язык интерфейса

ЎзР Конунчилиги

ЎзР Конунчилиги/ Базада янги/ Август, 2020 й./ Давлат органлари фаолиятининг қонуний асослари/ Алоҳида соҳалар фаолиятини ташкил этиш/ Ўзбекистон Республикаси Президентининг 08.08.2020 й. ПҚ-4798-сон "2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари тўғрисида"ги Қарори

Полный текст документа доступен в платной версии. По вопросам звоните на короткий номер 1172

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

08.08.2020 й.

N ПҚ-4798



2020-2021 ЙИЛЛАРДА ФАРҒОНА

ВИЛОЯТИНИНГ СЎХ ТУМАНИНИ КОМПЛЕКС

ИЖТИМОИЙ-ИҚТИСОДИЙ РИВОЖЛАНТИРИШ

ЧОРА-ТАДБИРЛАРИ ТЎҒРИСИДА


Фарғона вилояти Сўх туманининг мавжуд ресурсларидан самарали фойдаланиш, муҳандислик-коммуникация тармоқларини модернизациялаш, ижтимоий ва ишлаб чиқариш инфратузилмаларини ривожлантириш, саноат салоҳиятини янада ошириш, қишлоқ хўжалиги, сервис ва хизмат кўрсатиш сифатини яхшилаш, шунингдек, коронавирус пандемияси шароитида аҳоли бандлигини таъминлаш ва даромадларини ошириш ҳисобига туман аҳолисининг турмуш даражасини яхшилаш мақсадида:


1. 2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари дастури (кейинги ўринларда - Дастур) 1-иловага мувофиқ тасдиқлансин.


2. Қуйидагилар Фарғона вилоятининг Сўх туманини комплекс ижтимоий-иқтисодий ривожлантириш йўналишлари этиб белгилансин:

замонавий рақобатбардош саноат маҳсулотларини ишлаб чиқариш бўйича янги қувватларни ташкил этиш ва уларни ишлаб чиқаришни рағбатлантириш, хизматлар соҳасини ривожлантириш, тадбиркорликни янада қўллаб-қувватлаш;

қишлоқ хўжалигини янада ривожлантириш, соҳада фойдаланилмаётган ва фойдаланишдан чиқиб кетган ерларни ўзлаштириш, ирригация-мелиорация тадбирларини амалга ошириш, чорвачилик, шу жумладан, паррандачилик ва балиқчилик тармоғини янада ривожлантириш;

йўл-транспорт, муҳандислик-коммуникация инфратузилмасини ривожлантиришга, аҳолининг уй-жой маиший шароитларини яхшилашга, соғломлаштириш ва маданий ҳордиқ чиқаришини ташкиллаштиришга қаратилган тадбирларни амалга ошириш, туман марказини ободонлаштириш;

таълим ва тиббиёт муассасаларининг моддий-техника базасини мустаҳкамлаш, тиббиёт соҳаси ва педагог ходимларнинг меҳнатини янада рағбатлантириш, туманда олий маълумотли мутахассисларга бўлган эҳтиёжни қондириш, таълим ва тиббиёт хизматлари сифатини ошириш;

аҳолини ижтимоий қўллаб-қувватлашни янада кучайтириш, уларнинг иш билан бандлигини таъминлаш.


3. Вазирлар Маҳкамаси бир ҳафта муддатда Дастурни амалга оширишнинг асосий устувор йўналишларини инобатга олган ҳолда Дастурнинг мақсадли параметрлари ва молиялаштириш манбалари асосида 2020-2021 йилларда Сўх туманини комплекс ижтимоий-иқтисодий ривожлантириш чора-тадбирларининг манзилли дастурини тасдиқласин.


4. 2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари дастурини амалга ошириш бўйича республика ишчи гуруҳи (кейинги ўринларда - Республика ишчи гуруҳи) таркиби 2-иловага мувофиқ тасдиқлансин.

Қуйидагилар Республика ишчи гуруҳининг асосий вазифалари этиб белгилансин:

мутасадди раҳбарлар иштирокида Дастур доирасида амалга оширилаётган ҳар бир лойиҳанинг ўз муддатида ва сифатли амалга оширилишини таъминлаш;

Дастурга киритилган лойиҳаларнинг бажарилишини мунтазам равишда ҳар ойда бир марта Сўх туманида, ҳар чоракда бир марта республика даражасида муҳокама қилиб бориш ва муаммоли лойиҳалар ечими юзасидан зарур ва тезкор чора-тадбирларни амалга ошириш;

Дастур доирасида белгиланган лойиҳаларнинг амалга оширилиши мониторингини олиб бориш, лойиҳаларнинг ўз муддатида ва сифатли бажарилишига тўсқинлик қилувчи муаммоларни бартараф этиш юзасидан тезкор ва амалий чоралар кўриш;

тумандаги камбағалликка оид реал аҳволни ўрганиш, камбағалликни қисқартириш ва бартараф этиш бўйича зарур чора-тадбирларни белгилаш.


5. Фарғона вилоятининг Сўх туманида тадбиркорлик субъектларини қўллаб-қувватлаш ва иқтисодиёт тармоқларининг узлуксиз ишлашини таъминлаш, аҳолини ижтимоий ҳимоялаш мақсадида:

а) 2020 йилда жисмоний шахслар ер солиғи ва мол-мулк солиғини тўлашдан озод этилсин;

б) жорий йил 1 августдан бошлаб 2021 йил 31 июлга қадар:

якка тартибдаги тадбиркорлар учун жисмоний шахслардан олинадиган даромад солиғи амалдаги қатъий белгиланган солиқ ставкасининг 50 фоизи миқдорида белгилансин;

алкоголь маҳсулотлари билан чакана савдо қилиш ҳуқуқини берадиган рухсат гувоҳномасини олиш учун йиғимни тўлашдан озод қилинсин.


6. Тадбиркорларнинг бизнес лойиҳаларини молиявий қўллаб-қувватлаш мақсадида кредит фоиз ставкасининг 10 фоизли пунктидан юқори бўлган қисмини, бироқ Марказий банк асосий ставкасининг 1,75 бараваридан ошмаган миқдорини Тадбиркорлик фаолиятини қўллаб-қувватлаш давлат жамғармаси ҳисобидан компенсация қилиш тартиби жорий этилсин.


7. Молия вазирлиги тижорат банклари билан биргаликда Сўх тумани аҳолисига янги уй-жой қуришлари учун ипотека кредитлари ажратилишини таъминласин.


8. Фарғона вилоятининг Сўх тумани ҳокимига Фарғона вилояти ҳокимлиги билан келишган ҳолда 2022 йил 1 январга қадар туманни ижтимоий-иқтисодий ривожлантириш дастурига киритилган лойиҳалар учун, истисно тариқасида, суғориладиган ер майдонларидан ташқари ер участкаларини тўғридан-тўғри ажратиш ҳуқуқи берилсин.


9. Соғлиқни сақлаш вазирлиги Фарғона вилояти ҳокимлиги билан биргаликда тумандаги соғлиқни сақлаш муассасаларига юқори малакали мутахассисларни ишга жалб қилсин.


10. Белгилансинки:

Сўх туманида жойлашган тиббиёт муассасаларида фаолият олиб бораётган шифокорларнинг лавозим маошларига соҳадаги иш стажининг биринчи уч йили учун тариф ставкасига нисбатан 40 фоиз ва ҳар бир кейинги икки йил учун тариф ставкасига нисбатан 15 фоиз миқдорда, устаманинг энг кўп миқдори 100 фоиз ўрнатилади;

Сўх туманида жойлашган тиббиёт муассасаларида фаолият олиб бораётган шифокорларнинг лавозим маошларига ойлик қўшимча устамалар, ижтимоий нафақалар ҳамда Сўх тумани маҳаллий бюджетининг солиқлардан берилган имтиёзлари ҳисобига вужудга келган йўқотишлари жорий йилда Молия вазирлиги ҳузуридаги Инқирозга қарши курашиш жамғармаси ҳисобидан қоплаб берилади.


11. Ташқи ишлар вазирлиги Мудофаа вазирлиги билан биргаликда Қирғизистон Республикаси ҳаво ҳудудидан фойдаланиш масаласини ҳал этсин.

Транспорт вазирлиги Қирғизистон Республикаси ҳаво ҳудудидан фойдаланиш масаласи тўлиқ ҳал этилгандан кейин бир ҳафта муддатда Фарғона шаҳридан Сўх туманига кичик авиация транспорти орқали аҳолига мақбул нархларда қатновлар йўлга қўйилишини таъминласин.

Фарғона вилояти ҳокимлиги бир ой муддатда Сўх туманида самолёт ва вертолётлар учун учиш-қўниш майдончаларини ташкил этсин.

Молия вазирлиги Фарғона шаҳридан Сўх туманига кичик авиация транспорти қатнови бўйича кўрилган зарарларни қоплаш учун компенсация тўловларини жорий йилда Вазирлар Маҳкамасининг захира жамғармасидан қопланишини ва келгуси йилларда Давлат бюджети параметрларида назарда тутилишини таъминласин.


12. Фарғона вилояти ҳокимлиги:

Сўх тумани аҳолиси учун Фарғона вилоятининг Ёзёвон, Қўштепа, Бағдод, Риштон ва Бувайда туманлари ҳудудида деҳқончилик қилиш учун экин ер майдони ва ипотека кредитлари асосида квартиралар ажратсин;

Фарғона вилояти ҳудудида марказлаштирилган маблағлар ҳисобидан амалга оширилаётган қурилиш-таъмирлаш ишларига, шунингдек, саноат корхоналарида янги ташкил этилаётган иш ўринларига Сўх тумани аҳолисини кенг жалб қилсин;

Бандлик ва меҳнат муносабатлари вазирлиги ҳамда Тошкент шаҳар ҳокимлиги билан биргаликда Сўх туманининг иш билан бандлиги таъминланмаган аҳолининг бир қисмини Тошкент шаҳрида йирик объектларда амалга оширилаётган қурилиш-таъмирлаш ишларига тизимли равишда жалб қилинишини таъминласин.


13. Давлат геология ва минерал ресурслар қўмитаси белгиланган тартибда Дастур доирасида қурилиш материаллари ва бошқа саноат маҳсулотларини ишлаб чиқариш мақсадида ер қаъри участкаларидан фойдаланиш ҳуқуқи учун лицензиялар ҳамда ер ости ичимлик суви манбалари бўйича тегишли хулосалар берилишини таъминласин.


14. Энергетика вазирлиги Уй-жой коммунал хизмат кўрсатиш вазирлиги билан биргаликда аҳолини электр энергияси, табиий ва суюлтирилган газ, ичимлик суви ва канализация тизими билан таъминлаш бўйича муҳандислик-коммуникация инфратузилмасини ривожлантириш, шунингдек, Дастур доирасида амалга ошириладиган инвестиция лойиҳалари асосида ишлаб чиқариш корхоналарининг муҳандислик-коммуникация тармоқларига ўз вақтида уланишини ҳамда уларга мавжуд ресурс ва техник имкониятлардан келиб чиқиб, талаб этиладиган табиий газ ва электр энергияси етказиб берилишини таъминлаш чораларини кўрсин.


15. Иқтисодий тараққиёт ва камбағалликни қисқартириш вазирлиги, Молия вазирлиги марказлашган манбалар ҳисобига Дастурнинг 2020 йилда амалга ошириладиган лойиҳаларини 2020-2022 йилларга мўлжалланган Инвестиция дастурининг 2020 йил учун тасдиқланган параметрлари доирасида амалга оширсин ва кейинги йиллар учун белгиланган тадбирларнинг асосий кўрсаткичларини аниқлаштириб ва янгилаб борган ҳолда, келгуси йиллар Инвестиция дастурини шакллантиришда кўзда тутсин.


16. Қуйидагиларга:

Ўзбекистон Республикаси Бош вазирининг биринчи ўринбосари А.Ж. Раматов зиммасига - мазкур қарорнинг ижросини ўз вақтида ва сифатли амалга оширилишини таъминлаш, белгиланган чора-тадбирларни амалга оширишга масъул вазирлик ва идораларнинг самарали фаолиятини ташкил этиш ҳамда мувофиқлаштириш, аниқланган камчиликларни ўз вақтида бартараф этиш юзасидан;

Ўзбекистон Республикаси Бош вазирининг ўринбосари - иқтисодий тараққиёт ва камбағалликни қисқартириш вазири Ж.А. Қўчқоров зиммасига - ушбу қарорда назарда тутилган тадбирларни амалга ошириш учун Давлат бюджетидан зарур маблағларни ўз вақтида ажратиш ва бошқа молиявий ресурсларни жалб қилиш юзасидан;

Ўзбекистон Республикаси Бош вазирининг ўринбосари - инвестициялар ва ташқи савдо вазири С.У. Умурзаков зиммасига - туманда инвестиция муҳитини яхшилаш, инвесторлар ҳамда инвестицияларни, айниқса, тўғридан-тўғри инвестицияларни кенг жалб этиш ҳамда туманнинг экспорт салоҳиятини ошириш юзасидан;

Ўзбекистон Республикаси Бош вазирининг ўринбосари Ў.И. Барноев зиммасига - туманда қишлоқ хўжалиги ерларидан самарали фойдаланиш, фойдаланишдан чиқиб кетган ерларни ўзлаштириш, мева-сабзавотчилик, чорвачилик ҳамда қайта ишлаш соҳасини ривожлантириш юзасидан;

Ўзбекистон Республикаси Бош вазирининг ўринбосари Б.А. Мусаев зиммасига - туманда ижтимоий соҳада кадрларга бўлган эҳтиёжни қондириш, ижтимоий инфратузилма объектларининг моддий-техника базасини мустаҳкамлаш юзасидан шахсий жавобгарлик юклансин.


17. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов зиммасига юклансин.



Ўзбекистон Республикаси Президенти                                     Ш. Мирзиёев






Ўзбекистон Республикаси

Президентининг

2020 йил 8 августдаги

ПҚ-4798-сон қарорига

1-ИЛОВА



2020-2021 йилларда Фарғона вилоятининг Сўх туманини

комплекс ижтимоий-иқтисодий ривожлантириш

ЧОРА-ТАДБИРЛАРИ ДАСТУРИ

Т/р

Чора-тадбирларнинг номланиши

Сарф-харажатлар

(млрд сўм)

Молиялаштириш манбалари

Амалга ошириш муддати

Масъул ижрочилар

I. САНОАТ, ХИЗМАТ КЎРСАТИШ, ҚИШЛОҚ ХЎЖАЛИГИ СОҲАЛАРИНИ РИВОЖЛАНТИРИШ, ТАДБИРКОРЛИКНИ ҚЎЛЛАБ-ҚУВВАТЛАШ ОРҚАЛИ АҲОЛИ БАНДЛИГИНИ ТАЪМИНЛАШ ВА КАМБАҒАЛЛИКНИ ҚИСҚАРТИРИШ

1.

Саноат, хизматлар ва қишлоқ хўжалигини ривожлантириш бўйича 95 та лойиҳани амалга ошириш ҳисобига 5 000 та янги иш ўринларини яратиш.

99,4

Ташаббускорларнинг ўз маблағлари

2020-2021 йиллар

Фарғона вилояти ҳокимлиги, Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, Қишлоқ хўжалиги вазирлиги, хўжалик бирлашмалари, тижорат банклари

57,0

тижорат банклари кредитлари

52,8

(5,2 млн доллар)

хорижий инвестициялар

2.

Туманнинг табиий газ таъминоти яхши бўлган "Навобод" МФЙ ҳудудида "Риштон кулолчилик маркази" билан кооперация алоқаларини йўлга қўйиш орқали, кулолчилик, чинничилик ва ёғоч ўймакорлигига ихтисослашган "Ҳунармандчилик маркази"ни барпо этиш ва бу орқали 60 нафар аҳолининг бандлигини таъминлаш.

0,6

Савдо-саноат палатаси ва "Ҳунарманд" уюшмаси маблағлари

2020 йил

Савдо-саноат палатаси, "Ҳунарманд" уюшмаси, Фарғона вилояти ҳокимлиги, "Ҳудудгазтаъминот" АЖ

3.

"Себзор" МФЙ ҳудудида "Микрокредитбанк" АТБ хусусий шерикчилиги асосида адрас, атлас ва трикотаж маҳсулотлари ишлаб чиқаришга ихтисослашган "Тўқув тикувчилик" кооперация марказини ташкил этиш ҳамда Савдо-саноат палатаси томонидан кооперация асосида ишлаб чиқарилган маҳсулотларини сотишни ташкил этиш ва бу орқали кам таъминланган оилалар вакиллари бўлган 120 нафар хотин-қизларнинг бандлигини таъминлаш.

1,2

"Микрокредитбанк" АТБ, Фарғона вилояти ҳокимлиги ҳузуридаги "Янги иш ўринлари ташкил этишни рағбатлантириш ҳудудий жамғармаси" ва ташаббускорларнинг ўз маблағлари

2020 йил

"Микрокредитбанк" АТБ, Бандлик ва меҳнат муносабатлари вазирлиги, Савдо-саноат палатаси, "Ҳунарманд" уюшмаси, Фарғона вилояти ҳокимлиги

4.

Тумандаги майдони 0,5 гектар бўлган 6 та бўш турган давлат мулки объектларидан самарали фойдаланиш мақсадида инвесторларнинг таклифларидан келиб чиққан ҳолда бошланғич нархини белгилаш орқали Фарғона вилояти ҳокимлиги ва Давлат активларини бошқариш агентлиги қўшма қарорига асосан тадбиркорларга янги иш ўринларини яратиш мажбурияти билан оммавий савдоларда сотиш.

Ҳисоб-китоблар асосида

Ташаббускорларнинг ўз маблағлари

Савдога чиқариш 2020 июль, лойиҳаларни амалга ошириш - 2020-2021 йиллар

Давлат активларини бошқариш агентлиги, Фарғона вилояти ҳокимлиги

5.

"Сўх деҳқон бозори" МЧЖ устав капиталидаги давлат улушини (51%) инвесторлар таклифлари асосида ҳудудий танлов комиссияси орқали белгиланган тартибда инвестиция киритиш шарти билан оммавий савдо орқали сотиш ва бозор негизида замонавий савдо комплексини ташкил этиш.

Ҳисоб-китоблар асосида

Ташаббускорларнинг

ўз маблағлари

2020 йил

Давлат активларини бошқариш агентлиги,

Фарғона вилояти ҳокимлиги

6.

"Қалъача" МФЙда 2 гектар, "Чашма" МФЙда 2 гектар, "Равон" МФЙда 1 гектар, "Ҳушёр" МФЙда 1 гектар, жами 6 гектар майдонда кичик саноат зоналарини ташкил этиш ва зарур муҳандислик-коммуникация тармоқлари билан таъминлаш.

Лойиҳа-смета ҳужжатлари асосида

"Инқирозга қарши курашиш жамғармаси", Кичик саноат зоналарини муҳандислик-коммуникация тармоқларини ривожлантириш учун ажратилган маблағларни қайта тақсимлаш ҳамда Фарғона вилояти маҳаллий бюджетининг қўшимча манбалари ҳисобидан

2020 йил

Иқтисодий тараққиёт ва камбағалликни қисқартириш вазирлиги, Фарғона вилояти ҳокимлиги, Давлат активларини бошқариш агентлиги, Энергетика вазирлиги, Уй-жой коммунал хизмат кўрсатиш вазирлиги, "Ҳудудий электр тармоқлари" АЖ, "Ҳудудгазтаъминоти" АЖ, "Ўзтрансгаз" АЖ

7.

Халқаро пул ўтказмаларини амалга ошириш, миллий ва чет эл валютасини айирбошлашга мўлжалланган замонавий 2 та "Банк хизматлари маркази" ва 1 та "24/7 ўзига хизмат кўрсатиш шохобчаси"ни ташкил қилиш

Ҳисоб-китоблар асосида

"Агробанк" АТБ, "Микрокредитбанк" АТБ, Халқ банк

2020 йил 1 сентябрь

"Агробанк" АТБ, "Микрокредитбанк" АТБ, Халқ банк, Фарғона вилояти ҳокимлиги

8.

Четдан олиб келинадиган чорва молларини аҳоли томонидан сотиб олиш учун тижорат банклари томонидан "Ҳар бир оила - тадбиркор" дастури ҳисобидан кредитлар ажратиш.

Кредит олиш истагини билдирган фуқаролар рўйхати асосида

Халқ банки ва "Агробанк" АТБ кредитлари


Халқ банки, "Агробанк" АТБ, Фарғона вилоят ҳокимлиги

9.

Оҳактош, гил, бентонитли гил, гипс, сланец, қум ва шағал истиқболли майдонида геология-қидирув ишларини олиб бориш ва кон захираларини тасдиқлаш.

Лойиҳа ҳужжатларига асосан

Давлат геология ва минерал ресурслар қўмитасига ажратиладиган маблағлар ҳисобидан

2020 йил

15 декабрь

Давлат геология ва минерал ресурслар қўмитаси

10.

Мавжуд фойдаланилмаётган норуда фойдали қазилма Сураттош мармар (635 минг м3) ва Суратсой қурилиш тоши (830,7 минг м3) конларини саноат йўсинида ўзлаштириш учун салоҳиятли тадбиркорларга ер қаъри участкаларидан фойдаланиш ҳуқуқини берувчи лицензиялар бериш.

Мазкур конларда қурилиш материаллари ишлаб чиқариш бўйича лойиҳаларни амалга ошириш.

Ҳисоб-китоблар асосида








Ҳисоб-китоблар асосида

Ташаббускорларнинг ўз маблағлари ҳамда тижорат банклари кредитлари

2020 йил

август








2021 йил 1-ярим йиллик

Давлат геология ва минерал ресурслар қўмитаси








Фарғона вилояти ҳокимлиги, "Ўзсаноатқурилишматериаллари" уюшмаси

11.

Цемент ишлаб чиқариш бўйича лойиҳани амалга ошириш.

79,0

Ташаббускорларнинг ўз маблағлари ва тижорат банклари кредитлари

2021 йил

"Ўзсаноатқурилишматериаллари" уюшмаси, Фарғона вилояти ҳокимлиги, Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, тижорат банклари

12.

Қўлда тўқиладиган гиламчилик корхонаси фаолиятини ташкил этиш.

1,5

Ташаббускорларнинг ўз маблағлари ҳамда "Микрокредитбанк" АТБ кредитлари

2020 йил

"Ўзбекипаксаноат" уюшмаси, Фарғона вилояти ҳокимлиги

13.

"Чашма" булоғининг сувини қадоқлаб, ишлаб чиқариш бўйича корхона ташкил этиш.

1,0

Ташаббускорларнинг ўз маблағлари ва тижорат банклари кредитлари

2021 йил март

Ўзмиллийбанк, "Агробанк" АТБ, Фарғона вилояти ҳокимлиги

14.

"Озод" ширкат хўжалигида замонавий чорва комплексини қуриш ва наслли қорамол олиб келиш.

Бизнес-режа асосида

Ташаббускорларнинг ўз маблағлари, "Агробанк" АТБ кредитлари

2020 йил

Фарғона вилояти хокимлиги, Ветеринария ва чорвачиликни ривожлантириш қўмитаси, "Агробанк" АТБ

15.

Балиқчилик йўналишида 2 та лойиҳа бўйича 1,5 гектар майдонда интенсив усулда совуқ сувга мослашган балиқларни етиштиришни ҳамда Тошкент шаҳридаги йирик савдо комплексларига етказиб беришни йўлга қўйиш.

Бизнес-режа асосида

Ташаббускорларнинг ўз маблағлари ҳамда тижорат банклари кредитлари

2021 йил

"Ўзбекбалиқсаноат" уюшмаси, тижорат банклари

16.

Йирик тадбиркорларни жалб қилган ҳолда туманда 20 минг бошга мўлжалланган йирик паррандачилик комплексини ташкил этиш.

 

1,5

Ташаббускорларнинг ўз маблағлари ва "Ўзсаноат-қурилишбанк"АТБ кредитлари

2020 йил

"Паррандасаноат" уюшмаси, "Ўзсаноатқурилишбанк" АТБ

17.

2020 йилда йиллик қуввати 200 тонна бўлган мева-сабзавотни қайта ишлаш ва сақлаш корхонасини ташкил этиш.




2021 йилда камида 5 минг тонна қишлоқ хўжалиги маҳсулотларини қайта ишлаш бўйича янги лойиҳаларни амалга ошириш.

1,5

"Агробанк" АТБ кредитлари

(1,0 млрд сўм) ва ташаббускорларнинг ўз маблағи

(0,5 млрд сўм)


Ташаббускорларнинг ўз маблағлари ҳамда тижорат банклари кредитлари

2020 йил







2021 йил

Фарғона вилояти ҳокимлиги, "Агробанк" АТБ, тижорат банклари

18.

"Ҳушёр" МФЙ ҳудудидаги янги ўзлаштириладиган ерларда Ўрмон хўжалиги давлат қўмитаси томонидан 10 минг дона ёнғоқ, 10 минг дона писта ва 20 минг дона бодом кўчатларини етказиб бериб, 50 гектар ер майдонда бодомзор, пистазор ва ёнғоқзорлар ташкил қилиш.

2,0

Ўрмон хўжалиги давлат қўмитаси маблағлари ва ўрмон хўжалигини ривожлантириш жамғармаси маблағлари

2020 йил ноябрь

Ўрмон хўжалиги давлат қўмитаси, Фарғона вилояти ҳокимлиги

19.

Республикамизнинг бошқа ҳудудларидан яхши тажрибага эга бўлган йирик тадбиркорлик субъектларини жалб қилган ҳолда 10 гектар майдонда замонавий иссиқхоналар ташкил қилиш.

60,0

Ташаббускорларнинг ўз маблағлари ҳамда тижорат банклари кредитлари

2021 йил

Қишлоқ хўжалиги вазирлиги, Боғдорчилик ва иссиқхона хўжалигини ривожлантириш агентлиги, Фарғона вилояти ҳокимлиги, тижорат банклари

20.

1 230 гектар боғ майдонларини тўлиқ хатловдан ўтказиш, эски ва самарсиз боғлар ўрнида интенсив боғларни ташкил этиш тадбирларини амалга ошириш ва камида 50 гектар майдонда интенсив олма боғларини плантация шаклида ташкил этиш ҳамда аҳолига 20-30 сотихдан сотиш орқали 250 та янги иш ўринлари яратиш.

0,6

Ташаббускорларнинг ўз маблағлари ҳамда тижорат банклари кредитлари

2020-2021 йиллар

Қишлоқ хўжалиги вазирлиги, Боғдорчилик ва иссиқхона хўжалигини ривожлантириш агентлиги, Фарғона вилояти ҳокимлиги, тижорат банклари

21.

3 та ширкат хўжаликларида иш юритишни оилавий пудрат асосида ташкил этиб, 1 гектар майдонга 5 тадан оилани пудрат усулида бириктириш орқали 5 100 та оилани иш билан бандлигини таъминлаш.



2020 йил

Фарғона вилояти ҳокимлиги, Қишлоқ хўжалиги вазирлиги, Бандлик ва меҳнат муносабатлари вазирлиги, Иқтисодий тараққиёт ва камбағалликни қисқартириш вазирлиги

22.

Аҳолини қишлоқ хўжалиги соҳасида банд қилиш мақсадида туманнинг "Тул", "Ҳазрати Али" ва "Ҳушёр" МФЙлари ҳудудида 10 гектардан жами 30 гектар ер майдонида 3 та қишлоқ хўжалиги кооперативларини ташкил этиш ва кооперативларга аъзо этиб қабул қилинган 200 нафар ишсиз фуқароларнинг ҳар бири учун 2,2 млн сўмдан субсидия ажратиш.

0,45

Бандликка кўмаклашиш давлат жамғармаси маблағлари

2020 йил август

Фарғона вилояти ҳокимлиги, Бандлик ва меҳнат муносабатлари вазирлиги, Қишлоқ хўжалиги вазирлиги, Ўзбекистон фермер, деҳқон ва томорқа ер эгалари кенгаши

23.

Тумандаги "Қайроқ", "Варган", "Тоён", "Жавпая", "Дукур" массивларидаги ҳамда "Сўх", "Озод", "Ҳушёр" ширкатлари ҳудудида қишлоқ хўжалигида фойдаланилмайдиган ерларни ўзлаштириш орқали фуқароларга 20 сотихдан дала томорқалари учун ер майдони ажратиб, ҳар бир фуқарога 2,2 млн сўмдан субсидия ажратиш.

0,89

Бандликка кўмаклашиш давлат жамғармаси маблағлари

2020 йил сентябрь

Фарғона вилояти ҳокимлиги, Бандлик ва меҳнат муносабатлари вазирлиги, Қишлоқ хўжалиги вазирлиги, Ўзбекистон фермер, деҳқон ва томорқа ер эгалари кенгаши

24.

Йил якунига қадар банд бўлмаган аҳолини жамоат ишларига жалб этиш ҳисобига 2 235 та, эҳтиёжманд ва кам таъминланган ишсиз фуқароларнинг шахсий томорқаларига 2,2 млрд сўм субсидия ажратиш ҳисобига 325 та, тадбиркорлик фаолиятини бошлаш учун субсидия бериш ҳисобига 122 та, эҳтиёжманд аҳолини ишга қабул қилиш учун субсидия ажратиш орқали 25 та, ишсизлик нафақаси тўлаб бериш ҳисобига 60 та, вакант иш ўринларига ишсиз фуқароларни доимий иш ўринларига ишга жойлаштириш ҳисобига 180 та, Агросаноат ва Қишлоқ хўжалиги касб-ҳунар коллежлари базасида қисқа муддатли касбга ўқитиш курсларини ташкил этиш ҳисобига 300 та ишсиз аҳолининг бандлигини таъминлаш.

6,6

Жамоат ишлари жамғармаси,

Бандликка кўмаклашиш давлат жамғармаси маблағлари

2020 йил

Бандлик ва меҳнат муносабатлари вазирлиги,

Фарғона вилояти ҳокимлиги, Ўзбекистон фермер, деҳқон ва томорқа ер эгалари кенгаши

25.

"Сўх-дон" хусусий корхонасидаги мавжуд тегирмон цехини замонавий технологиялар асосида модернизация қилиб, йиллик ун ишлаб чиқариш қувватини қўшимча 18 минг тоннага ошириш.

Ҳисоб-китоблар асосида

Ташаббускорларнинг ўз маблағлари

2021 йил июнь

Фарғона вилояти ҳокимлиги, "Ўздонмаҳсулот" АК

26.

Туманнинг тупроққлим шароитидан келиб чиқиб уруғлик картошка етиштиришга ихтисослаштириш.

Ҳисоб-китоблар асосида

Ташаббускорларнинг ўз маблағлари

2020-2021 йиллар

Қишлоқ хўжалиги вазирлиги, Фарғона вилояти ҳокимлиги, Картошка етиштирувчилар уюшмаси

27.

Сўх дарёси ҳимоя зонасидаги ер майдонларини хатловдан ўтказиш ва шоличиликка ихтисослашган қишлоқ хўжалиги кооперативини ташкил этиш.

Ҳисоб-китоблар асосида

Ташаббускорларнинг ўз маблағлари

2020 йил

Фарғона вилояти ҳокимлиги, "Давергеодезкадастр" қўмитаси, Қишлоқ хўжалиги вазирлиги, Сув хўжалиги вазирлиги

28.

Хотин қизлар бандлигини таъминлаш мақсадида туман ҳудудидаги мавжуд тикув-трикотаж корхоналарига буюртмалар тақдим этган ҳолда узлуксиз фаолият юритишини ташкил этиш.

Ҳисоб-китоблар асосида

Тадбиркорларнинг ўз маблағлари

2020 йил

"Ўзтўқимачиликсаноат" уюшмаси, Фарғона вилоят ҳокимлиги

29.

Туристларни жалб қилиш учун зарур инфратузилмани ташкил қилган ҳолда экотуризмни ривожлантириш, меҳмон уйларини ташкил қилиш.

Лойиҳа-смета ҳужжатларига мувофиқ

Ташаббускорларнинг ўз маблағлари ҳамда тижорат банклари кредитлари

2020-2021 йиллар

Туризмни ривожлантириш давлат қўмитаси, "Давергеодезкадастр" қўмитаси, Давлат солиқ қўмитаси, Давлат хизматлари агентлиги, Фарғона вилояти ҳокимлиги

II. ЙЎЛ-ТРАНСПОРТ, МУҲАНДИСЛИК-КОММУНИКАЦИЯ ВА ИЖТИМОИЙ

ИНФРАТУЗИЛМАНИ РИВОЖЛАНТИРИШ

30.

160 км шағал қопламали йўлларни цементобетон қопламага ўтказиш ва асфальт қоплама ётқизиш, 106 км тупроқ йўлларни шағал қопламага ўтказиш ва 40 км цементобетон пиёдалар йўлакларини қуриш:

2020 йилда 96 км йўл ва 20 км пиёдалар йўлаклари;

2021 йилда 170 км йўл, 20 км пиёдалар йўлаклари.

104,1 шундан:

34,6

69,5

Ўзбекистон Республикасининг республика бюджети ва Фарғона вилояти маҳаллий бюджетидан ички йўлларни таъмирлаш учун кўзда тутилган маблағлар доирасида





2020 йил

2021 йил

Автомобиль йўллари қўмитаси, Фарғона вилояти ҳокимлиги, Молия вазирлиги, Иқтисодий тараққиёт ва камбағалликни қисқартириш вазирлиги

31.

Фарғона вилояти Риштон туманидан Сўх туманига Риштон-Равон йўналиши бўйича автобуслар (микроавтобус) қатновини (Қирғизистон орқали транзит) йўлга қўйиш.

1,2

Ташаббускорларнинг ўз маблағлари

Қирғизистон Республикаси ер ҳудудидан фойдаланиш ва чегара ўтказиш пунктларини очиш масалалари ҳал этилгандан сўнг ўн кун ичида

Транспорт вазирлиги, Ташқи ишлар вазирлиги, Фарғона вилояти ҳокимлиги, Давлат божхона қўмитаси, ДХХ Чегара қўшинлари

32.

Туманнинг "Офтобру", "Тул", "Ҳушёр", "Қақир", "Қарир-Себзор", "Сариканда", "Ҳазрат али", "Равон", "Янгиариқ", "Навобод", "Ленбург", "Қалача", "Ғазнов", "Сўх", "Чашма", "Демурсад", "Шарқобод" МФЙлари ҳудудида яшовчи 59 минг нафар аҳолини ичимлик сув билан таъминлаш мақсадида 274 км ичимлик сув тармоғи тортиш ва 30 та ичимлик сув иншооти қуриш ва реконструкция қилиш.

Шунингдек, туман сув таъминоти корхонасига 4 та техника воситаларини ажратиш.

48,0










60,5

Сув таъминоти ва канализация тизимларини ривожлантириш жамғармасига ажратилган маблағларнинг иқтисод қилинган қисми ҳисобидан ва Ўзбекистон Республикасининг республика бюджетидан Фарғона вилояти учун қўшимча ажратилган маблағлар ҳисобидан

2020 йил










2021 йил

Уй-жой коммунал хизмат кўрсатиш вазирлиги, Молия вазирлиги,

Иқтисодий тараққиёт ва камбағалликни қисқартириш вазирлиги

33.

Тумандаги марказий А.Темур кўчасининг батафсил режалаштириш лойиҳасини ишлаб чиқиб, тасдиқлаш.

Мазкур лойиҳага асосан кўчани замонавий шаҳарсозлик талаблари асосида реконструкция қилиш, кўчада кўп квартирали уй-жойлар ҳамда бозор инфратузилма объектларини қуриш.

Лойиҳа-смета ҳужжатлари асосида

Фарғона вилояти маҳаллий бюджети, вазирлик ва идораларнинг бюджетдан ташқари жамғармалари маблағлари, тижорат банклари кредитлари

2020 йил сентябрь


2020-2021 йиллар

Қурилиш вазирлиги, Фарғона вилояти ҳокимлиги



Фарғона вилояти ҳокимлиги, Иқтисодий тараққиёт ва камбағалликни қисқартириш вазирлиги, тегишли вазирлик ва идоралар, тижорат банклари

34.

"Чашма" булоғи атрофини ободонлаштириш, булоқни тозалаш тизимини жорий этиш.

Лойиҳа-смета ҳужжатлари асосида

Фарғона вилояти маҳаллий бюджети ва ҳомийлик маблағлари

2020 йил

Фарғона вилояти ҳокимлиги, ДХХ Чегара қўшинлари, Қурилиш вазирлиги, Сув хўжалиги вазирлиги

35.

Туман марказида Ровон шаҳар бош режасига мувофиқ ҳар бири 30 хонадонли 7 та 5 қаватли уй-жойлар қуриб, фойдаланишга топшириш.

28,0

2020 йилда қишлоқ жойларда кўп-квартирали арзон уй-жойлар қуриш учун Осиё тараққиёт банки ва Ислом тараққиёт банки томонидан ажратилган маблағларнинг иқтисод қилинган қисми ҳисобидан

2020 йил декабрь

"Қишлоқ қурилиш инвест" ИК" МЧЖ, Инвестициялар ва ташқи савдо вазирлиги, Фарғона вилояти ҳокимлиги, Қурилиш вазирлиги, "Давергеодезкадастр" қўмитаси, Иқтисодий тараққиёт ва камбағалликни қисқартириш вазирлиги, Молия вазирлиги, Қишлоқ қурилиш банк

36.

Сўх тумани Чашма қишлоғидаги бўлиб ўтган тартибсизликлар оқибатида бузилган 2 та уйни таъмирлаш.

Лойиҳа-смета ҳужжатлари асосида

"Қишлоқ қурилиш инвест" ИК" МЧЖ маблағлари ҳисобидан

2020 йил август

"Қишлоқ қурилиш инвест" ИК" МЧЖ

37.

Туман аҳолисига суюлтирилган газни ўз вақтида ва узлуксиз етказиб бериш мақсадида барча қулайлик ва имкониятларга эга бўлган суюлтирилган газ тўлдириш мажмуасини қуриш.

1,8

"Ҳудудгазтаъминот" АЖ маблағлари

2020 йил август

Энергетика вазирлиги, "Ҳудудгазтаъминот" АЖ

38.

Туман ҳудудидаги табиий газ билан таъминланган 8 536 та аҳоли хонадонларига замонавий электрон газ ҳисоблагичларни ўрнатиш ҳамда автоматлаштирилган тизимга улаш.

8,0

"Ҳудудгазтаъминот" АЖ маблағлари

2021 йил октябрь

Энергетика вазирлиги, "Ҳудудгазтаъминот" АЖ

39.

Тумандаги 12,9 км табиий газ тармоғини жорий таъмирлаш ва туман газ таъминоти корхонаси моддий техника базасини яхшилаш мақсадида 3 та махсус автотранспорт воситасини ажратиш.

2,0

"Ҳудудгазтаъминот" АЖ маблағлари

2020 йил декабрь

Энергетика вазирлиги, "Ҳудудгазтаъминот" АЖ

40.

Туманнинг электр таъминотини яхшилаш мақсадида 46 та трансформатор пунктларини модернизация қилиш, 103,1 км ҳаво тармоқларини янгидан қуриш ва таъмирлаш ҳамда 14 000 та аҳоли хонадонларига онлайн режимда ишлайдиган олдиндан тўлов тизимига эга электрон электр ҳисоблагичларни ўрнатиш.

12,1

"Ҳудудий электр тармоқлари" АЖ маблағлари

2020 йил декабрь

Энергетика вазирлиги, "Ҳудудий электр тармоқлари" АЖ

41.

"Ленбург", "Қалъа", "Сарибозорча", "Ҳазрати Али", "Шарқобод", "Офтобрў", "Сўҳибкор", "Қалъача", "Девайрон", "Малбут", "Чашма", "Гулистон", "Чумоқча", "Ҳушёр", "Себзор", "Қақир", "Қизилқиёқ" ва "Сўх" МФЙларнинг тор кўчаларига тунги ёритгичлар ўрнатиш.

Лойиҳа-смета ҳужжатлари асосида

Фарғона вилояти маҳаллий бюджети ва унинг қўшимча манбалари ҳисобидан

2020 йил

Фарғона вилояти ҳокимлиги

42.

Юқори тезликдаги интернет ва замонавий телекоммуникация хизматларидан фойдаланиш имкониятларини кенгайтириш мақсадида замонавий радиореле қурилмасини ўрнатиш орқали магистрал телекоммуникация тармоғининг ўтказувчанлик қобилиятини 10 бараварга ошириш, оптик GPON технологияси асосида 512 портга тенг қурилмалар ўрнатиш, туман маркази ҳамда Ленбург МФЙни телекоммуникация транспорт тармоғи билан улаш мақсадида 20 км оптик толали алоқа линияларини ташкил этиш.

4,24

"Ўзбектелеком" АК маблағлари

2020 йил декабрь

Ахборот технологиялари ва коммуникацияларини ривожлантириш вазирлиги, "Ўзбектелеком" АК

43.

Мобиль алоқа ва интернет хизматларини сифатини яхшилаш:

"Ўзбектелеком" АК "Ўзмобайл" филиали томонидан мобиль алоқа тармоғидаги 9 та база станцияларни юқори тезликдаги интернет технологияси асосида модернизация қилиш ва 3 та қўшимча янги база станцияларини ўрнатиш орқали аҳоли пунктлари қамровини 99,9 фоизга етказиш;

"UMS" МЧЖ томонидан "Навобод" ва "Демурсад" МФЙлар ҳудудларида 2 та юқори тезликдаги интернет технологияси асосида база станцияларини ўрнатиш ҳамда 2 та мавжуд база станцияларни замонавий технология асосида модернизация қилиш;

"COSCOM" МЧЖ томонидан "Соҳибкор" ва "Ленбург" МФЙлар  ҳудудларида 2 та юқори тезликдаги интернет технологияси асосида база станцияларини ўрнатиш;

"UNITEL" МЧЖ томонидан юқори тезликдаги интернет технологияси асосида 2 та янги база станцияларини ўрнатиш ва 1 та мавжуд база станциясини замонавий технология асосида модернизация қилиш.

4,3











1,3







1,1






1,2

"Ўзбектелеком" АК маблағлари










ташаббускорлар маблағлари







ташаббускорлар маблағлари






ташаббускорлар маблағлари

2020 йил июль











2020 йил декабрь






2020 йил октябрь





2020 йил декабрь

Ахборот технологиялари ва коммуникацияларини ривожлантириш вазирлиги, "Ўзбектелеком" АК

44.

Сўх тумани маҳаллий телевидениеси дастурларининг қамров ҳудудини кенгайтириш.

0,5

Ўзбекистон Республикасининг республика бюджети ва Фарғона вилояти маҳаллий бюджети маблағлари

2020 йил декабрь

Ахборот технологиялари ва коммуникацияларини ривожлантириш вазирлиги, "Ўзбектелеком" АК, Ўзбекистон миллий телерадиокомпанияси, "Радиоалоқа, радиоэшиттириш ва телевидение маркази" ДУК, Фарғона вилояти ҳокимлиги

45.

Туманда IP телевидение хизматларини жорий этиш.

0,1

"Ўзбектелеком" АК маблағлари

2020 йил октябрь

Ахборот технологиялари ва коммуникацияларини ривожлантириш вазирлиги, "Ўзбектелеком" АК

46.

Тумандаги Равон почта алоқа боғламаси ва мавжуд 2 та алоқа бўлимининг моддий-техника базасини мустаҳкамлаш, уларни марказлашган ахборот тизимларига улаш, замонавий хизматлар кўрсатиш имконини яратиш.

0,02

"Ўзбекистон почтаси" АЖ маблағлари

2020 йил октябрь

Ахборот технологиялари ва коммуникацияларини ривожлантириш вазирлиги, "Ўзбекистон почтаси" АЖ

47.

Ижтимоий соҳа объектларини юқори тезликдаги интернет тармоғига улаш мақсадида 27 та мактаб, 21 та мактабгача таълим, 5 та соғлиқни сақлаш муассасаларига жами 56 км оптик толали алоқа линияларини тортиш.

1,98

"Ўзбектелеком" АК маблағлари

2020 йил декабрь

Ахборот технологиялари ва коммуникацияларини ривожлантириш вазирлиги, "Ўзбектелеком" АК

48.

Туман ҳудудида фаолият юритаётган 13 та давлат идора ва ташкилотларини (Қишлоқ хўжалиги, Ветеринария, Қурилиш, Уй-жой коммунал хизмат кўрсатиш, Экология, Маҳалла ва оилани қўллаб-қувватлаш, Ғазна, Пенсия жамғармаси бўлимлари, "Тоза ҳудуд" ДУК, "Сувоқава" ДУК, Ободонлаштириш бошқармаси, Маънавият бўлими) алоҳида бинолар билан таъминлаш ҳамда моддий техника базасини ривожлантириш.

Ҳисоб-китоблар асосида

Вазирлик ва идораларнинг бюджетдан ташқари жамғармалари маблағлари ҳамда Фарғона вилояти маҳаллий бюджетининг қўшимча манбалари

2020-2021 йиллар

Фарғона вилояти ҳокимлиги, Қишлоқ хўжалиги вазирлиги, Сув хўжалиги вазирлиги, Қурилиш вазирлиги, Уй-жой коммунал хизмат кўрсатиш вазирлиги, Молия вазирлиги, Маҳалла ва оилани қўллаб-қувватлаш вазирлиги, Ветеринария ва чорвачиликни ривожлантириш қўмитаси, Давлат экология қўмитаси

49.

Туман давлат архивини алоҳида бино билан таъминлаш ҳамда моддий техника базасини мустаҳкамлаш.

Лойиҳа-смета ҳужжатлари асосида

Фарғона вилояти маҳаллий бюджети

2021 йил

Фарғона вилояти ҳокимлиги, "Ўзархив" агентлиги

50.

Туманнинг "Тоза ҳудуд" ДУК ҳисобига 1 дона чиқинди тозалаш учун занжирли техника ва 2 дона махсус чиқинди ташиш учун "ISUZU" русумли автомашинаси ажратиш.

2,0

Давлат экология қўмитаси махсус жамғармаси маблағлари

2020-2021 йил

Давлат экология қўмитаси

III. ИЖТИМОИЙ СОҲАНИ РИВОЖЛАНТИРИШ

51.

180 ўринга мўлжалланган қўшма типдаги (4 та гуруҳ умумий типдаги (120 ўрин) ва 4 та гуруҳ ақлий ва руҳий ривожланишида нуқсони бор болалар учун (60 ўрин) мўлжалланган) давлат мактабгача таълим ташкилотини ташкил этиш.

Лойиҳа-смета ҳужжатлари асосида

2020 йилда Мактабгача таълим вазирлигига Инвестиция дастури доирасида ажратилган маблағларнинг иқтисод қилинган қисми ҳисобидан

2020 йил

Мактабгача таълим вазирлиги, Фарғона вилояти ҳокимлиги

52.

Туманда 10 та оилавий шаклдаги мактабгача таълим ташкилотини ташкил этиш, 11 та мактабгача таълим ташкилотининг бўш турган хоналарини таъмирлаш орқали қўшимча гуруҳлар очиб, туманда мактабгача таълим тизимига жорий йил якунларига кўра болаларни қамраб олиш кўрсаткичини 37,4 фоиздан 53 фоизга етказиш.

Лойиҳа-смета ҳужжатлари асосида

Ташаббускорларнинг ўз маблағлари

2020 йил

Мактабгача таълим вазирлиги, Фарғона вилояти ҳокимлиги

53.

2020 йилда "Шарқобод" МФЙдаги 14-сон мактабгача таълим ташкилотини реконструкция қилишm

2021 йилда "Қақир" МФЙ ҳудудида янги давлат мактабгача таълим ташкилотини қуриш.

Лойиҳа-смета ҳужжатлари асосида




Лойиҳа-смета ҳужжатлари асосида

2020 йилда Мактабгача таълим вазирлигига, Инвестиция дастури доирасида ажратилган маблағларнинг иқтисод қилинган қисми ҳисобидан,

Инвестиция дастури доирасида

2020 йил





2021 йил

Мактабгача таълим вазирлиги, Иқтисодий тараққиёт ва камбағалликни қисқартириш вазирлиги, Қурилиш вазирлиги, Молия вазирлиги, Фарғона вилояти ҳокимлиги

54.

"Сарибозорча" МФЙ ҳудудида 25-сон мактабга қўшимча 240 ўринли янги бино қуриш.




2021 йилда "Офтобру" ҳудудида 220 ўринли янги мактаб қуриш, 4, 18, 25-сон мактабларни реконструкция қилиш, 1-сон мактаб биноларини мукаммал таъмирлаш.

2,5







Лойиҳа смета ҳужжатлари асосида

2020 йилда Халқ таълим вазирлигига Инвестиция дастури доирасида ажратилган маблағларнинг иқтисод қилинган қисми ҳисобидан


Инвестиция дастури доирасида

2020 йил







2021 йил

Фарғона вилояти ҳокимлиги, Халқ таълими вазирлиги, Иқтисодий тараққиёт ва камбағалликни қисқартириш вазирлиги, Қурилиш вазирлиги, Молия вазирлиги

55.

Тумандаги хорижий давлатлар дипломларига эга бўлган фуқароларни рўйхатларини шакллантириш, дипломларини нострификация қилишга кўмаклашиш.

-

-

Доимо

Таълим сифатини назорат қилиш давлат инспекцияси, Олий ва ўрта махсус таълим вазирлиги

56.

Туман тиббиёт бирлашмасининг 25 ўринли юқумли касалликлар шифохонасини реконструкция қилиш.

Кардиология, эндокринология, неврология, травматология ва болалар бўлимлари биноси ҳамда "Ленбург" ва "Мулғон" қишлоқ врачлик пунктлари биносини янгидан қуриш ва 7 та мавжуд қишлоқ врачлик пунктлари биноларини реконструкция қилиш.

3,6




Лойиҳа смета ҳужжатлари асосида

2020 йилги Инвестиция дастури доирасида



Инвестиция дастури доирасида

2020 йил




2021 йил ва келгуси йилларда

Соғлиқни сақлаш вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги

57.

Туман касалхонасини зарур замонавий тиббий ускуналар ва махсус жиҳозланган автотранспорт (реанимобиль), тез тиббий ёрдам бригадаларини замонавий тиббий жиҳозлар ва кислород ишлаб чиқариш мини станцияси билан таъминлаш.

1,5

2020 йилги Инвестиция дастури доирасида Соғлиқни сақлаш муассасаларини тиббий асбоб ускуналари учун ажратилган маблағларни иқтисод қилинган маблағлари ҳисобидан

2020 йил

Соғлиқни сақлаш вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги

58.

Тумандаги марказий шифохонани Соғлиқни сақлаш вазирлиги, Фарғона вилояти соғлиқни сақлаш бошқармаси ҳамда республика тиббиёт марказлари ўртасида замонавий ахборот технологияларини қўллаган ҳолда телемедицина тизимини жорий этиш.

Лойиҳа-смета ҳужжатлари асосида

Ахборот технологиялари ва коммуникацияларини ривожлантириш вазирлигининг бюджетдан ташқари маблағлари ҳисобидан

2020 йил сентябрь

Соғлиқни сақлаш вазирлиги, Ахборот технологиялари ва коммуникацияларини ривожлантириш вазирлиги, "Ўзбектелеком" АК

59.

Тор соҳа мутахассислар таъминотини яхшилаш ва аҳолига ихтисослаштирилган тиббий хизмат кўрсатиш сифатини ошириш мақсадида Сўх туманида фаолият юритаётган тиббиёт ходимларининг малака оширишлари учун керакли шарт-шароитлар яратиш, клиник ординатура ва магистратура босқичларига қўшимча имтиёзли квоталар ажратиш.

-

Давлат грантлари бўйича квоталарни ошириш лимитлари доирасида

2020 йил

Соғлиқни сақлаш вазирлиги, Олий ва ўрта махсус таълим вазирлиги

60.

Тумандаги мулкчилик шаклидан қатъий назар барча дорихоналарга дори-дармон воситаларни имтиёзли равишда марказлашган тартибда етказиб бериш ҳамда аҳоли кўп яшайдиган ("Демурсад", "Ғазноб", "Чашма" МФЙ) ҳудудларда эҳтиёждан келиб чиққан ҳолда қўшимча дорихоналар ташкил этиш.

Ҳисоб-китобларга мувофиқ

Ташаббускорларнинг ўз маблағлари

2020 йил якунига қадар

Соғлиқни сақлаш вазирлиги, Фармацевтика тармоғини ривожлантириш агентлиги, "Дори-дармон" АК

61.

Туман касб-ҳунар мактаби биносида тумандаги мактаб битирувчиларини олий таълим муассасаларига ўқишга киришлари учун табиий ва аниқ фанлар бўйича тайёрлов курсларини ташкил этиш.

Ҳисоб-китобларга мувофиқ

Фарғона вилоятидаги олий таълим муассасаларининг бюджетдан ташқари жамғармалари маблағлари

2020 йил

Олий ва ўрта махсус таълим вазирлиги, Фарғона вилояти ҳокимлиги, Халқ таълими вазирлиги

62.

Рақамли технологиялар ўқув марказини ташкил этиш ҳамда мактаблардаги информатика синфларида компьютер саводхонлиги, дастурлаш, робототехника ва бошқа тўгаракларни ташкил этиш.

Ҳисоб-китобларга мувофиқ

Ташаббускорларнинг ўз маблағлари

2020 йил декабрь

Фарғона вилояти ҳокимлиги, Ахборот технологиялари ва коммуникацияларини ривожлантириш вазирлиги, Халқ таълими вазирлиги

63.

Маҳалла фуқаролар йиғинлари иш фаолиятини яхшилаш мақсадида ўз балансига эга бўлмаган:

11 та маҳалла фуқаро йиғини учун хизмат биноларини давлат-хусусий шериклик асосида қуриш;

4 та маҳалла фуқаро йиғини биносини Фарғона вилояти маҳаллий бюджети маблағлари ҳисобидан қуриш;

5 та маҳалла фуқаро йиғини биноларини капитал таъмирлаш, 27 та маҳалла фуқаролар йиғинларини компьютер жамланмалари ва мебель жиҳозлари билан таъминлаш.

Лойиҳа-смета ҳужжатлари асосида



Ташаббускорларнинг ўз маблағлари

Фарғона вилояти маҳаллий бюджетининг қўшимча манбалари ҳисобидан

"Маҳалла" хайрия жамоат фонди маблағлари



2020 йил



2020-2021 йиллар



2020 йил

Маҳалла ва оилани қўллаб қувватлаш вазирлиги, Фарғона вилояти ҳокимлиги

64.

Ёшларнинг бўш вақтларини унумли ўтказиш мақсадида туман марказида ёшлар истироҳат боғи ва маданий-маърифий тадбирларни ўтказиш учун замонавий жиҳозланган ёзги амфитеатрни ташкил этиш.

8,0

Фарғона вилояти маҳаллий бюджети ва Ёшлар ишлари агентлиги маблағлари

2021 йил

Фарғона вилояти ҳокимлиги, Ёшлар ишлари агентлиги, Маданият вазирлиги

65.

Туманда "Ёшлар спорт комплекси"ни ташкил этиш.

Сўх тумани болалар-ўсмирлар спорт мактабининг "Ровон" шаҳарчасида жойлашган мавжуд бино ва иншоотлари ҳамда очиқ ўйингоҳини тўлиқ реконструкция қилиб ва унинг негизида Сўх тумани 2-сон болалар ва ўсмирлар спорт мактаби фаолиятини йўлга қўйиш.

Лойиҳа-смета ҳужжатлари асосида

Инвестиция дастури доирасида

2021 йил

Жисмоний тарбия ва спорт вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги

66.

"Офтобру" МФЙ ҳудудида жойлашган собиқ Ижтимоий-иқтисодий ва педагогика касб-ҳунар коллежи биносининг ҳозирда фаолият кўрсатмаётган ёпиқ спорт зал биносини туман болалар-ўсмирлар спорт мактабига бепул ўтказиш ва болалар-ўсмирлар спорт мактабининг мавжуд бино ва иншоотларини реконструкция қилиш.

Лойиҳа-смета ҳужжатлари асосида

Инвестиция дастури доирасида

2021 йил

Жисмоний тарбия ва спорт вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги

67.

Ўрта махсус маълумотли 7 нафар тренерларни Ўзбекистон давлат жисмоний тарбия ва спорт университетининг махсус сиртқи таълим шаклига мақсадли қабул қилиш ва жисмоний тарбия ва спорт бўйича мутахассисларни 34 нафарига тренерлик фаолияти билан шуғулланиши учун бепул асосда рухсатнома бериш.

-

-

2020/2021 ўқув йили

Жисмоний тарбия ва спорт вазирлиги, Олий ва ўрта махсус таълим вазирлиги

IV. ҚИШЛОҚ ХЎЖАЛИГИ ЕРЛАРИ ВА АҲОЛИ ТОМОРҚАЛАРИНИ СУВ ТАЪМИНОТИНИ

ЯХШИЛАШ, ФОЙДАЛАНИЛМАЁТГАН ЕРЛАРНИ ЎЗЛАШТИРИШ ҲАМДА

СЕЛ-ТОШҚИН ОҚИБАТЛАРИНИ ОЛДИНИ ОЛИШ

68.

Сўх тумани Қайроқ массивидаги 1 448 гектар яйлов майдонларини ўзлаштириш учун уч кўтармали "Қайроқ" насос станциясини босқичма-босқич қуриш.

10,0



80,7

Инқирозга қарши курашиш жамғармаси маблағлари

Инвестиция дастури доирасида

2020 йил




2021-2023 йиллар

Сув хўжалиги вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги, Фарғона вилояти ҳокимлиги

69.

Сўх тумани Ҳушёр ширкат хўжалиги Бўстон ҳудудидаги 600 гектар экин ер майдонлари ва 100 гектар аҳоли томорқаларини кафолатли сув билан таъминлаш учун "Ҳушёр-1" ва "Ҳушёр-2" насос станцияларини таъмирлаш, 1 дона янги насос агрегатини ўрнатиш ва 1,5 км узунликдаги юқори кучланишли электр линияси тортиш.

1,3

Инқирозга қарши курашиш жамғармаси маблағлари

2020 йил сентябрь

Сув хўжалиги вазирлиги, Фарғона вилояти ҳокимлиги, Иқтисодий тараққиёт ва камбағалликни қисқартириш вазирлиги, Молия вазирлиги

70.

Туманнинг "Варган", "Касмидон", "Самидон", "Малбут", "Девайрон", "Тоён" ва "Ҳушёр" массивларидаги фойдаланишдан чиқиб кетган 336 гектар суғориладиган ер майдонларини 11 та тик суғориш қудуқлари ва насос агрегатларини қуриш орқали ўзлаштириш.

Бунда "Ўзбекистон темир йўллари" АЖ томонидан 2 та бурғулаш техникасини ажратиш.

3,5

Инқирозга қарши курашиш жамғармаси маблағлари

2020 йил сентябрь

Сув хўжалиги вазирлиги, Фарғона вилояти ҳокимлиги, Қишлоқ хўжалиги вазирлиги, "Давергеодезкадастр" қўмитаси, Давлат геология ва минерал ресурслар қўмитаси, "Ўзбекистон темир йўллари" АЖ

71.

4 525 та хонадоннинг 462 гектар томорқа ер майдонларини кафолатли сув билан таъминлаш мақсадида 12 та тик қудуқ қазиш ва "Шарқобод" ҳудудидаги мавжуд насос агрегатларни тўлиқ реконструкция қилиш.

5,4

Инвестиция дастури доирасида

2021-2022 йиллар

Сув хўжалиги вазирлиги, Фарғона вилояти ҳокимлиги, Қишлоқ хўжалиги вазирлиги, "Давергеодезкадастр" қўмитаси, Давлат геология ва минерал ресурслар қўмитаси

72.

Лойиҳа институтларини жалб қилган ҳолда "Жавпоя" массивидаги адирлик ер майдонларини ўзлаштиришнинг иқтисодий самарадорлиги бўйича хулоса тайёрлаш.

Ҳисоб-китоблар асосида

Ташаббускорларнинг ўз маблағлари

2020 йил сентябрь

Қишлоқ хўжалиги вазирлиги, "Давергеодезкадастр" қўмитаси, Сув хўжалиги вазирлиги, Фарғона вилояти ҳокимлиги, Давлат геология ва минерал ресурслар қўмитаси

73.

Туманда барча турдаги техникаларга бўлган талабни аниқлаш ва талаб этиладиган техникаларни 2020-2021 йилларда тижорат банкларининг кам фоизли кредитлари ёки лизинг асосида етказиб бериш.

Ҳисоб-китоблар асосида

Лизинг ташкилоти маблағлари

2020 йил, сентябрь

Қишлоқ хўжалиги вазирлиги, "Ўзагролизинг" АЖ, Фарғона вилояти ҳокимлиги, тижорат банклари

74.

2020 йилда 9,5 км ва 2021 йилда 12,4 км сел йўлларини таъмирлаш ва қирғоқларни мустаҳкамлаш ишларини амалга ошириш.

Жами 27,1 млрд сўм, шундан 2020 йилда - 9,4 млрд сўм (шундан 3,3 млрд сўми Инқирозга қарши курашиш жамғармасидан), 2021 йилда - 17,7 млрд сўм

Инқирозга қарши курашиш жамғармаси ва Сел тошқини оқибатларини бартараф қилиш учун Ўзбекистон Республикасининг республика бюджетидан ажратиладиган маблағлар

2020-2021 йиллар

Фарғона вилояти ҳокимлиги, Иқтисодий тараққиёт ва камбағалликни қисқартириш вазирлиги, Молия вазирлиги, Сув хўжалиги вазирлиги, Фавқулодда вазиятлар вазирлиги

75.

Сўх тумани "Чашма" МФЙ ҳудудидаги "Обиширсой" устида жойлашган "Тариқ" кўпригини янгидан қуриш.

1,9

Ўзбекистон Республикасининг республика бюджети (Фарғона вилоятини ижтимоий-иқтисодий ривожлантириш учун кўзда тутилган маблағлар ҳисобидан)

2020 йил

Автомобиль йўллари қўмитаси, Фарғона вилояти ҳокимлиги, Сув хўжалиги вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги

V. ҲУКУМАТЛАРАРО КОМИССИЯЛАР УЧРАШУВЛАРИДА

МУҲОКАМА ҚИЛИНАДИГАН МАСАЛАЛАР

76.

Ўзбекистон - Қирғизистон Давлат чегаралари делимитация масаласини ҳал этиш.

-

-

Томонлар келишувига асосан

Ташқи ишлар вазирлиги, "Давергеодезкадастр" қўмитаси, ДХХ Чегара қўшинлари, Андижон, Наманган ва Фарғона вилоятлари ҳокимликлари

77.

Фарғона вилоятининг Риштон туманидан Қирғизистон ҳудудидан ўтувчи Сўх туманига автомобиль йўлини очиш масаласини кўриб чиқиш.

-

-

Томонлар келишувига асосан

Ташқи ишлар вазирлиги, Транспорт вазирлиги, Фарғона вилоят ҳокимлиги, Давлат божхона қўмитаси, ДХХ Чегара қўшинлари

78.

Қирғизистон ҳудудидаги яйловлардан фойдаланиш масаласини кўриб чиқиш.

-

-

Томонлар келишувига асосан

"Давергеодезкадастр" қўмитаси, Давлат экология қўмитаси, Ўрмон хўжалиги давлат қўмитаси, Ветеринария ва чорвачиликни ривожлантириш давлат қўмитаси, Фарғона вилояти ҳокимлиги, Ташқи ишлар вазирлиги, ДХХ Чегара қўшинлари




Ўзбекистон Республикаси

Президентининг

2020 йил 8 августдаги

ПҚ-4798-сон қарорига

2-ИЛОВА



2020-2021 йилларда Фарғона вилоятининг

Сўх туманини комплекс ижтимоий-иқтисодий

ривожлантириш чора-тадбирлари дастурини

амалга ошириш бўйича республика ишчи гуруҳи

ТАРКИБИ

1. А.Н. Арипов

-

Ўзбекистон Республикасининг Бош вазири, Республика ишчи гуруҳи раҳбари

2. А. Ж. Раматов

-

Ўзбекистон Республикаси Бош вазирининг биринчи ўринбосари, Республика ишчи гуруҳи раҳбари ўринбосари

3. Ш.М. Ғаниев

-

Фарғона вилояти ҳокими

4. Б.И. Закиров

-

қурилиш вазири

5. М.Х. Салиев

-

уй-жой коммунал хизмат кўрсатиш вазири

6. Н.Б. Хусанов

-

бандлик ва меҳнат муносабатлари вазири

7. Ш.М. Содиқов

-

ахборот технологиялари ва коммуникацияларини ривожлантириш вазири

8. Ж.А. Ходжаев

-

қишлоқ хўжалиги вазири

9. Ш.Р. Хамраев

-

сув хўжалиги вазири

10. А.Ж. Ортиқов

-

иқтисодий тараққиёт ва камбағалликни қисқартириш вазирининг биринчи ўринбосари

11. И.Р. Махкамов

-

транспорт вазирининг биринчи ўринбосари вазифасини бажарувчи

12. И.Т. Неъматов

-

ташқи ишлар вазири ўринбосари

13. Н.Қ. Холмуродов

-

инвестициялар ва ташқи савдо вазири ўринбосари

14. А.Я. Хайдаров

-

молия вазири ўринбосари

15. С.А. Холхўжаев

-

Марказий банк раисининг ўринбосари

16. М.Б. Азимов

-

Давлат божхона қўмитаси раиси

17. Х.С. Тўрахўжаев

-

"Давергеодезкадастр" қўмитаси раиси

18. А.А. Абдувалиев

-

Автомобиль йўллари қўмитаси раиси в.б.

19. С. Х. Бекенов

-

Давлат активлари бошқариш агентлиги директори

20. У.М. Мустафоев

-

"Ҳудудий электр тармоқлари" АЖ раиси

21. Б.Б. Эшмуратов

-

"Ҳудудгазтаъминот" АЖ раиси

22. А.И. Икрамов

-

Савдо-саноат палатаси раиси

23. Лавозимига кўра

-

тижорат банклари раҳбарлари

24. Ш.А. Абидов

-

Вазирлар Маҳкамасининг котибият мудири, Республика ишчи гуруҳи котиби

Қонун ҳужжатлари маълумотлари миллий базаси (www.lex.uz),

2020 йил 8 август


"Халқ сўзи", 2020 йил 9 август