Ер ости сувларига қудуқларни бурғилаш учун рухсатнома бериш бўйича давлат хизматлари кўрсатишнинг Маъмурий регламенти (ЎзР ВМ 08.01.2021 й. 9-сон қарорига 2-илова)

Функция недоступна

Вазирлар Маҳкамасининг

2021 йил 8 январдаги

9-сон қарорига

2-ИЛОВА

Ер ости сувларига қудуқларни бурғилаш учун рухсатнома

бериш бўйича давлат хизматлари кўрсатишнинг

МАЪМУРИЙ РЕГЛАМЕНТИ

1-БОБ. УМУМИЙ ҚОИДАЛАР

1. Ушбу Регламент ер ости сувларига қудуқларни бурғилаш фаолияти билан шуғулланувчи юридик шахсларга "Лицензия" ахборот тизими орқали ер ости сувларига қудуқларни бурғилаш учун рухсатнома (кейинги ўринларда - рухсатнома) бериш бўйича давлат хизматларини кўрсатиш тартибини белгилайди.

Ушбу Регламентда қуйидаги асосий тушунчалардан фойдаланилади:

ариза берувчи - ер ости сувларига қудуқларни бурғилаш учун рухсатнома олувчи юридик шахс;

буюртма берувчи - ер ости сувларига қудуқларни бурғилашга буюртма берувчи юридик ёки жисмоний шахс.

2. Ушбу Регламентнинг асосий мақсади ер ости сувларига қудуқларни бурғилаш билан боғлиқ жараёнларни тартибга солиш, бурғи қудуқлари ҳисобини юритиш, ер ости сувларига ноқонуний қудуқларни бурғилаш фаолиятини назорат қилиш ҳамда ер ости сувлари, биринчи навбатда, чучук ер ости сувлари захираларини муҳофаза қилишдан иборат.

3. Рухсатнома Ўзбекистон Республикаси Давлат геология ва минерал ресурслар қўмитаси (кейинги ўринларда - Давлат геология қўмитаси) томонидан "Лицензия" ахборот тизими ёки Ўзбекистон Республикаси Ягона интерактив давлат хизматлари портали (кейинги ўринларда - ЯИДХП) орқали ҳар бир бурғи қудуғи учун алоҳида берилади.

4. Қуйидагилар учун:

жисмоний шахсларга чуқурлиги 25 (йигирма беш) метргача бўлган ер ости сувларига қудуқларни бурғилаш учун ва суткасига кўпи билан 5 (беш) куб метр ҳажмдаги ер ости сувларини шахсий эҳтиёжлар учун якка тартибда олишга мўлжалланганда;

Давлат геология қўмитаси тизимдаги гидрогеология корхоналари (кейинги ўринларда - гидрогеология корхоналари) учун ҳар йилги минерал хомашё базасини ривожлантириш ва қайта тўлдириш давлат дастури доирасида ер ости сувларига қудуқларни бурғилаш ишлари амалга оширилганда рухсатнома олиш талаб қилинмайди.

5. Ушбу Регламентнинг 4-бандида назарда тутилгандан бошқа ҳар қандай ҳолатларда рухсатнома олмасдан ер ости сувларига қудуқларни бурғилаш қатъиян тақиқланади.

6. Рухсатноманинг амал қилиш муддати бурғилаш ишларини бажариш даврига, лекин икки йилдан ошмайдиган давр учун берилади.

7. Рухсатнома мазкур Регламентга 1-иловага мувофиқ схема асосида берилади.

2-БОБ. ЕР ОСТИ СУВЛАРИГА ҚУДУҚЛАРНИ БУРҒИЛАШ

УЧУН РУХСАТНОМА БЕРИШ ТАРТИБИ

8. Ариза берувчи рухсатнома олиш учун "Лицензия" ахборот тизими ёки давлат хизматларидан электрон тарзда фойдаланиш учун ЯИДХПда рўйхатдан ўтади.

9. "Лицензия" ахборот тизими ёки ЯИДХП орқали мурожаат қилинган ҳолларда эса ариза берувчи мустақил равишда ушбу Регламентга 2-иловага мувофиқ шаклдаги аризани электрон шаклда тўлдиради.

Аризага қуйидаги ҳужжатлар илова қилинади:

ер ости сувларига қудуқларни бурғилаш учун буюртма берувчи ва ариза берувчи ўртасида тузилган шартнома нусхаси;

ер ости сувларига қудуқларни бурғилаш учун лойиҳа ҳужжатларининг электрон нусхалари;

ариза берувчига тегишли бўлган бурғилаш ускунасининг мавжудлиги тўғрисида маълумот (ускуна техник паспорти ёки уни ижарага олганлиги тўғрисида шартнома нусхаси).

Ариза берувчидан ушбу бандда кўрсатилмаган маълумотларни, шунингдек, бошқа ҳужжатларни тақдим этишни талаб қилиш қатъиян тақиқланади.

10. Аризага зарур маълумотлар расмийлаштирилиб, киритилгандан сўнг ариза берувчи уни ўз электрон рақамли имзоси (кейинги ўринларда - ЭРИ) билан тасдиқлайди ёки Мобил-ID тизими орқали тасдиқлайди.

11. Давлат хизматларини кўрсатиш учун базавий ҳисоблаш миқдорининг 30 фоизи миқдорида йиғим ундирилади.

12. Давлат хизматларини кўрсатиш учун ундирилган йиғим суммаси қуйидаги тартибда тақсимланади:

а) "Лицензия" ахборот тизими орқали мурожаат этилганда:

20 фоизи - Ўзбекистон Республикаси Адлия вазирлигининг Давлат хизматларини ривожлантириш жамғармаси шахсий ғазна ҳисобварағига;

0,5 фоизи - Ахборот-коммуникация технологияларини ривожлантириш жамғармасининг электрон ҳукумат ва рақамли иқтисодиётнинг идоралараро лойиҳаларини молиялаштириш бўйича махсус ҳисобварағига;

қолган маблағлар тўлиқ рухсатнома берувчи ваколатли органнинг бюджетдан ташқари жамғармасига ўтказилади;

б) ЯИДХП орқали мурожаат этилганда:

10 фоизи - Ўзбекистон Республикаси Адлия вазирлигининг Давлат хизматларини ривожлантириш жамғармаси шахсий ғазна ҳисобварағига;

11,25 фоизи - Ахборот-коммуникация технологияларини ривожлантириш жамғармасининг электрон ҳукумат ва рақамли иқтисодиётнинг идоралараро лойиҳаларини молиялаштириш бўйича махсус ҳисобварағига;

қолган маблағлар тўлиқ рухсатнома берувчи ваколатли органнинг бюджетдан ташқари жамғармасига ўтказилади.

Давлат хизматларини кўрсатиш учун йиғим тўланганлиги Ягона биллинг тизими орқали тасдиқланади.

13. Юридик шахслар давлат хизматларидан фойдаланиш учун ЯИДХП орқали мурожаат этганда, ундириладиган йиғимнинг 90 фоизи миқдори тўланади.

14. Ариза берувчи томонидан ҳужжатларнинг тўлиқ бўлмаган ҳажмда тақдим этилганлиги, ариза ва унга илова қилинадиган ҳужжатларда нотўғри ёки бузиб кўрсатилган маълумотларнинг мавжудлиги, рухсатнома бериш талаблари ва шартларининг бузилиши ҳамда давлат хизматини кўрсатиш учун йиғимни тўламаслик давлат хизматлари кўрсатишни рад этиш учун асос ҳисобланади.

Шунингдек, ариза берувчи томонидан бурғиланган қудуқнинг техник паспорти тақдим этилмаслиги навбатдаги рухсатномани беришни рад этишга сабаб бўлади.

Аризани қабул қилишни бошқа сабабларга кўра рад этиш қатъиян тақиқланади.

15. Ариза берувчи давлат хизматларидан фойдаланишда уларни кўрсатишнинг ҳар қандай босқичида бош тортиш ҳуқуқига эга. Ариза берувчи давлат хизматларидан фойдаланишдан бош тортганда, унинг аризаси кўриб чиқилмасдан қолдирилади ва тўланган йиғим суммаси қайтарилмайди.

16. Ариза берувчи томонидан ариза тасдиқлангандан сўнг ушбу Регламентнинг 9-бандида назарда тутилган маълумотлар илова қилинган ҳолда, автоматик тарзда Давлат геология қўмитасига электрон шаклда юборилади.

17. Давлат геология қўмитаси ариза иловалар билан биргаликда тушгандан сўнг икки иш куни мобайнида ер ости сувларига қудуқ бурғилашнинг мақсадга мувофиқлигини ўрганиб чиқади ва гидрогеология корхоналарига электрон шаклда юборади.

18. Гидрогеология корхоналари икки иш куни мобайнида танланган ер майдони ва таклиф этилган қудуқ конструкциясини ўрганиб чиқади ва ўрганиш натижасида тегишли маълумот тайёрлаб, Давлат геология қўмитасига электрон шаклда юборади.

19. Давлат геология қўмитаси гидрогеология корхоналари томонидан тегишли маълумот асосида бир иш куни мобайнида рухсатнома бериш ёки беришни рад этиш бўйича хулоса тайёрлаб, рухсатномани ушбу Регламентга 3-иловага мувофиқ шаклда QR-код (матрик штрихли код) қўйиб расмийлаштиради ва ўз ЭРИ билан тасдиқлайди ҳамда "Лицензия" ахборот тизими ёки ЯИДХП орқали юборади.

20. Рухсатнома бериш рад этилганда, ариза берувчига рад этиш сабаблари кўрсатилган тегишли билдиришнома илова қилинади.

Ариза берувчи ўн иш куни давомида келтирилган сабабларни бартараф этиб, ҳужжатларни қайта кўриб чиқиш учун "Лицензия" ахборот тизимига ёки ЯИДХП орқали тақдим этиши мумкин.

Ариза берувчи рухсатнома бериш рад этилишига асос бўлган камчиликларни бартараф қилиб, ҳужжатларни қайта кўриб чиқиш учун тақдим этганда такроран пул ундирилмайди.

Камчиликлар бартараф этилганлиги ҳақидаги ариза олинган кундан бошлаб уч иш куни давомида томонидан тақдим этилган ҳужжатлар Давлат геология қўмитаси такроран кўриб чиқилади.

Рухсатнома бериш бўйича ҳужжатларни такроран кўриб чиқишда Давлат геология қўмитаси томонидан аввалги рад этиш учун асосларда баён этилмаган сабаблар келтирилишига йўл қўйилмайди, аввал кўрсатилган сабаблар бартараф этилганлигини тасдиқловчи маълумотлар билан боғлиқ рад этиш сабаблари келтирилиши бундан мустасно.

21. Рухсатнома "Лицензия" ахборот тизими ёки ЯИДХП орқали автоматик тарзда электрон шаклда ариза берувчининг электрон манзилига юборилади.

22. Рухсатномага унинг ажралмас қисми ҳисобланадиган ва ушбу Регламентнинг 3-бобига мувофиқ талаб ва шартларга амал қилиниши ҳақида ариза берувчининг мажбуриятлари тўғрисидаги ҳужжатлар илова қилинади.

3-БОБ. РУХСАТНОМА БЕРИШ ТАЛАБЛАРИ ВА ШАРТЛАРИ

23. Рухсатнома олган ариза берувчи рухсат беришнинг қуйидаги талаб ва шартларига риоя қилиши шарт:

гидрогеологик хулоса асосида тайёрланган ер ости сувларига қудуқларни бурғилаш технологияси ва лойиҳа параметрларига амал қилиш;

ер ости сувларига қудуқ бурғилашда меҳнатни муҳофаза қилиш ва саноат хавфсизлигини таъминлаш бўйича қонунчилик талабларига риоя қилиш;

экология ва атроф-муҳитни муҳофаза қилиш талабларини бажариш;

қудуқда сув чиқариш тугаллангандан сўнг ер ости сувларининг талаб этиладиган сифат ва таркибга мувофиқлигини аниқлаш учун лаборатория таҳлилини ўтказиш;

қудуқни санитария-муҳофаза зонасини ўрнатиш учун жиҳозлаш;

бурғилаш ишлари якунлангандан сўнг "Лицензия" ахборот тизими ёки ЯИДХП орқали бурғи қудуғини ҳисобга қўйиш учун техник паспортни тақдим этиш.

24. Ариза берувчи ер ости сувларига қудуқларни бурғилаш ишлари якунлангандан сўнг бир ой муддатда ушбу Регламентга 4-иловада келтирилган шакл бўйича бурғи қудуғининг техник паспортини тайёрлаши ҳамда "Лицензия" ахборот тизими ёки ЯИДХП орқали қудуқни ҳисобга қўйиш учун техник паспортни тақдим этиши шарт. Техник паспортда ер ости сувлари ҳақида маълумот, қудуқнинг конструкцияси ва қирқимнинг геологик-гидрогеологик тавсифи батафсил ва тўлиқ ёритилган бўлиши керак.

Ариза берувчи буюртма берувчи билан тузилган шартномада бурғилаш ишлари мобайнида ёки бурғилаш тугаллангандан сўнг бажарилмаган қўшимча тадқиқот ишлари (тажриба синов ишлари, геофизик каротаж, сувнинг лаборатория таҳлили кабилар) тўғрисидаги маълумотларни келтириб ўтиши зарур. Хўжалик-ичимлик мақсадлари учун ер ости сувларига қудуқ бурғилангандан сўнг тажриба-синов ва лаборатория таҳлили ишларини ўтказиш мажбурий ҳисобланади.

Белгиланган шаклга мос келмайдиган техник паспортнинг қабул қилинишига йўл қўйилмайди.

Бурғи қудуғининг техник паспортини рўйхатга олиш бўйича кўрсатилган давлат хизматлари учун йиғим ундирилмайди.

25. Давлат геология қўмитасининг ҳудудий гидрогеология станциялари (кейинги ўринларда - гидрогеология станциялари) "Лицензия" ахборот тизими ёки ЯИДХП орқали тақдим этилган техник паспортни икки иш куни мобайнида кўриб чиқади, кўриб чиқиш натижалари бўйича қудуққа тартиб рақамини бериб, уни ҳисобга олади ва ўз ЭРИ билан тасдиқлаб, "Лицензия" ахборот тизимига бевосита ёки ЯИДХП орқали юборади.

Қудуққа тартиб рақам берилишида қудуқнинг эгаси сувдан фойдаланувчи ёки сув истеъмолчиси сифатида ер ости сувларидан махсус фойдаланиш ёки махсус истеъмол қилиш учун рухсатнома олиши шартлиги бўйича тавсиялар қўшимча қилинади.

26. Техник паспорт "Лицензия" ахборот тизими ёки ЯИДХП орқали автоматик тарзда электрон шаклда ариза берувчининг электрон манзилига юборилади.

27. Рухсатнома олган ариза берувчи томонидан мазкур Регламентнинг 24-бандида белгиланган муддатда техник паспорт топширилмаган тақдирда, гидрогеология станциялари Давлат геология қўмитаси ҳузуридаги Кон-геология фаолиятини назорат қилиш инспекциясига рухсатнома бериш талаб ва шартларининг бажарилмаганлиги тўғрисида маълум қилади.

28. Техник паспортни "Лицензия" ахборот тизимига ёки ЯИДХПга топшириш орқали қудуқни рўйхатга қўймаслик, ер ости сувлари камайиши ва ифлосланишининг олдини олиш мақсадида қудуқнинг тугатилишига ёки ёпилишига (тампонажлашга) асос бўлади.

Бунда бурғиланган қудуқни тугатиш ёки тампонажлаш рухсатнома олган ариза берувчи маблағлари ҳисобидан амалга оширилади.

4-БОБ. РУХСАТНОМАНИ ҚАЙТА РАСМИЙЛАШТИРИШ,

УНИНГ АМАЛ ҚИЛИШИНИ ТЎХТАТИБ

ТУРИШ ЁКИ БЕКОР ҚИЛИШ

29. Рухсатнома олувчи - юридик шахс қайта ташкил қилинганда, унинг номи ёки жойлашган манзили (почта манзили) ўзгарганда, рухсатнома олувчи ёки унинг вориси қайта рўйхатдан ўтгандан сўнг етти иш куни мобайнида рухсатномани қайта расмийлаштириш тўғрисида ушбу маълумотларни тасдиқловчи ҳужжатларни илова қилган ҳолда, "Лицензия" ахборот тизимига ёки ЯИДХПга ариза топшириши шарт.

Рухсатномани қайта расмийлаштириш учун йиғим ундирилмайди.

30. Рухсатнома ариза олинган кундан бошлаб беш иш кунидан ортиқ бўлмаган муддатда Давлат геология қўмитаси томонидан қайта расмийлаштирилади.

31. Рухсатноманинг амал қилишини тўхтатиб туриш ва тўхтатиш, шунингдек, уни бекор қилиш Ўзбекистон Республикаси қонун ҳужжатларида белгиланган тартибда амалга оширилади.

5-БОБ. РУХСАТНОМА ОЛИНМАЙ БУРҒИЛАНГАН

ҚУДУҚЛАРНИ ҲИСОБГА ОЛИШ ЁКИ

ТУГАТИШ ТАРТИБИ

32. Рухсатнома олинмай бурғиланган қудуқларни ҳисобга олиш ёки тугатишнинг мақсадга мувофиқлиги гидрогеология станциялари томонидан қўшимча тадқиқотлар ўтказиш натижалари асосида белгиланади.

Қудуқ бурғилашнинг техник талаблари бўйича бурғиланган қудуқларни ҳисобга олишнинг мақсадга мувофиқлиги аниқланганда мазкур Регламентнинг 24, 25 ва 26-бандларида келтирилган ишлар амалга оширилади. Техник талабларга риоя қилинмай бурғиланган қудуқларни тугатишнинг мақсадга мувофиқлиги аниқланганда, улар гидрогеология станцияларининг тавсиялари асосида қудуқ эгасининг маблағлари ёки Ўзбекистон Республикаси Давлат бюджети (эгасиз қудуқлар учун) маблағлари ҳисобидан белгиланган тартибда тугатилади.

Фойдаланишга яроқли эгасиз қудуқлар Давлат геология қўмитаси бошчилигида экология органлари, сув, қишлоқ хўжалиги, маҳаллий ҳокимлик ва бошқа тегишли соҳа вакилларидан иборат ишчи гуруҳ қарори асосида янги сувдан фойдаланувчи ёки сув истеъмолчисига топширилади.

33. Рухсатнома олмасдан бурғиланган қудуқлар бўйича Давлат геология қўмитаси ҳузуридаги Кон-геология фаолиятини назорат қилиш инспекцияси давлат назоратини юритади ва ер ости сувларидан оқилона фойдаланишни ва уларнинг муҳофаза этилишини таъминлаш мақсадида ўрнатилган тартибда маъмурий жавобгарликка тортиш чораларини кўради.

6-БОБ. ЯКУНЛОВЧИ ҚОИДАЛАР

34. "Лицензия" ахборот тизими ва давлат хизматини кўрсатиш жараёнида иштирок этувчи ваколатли органлар ўз фаолиятини амалга ошириши натижасида олинган маълумотларнинг сир сақланишини таъминлайди.

35. Ўзбекистон Республикаси Адлия вазирлиги, Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари мазкур Регламент талаблари ижроси бўйича давлат органлари ва бошқа ташкилотлар фаолиятининг, шу жумладан, ЯИДХП орқали доимий назорат қилади ва мониторинг олиб боради.

36. Ариза берувчилар давлат органлари ва бошқа ташкилотлар ходимларининг ҳаракати (ҳаракатсизлиги) юзасидан қонун ҳужжатларида белгиланган тартибда шикоят қилишлари мумкин.

37. Ушбу Регламент талабларининг бузилишида айбдор бўлган шахслар қонун ҳужжатларида белгиланган тартибда жавоб берадилар.

Маъмурий регламентга

1-ИЛОВА

Ер ости сувларига қудуқларни бурғилаш учун рухсатнома

бериш бўйича давлат хизматлари кўрсатишнинг

СХЕМАСИ

        

Маъмурий регламентга

2-ИЛОВА

Ер ости сувларига қудуқларни

бурғилашга рухсатнома олиш учун

АРИЗА

Ариза берувчи-юридик шахс тўғрисида маълумот:

          

Маъмурий регламентга

3-ИЛОВА

O`ZBEKISTON RESPUBLIKASI

DAVLAT GEOLOGIYA VA MINERAL

RESURSLAR QO`MITASI

Yer osti suvlariga quduq burg`ilash uchun

RUXSATNOMA

uchun berildi.

2. Quduqning parametrlari:

boshlang`ich diametri______________ mm;

boshqa diametrga o`tish chuqurligi _______ m;

yakunlovchi diametr ___________ mm;

chuqurligi ____ m.

3. Yer osti suvlaridan _________________ kub.m/kun miqdorida olish uchun mo`ljallangan.

4. Ruxsatnomaning amal qilish muddati 20___ yil "____" ____________ gacha.

       

Маъмурий регламентга

4-ИЛОВА

ҳудудда ер ости сувларига бурғиланган

_________________-сон бурғи қудуғининг

ТЕХНИК ПАСПОРТИ

М.Ў.

М.Ў.

20_____ йил

1. Умумий маълумотлар

1.2. Қудуқ жойлашишининг географик координатлари (даража, мин., сек.):

Шимолий кенглик:____________________________________

Шарқий узунлик: _____________________________________

1.6. Рухсатномаларнинг рақами ва берилган вақти:

2. Бурғилаш ишларининг натижалари

2.1. Қудуқ кесимининг литологик тузилиши ҳақидаги қисқача маълумотлар:

2.3. Қудуқ обсадка қувурлари билан маҳкамланди:

2.4. Фильтр ______________ турда, d ______ мм ____________ м оралиқда ўрнатилган

2.5. Цементациялаш оралиғи _________________ м.

3. Сувни чиқариб олиш синови ҳақидаги маълумотлар

3.2. Сув кўтарувчи қувурнинг диаметри ва тушириш чуқурлиги (агар чуқурдаги насос бўлса, турини кўрсатиш, юкланиш чуқурликлари

3.3. Қудуқдаги сувнинг статистик сатҳлари:

чиқарилгунгача _______________м;

чиқарилгандан кейин _______________ м.

3.4. Чиқариш натижалари:

сувнинг сарфланиши Q _____ л/с, ўзи оқиб чиқишида унинг чиқарилгандан кейинги

сарфланишини кўрсатиш _______________________ л/с;

сув сатҳинингпасайиши: S ______________ м;

солиштирма дебит: Q/ S __________а/с.

3.5. Қудуққа сув кўтарувчи ускунани ўрнатиш бўйича тавсиялар (насос тури, маркаси ва юкланиш чуқурликлари

3.6. Қудуқнинг буюртмачига ва / ёки сувдан фойдаланувчига топширишдаги ҳолати

4. Сувнинг сифати ҳақида маълумот

        

        

5. Қудуқнинг техник паспортига иловалар

5.1. Қудуқнинг техник паспортига қуйидаги маълумотлар илова қилинган:

Қудуқнинг жойлашиш схемаси

Қудуқ конструкцияси

Лабораторияда ўтказилган сувнинг кимёвий таҳлил натижалари

      

Қонун ҳужжатлари маълумотлари миллий базаси (www.lex.uz),

2021 йил 9 январь