язык интерфейса

ЎзР Конунчилиги

ЎзР Конунчилиги/ Иқтисодиётнинг айрим соҳалари/ Қурилиш ва архитектура/ Қурилиш материаллари, буюмлари, конструкциялари, машиналари, механизмлари/ Ўзбекистон Республикаси Президентининг 09.07.2018 й. ПҚ-3841-сон "Ички бозорни қум-шағал материаллари билан барқарор таъминлаш бўйича қўшимча чора-тадбирлар тўғрисида"ги Қарори

Полный текст документа доступен в платной версии. По вопросам звоните на короткий номер 1172

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

09.07.2018 й.

N ПҚ-3841



ИЧКИ БОЗОРНИ ҚУМ-ШАҒАЛ

МАТЕРИАЛЛАРИ БИЛАН БАРҚАРОР

ТАЪМИНЛАШ БЎЙИЧА ҚЎШИМЧА

ЧОРА-ТАДБИРЛАР ТЎҒРИСИДА


Мамлакатимизда сув объектларини муҳофаза қилиш тизимини такомиллаштириш, дарёлар, сойлар, жилғалар ва кўллар муҳофаза ҳудудларини ва ўзанларини (кейинги ўринларда дарё ўзани деб юритилади) тозалаш бўйича ишларни самарали ташкиллаштиришга алоҳида эътибор қаратиб келинмоқда.

Амалга оширилаётган чора-тадбирларга қарамасдан норуда фойдали қазилмалар мавжуд жойларда ер ости бойликлари участкаларидан фойдаланиш ҳуқуқини берувчи лицензияга эга бўлмаган субъектлар томонидан ўзанларни тозалаш ишлари жараёнида ноқонуний тарзда қум-шағал материалларини қазиб олиш ишлари давом этмоқда.

Шу ўринда, тадбиркорлик субъектларига бундай ишларни амалга ошириш имкониятини бекор қилинганлиги уларнинг мавжуд техника ва жиҳозларининг ишламай туриб қолишига ва ички бозорда қум-шағал материалларининг нархи кескин ошиб кетишини юзага келтирмоқда.

Ўзбекистон Республикаси Фавқулодда вазиятлар вазирлигининг сел, тошқин ва ер кўчкиси хавфи бўлган ҳудудларда қирғоқни мустаҳкамлаш, ҳимоя қилиш ва тиклаш ишлари бўйича ихтисослаштирилган муҳандислик-техник отрядларига дарёлар ва сойлар ўзанларини тозалаш ишларининг юклатилиши тўпланиб қолган ушбу муаммоларни ҳал қилиш учун етарли бўлмаяпти.

Фаол тадбиркорликни ривожлантириш учун қулай шарт-шароитлар яратиш, дарё ўзанларини тозалаш жараёнида қонунчилик талаблари бузилишининг олдини олиш, бу соҳада давлат-хусусий ҳамкорлигини ривожлантириш, шунингдек, ички бозорни қум-шағал материаллари билан барқарор таъминлаш мақсадида:


1. Маълумот учун қабул қилинсинки, Ўзбекистон Республикаси Президентининг 2017 йил 25 сентябрдаги "Сув объектларини муҳофаза қилиш тизимини янада такомиллаштириш чора-тадбирлари тўғрисида"ги ПҚ-3286-сон қарори асосида:

дарёлар ўзанларини тозалаш ва қирғоқларни мустаҳкамлаш ишлари Ўзбекистон Республикаси Фавқулодда вазиятлар вазирлигининг сел, тошқин ва ер кўчкиси хавфи бўлган ҳудудларда қирғоқни мустаҳкамлаш, ҳимоя қилиш ва тиклаш ишлари бўйича ихтисослаштирилган муҳандислик-техник отрядлари томонидан амалга оширилади;

ушбу ишларга Ўзбекистон Республикаси Президентининг 2007 йил 19 февралдаги ПҚ-585-сонли қарори билан ташкил этилган тошқин сувлари ва сел оқимларини хавф-хатарсиз ўтказиб юборишни таъминлаш, кор кўчиш ва ер кўчки ҳодисалари хавфини камайтириш бўйича Ҳукумат комиссияси (кейинги ўринларда - Комиссия) қарори асосида бошқа ташкилотлар ҳам жалб этилиши мумкин.


2. Ўзбекистон Республикаси Фавқулодда вазиятлар вазирлигининг вазирлик ҳузурида дарёлар ўзанларини тозалаш жараёнида қум-шағал материалларини қазиб олиш бўйича буюртмачи сифатида "Хавфсиз дарё" давлат унитар корхонасини (кейинги ўринларда - "Хавфсиз дарё" ДУК) ташкил этиш тўғрисидаги таклифига розилик берилсин.


3. "Хавфсиз дарё" ДУКнинг асосий вазифалари этиб куйидагилар белгилансин:

дарё ўзанларини тозалаш жараёнида қум-шағал қазиб олиш ишларини олиб бориш учун лойиҳа ҳужжатларини ишлаб чиқиш. улар бўйича давлат экологик экспертизаси хулосасини олиш;

Ўзбекистон Республикаси Фавқулодда вазиятлар вазирлиги, Экология ва атроф-муҳитни муҳофаза қилиш давлат қўмитаси ҳамда Геология ва минерал ресурслар давлат қўмитаси ходимлари билан биргаликда доимий равишда жойларга чиққан холда дарёлар ўзанларини тозалаш ишлари олиб борилаётган участкалардаги ҳолатни ўрганиш;

шартнома асосида жалб этилган тадбиркорлик субъектлари томонидан дарёлар ўзанларини тозалаш ишлари натижасида олинган қум-шағал материаллари ҳажмининг ҳисобини юритиш;

Ўзбекистон Республикаси Фавқулодда вазиятлар вазирлиги билан биргаликда дарёлар ўзанларида қум-шағал материаллари тўпланиб қолган ва тозаланиши лозим бўлган участкалар рўйхатини тасдиқлаш учун Комиссияга киритиш.


4. Белгилаб қўйилсинки:

тўпланиб қолган қум-шағал материалларидан тозаланиши лозим бўлган дарё ўзанларининг рўйхати Ўзбекистон Республикаси Фавқулодда вазиятлар вазирлиги, Экология ва атроф-муҳитни муҳофаза қилиш давлат қўмитаси ҳамда Геология ва минерал ресурслар давлат қўмиталари ходимлари томонидан олиб борилган ўрганишлар натижалари бўйича шакллантирилади;

Комиссия томонидан тасдиқланадиган рўйхатдаги майдонларда дарёлар ўзанларини тозалаш ишларига тадбиркорлик субъектларини жалб қилиш "Хавфсиз дарё" ДУК томонидан "E-IJRO AUKSION" электрон савдо майдончаси орқали ўтказиладиган танлов йўли билан амалга оширилади;

дарё ўзанларини тозалашда фақат, қирғоқлар ювилишига ҳамда яқин ҳудудларни сув босишига сабаб бўлиши мумкин бўлган ва сув оқимларига тўсқинлик қилаётган ўзанда йиғилиб қолган қум-шағал материаллари ҳажмини қазиб олинишига рухсат этилади;

дарё ўзанларини тозалаш жараёнида қум-шағал материалларини қазиб олиш ишлари мавсумий тарзда, ер участкаларини ажратмаган холда амалга оширилади;

қум-шағал материалларини реализация қилишда тадбиркорлик субъектлари солиққа тортишнинг амалдаги тартибини сақлаб қолган ҳолда қазилма бойликлардан фойдаланганликлари учун ўрнатилган тартибда солиқ тўлайдилар;

дарё ўзанларини сифатли ва ўз вақтида тозаланишига "Хавфсиз дарё" ДУК масъулдир.


5. Белгилансинки:

Ўзбекистон Республикаси Фавқулодда вазиятлар вазирлиги "Хавфсиз дарё" ДУКнинг муассиси ҳисобланади;

"Хавфсиз дарё" ДУК директори ва унинг ўринбосари Фавқулодда вазиятлар вазири томонидан лавозимга тайинланади ва озод қилинади, ҳарбий хизматчи ҳисобланади хамда мақоми бўйича тегишли равишда Ўзбекистон Республикаси Фавқулодда вазиятлар вазирлиги марказий аппаратининг бошқарма бошлиғи ва унинг ўринбосари лавозимига тенглаштирилади.


6. "Хавфсиз дарё" ДУК ҳарбий хизматчилари қонунчиликда белгиланган озиқ-овқат, пул, кийим-кечак, турар жой таъминоти билан давлат бюджети маблағлари ҳисобидан таъминланиши, шунингдек, пенсия, тиббий таъминот ва бошқа ижтимоий кафолатлар хамда имтиёзлардан фойдаланиши белгилаб қўйилсин. Бунинг учун Ўзбекистон Республикаси Фавқулодда вазиятлар вазирлигига офицер таркибига кирувчи иккита қўшимча ҳарбий хизматчилар штат бирлиги ажратилсин.


7. "Хавфсиз дарё" ДУК директорига куйидаги ҳуқуқлар берилсин:

етарли даражадаги билим ва иш тажрибасига эга бўлган малакали мутахассисларни фуқаролик-ҳуқуқий шартнома асосида жалб қилиш;

Ўзбекистон Республикаси Фавқулодда вазиятлар вазирлиги билан келишилган холда ташкилий-штат тузилмасига ўзгартириш киритиш ва иш ҳажмидан келиб чиққан ҳолда юридик шахс мақомисиз, 4 нафардан ортиқ бўлмаган штат бирлиги билан ҳудудий бўлинмаларни ташкил этиш.


8. "Хавфсиз дарё" ДУК фаолиятини молиялаш манбалари этиб куйидагилар белгилансин:

"Хавфсиз дарё" ДУК билан тузилган шартномаларга асосан тадбиркорлик субъектлари томонидан дарё ўзанларини тозалаш натижасида олинган қум-шағал материалларининг (ишлов берилмаган) ҳар бир 1 куб.м. учун шартнома тузилган кунда амалда бўлган базавий ҳисоблаш миқдорининг икки фоизи миқдоридаги тўловлар;

қонун ҳужжатларида тақиқланмаган бошқа манбалар.


9. Белгилаб қўйилсинки, "Хавфсиз дарё" ДУКнинг пул маблағлари фақат қуйидагиларга:

"Хавфсиз дарё" ДУКни сақлаб туриш харажатларига;

тадбиркорлик субъектларини дарё ўзанларини тозалаш ишларига жалб қилиш билан боғлик харажатларга;

"Хавфсиз дарё" ДУК хамда Ўзбекистон Республикаси Фавқулодда вазиятлар вазирлигининг сел, сув тошқини ва кўчки хавфли ҳудудларда қирғоқ мустаҳкамлаш, ҳимоялаш ва тиклаш ишларини бажаришга ихтисослаштирилган муҳандислик-техник отрядларига юклатилган вазифаларни амалга ошириш доирасида моддий-техник таъминлашга йўналтирилади.


10. Ўзбекистон Республикаси Фавқулодда вазиятлар вазирлиги бошқа вазирлик ва идоралар билан биргаликда бир ой муддатда:

"Хавфсиз дарё" ДУК Уставини, ташкилий-штат тузилмасини, штат жадвалини, харажатлар сметасини тасдиқласин ва унинг белгиланган тартибда давлат рўйхатидан ўтказилишини таъминласин;

"Хавфсиз дарё" ДУКни хизмат хоналари, мебель, компьютерлар, алоқа, шунингдек, заруриятга кўра транспорт воситалари билан таъминласин;

"Хавфсиз дарё" ДУК фаолиятини самарали ташкил этишни юқори хамда профессионал даражада таъминлай оладиган малакали мутахассислар билан тўлдирилишини таъминласин.


11. Комиссия тўпланиб қолган қум-шағал материалларидан тозаланиши зарур бўлган дарёлар ва сойлар участкалари рўйхатини тасдиқлагач, уларни Ўзбекистон Республикаси Фавқулодда вазиятлар вазирлиги, Экология ва атроф-муҳитни муҳофаза қилиш давлат қўмитаси, Геология ва минерал ресурслар давлат қўмиталарининг расмий веб-сайтларида жойлаштирилишини таъминласин.


12. Ўзбекистон Республикаси Фавқулодда вазиятлар вазирлиги, Экология ва атроф-муҳитни муҳофаза қилиш давлат қўмитаси ҳамда Геология ва минерал ресурслар давлат қўмиталари дарёлар ўзанларининг тозаланиши бўйича амалга оширилаётган ишлар ҳамда мазкур ишлар натижасида олинган қум-шағал материаллари ҳисобга олиниши устидан қатъий назоратни ўрнатсин, шунингдек, тадбиркорлик субъектлари учун қум ва шағалнинг ўрнини босадиган мавжуд муқобил қурилиш тош қазилма жойларини тақдим қилиш бўйича зарур шароитлар яратсин.


13. Давлат ҳокимияти ва бошқарув органлари дарёларнинг ҳимоя зоналари, ўзанлари, кўллар, сув омборлари, каналлар, зовурлар, ва бошқа сув объектларини тозалаш ҳамда уларнинг қирғоқларини мустаҳкамлаш ишларида иштирок этиш истагини билдирган тадбиркорлик субъектларига ҳар томонлама кўмак кўрсатсин.


14. Фавқулодда вазиятлар вазирлиги:

а) бир ой муддатда Ўзбекистон Республикаси Молия вазирлиги билан биргаликда Фавқулодда вазиятлар вазирлиги марказий аппаратининг янгиланган штат жадвалини тасдиқласин;

б) 2018 нил якунлари бўйича, кейинчалик заруратга қараб, "Хавфсиз дарё" ДУКнинг фаолиятини ва дарё ўзанларини тозалаш ишлари самарадорлигини ошириш бўйича Ўзбекистон Республикаси Президенти Администрациясига таклифлар киритсин.

в) икки ой муддатда манфаатдор вазирлик ҳамда идоралар билан биргаликда Ўзбекистон Республикаси Вазирлар Маҳкамасига:

"E-IJRO AUKSION" электрон савдо майдончаси орқали тадбиркорлик субъектларини дарёлар ўзанларини тозалаш ишларига жалб қилиш тартибини тасдиқлаш бўйича ҳукумат қарори лойиҳасини;

қонун ҳужжатларига ушбу қарордан келиб чиқадиган ўзгартиш ва қўшимчалар тўғрисида таклифлар киритсин.


15. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Бош вазирининг биринчи ўринбосари - "Ўзбекистон темир йўллари" АЖ бошқаруви раиси А.Ж. Раматов ва Ўзбекистон Республикаси фавқулодда вазиятлар вазири вазифасини бажарувчиси Т.А. Худайбергенов зиммасига юклансин.



Ўзбекистон Республикаси Президенти                               Ш. Мирзиёев



Қонун ҳужжатлари маълумотлари миллий базаси (www.lex.uz),

2018 йил 11 июль


"Ўзбекистон Республикаси қонун ҳужжатлари тўплами",

2018 йил 16 июль, 28-сон, 575-модда