Ўзбекистон Республикаси Президентининг 27.12.2021 й. ПҚ-64-сон "Опера ва балет санъатини янада ривожлантириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

27.12.2021 й.

N ПҚ-64

ОПЕРА ВА БАЛЕТ САНЪАТИНИ ЯНАДА

РИВОЖЛАНТИРИШ ЧОРА-ТАДБИРЛАРИ

ТЎҒРИСИДА

Мамлакатимизда опера ва балет санъатини янада ривожлантириш, Алишер Навоий номидаги Ўзбекистон давлат академик катта театри фаолиятини такомиллаштириш, миллий опера ва балет санъатини кенг тарғиб этиш, унинг жаҳон санъат оламида тутган ўрни ва мавқеини янада мустаҳкамлаш ҳамда Ўзбекистон Республикаси Президентининг 2020 йил 26 майдаги "Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида"ги ПФ-6000-сон Фармонига мувофиқ:

1. Қуйидагилар республикада опера ва балет санъатини янада ривожлантиришнинг устувор йўналишлари этиб белгилансин:

Янги Ўзбекистонни барпо этишда опера ва балет санъатининг нуфузини ошириш, миллий опера ва балет санъатини жаҳон миқёсида тарғиб қилиш;

опера ва балет санъатининг энг сара миллий ва классик асарларидан халқимизни баҳраманд этиш, аҳоли, айниқса, олис ҳудудлардаги фуқароларнинг маданий хордиқ чиқаришини қўллаб-қувватлаш;

миллий опера ва балет санъатини кенг оммалаштириш, унинг ноёб дурдоналарини сақлаш ва тарғиб этиш, устоз-шогирд анъаналари ва ижодий мактабларни ҳар томонлама ривожлантириш;

опера ва балет санъати учун кадрлар тайёрлаш тизимини ривожлантириш, театрлар ва таълим муассасалари узвий ҳамкорлигини таъминлаш, ушбу йўналишдаги театр ташкилотларини қўллаб-қувватлаш ва уларнинг моддий-техника базасини мустаҳкамлаш;

опера ва балет санъати вакилларини ҳар томонлама қўллаб-қувватлаш ҳамда унинг равнақига муносиб ҳисса қўшган таниқли намояндаларнинг ҳаёти ва ижодий фаолиятини тарғиб қилиш.

2. Миллий опера ва балет санъатида устоз-шогирд анъаналари ва маҳорат мактабларини ривожлантириш мақсадида:

опера ва балет санъатидаги истеъдодли ва юқори малакали ижодкорларнинг маҳорат мактаблари 1-иловага мувофиқ ташкил этилсин;

маҳорат мактабини яратган ижодкорлар Давлат бюджети ҳисобидан асосий иш жойи орқали ҳар ойда базавий ҳисоблаш миқдорининг 15 баравари миқдорида қўшимча рағбатлантириб борилсин;

маҳорат мактабларига улар фаолият юритадиган муассасанинг объектларидан текин фойдаланиш ҳуқуқи берилсин, шунингдек, уларга ушбу муассаса томонидан алоҳида хона ажратилсин ва бошқа зарур шарт-шароитлар яратилсин;

келгусида Маданият вазирлиги ҳайъати қарори билан ташкил этиладиган янги маҳорат мактабларига ушбу банднинг учинчи ва тўртинчи хатбошисида белгиланган рағбатлантириш чоралари татбиқ этилиши белгилансин.

3. Опера ва балет санъати учун амалий кўникма ва зарур маҳоратга эга бўлган кадрлар тайёрлаш, театр ва таълим ташкилотлари узвийлигини таъминлаш ҳамда бунга соҳадаги фахрийлар ва устоз ижодкорларни кенг жалб қилиш мақсадида:

а) қуйидагилар:

Ўзбекистон давлат хореография академияси ҳузурида Хореография ўқув театри;

Алишер Навоий номидаги Ўзбекистон давлат академик катта театри ҳузурида (кейинги ўринларда - Театр) Вокал академияси ҳамда Опера ва балет асарларини яратиш ижодий устахонаси;

Театр ҳузурида 70 та штат бирлигидан иборат бўлган Фахрийлар оркестри ташкил этилсин;

б) Ўзбекистон давлат консерваторияси ҳузурида Мусиқали театр-студияси фаолияти такомиллаштирилсин.

Белгилансинки, ушбу бандда келтирилган:

ўқув театри, Вокал академия, ижодий устахона ва Фахрийлар оркестри юридик шахс ҳисобланмайди;

ўқув театри ҳамда Фахрийлар оркестрини жиҳозлаш ва уларни сақлаш харажатлари Давлат бюджети ҳамда қонунчилик ҳужжатлари билан тақиқланмаган бошқа манбалар ҳисобидан қопланади;

Вокал академия ва ижодий устахона Театрда жойлаштирилади ҳамда Театрнинг бюджетдан ташқари маблағлари, меценатлик кўмаги, ҳомийлик хайриялари ва қонунчилик ҳужжатлари билан тақиқланмаган бошқа манбалар ҳисобидан жиҳозланади ва сақланади.

Маданият вазирлиги (О.А. Назарбеков) икки ой муддатда ўқув театри, Вокал академия ва ижодий устахонанинг фаолият кўрсатиш тартибини тасдиқласин ҳамда улар фаолиятини самарали ташкил этиш бўйича зарур чораларни кўрсин.

4. Театр билан маданият ва санъат соҳасидаги таълим ташкилотларининг узвий ҳамкорлиги қуйидаги тартибда йўлга қўйилсин:

Театрнинг буюртмасига асосан вокал хонандалар, оркестр ва хор артистлари, балет соҳаси мутахассисларини тайёрлаш учун маданият ва санъат соҳасидаги тегишли таълим ташкилотларига ҳар йили махсус квота ажратилади;

В. Успенский ва Р. Глиэр номидаги Республика ихтисослаштирилган мусиқа мактаблари концерт-педагогик дастурини шакллантиришда Театрнинг репертуарлари инобатга олинади;

маданият ва санъат соҳасидаги таълим ташкилотларининг тегишли мутахассисликлар бўйича ўқувчи ва талабалари учун амалиёт дарсларини Театрда ўтказиш тизимли жорий этилади;

Ўзбекистон давлат консерваторияси ва Ўзбекистон давлат хореография академияси тегишли мутахассисликлар бўйича битирувчиларининг малакавий (диплом) ишлари Театрда амалга оширилади;

Театрнинг маҳоратли ижодкорлари томонидан маданият ва санъат соҳасидаги таълим ташкилотларида тегишли мутахассислик фанлари бўйича Театрдан ажралмаган ҳолда дарс бериш йўлга қўйилади;

2022/2023 ўқув йилидан бошлаб Ўзбекистон давлат хореография академиясида "Балет режиссёрлиги" бакалавриат таълим йўналиши очилади.

Маданият вазирлиги (О.А. Назарбеков) Олий ва ўрта махсус таълим вазирлиги (А.Ҳ. Тошқулов) ҳамда Тошкент шаҳар ҳокимлиги (Ж.А. Артикходжаев) билан биргаликда ушбу бандда белгиланган вазифаларнинг самарали бажарилишини таъминласин.

5. Маданият ва санъат, шу жумладан опера ва балет санъати учун техник ва хизмат кўрсатувчи ходимларни, хусусан грим устаси, реквизитор, саҳна монтажчиси ва ёритувчини тайёрлаш, қайта тайёрлаш ва уларнинг малакасини ошириш мақсадида Ўзбекистон давлат санъат ва маданият институти ҳузурида 2022/2023 ўқув йилидан бошлаб техникум ташкил қилинсин.

Маданият вазирлиги, Олий ва ўрта махсус таълим вазирлиги ташкил қилинаётган техникум фаолиятини тўлиқ йўлга қўйсин ва малакали мутахассислар билан таъминласин.

Вазирлар Маҳкамаси ўн кун муддатда техникумни жойлаштириш учун бино ажратсин ҳамда 2022/2023 ўқув йилига қадар унинг моддий-техника базасини шакллантирсин.

Ўзбекистон Республикаси таълим муассасаларига ўқишга қабул қилиш бўйича давлат комиссияси (А.Н. Арипов) 2022 йил 1 июнга қадар техникумга 2022/2023 ўқув йили учун қабул параметрларини тасдиқласин.

6. Маданият ва санъат соҳаси, шу жумладан опера ва балет санъати бўйича йирик ижодий ишларни амалга оширган соҳа вакиллари учун Маданият соҳаси академиги махсус унвони (кейинги ўринларда - махсус унвон) таъсис этилсин.

Белгилансинки:

махсус унвон соҳибларига Бадиий академиянинг академиклари учун қонунчилик ҳужжатларида белгиланган имтиёзлар татбиқ этилади, шу жумладан уларга даромад солиғидан озод қилинадиган ойлик гонорар тўланади;

махсус унвон маданият ва санъат соҳаларида йирик ижодий ишларни амалга оширган ижодкорларга Вазирлар Маҳкамаси томонидан белгиланган тартиб асосида ҳар уч йилда бир марта ўтказиладиган сайлов натижаларига кўра берилади.

Вазирлар Маҳкамаси уч ой муддатда махсус унвон учун номзодлар кўрсатиш, сайловларни ташкил этиш, ўтказиш ҳамда махсус унвонни бериш тартибини тасдиқласин.

7. Театрга ҳар йили камида тўртта миллий ҳамда жаҳон классик опера ва балет асарларини саҳналаштириш учун давлат буюртмасини бериш йўлга қўйилсин, шунингдек, 2022-2026 йилларда Театр томонидан давлат буюртмаси асосида 2-иловадаги режага мувофиқ саҳна асарлари саҳналаштирилиши таъминлансин.

Белгилансинки, Давлат бюджети ҳисобидан:

тарихий ва замонавий мавзуларда тегишлилиги бўйича миллий ҳамда жаҳон классик опера ва балет асарларини яратиш жараёнига Театр томонидан танлов эълон қилинади;

Маданият ва санъатни ривожлантириш жамғармаси томонидан миллий ҳамда замонавий жаҳон классик опера ва балет асарларини яратиш ва саҳналаштириш учун халқаро даражадаги мутахассислар жалб қилинади;

давлат буюртмаси асосида яратиладиган саҳна асарларининг реклама-тарғибот ишлари уч ой олдин бошланади ҳамда ушбу мақсадлар учун ҳар бир буюртма суммасининг 10 фоизи миқдорида маблағ ажратилади.

8. Ўзбекистон Миллий телерадиокомпанияси (А.Ж. Хаджаев) Театр репертуаридаги янги спектаклларни мунтазам равишда тасвирга олсин, уларнинг "Олтин фонди"ни яратсин, шунингдек, спектаклларни телеканаллар орқали эфирга узатиб борсин ҳамда бу борада хусусий телеканаллар билан ҳамкорликни йўлга қўйсин.

9. Опера ва балет санъати бўйича иқтидорли ёшларни излаб топиш, уларни юзага чиқариш ва рағбатлантириш тизимини жорий қилиш мақсадида ҳар йили анъанавий тарзда:

февраль ойида "Ёш вокал ижрочилари";

апрель ойида "Ёш балет ижрочилари";

июнь ойида "Дирижёр, режиссёр ва балетмейстерлар" республика кўрик-танловлари ўтказилсин.

Белгилансинки, ушбу бандда кўрсатилган республика кўрик-танловларининг Гран-при ва 1-ўрин ғолиблари мос таълим йўналишлари бўйича тегишли давлат олий таълим муассасаларининг бакалавриат қабул квотасига қўшимча давлат гранти асосида ўқишга қабул қилинади.

10. Миллий опера ва балет санъатини жаҳон миқёсида тарғиб қилиш, энг сара миллий ва классик асарлардан аҳолини баҳраманд этиш, хорижий театрлар билан ижодий алоқаларни янада мустаҳкамлаш учун 2022 йилдан бошлаб Давлат бюджети ҳисобидан ҳар икки йилда:

Ҳалима Носирова номидаги халқаро ёш операчилар кўрик-танлови;

"Тошкент баҳори" халқаро опера ва балет фестивали ўтказилсин.

Белгилансинки, ушбу бандда келтирилган ҳамда хорижда ўтказиладиган халқаро нуфузли опера ва балет фестиваллари, танловларида 1, 2 ва 3-ўринларни эгаллаган ижодкорлар Давлат бюджети ҳисобидан даромад солиғидан озод қилинадиган қуйидаги миқдорда бир марталик пул мукофоти билан тақдирланади:

1-ўрин учун - базавий ҳисоблаш миқдорининг 100 баравари миқдорида;

2-ўрин учун - базавий ҳисоблаш миқдорининг 70 баравари миқдорида;

3-ўрин учун - базавий ҳисоблаш миқдорининг 50 баравари миқдорида.

Вазирлар Маҳкамаси бир ой муддатда ушбу қарорнинг 9 ва 10-бандларида белгиланган кўрик-танлов ва фестивалларни ташкил этиш ва ўтказиш тартибларини тасдиқласин.

11. Театр фаолиятида замонавий маркетинг тизимини жорий этиш, юқори бадиий савиядаги спектаклларни саҳналаштириш ва ходимларни моддий қўллаб-қувватлаш мақсадида:

Театрнинг маркетинг, молиявий-иқтисодий ва бошқа ташкилий фаолиятини юритиш учун Театр тузилмасида бош менежер лавозими жорий этилсин;

хорижий мамлакатлардан етук ва малакали бош дирижёр Театрга камида икки йил фаолият олиб бориш шарти билан жалб этилсин;

Театрга Маданият вазирлиги тизимидаги ташкилотларнинг штат бирликларини мақбуллаштириш ҳисобига қўшимча 40 та ижодий ходим штат бирлиги ажратилсин.

2022 йил 1 июлдан бошлаб Театр ходимлари лавозим маошларини меҳнатга ҳақ тўлашнинг базавий лавозим маошлари миқдорига ҳамда Ягона тариф сеткаси бўйича меҳнатга ҳақ тўлашнинг тасдиқланган разрядларига асосан белгилашда тариф коэффициентлари миқдори Давлат бюджети ҳисобидан 1,5 бараварга оширилган ҳолда қўлланилади.

12. Аҳоли, айниқса, олис ҳудудлардаги фуқароларнинг маданий хордиқ чиқаришига кўмаклашиш мақсадида Театр жамоасининг ҳар йили камида тўрт марта республика ҳудудларига гастроль сафарларини ташкил этиш тартиби йўлга қўйилсин, шунингдек, Театр жамоасининг 2022-2024 йилларга мўлжалланган маҳаллий гастроль сафарлари режаси 3-иловага мувофиқ тасдиқласин.

Белгилансинки:

маҳаллий гастроль сафарларини ташкил этиш, чипталарни реализация қилиш билан боғлиқ харажатлар маҳаллий бюджетнинг қўшимча манбалари, меценатлик кўмаги, ихтиёрий ҳомийлик хайриялари ва қонунчилик ҳужжатлари билан тақиқланмаган бошқа манбалар ҳисобидан қопланади;

27 март - Халқаро театри куни муносабати билан Театрда ҳар йили 21-27 март, 1 июнь ва 1 ноябрь кунлари "очиқ эшиклар" куни деб эълон қилинсин. Ушбу кунларда ташриф буюрувчиларга театр намойишлари бепул ташкил қилинади ва маданий-маърифий тадбирлар, кўргазма ва ижодий учрашувлар ўтказилади.

13. Миллий опера ва балет санъатини жаҳон миқёсида кенг тарғиб этиш, илғор хорижий тажрибаларни ўрганиш ҳамда маданий алоқаларни янада кенгайтириш мақсадида қуйидаги тартиб жорий қилинсин:

Театр жамоасининг хорижий давлатларга ҳар йили камида икки марта гастроль сафарлари ташкил этилади;

Театр ижодкорлари ва мутахассисларини хорижда ўқитиш, малака ошириш ва стажировкага юбориш йўлга қўйилади;

Театр томонидан малакали хорижий мутахассислар иштирокида ҳар йили камида икки марта маҳорат дарси ўтказилади.

Ушбу банднинг иккинчи ва учинчи хатбошиларида белгиланган вазифалар Давлат бюджети, тўртинчи хатбошисидаги вазифалар меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан амалга оширилиши белгилансин.

Давлат бюджети ҳисобидан Театр жамоаси хорижий гастроль сафарларини ташкил этишнинг 2022-2026 йилларга мўлжалланган режаси 4-иловага мувофиқ, шунингдек, опера ва балет санъати ижодкорлари ва мутахассисларини хорижда ўқитиш, малака ошириш ва стажировкага юборишнинг 2022-2026 йилларга мўлжалланган режаси 5-иловага мувофиқ тасдиқлансин.

14. Алишер Навоий номидаги Ўзбекистон давлат академик катта театрининг Васийлик кенгаши таркиби 6-иловага мувофиқ тасдиқлансин ҳамда қуйидагилар Кенгашнинг асосий вазифалари этиб белгилансин:

Театрнинг ижодий фаолиятини ривожлантиришга қаратилган дастурлар ва истиқболли ташаббусларни қўллаб-қувватлаш, опера ва балет санъатини ривожлантириш бўйича таклифлар ишлаб чиқиш;

Театр фаолияти самарадорлигини ошириш ва такомиллаштириш бўйича дастурларни молиялаштириш ва амалга ошириш, ушбу соҳада халқаро ҳамкорликни йўлга қўйиш ва ривожлантириш;

Театрнинг Вокал академияси, ижодий устахона, маҳорат мактаблари ва таниқли намояндаларнинг ҳаёти ва ижоди билан боғлиқ тадбирларни моддий жиҳатдан қўллаб-қувватлаш;

Театрнинг доимий ривожланишини таъминлаш учун меценатлик кўмаги, ҳомийлик хайриялари, грантлар ва бюджетдан ташқари бошқа маблағларни жалб қилиш;

Театр фаолиятини самарали ташкил этиш билан боғлиқ бошқа ташкилий масалаларни амалга ошириш.

15. Опера ва балет санъатини янада ривожлантиришнинг 2022-2026 йилларга мўлжалланган чора-тадбирлар дастури 7-иловага мувофиқ тасдиқлансин.

Вазирлик ва идоралар раҳбарлари ушбу чора-тадбирлар дастурида белгиланган вазифаларни ўз вақтида ва самарали амалга оширишга шахсан масъул ҳисобланиши белгилаб қўйилсин.

16. Театр ходимларини ижтимоий муҳофаза қилиш ва уларнинг соғлиғини тиклашга кўмаклашиш мақсадида:

Театр ходимларига сифатли ва бепул тиббий хизмат кўрсатиш учун Ўзбекистон Ёзувчилар уюшмаси поликлиникаси бириктирилсин, бунда поликлиника томонидан кўрсатилган тиббий хизмат билан боғлиқ харажатлар Давлат бюджетидан соғлиқни сақлаш соҳасига ажратилган маблағлар ҳисобидан қопланади;

ҳомийлик хайриялари, бюджетдан ташқари маблағлар ва қонунчилик ҳужжатлари билан тақиқланмаган бошқа манбалар ҳисобидан Театрнинг камида 50 нафар ходимини санаторийлар, дам олиш уйлари ва оромгоҳларда имтиёзли йўлланма билан соғломлаштириш ва дам олишлари ташкил этилсин.

17. Театр фаолиятини ривожлантиришга жисмоний ёки юридик шахс, шу жумладан тадбиркорлик субъектлари томонидан йўналтирилган маблағлар, мол-мулк, шунингдек, бажариладиган ишлар, кўрсатиладиган хизматлар ва қўллаб-қувватлашнинг бошқа турлари меценатлик кўмаги ҳисобланиши ҳамда улар Солиқ кодексига асосан солиқ базасини аниқлашда чегириб ташланадиган харажатлар жумласига кириши маълумот учун қабул қилинсин.

18. Ташқи ишлар вазирлиги (А.Х. Камилов) Маданият вазирлигининг талабномаларига биноан Театрда фаолият юритиш, тадбирларда иштирок этиш ва маҳорат дарслари ўтиш учун мамлакатимизга ташриф буюрадиган хорижий меҳмонларга Ўзбекистон Республикасига кириш визалари консуллик йиғимлари ва ҳақиқий харажатларнинг ўрнини қоплаш ҳисобидан йиғимлар ундирилмасдан белгиланган тартибда расмийлаштирилишини таъминласин.

19. Маданият вазирлиги томонидан белгиланган тартибда шакллантириладиган рўйхатлар бўйича хориждан олиб келинадиган, Театрнинг фаолияти учун зарур бўлган мусиқа асбоб-ускуналари, техник жиҳозлар, декорациялар, чироқлар, грим маҳсулотлари ва балет артистлари учун махсус либослар, оёқ кийимлар ва бошқа ашёлар 2026 йил 1 январга қадар божхона божидан озод этилсин.

Давлат божхона қўмитаси (А.Ю. Мавлонов) мазкур бандга асосан хориждан олиб келинадиган товарлардан бошқа мақсадларда фойдаланилган тақдирда, имтиёзлар берилиши муносабати билан тўланмаган божхона божи суммаси қонунчилик ҳужжатларида назарда тутилган молиявий санкциялар қўлланилган ҳолда Давлат бюджетига ундирилишини таъминласин.

20. Молия вазирлиги (Т.А. Ишметов) мазкур қарорда назарда тутилган тегишли чора-тадбирларни амалга ошириш учун зарур маблағлар 2022 йилдан бошлаб Давлат бюджети параметрларида назарда тутилишини таъминласин.

21. Мазкур қарорнинг ижросини самарали ташкил қилишга масъул ва шахсий жавобгар этиб маданият вазири О.А. Назарбеков ҳамда Тошкент шаҳар ҳокими, Театр васийлик кенгаши раиси Ж.А. Артикходжаев белгилансин.

Қарор ижросини муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазирининг ўринбосари А.А. Абдуҳакимов ва Ўзбекистон Республикаси Президентининг маслаҳатчиси ўринбосари А.А. Жўрабоев зиммасига юклансин.

Ўзбекистон Республикаси Президенти                                                            Ш. Мирзиёев

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

1-ИЛОВА

Опера ва балет санъатидаги истеъдодли ва юқори малакали

ижодкорларнинг маҳорат мактабларини ташкил этиш

РЕЖАСИ

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

2-ИЛОВА

Алишер Навоий номидаги Ўзбекистон давлат

Академик катта театри томонидан 2022-2026 йилларда

энг сара миллий, жаҳон опера ва балет асарларини

саҳналаштириш репертуар

РЕЖАСИ

       

Изоҳ: асосли зарурат юзага келганда Театр Васийлик кенгаши ёки Маданият ва санъатни ривожлантириш жамғармасига Ўзбекистон Республикаси Президенти Администрацияси билан келишган ҳолда ушбу режага ўзгартириш киритиш ҳуқуқи берилади.

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

3-ИЛОВА

Алишер Навоий номидаги Ўзбекистон давлат

академик катта театри жамоасининг 2022-2024 йилларга

мўлжалланган маҳаллий гастроль сафарлари

РЕЖАСИ

Изоҳлар:

асосли зарурат юзага келганда Театр Васийлик кенгашига Ўзбекистон Республикаси Президенти Администрацияси билан келишилган ҳолда ушбу режада кўрсатилган ҳудудлар ва муддатларга ўзгартириш киритиш ҳуқуқи берилади;

ҳудудларда ушбу режага асосан гастроль сафарларини ташкил этиш билан боғлиқ харажатлар маҳаллий бюджетнинг қўшимча манбалари, меценатлик кўмаги, ҳомийлик хайриялари ва қонунчилик ҳужжатлари билан тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

4-ИЛОВА

Давлат бюджети ҳисобидан Алишер Навоий номидаги

Ўзбекистон давлат академик катта театри жамоаси

хорижий гастроль сафарларини ташкил этишнинг

2022-2026 йилларга мўлжалланган

РЕЖАСИ

    

Изоҳлар:

ушбу режада кўрсатилган муддатларнинг аниқ саналари хорижий мамлакат билан гастроль сафарини ташкил этиш юзасидан эришилган келишувга мувофиқ тегишлилиги бўйича Маданият вазирлиги ва Маданият ва санъатни ривожлантириш жамғармаси томонидан белгиланади;

Ташқи ишлар вазирлиги хорижий мамлакатларда гастроль сафарларини ташкил этишга амалий ёрдам кўрсатади;

асосли зарурат юзага келганда Театр Васийлик кенгаши ёки Маданият ва санъатни ривожлантириш жамғармасига Ўзбекистон Республикаси Президенти Администрацияси билан келишган ҳолда ушбу режага ўзгартириш киритиш ҳуқуқи берилади.

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

5-ИЛОВА

Алишер Навоий номидаги Ўзбекистон давлат

академик катта театри ижодкорлари ва мутахассисларини

2022-2026 йилларда хорижда ўқитиш, малака

ошириш ва стажировкага юбориш

РЕЖАСИ

        

Изоҳлар:

ушбу режада кўрсатилган муддатларнинг аниқ саналари хорижий мамлакат билан ўқитиш, малака ошириш ва стажировкани ташкил этиш юзасидан эришилган келишувга мувофиқ Маданият вазирлиги томонидан белгиланади;

ушбу режада кўрсатилган хориждаги олий таълим муассасаларида ҳар йили 4 нафар ижодкорлар ўқитилади;

ўқитиш, малака ошириш ва стажировкаларнинг сарф-харажатлар республика бюджети маблағлари ҳисобидан қопланади;

Ташқи ишлар вазирлиги хорижий мамлакатларда ўқитиш, малака ошириш ва стажировкаларни ташкил этишга амалий ёрдам кўрсатади;

асосли зарурат юзага келганда Театр Васийлик кенгашига Ўзбекистон Республикаси Президенти Администрацияси билан келишган ҳолда ушбу режага ўзгартириш киритиш ҳуқуқи берилади.

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

6-ИЛОВА

Алишер Навоий номидаги Ўзбекистон давлат академик

катта театрининг Васийлик кенгаши

ТАРКИБИ

      

Изоҳлар:

Васийлик кенгаши раисига Васийлик кенгаши таркибига бошқа ҳомийлар, меценат ва тадбиркорлик субъектларини уларнинг ташаббуси асосида киритиш ҳуқуқи берилади;

Васийлик кенгаши аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли вазифаларни бажариш юкланган шахслар киритилади.

Ўзбекистон Республикаси

Президентининг

2021 йил 27 декабрдаги

ПҚ-64-сон қарорига

7-ИЛОВА

Опера ва балет санъатини янада ривожлантиришнинг

2022-2026 йилларга мўлжалланган чора-тадбирлар

ДАСТУРИ

Қонун ҳужжатлари маълумотлари миллий базаси (www.lex.uz),

2021 йил 28 декабрь