номлари мустасно).

Қарор лойиҳасида:

давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган;

жинси бўйича бевосита ёки билвосита камситиш имконини яратадиган;

жисмоний ва юридик шахслар учун жавобгарликни, қўшимча тўлов ва йиғимларни, ортиқча маъмурий ва бошқа чеклашларни белгилайдиган, уларга асосланмаган харажатлар юзага келишига олиб келадиган, шунингдек рухсат бериш хусусиятига эга бўлган ҳуқуқий нормалар киритилиши тақиқланади.

18. Қарор лойиҳасида қонунчиликда мавжуд бўлмаган тушунча ва атамалар, шунингдек техникавий ва бошқа махсус тушунчалардан фойдаланилганда уларнинг таърифлари берилади.

Қонунчилик амалиётига мувофиқ умум қўлланиладиган тушунчаларга таъриф бериш талаб этилмайди.

19. Тушунчанинг ёки атаманинг таърифи унинг мазмунини тўлиқ очиб бериши керак. Тушунчани ёки атамани айнан шу тушунчанинг ўзи ва атама орқали, шунингдек ўзи таърифланиши лозим бўлган бошқа тушунча ва атамалар орқали таърифлашга йўл қўйилмайди.

20. Қарор лойиҳасида кўп маротаба қўлланилган уч ва ундан ортиқ тушунчага таъриф бериш зарурати бўлганда, улар алоҳида бандда кўрсатилади ва қарор лойиҳаси матнининг бошида келтирилади.

21. Сўз бирикмалари бир неча марта қўлланилган тақдирда, улар биринчи бор қайси таркибий бирликда (бандда, кичик бандда, хатбошида) қўлланилган бўлса, ўша таркибий бирликда тўлиқ таҳрирда баён қилинади ва мазкур тушунчанинг қарор лойиҳасининг кейинги қоидаларида қўлланиладиган қисқартирилган таърифи қавс ичида бош келишикда кўрсатилади.

22. Қарор лойиҳасида, қоида тариқасида, худди шундай юридик кучга эга бўлган норматив-ҳуқуқий ҳужжатда кўрсатилган ҳуқуқий нормалар қайта такрорланмайди.

Зарур бўлганда, қарор лойиҳасида юқорироқ юридик кучга эга бўлган норматив-ҳуқуқий ҳужжатларнинг айрим қоидалари мазкур норматив-ҳуқуқий ҳужжатларга ҳавола қилинган ҳолда акс эттирилади.

23. Бошқа норматив-ҳуқуқий ҳужжатларга доир ҳаволалар ҳуқуқий нормаларнинг ўзаро боғлиқлигини кўрсатиш зарурати бўлган ҳоллардагина ёки такрорлашларга йўл қўймаслик учунгина лойиҳа матнига киритилишига йўл қўйилади. Ҳаволалар аниқ бўлиши ва муайян норматив-ҳуқуқий ҳужжат ёки унинг алоҳида қоидаларини кўрсатиши керак.

Ҳар бир ҳавола қарор лойиҳаси бўйича тайёрланаётган тушунтириш хатида норматив-ҳуқуқий ҳужжатнинг реквизитлари, унинг ҳавола қилинаётган таркибий бирлиги кўрсатилган ҳолда асослантирилиши керак.

Қарор лойиҳасида давлат органларининг баённомаларига, топшириқларига ва хатларига ҳавола қилишга йўл қўйилмайди.

24. Қарор лойиҳаси бандининг матнини шу лойиҳанинг бошқа бандларида такрор баён қилишга йўл қўйилмайди.

25. Қарор лойиҳасининг тузилиши ҳуқуқий тартибга солиш предметининг мантиқан ривожланиб бориши ва ёритилишини таъминлаши керак.

26. Ҳажмига кўра қарор лойиҳаси пасайиб борувчи қуйидаги таркибий бирликларга бўлинади: бўлимлар, кичик бўлимлар, боблар, параграфлар, бандлар, кичик бандлар ва хатбошилар.

27. Қарор лойиҳасининг бўлимлари рим рақамлари, кичик бўлимлари ва боблари эса араб рақамлари билан рақамланади ва сарлавҳаларга эга бўлади. Параграфлар "§" белгиси билан белгиланади, араб рақамлари билан рақамланади ва сарлавҳаларга эга бўлади.

Бўлимлар, кичик бўлимлар, боблар ва параграфларнинг белгиси ва номи бош ҳарф билан, "ярим қора" шрифтда, матн марказига тўғриланган ҳолда, қўштирноқларсиз, қаторлар ўртасидаги бирлик интервалда ва сатр бошисиз, битта қаторда рақами кўрсатилиб, кетидан нуқта қўйилган ҳолда ёзилади.

28. Қуйидаги таркибий бирликнинг киритилишига йўл қўйилмайди:

агар қарор лойиҳасида боблар бўлмаса, "бўлим" бирлигининг;

агар қарор лойиҳасида бўлимлар бўлмаса, "кичик бўлим" бирлигининг;

агар қарор лойиҳасида бандлар бўлмаса, "кичик банд" ва "хатбоши" бирликларининг.

29. Ҳар бир ишлаб чиқиладиган қарор лойиҳаси номга эга бўлиши керак. Ном қисқа, тушунарли ифодаланиши ва унинг асосий ҳуқуқий тартибга солиш предметини акс эттириши зарур.

30. Қарор лойиҳаси уни қабул қилиш сабаблари ва мақсадларини тушунтиришдан иборат бўлган, қарор лойиҳасининг бошланишида жойлаштириладиган муқаддимага эга бўлиши мумкин.

Қарор лойиҳасининг муқаддимаси унинг мазмунини мантиқий ривожлантирувчи бир нечта хатбошиларда баён этилиши мумкин.

Муқаддима:

мустақил норматив кўрсатмаларни ўз ичига олмаслиги;

қарор қабул қилиниши муносабати билан ўз кучини йўқотган деб топилиши, ўзгартириш ва қўшимчалар киритилиши лозим бўлган бошқа норматив-ҳуқуқий ҳужжатларга доир ҳаволаларга эга бўлмаслиги;

қарор лойиҳасида қўлланиладиган асосий тушунчаларнинг аҳамиятини ўз ичига олмаслиги;

рақамланмаслиги керак.

31. Қарор лойиҳасининг муқаддимасида унинг қабул қилиниши учун асос бўлган ёки ижроси таъминланаётган қонунчилик ҳужжатлари кўрсатилиши мумкин.

32. Қарор лойиҳасида унинг (ёки унинг таркибий бирликларининг) расман эълон қилингандан сўнг ёхуд бошқа кечроқ муддатда кучга кириши тўғрисида банд киритилиши лозим.

Бунда тадбиркорлик фаолиятини амалга ошириш тартиб-таомили мураккаблаштирилишини ва тадбиркорлик фаолияти субъектлари зиммасига янги мажбуриятлар юклатилишини назарда тутадиган, шунингдек уларнинг жавобгарлигига оид янги чораларни белгилайдиган норматив-ҳуқуқий ҳужжатлар расмий эълон қилинган кундан эътиборан камида уч ойдан кейин кучга киради.

33. Қарор лойиҳасида ҳуқуқий нормалар араб рақамларида нуқта қўйилган ҳолда кетма-кет рақамланиб, бандлар тарзида баён қилинади, шунингдек сарлавҳаларга эга бўлмайди.

Ҳуқуқий нормаларни иккиланган (қўшалоқ) тарзда рақамлашга ҳамда бир вақтнинг ўзида кичик бандларни ва мустақил (кичик бандлар билан боғланмаган) хатбошиларни баён этишга йўл қўйилмайди.

34. Ҳар бир банд, қоида тариқасида, битта ҳуқуқий нормани ўз ичига олиши ҳамда тўлиқ ва тугалланган мазмунга эга бўлиши керак.

Қарор лойиҳасининг қарор қисмига энг муҳим бўлган ҳуқуқий нормалар киритилади.

35. Бандлар кичик бандлар ёки хатбошиларга бўлиниши мумкин.

36. Кичик бандлар доирасимон қавс билан ёпиладиган кичик ҳарфлар билан белгиланади. Ҳарфлар алифбо бўйича кетма-кетликда баён қилиниши керак.

37. Кичик бандлар фақат хатбошиларга бўлиниши мумкин. Хатбошилар бошланишида дефис ёки бошқа белгиларни ишлатишга йўл қўйилмайди.

38. Қарор билан ушбу ҳужжатларнинг таркибий қисми бўлган низомлар, қоидалар, йўриқномалар тасдиқланиши мумкин.

39. Қарор лойиҳасига талаблар, рўйхатлар, жадваллар, графиклар, тарифлар, хариталар, схемалар, тузилмалар, ҳужжатларнинг, бланкаларнинг намуналари, шунингдек тавсия хусусиятига эга ҳужжатлар (намунавий низомлар, уставлар, услубий тавсиялар ва бошқалар) илова қилиниши мумкин.

40. Агар қарор лойиҳасининг қарор қисмидаги бандлари (кичик бандлари, хатбошилари) билан ҳужжатларни тасдиқлаш назарда тутилган бўлса, норматив-ҳуқуқий ҳужжатнинг тегишли таркибий бирлиги ва у томонидан тасдиқланадиган ҳужжатнинг номи бир-бирига мос равишда баён этилиши керак.

41. Бўлимлардан иборат бўлган иловалар изчил кетма-кетликда рақамланган бандларга эга бўлади. Бўлим номга эга бўлади.

3-§. Қарор лойиҳасини юридик-техник жиҳатдан

расмийлаштириш ва расмий эълон қилиш

манбаларини кўрсатиш тартиби

42. Қарор лойиҳасининг матни А4 форматдаги варақнинг бир томонида унинг масштаби кичрайтирилмаган ҳолда жойлаштирилиши керак.

43. Агар қарор лойиҳаси икки ёки ундан ортиқ саҳифада баён этилган бўлса, унинг ҳар бир саҳифаси ва иловалари алоҳида рақамланиши керак. Саҳифанинг тартиб рақами саҳифанинг юқорисида ўртада 2 рақамидан бошлаб ёзилади. Биринчи саҳифада 1 рақами қўйилмайди.

44. Қарор лойиҳаси, қоида тариқасида, Мiсrоsоft Wоrd редакторидан ва қуйидаги параметрлардан фойдаланган ҳолда тайёрланади:

саҳифанинг чап ҳошияси 3 см, ўнг ҳошияси 2 см, паст ва юқори ҳошиялари 2 см;

14 ўлчамли шрифт;

биринчи қаторнинг сатр бошиси 1,27 см;

қаторлар ўртасидаги интервал (множитель) 1.

45. Қарор лойиҳасининг биринчи саҳифа юқори қисмининг ўнг бурчагида "Лойиҳа" сўзи қўйилади, унинг ўлчами матн шрифти ўлчами билан айнан бир хил бўлиши лозим.

46. Қарор лойиҳаси турининг матни бош ҳарфлар билан, матнини марказга тўғрилаган ҳолда, "ярим қора" шрифтда, қаторлар ўртасидаги бирлик интервалда ва сатр бошисиз расмийлаштирилади. Қарор лойиҳасининг тури икки қаторда ифодаланади.

47. Қарор лойиҳасининг номи кичик ҳарфларда, "ярим қора" шрифтда, матн марказга тўғриланган ҳолда, қўштирноқларсиз, қаторлараро бирлик интервалда ва сатр бошисиз ёзилади.

48. Матннинг ҳар бир қаторида сўзлар кўчирилмасдан тугалланган бўлиши лозим. Ҳар бир қатор охирида боғловчилар, "№" белгиси, сонлар қисми, аббревиатуралар ва бошқа шу кабилар, қоида тариқасида, қолдирилмайди.

49. Илова белгиси 12 ўлчамли шрифтда саҳифанинг юқори ўнг бурчагида, илованинг рақами (агар иловалар бир нечта бўлса), илова қилинаётган норматив-ҳуқуқий ҳужжат тури кўрсатилган ҳамда ҳужжат рақами ва санаси учун жой қолдирилган ҳолда жойлаштирилади.

50. Илованинг номи кичик ҳарфларда, "ярим қора" шрифтда, матн марказга тўғриланган ҳолда, қўштирноқларсиз, қаторлар ўртасидаги бирлик интервалда ва сатр бошисиз ёзилади.

4-§. Қарорларга ўзгартириш ва қўшимчалар киритиш,

шунингдек уларни ўз кучини йўқотган деб топиш

тўғрисидаги лойиҳаларни тайёрлашнинг

ўзига хос хусусиятлари

51. Қарорларга ўзгартириш ва қўшимчалар киритиш, шунингдек уларни ўз кучини йўқотган деб топиш тўғрисидаги қарор лойиҳаси, қоида тариқасида, қуйидаги ҳолларда тайёрланади:

Ўзбекистон Республикаси қонунларининг, Ўзбекистон Республикаси Президенти ҳужжатларининг ва Вазирлар Маҳкамаси қарорларининг қонунчиликни янгидан қабул қилинган норматив-ҳуқуқий ҳужжатларга мувофиқлаштиришга доир талабларини бажариш, шунингдек Ўзбекистон Республикаси Президентининг ва Ўзбекистон Республикаси Вазирлар Маҳкамасининг топшириқларини бажариш учун;

агар ишлаб чиқилаётган қарор лойиҳаси бошқа қарорларга ўзгартириш ёки қўшимчалар киритиш, шунингдек уларни ўз кучини йўқотган деб топиш заруриятини келтириб чиқарса;

қарор лойиҳасини тайёрлаш жараёнида худди шундай муносабатларни тартибга солувчи норматив-ҳуқуқий ҳужжат мавжудлиги маълум бўлиб қолганда ҳамда янги норматив-ҳуқуқий ҳужжатни қабул қилмасдан мазкур норматив-ҳуқуқий ҳужжатга ўзгартириш ва қўшимчалар киритиш йўли билан ҳуқуқий жиҳатдан тартибга солиш имконияти аниқланганда;

айни бир масала бўйича бир талай норматив-ҳуқуқий ҳужжатлар мавжуд бўлишини ва ҳуқуқий нормаларда аниқланган зиддиятларни бартараф этиш учун.

52. Қуйидагилар қарорларга ўзгартиришлар киритиш деб эътироф этилади:

рақамлар, сўзлар, жумлалар, графалар, блоклар ва позицияларни алмаштириш;

хатбошилар, кичик бандлар, бандлар, параграфлар, боблар, кичик бўлимлар, бўлимлар, иловаларни ўз кучини йўқотган деб топиш ёки рақамлар, сўзлар, жумлалар, графалар, блоклар, позициялар ва хатбошиларни чиқариб ташлаш;

хатбошилар, кичик бандлар, бандлар, параграфлар, боблар, кичик бўлимлар, бўлимлар, иловаларни, шунингдек параграфлар, боблар, кичик бўлимлар, бўлимлар, иловаларнинг номларини янги таҳрирда баён қилиш.

Графа - икки вертикал чизиқ билан чегараланган жадвал шаклида ифодаланган матннинг, ҳужжатнинг бўлими ёки банди.

Блок - турли шаклларда (тўртбурчак, тўғри бурчак, цилиндр, овал ва ҳ.к.) функционал жиҳатдан бирлаштирилган жадвалларнинг бир қисми;

Позиция - икки горизонтал чизиқ билан чегараланган жадвал шаклида графада ифодаланган матннинг, ҳужжатнинг бўлими, кичик бўлими, боби, банди, кичик банди.

53. Қуйидагилар қарорларга қўшимчалар киритиш деб эътироф этилади:

қарорнинг таркибий бирлигини янги сўзлар, рақамлар ёки жумлалар билан тўлдириш;

қарорларни таркибий бирликлар (бўлим, кичик бўлим, боб, параграф, илова, графа, блок, позиция, банд, кичик банд ва хатбоши) билан тўлдириш.

54. Қарорларга ўзгартириш ва қўшимчалар киритишни назарда тутувчи матн қуйидагиларга бўлинади:

арабча рақамлар билан нуқта қўйиб рақамланадиган бандлар;

кичик ҳарфларда қавс билан рақамланадиган кичик бандлар;

хатбошилар.

55. Агар банд билан тегишли қарорга фақат битта ўзгартириш ёки қўшимча киритиш назарда тутилган бўлса, кичик бандлар қўлланилмайди.

56. Қарорларга ўзгартириш ва қўшимчалар киритишда унинг бўлимлари, кичик бўлимлари, боблари, параграфлари, бандлари рақамлар билан рақамланиши ҳамда кичик бандларининг рақамлар билан рақамланиши ёки ҳарфлар билан рақамланиши ўзгармайди.

57. Агар қарорлар янги таркибий бирликлар билан тўлдирилаётган бўлса, уларни асосий рақам ёки ҳарф белгилари тепасига қўйиладиган қўшимча рақамлар билан белгилаш зарур.

58. Асосий рақам ёки ҳарф белгилари тепасига қўйиладиган рақамларни қўшишга фақат кейинги ўзгартиришлар ва қўшимчаларни киритишда йўл қўйилади. Таркибий бирликларнинг барча рақамланиши ўзгаришининг олдини олиш учун бундай белгилардан фақат кейинги қўшимчаларда фойдаланилади.

59. Агар тегишли қўшимчалар қарорларнинг таркибий бирлиги (бўлим, кичик бўлим, боб, параграф, банд, кичик банд ва хатбоши) охирига киритилаётган бўлса, мавжуд рақамланиш давом этади.

60. Банд ёки кичик банд янги хатбоши билан тўлдирилганда мазкур банднинг ёки кичик банднинг кейинги хатбошилари рақамланиши тегишли тартибда ўзгаради.

61. Агар қарор лойиҳаси бир вақтнинг ўзида бир нечта қарорларга ёки уларнинг таркибий бирликларига ўзгартириш ва қўшимчалар киритишни, шунингдек уларни ўз кучини йўқотган деб топишни назарда тутаётган бўлса, мазкур ҳужжатлар (уларнинг юридик кучи ва қабул қилинган санаси бўйича) хронологик тартибда жойлаштирилади. Айнан битта санада қабул қилинган норматив-ҳуқуқий ҳужжатлар уларнинг рақамларига мувофиқ ортиб бориш тартибида жойлаштирилади.

62. Агар қарорларга ўзгартириш ва қўшимчалар киритиш, шунингдек уларни ўз кучини йўқотган деб топиш тўғрисидаги нормаларни ўз ичига олган лойиҳада ушбу нормалар икки ёки ундан ортиқ бандни ташкил этса ва ҳажми катта бўлса, улар лойиҳага илова (иловалар) тарзида тайёрланади.

63. Қарорларга ўзгартириш ва қўшимчалар киритилганда мазкур ҳужжатнинг тури, қабул қилиш санаси, рақами ва номи кўрсатилади.

64. Агар тегишли ўзгартириш ва қўшимчалар қарорнинг иловасига киритилаётган бўлса, қарор лойиҳасида тегишли норматив-ҳуқуқий ҳужжатнинг номи келтирилмайди, балки у билан тасдиқланган илованинг номи кўрсатилади.

65. Ўзгартирилаётган, қўшилаётган ва чиқариб ташланаётган сўзлар ҳамда рақамлар қўштирноқ ичига олинади.

66. Агар илованинг, бўлимнинг, кичик бўлимнинг, бобнинг, параграфнинг, банднинг, кичик банднинг, хатбошининг ва жумланинг матнини сезиларли ўзгартириш талаб этилса, уларни янги таҳрирда баён этиш зарур.

67. Агар қарорнинг банди ёки кичик банди кириш хатбошисининг давоми бўлган хатбошилардан иборат бўлса, хатбошиларни ҳисоблаш кириш хатбошисидан бошланади.

68. Қарорларни ўз кучини йўқотган деб топишни назарда тутувчи қарор лойиҳасининг иловаси фақат бандлардан иборат бўлади. Бу ҳолда бандлардан иборат ўз кучини йўқотган деб топилаётган қарорларнинг рўйхати келтирилади.

69. Бутун қарорни ёки унинг кичик бандига қадар бўлган, шу жумладан кичик бандни ҳам қўшган ҳолда, таркибий бирлигини ўз кучини йўқотган деб топиш зарур бўлган ҳолларда, ушбу ҳужжат умуман ёки унинг кичик бандига қадар бўлган, шу жумладан кичик бандни ҳам қўшган ҳолда, таркибий бирлиги ўз кучини йўқотган деб топилади.

Қарорнинг хатбоши тарзидаги таркибий бирлигини ўз кучини йўқотган деб топиш зарур бўлган ҳолларда, мазкур хатбоши чиқариб ташланади.

70. Қарорнинг тегишли таркибий бирликлари ўз кучини йўқотган деб топилган тақдирда, кейинги таркибий бирликларнинг рақамланиши ўзгармайди.

Хатбоши чиқариб ташланганда кейинги хатбошиларнинг кетма-кетлиги қайта кўриб чиқилади.

71. Агар қарорда фақат битта амалдаги таркибий бирлик мавжуд бўлиб, қолганлари эса ўз кучини йўқотган бўлса, ушбу таркибий бирликни ўз кучини йўқотган деб топиш зарур бўлган тақдирда, бутун норматив-ҳуқуқий ҳужжат ўз кучини йўқотган деб топилиши шарт.

72. Ўз кучини йўқотган деб топилиши лозим бўлган қарорларнинг рўйхатларига амал қилиш муддати тугаган вақтинчалик тусдаги ҳужжатлар ёки нормалар киритилмайди.

73. Амал қилиш муддати тугаган қарор алоҳида нормасининг ёки бутун норматив-ҳуқуқий ҳужжатнинг амал қилиш муддати узайтирилмайди. Бу ҳолда янги норма киритилишини назарда тутувчи лойиҳа тайёрланади.

74. Агар ўз кучини йўқотган деб топилиши лозим бўлган бандда, кичик бандда ёки хатбошида тегишли равишда ўз кучини йўқотиши керак бўлган иловага кўрсатма мавжуд бўлса, мазкур таркибий бирлик ва унда назарда тутилган илова ўз кучини йўқотган деб топилиши лозим.

Агар илова тўлиқ ўз кучини йўқотган деб топилиши мумкин бўлмаса, унинг фақат тегишли таркибий бирликлари ўз кучини йўқотган деб топилиши (чиқариб ташланиши) лозим.

75. Қарор тўлиқ ёки қисман ўз кучини йўқотган деб топилган тақдирда, ўз кучини тўлиқ ёки қисман йўқотган деб топилаётган қарорга қайси қарорнинг қоидаларига кўра ўзгартириш ва қўшимчалар киритилган бўлса, ўша қарорнинг тегишли қоидалари ҳам ўз кучини йўқотган деб топилиши лозим.

Илгари қабул қилинган қарорни ўз кучини йўқотган деб топишни назарда тутувчи қарор ўз кучини йўқотган деб топилган тақдирда, илгари қабул қилинган қарорнинг амал қилиши тикланмайди. Мазкур қоида қарорнинг таркибий бирлигини ўз кучини йўқотган деб топишга (чиқариб ташлашга) нисбатан ҳам татбиқ этилади.

3-БОБ. ҚАРОР ЛОЙИҲАСИНИ МАНФААТДОР ОРГАНЛАР

ВА ТАШКИЛОТЛАР БИЛАН КЕЛИШИБ ОЛИШ

76. Ишлаб чиқувчи қарор лойиҳасига биринчи раҳбар даражасида "E-qaror" электрон тизими орқали виза қўяди ҳамда қарор лойиҳасини узил-кесил келишиб олиш (виза қўйиш) учун манфаатдор давлат органининг соҳага масъул ҳудудий бўлинмаларига (бундан буён матнда манфаатдор ташкилотлар деб юритилади) юборади, бундан қонунчиликда назарда тутилган ҳоллар мустасно.

77. Қуйидагилар билан мажбурий тартибда келишиб олинади:

Қорақалпоғистон Республикаси Иқтисодий тараққиёт ва камбағалликни қисқартириш вазирлиги ёки вилоятлар Иқтисодий тараққиёт ва камбағалликни қисқартириш бош бошқармалари ёки туман (шаҳар) Иқтисодий тараққиёт ва камбағалликни қисқартириш бўлимлари билан - барча лойиҳалар, шу жумладан ҳудудий ривожланиш дастурлари ва инвестиция дастурлари лойиҳалари;

Қорақалпоғистон Республикаси Молия вазирлиги, вилоятлар ва Тошкент шаҳар ҳокимликлари молия бош бошқармалари ёки туман (шаҳар) ҳокимликлари молия бўлимлари билан - маҳаллий бюджетдан маблағлар ажратишга доир лойиҳалар.

Қарор лойиҳаси қонунчиликда назарда тутилган ҳолларда бошқа манфаатдор ташкилотлар билан ҳам мажбурий тартибда келишиб олинади.

78. Манфаатдор ташкилотлар "E-qaror" электрон тизими орқали кўриб чиқиш учун келиб тушган қарор лойиҳасини 3 кун муддатда:

иш юритувига қабул қилади ҳамда кўриб чиқади;

электрон рақамли имзо қўйиш йўли билан келишади (виза қўяди) ёки зарурат бўлганда қарор лойиҳаси юзасидан ишлаб чиқувчига электрон тизим орқали

ўз таклиф ва эътирозларини кўрсатган ҳолда жавоб хатини киритади;

келишилган қарор лойиҳасини ишлаб чиқувчига юборади.

79. Манфаатдор ташкилотларга келишиш учун киритилган ҳужжатлар лойиҳалари юзасидан белгиланган муддатларда "E-qaror" электрон тизими орқали муносабат билдирилмаган тақдирда, қарор лойиҳаси келишилган ҳисобланади.

80. "E-qaror" электрон тизими орқали юбориладиган хатда асосланмаган фикр-мулоҳазалар ва таклифлар ишлаб чиқувчи томонидан қабул қилинмаслиги мумкин. Бунда асосланмаган фикр-мулоҳазалар ва таклифлар қабул қилинмаганлигининг оқибатлари учун жавобгарлик манфаатдор ташкилотнинг ўз фикр-мулоҳазалари ва таклифларини асослаб бермаган биринчи раҳбари зиммасига юклатилади.

81. Қабул қилиниши қарор лойиҳасининг мазмуни ва тузилишини жиддий равишда ўзгартирадиган, қарор лойиҳасига доир бўлган фикр-мулоҳазалар ҳамда таклифлар мавжуд бўлган тақдирда манфаатдор ташкилот ўзининг қарор лойиҳаси вариантини "E-qaror" электрон тизими орқали ишлаб чиқувчига таклиф этиши мумкин.

82. Ишлаб чиқувчи 3 кун муддатда манфаатдор ташкилотлар билан келишилган қарор лойиҳасини электрон тизимдан олади ва уни манфаатдор ташкилотнинг тегишли хулосасини ҳисобга олган ҳолда (зарур ҳолларда) якуний кўриб чиқади ҳамда уни электрон тизим орқали тегишли маҳаллий ижро этувчи ҳокимият органига (ҳоким қарори лойиҳалари бўйича) ёки маҳаллий вакиллик органлари котибиятига (халқ депутатлари маҳаллий Кенгашлари қарорлари бўйича) киритади.

83. Маҳаллий ижро этувчи ҳокимият органининг тегишли таркибий бўлинмаси, маҳаллий вакиллик органлари котибияти 3 кун муддатда "E-qaror" электрон тизими орқали келиб тушган қарор лойиҳасини иш юритувига қабул қилади ва уни кўриб чиқади ҳамда қарор лойиҳасини электрон рақамли имзо қўйиш йўли билан келишади (виза қўяди) ёки зарурат бўлганда уни ишлаб чиқувчига электрон тизим орқали ўз таклиф ва эътирозларини кўрсатган ҳолда қайтаради.

84. Ишлаб чиқувчи келишилган қарор лойиҳасини маҳаллий давлат ҳокимияти органининг юридик хизматига киритади.

Бунда, қарор лойиҳасининг коррупцияга қарши экспертизаси натижалари юзасидан Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомда (рўйхат рақами 3287, 2021 йил 24 февраль) белгиланган тартибда коррупциявий омилларни аниқлаш бўйича чеклист тўлдирилади ва қарор лойиҳасини ишлаб чиқувчининг биринчи раҳбари (истисно - унинг биринчи ўринбосари) имзоси билан расмийлаштирилади ҳамда маҳаллий давлат ҳокимияти органининг юридик хизматига қарор лойиҳаси билан бирга тақдим қилинади.

4-БОБ. ҚАРОР ЛОЙИҲАСИНИ ЮРИДИК

ХИЗМАТ ТОМОНИДАН ҲУҚУҚИЙ

ЭКСПЕРТИЗАДАН ЎТКАЗИШ

85. Юридик хизмат қарор лойиҳасини Норматив-ҳуқуқий ҳужжатлар лойиҳалари муҳокамаси порталига жамоатчилик муҳокамаси ўтказилиши учун жойлаштиради.

86. Жамоатчилик муҳокамаси якунлангандан сўнг юридик хизмат икки кун муддатда қарор лойиҳасини Ўзбекистон Республикасининг Конституцияси ва қонунларига, унга нисбатан юқорироқ юридик кучга эга бўлган бошқа норматив-ҳуқуқий ҳужжатларга, юридик-техник жиҳатдан расмийлаштиришнинг талабларига мувофиқлигини, шу жумладан қарор лойиҳасида ҳавола қилувчи нормалар қўлланилишининг асослилиги ҳамда мақсадга мувофиқлиги нуқтаи назаридан ҳуқуқий экспертизадан ўтказади.

Қарор лойиҳасининг ҳуқуқий экспертизаси жараёнида юридик хизмат уларда коррупция учун, давлат ҳокимияти ва бошқаруви органлари тизимида бошқа ҳуқуқбузарликларни содир этиш учун шарт-шароитлар яратувчи, шунингдек тадбиркорлик субъектлари учун ортиқча маъмурий ҳамда ўзга чекловларни жорий этувчи, тадбиркорлик субъектларининг асоссиз харажатлари юзага келишига олиб келувчи қоидалар ва нормалар бор-йўқлигини аниқлаш нуқтаи назаридан таҳлилни, шунингдек қарор лойиҳасининг Норматив-ҳуқуқий ҳужжатлар лойиҳалари муҳокамаси портали (regulation.gov.uz)га жойлаштирилиши натижаларини ҳам ўрганади.

Қарор лойиҳаси қонунчиликка, қонунчилик техникаси қоидаларига мувофиқ бўлган, шунингдек ҳавола қилувчи нормаларнинг қўлланилиши асосли ва мақсадга мувофиқ бўлган тақдирда, юридик хизмат унинг юзасидан ҳуқуқий хулоса тайёрлайди ҳамда хулоса юридик хизмат раҳбари (юридик хизмат раҳбари лавозими мавжуд бўлмаган тақдирда юридик хизмат ходими) томонидан имзоланади.

87. Юридик хизматнинг ҳуқуқий хулосасида қуйидагилар акс эттирилади:

норматив-ҳуқуқий ҳужжатни ишлаб чиқиш қайси норматив-ҳуқуқий ҳужжатларга биноан топширилган бўлса, ўша норматив-ҳуқуқий ҳужжатлар (номи, қабул қилинган санаси, рақами, эълон қилинган расмий манбаи, топшириқ баён этилган тегишли банди (кичик банди, хатбошиси) тўғрисидаги, шунингдек юқори органнинг топшириқлари (органнинг номи, топшириқнинг рақами ва санаси, зарур бўлган тақдирда, топшириқ берган мансабдор шахс) тўғрисидаги маълумотлар (топшириқ мавжуд бўлганда);

қарор лойиҳаси асосий қоидаларининг ҳуқуқий табиати тушунтирилган ҳолда, бу қоидалар моҳияти ва аҳамиятининг қисқача баёни;

қарор лойиҳасининг қонунчиликка, қонунчилик техникаси қоидаларига мувофиқлиги, шунингдек қарор лойиҳасидаги ҳар бир ҳавола қилувчи норма қўлланилишининг асослилиги ва мақсадга мувофиқлиги тўғрисидаги хулоса;

қарор лойиҳасининг жамоатчилик муҳокамасидан ўтказилганлиги ва унинг натижалари ҳақидаги маълумотлар;

қарор лойиҳасининг коррупцияга қарши ва бошқа турдаги экспертизалардан ўтказилганлиги тўғрисидаги маълумотлар.

88. Қарор лойиҳаси қонунчиликка ва қонунчилик техникаси қоидаларига мувофиқ бўлмаганда, шунингдек ҳавола қилувчи нормалар асоссиз ва мақсадга номувофиқ бўлганда, юридик хизмат икки кун муддатда ишлаб чиқувчининг лойиҳани тайёрлаш учун масъул бўлган таркибий бўлинмасига уни тегишли фикр-мулоҳазалар билан маромига етказиш учун қайтаради.

5-БОБ. ҚАРОР ЛОЙИҲАСИНИНГ ҲУДУДИЙ АДЛИЯ

ОРГАНЛАРИДАГИ ҲУҚУҚИЙ ЭКСПЕРТИЗАСИ

89. Барча манфаатдор ташкилотлар билан келишиб олинганидан кейин юридик хизмат қарор лойиҳасини қарорни қабул қилувчи органга киритишдан олдин уни ҳуқуқий экспертизадан ўтказиш учун тегишли ҳудудий адлия органига "E-qaror" электрон тизими орқали юридик хизмат хулосасини илова қилган ҳолда юборади.

90. Қарор лойиҳаси ҳудудий адлия органлари томонидан икки иш куни ичида хулосасиз "E-qaror" электрон тизими орқали ишлаб чиқувчига қуйидаги ҳолларда ҳуқуқий экспертиза ўтказилмасдан "E-qaror" электрон тизими орқали қайтарилади:

лойиҳа норматив-ҳуқуқий хусусиятга эга бўлмаса;

лойиҳа барча манфаатдор ташкилотлар билан уларнинг биринчи раҳбарлари (истисно ҳолларда - уларнинг биринчи ўринбосари) даражасида келишиб олинмаганда;

юридик хизматнинг ҳуқуқий хулосасида қарор лойиҳасининг жамоатчилик муҳокамасидан ўтказилганлиги ва унинг натижалари тўғрисидаги маълумотлар акс эттирилмаган бўлса.

91. Халқ депутатлари вилоят, туман, шаҳар Кенгашларининг қарорлари лойиҳалари мазкур Кенгашлар сессиялари ўтказилишидан камида беш кун олдин ҳудудий адлия органига "E-qaror" электрон тизими орқали юридик хизмат томонидан тақдим этилади.

92. Халқ депутатлари вилоят, туман, шаҳар Кенгашларининг қарор лойиҳалари икки иш куни ичида ҳамда вилоят, туман, шаҳар ҳокимининг қарор лойиҳалари беш иш куни ичида ҳудудий адлия органлари томонидан ҳуқуқий экспертизадан ўтказилади.

93. Қарор лойиҳаси ҳудудий адлия органлари томонидан ҳуқуқий экспертизадан ўтказилаётганда:

унинг Ўзбекистон Республикасининг Конституцияси ва қонунларига, унга нисбатан юқорироқ юридик кучга эга бўлган бошқа норматив-ҳуқуқий ҳужжатларга, юридик-техник жиҳатдан расмийлаштиришнинг талабларига мувофиқлиги, шу жумладан қарор лойиҳасида ҳавола қилувчи нормалар қўлланилишининг асослилиги ҳамда мақсадга мувофиқлиги аниқланади;

унда коррупция учун, давлат ҳокимияти ва бошқаруви органлари тизимида бошқа ҳуқуқбузарликларни содир этиш учун шарт-шароитлар яратувчи, шунингдек тадбиркорлик субъектлари учун ортиқча маъмурий ҳамда ўзга чекловларни жорий этувчи, тадбиркорлик субъектларининг асоссиз харажатлари юзага келишига олиб келувчи қоидалар ва нормалар бор-йўқлигини аниқлаш нуқтаи назаридан таҳлили амалга оширилади;

унда тадбиркорлик фаолиятини амалга ошириш жараёнини мураккаблаштиришни ва тадбиркорлик субъектларига янги юридик мажбуриятлар юклатишни назарда тутадиган, шунингдек тадбиркорлик субъектларига юридик жавобгарликнинг янги чораларини белгилайдиган нормалар мавжудлиги бўйича ўрганилади;

ҳуқуқий тартибга солиш предмети (муайян соҳадаги муносабат) ва ҳуқуқий тартибга солиш механизмининг ишлаб чиқилиш даражаси аниқланади, бунда тегишли муносабатларнинг ҳуқуқий тартибга солинганлик ҳолати ва даражасига баҳо бериш мақсадида соҳага оид норматив-ҳуқуқий ҳужжатлар хатловдан ўтказилади.

94. Қарор лойиҳаси нормаларидаги муайян ижтимоий муносабатларни ҳуқуқий тартибга солишга салбий таъсир кўрсатадиган бўшлиқлар ва номувофиқликлар ҳамда ички зиддиятлар мавжуд эмаслигига эътибор берилади ва норматив-ҳуқуқий ҳужжатнинг қабул қилиниш зарурияти, қарор лойиҳасининг номи унинг мазмунига мувофиқлиги ҳавола қилувчи нормалар қўлланилишининг асослилиги ҳамда мақсадга мувофиқлиги ўрганилади.

Бунда қуйидагиларга аҳамият берилади:

қарор лойиҳасининг ушбу Қоидаларда кўрсатилган талабларга мос равишда тайёрланганлиги ва расмийлаштирилганига;

ҳавола қилинаётган ҳужжатларнинг расмий манбалари тўғри кўрсатилганлигига;

қарор лойиҳаси билан бошқа қарорларга ўзгартириш ва қўшимчалар киритилиши назарда тутилган бўлса, қарор лойиҳаси ушбу Қоидаларда кўрсатилган талабларга мос равишда ишлаб чиқилганлигига.

95. Қарор лойиҳасида ишлатилган юридик, техник ва бошқа атамаларга баҳо беришда қуйидагилар ўрганилади:

атамаларнинг қонунчилик ҳужжатларида қабул қилинган мазмунига мувофиқ, ҳар хил талқин қилиш имкониятини истисно этган ҳолда баён қилинганлиги;

қарор лойиҳасидаги атама ва тушунчаларнинг тўлиқ очиб берилганлиги;

ишлатилган қисқартмаларга тушунча берилганлиги.

96. Агар тақдим этилган қарор лойиҳаси ҳуқуқий экспертиза натижаларига кўра қонунчилик ҳужжатлари ва қонунчилик техникаси қоидалари талабларига жавоб берса, лойиҳанинг қонунчилик ҳужжатларига мувофиқлиги тўғрисида мазкур Қоидаларнинг 1-иловасидаги намунага мувофиқ хулоса тузилади.

Агар тақдим этилган қарор лойиҳаси ҳуқуқий экспертиза натижаларига кўра қонунчилик ҳужжатларига мувофиқ бўлса, бироқ қонунчилик техникаси қоидалари талабларига жавоб бермаса ва ушбу камчиликлар ҳужжатни қабул қилиш жараёнида бартараф этилиши мумкин бўлганда, бартараф этилиши лозим бўлган камчиликлар кўрсатилган ҳолда мазкур Қоидаларнинг 2-иловасидаги намунага мувофиқ хулоса тузилади.

97. Қарор лойиҳасининг қонунчилик ҳужжатларига мувофиқлиги тўғрисидаги хулосада қуйидагилар кўрсатилади:

хулоса рақами ва санаси;

қарор лойиҳасининг реквизитлари;

қарор лойиҳасининг қонунчилик ҳужжатлари ва қонунчилик техникаси қоидаларига мувофиқлиги ҳақидаги маълумотлар;

қарорни қабул қилиш жараёнида бартараф этилиши мумкин бўлган қарор лойиҳасида йўл қўйилган қонунчилик техникаси қоидалари талабларига жавоб бермайдиган камчиликлар (агар мавжуд бўлса);

ҳуқуқий экспертизадан ўтказган мутахассис ҳамда хулосани тасдиқлаган ҳудудий адлия органи раҳбарининг фамилияси, исми, отасининг исми.

98. Агар тақдим этилган қарор лойиҳаси ҳуқуқий экспертиза натижаларига кўра қонунчилик ҳужжатлари ва қонунчилик техникаси қоидалари талабларига жавоб бермаса, қарор лойиҳасининг қонунчилик ҳужжатларига номувофиқлиги тўғрисида мазкур Қоидаларнинг 3-иловасидаги намунага мувофиқ хулоса тузилади.

99. Қарор лойиҳасининг қонунчилик ҳужжатларига номувофиқлиги тўғрисидаги хулосада қуйидагилар кўрсатилади:

хулоса рақами ва санаси;

қарор лойиҳасининг реквизитлари;

қарор лойиҳасининг қонунчилик ҳужжатлари ва қонунчилик техникаси қоидаларига номувофиқлиги ҳақидаги маълумотлар;

ҳуқуқий экспертизадан ўтказган мутахассис ҳамда хулосани тасдиқлаган ҳудудий адлия органи раҳбарининг фамилияси, исми, отасининг исми.

100. Қарор лойиҳасининг ҳуқуқий экспертизаси якунлари бўйича ҳудудий адлия органининг биринчи раҳбари (истисно ҳолларда - унинг биринчи ўринбосари) лойиҳага "E-qaror" электрон тизими орқали хулоса беради.

6-БОБ. ЯКУНИЙ ҚОИДА

101. Тошкент шаҳар, вилоятлар, туман (шаҳар) ҳокимлари ҳамда манфаатдор ташкилотларнинг мансабдор шахслари мазкур Қоидаларнинг талабларига риоя қилиниши учун шахсан масъулдирлар.

Қоидаларга

1-ИЛОВА

НАМУНА

(Қорақалпоғистон Республикаси Вазирлар Кенгаши,

вилоятлар ва Тошкент шаҳар ёки туман (шаҳар) ҳокимликлари)

_________________________________________ нинг норматив-ҳуқуқий

ҳужжат лойиҳасини ҳуқуқий экспертизадан ўтказиш юзасидан

ХУЛОСА

Ўзбекистон Республикасининг "Норматив-ҳуқуқий ҳужжатлар тўғрисида"ги Қонуни, Ўзбекистон Республикасининг Бюджет кодекси ва Ўзбекистон Республикаси Президентининг 2018 йил 13 апрелдаги ПҚ-3666-сон қарори билан тасдиқланган Ўзбекистон Республикаси Адлия вазирлиги тўғрисидаги низомга мувофиқ ___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси ҳуқуқий экспертизадан ўтказилганда қуйидагилар

АНИҚЛАНДИ:

Тақдим этилган қарор лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга мувофиқ ишлаб чиқилган.

___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга ҳамда бошқа қонунчилик ҳужжатларига зид эмас.

Юқоридагиларга кўра, тақдим этилган қарор лойиҳасини ҳуқуқий экспертизадан ўтказиш натижалари бўйича

ХУЛОСА ҚИЛАМАН:

___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга мувофиқ ишлаб чиқилганлиги ва бошқа қонунчилик ҳужжатларига зид эмаслиги, қонунчилик техникаси қоидаларига, ҳавола қилувчи нормалар қўлланилишининг асослилиги ва мақсадга мувофиқлиги, шунингдек уларда коррупцияга сабаб бўладиган омилларнинг, хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш принципларига мувофиқ бўлмаган қоидалар мавжуд эмаслиги қайд этилсин.

       

Қоидаларга

2-ИЛОВА

НАМУНА

(Қорақалпоғистон Республикаси Вазирлар Кенгаши,

вилоятлар ва Тошкент шаҳар ёки туман (шаҳар) ҳокимликлари)

_________________________________________ нинг норматив-ҳуқуқий

ҳужжат лойиҳасини ҳуқуқий экспертизадан ўтказиш юзасидан

ХУЛОСА

Ўзбекистон Республикасининг "Норматив-ҳуқуқий ҳужжатлар тўғрисида"ги Қонуни, Ўзбекистон Республикасининг Бюджет кодекси ва Ўзбекистон Республикаси Президентининг 2018 йил 13 апрелдаги ПҚ-3666-сон қарори билан тасдиқланган Ўзбекистон Республикаси Адлия вазирлиги тўғрисидаги низомга мувофиқ ___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг "Сариосиё туманида жамоат тартибини сақлаш, ободонлаштириш ва санитария қоидаларига риоя қилинишини тартибга солиш тўғрисида"ги қарор лойиҳаси ҳуқуқий экспертизадан ўтказилганда қуйидагилар

АНИҚЛАНДИ:

Сариосиё тумани халқ депутатлари Кенгаши қарори лойиҳасининг 6-бандида ушбу қарор ижросини назорат қилиш "Маҳалла" хайрия жамоат фондининг Сариосиё тумани бўлимига юклатилган.

"Нодавлат нотижорат ташкилотлари фаолиятининг кафолатлари тўғрисида"ги Қонуннинг 5-моддасига мувофиқ, нодавлат нотижорат ташкилотлари ўз фаолиятида давлат ҳокимияти ва бошқаруви органларидан мустақилдир, қонунларда назарда тутилганидан бошқа ҳолларда уларга ҳисобот бермайди ҳамда уларнинг назорати остида бўлмайди.

Шунга кўра, тақдим этилган лойиҳанинг 6-банди "Нодавлат нотижорат ташкилотлари фаолиятининг кафолатлари тўғрисида"ги Қонун талабларига мувофиқ қайта кўриб чиқилиши лозим.

Маҳаллий давлат ҳокимияти органлари томонидан норматив-ҳуқуқий ҳужжатлар лойиҳаларини ишлаб чиқиш, юридик-техник жиҳатдан расмийлаштириш, ҳуқуқий экспертизадан ўтказиш қоидаларининг (рўйхат рақами 3333, 2021 йил 18 ноябрь) 17-бандига асосан давлат тилида тенг маъноли сўзлар ва тушунчалар мавжуд бўлган тақдирда, чет тиллари атамалари қарор лойиҳасида қўлланилишига йўл қўйилмайди.

Бироқ, тақдим этилган лойиҳанинг 2, 3 ва 4-бандларида "перекрёстка" деган сўзлар қўлланилган. Шунга асосан, ҳужжатда мазкур эътироз инобатга олиниши керак.

Юқоридагиларга кўра, тақдим этилган қарор лойиҳасини ҳуқуқий экспертизадан ўтказиш натижалари бўйича

ХУЛОСА ҚИЛАМАН:

___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг "Сариосиё туманида жамоат тартибини сақлаш, ободонлаштириш ва санитария қоидаларига риоя қилинишини тартибга солиш тўғрисида"ги қарор лойиҳаси қонунчилик ҳужжатлари талабларига мувофиқ ишлаб чиқилганлиги, шунингдек қонунчилик техникаси қоидалари талабларига мувофиқ қайта кўриб чиқилиши зарурлиги қайд этилсин.

      

Қоидаларга

3-ИЛОВА

(Қорақалпоғистон Республикаси Вазирлар Кенгаши,

вилоятлар ва Тошкент шаҳар ёки туман (шаҳар) ҳокимликлари)

_________________________________________ нинг норматив-ҳуқуқий

ҳужжат лойиҳасини ҳуқуқий экспертизадан ўтказиш юзасидан

ХУЛОСА

Ўзбекистон Республикасининг "Норматив-ҳуқуқий ҳужжатлар тўғрисида"ги Қонуни, Ўзбекистон Республикасининг Бюджет кодекси ва Ўзбекистон Республикаси Президентининг 2018 йил 13 апрелдаги ПҚ-3666-сон қарори билан тасдиқланган Ўзбекистон Республикаси Адлия вазирлиги тўғрисидаги низомга мувофиқ ___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси ҳуқуқий экспертизадан ўтказилганда қуйидагилар

АНИҚЛАНДИ:

Тақдим этилган қарор лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга мувофиқ ишлаб чиқилган.

___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга ҳамда бошқа қонунчилик ҳужжатларига зид келмоқда.

Юқоридагиларга кўра, тақдим этилган қарор лойиҳасини ҳуқуқий экспертизадан ўтказиш натижалари бўйича

ХУЛОСА ҚИЛАМАН:

___________________ (Қорақалпоғистон Республикаси Вазирлар Кенгаши, вилоятлар ва Тошкент шаҳар ёки туман (шаҳар) ҳокимликлари)нинг 2021 йилги бюджетнинг қўшимча манбаларидан фойдаланиш тўғрисидаги қарори лойиҳаси Ўзбекистон Республикасининг Бюджет кодекси ва "2021 йил учун Ўзбекистон Республикасининг Давлат бюджети тўғрисида"ги Қонунга мувофиқ ишлаб чиқилмаганлиги ва бошқа қонунчилик ҳужжатларига зидлиги, қонунчилик техникаси қоидаларига тўғри келмаслиги, ҳавола қилувчи нормалар қўлланилишининг асоссизлиги ва мақсадга мувофиқ эмаслиги, шунингдек уларда коррупцияга сабаб бўладиган омилларнинг, хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш принципларига мувофиқ бўлмаган қоидалар мавжудлиги қайд этилсин.

Қонун ҳужжатлари маълумотлари миллий базаси (www.lex.uz),

2021 йил 18 ноябрь