Бухгалтерга ёрдам

Функция недоступна

ХИЗМАТ АВТОМОБИЛИНИ

ТАЪМИРЛАЙМИЗ

ЖОРИЙ ТАЪМИРЛАШ

Жорий таъмирлашдан асосий мақсад - транспортни ишчи ҳолатда тутиб туриш.

Автомобилдан фойдаланишда унинг айрим қисмлари ва деталлари, шунингдек сарфлаш ва ёнилғи-мойлаш материаллари алмаштирилиши керак.

Одатда, уларни алмаштириш муддатларини автомобиль ишлаб чиқарувчиси техник хизмат кўрсатиш регламентида белгилайди. Шу сабабли алмаштиришни режалаштириб, автотранспортни жорий таъмирлаш режасини ишлаб чиқинг.

МИСОЛ. Автомобиль ишлаб чиқарувчиси техник хизмат кўрсатиш регламентида ҳар 10 минг км йўл босгандан кейин ёнилғи фильтрини алмаштиришни назарда тутган. Мотор мойини ишлаб чиқарувчи унинг тури ва сифатига қараб 5-7 минг км йўл босгандан кейин алмаштириш муддатини белгилайди. Автошиналар фойдаланиш шароитига қараб 100 минг км йўл босгандан кейин алмаштирилиши мумкин. Аккумулятор ишининг кафолатли муддати - 2 йил. Ушбу кўрсаткичлардан келиб чиқиб режада автомобилни жорий таъмирлаш муддатларини белгиланг.

Автомобиль тури ва русуми, унинг техник тавсифлари ва фойдаланиш шароитига қараб у ёки бу деталларини алмаштириш муддати фарқланиши мумкин. Шу сабабли жорий таъмирлаш режаси ҳар бир автомобиль учун алоҳида тасдиқланади.

Режада айнан нималар таъмирланиши, бунда қандай эҳтиёт қисмлар ёки материаллар алмаштирилишини қайд этиш зарур.

Автомобилни техник кўрикдан ўтказиш ва таъмирлаш режаси йил бошлангунига қадар ҳар йили тузилади. У ташкилот раҳбарининг буйруғи билан тасдиқланади.

Жорий таъмирлаш режасига риоя этиш учун жавобгарликни автомобилдан бевосита фойдаланувчи моддий жавобгар шахс зиммасига юкланг. Жадвалга риоя этиш шартларини автомобилни жавобгар шахсга бериш чоғида расмийлаштириладиган тўлиқ моддий жавобгарлик тўғрисидаги шартномада қайд этинг.

ЎРТАЧА ВА КАПИТАЛ

ТАЪМИРЛАШ

Жорий таъмирлашдан фарқли равишда, ўртача ва капитал таъмирлашда автомобилнинг базавий ва корпус деталлари ва узеллари қисман ёки тўлиқ қисмларга ажратилиши ва таъмирланиши, эскирган деталлар алмаштирилиши назарда тутилади. Масалан, двигатель ёки юргизувчи қисмини таъмирлаш.

Автомобиль (унинг айрим қисмлари) бевосита бузилганда ёки режали тартибда ўртача ва капитал таъмирланиши мумкин.

Режали ўртача таъмирлаш - йилда 1 мартадан, капитал таъмирлаш эса бир неча йилда 1 мартадан кўп ўтказилмайди. Ҳаммаси автомобилнинг ҳолатига боғлиқ.

Автомобиль қуйидаги усулда таъмирланиши мумкин:

q хўжалик усулида - ташкилотнинг ўз кучи ва маблағи билан (таъмирлаш цехи, устахонада);

q пудрат усулида - автотранспортни таъмирлашга ихтисослашган ташкилот билан тузилган шартнома асосида.

Махсус техник воситалар ва профессионал кўникмаларни талаб этмайдиган жорий ва майда таъмирлаш ишлари хўжалик усулида бажарилади. Масалан, шиналар ёки аккумуляторни алмаштириш.

Тузилмасида жиҳозланган автотаъмирлаш устахоналари (цехлари) ва малакали мутахассислари бўлган корхоналар ўз кучлари билан автомобилларни ўртача ва капитал таъмирлай оладилар.

ҲУЖЖАТЛАР БИЛАН

РАСМИЙЛАШТИРИШ

Хўжалик усулида таъмирлаш

Таъмирлаш заруратини нуқсонлар далолатномаси (қайднома) билан тасдиқланг.

Уни техник кўрикдан ўтказиш (визуал ва (ёки) техник ўлчовлар) натижалари бўйича ҳар битта таъмирланаётган автомобиль учун тузинг.

Ўз автотаъмирлаш устахоналарига эга бўлган корхоналарда автомобилни ушбу бўлинма мутахассислари кўздан кечирадилар. Нуқсонлар далолатномасини ҳам улар тузадилар.

Бундай бўлинма (хизмат) бўлмаса, нуқсонлар далолатномасини ташкилот раҳбарининг буйруғи билан ташкил этилган махсус комиссия тузади.

Қонун ҳужжатларида нуқсонлар далолатномасининг белгиланган шакли назарда тутилмаган. Шу сабабли у эркин шаклда тузилади.