Ўзбекистон Республикаси Вазирлар Маҳкамасининг 24.08.2000 й. 331-сон "2000 йил пахта хосилини йиғиштириб олишни уюшқоқлик билан ўтказиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

24.08.2000 й.

N 331

2000 ЙИЛ ПАХТА ХОСИЛИНИ ЙИҒИШТИРИБ

ОЛИШНИ УЮШҚОҚЛИК БИЛАН ЎТКАЗИШ

ЧОРА-ТАДБИРЛАРИ ТЎҒРИСИДА

2000 йил пахта ҳосилини йиғиштириб олишни уюшқоқлик билан ўтказиш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Қишлоқ ва сув хўжалиги вазирлиги (Холтоев), "Ўздавпахтасаноатсотиш" уюшмаси (Зикриёев), "Ўзқишлоқхўжаликтаъминоттузатиш" давлат-кооператив қўмитаси (Юсупов), бошқа вазирликлар ва идоралар, Қорақалпоғистон Республикаси Вазирлар Кенгаши, вилоятлар ва туманлар ҳокимликлари, қишлоқ хўжалиги корхоналари раҳбарлари пахта териш машиналари, транспорт тракторлари, пахта ташиш учун махсус жиҳозланган юк автомобиллари, пахта тозалаш заводлари, пахта тайёрлаш пунктлари ҳамда қуритиш-тозалаш цехлари шу йил 1 сентябргача ҳозирлаб қўйилишини, шунингдек, хўжаликларга талаб қилинган миқдорда фартуклар, брезентлар ва йиғим-теримни қисқа муддатларда ҳамда нобудгарчиликсиз ўтказиш учун зарур бўлган бошқа моддий-техника ресурслари етказиб берилишини таъминласинлар.

2. Ўзбекистон Республикаси Қишлоқ ва сув хўжалиги вазирлиги (Холтоев), "Ўзқишлоқхўжаликтаъминоттузатиш" давлат-кооператив қўмитаси (Юсупов), Қорақалпоғистон Республикаси Вазирлар Кенгаши, вилоятлар ҳокимликлари:

ғўза баргини тўкиш 2000 йил 20 сентябрдан кечиктирмасдан, Қорақалпоғистон Республикаси ва Хоразм вилоятида эса шу йил 25 сентябрдан кечиктирмай тугалланган ҳолда энг қулай муддатларда сифатли ўтказилишини таъминласинлар. Ғўза баргини тўкишни ерда олиб бориш усули билан ўтказиш учун техника воситалари ва аппаратлар тайёрлаб қўйилишига биринчи даражали аҳамият берсинлар;

ҳосил пахта териш машиналари билан 1-иловада назарда тутилгандан кам бўлмаган ҳажмда йиғиштириб олинишини таъминласинлар;

далаларни "Кейс" горизонтал шпинделли машиналарнинг ишлаши учун тайёрлашга алоҳида эътибор берсинлар, ҳар бир ана шундай машина учун камида 140 гектар пахта майдони ажратилишини таъминласинлар. Горизонтал шпинделли машиналардан унумли фойдаланилиши учун шахсий жавобгарлик Қорақалпоғистон Республикаси Вазирлар Кенгаши Раиси, вилоятлар ва туманлар ҳокимлари ва "Ўзқишлоқхўжаликтаъминоттузатиш" давлат-кооператив қўмитаси ҳамда унинг ҳудудий бўлинмалари раҳбарлари зиммасига юклансин.

3. "Ўзқишлоқхўжаликтаъминоттузатиш" давлат-кооператив қўмитаси (Юсупов), "Ўзқишлоқхўжаликмаш-холдинг" холдинг компанияси (Матчонов) пахта териш машиналари, шунингдек, пахта йиғим-терими ва тайёрлашда банд бўлган бошқа техника учун двигателлар, узеллар, агрегатлар ва бошқа материалларнинг алмаштириш фондларини ташкил этсинлар, уларнинг белгиланган жойларга зудлик билан етказиб берилишини таъминласинлар.

4. "Ўзбекистон ҳаво йўллари" миллий авиакомпанияси (Рўзметов), Ўсимликларни ҳимоя қилиш ва агрокимёвий-тадқиқотлар республика маркази (Муҳамадалиев) Ўзбекистон Республикаси Қишлоқ ва сув хўжалиги вазирлиги ҳамда "Ўзагрокимётаъминот" бирлашмасининг буюртманомалари бўйича ғўза баргини тўкиш учун зарур бўлган миқдорда самолётлар ва махсус мотодельтопланлар ажратсинлар.

5. Пахта йиғим-терими қатнашчиларини моддий рағбатлантиришни кучайтириш мақсадида хўжаликларга пахта терими учун далалардаги мавжуд ҳосилга қараб табақалаштирилган ҳақ тўлаш тавсия қилинсин.

Қўл теримида:

терилган 1 килограмм ўрта толали нав пахта учун  камида 14 сўм, ингичка толали пахта учун 16 сўм;

терилган 1 килограмм ўрта толали уруғлик пахта учун  камида 16 сўм, ингичка толали пахта учун  18 сўм ҳақ тўлансин.

Машина-трактор парклари ва хўжаликлар механик-ҳайдовчиларга икки қаторли вертикал шпинделли пахта териш машинасида терилган бир тонна пахта учун  камида 300 сўм, тўрт қаторли машинада терилган пахта учун  камида 200 сўм, икки қаторли горизонтал шпинделли машинада терилган пахта учун  камида 150 сўм миқдорида ҳақ тўлайдилар.

Теримчилар ва пахта териш машиналарининг механик-ҳайдовчилари билан ҳар беш кунда ҳисоб-китоб қилинсин.

6. Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси, Марказий банк ва бошқа тижорат банклари теримчилар ва пахта териш машиналарининг механик-ҳайдовчилари билан, шунингдек, пахтани юклаш, тушириш, тайёрлаш, транспортда ташиш, жойлаштириш ҳамда ишлов бериш, пахта териш техникасига техника хизмати кўрсатиш ва тузатишда банд бўлган ходимлар билан ўз вақтида ҳисоб-китоб қилиш учун хўжаликларни, машина-трактор паркларини, тайёрлов пунктларини, пахта ташувчиларни, пахта тозалаш заводларини меҳнатга ҳақ тўлашнинг идоравий ички нормативлари бўйича ўз вақтида маблағ ва етарли миқдорда нақд пул билан таъминласинлар.

7. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ва туманлар ҳокимликлари ширкат хўжаликлари ва бошқа қишлоқ хўжалиги корхоналари ҳар бир оила, ижара пудрати ва бошқа ички хўжалик бўлинмалари билан топширилган пахта хом ашёсининг амалдаги ҳажми ва сифати асосида ҳисоб-китоб қилинишини таъминлаш устидан доимий назорат ўрнатсинлар.

Хўжалик ички пудрати айрим бўлинмалари зарарлари бошқа бўлинмалар даромадлари ҳисобига қопланиши қатъий тақиқлансин.

8. Андижон, Наманган ва Фарғона вилоятлари ҳокимликлари Жиззах ва Сирдарё вилоятлари хўжаликлари билан тузилган шартномаларга кўра 2-иловага мувофиқ ортиқча меҳнат ресурслари юқорида кўрсатиб ўтилган вилоятларга пахта теримига сафарбар қилинишини ташкил этсинлар.

"Ўзбекистон темир йўллари" давлат-акциядорлик компанияси, "Ўзавтотранс" давлат корпорацияси пахта теримига жалб қилинган одамларнинг тайинланган жойларга олиб борилишини таъминласинлар.

9. "Ўзавтотранс" давлат корпорацияси "Ўздавпахтасаноатсотиш" уюшмаси буюртманомаларига кўра тузилган шартномалар асосида республика минтақалари бўйича пахта ташиш учун зарур миқдорда юк машиналари ажратилишини таъминласин.

10. "Ўзқишлоқхўжаликмаш-холдинг" холдинг компанияси ва "Ўзқишлоқхўжаликтаъминоттузатиш" давлат-кооператив қўмитаси пахта йиғим-терими мавсумида қатнашувчи пахта териш машиналари ва бошқа техниканинг узлуксиз ишлашини ташкил этишда пахта экувчи хўжаликларга ва машина-трактор паркларига амалий ёрдам кўрсатиш мақсадида вилоятларга 3-иловага мувофиқ саноат корхоналарини бириктириб қўйсинлар.

11. "Ўзнефтмаҳсулот" акциядорлик компанияси (Аҳмедов) ёнилғи-мойлаш материаллари хўжаликларга, фермерларга, машина-трактор паркларига ва пахта тозалаш саноати корхоналарига йиғим-терим ишларини бажариш учун зарур бўлган миқдорда узлуксиз етказиб берилишини таъминласин.

12. "Ўзбекбирлашув" (Бекчонов), "Ўзбексавдо" (Файзиев) компаниялари, "Ўздонмаҳсулот" давлат корпорацияси (Нажмиддинов) пахта йиғим-терими қатнашчиларини озиқ-овқат ва бошқа халқ истеъмол товарлари билан узлуксиз таъминлаш масалаларини ўз вақтида ҳал қилсинлар.

13. Ўзбекистон Республикаси Соғлиқни сақлаш вазирлиги (Назиров) пахта йиғим-теримида банд бўлган ходимларга зарур тиббий ёрдам кўрсатилишини таъминласин.

14. Ўзбекистон Республикаси Маданият ишлари вазирлиги (Жўраев), Почта ва телекоммуникациялар агентлиги (Абдуллаев) ҳосил йиғим-терими даврида теримчиларга маданий хизмат кўрсатишни ташкил этсинлар, санъат усталари ва адабиёт намояндаларининг хўжаликларга боришларини, газета ва журналлар ўз вақтида етказиб берилишини назарда тутсинлар.

15. "Ўзтелерадио" компанияси (Кўчимов) замонавий усулларни амалиётда қўллаган ҳолда пахта етиштириш ва уни териб олишда юқори натижаларга эришган ишлаб чиқариш илғорлари  теримчилар, механик ҳайдовчилар, ижарачилар, фермерлар, хўжаликлар раҳбарларига алоҳида эътибор қаратган ҳолда 2000 йилги пахта йиғим-теримининг боришини радио ва телевидениеда мунтазам равишда ёритиб борсин.

16. Мазкур қарорнинг бажарилишини назорат қилиш Бош вазир ўринбосари Т.Холтоев ва Ўзбекистон Республикаси Президентининг Давлат маслаҳатчиси И.Жўрабеков зиммасига юклансин.

Вазирлар Маҳкамасининг Раиси                                              И. Каримов

Вазирлар Маҳкамасининг

2000 йил 24 августдаги

331-сон қарорига

3-ИЛОВА

"Ўзқишлоқхўжаликмаш-холдинг" холдинг компанияси

ва "Ўзқишлоқхўжаликтаъминоттузатиш" давлат-кооператив қўмитаси

заводларининг пахта териш техникасини тайёрлашни тугаллаш

ва уларнинг узлуксиз ишлашини таъминлашда ёрдам кўрсатиш

учун вилоятларга бириктирилиши

Жиззах вилояти:

"Тошкент трактор заводи" давлат-акциядорлик жамияти

"Чирчиқ қишлоқ хўжалиги машинасозлиги заводи" очиқ турдаги акциядорлик жамияти

"Асака таъмирлаш заводи" акциядорлик жамияти

"Тошкент агрегат заводи" акциядорлик жамияти

"Ўзгидравлика" акциядорлик жамияти

Қашқадарё вилояти:

"Тошкент қишлоқ хўжалиги машинасозлиги ишлаб чиқариш бирлашмаси" давлат-акциядорлик жамияти

"Кимёқишлоқмаш" акциядорлик жамияти

"Қаршитаъмир" акциядорлик жамияти

"Тошкент тажриба-тузатиш механика заводи" акциядорлик жамияти

Сирдарё вилояти:

"Ўзбекистон қишлоқ хўжалиги машинасозлиги ишлаб чиқариш бирлашмаси" акциядорлик жамияти

"Далварзин таъмирлаш заводи" акциядорлик жамияти

"Қўқон таъмирлаш" акциядорлик жамияти

"Ускунақурувчи" акциядорлик жамияти

"Кугайтаъмирлаш" акциядорлик жамияти