Меҳнатни муҳофаза қилиш бўйича мутахассис малака сертификати бериш тартиби тўғрисида Низом (ЎзР ВМ 15.09.2014 й. 263-сон қарорига 2-илова)

Функция недоступна

Вазирлар Маҳкамасининг

2014 йил 15 сентябрдаги

263-сон қарорига

2-ИЛОВА

Меҳнатни муҳофаза қилиш бўйича мутахассис

малака сертификати бериш тартиби тўғрисида

НИЗОМ

I. УМУМИЙ ҚОИДАЛАР

1. Ушбу Низом меҳнатни муҳофаза қилиш бўйича мутахассис малака сертификатини (кейинги ўринларда малака сертификати деб аталади) бериш, унинг муддатини узайтириш, уни қайта расмийлаштириш, унинг амал қилиш муддатини тўхтатиш ва уни бекор қилиш тартибини белгилайди.

2. Малака сертификати шахсни махсус тайёргарликка эга сифатида эътироф этиш ҳамда унинг ушбу Низомда белгиланган малака талабларига мувофиқлигини аниқлаш, зиммасига юкланган вазифалар ва функцияларни бажариши учун масъулиятини ошириш учун асос ҳисобланади.

3. Малака сертификати жисмоний шахсга меҳнатни муҳофаза қилиш соҳасидаги фаолиятни амалга оширувчи ташкилотнинг ходими сифатида ишлаш ҳуқуқини беради.

4. Талабгор малака имтиҳонини муваффақиятли топширган тақдирда, унга Қорақалпоғистон Республикаси Бандлик ва меҳнат муносабатлари вазирлиги, вилоятлар ва Тошкент шаҳар бандлик бош бошқармалари (кейинги ўринларда - ҳудудий меҳнат органлари) томонидан ушбу Низомга 1-иловага мувофиқ шакл бўйича малака сертификати берилади.

5. Малака имтиҳони меҳнатни муҳофаза қилиш бўйича мутахассис сифатида ишлашни хоҳловчи шахсларнинг (кейинги ўринларда талабгор деб аталади) билимларини текшириш воситаси ҳисобланади.

6. Малака имтиҳони махсус идоралараро имтиҳон комиссияси (кейинги ўринларда имтиҳон комиссияси деб аталади) томонидан ташкил этилади ва ўтказилади.

7. Имтиҳон комиссияси тўғрисидаги низом, унинг таркиби ва иш регламенти Ўзбекистон Республикаси Бандлик ва меҳнат муносабатлари вазирлиги томонидан тасдиқланади.

Имтиҳон комиссияси таркибига ҳудудий меҳнат органларининг Давлат меҳнат инспекцияси, Соғлиқни сақлаш вазирлиги, Саноат хавфсизлиги давлат қўмитаси ва Ўзбекстон Савдо-саноат палатасининг ҳудудий бошқармалари ҳамда Ўзбекистон Касаба уюшмалари федерацияси Кенгашининг ҳудудий бирлашмалари раҳбар ва ходимлари, шунингдек, келишилган ҳолда амалий тажрибага эга бўлган мутахассислар киритиладилар.

Ҳудудий меҳнат органларининг Давлат меҳнат инспекцияси имтиҳон комиссиясининг фаолиятини ташкил қилиш бўйича ишчи орган (кейинги ўринларда - ишчи орган), ҳудудий меҳнат органларининг бошлиқлари - имтиҳон комиссиясининг раиси, ишчи орган ўринбосари (меҳнатни муҳофаза қилиш масалалари бўйича) - имтиҳон комиссияси раисининг ўринбосари, ишчи органининг меҳнатни муҳофаза қилиш бўйича давлат меҳнат техник инспектори - имтиҳон комиссиясининг котиби ҳисобланади.

8. Малака сертификатини бериш, унинг амал қилиш муддатини узайтириш, уни қайта расмийлаштириш, шунингдек унинг дубликатини бериш учун ушбу Низомда белгиланган миқдорда йиғим тўланади.

9. Малака имтиҳонини топширишга ушбу Низомда белгиланган малака талабларига жавоб берадиган талабгорлар қўйилади.

II. МАЛАКА ТАЛАБЛАРИ

10. Талабгор малака сертификатини олиш учун қуйидаги талабларга жавоб бериши керак:

а) Ўзбекистон Республикаси олий таълим муассасаларида олинган олий техник маълумотнинг ёхуд хорижий давлатнинг таълим муассасасида олинган олий техник маълумотнинг (қонун ҳужжатларига мувофиқ нострификациялашдан ўтган тақдирда) ҳамда олий таълим муассасасини тамомлагандан кейин (шу жумладан, ўриндошлик бўйича) камида 3 йил амалий иш стажининг мавжудлиги;

ёхуд олий таълим муассасасини тамомлагандан кейин ишлаб чиқариш ёки меҳнатни муҳофаза қилиш хизматининг ёки меҳнатни муҳофаза қилиш соҳасидаги ташкилотнинг ёки санитария-гигиена хизматининг ходими (шу жумладан, ўриндошлик бўйича) сифатида ёки ишлаб чиқариш участкаси (бўлинмаси) раҳбари, Ўзбекистон Республикаси олий таълим муассасаларида олинган олий нотехник маълумот, ёхуд хорижий давлатнинг таълим муассасасида олинган олий нотехник маълумот (қонун ҳужжатларига мувофиқ нострификациядан ўтган тақдирда) билан охирги ўн йилдан камида 3 йил бош муҳандис, бош механик ёки бош энергетик иш стажининг мавжудлиги;

ёхуд Ўзбекистон Республикасида ёки хорижий давлатда (қонун ҳужжатларига мувофиқ нострификациялашдан ўтган тақдирда) олинган техника, физика-математика, кимё, биология, геология-минералогия, иқтисодиёт, тиббиёт ёхуд фармацевтика фонлари доктори (номзоди) илмий даражасининг мавжудлиги;

б) Меҳнатни муҳофаза қилиш бўйича ўқиш ва малака ошириш дастури асосида таълим муассасаларида махсус ўқитишдан ўтганлик.

III. МАЛАКА СЕРТИФИКАТИ ОЛИШ УЧУН

ТАҚДИМ ЭТИЛАДИГАН ҲУЖЖАТЛАР

11. Талабгор малака сертификати олиш учун ишчи органга ушбу Низомнинг 2-иловасига мувофиқ шакл бўйича малака имтиҳони топширишга киритиш тўғрисида ариза тақдим этади.

Малака имтиҳони топширишга киритиш тўғрисидаги аризага қуйидаги ҳужжатлар илова қилинади:

а) ушбу Низомнинг 3-иловасига мувофиқ шакл бўйича тўлдирилган анкета;

б) маълумоти тўғрисидаги диплом ёхуд фанлар номзоди ёки доктори илмий даражасини олганлик тўғрисидаги диплом ёхуд ҳужжатни берган муассаса томонидан белгиланган тартибда тасдиқланган нусхаси;

ёхуд хорижий давлатнинг таълим муассасасида олинган маълумот тўғрисидаги дипломнинг нусхаси ёхуд фанлар номзоди ёки доктори илмий даражасини олганлик тўғрисидаги дипломнинг нусхаси, шунингдек, маълумоти ёки илмий даражаси тўғрисидаги хорижий ҳужжатнинг нострификациялангани тўғрисида ваколатли давлат органи гувоҳномаси;

в) меҳнат дафтарчасидан қонун ҳужжатларида белгиланган тартибда тасдиқланган кўчирма (ўриндошлик бўйича иш стажи мавжуд бўлган тақдирда меҳнат дафтарчасида бу тўғридаги ёзув билан);

г) иккита фотосурат (3 х 4 см ўлчамда);

д) махсус ўқувдан ва малака оширишдан ўтганлик тўғрисидаги ҳужжат ёки уни берган муассаса томонидан белгиланган тартибда тасдиқланган нусхаси (ўқув тугаган санадан бошлаб ҳужжатларни топширгунгача бўлган санагача бир йилдан ортиқ вақт ўтмаган бўлса ҳужжат ҳақиқий ҳисобланади);

е) малака сертификати берилганлиги учун ариза берилган вақтда қонунчиликда белгиланган базавий ҳисоблаш миқдорининг бир баравари миқдорида йиғим тўланганлиги тўғрисидаги банк тўлов ҳужжати.

Кўрсатиб ўтилган ҳужжатлар бир нусхада тақдим этилади. Ушбу банднинг "б" ва "д" кичик бандларида назарда тутилган ҳужжатлардан нусхалар олиниб, асли қайтариб берилади ҳамда ушбу бандда назарда тутилмаган қўшимча ҳужжатларнинг талаб қилинишига йўл қўйилмайди.

IV. МАЛАКА ИМТИҲОНИНИ ТОПШИРИШГА КИРИТИШ

ЁКИ КИРИТИШНИ РАД ЭТИШ ТЎҒРИСИДА

ҚАРОРЛАР ҚАБУЛ ҚИЛИШ ТАРТИБИ

12. Ишчи орган ариза тушган кундан бошлаб беш кун муддатда малака имтиҳонини топширишга киритиш ёки киритишни рад этиш тўғрисида қарор қабул қилади.

Рад этиш тўғрисида қарор қабул қилинган тақдирда ишчи орган шу куннинг ўзидаёқ талабгорни, рад этиш учун асосларни кўрсатган ҳолда, қабул қилинган қарор тўғрисида ёзма равишда хабардор қилади.

13. Ишчи орган зарур даражада расмийлаштирилмаган ҳужжатлар тақдим этилганлиги, шунингдек талабгорнинг ушбу Низомда белгиланган малака талабларига номувофиқлиги сабабларига кўра малака имтиҳони топширишга киритишни рад этади.

Малака имтиҳонини топширишга киритишни рад этиш тўғрисидаги қарор асосланган бўлиши керак.

14. Малака имтиҳонини топширишга киритилиши рад этилган талабгор фақат ишчи орган кўрсатган камчиликлар бартараф этилгандан кейингина ариза билан такрорий мурожаат қилишга ҳақлидир. Малака имтиҳонини топширишга киритишни рад этиш учун асос бўлган камчиликларни бартараф этиш учун талабгорга кўпи билан ўн календарь кун муддат берилади.

Ҳужжатларни такрорий кўриб чиқиш уч календарь кун мобайнида амалга оширилади. Талабгорнинг аризаси қайта кўриб чиқилганлиги учун йиғим ундирилмайди.

Ишчи органнинг малака имтиҳонини топширишга киритишни рад этиш тўғрисидаги қарорида кўрсатилган муддат ўтгандан кейин талабгор томонидан берилган ариза янгидан берилган ҳисобланади ва ишчи орган томонидан умумий асосларда кўриб чиқилади.

Талабгор малака имтиҳонини топширишга киритишнинг рад этилиши, шунингдек ишчи орган мансабдор шахсининг ҳаракати (ҳаракатсизлиги) юзасидан белгиланган тартибда шикоят билдириш ҳуқуқига эга.

15. Ишчи орган, малака имтиҳонини топширишга киритиш тўғрисида қарор қабул қилинган тақдирда, малака имтиҳонини топширишга киритилганлар рўйхатини имтиҳон комиссиясига беради. Бунда малака имтиҳони, гуруҳларнинг шакллантирилишига кўра, лекин ҳар чоракда камида бир марта ўтказилади.

Малака имтиҳонини топширишга киритилган талабгорлар малака имтиҳонининг ўтказилиш санаси, вақти ва жойи тўғрисида у ўтказилгунгача ўн календарь кундан кечикмай ёзма равишда хабардор қилинади.

V. МАЛАКА ИМТИҲОНИНИ ТОПШИРИШ ТАРТИБИ

16. Талабгорлар малака имтиҳонини топширишга паспортини ёки шахсини тасдиқловчи бошқа ҳужжат кўрсатилган тақдирда киритилади. Ёнида паспорти ёки шахсини тасдиқловчи бошқа ҳужжати бўлмаган, ёхуд малака имтиҳонига кечикиб келган талабгорлар малака имтиҳонини топширишга киритилмайди ва малака имтиҳонини навбатдаги топширишга киритилган шахслар рўйхатига ўтказилади.

Талабгор, ушбу Низомнинг 15-бандига мувофиқ хабардор қилингани ҳолда, ишчи органга ҳужжатлар тақдим этилган санадан бошлаб олти ой мобайнида малака имтиҳонини топшириш учун келмаган тақдирда тақдим этилган ҳужжатлар талабгорга қайтариб берилади. Ҳужжатларни такроран тақдим этиш ушбу Низомнинг 11-бандида кўрсатилган тартибда амалга оширилади.

17. Малака имтиҳони (3 кишидан кам ва 6 кишидан ортиқ бўлмаган) талабгорлар гуруҳлари учун қуйидаги икки босқичда ўтказилади:

тест синовидан ўтказиш (4 академик соат мобайнида ёзма шаклда), унинг натижалари бўйича талабгор ёзма-оғзаки имтиҳонга киритилади;

имтиҳон билетлари бўйича ёзма-оғзаки имтиҳон топшириш (топшириқларни ечишга ва оғзаки жавоб бериш учун тайёрланишга 3 академик соат берилади).

Малака имтиҳонининг иккала босқичини бир кун мобайнида ўтказишга йўл қўйилмайди.

18. Тест, имтиҳон билетларининг саволлари ва тўғри жавобларнинг вариантлари имтиҳон комиссияси томонидан Меҳнатни муҳофаза қилиш бўйича ўқитиш ва малака ошириш дастури асосида ишлаб чиқилади. Тест ва имтиҳон билетлари саволларини ишлаб чиқиш учун меҳнатни муҳофаза қилиш соҳасидаги мутахассислар ва олимларнинг пулли асосда жалб этилишига йўл қўйилади.

Имтиҳон комиссияси раисининг имзоси қўйилмаган тестлар ва имтиҳон билетларининг бланклари ҳақиқий эмас деб ҳисобланади.

Тестлар ва имтиҳон билетларининг мазмуни қонун ҳужжатларига киритиладиган ўзгартириш ва қўшимчаларни ҳисобга олган ҳолда вақти-вақти билан қайта кўриб чиқилади.

19. Тест синови Меҳнатни муҳофаза қилиш бўйича ўқитиш ва малака ошириш дастури бўлимларини акс эттирадиган 50 та саволдан иборат бўлади.

Тест синови натижаларини ижобий деб баҳолаш учун асос ҳисобланадиган тўғри жавобларнинг сони тест синовидаги мавжуд саволлар сонининг камида 60 фоизини ташкил этиши керак.

20. Тест синови натижалари салбий деб эътироф этилган тақдирда талабгор ёзма-оғзаки имтиҳонни топширишга киритилмайди, бу ҳолда тақдим этилган ҳужжатлар унга қайтариб берилмайди.

21. Имтиҳон билети бешта бўлимдан иборат бўлади, улардан ҳар бири қуйидаги йўналишлар бўйича назарий саволлар ва/ёки амалий топшириқларни ўз ичига олади:

меҳнатни муҳофаза қилиш соҳасидаги қонун ҳужжатлари;

технологик жараёнлар ва асбоб-ускуналар хавфсизлигига қўйиладиган талаблар;

зарарли ишлаб чиқариш омиллари ва ходимларни уларнинг таъсиридан муҳофаза қилиш;

жамоавий ва якка тартибда ҳимоя қилиш воситалари ва уларни қўллаш;

меҳнат муҳофазасини бошқариш.

Имтиҳон билетининг бешта қисмидан ҳар бири бўйича жавоблар (шу жумладан, топшириқларни бажариш) беш балли тизим бўйича баҳоланади.

Имтиҳон билети бўйича камида 15 балл олган талабгорлар имтиҳонни муваффақиятли топширган ҳисобланади.

22. Малака имтиҳони ўтказиладиган хонага телекоммуникация ва техника воситаларининг олиб кирилиши мумкин эмас. Малака имтиҳони вақтида бошқа талабгорлар билан мулоқотда бўлишга, малака имтиҳони жараёнига ҳалақит беришга рухсат этилмайди. Ушбу талабларни бузган талабгор аудиториядан чиқариб юборилади ва малака имтиҳонидан ўтмаган ҳисобланади. Аудиториядан чиқариб юбориш ушбу Низомнинг 4-иловасига мувофиқ шакл бўйича далолатнома билан расмийлаштирилади.

23. Чет шахсларнинг малака имтиҳонида қатнашишига рухсат этилмайди.

24. Тест синовини ўтказишга ажратилган вақт тугагач, талабгорлар имтиҳон комиссиясига тест саволларини ва уларга жавобларни топшириши шарт.

Ушбу талабларни бузган талабгорлар малака имтиҳонини топширмаган ҳисобланади.

25. Малака имтиҳони натижалари имтиҳон комиссияси томонидан, у ўтказилгандан кейин уч кундан кечикмай эълон қилинади.

Малака имтиҳони натижалари имтиҳон комиссиясининг протоколи билан расмийлаштирилади ҳамда малака имтиҳони ўтказилган санадан кейин беш кун муддатда Ўзбекистон Республикаси Бандлик ва меҳнат муносабатлари вазирлигига топширилади.

26. Талабгорларнинг малака имтиҳонини топшириш бўйича ёзма ишлари (тест, билетлар саволлари ва уларга жавоблар), шунингдек имтиҳон комиссияларининг протоколлари нусхалари белгиланган тартибда ишчи органда сақланади.

27. Малака имтиҳонини топширмаган талабгорларга йиғим қайтариб берилмайди.

Малака имтиҳонини топширмаган талабгор, малака сертификати бериш учун йиғимни такроран тўлаган тақдирда, малака сертификати олиш учун ҳужжатларни такроран, лекин малака имтиҳонида қатнашган санасидан бошлаб камида бир ой муддат ўтгач, белгиланган тартибда тақдим этишга ҳақлидир.

VI. АПЕЛЛЯЦИЯЛАРНИ КЎРИБ ЧИҚИШ

29. Малака имтиҳони натижаларидан норози бўлишган талабгорлар малака имтиҳони натижалари эълон қилинган санадан бошлаб ўттиз календарь кун мобайнида Ўзбекистон Республикаси Бандлик ва меҳнат муносабатлари вазирлигига апелляция бериш ҳуқуқига эгадирлар. Апелляция ёзма шаклда тақдим этилади.

Ўзбекистон Республикаси Бандлик ва меҳнат муносабатлари вазирлиги берилган апелляцияни икки ҳафта муддатда кўриб чиқади ва қабул қилинган қарор тўғрисида талабгорга ёзма шаклда хабар қилади.

Апелляцияни кўриб чиқиш натижалари бўйича қуйидаги қарорлардан бири қабул қилинади:

имтиҳон комиссиясининг қарорини ўзгаришларсиз қолдириш ва апелляцияни қондиришни рад этиш;

имтиҳон комиссиясининг қарорини бекор қилиш ва такрорий малака имтиҳони тайинлаш.

30. Имтиҳон комиссиясининг қарорини ўзгаришларсиз қолдириш ва апелляцияни қондиришни рад этиш тўғрисидаги қарор қуйидаги ҳолатларда қабул қилинади:

апелляция ушбу Низом талаблари бузилган ҳолда тақдим этилганда;

апелляцияда келтирилган далиллар тасдиқланмаганда.

31. Имтиҳон комиссиясининг қарорини бекор қилиш ва такрорий малака имтиҳони ўтказиш тўғрисидаги қарор малака имтиҳони ушбу Низом талаблари бузилган ҳолда ўтказилган тақдирда қабул қилинади.

32. Малака имтиҳонини такрорий топшириш тўғрисида қарор қабул қилинган тақдирда Ўзбекистон Республикаси Бандлик ва меҳнат муносабатлари вазирлиги малака имтиҳонини топширмаган деб эътироф этилган талабгор учун такрорий имтиҳон кунини тайинлайди.

33. Такроран берилган апелляция кўриб чиқилмайди.

VII. МАЛАКА СЕРТИФИКАТИНИ БЕРИШ, УНИНГ

АМАЛ ҚИЛИШ МУДДАТИНИ УЗАЙТИРИШ, УНИ

ҚАЙТА РАСМИЙЛАШТИРИШ ВА УНИНГ

ДУБЛИКАТИНИ БЕРИШ ТАРТИБИ

34. Малака сертификати унинг бўйича қатъий ҳисобот бериладиган ҳужжат ҳисобланади, унда ҳисобга олиш серияси, тартиб рақами ва ҳимояланганлик даражаси бўлади. Бланклар ишчи органнинг буюртмасига биноан "Давлат белгиси" давлат ишлаб чиқариш бирлашмасида босмахона усулида тайёрланади. Ишчи орган директори сертификат бланкларининг зарур даражада ҳисобга олиниши, сақланиши ва улардан мақсадли фойдаланилиши юзасидан шахсан жавоб беради.

Малака сертификати эгасининг фотосурати ёпиштирилган ҳолда расмийлаштирилади ва Ўзбекистон Республикасининг барча ҳудудида юридик кучга эга бўлади.

35. Малака сертификати 5 йил муддатга берилади.

36. Малака сертификати Ўзбекистон Республикаси Бандлик ва меҳнат муносабатлари вазирлиги томонидан, имтиҳон комиссиясининг протоколлари олингандан кейин ўн кун муддатда расмийлаштирилади ҳамда меҳнатни муҳофаза қилиш бўйича мутахассисларнинг реестрига имзо қўйилган ҳолда малака сертификати эгасига ёхуд нотариал тасдиқланган ишончнома асосида бошқа шахсга берилади.

37. Талабгор малака сертификати расмийлаштирилган санадан бошлаб уч ой мобайнида уни олишдан ихтиёрий равишда воз кечган тақдирда Ўзбекистон Республикаси Бандлик ва меҳнат муносабатлари вазирлиги малака сертификатининг амал қилишини тўхтатиш тўғрисида қарор қабул қилишга ҳақлидир.

38. Малака сертификатининг эгаси малака сертификатининг амал қилиш муддати тугашидан уч ой олдин, лекин малака сертификатининг амал қилиш муддати тугашигача олти ойдан эрта бўлмаган муддатда ишчи органга малака сертификатининг амал қилиш муддатини узайтириш тўғрисида ушбу Низомнинг 2-иловасига мувофиқ шакл бўйича ариза беради.

Малака сертификатининг амал қилиш муддатини узайтириш тўғрисидаги аризага қуйидаги ҳужжатлар илова қилинади:

а) ушбу Низомнинг 3-иловасига мувофиқ шакл бўйича тўлдирилган анкета;

б) малака сертификатининг нусхаси;

в) махсус ўқувдан ва малака оширишдан ўтганлик тўғрисидаги ҳужжат (нусхаси олиниб, асли қайтарилади) ёки уни берган муассаса томонидан белгиланган тартибда тасдиқланган нусхаси (у агар ўқиш тугаган санадан бошлаб ҳужжатлар топширилган санагача бир йилдан кўп вақт ўтмаган тақдирда ҳақиқий ҳисобланади);

г) малака сертификатининг амал қилиш муддатини узайтирганлик учун, ариза берилган вақтда қонун ҳужжатларида белгиланган базавий ҳисоблаш миқдорининг 50 фоизи миқдорида йиғим тўланганини тасдиқловчи банкнинг тўлов ҳужжати.

39. Малака сертификатининг амал қилиш муддатини узайтириш ушбу Низомнинг 38-бандида кўрсатилган талабларга риоя этилганда ва малака сертификатининг эгаси малака имтиҳонини муваффақиятли равишда такроран топширганда амалга оширилади.

Малака сертификатининг амал қилиш муддати малака сертификатининг бланкасида кўрсатилган амал қилиш муддати тугаган санадан бошлаб узайтирилади.

40. Малака сертификатининг амал қилиш муддати 5 йилга узайтирилади.

41. Малака сертификатининг амал қилиш муддатини узайтириш илгари берилган малака сертификатининг бланкига махсус белги қўйиш йўли билан, белгиланган тартибда амалга оширилади.

Малака сертификатининг унинг амал қилиш муддатини узайтиришга тааллуқли бўлган бланки реквизитлари тўлдирилган тақдирда малака сертификатининг эгасига илгари берилган тартиб рақами билан янги малака сертификати берилади. Илгари берилган малака сертификатининг бланки йўқ қилинади.

42. Фамилияси (исми, отасининг исми) ёки паспортининг маълумотлари ўзгарган тақдирда малака сертификатининг эгаси тегишли ўзгартиришларни тасдиқловчи ҳужжатлар олинган кундан бошлаб ўн календарь кундан кечикмай ишчи органга малака сертификатини қайта расмийлаштириш тўғрисида ариза бериши шарт, аризага қайта расмийлаштирилиши керак бўлган малака сертификати ва тегишли ўзгартиришларни тасдиқловчи ҳужжатларнинг асл нусхалари илова қилинади.

43. Малака сертификатини қайта расмийлаштириш малака сертификатининг эгаси томонидан тегишли ариза берилган кундан бошлаб ўн кун мобайнида амалга оширилади, бунда илгари берилган тартиб рақами ва илгари белгиланган амал қилиш муддати билан малака сертификатининг янги бланки берилади. Илгари берилган малака сертификатининг бланки йўқ қилинади.

44. Йўқолган ёки яроқсиз ҳолга келган малака сертификати ўрнига эгасининг аризасига биноан дубликат берилади.

Малака сертификатининг эгаси матбуотда малака сертификатининг йўқолганлиги тўғрисида эълон бериши ва унинг тасдиғини ишчи органга тақдим этиши керак.

Малака сертификатининг дубликати айнан шу тартиб рақами ва унинг амал қилишининг илгари белгиланган муддати билан берилади, малака сертификатининг янги бланкида "Дубликат" сўзи мажбурий равишда қайд этилади.

Яроқсиз ҳолга келган малака сертификати ишчи органга қайтарилади ва йўқ қилинади.

45. Малака сертификатини қайта расмийлаштирганлик, дубликат берганлик учун ариза берилган вақтда қонун ҳужжатларида белгиланган базавий ҳисоблаш миқдорининг 10 фоизи миқдорида йиғим ундирилади.

VIII. МАЛАКА СЕРТИФИКАТИНИНГ АМАЛ

ҚИЛИШ МУДДАТИНИ ТЎХТАТИШ ВА УНИ

БЕКОР ҚИЛИШ ТАРТИБИ

46. Қуйидагилар малака сертификатининг амал қилишини тўхтатиш учун асослар ҳисобланади:

малака сертификати эгасининг аризаси;

ўз фаолиятини амалга ошириш чоғида қонунчилик талабларининг мунтазам равишда ёки бир марта қўпол бузилиши;

малака сертификати эгасининг оғир оқибатларга (ходимнинг ўлимига, унинг оғир тан жароҳатлари олишига ва шу кабиларга) сабаб бўлган бепарволиги, ҳаракатсизлиги;

муайян лавозимларни эгаллаш ёки меҳнат ва меҳнат муносабатлари соҳасида муайян фаолият билан шуғулланиш ҳуқуқидан маҳрум қилиш тарзидаги жазо назарда тутилган суд ҳукмининг қонуний кучга кириши;

фуқарони муомалага ёки чекланган муомалага белгиланган тартибда лаёқатсиз деб эътироф этиш тўғрисидаги суд қарори.

Шу билан бирга, қуйидагилар фаолиятни амалга оширишда қонунчилик талабларининг малака сертификатининг амал қилишини тўхтатиш учун асос ҳисобланадиган бир марта қўпол бузилиши деб эътироф этилади:

меҳнатни муҳофаза қилиш бўйича белгиланган талабларнинг бузилиши ҳолатларининг малака сертификати эгаси томонидан яширилганлиги;

ўз номидан фойдаланиши учун малака сертификатини бошқа шахсга берганлик фактининг аниқланганлиги;

малака сертификати эгасининг ўзи штатида турган ташкилот раҳбарининг тегишли рухсатисиз (буйруғисиз), назорат қилиш ёки ҳуқуқни муҳофаза қилиш органларининг топшириқлари бўйича ҳар хил текширишларни ўтказиш учун мутахассис сифатида иштирок этганлиги.

Малака сертификатининг амал қилиши уни тўхтатиш тўғрисида қарор қабул қилинган санадан бошлаб тўхтайди.

47. Малака сертификати қуйидаги ҳолатларда бекор қилинади:

малака сертификатини бериш тўғрисидаги қарорнинг ноқонунийлиги;

малака сертификатининг сохта ҳужжатлардан фойдаланган ҳолда олинганлиги факти.

Малака сертификатини бекор қилиш тўғрисидаги қарор малака сертификати берилган санадан бошлаб амал қилади.

48. Малака сертификатининг амал қилишини тўхтатиш ёки уни бекор қилиш учун асослар аниқланган тақдирда Ўзбекистон Республикаси Бандлик ва меҳнат муносабатлари вазирлиги тегишли қарор қабул қилади.

Малака сертификатининг амал қилишини тўхтатиш ёки уни бекор қилиш тўғрисидаги қарор асосланган бўлиши керак. Малака сертификатининг амал қилишини тўхтатиш ёки уни бекор қилиш тўғрисидаги маълумотлар иш ўринларини меҳнат шароитлари ва жароҳатлаш хавфлилиги юзасидан аттестациядан ўтказиш бўйича мутахассислар реестрига киритилади.

Малака сертификатининг амал қилишини тўхтатиш ёки уни бекор қилиш тўғрисидаги қарор беш кун муддатда малака сертификатининг эгасига ва у штатида турган ташкилотга юборилади.

Малака сертификатининг амал қилишини тўхтатиш ёки уни бекор қилиш тўғрисидаги қарор иш ўринларини меҳнат шароитлари ва жароҳатлаш хавфлилиги юзасидан аттестациядан ўтказиш бўйича мутахассис томонидан олинган кундан бошлаб ўн кун мобайнида сертификат уни йўқ қилиш учун Ўзбекистон Республикаси Бандлик ва меҳнат муносабатлари вазирлигига қайтарилиши керак.

49. Йўл қўйилган бузилишлар учун унинг малака сертификатининг амал қилиши тўхтатилган ёки у бекор қилинган иш ўринларини меҳнат шароитлари ва жароҳатлаш хавфлилиги юзасидан аттестациядан ўтказиш бўйича мутахассис малака сертификати бекор қилинган ёки унинг амал қилиш муддати тўхтатилган вақтдан бошлаб уч йил мобайнида малака сертификатини такроран олиш учун малака имтиҳонини топширишга киритилмайди.

IX. МАЛАКА СЕРТИФИКАТИГА ЭГА БЎЛГАН

МЕҲНАТНИ МУҲОФАЗА ҚИЛИШ БЎЙИЧА

МУТАХАССИСЛАР РЕЕСТРИНИ ЮРИТИШ

50. Ўзбекистон Республикаси Бандлик ва меҳнат муносабатлари вазирлиги малака сертификатига эга бўлган меҳнатни муҳофаза қилиш бўйича мутахассислар реестрини юритади, унда қуйидагилар кўрсатилади:

малака сертификати олинган сана, уни олган шахснинг фамилияси, исми, отасининг исми ва имзоси;

паспортининг маълумотлари ва яшаш жойи;

иш жойи;

малака сертификатининг тартиб рақами, берилган санаси;

малака сертификатининг амал қилишини узайтириш, тўхтатиш, уни бекор қилиш, қайта расмийлаштириш ва унинг дубликатини бериш.

51. Меҳнатни муҳофаза қилиш бўйича мутахассислар реестридан малака сертификатининг тартиб рақами, берилган санаси, уни қайта расмийлаштириш ва амал қилишини тўхтатиш, шунингдек уни бекор қилиш ва унинг дубликатини бериш тўғрисидаги маълумотлар манфаатдор шахсларга кўчирмалар тарзида берилиши мумкин.

X. ЯКУНЛОВЧИ ҚОИДАЛАР

52. Меҳнатни муҳофаза қилиш бўйича мутахассислар малака сертификати олинган йилдан кейинги йилдан бошлаб ҳар уч йил мобайнида Ўзбекистон Республикаси Бандлик ва меҳнат муносабатлари вазирлиги, Соғлиқни сақлаш вазирлиги ҳамда Олий ва ўрта махсус таълим вазирлиги томонидан тасдиқланадиган Меҳнатни муҳофаза қилиш бўйича ўқитиш ва малака ошириш дастури бўйича камида давомийлиги 72 академик соатдан кам бўлмаган ҳажмда малака ошириш курсларидан ўтишлари шарт.

Малака ошириш курслари штатида меҳнатни муҳофаза қилиш бўйича камида уч нафар мутахассисга эга бўлган таълим муассасалари томонидан, меҳнатни муҳофаза қилиш соҳасидаги назарий ва амалий билимларни чуқурлаштириш ва янгилаш уларнинг бажарилаётган вазифалар ва функцияларга профессионал тайёрлигини таъминлаш мақсадида ўтказилади.

53. Ушбу Низомга мувофиқ ундириладиган йиғимлар ишчи органнинг махсус ҳисоб рақамига ўтказилади.

Ўтказилган маблағлардан ишчи органнинг таъминоти ва уни моддий-техник жиҳатдан ривожлантириш, малака имтиҳонларини ўтказиш, шу жумладан, меҳнатга ҳақ тўлаш ва хизмат сафари харажатлари, малака сертификатларини ҳамда иш ўринларини аттестациядан ўтказиш натижалари бўйича давлат экспертизаси хулосалари бланкларини тайёрлаш ва расмийлаштириш билан боғлиқ харажатларни қоплаш, шунингдек халқаро хизмат сафарларини, иш билан таъминлаш, меҳнатни муҳофаза қилиш соҳасидаги илмий, методологик, амалий ва бошқа ишланмаларни молиялаштириш учун фойдаланилади.

54. Малака сертификатини бериш, унинг амал қилишини тўхтатиш ва уни бекор қилиш масалалари бўйича қарорлар юзасидан манфаатдор шахслар томонидан, қонун ҳужжатларида белгиланган тартибда шикоят билдирилиши мумкин.

Низомга

1-ИЛОВА

Олд томони

     

     

1-бет.

Ўзбекистон Республикасининг Герби

Ўзбекистон Республикаси

Бандлик ва меҳнат муносабатлари вазирлиги

N _____________

Тошкент ш.                                                             20__ йил "___" ____________

Ўзбекистон Республикаси Бандлик ва меҳнат муносабатлари вазирлиги томонидан

       

Ўзбекистон Республикаси ҳудудида иш ўринларини меҳнат шароитлари ва асбоб-ускуналарнинг жароҳатлаш хавфлилиги юзасидан аттестациядан ўтказиш соҳасида фаолият кўрсатувчи ташкилот ходими сифатида ишлашга рухсат берилади.

2-бет.

Малака сертификатининг амал қилиш муддати узайтирилди:

20__ йил "___" __________ дан 20__ йил "___" __________ гача

Малака сертификатининг амал қилиш муддати узайтирилди:

20__ йил "___" __________ дан 20__ йил "___" __________ гача

Малака сертификатининг амал қилиш муддати узайтирилди:

20__ йил "___" __________ дан 20__ йил "___" __________ гача

     

Низомга

2-ИЛОВА

Ўзбекистон Республикаси

Бандлик ва меҳнат

муносабатлари вазирлигига

_________________________

_____________________ дан

АРИЗА

Иш ўринларини меҳнат шароитлари ва асбоб-ускуналарнинг жароҳатлаш хавфлилиги юзасидан аттестациядан ўтказиш бўйича мутахассис малака сертификатини олиш учун малака имтиҳони топширишга рухсат беришингизни сўрайман.

Аризага қуйидагилар илова қилинади:

1.

2.

3.

ва бошқалар

       

Низомга

3-ИЛОВА

АНКЕТА

     

     

Низомга

4-ИЛОВА

Малака имтиҳонидан четлаштириш тўғрисида

ДАЛОЛАТНОМА

Ўтказиш жойи: _________________                  20__ йил "___" ____________

Гуруҳ _________

      

сабабли _____ соат ______ дақиқада малака имтиҳонидан четлатилганлигини тасдиқлаймиз.

"Ўзбекистон Республикаси қонун ҳужжатлари тўплами",

2014 йил 22 сентябрь, 38-сон, 484-модда