Олиб кирилаётган технологик жиҳозларнинг бутловчи ва эҳтиёт қисмларини божхона режимига расмийлаштириш тўғрисидаги низо бўйича

Функция недоступна

ҲАЛ ҚИЛУВ ҚАРОРЛАРИГА

ШАРҲЛАР

Олиб кирилаётган технологик жиҳозларнинг бутловчи ва эҳтиёт қисмларига нисбатан қўшилган қиймат солиғи ҳамда импорт божхона божи тўлови бўйича имтиёзлар ушбу жиҳозни етказиб бериш шартномасига мувофиқ янги технологик жиҳоз билан комплектда олиб кириладиган ва ушбу жиҳознинг ажралмас қисми ҳисобланган бутловчи ва эҳтиёт қисмларигагина татбиқ этилади

Ишнинг мазмуни

Масъулияти чекланган жамият (бундан буён матнда МЧЖ деб юритилади) Германия Федератив Республикаси компанияси билан 2012 йил 2 майда тузилган олди-сотди шартномасига асосан ушбу компания томонидан ишлаб чиқарилган паррандачилик жиҳозини Ўзбекистон Республикасига импорт қилиб, Ташқи иқтисодий фаолият божхона постига олиб келган.

Паррандачилик жиҳози бир неча ускуналардан, бутловчи буюмлар ва эҳтиёт қисмларидан иборат бўлиб, божхона юк декларацияларида (бундан буён матнда БЮД деб юритилади) барча ускуналар, бутловчи буюмлар ва эҳтиёт қисмлар паррандачилик жиҳозига тегишлилиги асосида ташқи иқтисодий фаолият Товар номенклатураси (бундан буён матнда ТИФ ТН деб юритилади) 8436290000 коди билан кўрсатилган ҳолда ИМ-40 "Эркин муомалага чиқариш" божхона режимига расмийлаштириш учун давлат божхона хизмати органига БЮДлари тақдим этилган.

Давлат божхона хизмати органи МЧЖга 2013 йил 29 январдаги хат билан паррандачилик жиҳози сифатида ҳавони вентиляция қилиш ва совутиш системаси ТИФ ТН 8415830009 коди билан классификацияланишини кўрсатиб, БЮДга тегишли ўзгартириш киритишни тавсия қилган. Шу асосда давлат божхона хизмати органи МЧЖга паррандачилик жиҳозини ИМ-40 "Эркин муомалага чиқариш" божхона режимига божхона расмийлаштирувини ўтказмаган.

Бундан норози бўлган МЧЖ хўжалик судига ариза билан мурожаат қилиб:

- вилоят божхона бошқармасининг МЧЖга БЮДда 70,0 минг бош товуқ учун паррандачилик катаги жиҳозини (2 комплект) ТИФ ТН 8436290000 коди билан эркин муомала режимига расмийлаштирмаслик ҳаракатини ноқонуний деб топишни;

- вилоят божхона бошқармасига ва унга бўйсунувчи ТИФ божхона пости зиммасига 70,0 минг бош товуқ учун паррандачилик катаги жиҳозини (2 комплект) барча ускуналарини (1 комплект - катак батареяси, турли йиғиш материаллари, 1 комплект - тухум териш системаси, бункер, 1 комплект - ем тарқатиш системаси, 1 комплект - ахлат йиғиштириш системаси, 1 комплект - вентиляция системаси, клапанлар, 1 комплект - ёритиш системаси, 1 комплект - электрон бошқариш системаси) умумий ТИФ ТН 8436290000 коди билан БЮДларни эркин муомала режимига расмийлаштириш мажбуриятини юклашни сўраган.

Аризачининг важлари

Суд мажлисида аризачи - МЧЖ аризадаги талабларни қувватлаб, тушунтириш бериб, республика ҳудудига контракт асосида олиб келинган паррандахона жиҳозининг ажралмас қисми бўлган ҳавони вентиляция қилиш ва совутиш системасининг товар коди божхона органи томонидан нотўғри талқин қилиниб, жиҳоздан алоҳида ҳолда кўрсатилган код билан расмийлаштирилиши кўрсатилганлигини, мазкур система жиҳоз билан чамбарчас боғлиқ ҳолда умумий функцияни паррандаларни парваришлаш функциясини бажаришини, бу ускунанинг вазифаси, ишлаб чиқарувчининг берган маълумотлари, паррандаларни парваришлаш ҳақидаги йўриқномалар, кўрсатмалар билан тасдиқланишини баён қилган.

Жавобгарнинг важлари

Вилоят божхона бошқармаси вакиллари аризага эътироз билдириб, ҳавони вентиляция қилиш ва совутиш системаси Ўзбекистон Республикаси ҳудудига олиб киришда импорт божхона божи ва қўшилган қиймат солиғидан озод қилинадиган технологик жиҳозлар, бутловчи буюм ва эҳтиёт қисмлар рўйхатида назарда тутилмаганлигини ва унинг вазифаси ҳавонинг ҳароратини ўзгартиришга, зарур даражада намлик ҳосил қилишга мослаштирилганлиги сабабли парранда жиҳозининг вазифаси билан мувофиқ келмаслиги ҳақида тушунтириш бердилар.

Суднинг ҳал қилув қарори

МЧЖнинг аризаси қаноатлантирилсин.

Вилоят божхона бошқармасининг МЧЖга БЮДда 70,0 минг бош товуқ учун паррандачилик катаги жиҳозини (2 комплект) ТИФ ТН 8436290000 коди билан эркин муомала режимига расмийлаштирмаганлиги ҳаракати ноқонуний деб топилсин.

Вилоят божхона бошқармасига ва унга бўйсунувчи ТИФ божхона пости зиммасига 70,0 минг бош товуқ учун паррандачилик катаги жиҳозининг (2 комплект) барча ускуналарини (1 комплект - катак батареяси, турли йиғиш материаллари, 1 комплект - тухум териш системаси, бункер, 1 комплект - ем тарқатиш системаси, 1 комплект - ахлат йиғиштириш системаси, 1 комплект - вентиляция системаси, клапанлар, 1 комплект - ёритиш системаси, 1 комплект - электрон бошқариш системаси) умумий ТИФ ТН 8436290000 коди билан кўрсатилган БЮД бўйича "Эркин муомалага чиқариш" божхона режимига расмийлаштириш мажбурияти юклансин.

Товарлар "Эркин муомалага чиқариш" божхона режимига расмийлаштириш, ҳал қилув қарори қонуний кучга киргандан сўнг МЧЖ БЮД ва бошқа расмийлаштириш учун талаб этиладиган ҳужжатларни тақдим этганидан сўнг бир ой ичида бажарилсин.

Шарҳ

Германия Федератив Республикаси компаниясининг 2013 йил 14 январдаги хатига кўра, импорт шартномасига асосан сотилган паррандачилик жиҳози тўпламидаги ҳавони вентиляция қилиш ва совутиш системаси мазкур жиҳознинг ажралмас қисмидир. Ушбу компания томонидан берилган тавсифнома ҳужжатида вентиляция қилиш ва совутиш системаси паррандаларни парваришлаш учун хизмат қилади. Қолаверса, тухум ишлаб чиқаришда товуқлар учун иқлим шароити белгиланган бир меъёрда ушлаб турилиши лозим.

Ўзбекистон Республикаси Президентининг 2007 йил 14 мартдаги "Ишлаб чиқаришни модернизациялаш, техник ва технологик қайта жиҳозлашни рағбатлантиришга оид қўшимча чора-тадбирлар тўғрисида"ги ПФ-3860-сонли Фармонининг 5-бандига кўра, олиб кириладиган технологик жиҳозларга қонунчиликда кўзда тутилган божхона тўловлари бўйича имтиёзлар Ўзбекистон Республикаси Иқтисодиёт, Молия, Ташқи иқтисодий алоқалар, инвестициялар ва савдо вазирликлари, Давлат божхона қўмитаси томонидан тасдиқланадиган технологик жиҳозлар рўйхатига мувофиқ қўлланилади.

Ўзбекистон Республикаси Адлия вазирлиги томонидан 2013 йил 20 мартда 2436-сон билан рўйхатга олинган Ўзбекистон Республикаси Иқтисодиёт вазирлиги, Молия вазирлиги, Ташқи иқтисодий алоқалар, инвестициялар ва савдо вазирлиги, Давлат божхона қўмитасининг 2013 йил 15 февралдаги 21, 16, 3-02, 01-02/8-44-сонли қарори билан тасдиқланган "Ўзбекистон Республикаси ҳудудига олиб киришда импорт божхона божи ва қўшилган қиймат солиғидан озод қилинадиган технологик жиҳозлар рўйхати"га паррандачилик жиҳози киритилган.

Бунда олиб кирилаётган технологик жиҳозларнинг бутловчи ва эҳтиёт қисмларига нисбатан қўшилган қиймат солиғи ҳамда импорт божхона божи тўлови бўйича имтиёзлар ушбу жиҳозни етказиб бериш шартномасига мувофиқ янги технологик жиҳоз билан комплектда олиб кириладиган ва ушбу жиҳознинг ажралмас қисми ҳисобланган бутловчи ва эҳтиёт қисмларигагина татбиқ этилади. Ушбу масалалар тўғрисида Ўзбекистон Республикаси Олий хўжалик суди Пленумининг "Хўжалик судлари томонидан божхона ҳақидаги қонун ҳужжатларини қўллашнинг айрим масалалари ҳақида" 2009 йил 24 апрелдаги 197-сонли қарорининг 21.2 ва 21.4-бандларида зарур тушунтиришлар берилган.

Шундай экан, МЧЖга нисбатан Ўзбекистон Республикаси Солиқ кодекси 211-моддасининг 7-банди, "Бож тарифи тўғрисида"ги Ўзбекистон Республикаси Қонуни 33-моддаси биринчи қисмининг ўн тў??изинчи хатбошисида назарда тутилган имтиёзлар татбиқ этилади.

Юқорида қайд этилганларни инобатга олган ҳолда суд МЧЖнинг аризасидаги талабларни қаноатлантирган. Чунки, олиб кирилаётган технологик жиҳозларнинг бутловчи ва эҳтиёт қисмларига нисбатан қўшилган қиймат солиғи ҳамда импорт божхона божи тўлови бўйича имтиёзлар ушбу жиҳозни етказиб бериш шартномасига мувофиқ янги технологик жиҳоз билан комплектда олиб кириладиган ва ушбу жиҳознинг ажралмас қисми ҳисобланган бутловчи ва эҳтиёт қисмларигагина татбиқ этилади.

“Ўзбекистон Республикаси Олий хўжалик суди Ахборотномаси”,

2013 й., 9-сон