Ўзбекистон Республикаси Олий хўжалик суди кассация инстанциясининг 09.03.2006 й. 16-0502/4967-сонли Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

09.03.2006 й.

N 16-0502/4967

(КЎЧИРМА)

Тугатишга доир иш очилганлиги ҳақида матбуотда эълон берилган санадан бошлаб кредиторлар томонидан талабларни тугатиш бошқарувчисига тақдим этиш муддати 2 ойдан кам бўлмаслиги лозим.

Чортоқ туман ДСИ хўжалик судига мурожаат қилиб, қарздор - "Экспресс шина" хусусий фирмасини кредиторлар ва бюджет олдидаги қарзлари бўйича талабларини уч ой ва ундан ортиқ вақт мобайнида қаноатлантира олмаганлиги сабабли банкрот деб топишни сўраган.

Хўжалик судининг ҳал қилув қарори билан ариза қаноатлантирилиб, корхона банкрот деб топилган.

Иш апелляция инстанциясида кўрилмаган.

Ҳал қилув қарорининг хулоса қисмида кредиторлар ўз талабларини бир ой ичида тақдим этишлари мумкинлиги ҳақидаги муддат белгиланган.

Ҳал қилув қарорининг мазкур қисми устидан Наманган вилоят прокуратураси кассация протести келтирган.

Судлов ҳайъати иш материалларини, кассация протестида келтирилган важларни ўрганиб, қуйидагиларга кўра кассация протестини қаноатлантиришни лозим топади.

Ўзбекистон Республикаси Фуқаролик кодексининг 55-моддасига мувофиқ, тугатиш комиссияси юридик шахсни давлат рўйхатидан ўтказиш ҳақидаги маълумотлар босиб чиқариладиган матбуот органларида юридик шахснинг тугатилиши ҳамда унинг кредиторлари томонидан талабларни баён этиш тартиби ва муддати ҳақида хабар эълон қилади. Бу муддат тугатиш ҳақида хабар эълон қилинган пайтдан бошлаб икки ойдан кам бўлиши мумкин эмас.

"Банкротлик тўғрисида"ги Ўзбекистон Республикаси Қонунининг 127-моддасида ҳам тугатишга доир иш очилганлиги ҳақида матбуотда эълон берилган санадан бошлаб кредиторлар ўз талабларини тугатиш бошқарувчисига тақдим этиш муддати 2 ойдан кам бўлмаслиги лозимлиги белгиланган.

Биринчи инстанция суди кредиторлар ўз талабларини бир ой ичида тақдим этишлари мумкин деб, нотўғри хулосага келган.

Бундай ҳолда судлов ҳайъати кассация протестини қаноатлантиришни ва хўжалик судининг ҳал қилув қарорини ўзгартириб, тугатишга доир иш юритиш очилганлиги ҳақида матбуотда эълон берилган санадан бошлаб кредиторлар ўз талабларини 2 ой ичида тақдим этишлари мумкин деб белгилашни лозим топади.

“Ўзбекистон Республикаси Олий хўжалик суди Ахборотномаси”,

2007 й., 2-сон