Ўзбекистон Республикаси Олий Мажлиси Қонунчилик палатасининг 02.07.2009 й. 1034-I-сон "Коллектив хавфсизлик тўғрисидаги шартнома ташкилоти Коллектив хавфсизлик кенгашининг 2009 йил 14 июнда Москва шаҳрида бўлиб ўтган сессиясида баён этилган Ўзбекистоннинг принципиал позицияси ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ МАЖЛИСИ ҚОНУНЧИЛИК

ПАЛАТАСИНИНГ

ҚАРОРИ

02.07.2009 й.

N 1034-I

КОЛЛЕКТИВ ХАВФСИЗЛИК ТЎҒРИСИДАГИ

ШАРТНОМА ТАШКИЛОТИ КОЛЛЕКТИВ

ХАВФСИЗЛИК КЕНГАШИНИНГ 2009 ЙИЛ

14 ИЮНДА МОСКВА ШАҲРИДА БЎЛИБ

ЎТГАН СЕССИЯСИДА БАЁН ЭТИЛГАН

ЎЗБЕКИСТОННИНГ ПРИНЦИПИАЛ

ПОЗИЦИЯСИ ҲАҚИДА

Тадбиркорлар ва ишбилармонлар ҳаракати - Ўзбекистон Либерал-демократик партияси фракциясининг Коллектив хавфсизлик тўғрисидаги шартнома ташкилоти Коллектив хавфсизлик кенгашининг 2009 йил 14 июнда Москва шаҳрида бўлиб ўтган сессиясида баён этилган Коллектив оператив ҳаракат кучлари тўғрисидаги битим лойиҳаси бўйича Ўзбекистоннинг принципиал позицияси ҳақидаги таклиф-ташаббусини кўриб чиқиб, Ўзбекистон Республикаси Олий Мажлисининг Қонунчилик палатаси ҚАРОР ҚИЛАДИ:

1. Ўзбекистон Республикаси Президенти И.А. Каримовнинг Коллектив хавфсизлик тўғрисидаги шартнома ташкилоти Коллектив хавфсизлик кенгашининг 2009 йил 14 июнда Москва шаҳрида бўлиб ўтган сессиясидаги нутқида Коллектив хавфсизлик тўғрисидаги шартнома ташкилотининг Коллектив оператив ҳаракат кучлари тўғрисидаги битим лойиҳаси юзасидан баён этган Ўзбекистоннинг принципиал позицияси тўла қўллаб-қувватлансин.

2. Таъкидлансинки:

Коллектив оператив ҳаракат кучлари фақатгина аъзо давлатлар хавфсизлигига ташқаридан бўладиган таҳдидлар ва хатарларни қайтариш учун мўлжалланган бўлиши керак, бунда мазкур кучларни қўллаш тўғрисида қарорлар қабул қилиш механизми консенсус принципига оғишмай риоя этилишига асосланиши лозим;

Коллектив кучлардан МДҲ ҳудудида ва КХШТ давлатларида шу давлатлар ўртасида келиб чиқиши мумкин бўлган низолар ва қарама-қаршиликларни ҳал этиш учун ҳарбий куч сифатида фойдаланилиши мумкин эмас;

контингентларни бошқа давлатнинг ҳудудига жўнатиш, шунингдек Коллектив хавфсизлик тўғрисидаги шартнома ташкилотига бошқа аъзо давлатларнинг Коллектив оператив ҳаракат кучлари таркибига ажратилган ҳарбий контингентларини ўз ҳудудига киритиш тўғрисида қарор қабул қилиш аъзо давлатларнинг миллий қонунчилигига зид бўлмаган тақдирдагина амалга оширилиши керак;

КOҲК тўғрисидаги битим, халқаро амалиётда қабул қилинганидек, бу Битим КХШТ мамлакатлари томонидан ратификация қилинганидан кейингина кучга кириши керак. КХШТнинг Коллектив кучларини Битим ратификация қилингунига қадар вақтинча қўллаш КХШТга аъзо давлатлар парламентларининг фикрини батамом инкор этади.

3. Ўзбекистон Республикаси Олий Мажлиси Қонунчилик палатасининг қўмиталари тегишлилигига кўра:

халқаро ташкилотлар доирасида халқаро шартномаларни тузиш чоғида Ўзбекистон Республикаси Конституциясига, Мудофаа доктринасига ва бошқа норматив-ҳуқуқий ҳужжатларига оғишмай риоя этилишини таъминласин;

Коллектив хавфсизлик тўғрисидаги шартнома доирасида Коллектив оператив ҳаракат кучлари тузиш масаласи юзасидан Ўзбекистон эгаллаган принципиал позициянинг моҳияти тўғрисида халқаро жамоатчиликни хабардор қилиш масалаларида Ўзбекистон Республикаси Ташқи ишлар вазирлиги билан биргаликда фаол иштирок этсин.

4. Ўзбекистон Республикаси Олий Мажлисининг Қонунчилик палатасидаги сиёсий партиялар фракцияларига Коллектив хавфсизлик тўғрисидаги шартнома ташкилоти Коллектив хавфсизлик кенгашининг 2009 йил 14 июнда Москва шаҳрида бўлиб ўтган сессиясида Ўзбекистон Республикаси Президенти И.А. Каримов томонидан илгари сурилган ташаббусларнинг мазмун-моҳияти тўғрисида аҳоли ўртасида кенг тушунтириш ишларини ташкил этиш тавсия қилинсин.

5. Ушбу Қарор қабул қилинган кундан эътиборан кучга киради.

Ўзбекистон Республикаси

Олий Мажлиси Қонунчилик

палатасининг Спикери                                                  Д. Тошмуҳамедова

“Ўзбекистон Республикаси Олий Мажлиси палаталарининг Ахборотномаси”, 2009 йил., 7-сон, 241-модда