МДҲнинг инсон ҳуқуқлари ва асосий эркинликлари тўғрисидаги Конвенцияси (Минск, 1995 йил 26 май, 1998 йил 11 августда кучга кирган)

Функция недоступна

МУСТАҚИЛ ДАВЛАТЛАР ҲАМДЎСТЛИГИНИНГ

ИНСОН ҲУҚУҚЛАРИ ВА АСОСИЙ ЭРКИНЛИКЛАРИ

ТЎҒРИСИДАГИ КОНВЕНЦИЯСИ (16)

Минск, 1995 йил 26 май

1998 йил 11 августда  кучга кирган

Мустақил Давлатлар Ҳамдўстлигига иштирокчи давлатлар, қуйида Аҳдлашувчи Томонлар деб аталувчилар,

Инсон ҳуқуқлари умумжаҳон декларациясини, Иқтисодий, ижтимоий ва маданий ҳуқуқлар тўғрисидаги Халқаро пактни, Фуқаролик ва сиёсий ҳуқуқлар тўғрисидаги Халқаро пактни ва шу пактга доир Факультатив протоколни, шунингдек ЕХҲТ (ЕХҲК) доирасида қабул қилинган инсон ҳуқуқлари бўйича халқаро мажбуриятларни эътиборга олиб,

кўрсатиб ўтилган ҳужжатлар ўзида эълон қилинган ҳуқуқлар ялпи ва самарали тан олиниши ҳамда уларга риоя этилишини таъминлаш мақсадини кўзлашини эътиборга олиб,

Мустақил Давлатлар Ҳамдўстлигига иштирокчи давлатлар бошлиқларининг Инсон ҳуқуқлари ва асосий эркинликлари соҳасидаги халқаро мажбуриятлар тўғрисидаги Декларациясини эътиборга олиб,

Мустақил Давлатлар Ҳамдўстлигига иштирокчи барча давлатлар томонидан инсон ҳуқуқлари соҳасидаги халқаро стандартларга риоя этиш, ирқи, жинси, тили, сиёсий эътиқоди, дини ва ижтимоий келиб чиқишидан қатъи назар, барча учун инсон ҳуқуқлари ва асосий эркинликларига ҳурмат билан қарашни кучайтириш ва рағбатлантириш демократик ўзгартиришларни чуқурлаштиришга, иқтисодий ва ижтимоий юксалишга, қонунийлик ва ҳуқуқий тартибот мустаҳкамланишига кўмаклашади деб ҳисоблаб,

эркинлик ва қонун устуворлигини қарор топтириш, инсон ҳуқуқлари ва асосий эркинликлари бузилишларининг олдини олиш ишида Аҳдлашувчи Томонларнинг коллектив куч-ғайратларини бирлаштириш, муросасозлик ва халқлар дўстлиги, фуқаролар тинчлиги ва тотувлигини мустаҳкамлаш анъаналари руҳида инсон ҳуқуқлари ва асосий эркинликларини ҳимоя қилиш бўйича мажбуриятларни самарали амалга оширишга интилиб,

бундай куч-ғайрат инсон ҳуқуқлари соҳасидаги асосий халқаро-ҳуқуқий ҳужжатларга мувофиқ инсон ҳуқуқлари ва эркинликларининг барча томонидан ҳурмат қилинишига ва уларга риоя этилишига кўмаклашади деб ҳисоблаб,

қуйидагилар ҳақида келишиб олдилар:

1-модда

Аҳдлашувчи томонлар ўз юрисдикциялари остидаги ҳар бир инсонга ушбу Конвенцияда баён қилинган ҳуқуқлар ва эркинликларни таъминлайдилар.