Ўзбекистон Республикаси Олий Кенгашининг 06.05.1993 й. 836-XII-сон "Ўзбекистон Республикасининг пул тизими тўғрисида"ги Ўзбекистон Республикаси Қонунини амалга киритиш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ КЕНГАШИНИНГ

ҚАРОРИ

06.05.1993 й.

N 836-XII

"ЎЗБЕКИСТОН РЕСПУБЛИКАСИНИНГ

ПУЛ ТИЗИМИ ТЎҒРИСИДА"ГИ ЎЗБЕКИСТОН

РЕСПУБЛИКАСИ ҚОНУНИНИ АМАЛГА

КИРИТИШ ҲАҚИДА

Расмий тўлов воситаси сифатида рублдан фойдаланаётган давлатларнинг ягона иқтисодий майдонини сақлаб қолиш, интеграциялаш ва хўжалик алоқаларини тиклашга қаратилган келишилган кредит, пул, бюджет, нарх-наво, бож ва солиқ сиёсатини юритиш ишига содиқ эканлигини таъкидлаб, Ўзбекистон Республикаси Олий Кенгаши ҚАРОР ҚИЛАДИ:

1. "Ўзбекистон Республикасининг пул тизими тўғрисида"ги Ўзбекистон Республикаси Қонуни эълон қилинган пайтдан бошлаб амалга киритилсин.

2. Муомалада бўлган 1961-1992 йилларда чиқарилган СССР Давлат банкининг банкнотлари, СССР давлат хазинаси билетлари ва тангалари, шунингдек 1992-1993 йилларда чиқарилган Россия Федерацияси Марказий банкининг пул белгилари Ўзбекистон Республикасининг бутун ҳудудида барча турдаги тўловларда, ҳисобларга, жамғармаларга, аккредитивларга киритиш учун ва ўтказиш учун амалдаги қиймати бўйича қабул қилиниши шарт.

3. Ўзбекистон Республикаси Вазирлар Маҳкамаси ва Ўзбекистон Республикаси Марказий банки нақд пулларга бўлган эҳтиёж қисқартирилишини таъминловчи нақд пулсиз ҳисоб-китоб қилиш усулини тўлов оборотига кенг жорий этиш, шунингдек савдо тушумлари инкассациясини яхшилаш тадбирларини кўрсин.

4. Ўзбекистон Республикасининг қонунлари бундан кейин "Ўзбекистон Республикасининг пул тизими тўғрисида"ги Ўзбекистон Республикаси Қонунига мувофиқ ҳолга келтирилгунга қадар аввал чиқарилган қонун ҳужжатлари ушбу Қонунга зид келмаслиги сабабли қўлланилаверади.

5. Ўзбекистон Республикаси Вазирлар Маҳкамаси "Ўзбекистон Республикасининг пул тизими тўғрисида"ги Ўзбекистон Республикаси Қонуни қабул қилиниши муносабати билан Ўзбекистон Республикаси қонун ҳужжатларига ўзгартишлар ва қўшимчалар киритиш ҳақидаги таклифларни белгиланган тартибда тақдим этсин ҳамда Ҳукуматнинг, вазирликлар ва идораларнинг меъёрий ҳужжатларини ушбу Қонунга мувофиқ ҳолга келтирсин.

Ўзбекистон Республикаси

Олий Кенгашининг Раиси                                                   Ш. Йўлдошев

"Ўзбекистон Республикаси Олий Кенгаши Ахборотномаси", 1993 й., N 5, 220-модда