язык интерфейса

ЎзР Конунчилиги

ЎзР Конунчилиги/ Пул ва бюджет тизими. Бюджетдан ташқари фондлар/ Бюджет тизими/ Бюджет процесси. Макроиқтисодий кўрсаткичлар. Моддий баланслар/ Моддий балансларни ишлаб чиқиш ва тасдиқлаш учун киритиш тартиби тўғрисида Низом (ЎзР ВМ 28.06.2006 й. 124-сон Қарорига илова)

Вы можете получить доступ на один день к продукту Законодательство Руз.

Вазирлар Маҳкамасининг

2006 йил 28 июндаги

124-сон қарорига

ИЛОВА



Моддий балансларни ишлаб чиқиш ва тасдиқлаш

учун киритиш тартиби тўғрисида

НИЗОМ


I. УМУМИЙ ҚОИДАЛАР


1. Мазкур Низом вазирликлар, идоралар, хўжалик бирлашмалари ва Ўзбекистон Республикаси Вазирлар Маҳкамаси котибиятларининг ўзаро ҳамкорлиги тартибини, хом ашё, материаллар ва тайёр маҳсулотларнинг асосий турларини ишлаб чиқариш ва улардан фойдаланишнинг моддий баланслари лойиҳаларини (кейинги ўринларда матнда "моддий баланслар" деб юритилади) ишлаб чиқиш ва тасдиқлаш учун киритиш тартибини белгилайди.


II. ИШЧИ ГУРУҲЛАР ТАРКИБЛАРИНИ ҲАМДА МОДДИЙ

БАЛАНСЛАР ЛОЙИҲАЛАРИНИ ИШЛАБ ЧИҚИШ

ВА КИРИТИШ ЖАДВАЛИНИ ТАСДИҚЛАШ


3. Ўзбекистон Республикаси Иқтисодиёт вазирлиги Ўзбекистон Республикаси Вазирлар Маҳкамасининг моддий баланслар лойиҳаларини ишлаб чиқиш ва киритиш бўйича ишчи гуруҳлар (кейинги ўринларда матнда "ишчи гуруҳлар" деб юритилади) таркибларини ҳамда моддий баланслар лойиҳаларини ишлаб чиқиш ва киритиш жадвалини тасдиқлаш тўғрисидаги фармойиши лойиҳасини белгиланган тартибда ишлаб чиқади ва ҳар йили 15 июлгача бўлган муддатда Вазирлар Маҳкамасига киритади.


4. Ўзбекистон Республикаси Вазирлар Маҳкамаси ҳар йили 25 июлгача моддий баланслар лойиҳаларини ишлаб чиқиш ва уларни Иқтисодиёт вазирлигига киритиш ҳамда кейинчалик Иқтисодиёт ва саноат вазирлиги томонидан муддатлари ва масъул ташкилотлар кўрсатилган ҳолда Вазирлар Маҳкамасига киритиш жадвалини тасдиқлайди.

Жадвал билан бир вақтда Иқтисодиёт вазирлиги ҳузуридаги Иқтисодиёт вазирининг ўринбосарлари раҳбарлигида балансларни бевосита ишлаб чиқувчи идоралар ва ташкилотларнинг раҳбарларини ёки раҳбарларнинг биринчи ўринбосарларини, Ўзбекистон Республикаси Молия вазирлиги, Инвестициялар ва ташқи савдо вазирлиги, Давлат солиқ қўмитаси, Давлат божхона қўмитаси масъул ходимларини жалб этган ҳолда ишчи гуруҳлар таркиблари тасдиқланади.

Ишчи гуруҳлар, зарурият бўлса, баланслар лойиҳаларини ишлаб чиқиш даврида бошқа вазирликлар ва идораларнинг вакилларини ҳамда Вазирлар Маҳкамаси котибиятларининг масъул ходимларини (келишув бўйича) жалб этиш ҳуқуқига эгадир.


III. ТАРМОҚ ВАЗИРЛИКЛАРИ, ИДОРАЛАР,

ХЎЖАЛИК БИРЛАШМАЛАРИ ДАРАЖАСИДА

МОДДИЙ БАЛАНСЛАРНИ ИШЛАБ ЧИҚИШ ВА

УЛАРНИ ИҚТИСОДИЁТ ВАЗИРЛИГИГА КИРИТИШ


5. Моддий баланслар лойиҳалари Иқтисодиёт ва саноат вазирлигига киритилгунга қадар баланс ишлаб чиқилиши учун масъул бўлган тармоқ вазирликлари, идоралар ва хўжалик бирлашмалари томонидан жорий йилнинг биринчи ярим йиллиги (агар тасдиқланган жадвал бўйича лойиҳа октябрь ойида ва ундан кейин киритилса - тўққиз ой) учун тармоқ ривожланишининг амалдаги натижалари баҳоланиши ва жорий йилга прогнозлар ҳисобга олинган ҳолда тармоқ даражасида прогноз моддий балансларнинг сценарий вариантлари тайёрланади.

6. Моддий баланслар лойиҳалари тармоқ вазирликлари, идоралар ва хўжалик бирлашмалари томонидан мазкур Низомнинг 4-бандига мувофиқ уларни киритиш жадвалида назарда тутилган муддатларда Иқтисодиёт ва саноат вазирлигига киритилади.

7. Иқтисодиёт ва саноат вазирлигига киритиладиган моддий баланслар лойиҳаси бўйича ҳужжатлар туркумида қуйидагилар мавжуд бўлиши керак:

идора раҳбари томонидан имзоланган илова қилинадиган хат;

Ўзбекистон Республикаси Президентининг қарори, фармойиши ёки Ҳукумат қарори (Вазирлар Маҳкамасининг қарори, фармойиши) лойиҳаси;

Мазкур Низомга иловага мувофиқ Хом ашё, материаллар ва тайёр маҳсулотларнинг энг муҳим турларини ишлаб чиқариш ва истеъмол қилиш моддий балансларини ишлаб чиқиш бўйича тавсияларга мувофиқ ишлаб чиқилган баланс лойиҳаси ва кўриб чиқиш жадваллари;

баланс лойиҳасига раҳбар томонидан имзоланган тушунтириш хати;

эҳтиёжнинг, қувватлардан фойдаланиш даражасининг ҳисоб-китоби ва баланс моддасини асослайдиган бошқа зарур ҳисоб-китоб материаллари.


8. Мазкур Низомнинг 7-банди талабларига риоя қилинмасдан Иқтисодиёт ва саноат вазирлигига киритилган моддий баланслар лойиҳалари тушган санасидан бошлаб 2 кундан кечикмай аниқ мулоҳазалар кўрсатилган ҳолда ишлаб чиқувчиларга қайтарилади.

Бунда мулоҳазалар ҳисобга олинган ҳолда қайта ишланган моддий баланс лойиҳаси 3 кун муддатда такроран Иқтисодиёт вазирлигига киритилади.



IV. МОДДИЙ БАЛАНСЛАРНИ ИҚТИСОДИЁТ ВА

САНОАТ ВАЗИРЛИГИДА ИШЛАБ ЧИҚИШ

9. Иқтисодиёт ва саноат вазирлиги томонидан қабул қилинган моддий баланслар лойиҳалари сўнгра ишчи гуруҳлар томонидан кўриб чиқилади. Моддий баланслар лойиҳаларини кўриб чиқиш давомида тармоқ ривожлантириш дастурлари, Инвестиция дастури, экспортнинг прогноз параметрлари, давлат стратегик захирасининг эҳтиёжлари ва иқтисодий ўсиш суръатларининг умумий кўрсаткичлари ҳисобга олинади.

10. Ишчи гуруҳлар тармоқ вазирликлари, идоралар ва хўжалик бирлашмалари томонидан киритилган моддий баланслар лойиҳаларини экспертизадан ўтказади, уларни келишади ва жадвалда назарда тутилган муддатларда мазкур Низомнинг 4-бандига мувофиқ Иқтисодиёт ва саноат вазирининг имзоси билан Вазирлар Маҳкамасига киритади.

Моддий баланслар лойиҳалари Вазирлар Маҳкамасининг Иш тартибида белгиланган тартибда тегишли моддий балансларни тасдиқлаш тўғрисидаги Ўзбекистон Республикаси Президентининг қарорлари, фармойишлари ёки Ҳукумат қарорлари (Вазирлар Маҳкамасининг қарорлари, фармойишлари) шаклида Ўзбекистон Республикаси Вазирлар Маҳкамасига киритилади.



V. МОДДИЙ БАЛАНСЛАРНИ

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИДА

КЎРИБ ЧИҚИШ ТАРТИБИ


11. Тегишли моддий балансларни тасдиқлаш тўғрисидаги Ҳукумат қарорлари лойиҳаларини Вазирлар Маҳкамасида кўриб чиқиш Вазирлар Маҳкамасининг Иш тартибига мувофиқ амалга оширилади.


12. Зарурият бўлса, моддий баланслар лойиҳаларини ва уларни тасдиқлаш тўғрисидаги тегишли қарорларни қайтариш Вазирлар Маҳкамасининг Иш тартибида белгиланган тартибда ва муддатларда амалга оширилиши мумкин.

Бунда ҳужжатлар мулоҳазалар ҳисобга олинган ҳолда ишчи гуруҳда пухта қайта ишланиши ва Вазирлар Маҳкамаси томонидан қайтарилган кундан бошлаб 3 кундан кечикмай такроран Вазирлар Маҳкамасига киритилиши керак.


13. Киритилган моддий баланслар лойиҳаларини кўриб чиқишга тайёрлаш Вазирлар Маҳкамасининг тегишли ахборот-таҳлил департаментлари томонидан 10 кун муддатда амалга оширилади. Кўрсатиб ўтилган муддатнинг фақат Ўзбекистон Республикаси Бош вазирининг қарори билан узайтирилишига йўл қўйилади.

Саволлар ва мулоҳазалар пайдо бўлган тақдирда моддий баланс лойиҳасини пухта қайта ишлаш ишчи гуруҳ вакилларини жалб этган ҳолда Вазирлар Маҳкамасининг ахборот-таҳлил департаментлари томонидан амалга оширилади.



VI. МОДДИЙ БАЛАНСЛАР ЛОЙИҲАЛАРИНИНГ

ЎЗБЕКИСТОН РЕСПУБЛИКАСИ ПРЕЗИДЕНТИ

АДМИНИСТРАЦИЯСИДА КЎРИБ ЧИҚИШ ТАРТИБИ

14. Моддий баланслар лойиҳаларини Ўзбекистон Республикаси Президенти Администрациясида кўриб чиқиш Ўзбекистон Республикаси Президенти Администрациясининг Регламентида белгиланган тартибда амалга оширилади.






Низомга

ИЛОВА



Хом ашё, материаллар ва тайёр маҳсулотларнинг

энг муҳим турларини ишлаб чиқариш ва истеъмол қилиш

моддий балансларини ишлаб чиқиш бўйича

ТАВСИЯЛАР


I. УМУМИЙ ҚОИДАЛАР


1. Мазкур Тавсиялар Ўзбекистон Республикаси Президентининг "Маҳсулотлар, хомашё ва материаллар асосий турларининг ишлаб чиқиладиган ва тасдиқланадиган моддий баланслар рўйхатини тасдиқлаш тўғрисида" 2017 йил 4 майдаги Ф-4926-сон фармойишига, Вазирлар Маҳкамасининг "Маҳсулотлар, хом ашё ва материалларнинг юқори ликвидли турларини сотишнинг бозор механизмларини жорий этишни давом эттириш тўғрисида" 2004 йил 5 февралдаги 57-сон қарорига мувофиқ ишлаб чиқилган.

Тавсияларда турлари Ҳукумат қарорлари билан белгиланган маҳсулотлар, хом ашё ва материалларни ишлаб чиқариш ва истеъмол қилишнинг тасдиқланадиган ва ҳисоблаб чиқиладиган моддий балансларини ишлаб чиқиш бўйича асосий йўналишлар мавжуд.


2. Хом ашё, материаллар ва тайёр маҳсулотларнинг энг муҳим турларини ишлаб чиқариш ва истеъмол қилиш баланслари (кейинги ўринларда матнда "моддий баланслар" деб юритилади) республикани ижтимоий-иқтисодий ривожлантириш прогнозларининг таркибий қисми ҳисобланади.


3. Моддий баланслар маҳсулотларнинг стратегик турларини ишлаб чиқаришнинг прогнозлаштирилаётган ўсишини иқтисодиёт тармоқлари ва ижтимоий соҳада уларга бўлган талаб билан комплекс боғлаш мақсадида ишлаб чиқилади.


4. Прогноз моддий баланслар ҳар йили ишлаб чиқилади.


5. Моддий баланс икки қисмдан иборат бўлади:

а) "Ресурслар" қисми моддий ресурслар жалб этилишининг барча манбаларини, шу жумладан, ишлаб чиқариш (қазиб олиш), импорт, давр бошидаги қолдиқ, давлат стратегик захирасидан тушум ва ҳоказоларни акс эттиради;

б) "Тақсимлаш (талаб) қисми қуйидаги ҳажмларни акс эттиради:

давлат эҳтиёжлари (бюджет истеъмолчилари) учун маҳсулот етказиб бериш;

тармоқ ички истеъмоли, шу жумладан, технологик эҳтиёжлар учун фойдаланиш ва ишлаб чиқариш нобудгарчилиги;

республика ички истеъмоли, унда баланснинг ўзига хослигидан келиб чиқиб маҳсулотни биржа савдолари (кимошди) орқали сотиш ва тўғридан-тўғри шартномалар бўйича етказиб бериш ҳажмлари алоҳида кўрсатилади;

давлат стратегик захирасини тўлдириш ва янгилаш учун етказиб бериш;

экспортга етказиб бериш, унда баланснинг ўзига хослигидан келиб чиқиб Ўзбекистон республика товар-хом ашё биржасининг валюта майдончалари Ташқи иқтисодий алоқалар, инвестициялар ва савдо вазирлигининг ташқи савдо ташкилотлари ва "Ўзпахтасаноат" АЖ орқали сотиладиган ҳажм алоҳида кўрсатилади;

давр охиридаги қолдиқ.


6. Балансларга ҳар қайси баланснинг хусусияти акс эттириладиган кўриб чиқиш жадваллари унинг моддалари (ресурслар ва тақсимланадиган қисми) мазмунини ҳамда ҳисобот, жорий ва прогноз даврларидаги кўрсаткичлар суръатларини ёйиб кўрсатган ҳолда илова қилинади.


7. Баланслар ўз таркибида хом ашёнинг ушбу турини, материаллар ва тайёр маҳсулот ишлаб чиқарадиган (қазиб оладиган ва улгуржи етказиб берадиган) вазирликлар, идоралар, хўжалик бошқаруви органлари томонидан Иқтисодиёт вазирлигига тақдим этилади.


8. Иқтисодиёт вазирлиги томонидан Вазирлар Маҳкамасига тақдим этиладиган прогноз моддий балансларга таклифлар мажбурий тартибда манфаатдор вазирликлар ва идоралар билан келишилган бўлиши ҳамда уларга раҳбарлар имзолаган тушунтириш хатлари илова қилинган бўлиши керак.

Тушунтириш хатида қуйидагилар мавжуд бўлиши керак:

ресурсларнинг у ёки бу тури учун ҳисобот ва прогноз йили бўйича баланснинг ҳар қайси моддасига алоҳида қисқача асослаш;

баланслар мазмунини баҳолаш, уларнинг ички бозорни тўлдириш муаммоларини ҳал этишга ва экспорт потенциалини ривожлантиришга, меҳнатга лаёқатли аҳоли бандлигини оширишга ва шу кабиларга таъсири;

ресурсларни биржа савдолари ва кимошди савдолари орқали сотишнинг бозор механизмларини жорий этиш билан боғлиқ масалалар;

Ҳукумат даражасида алоҳида кўриб чиқишни талаб қиладиган муаммолар ва уларни ҳал этиш бўйича таклифлар.



II. ЁҚИЛҒИ-ЭНЕРГЕТИКА КОМПЛЕКСИ

МАҲСУЛОТЛАРИ БАЛАНСЛАРИ


9. Ресурслар баланслари ва ёқилғи-энергетика комплекси маҳсулотларини тақсимлаш лойиҳалари умумлаштирилган ҳолда:

нефть ва газ конденсати, нефть маҳсулотлари, нефть маҳсулотларини ишлаб чиқариш учун қайта ишлаш хом ашёси, табиий газ, суюлтирилган газ бўйича - "Ўзбекнефтгаз" миллий-холдинг компанияси томонидан;

электр энергияси ва кўмир бўйича - "Ўзбекэнерго" давлат- акциядорлик компанияси, "Ўзбеккўмир" очиқ акциядорлик жамияти томонидан тақдим этилади.


10. Вазирликлар, идоралар, Ўзбекистон Республикаси Давлат бюджетидан моллиялаштириладиган хўжалик бошқаруви органлари ўз тасарруфларидаги корхоналарнинг автомобиль бензинига, дизель ёқилғисига, кўмирга бўлган эҳтиёжини асослайдилар ҳамда тегишли ҳисоб-китобларни Молия вазирлигининг ҳудудий органларига юборадилар.

Молия вазирлиги нефть маҳсулотлари ва кўмирни ишлаб чиқариш ҳамда тақсимлаш бўйича баланслар лойиҳалари Иқтисодиёт вазирлигига киритилгунга қадар вазирликлар, идоралар, хўжалик бошқаруви органлари бўйича бюджет маблағлари лимитларини белгилайди.

"Ўзбекнефтгаз" миллий-холдинг компанияси Молия вазирлиги ва бошқа манфаатдор вазирликлар, идоралар, хўжалик бошқаруви органлари билан биргаликда ушбу мақсадлар учун ажратилган бюджет маблағлари доирасида натурал ифодада автомобиль бензини ва дизель ёқилғиси лимитларини белгилайди.


11. Давлат буюртмаси бўйича қишлоқ хўжалиги маҳсулотлари етиштирадиган қишлоқ хўжалиги ишлаб чиқарувчилари учун дизель ёқилғиси етказиб бериш ҳажмлари давлат буюртмасига мувофиқ белгиланади.



III. ҚОРА ВА РАНГЛИ МЕТАЛЛУРГИЯ

МАҲСУЛОТЛАРИ БАЛАНСЛАРИ


12. Қора ва рангли металлургия маҳсулотларини ишлаб чиқариш ва улардан фойдаланиш баланслари лойиҳалари:

қора металлар прокати, қора металлар парчалари ва чиқитларини тайёрлаш ҳамда ишлатиш бўйича - "Ўзметкомбинат" акциядорлик ишлаб чиқариш бирлашмаси томонидан;

иккиламчи алюминий, рангли металлар парчалари ва чиқитларини тайёрлаш ҳамда ишлатиш бўйича - "Ўзбекистон рангли металл парчалари, чиқиндиларини тайёрлаш ва қайта ишлаш заводи" АЖ томонидан;

рангли металлар (тозаланган мис ва металл рух) бўйича - "Олмалиқ кон-металлургия комбинати" очиқ акциядорлик жамияти, "Ўзбекистон рангли металл парчалари, чиқиндиларини тайёрлаш ва қайта ишлаш заводи" АЖ томонидан тақдим этилади.

13. Вазирликлар, идоралар, Ўзбекистон Республикаси Давлат бюджетидан молиялаштириладиган хўжалик бошқаруви органлари, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Иқтисодиёт вазирлигига, Иқтисодиёт вазирлиги томонидан юбориладиган шакллар бўйича, зарур асослашлар ва ҳисоб-китоблар билан бирга тасарруфидаги корхоналар ва ташкилотларнинг металлургия саноати маҳсулотларига бўлган эҳтиёжини, "Ўзметкомбинат" акциядорлик ишлаб чиқариш бирлашмаси томонидан етказиб бериладиган қора металлар прокати умумий миқдоридан ажратган ҳолда, адресли дастурларни амалга оширишга эҳтиёжни, шу жумладан, академик лицейлар, касб-ҳунар коллежларини ва умумтаълим мактабларини шунингдек тиббиёт муассасаларини қуриш ва реконструкция қилишга эҳтиёжни тақдим этадилар.

Шу билан бирга, фойдаланиш йўналишларини (қурилиш-монтаж ишларини, маҳсулотлар ишлаб чиқаришни, фойдаланиш эҳтиёжларини) ҳамда ушбу йўналишлар бўйича солиштирма харажатларни кўрсатган ҳолда ҳисобот, жорий ва прогноз даврлари динамикасида муфассал ҳисоб-китоблар тақдим этилади.

Қора ва рангли металлар парчалари, чиқитларини тайёрлаш (топшириш) бўйича топшириқлар Иқтисодиёт вазирлиги томонидан "Ўзметкомбинат" акциядорлик ишлаб чиқариш бирлашмаси ҳамда "Ўзиккиламчиранглиметалл" акциядорлик жамияти билан биргаликда, вазирликлар, идоралар, компаниялар, уюшмалар, холдинглар таклифларини ҳисобга олган ҳолда ишлаб чиқилади ва ҳар йили октябрь ойидан кечикмай Вазирлар Маҳкамасига тасдиқлаш учун киритилади.



IV. КАБЕЛЬ-СИМ МАҲСУЛОТЛАРИ

УЧУН ИШЛАБ ЧИҚАРИШ ВА

ИШЛАТИШ БАЛАНСЛАРИ


14. "Ўзэлтехсаноат" уюшмаси, "Ўзагротехсаноатхолдинг" АЖ, "Олмалиқ кон-металлургия комбинати" очиқ акциядорлик жамияти ва бошқа ташкилотлар тасарруфидаги корхоналар томонидан ишлаб чиқариладиган кабель-сим маҳсулотларининг тегишли турларини ишлаб чиқариш ва улардан фойдаланиш бўйича таклифлар тақдим этадилар, бунда ишлаб чиқариладиган кабель турини ва миснинг солиштирма сарфини ҳисобга олган ҳолда тозаланган мисга эҳтиёж ҳисоб-китоблари илова қилинади.

15. Кабель-сим маҳсулотларига бўлган эҳтиёж тасарруфидаги корхоналар бўйича вазирликлар, идоралар, хўжалик бошқаруви органлари, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан Иқтисодиёт вазирлиги юборадиган шакллар бўйича Иқтисодиёт вазирлигига тақдим этилади.

Эҳтиёж фойдаланиш йўналишлари (қурилиш-монтаж ишлари, ишлаётган тармоқларни алмаштириш, саноат маҳсулоти ва шу кабилар билан комплектация қилиш) бўйича, ушбу йўналишлар бўйича сарфларнинг солиштирма нормаларини қўлланган ҳолда ҳисоб-китоблар билан асосланади.


16. Умумий эҳтиёжда "давлат эҳтиёжлари учун" сатри ажратиб кўрсатилади, у давлат молия маблағлари ҳисобига кабель-сим маҳсулотлари харид қилиш ҳажмларини акс эттиради.



V. МИНЕРАЛ ЎҒИТЛАР БАЛАНСИ


17. Минерал ўғитларни турлари бўйича ишлаб чиқариш ва улардан фойдаланиш баланси лойиҳаси физик вазн ва 100 фоиз озиқли модда миқдори бўйича ишлаб чиқилади ҳамда қуйидаги асослашлар билан бирга "Ўзкимёсаноат" давлат-акциядорлик компаниясига тақдим этилади:

турларига кўра корхоналар бўйича ишлаб чиқариш қувватларидан фойдаланиш мўлжали;

ўғитларнинг амалдаги ва мўлжалланаётган экспорти тўғрисидаги маълумотлар;

республика истеъмолчиларига ўғитларни амалда етказиб бериш тўғрисидаги маълумотлар ва прогноз қилинаётган давр учун таклифлар.

Шу билан бирга, балансга Қишлоқ хўжалиги вазирлиги билан биргаликда ишлаб чиқилган қишлоқ хўжалиги ишлаб чиқарувчиларига минерал ўғитлар етказиб бериш жадвали азот, фосфор ва калий ўғитлари бўйича ойларга бўлган ҳолда илова қилинади.

"Ўзкимёсаноат" давлат-акциядорлик компанияси минерал ўғитлар баланси лойиҳасига аммиак, фосфор хом ашёси, техник олтингугурт , олтингугурт кислотаси ва шу каби хом ашёларни ишлаб чиқариш баланслари лойиҳаларини илова қилади.


18. Қишлоқ хўжалиги вазирлиги томонидан "Ўзкимёсаноат" давлат-акциядорлик компанияси билан биргаликда экин майдонлари баланси, минерал ўғитлар солиш нормалари асосида қишлоқ хўжалигига, шу жумладан, давлат эҳтиёжлари учун, шунингдек бошқа қишлоқ хўжалиги ишлаб чиқарувчиларини таъминлаш учун, шу жумладан, биржа савдолари орқали ҳамда тўғридан-тўғри шартномалар бўйича минерал ўғитлар ажратиш прогнози ҳисоблаб чиқилади.

19. "Ўзкимёсаноат" давлат-акциядорлик компанияси:

ишлаб чиқарилаётган минерал ўғитлар қиймати, қишлоқ хўжалигига етказиб бериладиган ўғитлар қиймати ҳисобини ҳамда прогноз қилинаётган йилда давлат эҳтиёжлари учун минерал ўғитлар харид қилишга ажратилиши кўзда тутилаётган маблағлар ҳажмларини;

"Ўзкимёсаноат" давлат-акциядорлик компанияси корхоналарининг молия ресурслари ва пул оқимлари ҳисоб-китоб балансларини;

экспорт қийматини ва корхоналар ихтиёрида қоладиган валюта тушумининг корхоналар бўйича ҳажмини;

корхоналар бўйича импорт қийматини;

режали - олдини олиш таъмирлашларини ўтказиш жадвалларини;

корхоналар бўйича технологик эҳтиёжлар учун минерал ўғитларга эҳтиёж прогнозини тақдим этади.



VI. ЎСИМЛИКЛАРНИ ҲИМОЯ ҚИЛИШ

КИМЁВИЙ ВОСИТАЛАРИНИ ИШЛАБ

ЧИҚАРИШ ВА ТАҚСИМЛАШ БАЛАНСИ


20. Қишлоқ хўжалигининг кимёвий препаратларга бўлган эҳтиёжини аниқлаш ҳамда ўсимликларни ҳимоя қилишнинг кимёвий воситалари баланси лойиҳасини тайёрлаш Вазирлар Маҳкамасининг "Ўсимликларни ҳимоя қилиш кимёвий препаратларини етказиб бериш ва улардан фойдаланиш самарадорлигини назорат қилиш тизимини такомиллаштириш чора-тадбирлари тўғрисида" 2006 йил 24 февралдаги 31-сон қарори билан тасдиқланган Вазирликлар, идоралар ва ташкилотларнинг қишлоқ хўжалигини кимёвий препаратлар билан таъминлаш борасида ҳамкорлик қилиш тартибига мувофиқ амалга оширилади.



VII. АГРОСАНОАТ КОМПЛЕКСИ

ҚАЙТА ИШЛАШ ТАРМОҚЛАРИ

МАҲСУЛОТЛАРИНИНГ БАЛАНСЛАРИ


Озиқ-овқат буғдойи


21. "Ўздонмаҳсулот" акциядорлик компанияси, Ташқи иқтисодий алоқалар, инвестициялар ва савдо вазирлиги, Давлат статистика қўмитаси ҳамда Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси Иқтисодиёт вазирлигига жадвал материаллари ва таҳлилий хат тарзида озиқ-овқат буғдойи бўйича прогноз баланси кўрсаткичларини тақдим этадилар.

Сўнгра қайта ишлаш учун етказиб бериладиган буғдойни тайёрлаш ҳажмлари аниқланади, олдинги йилдаги ҳақиқий маълумотларни, прогноз йили бошидаги қолдиқларни кўрсатган ҳолда озиқ-овқат буғдойидан фойдаланишнинг ҳар ойдаги ҳажмлари ишлаб чиқилади.


22. Иқтисодиёт вазирлиги прогноз йили бошидаги қолдиқлар тўғрисидаги ҳақиқий маълумотлар асосида озиқ-овқат буғдойининг давлат ресурсларидан ун ишлаб чиқариш, экспорт қилиш ва республика ичидаги истеъмолчиларга сотиш ҳажмларини прогноз қилади. Шундан келиб чиққан ҳолда прогноз йили учун баланснинг ресурс қисми шакллантирилади.


Пахта толаси


23. Пахта толаси ишлаб чиқариш ва етказиб беришнинг прогноз баланслари икки давр бўйича - январь-август (жорий йил пахта хом ашёси ҳосилидан) ва сентябрь-декабрь учун (прогноз даври ҳосилидан) шакллантирилади. "Ўзпахтасаноат" акциядорлик жамияти Иқтисодиёт вазирлигига ишлаб чиқилган қуйидаги жадвалларни ва ҳисоб-китобларни тақдим этади:

сортлари бўйича пахта хом ашёсини қайта ишлаш ҳажмлари ва унинг умумий ҳажмлардаги салмоғи тўғрисидаги, тола ишлаб чиқариш ва унинг прогноз йилидан олдинги охирги уч йилда қайта ишлашда олинган миқдори тўғрисидаги маълумотлар;

ҳудудлар бўйича пахта хом ашёси тайёрлаш, тола чиқиши миқдори, тола ишлаб чиқаришнинг, шу жумладан, давлат ресурсларидаги ва хўжаликлар ресурсларидаги умумий ҳажми тўғрисидаги маълумотлар;

сортлар бўйича жорий йил ҳосилидан пахта толаси ишлаб чиқаришнинг умуман, жорий йилнинг сентябрь-декабрь ойларида ҳамда прогноз йилининг январь-июль ойларида кутилаётган ҳисоб-китоби. Бунда пахта хом ашёси тайёрлаш, қайта ишлашга етказиб берилаётган пахта хом ашёси ҳажмлари, тола ишлаб чиқариш ва унинг қайта ишланган хом ашёдаги салмоғи тўғрисидаги маълумотлар кўрсатилади;

жорий йилнинг сентябрь-декабрь ойларидаги ҳақиқий маълумотларни, прогноз йили бошидаги қолдиқларни ва январь-июль ойларидаги прогнозни кўрсатган ҳолда сортларига кўра пахта хом ашёсини қайта ишлашнинг ойлар бўйича жадвали.


24. Иқтисодиёт вазирлиги прогноз йили бошидаги пахта толаси қолдиқлари ва уни ишлаб чиқаришнинг мўлжали, экспорт прогнози ҳамда республика истеъмолчиларига етказиб бериш тўғрисидаги ҳақиқий маълумотлардан келиб чиққан ҳолда баланснинг ресурс қисмини шакллантиради ва улардан фойдаланиш йўналишларини белгилайди.


Пахта линти


25. "Ўзпахтасаноат" акциядорлик жамияти давлат ресурсларини ва хўжаликлар ресурсларини ажратиб кўрсатган ҳолда жорий йилда пахта линти ишлаб чиқариш ва етказиб бериш, унинг йил бошидаги қолдиқлари, ундан фойдаланиш йўналишлари, шу жумладан, саноатда қайта ишлаш учун республика корхоналарига етказиб бериш тўғрисидаги ҳақиқий маълумотларни Иқтисодиёт вазирлигига тақдим этади.

26. Иқтисодиёт вазирлиги пахта линтининг прогноз йили бошидаги қолдиқлари ва уни ишлаб чиқариш мўлжали, экспорт ва республика истеъмолчиларига етказиб бериш прогнози тўғрисидаги ҳақиқий маълумотлардан келиб чиққан ҳолда баланснинг ресурс қисмини шакллантиради ва улардан фойдаланиш йўналишларини белгилайди.


Пахта шроти (кунжара) ва чигит шелухаси


27. "Ўзпахтасаноатэкспорт" холдинг компанияси шрот (кунжара) ишлаб чиқариш тўғрисидаги таклифларни шакллантиради ва Иқтисодиёт вазирлигига тақдим этади, бунда "Ўзпахтасаноат" АЖнинг техник чигит етказиб бериш прогноз ҳажмлари тўғрисидаги ахборот асосида давлат ресурслари ва чигит ресурслари (давлат ресурслари ва хўжаликлар ресурсларини ажратиб кўрсатган ҳолда) даврлар бўйича: январь-август учун - жорий йил пахта хом ашёси ҳосили чигити ҳамда сентябрь-декабрь учун - прогноз қилинаётган давр ҳосили чигити бўйича ажратиб кўрсатилади.

28. Баланс лойиҳаси икки давр бўйича: январь-август учун - жорий йил пахта хом ашёси ҳосилидан ва сентябрь-декабрь учун - прогноз қилинаётган давр ҳосилидан шакллантирилади.


29. Баланснинг ресурс қисмидан (давр бошидаги қолдиқлар ва ишлаб чиқариш) келиб чиққан ҳолда фойдаланиш, шу жумладан, сотишнинг бозор механизмлари орқали фойдаланиш, қишлоқ хўжалиги ишлаб чиқарувчиларининг ресурслардан фойдаланиши учун кенг имконият яратиш ва экспорт қилиш йўналишлари белгиланади.


Ўсимлик ёғи


30. "Ўзпахтасаноат" акциядорлик жамияти даврларга бўлган ҳолда: январь-августда - жорий йил пахта хом ашёси ҳосили техник чигитини ва сентябрь-декабрда - прогноз қилинаётган давр ҳосилидан олинган техник чигитни етказиб бериш прогноз ҳажмлари тўғрисида балансга таклифларни шакллантиради ва Ўзбекистон Республикаси Иқтисодиёт вазирлигига тақдим этади.

Прогноз йили бошидаги ўсимлик ёғи қолдиқлари ва уни ишлаб чиқариш мўлжали, экспорт қилиш ва республика истеъмолчиларига етказиб бериш прогнози тўғрисидаги ҳақиқий маълумотлардан келиб чиққан ҳолда улардан фойдаланиш, шу жумладан, сотишнинг бозор механизмлари орқали фойдаланиш йўналишлари белгиланади.


Этил (озиқ-овқат) спирти


31. Этил (озиқ-овқат) спирти бўйича прогноз баланси кўрсаткичлари Иқтисодиёт вазирлигига "Ўзспиртсаноат" акциядорлик компанияси, "Ўзвиносаноат-холдинг" компанияси, шунингдек "Ўздавзахира" қўмитаси томонидан давлат стратегик захираси норматив эҳтиёжи бўйича тақдим этилади.


32. "Ўзспиртсаноат" акциядорлик компанияси, "Ўзвиносаноат-холдинг" компанияси, "Дори-дармон" акциядорлик компанияси, "Ўзбекозиқовқатхолдинг" ХК республиканинг бошқа вазирликлари, идоралари, ташкилотларига сарфлашнинг солиштирма нормаларини ва шу кабиларни ҳисобга олган ҳолда фойдаланиш йўналишлари бўйича ишлаб чиқариш ва фойдаланиш эҳтиёжлари учун спиртга бўлган асосланган эҳтиёж тўғрисида таклифлар тақдим қиладилар.

Гўшт ва гўшт маҳсулотлари


33. "Ишлаб чиқариш" моддаси прогноз қилинаётган даврда агросаноат комплексини ривожлантириш параметрлари асосида сўйилган вазнда гўшт етиштириш умумий ҳажмини ҳамда барча тоифалардаги хўжаликларда, шу жумладан, уй хўжаликларида (тирик вазнда) гўшт етиштириш ҳажмини акс эттиради.

Гўшт импорт қилиш мамлакатнинг бир нафар аҳолиси ҳисобига эҳтиёжни қоплаш заруриятидан келиб чиққан ҳолда белгиланади.

Давлат стратегик захирасидан гўшт чиқариш ҳажми ғамланадиган ресурсларни янгилаш заруриятидан келиб чиққан ҳолда белгиланади, параметрлар эса "Ўздавзахира" қўмитаси билан келишилади.

Гўшт ресурслардан фойдаланиш ҳисоб-китоби давлат эҳтиёжлари (ижтимоий соҳа муассасалари контингентини, махсус истеъмолчиларни, уларга тенглаштирилган шахсларни таъминлашни ва давлат захирасини тўлдиришни, шунингдек саноатда қайта ишлашни (ички бозорни тўлдириш учун колбаса, гўшт маҳсулотлари ва гўшт консервалари ишлаб чиқаришни) ҳамда бир киши ҳисобига аҳоли истеъмолини назарда тутади.



VIII. ҚУРИЛИШ МАТЕРИАЛЛАРИ

САНОАТИ МАҲСУЛОТЛАРИ


34. Цемент ишлаб чиқариш ва ишлатиш баланси лойиҳасини умумлаштирилган ҳолда Иқтисодиёт вазирлигига "Ўзсаноатқурилишматериаллари" уюшмаси мавжуд ишлаб чиқариш қувватларини кўрсатган ҳолда республика ишлаб чиқарувчи заводлари бўйича тақдим этади.

Республика корхоналари ишлаб чиқариш ҳажмларининг асосланган ҳисоб-китоблари ва маҳсулот сарфлашнинг тасдиқланган нормалари асосида тармоқнинг шифер ва асбоцемент қувурлар ишлаб чиқариш учун цементга бўлган эҳтиёжи аниқланади.

Шу билан бир қаторда, сарфлаш нормативлари бўйича аниқ дастурни бажариш, шу жумладан, академик лицейлар, касб-ҳунар коллежларини ва умумтаълим мактабларини шунингдек тиббиёт муассасаларини қуриш ва реконструкция қилиш, болалар спортини, темир йўл ва йўл қурилишини ривожлантириш учун, шунингдек якка тартибдаги қурилишга ички бозорнинг цементга бўлган эҳтиёжи ҳисобга олинади.


"Ўзбекистон Республикаси қонун ҳужжатлари тўплами", 2006 йил, 25-26-сон, 237-модда.