Адлия вазирининг 27.01.2022 й. 27-мҳ-сон "Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомга ўзгартириш ва қўшимчалар киритиш ҳақида"ги Буйруғи (АВ томонидан 27.01.2022 й. 3287-1-сон билан рўйхатга олинган)

Функция недоступна

ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

27.01.2022 й.

N 3287-1

ЎЗБЕКИСТОН РЕСПУБЛИКАСИ

АДЛИЯ ВАЗИРИНИНГ

27.01.2022 й.

N 27-мҳ

БУЙРУҒИ

Норматив-ҳуқуқий ҳужжатлар ва улар

лойиҳаларининг коррупцияга қарши экспертизасини

ўтказиш тартиби тўғрисидаги низомга ўзгартириш

ва қўшимчалар киритиш ҳақида

Ўзбекистон Республикаси Президентининг2021 йил 22 октябрдаги ПҚ-5263-сон "Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора-тадбирлари тўғрисида"ги қарорига мувофиқ БУЮРАМАН:

1. Ўзбекистон Республикаси адлия вазирининг 2021 йил 24 февралдаги 2-мҳ-сон буйруғи (рўйхат рақами 3287, 2021 йил 24 февраль) (Қонун ҳужжатлари маълумотлари миллий базаси, 24.02.2021 й., 10/21/3287/0153-сон) билан тасдиқланган Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур буйруқ расмий эълон қилинган кундан эътиборан кучга киради.

Адлия вазири                                                                      Р.К. Давлетов

Буйруққа

ИЛОВА

Норматив-ҳуқуқий ҳужжатлар ва улар

лойиҳаларининг коррупцияга қарши экспертизасини

ўтказиш тартиби тўғрисидаги низомга киритилаётган

ўзгартириш ва қўшимчалар

1. 1-бандда:

қуйидаги мазмундаги олтинчи ва еттинчи хатбошилар билан тўлдирилсин:

"илмий эксперт - илмий ташкилот ёки олий таълим муассасасининг Қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш бўйича экспертлар реестрига киритилган вакили;

мустақил эксперт - Қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш бўйича экспертлар реестрига киритилган жисмоний шахс;";

олтинчи хатбоши тегишли равишда саккизинчи хатбоши деб ҳисоблансин.

2. 7-банд қуйидаги таҳрирда баён этилсин:

"7. Коррупциявий омиллар ушбу Низомнинг 2-иловасига мувофиқ Услубиёт (бундан буён матнда Услубиёт деб юритилади) асосида аниқланади, бунда коррупцияга қарши экспертиза ўтказилаётганда норматив-ҳуқуқий ҳужжат ёки лойиҳанинг ҳар бир нормаси ёхуд қоидасининг таҳлили амалга оширилади.".

3. Қуйидаги мазмундаги 12-1-банд билан тўлдирилсин:

"12-1. Лойиҳаларнинг коррупцияга қарши экспертизаси мустақил ва илмий экспертлар томонидан ўз ташаббусига кўра ёки давлат органлари ва ташкилотларнинг буюртмалари асосида ушбу Низомнинг 4-1-бобида белгиланган тартибда ўтказилади.".

4. 13, 21 ва 25-бандлардаги "Методика" деган сўз "Услубиёт" деган сўз билан алмаштирилсин.

5. Қуйидаги мазмундаги 20-1-банд билан тўлдирилсин:

"20-1. Лойиҳа ишлаб чиқувчи томонидан чеклист тўлдирилмаган ҳолда адлия органларига киритилган тақдирда, ушбу лойиҳа ҳуқуқий экспертизадан ўтказилмасдан ишлаб чиқувчига қайтарилади.".

6. 26-банд қуйидаги таҳрирда баён этилсин:

"26. Давлат органлари ва ташкилотлар томонидан амалдаги норматив-ҳуқуқий ҳужжатларнинг коррупцияга қарши экспертизаси ҳар йили Адлия вазирлиги томонидан ишлаб чиқиладиган ва Ўзбекистон Республикаси Вазирлар Маҳкамаси (кейинги ўринларда - Вазирлар Маҳкамаси) томонидан тасдиқланадиган амалдаги норматив-ҳуқуқий ҳужжатларни коррупцияга қарши экспертизадан ўтказиш режасига асосан ҳамда Ўзбекистон Республикаси Президентининг 2019 йил 2 ноябрдаги ПҚ-4505-сон "Ҳуқуқий мониторингнинг замонавий механизмлари асосида қонун ҳужжатлари ижросининг самарадорлигини ошириш чора-тадбирлари тўғрисида"ги қарорига мувофиқ норматив-ҳуқуқий ҳужжатлар ижросининг ҳуқуқий мониторинги доирасида ўтказилади.

Давлат органлари ва ташкилотлар ўзларининг ташаббуслари асосида ҳам амалдаги норматив-ҳуқуқий ҳужжатларни коррупцияга қарши экспертизадан ўтказишлари мумкин.".

7. Қуйидаги мазмундаги 26-1 - 26-4-бандлар билан тўлдирилсин:

"26-1. Вазирлар Маҳкамаси томонидан тасдиқланадиган амалдаги норматив-ҳуқуқий ҳужжатларни коррупцияга қарши экспертизадан ўтказиш режасида белгиланган муддатларда давлат органлари ва ташкилотлар амалдаги норматив-ҳуқуқий ҳужжатларни коррупцияга қарши экспертизадан ўтказади ҳамда натижалари бўйича тўлдирилган чеклист ва аниқланган коррупциявий омилларни бартараф этиш юзасидан таклифларни Адлия вазирлигига киритади.

26-2. Адлия вазирлиги давлат органлари ва ташкилотлар томонидан коррупцияга қарши экспертиза натижалари бўйича аниқланган коррупциявий омилларни бартараф этиш юзасидан таклифларни умумлаштиради ҳамда коррупциявий омилларни бартараф этиш бўйича "Йўл харитаси"ни ишлаб чиқади ва тасдиқлаш учун Вазирлар Маҳкамасига киритади.

26-3. Амалдаги норматив-ҳуқуқий ҳужжатларда аниқланган коррупциявий омилларни бартараф этиш бўйича "Йўл харитаси" Вазирлар Маҳкамаси томонидан тасдиқланади.

26-4. Амалдаги норматив-ҳуқуқий ҳужжатларнинг коррупцияга қарши экспертизаси мустақил ва илмий экспертлар томонидан ўз ташаббусига кўра ёки давлат органлари ва ташкилотларнинг буюртмалари асосида ушбу Низомнинг 4-1-бобида белгиланган тартибда ўтказилади.".

8. 28-банд ўз кучини йўқотган деб топилсин.

9. Қуйидаги мазмундаги 4-1-боб билан тўлдирилсин:

"4-1-боб. Мустақил ва илмий экспертлар томонидан

норматив-ҳуқуқий ҳужжатлар ва улар лойиҳаларини

коррупцияга қарши экспертизасини ўтказиш

29-1. Мустақил ва илмий экспертлар ўз ташаббусига кўра, шунингдек давлат органлари ва ташкилотларнинг буюртмаларига асосан норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказади.

29-2. Мустақил ва илмий экспертлар томонидан норматив-ҳуқуқий ҳужжатлар ва улар лойиҳаларининг коррупцияга қарши экспертизаси Услубиёт асосида чеклистни тўлдириш ёки хулоса тузиш орқали ўтказилади.

29-3. Мустақил ва илмий экспертлар томонидан норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш:

давлат органлари ва ташкилотларнинг буюртмаларига асосан амалга оширилганда мустақил ва илмий экспертлар томонидан коррупцияга қарши экспертиза натижалари бўйича чеклист тўлдирилади;

мустақил ва илмий экспертларнинг ўз ташаббусига кўра амалга оширилганда коррупцияга қарши экспертиза натижалари бўйича ушбу Низомнинг 4-иловасига мувофиқ шаклда хулоса тузилади.

Норматив-ҳуқуқий ҳужжатлар ва улар лойиҳаларида коррупциявий омиллар аниқланган тақдирда, чеклистда ёки хулосада уларни бартараф этишга қаратилган тавсиялар ва чоралар кўрсатилиши шарт.

29-4. Мустақил ва илмий экспертлар томонидан давлат органлари ва ташкилотларнинг буюртмаларига асосан норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш натижалари бўйича тўлдирилган чеклист буюртма берган давлат органлари ва ташкилотга юборилади.

29-5. Мустақил ва илмий экспертларнинг ўз ташаббусига асосан ўтказилган коррупцияга қарши экспертиза натижалари бўйича тузилган хулоса:

амалдаги норматив-ҳуқуқий ҳужжатлар бўйича ушбу норматив-ҳуқуқий ҳужжатлар билан тартибга солинадиган соҳада ягона давлат сиёсатини юритишга масъул бўлган давлат органи ва ташкилотга юборилади;

лойиҳалар бўйича ушбу лойиҳаларни ишлаб чиқувчиларга юборилади.

29-6. Мустақил ва илмий экспертлар томонидан норматив-ҳуқуқий ҳужжатлар ва улар лойиҳаларининг коррупцияга қарши экспертизаси натижалари бўйича тўлдирилган чеклист ёки хулосалар тегишли давлат органлари ва ташкилотларга келиб тушган кундан бошлаб 15 кун ичида мажбурий кўриб чиқилади.

Кўриб чиқиш натижалари бўйича чеклист ёки хулосада кўрсатилган ҳар бир коррупциявий омил қабул қилинганлиги ёки қабул қилинмаганлиги асослантирилган маълумотнома тузилади.

29-7. Мустақил ва илмий экспертлар томонидан амалдаги норматив-ҳуқуқий ҳужжатларнинг коррупцияга қарши экспертизасини ўтказиш натижалари бўйича тўлдирилган чеклист ёки хулосаларни кўриб чиқиш натижалари юзасидан тузилган маълумотнома имзоланган куни экспертиза ўтказган мустақил ёки илмий экспертга ва тегишли адлия органларига юборилади.

29-8. Мустақил ва илмий экспертлар томонидан лойиҳаларнинг коррупцияга қарши экспертизасини ўтказиш натижалари бўйича тўлдирилган чеклист ёки хулосаларни кўриб чиқиш натижалари юзасидан тузилган маълумотнома имзоланган куни экспертиза ўтказган мустақил ёки илмий экспертга (барча ҳолларда) ҳамда адлия органларига (лойиҳани ҳуқуқий экспертиза учун киритиш вақтида) юборилади.

29-9. Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш жараёнларини мувофиқлаштириш, лойиҳа ишлаб чиқувчилари ҳамда тегишли вазирлик ва идоралар билан мустақил ва илмий экспертларнинг ҳамкорлигини йўлга қўйиш, шунингдек, Қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш бўйича экспертлар реестрига тегишли маълумотларни киритиш Адлия вазирлигининг Тартибга солиш таъсирини баҳолаш бошқармаси томонидан амалга оширилади.".

10. 5-бобнинг номидаги "адлия органи ходимининг" деган сўзлар "давлат органлари ва ташкилотлар, адлия органлари ходимларининг ҳамда мустақил ва илмий экспертларнинг" деган сўзлар билан алмаштирилсин.

11. 30 ва 31-бандларнинг биринчи хатбошиларидаги "адлия органи ходимининг" деган сўзлар "давлат органлари ва ташкилотлар, адлия органлари ходимларининг ҳамда мустақил ва илмий экспертларнинг" деган сўзлар билан алмаштирилсин.

12. 32-банддан "мустақил экспертлар ва" деган сўзлар чиқариб ташлансин.

13. 2-илованинг номидаги "МЕТОДИКАСИ" деган сўз "УСЛУБИЁТИ" деган сўз билан алмаштирилсин.

14. Мазкур ўзгартириш ва қўшимчаларнинг иловасига мувофиқ таҳрирда 4-илова билан тўлдирилсин.

15. Мазкур ўзгартириш ва қўшимчалар Ўзбекистон Республикаси Коррупцияга қарши курашиш агентлиги билан келишилган.

Ўзгартириш ва қўшимчаларга

ИЛОВА

"Норматив-ҳуқуқий ҳужжатлар ва улар

лойиҳаларининг коррупцияга қарши

экспертизасини ўтказиш тартиби

тўғрисидаги низомга

4-ИЛОВА

Норматив-ҳуқуқий ҳужжатлар ва улар

лойиҳаларини коррупцияга қарши мустақил

ва илмий экспертизадан ўтказиш натижалари бўйича

ХУЛОСА

коррупцияга қарши экспертизадан ўтказилди ва натижаси бўйича қуйидагилар маълум қилинади.

1. Нормаларнинг барқарорлиги ва ҳуқуқий мувофиқлиги билан боғлиқ бўлган коррупциявий омилларнинг мавжудлиги: мавжуд / мавжуд эмас.

- коррупциявий омил мавжуд норма: ________________________________.

- келиб чиқиши мумкин бўлган коррупцияга оид ҳуқуқбузарлик: _________________.

- келиб чиқиши мумкин бўлган коррупциявий омилни бартараф этиш бўйича таклиф: ________________________________________________________.

2. Ваколатлар, ҳуқуқ ва мажбуриятлар билан боғлиқ бўлган коррупциявий омилларнинг мавжудлиги: мавжуд / мавжуд эмас.

- коррупциявий омил мавжуд норма: ________________________________.

- келиб чиқиши мумкин бўлган коррупцияга оид ҳуқуқбузарлик: __________________.

- келиб чиқиши мумкин бўлган коррупциявий омилни бартараф этиш бўйича таклиф: _______________________________________________________.

3. Маъмурий тартиб-таомиллар билан боғлиқ бўлган коррупциявий омилларнинг мавжудлиги: мавжуд / мавжуд эмас.

- коррупциявий омил мавжуд норма: ________________________________.

- келиб чиқиши мумкин бўлган коррупцияга оид ҳуқуқбузарлик: ___________________.

- келиб чиқиши мумкин бўлган коррупциявий омилни бартараф этиш бўйича таклиф: ________________________________________________________.

4. Назорат билан боғлиқ бўлган коррупциявий омилларнинг мавжудлиги: мавжуд / мавжуд эмас.

- коррупциявий омил мавжуд норма: ________________________________.

- келиб чиқиши мумкин бўлган коррупцияга оид ҳуқуқбузарлик: ___________________.

- келиб чиқиши мумкин бўлган коррупциявий омилни бартараф этиш бўйича таклиф: _______________________________________________________.

5. Бошқа турдаги коррупциявий омилларнинг мавжудлиги:

Эксперт тўғрисидаги маълумотлар

Реестр рақами:

Тел:

Электрон почта манзили:".

Қонун ҳужжатлари маълумотлари миллий базаси (www.lex.uz),

2022 йил 27 январь