Ўзбекистон Республикаси Вазирлар Маҳкамасининг 30.03.2019 й. 271-сон "Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги ҳамда Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлигининг узум етиштирувчилар ва вино тайёрловчиларни қўллаб-қувватлаш жамғармаси тўғрисидаги низомларни тасдиқлаш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

30.03.2019 й.

N 271

ЎЗБЕКИСТОН РЕСПУБЛИКАСИ

ҚИШЛОҚ ХЎЖАЛИГИ ВАЗИРЛИГИ ҲУЗУРИДАГИ

УЗУМЧИЛИК ВА ВИНОЧИЛИКНИ РИВОЖЛАНТИРИШ

АГЕНТЛИГИ ҲАМДА ЎЗБЕКИСТОН РЕСПУБЛИКАСИ

ҚИШЛОҚ ХЎЖАЛИГИ ВАЗИРЛИГИ ҲУЗУРИДАГИ

УЗУМЧИЛИК ВА ВИНОЧИЛИКНИ РИВОЖЛАНТИРИШ

АГЕНТЛИГИНИНГ УЗУМ ЕТИШТИРУВЧИЛАР ВА

ВИНО ТАЙЁРЛОВЧИЛАРНИ ҚЎЛЛАБ-ҚУВВАТЛАШ

ЖАМҒАРМАСИ ТЎҒРИСИДАГИ НИЗОМЛАРНИ

ТАСДИҚЛАШ ҲАҚИДА

Ўзбекистон Республикаси Президентининг "Алкоголь ва тамаки маҳсулотларини ишлаб чиқариш ва уларнинг айланмасини давлат томонидан тартибга солишни такомиллаштириш ҳамда узумчилик ва виночиликни ривожлантиришга доир чора-тадбирлар тўғрисида" 2019 йил 5 февралдаги ПФ-5656-сон Фармонига ҳамда Ўзбекистон Республикаси Президентининг "Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги фаолиятини ташкил этиш тўғрисида" 2019 йил 5 февралдаги ПҚ-4161-сон қарорига мувофиқ Вазирлар Маҳкамаси ҚАРОР ҚИЛАДИ:

1. Қуйидагилар:

Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги тўғрисидаги низом 1-иловага мувофиқ;

Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлигининг Узум етиштирувчилар ва вино тайёрловчиларни қўллаб-қувватлаш жамғармаси тўғрисидаги низом 2-иловага мувофиқ тасдиқлансин.

2. Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги:

"Энология лабораторияси" давлат унитар корхонаси ва "Узумчилик ўқув маркази" давлат унитар корхонаси уставларини икки ой муддатда ишлаб чиқсин ва белгиланган тартибда тасдиқласин, шунингдек, уларнинг қонун ҳужжатларида белгиланган тартибда давлат рўйхатидан ўтказилишини таъминласин;

Узум етиштирувчилар ва вино тайёрловчиларни қўллаб-қувватлаш жамғармаси маблағлари ҳисобига "Энология лабораторияси" давлат унитар корхонаси зарур замонавий лаборатория анжомлари билан жиҳозланишини ва миллий даражада аккредитациядан ўтказилишини, шунингдек, узум, мевалар ва резаворлардан алкоголли маҳсулотларни ишлаб чиқариш бўйича тажриба ишлаб чиқариши ташкил этилишини таъминласин;

соҳа ташкилотларининг коллекциялари ҳисобига Ўзбекистон вино коллекциясини яратсин ҳамда ҳар йили унинг соҳа ташкилотлари маҳсулотлари билан тўлдирилишини таъминласин.

3. Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги Тошкент кимё-технология институти, Академик М.Мирзаев номидаги узумчилик, виночилик ва боғдорчилик илмий-тадқиқот институти ва Давлат активларини бошқариш агентлиги билан биргаликда икки ой муддатда Ўзбекистон Республикаси Вазирлар Маҳкамасига "Энология лабораторияси" давлат унитар корхонаси ҳузурида узумнинг техник навлари плантациясини яратиш, шунингдек, "Виночилик технологияси ва саноат узумчилиги" факультети талабалари, Тошкент кимё-технология институти ҳузуридаги Виночилик соҳаси мутахассисларининг малакасини ошириш ва қайта тайёрлаш маркази тингловчилари учун ўқув ва ишлаб чиқариш амалиётини ташкил этиш юзасидан таклифлар киритсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича маслаҳатчиси А.Д. Вахабов ва Ўзбекистон Республикаси қишлоқ хўжалиги вазири Ж.А. Ходжаев зиммасига юклансин.

Ўзбекистон Республикасининг Бош вазири                                                 А. Арипов

Қонун ҳужжатлари маълумотлари миллий базаси (www.lex.uz),

2019 йил 1 апрель