Ижтимоий аҳамиятга эга озиқ-овқат маҳсулотларини Ички истеъмол бозорида нарх-навони барқарорлаштиришга кўмаклашиш жамғармаси маблағлари ҳисобига харид қилиш тартиби тўғрисида Низом (ЎзР 30.07.2018 й. 596-сон қарорига илова)

Функция недоступна

Вазирлар Маҳкамасининг

2018 йил 30 июлдаги

596-сон қарорига

ИЛОВА

Ижтимоий аҳамиятга эга озиқ-овқат маҳсулотларини

Ички истеъмол бозорида нарх-навони барқарорлаштиришга

кўмаклашиш жамғармаси маблағлари ҳисобига

харид қилиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом ижтимоий аҳамиятга эга озиқ-овқат маҳсулотлари маҳаллий тайёрлов ташкилотлари томонидан Ички истеъмол бозорида нарх-навони барқарорлаштиришга кўмаклашиш жамғармаси (кейинги ўринларда Жамғарма деб аталади) маблағлари ҳисобига харид қилиниши тартибини белгилайди.

2. Ушбу Низомда қуйидаги асосий тушунчалардан фойдаланилади:

Республика комиссияси - Ўзбекистон Республикаси Президентининг "Республика аҳолисини ижтимоий аҳамиятга эга озиқ-овқат товарларининг асосий турлари билан ишончли таъминлашга оид кечиктириб бўлмайдиган чора-тадбирлар тўғрисида" 2017 йил 23 июндаги ПҚ-3082-сон қарорига мувофиқ ташкил этилган Ижтимоий аҳамиятга эга озиқ-овқат товарларининг асосий турларига нарх-навони мониторинг ва назорат қилиш республика комиссияси;

ҳудудий комиссиялар - Ўзбекистон Республикаси Президентининг "Республика аҳолисини ижтимоий аҳамиятга эга озиқ-овқат товарларининг асосий турлари билан ишончли таъминлашга оид кечиктириб бўлмайдиган чора-тадбирлар тўғрисида" 2017 йил 23 июндаги ПҚ-3082-сон қарорига мувофиқ Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида ташкил этилган Ижтимоий аҳамиятга эга озиқ-овқат товарларининг асосий турларига нарх-навони мониторинг ва назорат қилиш бўйича доимий фаолият юритадиган ҳудудий комиссиялар;

ижтимоий аҳамиятга эга озиқ-овқат маҳсулотлари - аҳоли истеъмолининг асосий рационини ташкил қиладиган, улар бўйича ички бозорда талаб ва таклифларнинг мавсумий ҳамда бошқа кескин ўзгаришлари кузатиладиган озиқ-овқат маҳсулотлари, биринчи навбатда, гўшт (мол гўшти, қўй гўшти, парранда гўшти), ўсимлик ва ҳайвон ёғи, шакар, ғалла, ун, картошка, сабзи, бошпиёз ва рўйхати Республика комиссияси томонидан тасдиқланадиган бошқа турдаги озиқ-овқат маҳсулотлари;

Тайёрлов ташкилотлари реестри - ижтимоий аҳамиятга эга озиқ-овқат маҳсулотларини сақлаш учун омборхоналарга ҳамда уларни Жамғарма маблағлари ҳисобига харид қилиш учун савдо шохобчаларига эга бўлган Ижтимоий аҳамиятга эга озиқ-овқат маҳсулотларини харид қилувчи, тайёрловчи, ғамловчи, сақловчи ва сотувчи ташкилотлар реестри;

тайёрлов ташкилотлари - Тайёрлов ташкилотлари реестрига киритилган ва ижтимоий аҳамиятга эга озиқ-овқат маҳсулотларини Жамғарма маблағлари ҳисобига харид қилувчи, тайёрловчи, ғамловчи, сақловчи ва сотувчи ташкилотлар;

буюртмачи - ижтимоий аҳамиятга эга озиқ-овқат маҳсулотларини Жамғарма маблағлари ҳисобидан харид қилувчи тайёрлов ташкилоти;

етказиб берувчи - харидларни амалга оширишга талабгор сифатида харид тартиботида иштирок этувчи Ўзбекистон Республикаси резиденти ва норезиденти бўлган харид тартиботлари иштирокчиси. Харид тартиботлари якунлари бўйича ғолиб деб топилган ва у билан харидларни амалга оширишга шартнома тузилган иштирокчи;

Жамғарма - Ўзбекистон Республикаси Вазирлар Маҳкамасининг махсус жамғармаси шаклида ташкил этиладиган ва ўз фаолиятини юридик шахс ташкил этмасдан амалга оширадиган ҳамда маблағларидан фақат Республика комиссиясининг қарорлари асосида фойдаланиладиган Ички истеъмол бозорида нарх-навони барқарорлаштиришга кўмаклашиш жамғармаси (Ўзбекистон Республикаси Президентининг "Республика аҳолисини ижтимоий аҳамиятга эга озиқ-овқат товарларининг асосий турлари билан ишончли таъминлашга оид кечиктириб бўлмайдиган чора-тадбирлар тўғрисида" 2017 йил 23 июндаги ПҚ-3082-сон қарорига мувофиқ).

3. Жамғарма маблағлари ҳисобига ижтимоий аҳамиятга эга озиқ-овқат маҳсулотларини харид қилиш, ички бозорда, биринчи навбатда, муҳим турдаги ижтимоий аҳамиятга эга озиқ-овқат маҳсулотлари учун талаб ва таклифларнинг мавсумий ва бошқа кескин ўзгариб туришини юмшатиш мақсадида амалга оширилади.

2-БОБ. ИЖТИМОИЙ АҲАМИЯТГА ЭГА

ОЗИҚ-ОВҚАТ МАҲСУЛОТЛАРИНИ ХАРИД ҚИЛИШДА

ИШТИРОК ЭТИШ УЧУН ТАЙЁРЛОВ ТАШКИЛОТЛАРИ

РЕЕСТРИНИ ШАКЛЛАНТИРИШ ТАРТИБИ

4. Ички бозордаги талаб ва таклифларнинг мавсумий ва бошқа кескин ўзгариб туришига нисбатан тезкор чоралар кўриш учун Ижтимоий аҳамиятга эга озиқ-овқат маҳсулотларини Жамғарма маблағлари ҳисобига харид қилиш бўйича тайёрлов ташкилотларининг мунтазам янгилаб бориладиган реестри Республика комиссияси томонидан олдиндан шакллантирилади.

5. Тайёрлов ташкилотлари реестрини шакллантириш ва тизимли равишда юритиш ҳудудий комиссиялар томонидан тақдим этиладиган материаллар асосида Республика комиссияси томонидан амалга оширилади.

Тайёрлов ташкилотлари реестри ҳудудий комиссиялар таклифлари ҳисобга олинган ҳолда ҳар ойда жорий ойнинг 5-кунигача янгиланади.

6. Республика комиссияси Тайёрлов ташкилотлари реестрини шакллантириш учун ҳар йили январь ойида Ўзбекистон Республикаси Ягона интерактив давлат хизматлари порталида ва xarid.uz давлат харидлари ахборот порталида ижтимоий аҳамиятга эга озиқ-овқат маҳсулотлари харидида иштирок этишга Тайёрлов ташкилотлари реестрига киритиш учун тайёрлов ташкилотини танлаш бўйича танлов ўтказилиши тўғрисидаги эълонни жойлаштиради.

Тайёрлов ташкилотларини танлаш бўйича танлов ўтказилиши тўғрисидаги эълон танлов ўтказилиши ва тайёрлов ташкилотларидан таклифларни қабул қилиш муддати тамом бўлиши санасидан камида ўн кун олдин жойлаштирилади.

Эълонда қуйидаги маълумотлар бўлиши керак:

товарнинг батафсил тавсифи ва нархи;

тайёрлов ташкилотларига қўйиладиган талаблар;

тайёрлов ташкилоти билан алоқа қилиш учун алоқа қилувчи шахслар сифатида белгиланган бир ёки бир неча мансабдор шахсларнинг фамилияси, исми ва отасининг исми, лавозими ва манзили;

зарур ҳужжатларнинг қоидаларини тушунтиришга сўров бериш шакли;

таклифлар билдирилган буюртманомаларни бериш муддати тамом бўлиши санаси ва вақти.

Эълонда қонун ҳужжатларига зид бўлмаган бошқа маълумотлар ҳам бўлиши мумкин.

7. Тайёрлов ташкилотлари Тайёрлов ташкилотлари реестрига киритиш мақсадида тайёрлов ташкилотларини танлаш бўйича танловда иштирок этиш учун ҳудудий комиссияларга қуйидаги ҳужжатларни тақдим этади:

Республика комиссияси тасдиқлаган шаклдаги ариза;

ҳисоб-китоб рақами ҳолати тўғрисида маълумотнома;

улгуржи савдони амалга ошириш ҳуқуқига лицензия мавжудлиги тўғрисида маълумот;

талабгорда ижтимоий аҳамиятга эга озиқ-овқат маҳсулотларини тегишли равишда сақлаш ва сотиш учун ўзининг ёки ижарага олинган омборхоналари ҳамда савдо шохобчаларининг мавжудлигини тасдиқловчи ҳужжат;

шартномаларни ижро этиш учун зарур техник, молиявий, моддий, кадрлар ресурслари ва бошқа ресурслар мавжудлигини тасдиқлайдиган ҳужжат.

Тақдим этилган маълумотларнинг ишончлилиги ва тўлиқлиги учун тайёрлов ташкилотлари жавоб беради.

Таклифлар билдирилган буюртманомаларни қабул қилиш Ўзбекистон Республикаси Ягона интерактив давлат хизматлари порталида эълон қилинган эълонда кўрсатилган муддат бошлангандан кейин тўхтатилади.

8. Озиқ-овқат маҳсулотлари харидларида иштирок этиш учун тайёрлов ташкилотларининг таклифларини ҳудудий комиссиялар томонидан кўриб чиқиш ва баҳолаш муддати таклифлар бериш тамом бўлган пайтдан бошлаб уч кундан ортиқ бўлмаслиги керак.

9. Тайёрлов ташкилотларининг таклифларини кўриб чиқиш ва баҳолаш қуйидаги мезонлар асосида амалга оширилади:

шартномаларни ижро этиш учун талабгорда зарур техник, молиявий, моддий, кадрлар ресурслари ва бошқа ресурсларнинг мавжудлиги;

талабгорда солиқлар ва бошқа мажбурий тўловларни тўлаш бўйича қарздорликнинг йўқлиги;

талабгорда ижтимоий аҳамиятга эга озиқ-овқат маҳсулотларини тегишли равишда сақлаш ва сотиш учун ўзининг омборхоналари ёки ижарага олинган омборлар ҳамда савдо шохобчаларининг мавжудлиги.

Ушбу бандда кўрсатилган мезонлар ҳисобга олинган ҳолда шартномаларни ижро этиш учун энг яхши шарт-шароитларни таклиф этган тайёрлов ташкилоти ғолиб деб эътироф этилади.

Бир неча тайёрлов ташкилотларидан тенг қийматли таклифлар тушган тақдирда ижтимоий аҳамиятга эга озиқ-овқат маҳсулотлари харидларида иштирок этиш учун биринчи бўлиб ариза берган тайёрлов ташкилотига устунлик берилади.

Таклифларни кўриб чиқиш ва баҳолаш натижалари ҳудудий комиссиянинг баённомасида қайд этилади.

Таклифларни кўриб чиқиш ва баҳолаш баённомасида:

тайёрлов ташкилотларининг таклифларини кўриб чиқиш ва баҳолаш санаси ва вақти;

таклифларни кўриб чиқиш ва баҳолашда қатнашган ҳудудий комиссия аъзолари ва тайёрлов ташкилотларининг ваколатли вакиллари таркиби;

таклифлари кўриб чиқилган тайёрлов ташкилотлари рўйхати;

рад этишнинг аниқ сабаблари кўрсатилган ҳолда таклифлари рад этилган тайёрлов ташкилотлари рўйхати;

тайёрлов ташкилотларини танлаш бўйича қабул қилинган қарор;

танлаб олинган тайёрлов ташкилотларининг тўлиқ номи, жойлашган жойи тўғрисидаги маълумотлар бўлиши керак.

Таклифларни кўриб чиқиш ва баҳолаш баённомаси ҳудудий комиссиянинг барча аъзолари томонидан имзоланади ва ундан кўчирма у имзоланган кундан бошлаб уч иш куни мобайнида махсус ахборот веб-порталида эълон қилинади.

Тайёрлов ташкилотлари таклифларни кўриб чиқиш ва баҳолаш баённомаси эълон қилингандан кейин тегишли ҳудудий комиссияга танлов натижалари бўйича тушунтириш бериш тўғрисидаги сўровни юбориш ҳуқуқига эгадирлар. Бундай сўров тушган санадан бошлаб уч иш куни мобайнида ҳудудий комиссия тайёрлов ташкилотига ўз танлови асосланган тегишли тушунтиришни тақдим этиши шарт.

10. Баҳолаш якунлари бўйича ҳудудий комиссия уч кун мобайнида ижтимоий аҳамиятга эга озиқ-овқат маҳсулотларини харид қилиш ва сотиш бўйича тайёрлов ташкилотлари рўйхатини шакллантиради ва тасдиқлайди ҳамда уни Республика комиссиясига тақдим этади.

11. Республика комиссияси ҳудудий комиссияларнинг таклифлари асосида икки кун мобайнида ижтимоий аҳамиятга эга озиқ-овқат маҳсулотларини харид қилувчи ва сотувчи Тайёрлов ташкилотлари реестрини шакллантиради.

Тайёрлов ташкилоти танлов натижалари бўйича ҳудудий ёки республика комиссияларининг қарорига рози бўлмаган тақдирда ҳудудий ёки республика комиссияларининг қарори устидан қонун ҳужжатларида белгиланган тартибда шикоят қилиш ҳуқуқига эгадир.

3-БОБ. ИЖТИМОИЙ АҲАМИЯТГА ЭГА

ОЗИҚ-ОВҚАТ МАҲСУЛОТЛАРИГА БЎЛГАН

ЭҲТИЁЖНИ ШАКЛЛАНТИРИШ ТАРТИБИ

12. Ҳудудий комиссиялар ижтимоий аҳамиятга эга озиқ-овқат маҳсулотларининг амалдаги ва кутилаётган нархлари мониторингини олиб бориш доирасида ҳар куни ички бозордаги нархларнинг жорий ҳолатини ҳамда омборхоналарда сақланаётган ва савдо ташкилотларидаги (савдо шохобчаларидаги) маҳсулотлар қолдиғини ўрганадилар. Мониторинг натижаларига кўра Республика комиссиясига келгуси давр учун ижтимоий аҳамиятга эга озиқ-овқат маҳсулотларига прогноз қилинаётган нархлар ва эҳтиёж бўйича асосланган таклифларни ҳар ўн кунда тақдим этади, ички ва ташқи бозорларда уларни харид қилиш рўйхати ва ҳажмларини белгилайди.

13. Республика комиссияси келгуси даврга ижтимоий аҳамиятга эга озиқ-овқат маҳсулотларининг прогнозлаштирилаётган нархлари ва уларга бўлган эҳтиёж бўйича ҳудудий комиссияларнинг таклифлари олингандан кейин икки кун мобайнида Ўзбекистон Республикаси Ташқи савдо вазирлигига импорт контрактлар бўйича харид қилинадиган ижтимоий аҳамиятга эга озиқ-овқат маҳсулотлари рўйхатини тақдим этади.

14. Ўзбекистон Республикаси Ташқи савдо вазирлиги Савдо-саноат палатаси билан биргаликда ижтимоий аҳамиятга эга озиқ-овқат маҳсулотлари рўйхати олинган кундан бошлаб уч кун мобайнида Республика комиссиясига ижтимоий аҳамиятга эга озиқ-овқат маҳсулотларини Жамғарма маблағлари ҳисобига импорт контрактлар бўйича етказиб беришга нархлар бўйича тавсияларни тақдим этади.

Жаҳон бозорида товарлар нархлари конъюнктурасини ўрганиш Ўзбекистон Республикаси Ташқи савдо вазирлиги томонидан:

бошқа хорижий ишлаб чиқарувчи ташкилотлардан ёки маҳаллий экспорт қилувчи корхоналардан ёзма шаклда олинган шунга ўхшаш маҳсулотлар нархлари тўғрисидаги маълумотлар;

расмий оммавий ахборот воситаларида эълон қилинган экспорт қилинадиган маҳсулотга жаҳон нархлари даражаси тўғрисидаги маълумотлар;

товар-хомашё биржалари, турли агентликлар, консалтинг ташкилотлари, махсус ваколатли органлардан ва жаҳон нархлари тўғрисидаги маълумотларни тўплаш ва эълон қилиш билан шуғулланувчи бошқа юридик шахслардан ёзма шаклда олинган хулосалар ёки маълумотлар асосида амалга оширилади.

15. Республика комиссияси ҳудудий комиссиялар раҳбарлари тақдим этган нархлар ва ҳажмлар бўйича таклифларни кўриб чиқиб, Ўзбекистон Республикаси Ташқи савдо вазирлиги тавсияларини ҳисобга олиб Жамғарма маблағлари ҳисобига харид қилинадиган ижтимоий аҳамиятга эга озиқ-овқат маҳсулотлари рўйхатини ушбу маҳсулотлар ҳажмлари ва харид қилиш бозорларини (ички ва ташқи) кўрсатган ҳолда тасдиқлайди, ижтимоий аҳамиятга эга озиқ-овқат маҳсулотларининг режалаштирилаётган хариди тўғрисидаги ахборотни Ўзбекистон Республикаси Ягона интерактив давлат хизматлари порталида ва xarid.uz давлат харидлари ахборот порталида жойлаштиради.

4-БОБ. ИЖТИМОИЙ АҲАМИЯТГА ЭГА

ОЗИҚ-ОВҚАТ МАҲСУЛОТЛАРИНИ

ХАРИД ҚИЛИШ ТАРТИБИ

16. Ижтимоий аҳамиятга эга озиқ-овқат маҳсулотлари Жамғарма маблағлари ҳисобига ушбу Низомга иловага мувофиқ схема бўйича харид қилинади.

17. Ижтимоий аҳамиятга эга озиқ-овқат маҳсулотлари ички ва ташқи бозорларда Жамғарма маблағлари ҳисобига харид қилинади.

Ички бозорда қишлоқ хўжалиги маҳсулотлари қиш-баҳор даврига ғамлаш учун етказиб берувчилар ва тайёрлов ташкилотлари ўртасида тузилган шартномалар (контрактлар) асосида харид қилинади.

Қишлоқ хўжалиги маҳсулотлари қиш-баҳор даврига ғамлаш учун деҳқон ва шахсий ёрдамчи хўжаликлардан Ўзбекистон Республикаси Президентининг 2017 йил 30 ноябрдаги ПҚ-3418-сон қарори билан тасдиқланган "Ўзбекозиқовқатзахира" уюшмаси ташкилотлари томонидан деҳқон ва шахсий ёрдамчи хўжаликлардан қишлоқ хўжалиги маҳсулотларини харид қилиш тартиби тўғрисидаги низом талабларига мувофиқ харид қилинади.

Ижтимоий аҳамиятга эга озиқ-овқат маҳсулотлари Жамғарма маблағлари ҳисобига фақат товар-хомашё биржалари, шу жумладан, хорижий биржаларнинг очиқ электрон савдолари тизими орқали импорт қилинади.

18. Ижтимоий аҳамиятга эга озиқ-овқат маҳсулотларини харид қилиш учун Жамғарма маблағлари тайёрлов ташкилотлари ва хизмат кўрсатувчи тижорат банклари билан уч томонлама шартномалар тузиш асосида ҳамда ушбу шартномаларда қарзни қоплаш жадваллари ва тайёрлов ташкилотларига хизмат кўрсатувчи банкларнинг қарзни қайтариш бўйича кафолатлари назарда тутилган ҳолда Ўзбекистон Республикаси Молия вазирлиги томонидан фоизсиз қарз шаклида ажратилади.

Бунда ички етказиб берувчилар учун тўловлар миллий валютада, ижтимоий аҳамиятга эга озиқ-овқат маҳсулотларини импорт қилишда эса АҚШ долларида тўланади.

19. Қарзлар Жамғармага тайёрлов ташкилотлари томонидан фоизсиз қарз ажратиш тўғрисидаги уч томонлама шартномаларнинг ажралмас қисми ҳисобланган ўзаро келишилган жадвалларга мувофиқ қайтарилади. Қоплаш жадвалларида, қоидага кўра, харид қилинган ижтимоий аҳамиятга эга озиқ-овқат маҳсулотларини сотиш учун рухсатнома олинган санадан бошлаб 30 кун мобайнида қарзни қоплаш назарда тутилиши керак.

Валютадаги қарз Ўзбекистон Республикаси Марказий банкининг қарзни қайтариш санасидаги курси бўйича миллий валютада қайтарилади.

5-БОБ. ИЖТИМОИЙ АҲАМИЯТГА ЭГА

ОЗИҚ-ОВҚАТ МАҲСУЛОТЛАРИНИ ТОВАР-ХОМАШЁ

БИРЖАЛАРИНИНГ ОЧИҚ ЭЛЕКТРОН САВДОЛАР

ТИЗИМИ ОРҚАЛИ ХАРИД ҚИЛИШ ТАРТИБИ

20. Ижтимоий аҳамиятга эга озиқ-овқат маҳсулотларини Жамғарма маблағлари ҳисобига товар-хомашё биржаларининг очиқ электрон савдолар тизими орқали харид қилиш давлат харидларини ташкил этиш ва ўтказиш учун белгиланган қонун ҳужжатлари талабларига мувофиқ амалга оширилади.

21. Ижтимоий аҳамиятга эга озиқ-овқат товарини етказиб беришга маҳаллий товар-хомашё биржаларининг очиқ электрон савдоларида таклифлар бўлмаган тақдирда буюртмачи ижтимоий аҳамиятга эга озиқ-овқат маҳсулотларини хорижий биржаларнинг очиқ электрон савдоларида сотиб олиш ҳуқуқига эгадир.

6-БОБ. ИЖТИМОИЙ АҲАМИЯТГА ЭГА

ОЗИҚ-ОВҚАТ МАҲСУЛОТЛАРИНИ

СОТИШ ТАРТИБИ

22. Жамғарма маблағлари ҳисобидан харид қилинган ижтимоий аҳамиятга эга озиқ-овқат маҳсулотлари тайёрлов ташкилотлари томонидан ички бозордаги нархлар конъюнктураси ҳисобга олинган ҳолда Республика комиссияси белгилайдиган нархлар бўйича сотилади.

23. Жамғарма маблағлари ҳисобига харид қилинган ижтимоий аҳамиятга эга озиқ-овқат маҳсулотлари фақат Тайёрлов ташкилотлари реестрига киритилган савдо шохобчаларида сотилади.

7-БОБ. ЯКУНЛОВЧИ ҚОИДАЛАР

24. Жамғармага маблағларини ўз вақтида қайтариш бўйича жавобгарлик фоизсиз қарз бўйича тузилган шартномалар шартларига мувофиқ тегишли тайёрлов ташкилотларига юкланади.

25. Тайёрлов ташкилотлари фоизсиз қарз ажратиш тўғрисида тузилган шартномаларга мувофиқ Жамғарманинг мақсадли маблағларини қайтариш билан боғлиқ ўз мажбуриятларини бажармаганда ёки тегишли равишда бажармаганда Ўзбекистон Республикаси Молия вазирлигига қарздорларнинг барча банк ҳисоб рақамларидаги маблағлари ҳисобига қарзларни ва пеняни ҳисобдан чиқариш учун устувор ҳуқуқ берилади, қонунчиликка мувофиқ даъво тақдим этиш мумкин бўлмаган қарздорлар бундан мустасно. Бунда тайёрлов ташкилотларига нисбатан қонунчиликка мувофиқ асосий ҳисоб-китоб рақамига инкасса талаблари қўйилади.

26. Ўзбекистон Республикаси Молия вазирлигининг Давлат молия назорати бош бошқармаси Жамғарманинг ажратилган маблағларидан қатъий мақсадли фойдаланиш белгиланган тартибда назорат қилинишини таъминлайди.

27. Ушбу Низом талаблари бузилишида айбдор бўлган шахслар қонун ҳужжатларига мувофиқ жавоб берадилар.

Низомга

ИЛОВА

Ижтимоий аҳамиятга эга озиқ-овқат маҳсулотларини

Ички истеъмол бозорида нарх-навони барқарорлаштиришга

кўмаклашиш жамғармаси маблағлари ҳисобига харид қилиш

СХЕМАСИ

   

Қонун ҳужжатлари маълумотлари миллий базаси (www.lex.uz),

2018 йил 1 август

"Ўзбекистон Республикаси қонун ҳужжатлари тўплами",

2018 йил 6 август, 31-сон, 646-модда