ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

28.04.2021 й.

N 249

МАҲСУЛОТЛАР (ТОВАР ВА ХИЗМАТЛАР) ЯГОНА

ЭЛЕКТРОН МИЛЛИЙ КАТАЛОГИНИ ЖОРИЙ ЭТИШ,

ТАДБИРКОРЛИК СУБЪЕКТЛАРИ ЎРТАСИДА ТУЗИЛГАН

ШАРТНОМАЛАРНИ ЭЛЕКТРОН РЎЙХАТДАН ЎТКАЗИШ

ВА ТОВАР-МОДДИЙ БОЙЛИКЛАРНИ ОЛИШ УЧУН

ИШОНЧНОМАЛАРНИ ЭЛЕКТРОН РАСМИЙЛАШТИРИШ

ЧОРА-ТАДБИРЛАРИ ТЎҒРИСИДА

Ўзбекистон Республикаси Президентининг "Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида" 2020 йил 30 октябрдаги ПФ-6098-сон Фармонига мувофиқ, шунингдек, солиқ маъмуриятчилиги самарадорлигини ошириш ва солиқ тўловчилар фаолиятининг шаффофлигини таъминлаш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Давлат солиқ қўмитасининг (кейинги ўринларда - Давлат солиқ қўмитаси) бирламчи бухгалтерия ҳужжатларида маҳсулотларнинг (товар ва хизматларнинг) унификациялашган номларидан фойдаланиш, шу жумладан, товарларнинг штрих кодларини маҳсулотларнинг унификациялашган номларига босқичма-босқич автоматик равишда боғлаш тўғрисидаги таклифига розилик берилсин.

2. Қуйидагилар:

Маҳсулотлар (товар ва хизматлар) ягона электрон миллий каталоги 1-иловага мувофиқ;

Тадбиркорлик субъектлари ўртасида тузилган шартномаларни электрон рўйхатдан ўтказиш тартиби тўғрисидаги низом 2-иловага мувофиқ;

Товар-моддий бойликларни олиш учун ишончномаларни электрон расмийлаштириш тартиби тўғрисидаги низом 3-иловага мувофиқ;

Товар-транспорт юк хатларини электрон шаклда расмийлаштириш тартиби тўғрисидаги низом 3-1-иловага мувофиқ тасдиқлансин.

3. Вазирлар Маҳкамасининг "Солиқ хавфини бошқариш, солиқ хавфи мавжуд солиқ тўловчиларни (солиқ агентларини) аниқлаш ва солиқ текширувларини ташкил этиш ва ўтказиш тўғрисида" 2021 йил 7 январдаги 1-сон қарорига мувофиқ Маҳсулотлар (товар ва хизматлар) ягона электрон миллий каталоги (кейинги ўринларда - Каталог) бўйича идентификациялаш ва штрих кодлари акс эттирилиши бўйича ҳисобварақ-фактура шаклларига қўшимчалар киритилганлиги маълумот учун қабул қилинсин.

4. 2021 йил 1 июндан бошлаб қуйидагиларни ўз ичига олган тартиблар:

Ягона электрон шартномаларнинг ахборот порталида (кейинги ўринларда - Шартномалар портали) тадбиркорлик субъектлари ўртасида тузилган шартномаларни ихтиёрий равишда электрон рўйхатдан ўтказиш;

Шартномалар порталида рўйхатдан ўтган шартномалар асосида маҳсулотларнинг (товар ва хизматларнинг) унификациялашган номлари ва идентификациялаш кодларини ҳисобварақ-фактураларда автоматлаштирилган тарзда акс эттириш;

товар-моддий бойликларни олиш учун ишончномаларни электрон ҳужжат айланиш тизими операторлари ахборот тизими орқали шартнома ёки онлайн оферта асосида расмийлаштириш тажриба тариқасида жорий этилсин.

Давлат солиқ қўмитаси 2022 йил 1 сентябрга қадар тажриба натижалари бўйича тадбиркорлик субъектларининг таклифларини инобатга олган ҳолда, ушбу тартибларни такомиллаштириш ҳамда идентификациялаш ва штрих кодлари ҳисобварақ-фактураларда қасддан нотўғри акс эттирилиши бўйича жавобгарликни кучайтириш юзасидан таклифларни Вазирлар Маҳкамасига киритсин.

2023 йил 1 январдан маҳсулотларни сертификатлаш жараёнида маҳсулотлар (товар ва хизматларнинг) идентификация кодини (МХИК) мажбурий акс эттириш тартиби жорий этилсин.

5. Давлат солиқ қўмитаси ҳузуридаги "Янги технологиялар" илмий-ахборот маркази" давлат унитар корхонаси Каталог ва Шартномалар порталини юритиш оператори этиб белгилансин ҳамда унга заруратга кўра, ўзгартириш ва қўшимчалар киритиш ҳуқуқи берилсин.

6. Давлат солиқ қўмитаси:

бир ой муддатда Каталогнинг Давлат солиқ қўмитасининг Интернет жаҳон ахборот тармоғидаги расмий веб-сайтида жойлаштирилишини ва маълумотлар келгусида доимий янгиланиб борилишини;

икки ой муддатда Шартномалар порталининг ишлаб чиқилишини ва белгиланган тартибда "Электрон ҳукумат" тизимининг идоралараро интеграцион платформасига уланишини;

икки ой муддатда маҳсулотларнинг штрих кодларини кўрсатиш орқали маҳсулотларнинг (товар ва хизматларнинг) унификациялашган номлари ва идентификациялаш кодларини аниқлаш имконини берувчи интерактив хизмат жорий этилишини ва Ягона интерактив давлат хизматлари порталига интеграция қилинишини;

уч ой муддатда онлайн назорат-касса машиналари ва виртуал касса тизимига маҳсулотларнинг (товар ва хизматларнинг) унификациялашган номлари ва идентификациялаш кодлари интеграция қилинишини таъминласин.

Белгилансинки, Каталогни ва Шартномалар порталини ташкил этиш ва амалиётга жорий этиш Ўзбекистон Республикаси Давлат солиқ қўмитасининг Моддий ёрдам, ижтимоий ҳимоя, солиқ органларини ривожлантириш ва кўзда тутилмаган харажатлар махсус жамғармаси ҳисобидан молиялаштирилади.

7. Давлат солиқ қўмитасиикки ҳафта муддатда Маҳсулотлар (товар ва хизматлар) ягона электрон миллий каталогини юритиш тартибини тасдиқласин.

8. Вазирлар Маҳкамасининг "Онлайн назорат-касса машиналари ва виртуал касса тизими қўлланилишини таъминлаш чора-тадбирлари тўғрисида" 2019 йил 23 ноябрдаги 943-сон қарорига 4-иловага мувофиқ ўзгартиришлар ва қўшимча киритилсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари - иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси Давлат солиқ қўмитаси раиси Ш.Д. Кудбиев зиммасига юклансин.

Ўзбекистон Республикасининг Бош вазири                                     А. Арипов

Вазирлар Маҳкамасининг

2021 йил 28 апрелдаги

249-сон қарорига

1-ИЛОВА

Маҳсулотлар (товар ва хизматлар) ягона электрон

МИЛЛИЙ КАТАЛОГИ*

...