Ўзбекистон Республикаси Мудофаа вазирлиги Ахборот-коммуникация технологиялари ва алоқа ҳарбий институтининг илмий-тадқиқот фаолиятини ривожлантириш жамғармаси тўғрисида Низом (ЎзР ВМ 23.01.2021 й. 36-сон қарорига 2-илова)

Функция недоступна

Вазирлар Маҳкамасининг

2021 йил 23 январдаги

36-сон қарорига

2-ИЛОВА

Ўзбекистон Республикаси Мудофаа вазирлиги

Ахборот-коммуникация технологиялари ва алоқа

ҳарбий институтининг илмий-тадқиқот фаолиятини

ривожлантириш жамғармаси тўғрисида

НИЗОМ

1-БОБ. УМУМИЙ ҚОИДАЛАР

1. Мазкур Низом Ўзбекистон Республикаси Мудофаа вазирлиги Ахборот-коммуникация технологиялари ва алоқа ҳарбий институтининг илмий-тадқиқот фаолиятини ривожлантириш жамғармаси (кейинги ўринларда - Жамғарма) маблағларини шакллантириш ва улардан фойдаланиш, Жамғарма маблағларини бошқариш, шунингдек, ҳисоб ва ҳисоботини юритиш тартибини белгилайди.

2. Жамғарма юридик шахс ҳисобланмайди ва унинг маблағлари Ўзбекистон Республикаси Мудофаа вазирлиги Ахборот-коммуникация технологиялари ва алоқа ҳарбий институтининг (кейинги ўринларда - Институт) бюджетдан ташқари маблағларини сақлаш учун депозит ҳисобварағида жамланади ҳамда ушбу Низомда белгиланган мақсадларга сарфланади.

3. Жамғарма маблағларидан фойдаланиш Институт бошлиғи томонидан тасдиқланадиган ва Ўзбекистон Республикаси Мудофаа вазирлиги Молия-иқтисод бош бошқармасида белгиланган тартибда рўйхатга олинадиган йиллик даромадлар ва харажатлар сметаси асосида амалга оширилади.

4. Жамғарма фаолиятини бошқариш ва назорат қилиш Институт бошлиғи томонидан амалга оширилади.

5. Йил охирида Жамғарма маблағларининг қолдиқлари Ўзбекистон Республикаси Давлат бюджети даромадига киритилмайди ва келгуси молия йили учун Жамғарманинг даромадлар ва харажатлар сметасини тузишда ҳисобга олинади.

2-БОБ. ЖАМҒАРМА МАБЛАҒЛАРИНИ

ШАКЛЛАНТИРИШ ВА УЛАРДАН

ФОЙДАЛАНИШ

6. Жамғарма маблағлари қуйидагилар ҳисобига шакллантирилади:

Институт томонидан кўрсатиладиган пуллик хизматлар ҳисобидан тушадиган маблағлар;

юридик ва жисмоний шахсларнинг ҳомийлик хайриялари;

қонун ҳужжатлари билан тақиқланмаган бошқа манбалар.

7. Жамғарма маблағларидан:

а) 75 фоиздан кам бўлмаган миқдорда:

Институтнинг илмий-тадқиқот фаолиятини амалга оширувчи таркибий бўлинмалари моддий-техник базасини мустаҳкамлаш тадбирларига, шу жумладан:

миллий армияни ривожлантириш, Ўзбекистон Республикаси Қуролли Кучларининг жанговар шайлиги ва мудофаа салоҳиятини ривожлантириш соҳасидаги илмий-тадқиқот фаолиятига (ишларига);

Институтнинг илмий-тадқиқот фаолиятини амалга оширувчи таркибий бўлинмаларида илғор илмий тадқиқотлар ва қидирув ишларини ўтказиш учун принципиал жиҳатдан янги, замонавий юқори технологик жиҳозлар билан жиҳозланган илмий лабораторияларни ташкил қилиш бўйича тадбирларга;

Институтнинг илмий-тадқиқот фаолиятини амалга оширувчи таркибий бўлинмаларини замонавий асбоб-ускуналар билан қўшимча жиҳозлаш ҳамда зарур бўлган сарфлаш материаллари ва бутловчи буюмлар билан узлуксиз таъминлаш бўйича тадбирларга;

етакчи электрон илмий маълумотлар базаларидан эркин фойдаланишни таъминлаш ҳамда илмий натижаларни нашрларда, шу жумладан, халқаро нашриётларда босишга тайёрлаш бўйича харажатларни тўлашга;

техника, ҳарбий-техник мулк, илмий ва махсус адабиёт, модернизация қилиш ва таъмирлаш ҳамда илмий, илмий-тадқиқот ва инновацион фаолият режалари доирасида ўтказиладиган тадбирларни, халқаро ҳарбий ва ҳарбий-техник ҳамкорлик тадбирларини молиялаштиришга;

Институт ҳарбий хизматчилари, курсантлари ва Қуролли Кучлар ишчи ва хизматчилари томонидан олиб борилаётган, институт илмий кенгаши томонидан тасдиқланган инновацион, амалий, функционал илмий лойиҳаларни молиялаштиришга;

Институтнинг илмий-тадқиқот фаолиятини амалга оширувчи таркибий бўлинмаларига юкланган функцияларни амалга ошириш ва вазифаларни бажаришга йўналтирилган тадбирларга;

б) 25 фоиздан кўп бўлмаган миқдорда алоҳида ўрнак кўрсатган илмий-тадқиқот фаолиятини амалга оширувчи Институтнинг ҳарбий хизматчилари, Қуролли Кучлар хизматчиларини моддий рағбатлантириш бўйича тадбирларни молиялаштиришга, уларга илмий ютуқлари учун пул мукофотлари тўлаш ва уларни тақдирлаш учун қимматбаҳо совғалар, шу жумладан, эсдалик совғалари харид қилиш учун фойдаланилади.

3-БОБ. ЖАМҒАРМА МАБЛАҒЛАРИ БЎЙИЧА

ДАРОМАДЛАР ВА ХАРАЖАТЛАР СМЕТАСИНИ

ТАСДИҚЛАШ ҲАМДА САРФЛАШ

8. Жамғарманинг даромадлар ва харажатлар сметаси Институт бошлиғи томонидан тасдиқланади ва Ўзбекистон Республикаси Мудофаа вазирлиги Молия-иқтисод бош бошқармасида белгиланган тартибда рўйхатга олинади.

9. Жамғармадан маблағлар ажратиш ва уларни сарфлаш даромадлар ва харажатлар сметаси Ўзбекистон Республикаси Мудофаа вазирлиги Молия-иқтисод бош бошқармасида рўйхатга олинганидан сўнг амалга оширилади.

10. Жамғарманинг даромадлар ва харажатлар сметасига киритиладиган ўзгартиришлар белгиланган тартибда Ўзбекистон Республикаси Мудофаа вазирлиги Молия-иқтисод бош бошқармасида рўйхатга олинади.

11. Юридик ва жисмоний шахслар томонидан кўрсатилган ҳомийлик хайриялари тўлиқ суммаси, агар ҳомий билан аниқ мақсадлар учун йўналтирилиши келишилмаган бўлса, Институт илмий-тадқиқот фаолиятини амалга оширувчи таркибий бўлинмаларининг моддий-техник базасини мустаҳкамлаш учун сарфланади.

12. Жамғарманинг касса харажатлари тасдиқланган даромадлар ва харажатлар сметасининг параметрлари доирасида амалга оширилади.

4-БОБ. ЖАМҒАРМА МАБЛАҒЛАРИ

БЎЙИЧА ҲИСОБ ВА ҲИСОБОТ

13. Жамғарма маблағларини ҳисобга олиш белгиланган тартибда ва Ўзбекистон Республикаси Мудофаа вазирлигининг бюджетдан ташқари маблағлари рўйхати асосида юритилади.

14. Жамғарма маблағларидан фойдаланиш юзасидан ҳисобот белгиланган тартибда Институт бошлиғи томонидан Ўзбекистон Республикаси Мудофаа вазирлиги Молия-иқтисод бош бошқармасига тақдим этилади.

15. Институт бошлиғи ҳамда Институт молия бўлими бошлиғи қуйидагилар учун жавобгар ҳисобланадилар:

Жамғарма маблағларининг қонуний ва мақсадли йўналтирилиши;

Жамғарма маблағларининг тасдиқланган даромадлар ва харажатлар сметасига қатъий мувофиқ равишда сарфланиши;

Жамғарма маблағлари бўйича харажатларнинг тўғри ҳисобга олиниши;

Жамғарма маблағларидан оқилона фойдаланилиши;

юридик ва жисмоний шахслар (етказиб берувчилар) билан тузиладиган шартномаларнинг асосли ва қонун ҳужжатларига мувофиқ расмийлаштирилиши ва тузилиши;

товарлар (ишлар, хизматлар)нинг етказиб берилишини тасдиқлайдиган бирламчи ва бошқа ҳужжатларнинг ишончлилиги.

5-БОБ. ЯКУНЛОВЧИ ҚОИДАЛАР

16. Жамғарма маблағларининг тўғри шакллантирилиши ва улардан фойдаланилишини назорат қилиш Ўзбекистон Республикаси Мудофаа вазирлиги Молия-иқтисод бош бошқармаси ва Назорат-тафтиш бошқармаси, шунингдек, қонун ҳужжатларига мувофиқ бошқа назорат органлари томонидан амалга оширилади.

17. Мазкур Низом талабларининг бузилишида айбдор бўлган шахслар қонун ҳужжатларида белгиланган тартибда жавоб берадилар.

Қонун ҳужжатлари маълумотлари миллий базаси (www.lex.uz),

2021 йил 23 январь