Катталик бирликларини ёзиш ва қўллаш Қоидалари (ЎзР ВМ 10.01.2018 й. 21-сон қарорига 3-илова)

Функция недоступна

Вазирлар Маҳкамасининг

2018 йил 10 январдаги

21-сон қарорига

3-ИЛОВА

Катталик бирликларини ёзиш ва қўллаш

ҚОИДАЛАРИ

1-БОБ. ҚЎЛЛАШ ДОИРАСИ

1. Мазкур Қоидалар Ўзбекистон Республикасида қўллашга рухсат этилган катталик бирликларини ёзиш ва қўллаш тартибини белгилайди.

2. Ташқи савдо фаолиятини амалга оширишда ушбу қоида талаблари ихтиёрий ҳисобланади.

2-БОБ. АТАМАЛАР ВА ТАЪРИФЛАР

3. Мазкур Қоидаларда қуйидаги атамалар ва таърифлар қўлланади:

катталик - объект, жисм ёки модданинг сифат жиҳатидан ажратилиши ва миқдор жиҳатидан аниқланиши мумкин бўлган хоссаси;

катталик бирлиги - катталикнинг, шу катталик бирлиги деб қабул қилинган ва у билан бир хил бўлган катталикларни миқдор жиҳатдан ифодалаш учун қўлланадиган қайд этилган қиймати;

когерент ҳосила бирлик - ушбу катталиклар тизими учун ва асосий бирликларнинг танланган тўплами учун асосий бирликларнинг бирга тенг пропорционаллик коэффициенти билан даражаларининг кўпайтмаси ҳисобланган ҳосила бирлик;

халқаро катталиклар тизими - Халқаро катталиклар тизимига (кейинги ўринларда СИ деб аталади) асосланган, Ўлчов ва тарозилар бош конференцияси томонидан қабул қилинган ва тавсия этилган, номлар ва белгилар, шунингдек, олд қўшимчалар тўплами ва уларнинг номлари ҳамда белгиларини, уларни қўллаш қоидаларини ўз ичига олган тизим;

каррали катталик бирлиги - ушбу ўлчаш бирлигини бирдан катта бўлган бутун сонга кўпайтириш йўли билан олинадиган катталик бирлиги;

асосий катталик - ушбу катталиклар тизими учун тизим катталикларидан ҳеч бири бошқа катталиклар орқали ифодаланиши мумкин бўлмаган тарзда шартли равишда танланган катталиклардан бири;

асосий катталик бирлиги - келишувга кўра асосий катталик учун қабул қилинган ўлчаш бирлиги;

ҳосила катталик - катталиклар тизимида шу тизимнинг асосий катталиклари орқали аниқланган катталик;

ҳосила катталиклар бирлиги - ҳосила катталик учун қабул қилинган ўлчаш бирлиги;

катталиклар тизими - катталикларнин шу катталикларни боғловчи бир-бирига зид бўлмаган тенгламалар мажмуи билан биргаликдаги мажмуи;

катталик бирликлари тизими - асосий ва ҳосила катталик бирликларининг ушбу катталик тизими учун белгиланган қоидаларга мувофиқ аниқланган каррали ва улушли бирликлари билан биргаликдаги мажмуи.

3-БОБ. КАТТАЛИК БИРЛИКЛАРИНИ ҚЎЛЛАШ ҚОИДАЛАРИ

4. СИ асосий катталик бирликларидан ва СИ ҳосила катталик бирликларидан Ўзбекистон Республикасида қўллашга рухсат этилган каррали ва улушли катталик бирликлари ўнли кўпайтирувчилар ёрдамида ҳосил қилинади.

Каррали ва улушли катталик бирликларини ҳосил қилиш учун қўлланиладиган ўнли кўпайтирувчилар, шунингдек, уларнинг номлари ва белгиларини ҳосил қилувчи олд қўшимчалар мазкур Қоидаларга иловада келтирилган.

5. Массанинг улушли тизим бирликларини ҳосил қилиш учун масса бирлиги - килограмм ўрнига массанинг улушли тизим бирлиги - грамм қўлланилади ва олд қўшимча "грамм" сўзига қўшилади. Массанинг улушли бирлиги - грамм олд қўшимча қўшилмасдан қўлланилади.

6. Вақт катталикларининг тизимдан ташқари бирликлари: ҳафта, ой, йил, аср, мингйиллик каррали ва улушли бирликларни ҳосил қилмайди, уларнинг номлари ва белгиларида олд қўшимчалар қўлланилмайди.

7. Ахборот миқдорининг "байт" каррали бирликларини ҳосил қилиш учун "210", "220" ва "230" иккилик кўпайтмаларига мос бўлган "Кило", "Мега", "Гига" олд қўшимчалари қўлланилади (1 Кбайт = 1024 байт, 1 Мбайт = 1024 Кбайт, 1 Гбайт = 1024 Мбайт).

Иккилик саноқ тартибида ахборот миқдорининг каррали бирликлари номлари ва белгиларини ҳосил қилиш учун қўлланиладиган кўпайтма ва олд қўшимчалар жадвалда келтирилган.

4-БОБ. КАТТАЛИК БИРЛИКЛАРИ ВА УЛАРНИНГ

БЕЛГИЛАРИНИ ЁЗИШ ҚОИДАЛАРИ

8. Ўзбекистон Республикасида қўллашга расмий равишда рухсат этилган катталик бирликларини ёзиш фақат белгиланган тартибда тасдиқланган номлари ёки белгиларига мувофиқ амалга оширилади.

Катталик бирликларининг мазкур Қоидаларда белгиланган номлари ёки белгиларига бирон-бир белги ёки қўшимчалар қўшилишига йўл қўйилмайди.

9. Бирлик белгилари тўғри шрифтда ёзилади. Бирлик белгиларида қисқартириш белгиси сифатида нуқта қўйилмайди.

10. Катталик қийматларининг ёзилишида катталик бирликларининг ҳарфлар ёки махсус белгилар ("…°", "…'", "…''") билан ифодаланган белгилари қўлланилади.

11. Ясси бурчак катталик бирлигининг "градус", "минут", "секунд" белгилари сатр устида ёзилади.

12. Сиғим ҳажмининг бирлиги "литр"ни (ҳарфли белгиси l "эль") L белгиси билан ифодалашга йўл қўйилади.

13. СИ каррали ёки улушли бирликларининг номлари ёки белгиларини ёзишда олд қўшимча ёки унинг белгиси бирлик номи ёки белгиси билан қўшиб ёзилади.

Бундай бирликлар кенг тарқалган ҳолатларда олд қўшимчани кўпайтманинг иккинчи кўпайтирувчисига ёки махражга қўшишга йўл қўйилади.

Бошланғич бирликнинг номига ва белгисига бир вақтда иккита ёки ундан кўп олд қўшимча қўшилмайди.

14. Катталик бирликларининг белгилари катталикларнинг сонли қийматларидан кейин улар билан бир қаторда (кейинги сатрга кўчирмасдан) жойлаштирилади. Катталик бирлигининг белгиси олдида турган, ўзидан эгри чизиқли касрни ифодалайдиган сонли қиймат қавсга олинади. Катталик бирлигининг сонли қиймати ва белгиси ўртасида бўш жой қолдирилади.

Сатр устида жойлаштирилган ясси бурчак катталик бирликларининг "градус", "минут", "секунд" белгилари бундан мустасно бўлиб, улар олдида бўш жой қолдирилмайди.

15. Сонли катталик қийматида ўнли каср мавжудлигида катталик бирлигининг белгиси охирги рақамдан кейин кўрсатилади. Катталик бирлигининг сонли қиймати ва ҳарфли белгиси ўртасида бўш жой қолдирилади.

16. Чегаравий оғишларга эга бўлган катталик қийматларининг кўрсатилишида катталик қиймати ва унинг чегаравий оғишлари қавс ичига олинади, катталик бирликларининг белгилари эса қавсдан ташқарида жойланади ёки катталик бирликларининг белгилари сонли катталик қийматидан кейин ҳам ва унинг чегаравий оғишидан кейин ҳам қўйилади.

17. Формулалардаги катталик белгиларига берилган тушунтиришларда бирлик белгиларини қўллашга рухсат этилади.

Бирлик белгиларини ҳарфли шаклда тақдим этилган, катталиклар ўртасидаги боғлиқликни ёки уларнинг сонли қийматлари ўртасидаги боғлиқликни ифодалайдиган формулалар билан битта сатрда жойлашга йўл қўйилмайди.

18. Кўпайтмага кирувчи бирликларнинг ҳарфли белгилари ўрта чизиқда кўпайтириш белгилари сифатида нуқталар билан ажратилади. Бу мақсадда "х" белгисидан фойдаланишга йўл қўйилмайди.

19. Бирликлар нисбатини ҳарф билан белгилашда бўлиш белгиси сифатида фақат битта эгри ёки горизонтал чизиқдан фойдаланилади. Бирлик белгиларидан даражага (мусбат ва манфий) кўтарилган бирлик белгиларининг кўпайтмаси кўринишида фойдаланишга йўл қўйилади.

Агар нисбатга кирувчи бирликлардан биттаси учун манфий даража кўринишидаги (масалан, s-1, m-1, К-1, с-1) белги ўрнатилган бўлса, эгри ёки горизонтал чизиқдан фойдаланишга йўл қўйилмайди.

20. Эгри чизиқ қўлланганда сурат ва махраждаги бирликлар белгиси сатрга жойлаштирилади, махраждаги бирлик белгиларининг кўпайтмаси қавсга олинади.

21. Икки ва ундан кўп бирликдан ташкил топган ҳосила бирлик кўрсатилганда ҳарфли белгилар ва бирлик номларини бирга қўшиб қўллашга, яъни айрим бирликлар учун белгиларни, бошқалари учун эса - номларини кўрсатишга рухсат этилмайди.

22. Катталикнинг рақамли қийматлари диапазони бир турдаги катталик бирликларида ифодаланган бўлса, катталик бирлигининг белгиси, махсус белгилар кўринишидаги катталиклар бундан мустасно ("…°", "…'", "…''"), диапазоннинг охирги рақамли қийматидан кейин кўрсатилади.

23. Ахборот миқдори бирлигининг иккилик қўшимчалари катта ҳарфда ёзилади. Ахборот бирлигининг халқаро белгиларини "K", "M", "G" қўшимчалари билан ишлатишга йўл қўйилади.

5-БОБ. ЯКУНЛОВЧИ ҚОИДА

24. Мазкур Қоидалар талаблари бузилишида айбдор бўлган шахслар қонун ҳужжатларида белгиланган тартибда жавоб беради.

Қоидаларга

ИЛОВА

Каррали ва улушли катталик бирликларини ҳосил

қилиш учун қўлланадиган ўнли кўпайтирувчилар,

шунингдек, уларнинг номлари ва белгиларини

ҳосил қилувчи олд қўшимчалар

Изоҳ:

Бошланғич катталик бирликлари каррали ва улушли катталик бирликлар даражасига оширилганда, бошланғич катталик бирлиги каррали ва улушли даража кўрсаткичига тегишли белги қўшиш орқали ҳосил қилинади. Бунда даража кўрсаткичи қўшимча билан каррали ёки улушли катталик бирликларини даражага кўтаришни билдиради.

Қонун ҳужжатлари маълумотлари миллий базаси (www.lex.uz),

2018 йил 12 январь