язык интерфейса

Вы можете получить доступ на один день к продукту Законодательство Руз.

Ўзбекистон Республикаси

Адлия вазирлигида

2007 йил 9 январда 1652-сон

билан рўйхатга олинган

Ўзбекистон автомобиль ва дарё

транспорти агентлиги, Олий ва ўрта

махсус таълим вазирлигининг

Ўрта махсус, касб-ҳунар таълим

маркази, Ички ишлар вазирлигининг

2006 йил 27 декабрдаги

6, 48/ҚБ, 11-сон қарори билан

ТАСДИҚЛАНГАН



Ўзбекистон Республикасида автомототранспорт

воситалари   ҳайдовчиларини   тайёрлаш   ва   қайта

тайёрлаш билан шуғулланувчи таълим муассасаларини

битирган        ҳайдовчиликка        номзодларга

бериладиган ягона намунадаги гувоҳномани

бериш тартиби тўғрисидаги

НИЗОМ


Мазкур Низом Ўзбекистон Республикасида автомототранспорт воситалари ҳайдовчиларини тайёрлаш ва қайта тайёрлаш билан шуғулланувчи таълим муассасаларини битирган ҳайдовчиликка номзодларга ягона намунадаги гувоҳнома бериш тартибини белгилайди.


I. УМУМИЙ ҚОИДАЛАР


1. Ўзбекистон Республикасида автомототранспорт воситалари ва шаҳар электр транспорти воситаларини ҳайдовчиларини тайёрлаш ва қайта тайёрлаш Ўзбекистон Республикаси Вазирлар Маҳкамасининг 2018 йил 31 майдаги 408-сон қарори билан тасдиқланган Автомототранспорт воситалари ва шаҳар электр транспорти воситалари ҳайдовчиларини тайёрлаш, қайта тайёрлаш ва уларнинг малакасини ошириш тартиби тўғрисидаги низомга мувофиқ амалга оширилади.

2. Ҳайдовчиликка номзодларни тайёрлаш ва қайта тайёрлаш билан шуғулланадиган таълим муассасаларининг (кейинги ўринларда матнда - таълим муассасаси) имтиҳон ва синовларидан муваффақиятли ўтган номзодларга ўқишни битирганликлари ҳақида ягона намунадаги гувоҳнома берилади (мазкур Низомнинг 1-иловаси).

3. Гувоҳнома таълим муассасасида ташкил этиладиган комиссия баённомасига асосан берилади.

Комиссия таълим муассасаси раҳбарининг буйруғига асосан, раис ва икки кишидан иборат таркибда тузилади. Қўшимча равишда комиссия аъзолари таркибига муҳандис-ўқитувчилар, ишлаб чиқариш усталари, агар ҳайдовчилар ташкилотлар учун тайёрланаётган бўлса, шу ташкилотнинг вакили ҳам киритилиши мумкин.

4. Имтиҳонлар натижаси ҳақида имтиҳон комиссияси раиси ва аъзолари томонидан баённома тўлдирилади, сўнгра таълим муассасаси раҳбари томонидан имзоланади ҳамда муҳр билан тасдиқланади.

5. Гувоҳнома бланкалари Ўзбекистон автомобиль транспорти агентлигининг (кейинги ўринларда матнда - агентлик) "Автомобиль транспорти ходимларини малакасини ошириш ва қайта тайёрлаш институти" ДКнинг буюртмаси асосида тайёрланади.

6. Гувоҳнома бланкалари "Автомобиль транспорти ходимларини малакасини ошириш ва қайта тайёрлаш институти" ДКнинг тақсимотига асосан, таълим муассасаларга "махсус ҳудудий код"лар асосида агентликнинг ҳудудий бошқармалари томонидан етказиб берилади (мазкур Низомнинг 2-иловаси).


II. ГУВОҲНОМАНИ ТАЙЁРЛАШ, УНИНГ

ТЕХНИК ТАВСИФИ, САҚЛАШ ВА

САРФЛАШ ТАРТИБИ


7. Гувоҳномалар таълим муассасаси буюртмаларига асосан агентликнинг "Автомобиль транспорти ходимларини малакасини ошириш ва қайта тайёрлаш институти" ДК томонидан таъминланади.

"Автомобиль транспорти ходимларини малакасини ошириш ва қайта тайёрлаш институти" ДК буюртмасига асосан гувоҳномалар "Давлат белгиси" бирлашмасининг Тошкент шаҳар босма фабрикасида босма усулда тайёрланади.

8. Гувоҳноманинг ташқи кўринишида Ўзбекистон Республикасининг ҳимояланган герби ифодаланади, ички кўринишида эса, гувоҳноманинг ҳудудий коди, серияси ва рўйхат рақами, таълим муассасасининг номи, номзоднинг фамилияси, исми-шарифи, ўқиш муддати, ўқув дастурининг номи, имтиҳон топширган фанларнинг номи, имтиҳон натижасига кўра олган баҳоси, таълим муассасасининг муҳри ҳамда берилган ҳайдовчилик гувоҳномасининг серияси ва рўйхат рақами ёзилади.

9. Гувоҳномаларнинг кирим ва чиқимлари таълим муассасасининг ҳисобот дафтарларида қайд қилиб борилади.

10. Гувоҳнома бланкалари қатъий ҳисобот ҳужжатлари тоифасига киритилади ва ўрнатилган тартибда сақланади.


11. Гувоҳномани тўлдириш жараёнида тузатишлар ва ўзгартиришлар киритиш қатъиян ман қилинади.


12. Тўлдириш жараёнида бузилган гувоҳномаларни қайта ишлатилмаслик учун уларнинг коди, серияси ва рўйхат рақами қирқиб олиниб, таълим муассасасининг махсус комиссияси томонидан ёқиш йўли билан йўқ қилинади. Таълим муассасасининг тафтиш комиссияси бу ҳақда далолатнома тузиб, унга гувоҳноманинг қирқиб олинган коди, серияси ва рўйхат рақами ёпиштириб қўйилади.

13. Гувоҳнома йўқолиб қолган ҳолларда ҳайдовчиликка номзод таълим муассасаси раҳбари номига ёзма равишда ариза билан мурожаат қилади. Номзоднинг аризаси ва имтиҳон комиссиясининг баённомасига асосан, таълим муассасаси томонидан гувоҳноманинг дубликати берилади. Бунда таълим муассасасининг қайд дафтарига "Дубликат" деб ёзув киритилади.





Низомга

1-ИЛОВА



А) Ташқи кўриниши:




ГЕРБ







GUVOHNOMA







Б) Ички кўриниши:

O`ZBEKISTON RESPUBLIKASI

______________________________________

______________________________________

Ta`lim muassasasi (tashkiloti)ning nomi

10  AA   000001

G U V O H N O M A

Berildi ________________________________

(familiyasi, ismi, otasining ismi)


_______________________ ga shu haqdakim

u 20___ yilning "__"_________________ dan

u 20___ yilning "__"_______________ gacha

______________________________________

_________________________dasturi bo`yicha

ta`lim oldi va 20___ yil "__"__________ dagi

"_________" raqamli imtihon komissiyasining

bayoniga asosan bitiruv imtihonlarida

quyidagi baholarni (qoniqarli, yaxshi, a`lo)

oldi:

_______________                       ___________

(o`quv fanining nomi)                                   (baho)

_______________                       ___________

(o`quv fanining nomi)                                   (baho)

_______________                       ___________

(o`quv fanining nomi)                                   (baho)


Imtihon komissiyasi raisi:

________________                     ___________

(familiyasi, ismi-sharifi)                               (imzo)


Ta`lim muassasasi (tashkiloti) rahbari:

________________                     ___________

(familiyasi, ismi-sharifi)                               (imzo)


                                              MO`


____________________ YHXB RIB (TRIB)

(Hududiy IIV-IIBB-IIB nomi)


tomonidan _______ seriyadagi __________

raqamli haydovchilik guvohnomasi berildi.

RIB (TRIB) boshlig`i:

_______________                      ___________

(familiyasi, ismi-sharifi)                               (imzo)


20___ yil "__"_____________        MO`


Ushbu hujjat avtomototransport

vositalarini boshqarish

huquqini bermaydi


          10  AA   000001





Низомга

2-ИЛОВА



МАХСУС ҲУДУДИЙ КОДЛАР:

Т.р.

Ҳудудлар


Махсус кодлар


1

2


3

1.

Тошкент шаҳри


10

2.

Тошкент вилояти


11

3.

Сирдарё вилояти


12

4.

Жиззах вилояти


13

5.

Самарқанд вилояти


14

6.

Фарғона вилояти


15

7.

Наманган вилояти


16

8.

Андижон вилояти


17

9.

Қашқадарё вилояти


18

10.

Сурхондарё вилояти


19

11.

Бухоро вилояти


20

12.

Навоий вилояти


21

13.

Хоразм вилояти


22

14.

Қорақалпоғистон Республикаси


23


"Ўзбекистон Республикаси қонун ҳужжатлари тўплами", 2007 йил, 1-2-сон, 18-модда.