Ўзбекистон Республикаси Президентининг 02.02.2022 й. ПҚ-112-сон "Маданият ва санъат соҳасини янада ривожлантиришга доир қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

02.02.2022 й.

N ПҚ-112

МАДАНИЯТ ВА САНЪАТ СОҲАСИНИ ЯНАДА

РИВОЖЛАНТИРИШГА ДОИР ҚЎШИМЧА

ЧОРА-ТАДБИРЛАР ТЎҒРИСИДА

Аҳоли, айниқса, олис ҳудудларда истиқомат қиладиган фуқароларга маданий дам олиш хизматлари кўрсатиш даражасини ошириш, республиканинг барча ҳудудларида театр, цирк ва бошқа турдаги оммавий-маданий ва концерт-томоша тадбирларини тизимли равишда йўлга қўйиш, маданият ва санъат соҳасида истеъдодли ёш ижодкорларни излаб топиш ва қўллаб-қувватлаш, таълим муассасаларини миллий чолғулар, мусиқа дарсликлари, ноталар тўпламлари ва ўқув-методик адабиётлар билан таъминлашнинг яхлит тизимини яратиш мақсадида, шунингдек, 2022-2026 йилларга мўлжалланган Янги Ўзбекистоннинг Тараққиёт стратегиясини "Инсон қадрини улуғлаш ва фаол маҳалла йили"да амалга оширишга оид Давлат дастурига мувофиқ:

1. 2022/2023 ўқув йилидан бошлаб таълим муассасаларида ўқувчи ва талабаларнинг мусиқий билим ва кўникмаларини ошириш, уларнинг қалбида миллий маданиятга бўлган муҳаббатни шакллантириш, ёш истеъдодларни аниқлаш ва қўллаб-қувватлашга қаратилган қуйидаги чора-тадбирлар амалга оширилиши белгилансин:

а) умумий ўрта таълим муассасаларида:

мазкур қарорга 1-иловадаги рўйхатда келтирилган миллий мусиқа чолғуларидан камида биттасида куй ижро этиш маҳорати ўргатилади ҳамда бу ҳақда уларнинг таълим тўғрисидаги ҳужжатига (шаҳодатнома) тегишли қайд киритилади;

мусиқа фани учун ҳафтасига белгиланган бир ўқув соати ҳамда унга қўшимча равишда ҳар ҳафта миллий мусиқа чолғуларида куй ижро этиш амалий тўгараклари ва факультатив дарслари ўтказилади;

мазкур қарорга 1-иловадаги рўйхатда келтирилган миллий чолғулардан камида биттасида, 2023/2024 ўқув йилидан бошлаб эса камида учтасида куй ижро этиш маҳоратига эга бўлиш мусиқа фани ўқитувчилари учун мажбурий ҳисобланади;

мусиқа фани учун ажратилган ўқув соатлари доирасида "Ҳаётимга ҳамроҳдир чолғу" шиори остида чолғу ижрочилиги дарс машғулотлари йўлга қўйилади;

ноталар тўпламлари ва махсус мусиқий адабиётлар билан таъминлаш умумтаълим мактабларини дарсликлар ва ўқув-методик қўлланмалар билан таъминлаш тизимига киритилади;

ўқувчиларнинг дарсдан ташқари вақтларини мазмунли ташкил этиш мақсадида уларнинг қизиқишларига кўра миллий мусиқа чолғуларида куй ижро этиш маҳорати, тасвирий ва амалий санъат, ҳунармандчилик йўналишларида амалий тўгараклар (кейинги ўринларда - амалий тўгараклар) ташкил этилади;

амалий тўгараклар раҳбарларига "Баркамол авлод" болалар мактаблари тўгарак раҳбари учун белгиланган базавий тариф ставкалари қўлланилади;

амалий тўгаракларни олиб бориш ҳисоби "Электрон кундалик" дастури орқали амалга оширилади ҳамда ҳар чоракда тўгарак иштирокчиларининг ҳисобот концертлари ташкил қилинади;

мусиқа санъати бўйича профессионал таълим ҳамда олий таълим тўғрисидаги ҳужжатга эга бўлган, камида 3 та миллий мусиқа чолғуларида маҳорат билан куй ижро эта оладиган мутахассисларни асосий иш жойидан бўш вақтида у ердаги меҳнатга ҳақ тўлаш шартларини сақлаб қолган ҳолда ўриндошлик асосида умумий ўрта таълим муассасалари мусиқа фани ўқитувчиси ва мусиқа йўналишидаги тўгарак раҳбари лавозимига тўлиқ ставкада ишга қабул қилишга рухсат берилади;

мусиқа фани ўқитувчиларини камида учта миллий мусиқа чолғуларида куй ижро этишга ўргатиш халқ таълими ходимларини узлуксиз касбий ривожлантириш тизими доирасида амалга оширилади, бунда қайта тайёрлаш (малака ошириш) курсларида машғулот олиб бориш учун маданият ва санъат соҳаси вакиллари шартнома асосида жалб этилади;

б) умумий ўрта, ўрта махсус, профессионал ва олий таълим муассасаларида:

Ўзбекистон давлат филармонияси ва унинг ҳудудий бўлимлари томонидан бошқа маданият муассасалари билан ҳамкорликда лекторий концертларини ўтказиш йўлга қўйилади;

лекторий концертлари таълим ва маданият муассасаларида ташкил этилади ҳамда ўқувчи ва талабаларнинг мусиқий маданияти ва саводхонлигини юксалтиришга, эстетик диди, дунёқарашини кенгайтиришга ва мусиқани ҳис қилишига қаратилган амалий машғулотлардан иборат бўлади;

лекторий концертларининг ўтказилганлиги ҳақида тегишли таълим, маданият муассасаси, туман (шаҳар) ҳокимлиги ёки бошқа масъул ташкилот раҳбари ва Ўзбекистон давлат филармонияси бош директори томонидан далолатнома тузилади;

лекторий концертларини ўтказиш билан боғлиқ харажатлар маҳаллий бюджет маблағлари (умумий ўрта таълим муассасаларида) ва бюджетдан ташқари маблағлар (олий таълим муассасаларида) ёки қонунчиликда тақиқланмаган бошқа манбалар ҳисобидан далолатнома асосида молиялаштирилади;

Маданият вазирлиги ҳайъати қарори билан умумий ўрта, ўрта махсус, профессионал ва олий таълим муассасаларида маданият ва санъат соҳасидаги давлат мукофотлари билан тақдирланган ижодкорлар раҳбарлигида уларнинг "маҳорат мактаблари" ташкил этилади;

"маҳорат мактаблари" раҳбари бўлган ижодкорлар Маданият вазирлигининг бюджетдан ташқари жамғармаси (кейинги ўринларда - Жамғарма) маблағлари ҳисобидан асосий иш жойи орқали ҳар ойда базавий ҳисоблаш миқдорининг ўн беш баравари миқдорда қўшимча моддий рағбатлантириб борилади;

в) умумий ўрта таълим муассасалари, болалар мусиқа ва санъат мактаблари, маданият марказлари:

2022-2024 йилларда мазкур қарорга 1а-иловада белгиланган режа-жадвалга мувофиқ 3 тадан миллий мусиқа чолғулари тўпламлари билан таъминланади;

миллий мусиқа чолғулари тўпламлари билан таъминлаш харажатлари Ўзбекистон Республикаси республика бюджети ва тегишли маҳаллий бюджетлардан тенг улушларда ажратиладиган маблағлар ҳисобидан молиялаштирилади;

миллий мусиқа чолғулари тўпламлари Маданият вазирлиги ва Халқ таълими вазирлигининг ҳудудий бошқармалари томонидан марказлашган тартибда харид қилинади ва тегишли давлат муассасаларига етказиб берилади, бунда харид комиссиясининг таркибига миллий мусиқа чолғуларида куй ижро эта олувчи юқори малакали мутахассислар киритилади, чолғулар улар томонидан синаб кўрилади;

г) ҳар йили:

ўқувчилар ва талабалар ўртасида мазкур қарорга 2-иловадаги рўйхат бўйича "таълим муассасаси - туман (шаҳар) - вилоят (Қорақалпоғистон Республикаси, Тошкент шаҳри) - республика" кесимида маданият ва санъат соҳасидаги республика кўрик-танловлари ташкил этилади;

республика кўрик танловларининг "таълим муассасаси" босқичида тегишли таълим муассасаси жойлашган маҳалладаги ёшларнинг фаол иштирокини таъминлаш Ёшлар етакчилари ва маданият марказлари зиммасига юкланади.

2. Мазкур қарорнинг 1-бандида белгиланган тадбирлар ижросини самарали ташкил этиш мақсадида:

а) Халқ таълими вазирлиги (Б.О. Саидов) 2022 йил 1 июнга қадар:

ҳар бир умумий ўрта таълим муассасаларида директор буйруғи билан амалий тўгараклар ташкил этилишини, бу ҳақида ўқитувчи ва ўқувчиларнинг хабардор қилинишини таъминласин;

умумий ўрта таълим муассасаларида мусиқа фани ўқитувчиларига бўлган талаб ва келгусидаги эҳтиёжни мунтазам равишда таҳлил қилиб борсин, заруратга кўра, Маданият вазирлиги билан биргаликда мусиқа фани ўқитувчиларини тайёрловчи олий таълим муассасаларига буюртмалар бериб борсин;

б) Маданият вазирлиги (О.А. Назарбеков) икки ой муддатда:

мусиқий саводхонликни оширишга қаратилган лекторий концертларининг бадиий дастурини ишлаб чиқсин ва тасдиқласин;

Ўзбекистон техник жиҳатдан тартибга солиш агентлиги (Д.Н. Саттаров) билан биргаликда мусиқа чолғуларини ишлаб чиқарувчи мутахассисларни жалб қилган ҳолда мазкур қарорга 1-иловадаги рўйхатда келтирилган миллий мусиқа чолғуларини ишлаб чиқариш бўйича техник жиҳатдан тартибга солиш соҳасидаги норматив ҳужжатлар лойиҳаларини ишлаб чиқсин ва белгиланган тартибда қабул қилинишини таъминласин.

3. Қуйидагилардан иборат 2022 йилда республика миқёсида ўтказиладиган оммавий-маданий ва концерт-томоша тадбирларининг йиллик календарь режаси (кейинги ўринларда - 2022 йил учун календарь режа) тасдиқлансин:

2022 йилда Ўзбекистон Республикасида халқаро ва республика миқёсидаги фестивалларни ўтказиш режа-жадвали 3а-иловага мувофиқ;

2022 йилда Маданият вазирлиги томонидан "Маданият карвони" шаклида ҳудудларда концерт-томоша тадбирларини ўтказиш режа-жадвали 3б-иловага мувофиқ;

2022 йилда Ўзбекистон давлат филармонияси таркибидаги бадиий жамоалар томонидан унинг ҳудудий бўлимлари билан бирга концерт-томоша тадбирларини ўтказиш режа-жадвали 3в-иловага мувофиқ;

2022 йилда Ўзбекистон миллий ва давлат симфоник оркестрлари, Ўзбек миллий мақом санъати марказининг Юнус Ражабий номидаги Мақом ансамбли ва "Ўзбек давлат цирки" давлат муассасаси ижодий (бадиий) жамоаларининг ҳудудларга гастроль сафарларини ташкил этиш режа-жадвали 3г-иловага мувофиқ;

2022 йилда Маданият вазирлиги тизимидаги давлат театрлари жамоаларининг ҳудудларга гастроль сафарларини ташкил этиш режа-жадвали 3д-иловага мувофиқ;

2022 йилда Ўзбекистон миллий симфоник оркестри ва Ўзбекистон давлат симфоник оркестрининг Тошкент шаҳрида йирик концерт-томоша тадбирларини ташкил этиш режа-жадвали 3е-иловага мувофиқ;

2022 йилда республика миқёсида касб байрамларини нишонлаш муносабати билан ташкил этиладиган концерт-томоша тадбирлари рўйхати 3ж-иловага мувофиқ;

2022 йилда ҳудудлардаги маданият муассасалари томонидан ўзаролик тамойили асосида бошқа ҳудудларга гастроль сафарларини, ҳудуднинг "маданият кунлари" тадбирларини ташкил этиш режа-жадвали 3з-иловага мувофиқ.

4. 2022 йил учун календарь режада белгиланган тадбирларнинг ижросини самарали ташкил этиш мақсадида:

а) Маданият вазирлиги (О.А. Назарбеков):

2022 йил 1 июнга қадар "Маданият карвони" учун мўлжалланган, тегишли мусиқа техникаси ва саҳнага эга 2 дона махсус автотранспорт воситасини харид қилсин;

вазирлик тизимидаги концерт-томоша муассасалари, цирк ва театр ходимлари орасидан "Маданият карвони" таркибига киритиладиган ижодкорлар (доимий аъзолар ва муайян тадбирларда иштирок этувчилар) рўйхатини шакллантирсин;

Қорақалпоғистон Республикаси Вазирлар Кенгаши, вилоятлар, Тошкент шаҳар, туманлар ва шаҳарлар ҳокимликлари билан биргаликда 2022 йил учун календарь режада белгиланган тадбирларни ўтказиш жойи, вақти, иштирок этадиган ижодкорлар ҳақида оммавий ахборот воситалари ва ахборот тарқатишнинг бошқа манбалари орқали, шу жумладан, тадбир ўтказиладиган ҳудудлар аҳолисини камида икки ой олдин хабардор қилиш тизимини йўлга қўйсин;

б) Қорақалпоғистон Республикаси Вазирлар Кенгаши Раиси, вилоятлар, Тошкент шаҳар, туманлар ва шаҳарлар ҳокимлари:

бир ой муддатда ўз ҳудудларида 2022 йилда ўтказиладиган оммавий-маданий ва концерт-томоша тадбирларининг йиллик календарь режаларини тасдиқласин;

2022 йил учун календарь режада белгиланган тадбирларнинг юқори савияда ўтказилиши учун зарур ташкилий масалаларни ҳал қилсин;

ўзаролик тамойили асосида ўз ҳудудида фаолият юритаётган маданият муассасалари жамоаларининг бошқа ҳудудларга гастроль сафарларини, ҳудуднинг "маданият кунлари" тадбирларининг самарали ташкил этилишини таъминласин;

в) Туризм ва спорт вазирлиги (А.А. Абдухакимов) 2022 йил учун календарь режага киритилган тадбирларни маҳаллий ва хорижий туристлар орасида кенг тарғиб қилиш чораларини кўрсин, туристлар оқимининг ўзгаришини инобатга олиб календарь режага ўзгартириш ва қўшимчалар киритиш бўйича таклифларни доимий равишда Маданият вазирлигига тақдим этиб борсин;

г) Молия вазирлиги (Т.А. Ишметов) бир ой муддатда "Маданият карвони" учун мўлжалланган, тегишли мусиқа техникаси ва саҳнага эга 2 дона махсус автотранспорт воситасини харид қилиш учун Маданият вазирлигига Давлат бюджетидан қўшимча 20 миллиард сўм ажратилишини таъминласин.

5. Барча давлат органлари, муассасалари ва корхоналари ҳар чоракда камида бир маротаба бюджетдан ташқари маблағлари ҳамда касаба уюшмалари маблағлари ҳисобидан ўз ходимларининг маданий-эстетик ҳордиқ чиқаришлари учун оммавий-маданий ва концерт-томоша тадбирларини ташкил этиш, концерт, цирк ва театрларга кириш учун билет ва абонементларни харид қилиш амалиётини жорий этсин.

Давлат активларини бошқариш агентлиги (А.Ж. Ортиқов), хўжалик жамиятлари муассиси бўлган бошқа давлат органлари бир ой муддатда устав фондида (капиталида) давлат улуши 50 фоиз ва ундан ортиқ бўлган хўжалик жамиятлари ҳамда давлат корхоналарининг бошқарув органлари йиғилишларида ушбу ташкилотлар буюртмаси асосида ходимлар ва уларнинг оила аъзолари учун оммавий-маданий ва концерт-томоша тадбирларини ўтказиш вазифасини бизнес-режага киритиш бўйича ташаббус билан чиқсин.

Маданият вазирлиги (О.А. Назарбеков) ҳудудий бўлинмалари билан биргаликда ҳар ойнинг 25-санасига қадар барча даражадаги давлат бошқаруви органлари, муассасалари, корхоналари ва хўжалик жамиятларига улар жойлашган ҳудудда келгуси ойда ташкил этиладиган оммавий-маданий ва концерт-томоша тадбирлари ҳақида маълумот бериб борсин.

6. Белгилансинки, 2022 йилдан бошлаб маданият ва санъат соҳасини давлат томонидан қўллаб-қувватлашнинг қуйидаги қўшимча чоралари жорий этилади:

а) Маданият вазирлиги томонидан "Инсон қадри учун" эзгу ғояси асосида ҳар йили қуйидагилар учун давлат буюртмалари берилади:

театрларда саҳналаштириладиган камида 40 та янги спектаклга;

композиторлар ва бастакорларга 40 та янги мусиқа асарлари, шу жумладан, опера, симфония, оратория каби мумтоз ва замонавий жанрлар, хусусан, эстрада бўйича асарлар яратишга;

камида 100 та юксак бадиий савиядаги Интернет ва ижтимоий тармоқлар учун мўлжалланган аудиовизуал асарлар яратишга (кенг оммалашган 20 та аудиовизуал асар ижодкорлари Маданият вазирлиги ҳайъатининг қарори билан тегишлича базавий ҳисоблаш миқдорининг 50 бараваригача бир марталик пул мукофоти билан тақдирланади);

камида 150 та энг яхши миллий қўшиқларни караоке ёрдамида ижро қилиш учун қайта ишлашга;

атоқли ижодкор-зиёлилар, аҳоли орасида юксак ҳурматга эга санъат ва ижод вакиллари томонидан олис ва чекка ҳудудлар аҳолиси, ушбу ҳудудлардаги таълим муассасалари ўқувчилари билан ижодий учрашувлар ўтказишга (бир йиллик режа-жадвал ҳамда Маданият вазирлиги билан тузиладиган фуқаровий-ҳуқуқий шартнома асосида);

таълим муассасалари (танаффус пайтида), аэропорт, темир йўл ва автовокзаллар, савдо-кўнгилочар мажмуалар, маданият ва истироҳат боғлари, хиёбонлар, меҳмонхоналар ва бошқа ташкилотларнинг локал тармоқлари орқали эшиттириладиган ва ташриф буюрувчиларнинг руҳиятига ижобий таъсир қиладиган миллий куйлардан иборат мусиқий альбомларни тайёрлаш ва оммалаштириш ишларига (муаллифлик ҳуқуқларига риоя қилган ҳолда);

б) аҳоли орасида кенг оммалашган Интернет сайтлари ва ижтимоий тармоқларда "Ўзбекистон Республикаси Маданият вазирлиги" номли саҳифалар ташкил этилиб, улар орқали Жамғарма маблағлари ҳамда саҳифаларни юритишдан келиб тушган маблағлар ҳисобидан ўзбек халқи миллий маданиятини тарғиб этувчи қуйидаги танловлар жорий этилади:

мусиқа чолғуларида (миллий, опера, симфония, оратория, эстрада, бошқа мумтоз ва замонавий жанрларда) бажарилган энг яхши 100 та ижро;

энг яхши 100 та миллий қўшиқ;

энг яхши 100 та миллий мусиқий клип;

караоке ёрдамида қўшиқ ижро қилишга мўлжалланган, энг яхши 100 та мусиқий композиция (қўшиқ матни билан);

давлат ва хусусий театрларда саҳналаштирилган энг яхши 50 та спектакль.

Бунда, ҳар бир йўналиш бўйича ғолиблар йил давомида жойлаштирилган ва ҳар йили 15 декабрь ҳолатига фойдаланувчилар томонидан энг кўп кўрилган ижролар орасидан аниқланади ҳамда Маданият вазирлиги ҳайъатининг қарори билан тегишлича базавий ҳисоблаш миқдорининг 50 бараваригача бир марталик пул мукофоти билан тақдирланади;

в) юридик шахсларнинг фойда солиғи ҳамда айланмадан солиқни ҳисоблашда солиқ солинадиган база ушбу ташкилот ходимлари ва уларнинг оила аъзолари учун оммавий-маданий ва концерт-томоша тадбирларини ўтказиш, шу жумладан, ушбу тадбирларга кириш учун билетлар харид қилишга йўналтирилган маблағлар суммасига камайтирилади, бунда мазкур чегириладиган маблағлар солиқ солинадиган базанинг 2 фоизидан ошмаслиги лозим;

г) миллий мусиқа чолғу асбобларини ишлаб чиқаришдан олган даромадлари жорий ҳисобот (солиқ) даври якунлари бўйича жами даромаднинг камида 60 фоизини ташкил этадиган ташкилотлар учун айланмадан солиқ ва ижтимоий солиқ ставкаси 2022 йил 1 апрелдан 2025 йил 1 январга қадар 1 фоиз этиб белгиланади;

д) Маданият вазирлигига ўз тизимидаги барча ташкилотлар учун бюджет ташкилотининг ривожлантириш жамғармаси маблағларини сарфлаш нисбатини (моддий-техника базасини мустаҳкамлашга ҳамда ходимларни ижтимоий ҳимоя қилиш ва моддий рағбатлантириш тадбирларига) мустақил белгилаш ҳуқуқи берилади.

7. Мазкур қарорнинг 6-бандида белгиланган маданият ва санъат соҳасини давлат томонидан қўллаб-қувватлашнинг қўшимча чораларини ўз вақтида ва тўлиқ жорий этиш мақсадида:

а) Маданият вазирлиги (О.А. Назарбеков):

юксак бадиий савиядаги аудиовизуал асарларга давлат буюртмаларини жойлаштиришда уларнинг миллий адабиёт ва шеъриятимизнинг нодир дурдоналари асосида яратилиши, истеъдодли ижодкорлар томонидан маҳорат билан бадиий ўқиш, монолог ва бошқа шаклларда, шунингдек, хорижий тилларда ижро қилинишига, алоҳида эътибор қаратсин;

бир ой муддатда Интернет сайтлари ва ижтимоий тармоқларда "Ўзбекистон Республикаси Маданият вазирлиги" номли саҳифаларни ташкил этсин, уларни доимий равишда кенг жамоатчилик орасида оммалаштириш чораларини кўрсин, саҳифалар фаолиятини ташкил этишда муаллифлик ҳуқуқларига риоя қилинишини қатъий назорат қилсин;

б) Молия вазирлиги (Т.А. Ишметов) бир ой муддатда тегишли солиқ имтиёзларини жорий этиш юзасидан Ўзбекистон Республикаси Солиқ кодексига ўзгартириш ва қўшимчалар киритиш бўйича қонун лойиҳасини Вазирлар Маҳкамасига киритсин.

8. Ўзбекистон Республикаси Президентининг 2022 йил 15 январдаги ПФ-52-сон Фармонига асосан Маданият вазирлигининг бюджетдан ташқари жамғармаси ташкил этилганлиги маълумот учун қабул қилинсин.

Белгилансинки:

а) Жамғарма маблағлари республика бюджетидан ажратиладиган маблағлар, Маданият вазирлиги тизимидаги ташкилотлар фойдасининг муассисга йўналтириладиган қисми ҳамда қонунчиликда белгиланган ёки тақиқланмаган бошқа манбалар ҳисобидан шакллантирилади;

б) қуйидаги тадбирлар Жамғармага Давлат бюджетидан ажратилган маблағлар ҳисобидан молиялаштирилади:

"маҳорат мактаблари" раҳбари бўлган ижодкорларни қўшимча моддий рағбатлантириш;

оммавий-маданий ва концерт-томоша тадбирларининг йиллик календарь режаси асосида "Маданият карвони" шаклида ҳудудларда концерт-томоша тадбирларини, Ўзбекистон давлат филармонияси, Ўзбек миллий мақом санъати маркази, Юнус Ражабий номидаги Мақом ансамбли, "Ўзбек давлат цирки" давлат муассасаси, давлат театрлари, Ўзбекистон миллий симфоник оркестри ва Ўзбекистон давлат симфоник оркестри томонидан концерт-томоша тадбирларини ўтказиш;

"Инсон қадри учун" эзгу ғояси асосида Маданият вазирлиги томонидан бериладиган давлат буюртмаларини молиялаштириш;

"Ўзбекистон Республикаси Маданият вазирлиги" номли саҳифалар орқали ташкил этиладиган танловлар ғолибларини тақдирлаш;

Маданият вазирлиги тизимидаги муассасалар томонидан ўтказиладиган оммавий-маданий ва концерт-томоша тадбирларининг рекламасини ташкил қилиш, телеканаллардан эфир вақтини сотиб олиш;

қонунчилик ҳужжатларида белгиланган бошқа чора-тадбирларни амалга ошириш.

9. Молия вазирлиги (Т.А. Ишметов):

ушбу қарорда амалга оширилиши белгиланган тадбирларни молиялаштириш учун Жамғармага 2022 йилда жами 50 миллиард сўм, шундан, 25 миллиард сўмни 2022 йил 1 мартга қадар, қолган 25 миллиард сўмни ажратилган маблағларнинг ўзлаштирилишига қараб, Маданият вазирлигининг сўровига асосан ажратсин;

ушбу қарор билан Маданият вазирлигига юклатилган вазифаларни амалга ошириш учун 2023 йил Давлат бюджети параметрларида Жамғармага 50 миллиард сўм назарда тутсин.

10. Маданият ва санъат соҳасидаги ижодкорларни ҳар йили бир маротаба тақдирлаш мақсадида Маданият ва санъат миллий мукофоти таъсис этилсин.

Маданият вазирлиги икки ой муддатда маданият ва санъат миллий мукофоти билан тақдирлаш тартиби тўғрисидаги низом лойиҳасини Вазирлар Маҳкамасига киритсин.

11. Белгилансинки, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари қарори билан маҳаллий бюджетнинг қўшимча манбалари ҳисобидан ушбу ҳудудда узоқ йиллар самарали фаолият олиб борган маданият ва санъат соҳаси вакилларига ҳамда истеъдодли ёш ижодкорларга ипотека кредити асосида сотиб олинаётган уй-жой қийматининг 50 фоизи миқдорида, бироқ Ўзбекистон Республикаси Президентининг 2021 йил 9 декабрдаги ПФ-33-сон Фармонига мувофиқ белгиланадиган уй-жой ҳисобланган қийматининг 50 фоизидан юқори бўлмаган миқдорда субсидия берилади.

12. Ҳудудий маданият органлари тузилмасидаги намунавий мақом ансамбллари негизида амалдаги молиялаштириш тартиби ва штат бирликлари доирасида юридик шахс мақомига эга бўлган Ўзбек миллий мақом санъати марказининг ҳудудий бўлимлари ташкил этилсин.

13. Ўзбекистон Миллий телерадиокомпаниясининг "Маданият ва маърифат" телеканали Маданият вазирлигининг Бош ахборот ҳамкори этиб белгилансин.

Белгилаб қўйилсинки:

Маданият вазирлиги томонидан намойиш этишга тайёр ҳолда тақдим этиладиган материаллар "Маданият ва маърифат" телеканалида томошабинлар учун қулай бўлган вақтларда бепул эфирга узатилади;

республика телеканалларидан томошабинлар учун қулай бўлган эфир вақтлари Маданият вазирлиги томонидан сотиб олинади ва ушбу вақтда вазирлик тақдим этган материаллар эфирга узатилади;

Ўзбекистон Миллий телерадиокомпанияси таркибидаги телеканалларда ҳар ҳафтада аниқ бир вақтда Маданият вазирлиги учун эфир вақти ажратилади;

телеканаллар фаолиятига тааллуқли тегишли лицензия талаблари ва шартларига миллий маданиятимиз дурдоналарини, шу жумладан, миллий чолғуларда асарлар ижро этилишини эфирга бериш талаблари киритилади.

Маданият вазирлиги (О.А. Назарбеков), Ахборот технологиялари ва коммуникацияларини ривожлантириш вазирлиги (Ш.Х. Шерматов) бир ой муддатда телеканаллар фаолиятини лицензиялаш бўйича қонунчиликка ўзгартириш киритиш бўйича таклифларни Вазирлар Маҳкамасига киритсин.

14. Қуйидагилар:

2022-2023 йилларда Ўзбекистон Республикасида миллий маданиятни янада ривожлантириш концепциясини амалга ошириш бўйича "йўл харитаси" 4-иловага мувофиқ;

Давлат бюджети маблағлари ҳисобидан давлат театрлари ва "Ўзбек давлат цирки" давлат муассасасини автобус ва юк транспорт воситалари билан таъминлаш режаси 5-иловага мувофиқ;

Давлат бюджети маблағлари ҳисобидан туман (шаҳар) маданият бўлимларини махсус автотранспорт воситаси билан таъминлаш режаси 6-иловага мувофиқ тасдиқлансин.

Вазирлик ва идораларнинг биринчи раҳбарлари, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари ушбу бандда тасдиқланган "йўл харитаси" ва режаларда белгиланган вазифаларнинг ўз вақтида ва тўлиқ бажарилишини таъминлаш учун шахсан масъул эканлиги белгилансин.

15. Молия вазирлиги 2022 йил олти ойлик якуни бўйича Давлат бюджети харажатларини мақбуллаштириш ҳисобига ушбу қарорда назарда тутилган тадбирларни молиялаштириш манбаси юзасидан Ўзбекистон Республикаси Президенти Администрациясига таклиф киритсин, 2023 йилдан бошлаб ҳар йили Давлат бюджети параметрларини ишлаб чиқишда зарур маблағлар назарда тутилишини таъминласин.

16. Муассаса ва ташкилотлар, тадбиркорлик субъектлари томонидан белгиланган тартибда шакллантириладиган рўйхатлар бўйича ўзларининг моддий-техника базасини мустаҳкамлаш ёки таъминлаш мақсадида хориждан импорт қилиб олиб келинадиган, Ўзбекистон Республикасида ишлаб чиқарилмайдиган мусиқа чолғулари, овоз кучайтиргич мосламалар, техник жиҳозлар, чироқлар, махсус либос ва оёқ кийимлар, "Маданият карвони" учун мўлжалланган махсус автотранспорт воситалари, уларга ўрнатиладиган мусиқа техникаси ва саҳналар 2025 йил 1 январга қадар божхона божидан озод этилсин.

17. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига 7-иловага мувофиқ ўзгартириш ва қўшимчалар киритилсин.

18. Ўзбекистон Республикаси Президентининг ва Ўзбекистон Республикаси Ҳукуматининг айрим қарорлари 8-иловага мувофиқ ўз кучини йўқотган деб ҳисоблансин.

19. Маданият вазирлиги Адлия вазирлиги, манфаатдор вазирлик ва идоралар билан биргаликда икки ой муддатда:

қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисидаги таклифларни Вазирлар Маҳкамасига киритсин;

ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.

20. Мазкур қарор ижросини самарали ташкил қилишга масъул ва шахсий жавобгар этиб маданият вазири О.А. Назарбеков белгилансин.

Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ҳамда назорат қилиш Ўзбекистон Республикаси Бош вазирининг ўринбосари А.А. Абдухакимов ва Ўзбекистон Республикаси Президенти маслаҳатчисининг ўринбосари А.А. Жўрабоев зиммасига юклансин.

Амалга оширилаётган чора-тадбирлар натижадорлиги юзасидан Ўзбекистон Республикаси Президентига ҳар чоракда ахборот берилсин.

Ўзбекистон Республикаси Президенти                                                       Ш. Мирзиёев

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

1-ИЛОВА

Халқ таълими вазирлиги тасарруфидаги умумий

ўрта таълим муассасалари таъминланиши лозим

бўлган миллий мусиқа чолғулари

РЎЙХАТИ

1. Дутор

2. Дўмбира

3. Дойра

4. Танбур

5. Рубоб

6. Ғижжак

7. Най

  

Изоҳ:

Маданият вазирлиги ва Халқ таълими вазирлигининг таклифлари асосида ушбу рўйхатга Вазирлар Маҳкамасининг қарори билан ўзгартириш ва қўшимчалар киритилиши мумкин.

Ўқувчиларнинг қизиқишларидан келиб чиқиб, ушбу рўйхатда келтирилмаган бошқа мусиқа чолғуларида куй ижро этиш кўникмалари ўргатилиши ҳам ташкил этилиши мумкин.

Ўқувчининг қўшимча ўрганган, шу жумладан ушбу рўйхатда келтирилмаган мусиқа чолғуларида куй ижро этиш кўникмасига эгалиги ҳақида ҳам унинг таълим тўғрисидаги ҳужжатига тегишли қўшимча қайд киритилади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

1а-ИЛОВА

Умумтаълим мактаблари, болалар мусиқа ва санъат

мактаблари, маданият марказларини миллий

чолғу асбоблари билан таъминлаш

РЕЖА-ЖАДВАЛИ*

       

*) Ҳар бир муассаса 3 йил давомида ҳар йили бир тўпламдан чолғулар билан таъминланади.

**) Ҳар бир муассасада мавжуд чолғулар хатловдан ўтказилади, хатлов натижасига кўра мазкур режада белгиланган чолғулар сони ўзгариши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

2-ИЛОВА

Ўқувчилар ва талабалар ўртасида ўтказиладиган

маданият ва санъат соҳасидаги республика

кўрик-танловлари

РЎЙХАТИ

      

Изоҳ:

Маданият вазирлиги, Халқ таълими вазирлиги, Олий ва ўрта махсус таълим вазирлиги, Ёшлар ишлари агентлиги барча тадбирларни юқори савияда ўтказиш бўйича масъул ҳисобланади.

Қорақалпоғистон Республикаси Вазирлар Кенгаши, вилоятлар ва Тошкент шаҳар, барча шаҳарлар ва туманлар ҳокимликлари тегишли вазирликлар ва идоралар билан биргаликда тадбирларни таълим муассасаси, туман (шаҳар), вилоят (Қорақалпоғистон, Тошкент шаҳар) босқичларини юқори савияда ташкил этади.

Тадбирлар ўтказиладиган жойларда Ички ишлар вазирлиги жамоат тартибини сақланишини ҳамда Соғлиқни сақлаш вазирлиги тез тиббий хизмат кўрсатишни бепул ташкил қилади, шунингдек, санитария қоидаларига, нормаларига ва гигиена нормативларига қатъий риоя қилинишини назорат қилади.

Кўрик-танловлар масъул вазирлик ва идораларнинг қарори билан бошқа муддатларда ўтказилиши мумкин.

Вазирлик ва идоралар тегишли ҳужжатларга мувофиқ ушбу рўйхатда келтирилмаган бошқа кўрик-танлов ва тадбирларни белгиланган тартибда ташкил этиши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3а-ИЛОВА

2022 йилда Ўзбекистон Республикасида халқаро ва

республика миқёсидаги фестивалларни ўтказиш

РЕЖА-ЖАДВАЛИ

Изоҳ: тадбирларнинг ўтказиш муддатларига Вазирлар Маҳкамаси орқали Ўзбекистон Республикаси Президенти Администрацияси билан келишган ҳолда ўзгартириш ва қўшимчалар киритилиши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3б-ИЛОВА

2022 йилда Маданият вазирлиги томонидан

"Маданият карвони" шаклида ҳудудларда

концерт-томоша тадбирларини ўтказиш

РЕЖА-ЖАДВАЛИ

       

Изоҳ:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Ушбу режа-жадвалга асосан гастроль сафарларини ташкил этиш билан боғлиқ харажатлар Маданият вазирлигининг бюджетдан ташқари жамғармаси, маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3в-ИЛОВА

2022 йилда Ўзбекистон давлат филармонияси таркибидаги

бадиий жамоалар томонидан унинг ҳудудий бўлимлари

билан бирга концерт-томоша тадбирларини ўтказиш

РЕЖА-ЖАДВАЛИ

Изоҳ:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Ушбу режа-жадвалга асосан гастроль сафарларини ташкил этиш билан боғлиқ харажатлар Маданият вазирлигининг бюджетдан ташқари жамғармаси, маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3г-ИЛОВА

2022 йилда Ўзбекистон миллий ва давлат симфоник

оркестрлари, Ўзбек миллий мақом санъати марказининг

Юнус Ражабий номидаги Мақом ансамбли ва "Ўзбек давлат цирки"

давлат муассасаси ижодий (бадиий) жамоаларининг

ҳудудларга гастроль сафарларини ташкил этиш

РЕЖА-ЖАДВАЛИ

     

Изоҳ:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Ушбу режа-жадвалга асосан гастроль сафарларини ташкил этиш билан боғлиқ харажатлар Маданият вазирлигининг бюджетдан ташқари жамғармаси, маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3д-ИЛОВА

2022 йилда Маданият вазирлиги тизимидаги давлат

театрлари жамоаларининг ҳудудларга гастроль

сафарларини ташкил этиш

РЕЖА-ЖАДВАЛИ

    

Изоҳ:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Ушбу режа-жадвалга асосан гастроль сафарларини ташкил этиш билан боғлиқ харажатлар Маданият вазирлигининг бюджетдан ташқари жамғармаси, маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3е-ИЛОВА

2022 йилда Ўзбекистон миллий симфоник оркестри

ва Ўзбекистон давлат симфоник оркестрининг

Тошкент шаҳрида йирик концерт-томоша

тадбирларини ташкил этиш

РЕЖА-ЖАДВАЛИ

  

     

Изоҳ:

Маданият вазирлигига заруратга кўра ушбу режа-жадвалда кўрсатилган мажмуалар ва муддатларга ўзгартириш киритиш ҳуқуқи берилади.

Ушбу режа-жадвалга асосан концерт-томоша тадбирларини ташкил этиш билан боғлиқ харажатлар Маданият вазирлигининг бюджетдан ташқари жамғармаси, маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3ж-ИЛОВА

2022 йилда республика миқёсида касб байрамларини

нишонлаш муносабати билан ташкил этиладиган

концерт-томоша тадбирлари

РЎЙХАТИ

       

Изоҳ:

Мазкур рўйхатда назарда тутилган концерт-томоша тадбирларини молиялаштириш буюртмачиларнинг бюджетдан ташқари маблағлари ҳисобидан амалга оширилади.

Мазкур рўйхатда назарда тутилган концерт-томоша тадбирларини ўтказиш учун вазирлик ва идораларга (буюртмачиларга) 2022 йилда Давлат бюджетидан маблағ ажратилган ҳолатларда, ушбу тадбирлар Давлат бюджети маблағлари ҳисобидан ўтказилиши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

3з-ИЛОВА

2022 йилда ҳудудлардаги маданият муассасалари

томонидан ўзаролик тамойили асосида бошқа

ҳудудларга гастроль сафарларини, ҳудуднинг

"маданият кунлари" тадбирларини ташкил этиш

РЕЖА-ЖАДВАЛИ

            

Изоҳ:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Ушбу режа-жадвалга асосан гастроль сафарларини ташкил этиш билан боғлиқ харажатлар маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

4-ИЛОВА

2022-2023 йилларда Ўзбекистон Республикасида

миллий маданиятни янада ривожлантириш

концепциясини амалга ошириш бўйича

"ЙЎЛ ХАРИТАСИ"

  

   

Изоҳ: Вазирлар Маҳкамаси билан келишилган ҳолда ушбу "йўл харита"да ишлаб чиқилиши белгиланган қонунчилик ҳужжатлари лойиҳалари бирлаштирилиши ва (ёки) қонунчилик ҳужжат тури ўзгартирилиши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

5-ИЛОВА

Давлат бюджети маблағлари ҳисобидан давлат театрлари

ва "Ўзбек давлат цирки" давлат муассасасини автобус

ва юк транспорт воситалари билан таъминлаш

РЕЖАСИ*

  

*) Давлат театрлари ва "Ўзбек давлат цирки" давлат муассасасида мавжуд автотранспорт воситалари хатловдан ўтказилади. Хатлов якунлари бўйича мазкур режада белгиланган автотранспорт воситалари сони ўзгариши мумкин;

**) Автотранспорт воситасининг нархи ўзгарганда, ушбу режада кўзда тутилган маблағ миқдори ўзгариши мумкин.

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

6-ИЛОВА

Давлат бюджети маблағлари ҳисобидан

туман (шаҳар) маданият бўлимларини махсус

автотранспорт воситаси билан таъминлаш

РЕЖАСИ*

млн сўм

   

*) Туман (шаҳар) маданият бўлимларида мавжуд автотранспорт воситалари хатловдан ўтказилади. Хатлов якунлари бўйича мазкур режада белгиланган автотранспорт воситалари сони ўзгариши мумкин;

**) Автотранспорт воситаси нархи ўзгарганда, ушбу режада кўзда тутилган маблағ миқдори ўзгариши мумкин

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

7-ИЛОВА

Ўзбекистон Республикаси Президентининг ва

Ўзбекистон Республикаси Ҳукуматининг айрим

қарорларига киритилаётган ўзгартириш ва

қўшимчалар

1. Ўзбекистон Республикаси Президентининг 2017 йил 17 ноябрдаги "Ўзбек миллий мақом санъатини янада ривожлантириш чора-тадбирлари тўғрисида"ги ПҚ-3391-сон қарорида:

а) 8-банднинг бешинчи хатбошисидаги "намунали ансамблларини" сўзлари "ҳудудий бўлимларини" сўзларига алмаштирилсин;

б) 9-банд қуйидаги таҳрирда баён этилсин:

"9. Маданият вазирлиги, Олий ва ўрта махсус таълим вазирлиги, Молия вазирлиги, Иқтисодий тараққиёт ва камбағалликни қисқартириш вазирлиги, Қорақалпоғистон Республикаси Вазирлар Кенгаши, вилоятлар ҳокимликлари уч ой муддатда вилоятларда Ўзбек миллий мақом санъати марказининг юридик шахс мақомига эга бўлган ҳудудий бўлимларини ташкил этсин".

2. Ўзбекистон Республикаси Президентининг 2018 йил 1 августдаги "Маданият ва санъат соҳасида давлат-хусусий шерикликни ривожлантириш учун шарт-шароитлар яратиш чора-тадбирлари тўғрисида"ги ПҚ-3892-сон қарорида:

3-банднинг иккинчи хатбошиси қуйидаги таҳрирда баён этилсин:

"Ўзбекистон Республикаси Маданият вазирлиги ва Кинематография агентлиги томонидан ўтказиладиган танлов натижалари бўйича Ўзбекистон Республикасининг "Давлат-хусусий шериклик тўғрисида"ги Қонунига мувофиқ тузилади. Бунда ушбу қарорнинг 1-банди саккизинчи хатбошисида назарда тутилган ҳолда танлов ўтказилмайди";

4-банднинг иккинчи хатбошисидаги "Вазирлар Маҳкамаси ҳузуридаги Ўзбекистон Республикасини ривожлантириш давлат дастурларини молиялаштириш жамғармасида" сўзлари "Маданият вазирлигининг бюджетдан ташқари жамғармасида" сўзлари билан алмаштирилсин.

3. Ўзбекистон Республикаси Президентининг 2020 йил 26 майдаги "Ўзбекистон Республикаси Маданият вазирлиги фаолиятини такомиллаштириш чора-тадбирлари тўғрисида"ги ПҚ-4730-сон қарорида:

а) 1-бандда:

иккинчи хатбошидаги "ва ахборот-мультимедиа" сўзлари чиқариб ташлансин;

саккизинчи хатбоши қуйидаги таҳрирда баён этилсин:

"Гулистон" ва "Театр" журналлари таҳририятлари ягона таҳририятга бирлаштирилсин";

б) 9-1-бандда:

қуйидаги мазмундаги иккинчи - ўн биринчи хатбошилар билан тўлдирилсин:

"Қуйидагилар Маданият вазирлигининг бюджетдан ташқари жамғармаси маблағларини шакллантириш манбалари этиб белгилансин:

Давлат бюджетидан ажратиладиган маблағлар;

вазирлик тизимидаги давлат корхоналарининг фойдасидан давлат улуши бўйича белгиланган миқдорда дивидентлар тўлангандан сўнг қолган маблағнинг 15 фоизи;

театрлар, цирк ва концерт-томоша муассасалари томонидан ташкил этиладиган маданий тадбирларни ўтказишдан олинадиган фойданинг 10 фоизи;

Жамғарманинг вақтинча бўш турган маблағларини депозитларга жойлаштиришдан олинадиган даромадлар;

давлат-хусусий шериклик асосида олинадиган даромадларнинг тақсимланишидан тушган маблағлар;

вазирлик ташаббуси билан вазирлик тизим ташкилотлари томонидан ташкил этиладиган концерт-томоша тадбирлари, спектакллар, шоу дастурлар ва бошқа тадбирлардан тушадиган маблағлар;

вазирлик тасарруфидаги "Ягона буюртмачи хизмати" инжиниринг компаниясининг бюджетдан ташқари ҳисоб рақамидан ажратиладиган маблағлар;

халқаро молия ташкилотлари, хорижий давлатлар ва бошқа донорларнинг кредитлари, грантлари ва техник кўмак маблағлари;

қонунчилик ҳужжатларида тақиқланмаган бошқа манбалар";

иккинчи - учинчи хатбошилар тегишинча ўн иккинчи - ўн учинчи хатбошилар деб ҳисоблансин.

4. Ўзбекистон Республикаси Президентининг 2021 йил 5 ноябрдаги "Юриш, югуриш, мини-футбол, бадминтон, стритбол ва "Workоut" спорт турларини янада ривожлантириш чора-тадбирлари тўғрисида"ги ПҚ-5282-сон қарорида:

а) 3-банднинг иккинчи хатбошисидаги "Samarkand Half Marathon" сўзлари "Samarkand Marathon" сўзлари билан алмаштирилсин;

б) илованинг 25-бандида:

"Амалга ошириш механизми" устунидаги "Samarkand Half Marathon" сўзлари "Samarkand Marathon" сўзлари билан алмаштирилсин;

"Масъул ижрочилар" устуни қуйидаги таҳрирда баён қилинсин:

"Туризм ва спорт вазирлиги, Вазирлар Маҳкамаси ҳузуридаги Маданият ва санъатни ривожлантириш жамғармаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирлик, идора ва ташкилотлар, Ўзбекистон Миллий олимпия қўмитаси, спорт федерация (ассоциация)лари".

5. Ўзбекистон Республикаси Президентининг 2021 йил 27 декабрдаги "Опера ва балет санъатини янада ривожлантириш чора-тадбирлари тўғрисида"ги ПҚ-64-сон қарорида:

а) 11-банди бешинчи хатбошиси қуйидаги таҳрирда баён этилсин:

"2022 йил 1 июлдан бошлаб Театр ходимлари лавозим маошларини меҳнатга ҳақ тўлашнинг базавий лавозим маошлари миқдорига ҳамда Ягона тариф сеткаси бўйича меҳнатга ҳақ тўлашнинг тасдиқланган разрядларига асосан белгилашда тариф коэффициентлари миқдори Давлат бюджети ҳисобидан 1,5 бараварга оширилган ҳолда қўлланилади";

б) 7-иловада:

3-позициянинг "Молиялаштириш манбалари ва суммаси" устуни қуйидаги таҳрирда баён этилсин:

"Қорақалпоғистон Республикаси республика бюджети ва вилоятлар маҳаллий бюджетлари маблағлари, ҳомийлик хайриялари, меценатлик кўмаги";

4-позициянинг рус тилидаги матнида "Источники и сумма финансирования" устуни қуйидаги таҳрирда баён этилсин:

"Средства республиканского бюджета, благотворительные пожертвования, меценатская поддержка".

6. Вазирлар Маҳкамасининг 1999 йил 3 сентябрдаги 414-сон қарори билан тасдиқланган Бюджет ташкилотлари харажатларини молиялаштириш (тўлаш) тартибининг 29-банди еттинчи хатбошисидаги "халқ таълими" сўзларидан кейин "ҳамда маданият" сўзлари билан тўлдирилсин.

7. Вазирлар Маҳкамасининг 2020 йил 30 сентябрдаги "Опера санъатига ихтисослаштирилган мактаб-интернат ташкил этиш тўғрисида"ги 595-сон қарорининг 2-банди учинчи хатбошиси қуйидаги таҳрирда баён этилсин:

"2022/2023 ўқув йилидан бошлаб мактаб-интернатнинг 8-синфига 25 нафар ўқувчи танлов асосида қабул қилинади".

Ўзбекистон Республикаси

Президентининг

2022 йил 2 февралдаги

ПҚ-112-сон қарорига

8-ИЛОВА

Ўзбекистон Республикаси Президентининг ва

Ўзбекистон Республикаси Ҳукуматининг ўз кучини

йўқотган деб ҳисобланаётган айрим қарорлари

РЎЙХАТИ

1. "Ўзбекистон Республикаси Президентининг 2017 йил 8 августдаги "Ўзбекистон давлат консерваторияси фаолиятини янада ривожлантириш ва такомиллаштириш чора-тадбирлари тўғрисида"ги ПҚ-3178-сон қарорида:

а) 1-банднинг учинчи хатбошиси ва қарорга 2-илова;

б) 3-бандда:

2. Вазирлар Маҳкамасининг 2017 йил 5 сентябрдаги "Ўзбекистон Республикаси Маданият вазирлиги ҳузуридаги Ўзбекистонга оид хориждаги маданий бойликларни тадқиқ этиш маркази фаолиятини ташкил этиш чора-тадбирлари тўғрисида"ги 700-сон қарори.

3. Вазирлар Маҳкамасининг 2018 йил 14 февралдаги "Ўзбекистон Республикаси Ҳукуматининг айрим қарорларига ўзгартиришлар киритиш, шунингдек, баъзи қарорларини ўз кучини йўқотган деб ҳисоблаш тўғрисида"ги 109-сон қарорига илованинг 20-банди.

4. Вазирлар Маҳкамасининг 2018 йил 29 майдаги "Ўзбекистон Республикаси Вазирлар Маҳкамасининг ижро этувчи тузилмаси такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида"ги 400-сон қарорига илованинг 35-банди.

5. Вазирлар Маҳкамасининг 2019 йил 23 февралдаги "Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг "Идоралараро коллегиал органларни тубдан қисқартириш ва янада оптималлаштириш чора-тадбирлари тўғрисида" 2018 йил 28 августдаги ПФ-5527-сон Фармони)"ги 161-сон қарорига 1-илованинг 34-банди.

6. Вазирлар Маҳкамасининг 2019 йил 13 майдаги "Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг "Мамлакатни ижтимоий-иқтисодий ривожлантиришнинг стратегик вазифалари амалга оширилиши самарадорлиги учун Ўзбекистон Республикаси Вазирлар Маҳкамасининг масъулиятини оширишга доир биринчи навбатдаги чора-тадбирлар тўғрисида" 2019 йил 28 январдаги ПФ-5644-сон, "Ўзбекистон Республикаси Президентининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида" 2019 йил 1 февралдаги ПФ-5650-сон фармонлари ва Ўзбекистон Республикаси Президентининг "Ўзбекистон Республикаси Ҳукумати ишини ташкил этишнинг сифат жиҳатидан янги тизимини жорий этиш тўғрисида" 2019 йил 28 январдаги ПҚ-4136-сон қарори)"ги 397-сон қарорига илованинг 63-банди.

7. Вазирлар Маҳкамасининг 2020 йил 26 июндаги "Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг "Ўзбекистон Республикаси Вазирлар Маҳкамасининг ижро этувчи тузилмасини такомиллаштиришга доир қўшимча чора-тадбирлар тўғрисида" 2020 йил 22 январдаги ПҚ-4569-сон, "Ўзбекистон Республикаси Вазирлар Маҳкамаси фаолиятини такомиллаштиришга оид қўшимча чора-тадбирлар тўғрисида" 2020 йил 24 февралдаги ПҚ-4612-сон, "Ўзбекистон Республикаси Вазирлар Маҳкамасининг тузилмасига Бош вазирнинг инвестициялар ва ташқи иқтисодий алоқалар масалалари бўйича ўринбосари-инвестициялар ва ташқи савдо вазири лавозимини киритиш тўғрисида" 2020 йил 10 мартдаги ПҚ-4635-сон ва "Ўзбекистон Республикаси Вазирлар Маҳкамасининг фаолиятини такомиллаштиришга оид қўшимча чора-тадбирлар тўғрисида" 2020 йил 12 майдаги ПҚ-4710-сон қарорлари)"ги 411-сон қарорига 1-илованинг 24-банди.

8. Вазирлар Маҳкамасининг 2021 йил 8 январдаги "Ўзбекистон Республикаси Ҳукуматининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг "Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида" 2020 йил 26 майдаги ПФ-6000-сон Фармони ва "Ўзбекистон Республикаси Маданият вазирлиги фаолиятини такомиллаштириш чора-тадбирлари тўғрисида" 2020 йил 26 майдаги ПҚ-4730-сон қарори)"ги 7-сон қарорига илованинг 6-банди.

Қонун ҳужжатлари маълумотлари миллий базаси (www.lex.uz),

2022 йил 3 февраль

"Халқ сўзи", 2022 йил 4 февраль