Ташқи реклама объектларини (конструкцияларини) ер участкалари, давлат мулки бўлган бино ва иншоотларда қуриш ҳуқуқини электрон аукцион орқали сотиш тартиби тўғрисида Низом (ЎзР ВМ 20.02.2020 й. 104-сон қарорига 3-илова)

Функция недоступна

Вазирлар Маҳкамасининг

2020 йил 20 февралдаги

104-сон қарорига

3-ИЛОВА

Ташқи реклама объектларини (конструкцияларини) ер

участкалари, давлат мулки бўлган бино ва иншоотларда

қуриш ҳуқуқини электрон аукцион орқали

сотиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом ташқи реклама объектларини (конструкцияларини) ер участкалари, давлат мулки бўлган бино ва конструкцияларда қуриш ҳуқуқини юридик ва жисмоний шахсларга электрон аукционлар орқали сотиш тартибини белгилайди.

2. Ушбу Низомда қуйидаги асосий тушунчалар қўлланилади:

балансда сақловчи - балансида давлатга қарашли бино ёки иншоот мавжуд бўлган ҳамда унга ташқи реклама объектларини (конструкцияларини) қуриш ҳуқуқи тақдим этилган юридик шахс;

закалат - электрон савдоларда иштирок этиш учун талабгорлар томонидан бошланғич нархнинг 20 фоизи миқдорида тўланадиган маблағ;

ташқи реклама объектларини (конструкцияларини) қуриш ҳуқуқи - ер участкалари, давлат мулки бўлган бино ва иншоотларда ташқи реклама объектларини (конструкцияларини) қуриш учун аукцион савдолари орқали сотиб олинган ҳуқуқ;

ваколатли орган - туман (шаҳар) ҳокимлиги;

бошланғич нарх - ташқи реклама объектларини (конструкцияларини) қуриш ҳуқуқини аукционга қўйишда ваколатли орган белгилайдиган нарх;

оператор - "E-IJRO AUKSION" ягона электрон савдо майдончасида электрон онлайн-аукционларни ташкил этиш ва ўтказиш ваколати берилган "Электрон онлайн-аукционларни ташкил этиш маркази" давлат унитар корхонаси;

реклама жойининг паспорти - ташқи реклама объекти (конструкцияси) ва унинг эгаси тўғрисидаги маълумотларни ўз ичига олган белгиланган шаклдаги ҳужжат;

ғолиб - ташқи реклама объектларини (конструкцияларини) қуриш ҳуқуқи учун энг юқори нархни таклиф этган аукцион қатнашчиси;

харидор - ташқи реклама объектларини (конструкцияларини) қуриш ҳуқуқи бўйича ваколатли орган билан шартнома (кейинги ўринларда шартнома деб аталади) тузган аукцион ғолиби;

талабгор - аукционда иштирок этиш ниятини билдирган ва операторнинг ихтисослаштирилган веб-порталида ушбу Низом билан белгиланган тартибда рўйхатдан ўтказилган нодавлат юридик ёки жисмоний шахс (Ўзбекистон Республикасининг резиденти ёки норезиденти);

ихтисослаштирилган веб-портал (кейинги ўринларда веб-портал деб аталади) - Интернет бутунжаҳон ахборот тармоғида жойлашган, ваколатли органнинг ташқи реклама объектларини жойлаштириш ҳуқуқларини электрон ахборот базасига (кейинги ўринларда ахборот базаси деб аталади) ягона кириш нуқтасини тақдим этувчи ресурс;

лот - ташқи реклама объектларини (конструкцияларини) қуриш ҳуқуқини электрон аукцион савдосига қўйиш;

электрон савдо майдончасининг техник узилиши - электрон онлайн-аукционда қатнашувчилардан бирининг иштирок этишига ёки оператор ходим томонидан электрон онлайн-аукционни ўтказишга хизмат кўрсатишда техник имкониятларни амалга оширишга тўсқинлик қилувчи электрон савдо майдончасидаги техник носозликлар;

иштирокчи - аукционда иштирок этишга қўйилган талабгор;

электрон савдо майдончаси (кейинги ўринларда савдо майдончаси деб аталади) - аукцион ташкил этиш ва ўтказиш учун зарур бўлган ахборотни киритиш, сақлаш ва унга ишлов бериш имкониятини ҳамда манфаатдор шахсларнинг электрон онлайн-аукционлар (танловлар) жараёнларига бевосита кириш имкониятини таъминлайдиган ахборот тизими;

электрон аукцион (кейинги ўринларда аукцион деб аталади) - харидорни мусобақа асосида аниқлаш бўйича веб-порталда ўтказиладиган савдолар шакли, бунда ташқи реклама объектларини (конструкцияларини) қуриш ҳуқуқига оммавий тарзда энг катта нархни таклиф этган иштирокчи эга бўлади;

электрон ҳужжат - электрон шаклда қайд этилган, электрон рақамли имзо (кейинги ўринларда ЭРИ деб аталади) билан тасдиқланган ахборот. Электрон ҳужжат битимни амалга оширишнинг исботи сифатида қўлланиши мумкин.

3. Ваколатли орган ва балансда сақловчи ташқи реклама объектини (конструкциясини) жойлаштириш ҳуқуқи харидорга берилгунга қадар давлат мулки бўлган бино ва иншоотларнинг сақланишини таъминлайдилар ва улар тўғрисидаги маълумотларнинг тўғрилиги учун жавобгар бўладилар.

4. Оператор электрон онлайн-аукционни ташкил этиш хизматлари учун ташқи реклама объектларини (конструкцияларини) жойлаштириш ҳуқуқини сотиш қийматининг 1 фоизи миқдорида мукофот олади.

5. Ташқи реклама объектларини (конструкцияларини) қуриш ҳуқуқини "Е-IJRO AUKSION" ягона электрон савдо майдончасида электрон аукционлар орқали сотишнинг бошланғич нархи қуйидаги тартибда аниқланади:

ер участкалари учун тегишли ҳудудда белгиланган ер солиғининг 10 баробари миқдоридан кам бўлмаган миқдорда кўзда тутилган фойдаланиш муддатининг ҳар бир йили учун;

давлат мулки бўлган бино ва иншоотлар учун - бино ва иншоотнинг фасад қисми ҳамда периметри майдонинининг ҳар 1 кв. метри учун, шунингдек, бино ва иншоотларда ўрнатиладиган хар бир реклама пешлавҳаси учун ўрнатилган минимал ставкалардан кам бўлмаган миқдорда кўзда тутилган фойдаланиш муддатининг ҳар бир йили учун.

2-БОБ. АУКЦИОННИ ТАШКИЛ ЭТИШ

ВА ЎТКАЗИШ

6. Ваколатли орган аукцион савдоларни ўтказиш учун:

оператор билан веб-порталда савдоларни ўтказиш бўйича электрон хизматлар кўрсатишга шартнома тузади;

аукцион ўтказилишидан камида ўттиз кун олдин Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлигининг даврий матбуот нашрларида ҳамда расмий веб-сайтида аукцион тўғрисида эълон қилади;

операторнинг веб-порталида маълумотларни жойлаштириш учун электрон ҳужжатлар билан таъминлайди;

қонун ҳужжатларига мувофиқ бошқа функцияларни амалга оширади.

7. Оператор ваколатли орган билан тузилган веб-порталда савдоларни ўтказиш бўйича электрон хизматларни кўрсатиш тўғрисидаги шартномага мувофиқ қуйидагиларни амалга оширади:

ушбу Низомга мувофиқ талабгорлар орасидан аукцион иштирокчиларининг рўйхатини шакллантириш;

"E-IJRO AUKSION" веб-порталида электрон аукцион тўғрисидаги хабарномани ундан 30 кун олдин эълон қилиш;

веб-порталда эълон қилинган пайтдан бошлаб ташқи реклама объектларини (конструкцияларини) қуриш ҳуқуқини бериш бўйича қўшимча маълумот олиш учун юридик ва жисмоний шахсларнинг илтимосларига биноан аукцион тўғрисида хабарномани тақдим этиш;

аукцион натижалари тўғрисидаги ахборотни у ўтказилган кундан бошлаб бир иш куни ичида веб-порталда эълон қилиш;

закалатларни қабул қилиш ва аукцион иштирокчиларига қайтариш ва ваколатли органга аукционда ғолиб бўлган иштирокчининг закалатини ўтказиш (савдолар операторининг хизмат ҳақи чегирилган ҳолда);

электрон ҳужжатларни ва электрон хабарларни, шу жумладан, электрон савдолар иштирокчиларининг хабарларини сақлаш;

электрон савдоларни ўтказишда электрон ҳужжатларнинг ва электрон хабарларнинг айланиши билан боғлиқ бўлган бошқа функциялар.

8. Оператор ваколатли орган ва харидор ўртасида аукцион баённомаси асосида тузилган шартномада томон сифатида қатнашмайди.

9. Оператор:

электрон ҳужжатларга, электрон хабарларга ва шахсий маълумотларга рухсат этилмаган киришдан ҳимояланиш чораларини кўришга;

қонун ҳужжатларида назарда тутилган ҳоллардан ташқари, электрон ҳужжатлар ва электрон хабарларни учинчи шахсларга ошкор қилмасликка;

ахборот тизимларида мавжуд бўлган ахборотнинг бутунлиги ва махфийлигини таъминлашга мажбурдир.

Оператор электрон хизматлар кўрсатилиши бўйича аукцион ўтказиш шартномаси ва амалдаги қонун ҳужжатларига мувофиқ бошқа мажбуриятларни ҳам олиши мумкин.

10. Оператор электрон ҳужжатлар таркиби билан боғлиқ ҳуқуқий оқибатлар ва электрон савдо субъектларининг электрон хабарлари учун жавобгар бўлмайди.

11. Электрон аукционда иштирок этиш учун аризалар операторнинг веб-порталида автоматик режимда билдиришнома жойлаштирилган кундан бошлаб қабул қилинади ва буюртманомаларни қабул қилиш электрон аукцион бошланиши билан якунланади.

12. Талабнома электрон кўринишда тақдим этилади ва ЭРИ билан тасдиқланади.

13. Оператор аукционда иштирок этиш учун электрон аризаларнинг (кейинги ўринда электрон ариза деб аталади) ва уларга илова қилинадиган электрон ҳужжатларнинг сақланиши ҳамда уларнинг махфийлигини таъминлайди.

14. Аукцион давомида электрон савдо майдончасининг техник узилиши юзага келган ҳолда, оператор ушбу техник узилиш мавжудлиги ҳолатини веб-портал саҳифасида қайд этади, барча аукцион иштирокчиларини веб-порталда ахборотни жойлаштириш, электрон почта ва (ёки) СМС-хабарлар орқали бу ҳақда хабардор қилади.

Иштирокчининг компьютер ва (ёки) телекоммуникация жиҳозида техник узилиш бўлганда аукцион давом эттирилади.

Аукцион ўтказилишига тўсқинлик қиладиган веб-портал техник узилиши ҳолати мавжуд бўлган тақдирда, оператор бу ҳақда ваколатли органни хабардор қилади ва аукцион техник узилиш бартараф этилган кундан кейинги иккинчи иш кунига кўчирилади, аукционда иштирок этган иштирокчиларни ушбу аукционни давом эттириш санаси ва вақти тўғрисида веб-порталда ахборотни жойлаштириш орқали электрон почта ва (ёки) СМС-хабарлар орқали мажбурий тартибда олдиндан хабардор қилади.

15. Ваколатли орган томонидан аукцион тўғрисида хабар эълон қилинишидан олдин, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари операторга электрон кўринишда давлат мулки бўлган ер участкаларида, бино ва иншоотларда ташқи реклама объектларини (конструкцияларини) жойлаштириш ҳуқуқини келгусида электрон савдода амалга ошириш учун қуйидагиларни тақдим этади:

ташқи реклама объектларининг (конструкцияларининг) турлари ва кўриниши, асосий дизайнерлик ечимлари ва ўлчамлари, уларнинг жойлашув харитаси (схемаси) тавсия этилган рўйхати билан ташқи реклама объектларини (конструкцияларини) қуриш учун тақдим этилган давлат ер участкалари, бино ва иншоотлар бўйича шакллантирилган электрон рўйхатни;

реклама жойининг паспортини;

ташқи реклама объектларини (конструкцияларини) жойлаштириш ҳуқуқининг бошланғич нархи тўғрисида маълумотни.

16. Оператор ваколатли орган маълумотлар базасига маълумотларни киритган вақтдан бошлаб бир иш куни ичида веб-порталда қуйидагиларни эълон қилади:

аукцион ўтказилиши тўғрисидаги хабарни;

ташқи реклама объектларининг (конструкцияларининг) турлари ва кўриниши, асосий дизайнерлик ечимлари ва ўлчамлари, уларнинг жойлашув харитаси (схемаси) тавсия этилган рўйхати билан ташқи реклама объектларини (конструкцияларини) қуриш учун тақдим этилган давлат ер участкалари, бино ва иншоотлар бўйича шакллантирилган электрон рўйхатни;

реклама жойининг паспортини;

ташқи реклама объектларини (конструкцияларини) жойлаштириш ҳуқуқининг бошланғич нархи тўғрисида маълумотни.

17. Аукцион тўғрисида хабар эълон қилингандан сўнг оператор барча хоҳловчиларга веб-порталидаги маълумотларга киришини таъминлайди, балансда сақловчи эса ташқи реклама жойлаштирилиши белгиланган давлат мулки бўлган бино ва иншоотлар билан танишиб чиқиш имкониятини яратади.

18. Аукцион тўғрисидаги хабарномада қуйидаги маълумотлар бўлиши керак:

аукцион ўтказиладиган сана ва вақт;

закалат суммаси, уни тўлаш муддати ва тартиби ҳамда банк реквизитлари;

қўшимча маълумот олиш учун манзил ва алоқа телефони;

аукцион тўғрисида бошқа маълумотлар.

19. Аукцион қатнашчиларини рўйхатга олиш хабарнома эълон қилинган вақтдан бошлаб операторнинг веб-порталида амалга оширилади.

20. Аукционда иштирок этиш учун иштирокчи ўз мажбуриятларини бажариш кафолати сифатида аукцион тўғрисида хабарномада кўрсатилган оператор банки ҳисобрақамига закалат қўйиши шарт.

21. Савдо иштирокчиси аукционда иштирок этиш учун ариза беришнинг охирги муддати тугашига қадар исталган вақтда веб-портал орқали аукционда қатнашиш учун буюртманомани қайтариб олиши мумкин. Бундай ҳолда, иштирокчидан олинган закалат пули электрон аукционда қатнашмаслик истаги тўғрисидаги электрон аризаси асосида қайтарилади. Оператор аризачининг электрон аризаси келиб тушган кундан бошлаб уч иш кунидан кечиктирмай маблағни қайтаради.

22. Аукционда қатнашиш учун ариза қабул қилингандан сўнг оператор автоматик равишда маълумотлар базасидан закалат тўлови мавжудлигини текширади.

23. Агар иштирокчининг закалат маблағи миқдори маълум (танланган) лотда иштирок этиш учун етарли бўлмаса, электрон аукционда қатнашиш учун ариза қабул қилинмайди.

24. Аризаларни автоматик текшириш натижаларига кўра веб-портал электрон почта ва СМС хабар орқали талабгорга ариза қабул қилинганлиги ҳақида ёки закалат тўламагани ёки тўловни амалга оширмаганлиги сабабли уни қабул қилиш рад этилганлиги тўғрисида хабар беради.

25. Аукционда иштирок этадиган иштирокчига веб-портал томонидан тайинланган буюртма рақами бўйича кириш ҳуқуқи берилади.

Ҳар бир иштирокчига автоматик равишда аукцион қатнашчиси рақами бириктирилади.

Шунингдек, талабгорга аукционда қатнашиш ва ҳар бир рўйхатдан ўтган таклиф бўйича аукцион бошланиши тўғрисида электрон почта ва СМС орқали хабар юборилади.

26. Аукцион савдоси ўтказилиши эълон қилинган вақтда лотни бошланғич нархда автоматик равишда савдо майдончасига қўйиш билан бошланади.

27. Аукцион мусобақа ва нархини ошириб бориш тамойили асосида амалга оширилади.

28. Агар аукционга икки ёки ундан ортиқ иштирокчи қабул қилинган бўлса, аукцион ўтказилади.

29. Аукционлар иш куни давомида, соат 09:00 дан соат 18:00 гача бўлган вақт оралиғида ўтказилади.

30. Агар иштирокчи томонидан лотнинг нархини ошириш ҳақидаги таклифни охирги тасдиқлаш электрон аукцион ўтказилиши вақти тугашигача ўн дақиқадан кам вақт қолганда амалга оширилган бўлса, аукционни ўтказиш муддати таклифни охирги тасдиқлаш пайтидан бошлаб ўн дақиқа муддатгача узайтирилади. Ҳар бир кейинги таклиф электрон аукцион ўтказилиши муддатини ўн дақиқага узайтиради. Бунда электрон аукцион ўтказилиши муддати кўпи билан уч соатга узайтирилади ва аукцион соат 21:00 гача якунланиши лозим. Лотнинг нархи ҳақидаги таклифни охирги бўлиб соат 21:00 гача тасдиқлаган иштирокчи аукцион ғолиби деб тан олинади.

31. Аукцион босқичи:

биринчи тўрт босқичда - аукцион объекти бошланғич қийматининг ўн фоизини;

бешинчи ва кейинги босқичларда - аукцион объекти бошланғич қийматининг беш фоизини ташкил этади.

32. Электрон аукцион иштирокчилардан лотнинг бошланғич нархидан бир босқичга оширилган лотнинг нархи тўғрисида таклифни тасдиқлашни сўрашдан бошланади.

33. Агар аукцион иштирокчиларидан бири таклифни тасдиқлаган пайтдан бошлаб ўн дақиқа ичида лотнинг белгиланган босқич миқдорига оширилган нархни тасдиқласа, лот нархи тўғрисидаги кейинги таклифни тасдиқлаш вақти ўн дақиқага узайтирилади.

34. Агар охирги тасдиқланган таклиф пайтидан бошлаб ўн дақиқа ичида лотнинг нархини ошириш тўғрисида кейинги таклиф бирорта иштирокчи томонидан тасдиқланмаса, электрон аукцион аукцион натижалари тўғрисидаги баённомани автоматик шакллантириш билан якунланади. Лотнинг нархи ҳақидаги таклифни охирги бўлиб тасдиқлаган иштирокчи аукцион ғолиби деб эътироф этилади.

35. Аукцион ғолиби уч иш куни ичида аукцион объектининг тўлиқ нархини тўлайди, шундан сўнг аукцион якунлари тўғрисида баённома тузилади.

36. Агар:

электрон аукционда иштирок этиш учун бирорта аукцион иштирокчиси қўйилмаган бўлса ёки унда иштирок этиш учун фақат битта буюртманома тушган бўлса;

аукционда иштирок этишга фақат битта иштирокчига рухсат берилган бўлса;

аукцион иштирокчиларидан бирортаси, шу жумладан аукцион ғолиби ташқи реклама объектларини жойлаштириш ҳуқуқини аукцион жараёнида шаклланган нарх бўйича сотиб олиш истагини билдирмаган бўлса;

аукцион ғолиби аукцион объектининг тўлиқ нархини тўламаган бўлса, аукцион бўлиб ўтмаган деб эътироф этилади.

37. Аукцион ҳақиқий эмас деб топилган (бўлиб ўтмаган деб эътироф этилган) тақдирда, ташқи реклама объектини (конструкциясини) жойлаштириш ҳуқуқи такрорий аукционга қўйилади.

38. Такрорий аукцион хабарномада белгиланган кун ва вақтда аукцион ўтказилмаган деб топилган кундан бошлаб ўн беш кундан кечиктирмай ўтказилади.

39. Талабномани бериш муддати тугаши билан фақат битта иштирокчи такрорий аукцион учун ариза топширган бўлса, аукцион оператори савдо иштирокчисига аукцион объектини бахоланган нархда сотиб олиш ва уни уч иш куни ичида тўлаш таклифини электрон шаклда юборади.

Агар аукцион ғолиби уч иш куни давомида аукцион объектининг тўлиқ нархини тўласа, у аукцион ғолиби деб тан олинади ва аукцион якунлари тўғрисида баённома расмийлаштирилади.

Агар у таклиф юборилган пайтдан бошлаб уч иш куни ичида операторга аукцион объектини сотиб олишни хоҳламаслиги ёки ушбу муддат давомида аукцион объектининг тўлиқ нархини тўламаганлиги тўғрисида хабар берса, аукцион иштирокчиси аукцион объектини сотиб олишдан бош тортган деб ҳисобланади.

Аукцион объектини сотиб олишни рад этган деб тан олинган аукцион қатнашчисига ушбу аукцион объекти бўйича кейинги савдоларга иштирок этишига йўл қўйилмайди.

Аукцион ғолиби 30 кун ичида икки ёки ундан кўп аукцион объектини сотиб олишдан бош тортса, кейинги олти ой ичида барча аукционларга қўйилмайди.

40. Аукцион натижалари тўғрисида билдиришнома автоматик равишда электрон почта ва СМС-ҳабар бериш орқали аукционда иштирок этиш учун ариза берган барча иштирокчиларга юборилади.

41. Аукционда ғолиб бўлган иштирокчининг закалати оператор томонидан аукцион ғолиби аниқланган кундан бошлаб уч иш куни ичида (оператор хизматлари учун тўланадиган тўловни ҳисобга олган ҳолда) ваколатли органнинг ҳисоб варағига ўтказилади. Бу ҳолда ғолиб томонидан тўланган закалат тўлови объектнинг сотиб олиш суммасига қўшиб хисобланади, қолган иштирокчиларнинг закалат тўловлари электрон аризалар асосида ўзларининг банк ҳисобварақларига уч иш куни ичида қайтарилади.

42. Аукцион ғолиби шартнома тузишни рад этса ёки бош тортса, у томонидан қўйилган закалат суммаси қайтарилмайди ва операторда қолади.

Операторда қолган закалат суммаси оператор тўловидан ташқари уч иш куни ичида ваколатли органнинг ҳисоб-рақамига юборилади.

43. Аукцион натижалари тўғрисидаги электрон баённома веб-портал томонидан автоматик равишда расмийлаштирилади ва реклама жойи паспорти олиш учун асос бўлган аукцион натижаларини қайд этувчи ҳужжатдир.

44. Аукцион бўлиб ўтмаган деб топилган тақдирда, талабгорлар қайта аукционда қатнашишни рад этсалар, оператор томонидан закалат суммаси уч иш куни ичида талабгорларнинг ҳисоб рақамига ўтказиб берилади.

3-БОБ. ЯКУНЛОВЧИ ҚОИДАЛАР

45. Ташқи реклама объектларини (конструкцияларини) қуриш ҳуқуқини бошқа шахсга ўтказиш билан боғлиқ низолар қонун ҳужжатларида белгиланган тартибда кўриб чиқилади.

46. Ушбу Низом талабларини бузганликда айбдор шахслар қонун ҳужжатларида белгиланган тартибда жавобгар бўладилар.

Қонун ҳужжатлари маълумотлари миллий базаси (www.lex.uz),

2020 йил 21 февраль