Ўзбекистон Республикаси Президентининг 22.11.2021 й. Ф-5-сон "2022-2023 йилларга мўлжалланган Янги Ўзбекистон маъмурий ислоҳотлари дастурини ишлаб чиқиш бўйича ташкилий чора-тадбирлар тўғрисида"ги Фармойиши

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОЙИШИ

22.11.2021 й.

N Ф-5

2022-2023 ЙИЛЛАРГА

МЎЛЖАЛЛАНГАН ЯНГИ ЎЗБЕКИСТОН

МАЪМУРИЙ ИСЛОҲОТЛАРИ ДАСТУРИНИ

ИШЛАБ ЧИҚИШ БЎЙИЧА ТАШКИЛИЙ

ЧОРА-ТАДБИРЛАР ТЎҒРИСИДА

Маъмурий ислоҳотларни изчил давом эттириш йўлида ўз ечимини кутаётган масалаларни ҳал этиш, Янги Ўзбекистон шароитида давлат бошқаруви ва маҳаллий давлат ҳокимияти тизимининг самарадорлигини ошириш, улар фаолиятини натижадорликка йўналтириш орқали аҳоли фаровонлигини таъминлаш ва "мобиль бошқарув аппарати"ни яратиш, Ўзбекистон Республикаси Президентининг сайловолди дастури ҳамда Ўзбекистон Республикаси Президенти лавозимига киришиш маросимига бағишланган Олий Мажлис палаталарининг қўшма мажлисидаги маърузаси доирасида илгари сурилган ташаббус ва таклифларни реализация қилиш мақсадида:

1. Қуйидагилар:

2022-2023 йилларга мўлжалланган Янги Ўзбекистон маъмурий ислоҳотлари дастурини ишлаб чиқишни мувофиқлаштирувчи республика комиссияси (кейинги ўринларда - Комиссия) 1-иловага мувофиқ;

Давлат бошқаруви органларининг мақомини белгилаш, тузилмаларини такомиллаштириш ва штат бирликларини мақбуллаштириш юзасидан таклифларни ишлаб чиқиш бўйича ишчи гуруҳи 2-иловага мувофиқ;

Давлат бошқаруви органлари фаолиятида рақамли технологиялар, очиқлик ва давлат-хусусий шерикликни ривожлантириш юзасидан таклифларни ишлаб чиқиш бўйича ишчи гуруҳи 3-иловага мувофиқ;

Давлат бошқаруви органларининг моддий-техника таъминотини такомиллаштириш юзасидан таклифларни ишлаб чиқиш бўйича ишчи гуруҳи 4-иловага мувофиқ;

Давлат бошқаруви органларининг кадрлар салоҳиятини такомиллаштириш юзасидан таклифларни ишлаб чиқиш бўйича ишчи гуруҳи 5-иловага мувофиқ;

Давлат бошқаруви органларида коррупциянинг олдини олиш юзасидан таклифларни ишлаб чиқиш бўйича ишчи гуруҳи 6-иловага мувофиқ;

Маҳаллий давлат ҳокимияти органлари фаолиятини тубдан такомиллаштириш юзасидан таклифларни ишлаб чиқиш бўйича ишчи гуруҳи 7-иловага мувофиқ ташкил этилсин.

2. Комиссиянинг асосий вазифалари этиб қуйидагилар белгилансин:

маъмурий ислоҳотларни амалга оширишда давлат бошқаруви органларининг фаолияти ўзаро келишилган тарзда, самарали олиб борилишини, сусткашликлар ва масъулиятсизликка йўл қўймаслигини таъминлаш, шунингдек, ишчи гуруҳлари ишини пухта ва сифатли ташкил қилиш, мазкур фармойишда белгиланган чора-тадбирлар билан бир қаторда уларнинг қўшимча вазифа ва функцияларини белгилаш;

вазирликлар, давлат қўмиталари, қўмиталар, агентликлар, инспекциялар, марказлар ва бошқа давлат бошқаруви органлари (кейинги ўринларда - вазирлик ва идоралар)нинг давлат сиёсатини амалга ошириш, назорат функцияларини бажариш, жисмоний ва юридик шахсларга давлат хизматларини кўрсатиш соҳасидаги функцияларини бўлиш;

вазирлик ва идоралар фаолиятида аниқ кўрсаткичлар ва мақсадли индикаторларга эришиш тизимини жорий қилиш;

давлат бошқаруви асослари тўғрисидаги қонунчилик ҳужжатларининг замон талабларига мос равишда пухта ишлаб чиқилиши ҳамда киритилишини таъминлаш.

3. Ишчи гуруҳлар раҳбарлари Р.Қ. Давлетов, Ш.Х. Шерматов, Т.А. Ишметов, О.А. Хасанов, Н.Т. Йўлдошев, Д.А. Кучкаров 2022-2023 йилларга мўлжалланган Янги Ўзбекистон маъмурий ислоҳотлари дастури лойиҳасига таклифлар 8-иловада белгиланган асосий устувор йўналишларни инобатга олган ҳолда ишлаб чиқилишини таъминласин.

4. 2022-2023 йилларга мўлжалланган Янги Ўзбекистон маъмурий ислоҳотлари дастурининг лойиҳасини ишлаб чиқиш схемаси 9-иловага мувофиқ тасдиқлансин.

5. Шундай тартиб ўрнатилсинки, унга мувофиқ:

мазкур фармойишнинг 2-7-иловаларига мувофиқ ташкил қилинаётган ишчи гуруҳлари томонидан тайёрланган таклифлар ишчи гуруҳи раҳбарининг имзоси билан Ўзбекистон Республикаси Президенти Администрациясига киритилади;

таклифлар тақдимот кўринишида тақдим қилинади ҳамда уларга таҳлилий маълумотнома ва жадваллар, ривожланган мамлакатларнинг тажрибасини ўрганиш бўйича маълумотнома ва бошқа материаллар, шунингдек, зарур ҳолларда, норматив-ҳуқуқий ҳужжатлар лойиҳалари илова қилинади (кейинги ўринларда - тақдимот материаллари);

Ўзбекистон Республикаси Президенти Администрацияси Вазирлар Маҳкамаси ҳамда ишчи гуруҳлари билан биргаликда тақдим қилинган тақдимот материалларини кўриб чиқади ҳамда Комиссияга киритади;

Комиссиянинг йиғилишида тақдимот материалларини шахсан ишчи гуруҳлари раҳбарлари тақдимот қилади.

6. Белгилансинки, ишчи гуруҳи аъзолари асосий иш жойидаги вазифалардан тўлиқ озод қилинади ҳамда тегишли давр мобайнида улар учун қонунчиликда белгиланган барча шарт-шароитлар сақлаб қолинади.

Вазирлик ва идоралар раҳбарлари икки кун муддатда ишчи гуруҳлари таркибига киритилган аъзолар белгиланган тартибда ўз ишида тўлиқ фаолият юритишини таъминласин.

7. Ишчи гуруҳлари раҳбарлари Р.Қ. Давлетов, Ш.Х. Шерматов, Т.А. Ишметов, О.А. Хасанов, Н.Т. Йўлдошев, Д.А. Кучкаров:

уч кун муддатда ташкилий йиғилишларни ўтказиб, тегишли йўналиш доирасида белгиланган вазифалар сифатли ва ўз вақтида амалга оширилишини таъминлаш бўйича саволнома, тармоқ графиги ва тақдимот материаллари намуналарини тасдиқласин ҳамда ишчи гуруҳи аъзоларининг вазифалар тақсимотини белгиласин;

ишчи гуруҳлари фаолиятини самарали ташкил қилиш учун барча зарур чораларни амалга оширсин;

ҳар куни тегишли ишчи гуруҳлари томонидан тайёрланаётган таклифларнинг муҳокамасини ташкил этиб борсин, зарур ҳолларда, ушбу ишларни бошқа ишчи гуруҳлари билан биргаликда амалга оширсин;

таклифларни тайёрлаш жараёнида ишчи гуруҳлари ўртасида самарали ва доимий коммуникация ҳамда ҳамкорликни йўлга қўйсин;

2022 йил 20 январга қадар ишчи гуруҳлари томонидан ҳар томонлама асослантирилган таклифлар ишлаб чиқилишини ва уларнинг манфаатдор вазирлик ва идоралар, шу жумладан, маҳаллий ҳокимликлар билан келишилишини ҳамда Ўзбекистон Республикаси Президенти Администрациясига киритилишини таъминласин.

8. Ишчи гуруҳлари раҳбарларига:

белгиланган вазифаларни амалга оширишда вазирлик ва идоралар, илмий ва таълим муассасалари, халқаро ташкилотлар мутахассислари, шунингдек, маҳаллий ҳамда хорижий эксперт ва маслаҳатчиларни жалб қилиш;

журналист ва блогерларни жалб қилиш ҳамда тайёрланаётган таклифларни оммавий ахборот воситалари ва ижтимоий тармоқларда ёритиш, белгиланган вазифалар бўйича сўровномалар ташкил қилиш ҳуқуқи берилсин.

9. Ташқи ишлар вазирлиги (А.Х. Камилов):

ишчи гуруҳларининг сўровларига асосан Ўзбекистон Республикасининг хорижий мамлакатлардаги дипломатик ваколатхоналарини жалб қилган ҳолда тегишли масалалар юзасидан ривожланган давлатларнинг тажрибасини чуқур ўрганиб, улар бўйича маълумотларнинг тезкор тақдим этилишини таъминласин;

ушбу маълумотларни тайёрлашда хорижий давлатларнинг нуфузли экспертлари, олимлари ва мутахассислари билан учрашувлар ва муҳокамалар ўтказиш (шу жумладан, видеоконференцалоқа шаклида), улардаги асосий норматив-ҳуқуқий ҳужжатларни таржима қилиш чораларини кўрсин;

Инвестициялар ва ташқи савдо вазирлиги билан биргаликда халқаро ташкилотлар ва халқаро молия институтларидан маъмурий ислоҳотлар юзасидан тайёрланган таҳлилий ахборотлар ва ҳисоботлар, шунингдек, тавсия ва таклифларини сўраб олсин ва ишчи гуруҳларига тақдим этсин, зарур ҳолларда, уларнинг тажрибали экспертларини ишчи гуруҳлари фаолиятига жалб қилишга кўмаклашсин;

Давлат хизматини ривожлантириш агентлиги, "Эл-юрт умиди" жамғармаси билан биргаликда зарур ҳолларда ишчи гуруҳлари аъзоларини ривожланган хорижий давлатларга қисқа муддатли хизмат сафарига юборишни ташкил этсин.

Бунда, ишчи гуруҳлари аъзоларини хорижга юбориш билан боғлиқ харажатлар (транспорт, меҳмонхона, кунлик ва бошқалар) Давлат хизматини ривожлантиришни қўллаб-қувватлаш жамғармаси маблағлари ҳисобидан қопланади.

10. Комиссия (А.Н. Арипов, З.Ш. Низомиддинов):

2022 йил 10 февралга қадар тақдимот материалларини кўриб чиқсин;

2022 йил 20 февралга қадар ҳар бир йўналиш бўйича Ўзбекистон Республикаси Президентига тақдимот қилсин;

2022 йил 1 мартга қадар 2022-2023 йилларда Янги Ўзбекистон маъмурий ислоҳотларини амалга ошириш бўйича "Йўл харитаси"ни тасдиқлашни назарда тутувчи Ўзбекистон Республикаси Президенти Фармони лойиҳасини киритсин.

Ўзбекистон Республикаси Президенти                                     Ш. Мирзиёев

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

1-ИЛОВА

2022-2023 йилларга мўлжалланган Янги Ўзбекистон

маъмурий ислоҳотлари дастурини ишлаб чиқишни

мувофиқлаштирувчи республика комиссияси

ТАРКИБИ

Изоҳ: комиссия аъзолари бошқа ишга ўтган тақдирда, унинг таркибига мазкур лавозимга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

2-ИЛОВА

Давлат бошқаруви органларининг мақомини белгилаш,

тузилмаларини такомиллаштириш ва штат бирликларини

мақбуллаштириш юзасидан таклифларни

ишлаб чиқиш бўйича ишчи гуруҳи

ТАРКИБИ

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

3-ИЛОВА

Давлат бошқаруви органлари фаолиятида рақамли

технологиялар, очиқлик ва давлат-хусусий шерикликни

ривожлантириш юзасидан таклифларни ишлаб

чиқиш бўйича ишчи гуруҳи

ТАРКИБИ

 

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

4-ИЛОВА

Давлат бошқаруви органларининг моддий-техника

таъминотини такомиллаштириш юзасидан таклифларни

ишлаб чиқиш бўйича ишчи гуруҳи

ТАРКИБИ

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

5-ИЛОВА

Давлат бошқаруви органларининг кадрлар салоҳиятини

такомиллаштириш юзасидан таклифларни

ишлаб чиқиш бўйича ишчи гуруҳи

ТАРКИБИ

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

6-ИЛОВА

Давлат бошқаруви органларида коррупциянинг

олдини олиш юзасидан таклифларни ишлаб

чиқиш бўйича ишчи гуруҳи

ТАРКИБИ

  

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

7-ИЛОВА

Маҳаллий давлат ҳокимияти органлари фаолиятини

тубдан такомиллаштириш юзасидан таклифларни

ишлаб чиқиш бўйича ишчи гуруҳи

ТАРКИБИ

   

Изоҳ: ишчи гуруҳи аъзолари бошқа ишга ўтган тақдирда, унинг таркибига мазкур лавозимларга янги тайинланган ёки тегишли функцияларни бажариш зиммасига юклатилган шахслар киритилади.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

8-ИЛОВА

2022-2023 йилларга мўлжалланган Янги Ўзбекистон

маъмурий ислоҳотлари дастури лойиҳасига таклифлар

ишлаб чиқишда эътибор қаратилиши лозим бўлган

асосий устувор йўналишлар

I. Давлат бошқаруви органларининг мақомини белгилаш, тузилмаларини такомиллаштириш ва штат бирликларини мақбуллаштириш юзасидан:

давлат бошқаруви органларининг ҳар бирининг мақомини белгилаш, уларни ташкил этиш ва тугатишнинг аниқ тартиби, бир-биридан фарқловчи мезонларни назарда тутувчи механизмларни ишлаб чиқиш;

вазирлик ва идоралар ҳамда улар таркибига кирадиган ташкилотларнинг барча функцияларни таҳлил қилиш, такрорланувчи вазифа ва функцияларини қисқартириш, шунингдек, ушбу асосда вазирлик ва идоралар ҳамда уларнинг таркибига кирадиган ташкилотларнини қайта ташкил қилиш (қўшиб юбориш, қўшиб олиш, бўлиш, ажратиб чиқариш, ўзгартириш) ва сонини камайтириш;

вазирлик ва идоралар ҳамда улар таркибига кирадиган ташкилотлар фаолияти устидан давлат назоратини амалга оширишда манфаатлар тўқнашувини вужудга келтираётган омилларни аниқлаш ва уларни бартараф қилиш;

давлат-ҳокимият ваколатлари берилган идоралараро коллегиал органлар (комиссиялар, кенгашлар, ишчи гуруҳлар ва бошқалар)ни ташкил қилишнинг аниқ ҳуқуқий асосларини яратиш, уларнинг ваколат чегаралари ва фаолият юритиш даврини белгилаш, шунингдек, коллегиал органлар сонини қисқартириш ва улар ваколатини тегишли соҳага масъул бўлган вазирлик ва идораларга бериш;

ҳудудларни ривожлантириш бўйича вазифаларни ҳал қилишда вазирлик ва идораларнинг ҳудудий ва туман (шаҳар) бўлинмалари ишини самарали ташкил этиш;

вазирлик ва идоралар раҳбар ўринбосарларининг йўналишлар кесимидаги жавобгарлик чегараларини аниқ белгилаш, уларга юклатилган функция ва вазифаларни туман (шаҳар), маҳалла даражасида самарали ташкил этиш;

вазирлик ва идоралар ҳамда улар таркибига кирадиган ташкилотларнинг ташкилий ва марказий аппарати тузилмаларининг ягона намунасини ишлаб чиқиш, ташкилий тузилмаларга ташкилотларни киритиш ва чиқариб ташлашнинг ҳуқуқий асосларини белгилаш;

вазирлик ва идоралар ҳамда улар таркибига кирадиган ташкилотларнинг штат бирликлари тўғрисидаги ягона очиқ марказлашган ахборот платформасини яратиш, уларга қўшимча штат бирликларини ажратиш ёки мавжудларини қисқартириш бўйича аниқ ҳуқуқий асосларни белгилаш;

вазирлик ва идоралар ҳамда улар таркибига кирадиган ташкилотларнинг Давлат бюджети маблағлари ҳисобидан молиялаштирилаётган штат бирликларини мақбуллаштириш.

II. Давлат бошқаруви органлари фаолиятида рақамли технологиялар, очиқлик ва давлат-хусусий шерикликни ривожлантириш юзасидан:

вазирлик ва идоралар ҳамда улар таркибига кирадиган ташкилотларда маъмурий тартиб-таомилларни мақбуллаштириш, қоғозбозликни камайтириш, бошқарув жараёнини автоматлаштириш, иш юритувини тўлиқ рақамлаштириш;

вазирлик ва идоралар (шу жумладан уларнинг таркибий тузилмаларида) ҳамда улар таркибига кирадиган ташкилотларда ягона ҳужжат алмашинувини таъминлаш, ушбу йўналишда дастурий маҳсулотларни ишлаб чиқиш ва фойдаланишнинг миллий стандартларини жорий қилиш, "Очиқ идора" лойиҳасини амалга ошириш;

давлат хизматларини кўрсатиш тизимини такомиллаштириш, уларни тўлиқ рақамлаштириш ва дебюрократлаштириш орқали фуқароларнинг сарсон бўлишига барҳам бериш;

вазирлик ва идоралар ҳамда улар таркибига кирадиган ташкилотлар билан ўзаро электрон муносабатларни янада такомиллаштириш доирасида фуқароларнинг рақамли имзоси ва Ягона интерактив давлат хизматлари порталидаги шахсий кабинетлар улушини ошириш;

вазирлик ва идоралар ҳамда улар таркибига кирадиган ташкилотлар фаолиятининг очиқлиги ва шаффофлигини таъминлаш, уларнинг аҳоли, нодавлат нотижорат ташкилотлар ва оммавий ахборот воситалари билан ишлашида янги, замонавий ва таъсирчан технологияларни жорий қилиш;

вазирлик ва идоралар ҳамда улар таркибига кирадиган ташкилотларнинг айрим функцияларини нодавлат секторига ўтказиш орқали маъмурий аппаратни ихчамлаштириш ва иш жараёнларини оптималлаштириш;

ижтимоий-иқтисодий масалаларни ҳал қилишда ижтимоий ҳамда давлат-хусусий шерикликнинг ҳуқуқий ва институционал базасини янада такомиллаштириш.

III. Давлат бошқаруви органларининг моддий-техника таъминотини такомиллаштириш юзасидан:

вазирлик ва идоралар ҳамда улар таркибига кирадиган ташкилотлар тасарруфидаги маъмурий бинолар, иншоотлар ва бўш турган ер майдонларидан, шу жумладан қурилиши тугалланмаган объектлардан самарали фойдаланиш механизмларини яратиш;

вазирлик ва идоралар ҳамда улар таркибига кирадиган ташкилотлар ҳудудий бўлинмаларининг моддий-техника таъминоти (шу жумладан автотранспорт воситалари билан) ҳолатини ўрганиш, мавжуд муаммоларни бартараф этишнинг ҳуқуқий асосини яратиш;

тегишли вазирлик ва идораларнинг ҳудудий бўлинмаларини битта маъмурий бинога жойлаштириш орқали аҳолига "Ягона дарча" тизими асосида хизмат кўрсатиш, улар ўртасида самарали ҳамкорликни таъминлаш бўйича қулай шарт-шароитлар яратиш;

тегишли вазирлик ва идоралар маъмурий биноларининг ички қисмини очиқ офис кўринишида режалаштириш ва қуриш.

IV. Давлат бошқаруви органларининг кадрлар салоҳиятини такомиллаштириш юзасидан:

вазирлик ва идоралар ҳамда улар таркибига кирадиган ташкилотларда касбга оид сифатлар ва алоҳида хизматларни одилона ва объектив баҳолаш асосида энг муносиб ва қобилиятли мутахассис ходимларни ишга қабул қилиш;

кадрларни танлов асосида ва кенг рақобат муҳитида ишга қабул қилишни тўлиқ жорий қилиш ва улар фаолияти самарадорлигини баҳолашнинг ҳуқуқий асосларини такомиллаштириш, шахснинг маънавий-ахлоқий ва ватанпарварлик сифатларини объектив баҳолаш;

вазирлик ва идоралар ҳамда улар таркибига кирадиган ташкилотларнинг кадрлар билан ишлаш тузилмалари (HR-хизмат) мақомини ошириш, уларнинг маъмурий функцияларини кенгайтириш, ходимларни излаш, таклиф қилиш ва ишга жойлаштиришнинг янги технологияларини жорий қилиш;

вазирлик ва идоралар ҳамда улар таркибига кирадиган ташкилотлар раҳбарларининг ёрдамчилари мақомини ошириш, шу жумладан қарорлар қабул қилишда уларнинг мустақиллиги ва масъулиятини белгилаш, ушбу лавозимга чуқур билим, тажриба ва амалий кўникмаларга эга бўлган малакали мутахассисларни тайинлаш;

давлат фуқаролик хизмати тўғрисидаги қонунчиликни такомиллаштириш, ушбу соҳани тартибга солиш мақсадида ягона қонун лойиҳасини ҳамда давлат фуқаролик хизматини узоқ истиқболли ривожлантириш стратегиясини ишлаб чиқиш ва қабул қилиш;

вазирлик ва идоралар ҳамда улар таркибига кирадиган ташкилотларда "Кадрлар - барчасини ҳал қилади" тамойилини амалиётга жорий килишни таъминлаш, ўз устида ишламайдиган ва масъулиятни ҳис қилмайдиган кадрларга нисбатан "жамоавий таъсир"ни амалга ошириш;

вазирлик ва идоралар ҳамда улар таркибига кирадиган ташкилотлар кадрларини аттестация, ротация қилиш, малакасини ошириш, ўқиш ва стажировкага юбориш тизимига замонавий технологияларни жорий қилиш;

Давлат бошқаруви академиясининг кадрларни тайёрлаш, қайта тайёрлаш ва малакасини оширишдаги ролини кучайтириш, кадрлар салоҳиятини юксалтириш борасидаги иштирокини кенгайтириш;

вазирлик ва идоралар ҳамда улар таркибига кирадиган ташкилотларда ягона кадрлар рейтингини юритиш, бунда рейтингни шакллантиришда кадрлар қўнимсизлиги, тизимдан чиқиб кетганлиги, кадрларни мотивация қилиш ва шарт-шароитлар яратиш масалаларини инобатга олиш;

вазирлик ва идоралар ҳамда улар таркибига кирадиган ташкилотлар кадрларининг дам олиши, иш қобилиятини тиклаши, бўш вақтини мазмунли ва фойдали ўтказиши тизимини такомиллаштириш, давлат фуқаролик хизматчилари томонидан олинадиган кафолатланган бепул хизматлар ва воситалар пакетини ишлаб чиқиш.

V. Давлат бошқаруви органларида коррупциянинг олдини олиш юзасидан:

вазирлик ва идоралар ҳамда улар таркибига кирадиган ташкилотлар кесимида коррупция авж олган соҳаларда унинг ривожланиш сабаблари ва шартларини ўрганиш асосида ушбу соҳаларнинг ҳар бирига "ташхис қўйиш" ҳамда коррупция омилларини бартараф этиш;

вазирлик ва идоралар ҳамда улар таркибига кирадиган ташкилотларда коррупциянинг олдини олишга доир аниқ чора-тадбирларни ишлаб чиқиш;

вазирлик ва идоралар ҳамда улар таркибига кирадиган ташкилотлар томонидан Давлат бюджети ва халқаро молия институтлари маблағлари ҳисобидан қурилган, реконструкция қилинган, мукаммал таъмирланган ва жиҳозланган бино ва иншоотлар, амалга оширилган харидлар ва хизматлар учун сарфланадиган маблағлардан оқилона, тежамкор ва самарали фойдаланиш, тендер ва танловларни очиқ ва шаффоф ҳолда ўтказиш тизимини янада такомиллаштириш;

коррупцияга қарши курашиш тўғрисидаги қонунчилик ҳужжатларини такомиллаштириш, уларнинг нормаларини аниқ ҳуқуқий механизмлар билан очиб бериш.

VI. Маҳаллий давлат ҳокимияти органлари фаолиятини тубдан такомиллаштириш юзасидан:

халқ депутатлари Кенгашларининг Олий Мажлис Сенати билан, ҳокимликларнинг вазирлик ва идоралар ҳамда уларнинг ҳудудий бўлинмалари билан алоқаларига доир ҳуқуқий асосларни такомиллаштириш;

халқ депутатлари Кенгашларининг маҳаллалардаги мавжуд муаммоларни ҳал қилишдаги ролини янада ошириш;

маҳаллий вакиллик органларида доимий асосда фаолият юритувчи депутатлар корпусини шакллантириш ҳисобига ҳудудий ижро органлари фаолияти устидан депутатлик назоратини кучайтириш;

ҳокимлар, уларнинг ўринбосарлари ва маслаҳатчиларининг ваколат чегарасини аниқ белгилаш, улар фаолиятини маҳаллалар даражасида амалга оширган ишлари натижадорлигига қараб баҳолаб бориш амалиётини йўлга қўйиш;

ҳоким ёрдамчилари фаолиятини самарали ташкил этиш, уларга юклатилган вазифаларни амалга оширишда масъул вазирлик ва идоралар билан ҳамкорликни йўлга қўйиш механизмларини белгилаш.

Ўзбекистон Республикаси

Президентининг

2021 йил 22 ноябрдаги

Ф-5-сон фармойишига

9-ИЛОВА

2022-2023 йилларга мўлжалланган Янги Ўзбекистон

маъмурий ислоҳотлари дастурининг

лойиҳасини ишлаб чиқиш

СХЕМАСИ

"Халқ сўзи", 2021 йил 23 ноябрь