Ўзбекистон Республикаси Вазирлар Маҳкамасининг 22.02.1993 й. 93-сон "Гугурт ишлаб чиқариш бўйича "Ўзэллас" Ўзбекистон-Греция қўшма корхонасини ташкил этиш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

22.02.1993 й.

N 93

ГУГУРТ ИШЛАБ ЧИҚАРИШ БЎЙИЧА

"ЎЗЭЛЛАС" ЎЗБЕКИСТОН - ГРЕЦИЯ

ҚЎШМА КОРХОНАСИНИ ТАШКИЛ

ЭТИШ ТЎҒРИСИДА

Вазирлар Маҳкамаси ҚАРОР ҚИЛАДИ:

1. "Ўзбошёғочқурилиш" бирлашмаси ва "ИМПЕКС-ГРОУП" фирмасининг гугурт ишлаб чиқариш бўйича "Ўзэллас" қўшма корхонасини ташкил этиш тўғрисидаги таклифи қабул қилинсин.

2. "Ўзбошёғочқурилиш" бирлашмаси "ИМПЕКС-ГРОУП" фирмаси билан биргаликда "Ўзэллас" қўшма корхонасини белгиланган тартибда рўйхатдан ўтказиш учун 1993 йил 15 мартгача зарур ҳужжатларни тайёрласин ва Ўзбекистон Республикаси Молия вазирлигига тақдим этсин.

3. Қўшма корхонанинг иншоотларини қуриш бўйича бош пудратчи этиб "Ўзбошёғочқурилиш" бирлашмаси белгилансин.

4. "Ўзоғирсаноат" институти "Ўзбошёғочқурилиш" бирлашмасининг талабномасига биноан гугурт ишлаб чиқариш бўйича технологик линияларни жойлаштириш учун ёғочга комплекс ишлов бериш корхонасининг мавжуд ишлаб чиқариш майдонларини қайтадан қуришнинг лойиҳа-смета ҳужжатларини ишлаб чиқсин.

5. Қуйидагилар маълумот учун қабул қилинсин:

"ИМПЕКС-ГРОУП" фирмаси ўзининг устав фондидаги улуши (33 фоиз) ҳисобига Грециядаги ускуналарни қисмларга ажратиб Тошкентга олиб келади ва монтаж қилиб, ишга тушириш, созлаш ишларини бажаради ва кадрларни ўқитади;

қўшма корхона учун ажратилган ер участкасининг, бинолар ва иншоотларнинг қиймати 1,5 млн АҚШ долларига баҳоланган ҳамда "Ўзбошёғочқурилиш" бирлашмасининг устав фондидаги улуши (67 фоиз) деб ҳисобланади.

6. "Ўзистиқболстат" давлат қўмитаси, Ўзбекистон Республикаси Молия вазирлиги ва Ўзсаноатқурилиш банки мазкур қўшма корхона иншоотлари қурилишини маблағ билан таъминлаш учун 3,5 млн АҚШ доллари "Ўзбошёғочқурилиш" бирлашмасининг устав фондидаги улуши ва имтиёзли кредит ажратишни назарда тутсинлар.

7. "Ўзшартномасавдо" "Ўзбошёғочқурилиш" бирлашмасининг буюртманомасига биноан гугурт ишлаб чиқариш учун зарур бўлган кимёвий хом ашё етказиб беришни белгиланган тартибда ҳал этсин.

8. Ушбу қарорнинг бажарилишини назорат қилиш Бош вазирнинг ўринбосари ўртоқ К.Н. Тўлаганов зиммасига юклатилсин.

Ўзбекистон Республикасининг Бош вазири                                             А. Муталов