Ички ишлар органларида хизматга номзодларни танлаб олиш тадбирларини ташкил этиш ва ўтказиш тартиби тўғрисидаги Йўриқнома (АВ томонидан 09.03.2022 й. 3352-сон билан рўйхатга олинган ички ишлар вазирининг 05.03.2022 й. 52-сон буйруғи билан тасдиқланган)

Функция недоступна

Ўзбекистон Республикаси

Адлия вазирлигида

2022 йил 9 мартда 3352-сон

билан рўйхатга олинган

Ўзбекистон Республикаси

ички ишлар вазирининг

2022 йил 5 мартдаги

52-сон буйруғига

ИЛОВА

Ички ишлар органларида хизматга номзодларни

танлаб олиш тадбирларини ташкил этиш

ва ўтказиш тартиби тўғрисидаги

ЙЎРИҚНОМА

Мазкур Йўриқнома ички ишлар органларида хизматга (бундан буён матнда хизмат деб юритилади) номзодларни танлаб олиш тадбирларини (бундан буён матнда танлов деб юритилади) ташкил этиш ва ўтказиш тартибини белгилайди.

1-БОБ. УМУМИЙ ҚОИДАЛАР

1. Номзодлар хизматга ихтиёрий тартибда, ички ишлар органларидаги мавжуд бўш лавозимлардан келиб чиққан ҳолда ички ишлар органлари томонидан танлов асосида қабул қилинади.

Танловда иштирок этадиган номзодларнинг сони чекланмайди.

2. Номзодларга қўйиладиган умумий талаблар, танловда иштирок этиш учун мурожаат қилиш ҳамда танловдан муваффақиятли ўтган номзодларни хизматга қабул қилиш тартиби Ўзбекистон Республикаси Президентининг 2017 йил 29 ноябрдаги ПҚ-3413-сон қарори билан тасдиқланган Ички ишлар органларида хизматни ўташ тартиби тўғрисидаги низомга (бундан буён матнда Низом деб юритилади) мувофиқ амалга оширилади.

3. Низомга асосан:

а) хизмат мажбуриятларини бажариш чоғида ҳалок бўлган ички ишлар органлари ходимлари ва ҳарбий хизматчиларнинг фарзандлари танловнинг дастлабки ўрганиш, жисмоний тайёргарлик даражасини баҳолаш ҳамда интеллектуал ривожланганлик даражаси ва психоэмоционал барқарорликни баҳолаш босқичларидан муваффақиятли ўтган тақдирда, якуний суҳбатсиз хизматга қабул қилинади;

б) мазкур Йўриқноманинг 1-иловасида келтирилган рўйхатга мувофиқ ички ишлар органларининг тор ихтисослик бўйича мутахассисликлар талаб этиладиган айрим лавозимларига тегишли тор ихтисослик бўйича мутахассисликка эга бўлган номзодлар танловсиз қабул қилинади;

в) мазкур Йўриқноманинг 2-иловасида келтирилган рўйхатга мувофиқ ички ишлар органларининг алоҳида мутахассислик талаб этиладиган лавозимларига ушбу мутахассисликка эга бўлган номзодларгина танлов асосида (бундан мазкур Йўриқноманинг 1-иловасидаги рўйхатга мувофиқ тор ихтисослик бўйича мутахассисликлар талаб этиладиган лавозимлар учун номзодлар мустасно) қабул қилинади;

г) мазкур Йўриқноманинг 3-иловасида келтирилган рўйхатга мувофиқ ички ишлар органларининг айрим бўлинмалари ва лавозимларига ўттиз ёшдан катта бўлган фуқаролар қабул қилиниши мумкин;

д) қуйидаги номзодлар, истисно тариқасида, танлов тадбирларининг жисмоний тайёргарлик даражасини баҳолаш босқичидан озод қилинади ҳамда уларга ушбу босқич бўйича максимал балл берилади:

илмий даража ёки илмий унвонга эга бўлган номзодлар;

олий таълимни имтиёзли диплом билан тамомлаганлар;

профессор-ўқитувчи ва илмий таркиб лавозимларига номзодлар;

эксперт-криминалистика, иш юритиш ҳамда таҳлилий ва юридик таъминлаш бўлинмаларидаги лавозимларга номзодлар.

4. Ўзбекистон Республикаси Вазирлар Маҳкамасининг 2022 йил 15 январдаги 23-сон қарори билан тасдиқланган Аҳолининг жисмоний тайёргарлик даражасини баҳолаш бўйича спорт синовларини ташкил этиш ва ўтказиш тартиби тўғрисидаги низомга асосан, ёш кўрсаткичларидан келиб чиқиб, аҳолининг жисмоний тайёргарлик даражасини баҳолаш бўйича спорт синовларининг махсус талабларини муваффақиятли бажарган (1, 2 ва 3-ўрин ғолиблари) фуқаролар бир йил мобайнида танловнинг жисмоний тайёргарлик даражасини баҳолаш босқичидан озод қилинади ҳамда уларга ушбу босқич бўйича максимал балл берилади.

5. Сўнгги беш йил ичида республика миқёсидаги спорт мусобақасининг ғолиби бўлган ёки халқаро миқёсдаги спорт мусобақасининг 1 - 3-ўринларидан бирини эгаллаган спортчилар, истисно тариқасида, хизматга фақатгина якуний суҳбат асосида қабул қилинади.

6. Хизматга қабул қилишда номзодлар бўйининг баландлиги қуйидаги махсус антропометрик параметрларга жавоб бериши талаб этилади (бундан мазкур банднинг тўртинчи хатбошисида назарда тутилган лавозимлар бўйича номзодлар мустасно):

эркак жинсидаги номзодларнинг бўйи - 165 сантиметрдан паст бўлмаслиги керак;

аёл жинсидаги номзодларнинг бўйи - 160 сантиметрдан паст бўлмаслиги керак.

Мазкур Йўриқноманинг 4-иловасида келтирилган рўйхатга мувофиқ Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати ва Жамоат тартибини сақлаш бўлинмаларининг айрим лавозимларига номзодлар бўйининг баландлиги алоҳида антропометрик параметрларга жавоб бериши талаб этилади.

7. Танлов тадбирларининг исталган битта босқичидан ўта олмаган номзодга уни такроран топширишга, шунингдек танлов тадбирларининг кейинги босқичига ўтишга рухсат берилмайди. Бунда, номзод кейинги танловларга дастлабки ўрганиш босқичидан бошлаб қайта қатнашиши мумкин.

8. Танлов тадбирлари давомида фахрийлар кенгаши аъзолари, жамоат ташкилотлари вакиллари ва номзодларнинг яқин қариндошлари (бундан буён матнда жамоатчилик вакиллари деб юритилади) иштирок этишлари мумкин.

Бунда, жамоатчилик вакиллари саралаш тадбирларини ўтказиш жараёни ва унинг натижаларидан норози бўлган тақдирда танловнинг тегишли комиссияси раисига ёзма равишда мурожаат қилишлари ва ўз таклиф ҳамда эътирозларини билдиришлари мумкин. Жамоатчилик вакилларининг мурожаатлари Ўзбекистон Республикасининг "Жисмоний ва юридик шахсларнинг мурожаатлари тўғрисида"ги Қонунида белгиланган тартибда кўриб чиқилиши лозим.

2-БОБ. ТАНЛОВ ТАДБИРЛАРИНИ

ТАШКИЛЛАШТИРИШ

9. Хизматга муносиб номзодларни танлаб олиш мақсадида мунтазам равишда тарғибот-ташвиқот ишлари олиб борилади, оммавий ахборот воситаларида ҳамда ички ишлар органларининг расмий нашрлари, веб-сайтларида бўш лавозимлар тўғрисида, шунингдек танлов ўтказилишидан камида бир ой олдин танлов ўтказиш жойи ва кунлари тўғрисида эълонлар жойлаштирилади.

10. Жамоатчилик вакиллари танловларни реал вақт режимида (онлайн) кузатиб боришлари учун танлов тадбирлари видеокузатув (онлайн трансляция) остида ўтказилади.

11. Хизматга кириш истагини билдирган номзодлар доимий яшаш жойи бўйича рўйхатга олинган жойидаги ички ишлар органига мазкур Йўриқноманинг 5-иловасига мувофиқ шаклдаги ариза билан унга қуйидаги ҳужжатларни илова қилган ҳолда мурожаат этади:

биометрик паспорт ёки идентификация ID-картаси (нусхаси олиниб, асли қайтарилади);

қариндошларнинг (ота-она, эр-хотин, фарзандлар, ака-укалар, опа-сингиллар, шунингдек эр-хотинларнинг ота-оналари, ака-укалари, опа-сингиллари) биометрик паспорти ёки идентификация ID-картаси (нусхаси олиниб, асли қайтарилади);

ўқиш ва иш (агар ўқиётган ёки ишлаётган бўлса) жойидан тавсифнома;

номзод томонидан қўлда ёки компьютерда ёзилган таржимаи ҳол;

анкета-маълумотнома;

ҳарбий гувоҳнома (нусхаси олиниб, асли қайтарилади);

доимий яшаш жойи бўйича рўйхатга олинган жойидан белгиланган намунадаги соғлиғининг ҳолати ҳақида маълумотнома (бўйнинг баландлиги бўйича антропометрик параметри кўрсатилган ҳолда).

Ички ишлар вазирлиги марказий аппарати ва Ички ишлар вазирлиги Академиясига, шунингдек Тошкент шаҳар Ички ишлар бош бошқармасига хизматга кириш истаги бўлган номзодлар, доимий яшаш жойи бўйича рўйхатга олинган жойидан қатъи назар, тегишлилигига кўра, Ички ишлар вазирлиги марказий аппаратига, Ички ишлар вазирлиги Академиясига ёки Тошкент шаҳар Ички ишлар бош бошқармасига мурожаат қилади.

Танлов тадбирлари бошланганидан кейин мурожаат қилган номзодлар ушбу танловда эмас, балки кейинги танловда иштирок этишлари мумкин бўлади.

12. Навбатдаги танлов тадбирлари бошланишидан ўн кун олдин тегишли ички ишлар органлари томонидан танловда қатнашиш тўғрисидаги ариза билан мурожаат қилган номзодларга саралаш тадбирларининг бошланиш вақти ва жойи ҳақида хабар берилади.

13. Танловни ташкил этиш ва ўтказиш учун Ички ишлар вазирлигининг тегишли таркибий тузилмалари, Қорақалпоғистон Республикаси ички ишлар вазири, Тошкент шаҳар ва Тошкент вилояти ички ишлар бош бошқармалари ва вилоятлар ички ишлар бошқармалари бошлиқлари (бундан буён матнда ички ишлар органлари бошлиқлари деб юритилади) буйруғи билан мазкур Йўриқноманинг 6-иловасига мувофиқ таркибда, аъзолари сони тоқ сондан иборат бўлган Танлов тадбирларини ташкил этиш ва ўтказиш комиссиялари (бундан буён матнда Қабул комиссияси деб юритилади) тузилади.

Танловлар шаффоф ва ошкора тарзда ўтказилишини таъминлаш ҳамда жамоатчилик назоратини ўрнатиш мақсадида Қабул комиссияси фаолиятида иштирок этиш учун ихтиёрийлик асосида жамоатчилик вакиллари таклиф этилиши мумкин.

14. Ички ишлар органлари бошлиқларининг маънавий-маърифий ишлар ва кадрлар билан таъминлаш бўйича тегишли ўринбосарлари Қабул комиссиялари фаолиятига раҳбарлик қилади ва қуйидагиларни амалга оширади:

Қабул комиссияси ишини ташкиллаштиради ҳамда унга юклатилган вазифа ва функцияларнинг бажарилишини таъминлайди;

Қабул комиссияси аъзолари ўртасида вазифаларни тақсимлайди ҳамда уларнинг бажарилишини назорат қилади;

Қабул комиссияси таркибидаги кичик комиссияларни шакллантиради ва таркибини тасдиқлайди;

кичик комиссиялар фаолиятини мувофиқлаштиради ва назорат қилади;

танловларни видеокузатув қурилмалари орқали реал вақт режимида (онлайн) кузатиб бориш имконияти яратилишини ташкиллаштиради.

15. Қабул комиссияси таркибида қуйидаги йўналишлар бўйича кичик комиссиялар тузилади:

тегишли соҳавий хизмат раҳбарлари ҳамда кадрлар билан таъминлаш бўлинмаси раҳбар ва ходимларидан иборат таркибда тузиладиган номзодларни дастлабки ўрганиш бўйича кичик комиссия;

касбий тайёргарлик, шахсий хавфсизлик, тиббиёт бўлинмалари, Ёшлар иттифоқи бошланғич ташкилоти етакчилари ва соҳавий хизмат ходимларидан иборат таркибда тузиладиган жисмоний тайёргарлик даражасини баҳолаш бўйича кичик комиссия;

мутахассис-психологлар ва бевосита уларнинг бошлиқларидан иборат таркибда тузиладиган интеллектуал ривожланганлик даражаси ва психоэмоционал барқарорликни баҳолаш бўйича кичик комиссия.

16. Танловлар номзоднинг хоҳишига кўра, ўзбек, қорақалпоқ ёки рус тилларида ўтказилади.

17. Танлов тадбирлари қуйидаги босқичларни ўз ичига олади:

дастлабки ўрганиш (Низом ҳамда мазкур Йўриқномада белгиланган талабларга мос келишни текшириш);

жисмоний тайёргарлик даражасини баҳолаш;

интеллектуал ривожланганлик даражаси ва психоэмоционал барқарорликни баҳолаш;

якуний суҳбат.

3-БОБ. НОМЗОДЛАРНИ ДАСТЛАБКИ ЎРГАНИШ

18. Дастлабки ўрганиш учун ҳозир бўлган номзодларнинг Низомда белгиланган умумий талаблар ва мазкур Йўриқноманинг 5-бандида назарда тутилган талабларга жавоб беришини аниқлаш мақсадида дастлабки ўрганиш бўйича кичик комиссия (бундан буён мазкур бобда кичик комиссия деб юритилади) томонидан номзодлар тақдим қилган ҳужжатлар ўрганиб чиқилади ҳамда уларнинг бўйи ўлчанади.

19. Номзоднинг бўйи талабга жавоб бермаган ҳолларда, унга дастлабки ўрганиш тадбирларида иштирок этишга рухсат берилмайди.

20. Ҳужжатларида камчилик аниқланган номзодга ушбу камчиликни бартараф этиши ва навбатдаги қабул кунида ҳозир бўлиши кичик комиссия аъзолари томонидан тушунтирилади.

21. Дастлабки ўрганиш давомида Низом ва мазкур Йўриқномада белгиланган талабларга мос деб топилган номзодлар шу вақтнинг ўзида суҳбатдан ўтказилади.

22. Суҳбат кичик комиссиянинг суҳбат ўтказилишига масъул бўлган аъзоси (аъзолари) томонидан номзодга Низом ва мазкур Йўриқнома талаблари, унинг ҳуқуқ ва мажбуриятлари, хизматни ўташ билан боғлиқ шартлар ва имтиёзлар, хизматнинг зарарли ва хавфли жиҳатларини тушунтириш ҳамда номзоднинг хизматга кириш истаги бор ёки йўқлигини аниқлаш мақсадида ўтказилади.

23. Кичик комиссия томонидан номзодни дастлабки ўрганиш босқичида ўтказилган тадбирлар натижалари умумлаштирилиб, шу куннинг ўзида номзодни танловнинг кейинги босқичига ўтказиш ёки ўтказишни рад этиш ҳақида хулоса чиқарилади.

Ўрганиш натижалари бўйича барча номзодларга мазкур Йўриқноманинг 7-иловасига мувофиқ шаклдаги дастлабки ўрганиш варақаси расмийлаштирилади ва номзодларга имзолатган ҳолда таништирилади.

24. Кичик комиссиянинг масъул аъзоси танловнинг дастлабки ўрганиш босқичидан муваффақиятли ўтган номзодларнинг ҳужжатлари ва дастлабки ўрганиш натижаларини ягона йиғма жилдда жамлайди.

4-БОБ. НОМЗОДЛАРНИНГ ЖИСМОНИЙ

ТАЙЁРГАРЛИК ДАРАЖАСИНИ БАҲОЛАШ

25. Танловнинг дастлабки ўрганиш босқичидан муваффақиятли ўтган номзодларнинг жисмоний тайёргарлик даражасини аниқлаш мақсадида танловнинг жисмоний тайёргарлик даражасини баҳолаш тадбири ўтказилади.

26. Номзодлар жисмоний тайёргарлик даражасини баҳолаш машқларини бажаришни бошлашидан олдин уларга жисмоний тайёргарлик даражасини баҳолаш бўйича кичик комиссия (бундан буён мазкур бобда кичик комиссия деб юритилади) аъзолари томонидан машқларни бажаришга қўйиладиган талаблар, машқларни бажариш тартиби ҳамда баҳолаш мезонлари тушунтирилади.

27. Номзодларнинг жисмоний тайёргарлик даражасини баҳолаш уларнинг мазкур бобда назарда тутилган машқларни бажаришларини текшириш орқали амалга оширилади.

28. Жисмоний тайёргарлик даражасини баҳолаш тадбири бошланишидан олдин номзод кичик комиссиянинг масъул аъзоларига ўзини биометрик паспорти ёки идентификация ID-картасини кўрсатган ҳолда таништиради.

29. Номзодлар машқларни спорт кийимида бажаришлари тавсия этилади.

30. Номзодлар томонидан бажарилиши лозим бўлган жисмоний тайёргарлик машқлари ва уларни бажаришга қўйиладиган талаблар эркак ва аёл жинсидаги номзодлар учун алоҳида белгиланади.

31. Қуйидагилар эркак жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

куч ишлатиш машқи - тўсинда (турникда) тортилиш;

тезликка оид машқ - 100 метрга югуриш;

чидамлиликка оид машқ - 3 000 метрга югуриш.

32. Қуйидагилар аёл жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

куч ишлатиш машқи - куч ишлатиш машқлари комплекси;

тезликка оид машқ - 100 метрга югуриш;

чидамлиликка оид машқ - 1000 метрга югуриш.

33. Жисмоний тайёргарлик машқлари қуйидаги кетма-кетликда бажарилади:

биринчи навбатда - куч ишлатиш машқлари;

иккинчи навбатда - тезликка оид машқлар;

учинчи навбатда - чидамлиликка оид машқлар.

34. Жисмоний тайёргарлик машқларини бажариш оралиғида номзодларга дам олиш учун камида 10 дақиқа вақт берилади.

35. 100 метрга югуриш машқи стадионнинг югуриш йўлакчасида ёхуд қаттиқ қопламали текис жойларда юқори ёки қуйи стартдан қуйидагича амалга оширилади:

"Старт" командаси бўйича старт олиш чизиғига яқинлашиш;

"Диққат" командаси бўйича тананинг оғирлигини олдинда турган оёққа ўтказиш, гавда ва бошни олдинга эгиш, қўлларни тирсакка букиш;

"Олға" командаси бўйича югуришни бошлаш.

36. Қуйидагилар тўсинда (турникда) тортилиш машқига қўйиладиган талаблар ҳисобланади:

бош бармоқ тўсин ичкарисидан ушланади, тана бироз ростланади, тизза бўғими тўғриланади, оёқ учлари чўзилади, товонлар бирлаштирилади;

ияк тўсиндан (турникдан) ўтгунга қадар қўллар букилади;

ҳаракат тўлиқ амалга оширилиши билан дастлабки ҳолатга қайтилади (осилиш ҳолати 1-2 сония давом этиши мумкин);

оёқларни 45° гача кўтаришга рухсат этилади.

Ушбу машқни бажаришда оёқларни букиш ва кериш, танани ҳаракатсиз ҳолатда эгиш ҳамда оёқлар билан силтанма ҳаракатлар қилиш тақиқланади.

37. 3000 ва 1000 метрга югуриш машқлари стадионнинг югуриш йўлакчасида ёхуд қаттиқ қопламали текис жойларда, умумий ёки алоҳида старт берилган ҳолда ўтказилади.

Старт ва марра чизиқлари бир жойда белгиланиши мумкин. Бунда, югуриш ҳудудидан чиқиб кетган ёки югуришдан юриш ҳолатига ўтган иштирокчи машқни бажармаган ҳисобланади.

38. Номзод томонидан куч ишлатиш машқлари комплексини бажаришда 1 дақиқа ичида 2 та машқ узлуксиз бажарилиши керак.

Ҳар бир машқни бажариш учун 30 сониядан вақт ажратилади. Биринчи машқни бажариш учун ажратилган 30 сония вақт тугаганлиги эълон қилинганда, номзод дарҳол иккинчи машқни бажаришга киришади.

39. Қуйидагилар биринчи машқни бажаришга қўйиладиган талаблар ҳисобланади:

чалқанча ётилади;

қўллар белда, тиззалар букилмаган ҳолда оёқлар тўпиқ қисмидан бошқа бир шахс ёрдамида босилиб, ушланади;

дастлабки ҳолатдан гавда олдинга кўтарилиб, қўллар оёқ учига текканидан сўнг, дастлабки ҳолатга қайтилади.

Ушбу машқни бажариш вақтида тиззаларни букиш ва оёқларни тепага қўтариш тақиқланади.

40. Қуйидагилар иккинчи машқни бажаришга қўйиладиган талаблар ҳисобланади:

таяниб ётилади, қўллар елка кенглигида тиззалар букилмаган ҳолатда бўлади;

қўллар букилиб ёзилади (бунда, бел ҳамда елка қисмлари биргаликда ва текис тушиб чиқиши шарт);

қўллар букилиб тана ерга нисбатан параллел ҳолатга келтирилганидан сўнг, дастлабки ҳолатга қайтилади.

Ушбу машқни бажариш вақтида қўллар чала букилиб ёзилиши, бел ва елкалар ҳар хил тушиб чиқиши, тиззаларнинг ерга тегиши тақиқланади.

41. Мазкур бобда назарда тутилган машқларни бажариш тартибини бузган номзодга шу машқ бўйича балл қўйилмайди.

42. Номзодларнинг жисмоний тайёргарлик даражасини баҳолаш мазкур Йўриқноманинг 8-иловасига мувофиқ амалга оширилади. Бунда, номзодга ҳар бир машқни бажарганлик учун балл берилади. Умумий тўпланиши мумкин бўлган максимал балл - 30 баллни ташкил этади.

43. Жисмоний тайёргарлик даражасини баҳолаш тадбирлари ўтказилган кундан кейинги кундан кечиктирмай унинг натижалари бўйича мазкур Йўриқноманинг 9-иловасига мувофиқ шаклда қайднома расмийлаштирилади ва натижалар номзодларга эълон қилинади.

44. Қайднома кичик комиссиянинг жисмоний тайёргарлик даражасини баҳолаш бўйича тадбирда иштирок этган аъзолари томонидан имзоланади.

45. Жисмоний тайёргарлик даражасини баҳолаш машқларидан жами тўпланган балли 15 баллдан паст бўлган номзодлар саралашнинг кейинги босқичига ўтказилмайди.

46. Танловнинг якуний натижаларини ҳисоблашда жисмоний тайёргарлик даражасини баҳолаш машқларидан тўпланган баллар якуний суҳбат давомида тўпланган баллар билан биргаликда қўшиб ҳисобланади.

5-БОБ. НОМЗОДЛАРНИНГ ИНТЕЛЛЕКТУАЛ

РИВОЖЛАНГАНЛИК ДАРАЖАСИ ВА

ПСИХОЭМОЦИОНАЛ БАРҚАРОРЛИГИНИ

БАҲОЛАШ

47. Танловнинг жисмоний тайёргарлик даражасини баҳолаш босқичидан муваффақиятли ўтган номзодларнинг интеллектуал ривожланганлик даражаси ва психоэмоционал барқарорлигини аниқлаш мақсадида психологик ўрганиш ўтказилади.

48. Номзодларнинг интеллектуал ривожланганлик даражаси ва психоэмоционал барқарорлигини баҳолаш психологик тест синовидан ўтказиш орқали амалга оширилади.

49. Психологик тестлар, уларнинг жавоблари ва жавоблар бланкалари Ўзбекистон Республикаси ички ишлар вазири ёки унинг ўринбосари томонидан тасдиқланади.

Психологик тестлар номзодларнинг қуйидаги психологик хусусиятларини аниқлашга йўналтирилади:

ақл-заковат, умумий интеллектуал салоҳият ва хотира;

мантиқий фикрлаш, зийраклик, тафаккур шаклларининг ривожланганлик даражаси, фикрлаш тезлиги ва таҳлил қилиш қобилияти;

шахсга хос индивидуал хусусиятлар, киришимлилик, психик турғунлик, самимийлик.

50. Психологик тестлар, уларнинг жавоблари ва жавоблар бланкалари Қабул комиссияси котибида сақланади, котиб тестлар ва уларнинг жавоблари ошкор қилинмаслиги учун масъул ҳисобланади.

51. Психологик ўрганиш бошланишидан аввал номзодлар интеллектуал ривожланганлик даражаси ва психоэмоционал барқарорликни баҳолаш бўйича кичик комиссия (бундан буён мазкур бобда кичик комиссия деб юритилади) аъзолари томонидан психологик ўрганишни ўтказиш тартиби, ҳар бир вазифа бўйича назарда тутилган баҳолаш мезонлари билан таништирилади.

52. Номзодлар психологик ўрганиш ўтказиладиган хонага ўзининг биометрик паспорти ёки идентификация ID-картасини кўрсатган ҳолда киритилади.

53. Тест синовлари ўтказилаётган хонага жадвал, китоб, уяли телефон, компьютер, калькулятор ҳамда бошқа телекоммуникация воситалари ва шпаргалкалар олиб кириш тақиқланади.

54. Номзодлар барча ҳаракатларни комиссия аъзолари кўрсатмаларига мувофиқ бажаради. Мазкур кўрсатмаларга амал қилмаган номзод хонадан чиқариб юборилади ҳамда у тест синовларини бажармаган ҳисобланади.

55. Номзодлар билан тест синовлари якка тартибда ёки гуруҳ бўлиб ўтказилиши мумкин. Тест гуруҳ таркибида ўтказилганда, хонада номзодлар сони 30 нафардан ошмаслиги зарур.

56. Тест бошлангунга қадар номзодлар соғлиғининг ҳолати суриштирилади. Ўзини ёмон ҳис қилаётганидан шикоят қилган номзодлар шу куни тест синовига қўйилмайди. Бундай ҳолларда номзодга бошқа куни қайта тест синовидан ўтиш учун рухсат берилиши лозим.

57. Психологик ўрганиш давомида номзодларга икки қисмдан иборат бўлган тест асосида вазифалар берилади.

Бунда, биринчи қисмда (интеллектуал ривожланганлик даражасини ўрганиш) номзодларга 40 та топшириқдан иборат бўлган 3 та вазифа, иккинчи қисмда эса, (психоэмоционал барқарорлик даражасини ўрганиш) 141 та саволдан, шунингдек жавобларнинг самимий ёки носамимийлигини аниқлаш йўналиши бўйича бериладиган 15 та саволдан иборат 1 та вазифа берилади.

58. Номзодга берилган вазифаларни бажариш учун 1 соат 30 дақиқа, шунингдек ҳар бир вазифани ўқиб чиқиш учун қўшимча 5 дақиқадан - умумий 1 соат 50 дақиқа вақт берилади.

59. Саволларнинг ўзига хослигидан келиб чиқиб, жавоб вариантлари берилиши ёки берилмаслиги мумкин. Номзодлар тест саволларига жавоб вариантларини белгилашда жавоблар варақасидаги вариантлардан фақат битта тўғри жавобни белгилаши лозим.

60. Тест синовларини топшириш вақтида номзоднинг хонадан чиқиши тақиқланади, бундан номзоднинг соғлиғи ёмонлашган ҳолатлар мустасно.

61. Тест синовларини ўтказиш вақтида синовлар ўтказилаётган хонада номзодлар ҳамда кичик комиссия аъзоларидан ташқари бошқа шахсларнинг бўлиши тақиқланади.

62. Номзоднинг психологик тест саволларига берган жавоблари 2 кун ичида мазкур Йўриқноманинг 10-иловасига мувофиқ Психологик тест натижаларини ҳисоблаш жадвали асосида кичик комиссия аъзолари томонидан ҳисоблаб чиқилади.

63. Психологик тестларни бажармаган, шунингдек тест натижалари қониқарсиз баҳоланган номзодларга синовни қайта топширишга рухсат берилмайди.

64. Тест синовининг натижалари бўйича, у ўтказилган кундан бошлаб 2 кун ичида кичик комиссиянинг психологик ўрганиш тадбирларида иштирок этган аъзолари томонидан мазкур Йўриқноманинг 11-иловасига мувофиқ шаклда қайднома расмийлаштирилади ва имзоланади.

Психологик ўрганиш натижалари қайднома расмийлаштирилган куннинг ўзида номзодларга эълон қилиниши лозим.

65. Психологик ўрганиш натижаларига асосан қуйидаги хулосалардан бири чиқарилади:

ички ишлар органларида хизматга тавсия этиш ҳақида;

ички ишлар органларида хизматга тавсия этмаслик ҳақида.

66. Баҳолаш натижаларига кўра, ички ишлар органларида хизматга тавсия этилган номзодларгина якуний суҳбатга қўйилади.

6-БОБ. ЯКУНИЙ СУҲБАТ ЎТКАЗИШ

67. Якуний суҳбат номзодларнинг ақлий салоҳияти, хизмат ўташга руҳан тайёрлиги, киришимлилиги, шунингдек ходим учун зарур бўлган бошқа маънавий-ахлоқий ва касбий жиҳатдан муҳим хислатларга эгалигини аниқлаш мақсадида ҳуқуқшунослик ва "тарбия" фанлари бўйича билимларни ҳамда касбга оид умумий дунёқарашни баҳолаш орқали оғзаки савол-жавоб тарзида ўтказилади.

68. Якуний суҳбатга танловнинг дастлабки ўрганиш, жисмоний тайёргарлик даражасини баҳолаш ҳамда интеллектуал ривожланганлик даражаси ва психоэмоционал барқарорликни баҳолаш тадбирларидан муваффақиятли ўтган номзодлар киритилади.

69. Якуний суҳбатда, қоида тариқасида, бир лавозимга камида иккита номзод иштирок этиши лозим. Бунда, танлов натижасига кўра, якуний суҳбатга киришга фақатгина битта номзод тавсия этилган бўлса, кейинги танловлар натижасига кўра, камида яна бир нафар номзод тавсия этилгунга қадар якуний суҳбат ўтказилмайди (мазкур Йўриқноманинг 3-банди "д" кичик банди ҳамда 5-бандида назарда тутилган номзодларни якуний суҳбатдан ўтказишда ушбу талаб қўйилмайди).

70. Якуний суҳбат Қабул комиссияси томонидан коллегиаллик принципи асосида ҳар бир фан бўйича Ички ишлар вазирлиги тизимидан камида бир нафардан малакали мутахассис жалб этилган ҳолда ўтказилади.

71. Якуний суҳбат саволлари базаси Ички ишлар вазирлиги Касбий тайёргарлик бошқармаси томонидан тегишли соҳавий хизматлар билан ҳамкорликда ишлаб чиқилади ҳамда Ўзбекистон Республикаси ички ишлар вазири ёки унинг ўринбосари томонидан тасдиқланади ва Ички ишлар вазирлиги Касбий тайёргарлик бошқармаси томонидан вазирликнинг расмий веб-сайтига мунтазам равишда жойлаштириб борилади.

Бунда, номзодларга Ички ишлар вазирлигининг расмий веб-сайтига жойлаштирилмаган саволлар берилишига йўл қўйилмайди.

72. Имтихон ўтказилишидан бир соат олдин Қабул комиссияси аъзолари иштирокида компьютерда махсус дастурдан фойдаланган ҳолда саволлар базасидан ҳар бир фандан 1 тадан - жами 3 та савол кўрсатилган билетлар шакллантирилади. Билетларда саволларнинг такрорланишига йўл қўйилмайди.

73. Номзодларга якуний суҳбат ўтказиладиган хонага жадвал, китоб, уяли телефон, компьютер, калькулятор ҳамда бошқа телекоммуникация воситалари ва шпаргалкалар олиб кириш тақиқланади.

74. Номзодлар якуний суҳбат ўтказиладиган хонага биометрик паспорти ёки идентификация ID-картасини кўрсатган ҳолда киритилади.

75. Номзодларга якуний суҳбат ўтказиш бўйича асосий тушунчалар ва зарур маълумотлар танлов тадбири бошланишидан олдин Қабул комиссияси аъзолари томонидан берилади.

76. Номзодлар билетни ихтиёрий равишда танлаб олади ва ундаги саволларга ихтиёрий кетма-кетликда жавоб беради.

Ҳар бир билетда қуйидаги йўналишлар бўйича саволлар киритилади:

биринчи савол - ҳуқуқшунослик фани;

иккинчи савол - "тарбия" фани;

учинчи савол - касбга оид умумий дунёқарашни аниқлашга қаратилган савол.

77. Номзодларга саволларга тайёргарлик кўришлари учун 15 дақиқа вақт берилади. Агарда номзод ушбу вақтдан фойдаланишни лозим деб топмаса, тайёргарлик кўрмасдан жавоб беришига рухсат этилади.

78. Номзодларнинг билетга тайёргарлик кўришлари учун якуний суҳбат ўтказиш хонасига туташ бўлган алоҳида аудитория ажратилади. Унга 5 нафаргача номзодлар киритилиб, билетларга тайёргарлик кўриш жараёни Қабул комиссияси котиби томонидан назорат қилинади.

79. Номзодлар саволларга берган жавобларига қараб, қуйидаги мезонлар асосида ҳар бир савол бўйича "10" баллик тизимда баҳоланади:

номзод тўғри хулоса ва қарор қабул қилади, ижодий фикрлай олади, мустақил мушоҳада юритади, амалда қўллай олади, моҳиятини тушунади, билади ва айтиб беради деб топилганда - 8 - 10 балл;

номзод мустақил мушоҳада юритади, амалда қўллай олади, моҳиятини тушунади, билади, айтиб беради ва тасаввурга эга деб топилганда - 5 - 7 балл;

номзод моҳиятини қисман тушунади, билади, айтиб беради ва тасаввурга эга деб топилганда - 3-4 балл;

номзод билмайди, айтиб бера олмайди ва тасаввурга қисман эга деб топилганда - 1-2 балл қўйилади;

номзод билмайди, айтиб бера олмайди ва тасаввурга эга эмас деб топилганда - балл қўйилмайди.

80. Номзодларга қўйилган баллар умумлаштирилади. Бунда, якуний суҳбат давомида тўпланиши мумкин бўлган максимал балл - 30 баллни ташкил этади.

81. Якуний суҳбатга қатнашмаган номзодларга балл қўйилмайди.

82. Якуний суҳбат ўтказилган кундан кейинги кундан кечиктирмай унинг натижалари номзодларга эълон қилинади.

Қабул комиссияси котиби томонидан номзодларнинг жисмоний тайёргарлик даражасини баҳолаш ва якуний суҳбат тадбирларида тўплаган баллари умумлаштирилиб, мазкур Йўриқноманинг 12-иловасига мувофиқ шаклда Танлов натижалари бўйича қайднома (бундан буён матнда қайднома деб юритилади) расмийлаштирилади. Умумлаштирилгандаги максимал балл - 60 баллни ташкил этади.

83. Қайднома Қабул комиссиясининг ҳар бир аъзоси томонидан имзоланади ҳамда тасдиқлаш учун комиссия раисига тақдим этилади.

Қайдноманинг кўчирма нусхаси номзодлар ва бошқа фуқаролар кўриши учун қулай бўлган жойда (ахборот стендлари ёки ички ишлар органларининг хизмат бинолари деворларида) илиб қўйилади.

84. Ички ишлар органларидаги мавжуд бўш лавозимлар сонини ҳисобга олган ҳолда жисмоний тайёргарлик даражасини баҳолаш ва якуний суҳбатнинг умумлаштирилган натижаларига кўра, энг юқори балл тўплаган номзодлар хизматга қабул қилинади.

85. Агар икки ёки бир нечта номзодларнинг умумий тўплаган баллари тенг бўлиб қолса, уларнинг интеллектуал ривожланганлик даражаси ва психоэмоционал барқарорликни баҳолаш тадбирида қайд этган натижаси инобатга олинган ҳолда энг яхши кўрсаткичга эга номзод танлаб олинади.

86. Танлов тадбирлари бошланишидан олдин дастлабки ўрганиш, жисмоний тайёргарлик даражасини баҳолаш, интеллектуал ривожланганлик даражаси ва психоэмоционал барқарорликни баҳолаш ҳамда якуний суҳбат натижалари юзасидан номзодларнинг ариза ва шикоятларини кўриб чиқиш учун Қабул комиссияси раисининг буйруғига асосан Апелляция комиссияси ташкил этилади.

87. Апелляция комиссиясига ариза ва шикоятлар танловнинг тегишли босқичи бўйича натижалар эълон қилинган кундан бошлаб бир ҳафта мобайнида тақдим этилиши мумкин.

88. Апелляция комиссияси тақдим этилган ариза ва шикоятларни улар тушган кундан бошлаб уч иш кунидан ошмаган муддатда мурожаат қилган номзод иштирокида кўриб чиқади.

Апелляция комиссияси қарори устидан белгиланган тартибда юқори турувчи органга ёки судга шикоят қилиниши мумкин.

89. Танлов тадбирлари давомида расмийлаштирилган барча ҳужжатлар (дастлабки ўрганиш варақалари, қайдномалар ва комиссия баённомаларининг нусхалари) номзодларнинг шахсий ҳужжатлар йиғмажилдига бириктириб қўйилади.

90. Танловдан ўтмаган номзодлар бўйича танлов тадбирлари давомида расмийлаштирилган барча ҳужжатлар ҳамда танловнинг барча босқичлари акс этган видеотасвир материаллари кадрлар билан таъминлаш бўлинмаларида беш йил муддат давомида сақланади, кейин эса далолатнома асосида йўқ қилинади.

7-БОБ. ЯКУНИЙ ҚОИДА

91. Мазкур Йўриқнома талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Йўриқномага

1-ИЛОВА

Ички ишлар органларига хизматга танловларсиз

қабул қилинадиган тор ихтисослик бўйича

мутахассисликлар ва лавозимлар

РЎЙХАТИ

Йўриқномага

2-ИЛОВА

Ички ишлар органларига хизматга қабул қилиш учун алоҳида

мутахассислик талаб этиладиган лавозимлар

РЎЙХАТИ*

   

*) Изоҳлар:

1. Ушбу рўйхатдаги айрим лавозимлар мазкур Йўриқноманинг 1-иловасига мувофиқ Ички ишлар органларига хизматга танловларсиз қабул қилинадиган тор ихтисослик бўйича мутахассисликлар ва лавозимлар рўйхатига киритилганлиги боис, ушбу лавозимлар учун номзодлар хизматга танловларсиз қабул қилинади;

2. Ўзбекистон Республикаси Президентининг 2021 йил 29 ноябрдаги ПФ-27-сон "Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида"ги Фармонига асосан 2024 йил 1 сентябрдан эътиборан Тошкент шаҳар ички ишлар органлари, 2025 йил 1 сентябрдан бошлаб қолган ҳудудий ички ишлар органлари профилактика катта инспектори лавозимларига фақат олий юридик маълумотга эга бўлган ходимлар тайинланади.

Йўриқномага

3-ИЛОВА

Ички ишлар органларининг ўттиз ёшдан катта

фуқаролар қабул қилиниши мумкин бўлган

бўлинмалари ва лавозимлари

РЎЙХАТИ

1. Ахборот технологиялари, алоқа ва ахборотни ҳимоялаш, ривожлантириш ҳамда компьютерлаштирилган ва киберхавфсизлик бўлинмалари бўйича:

бошқарма бошлиғи;

бошқарма бошлиғи ўринбосари - телекоммуникация ва радиоалоқа бўлими бошлиғи;

бошқарма бошлиғи ўринбосари - ахборот тизимлари ва маълумотлар базасини жорий қилиш бўлими бошлиғи;

бўлим ва бўлинма бошлиғи;

бош ва етакчи мутахассис;

катта мутахассис-муҳандис;

катта муҳандис;

катта инспектор;

муҳим топшириқлар бўйича инспектор;

мутахассис, муҳандис, кичик мутахассис;

ўта муҳим ишлар бўйича тезкор вакил;

катта тезкор вакил.

2. Назорат-тафтиш инспекцияси бўйича:

инспекция бошлиғи;

инспекция бошлиғи ўринбосари;

бўлим бошлиғи;

бош ва катта тафтишчи;

тафтишчи.

3. Молия ва моддий-техника таъминоти хизматлари бўйича:

бошқарма бошлиқлари;

бошқарма бошлиғи ўринбосари;

бўлим, бўлинма бошлиғи;

бош иқтисодчи;

бош муҳандис-иқтисодчи;

бош ва етакчи мутахассис;

бош муҳандис;

бош бухгалтер, бухгалтер;

ғазначи;

иқтисодчи.

4. Капитал қурилиш ва таъмирлаш хизматлари бўйича:

бошқарма бошлиғи;

бошқарма бошлиғи ўринбосари;

бўлим ва бўлинма бошлиғи;

бош мутахассис.

5. Хўжалик хизматлари ҳамда жазони ижро этиш муассасалари ва ташкилотлари бўйича:

департамент бошлиғининг ишлаб чиқаришни ривожлантириш бўйича ўринбосари;

ишлаб чиқаришни ташкил этиш бошқармаси бошлиғи;

бошқарма бошлиғи ўринбосари - ишлаб чиқариш ва қишлоқ хўжалиги бўлими бошлиғи;

корхона директори - колония бошлиғининг ишлаб чиқаришни ривожлантириш бўйича ўринбосари;

транспорт бўлими бошлиғи;

бош муҳаррир;

етакчи ва катта мутахассис;

етакчи мутахассис-муҳаррир;

катта мутахассис-мухбир;

катта мутахассис-масъул котиб;

мутахассис-мухбир;

бош ва катта муҳандис;

катта муҳандис-энергетик;

катта муҳандис-иқтисодчи;

катта мутахассис-зоотехник;

участка бошлиғи;

мутахассис;

цех бошлиғи;

катта инспектор-муҳандис;

инспектор-муҳандис.

6. Жамоатчилик ва оммавий ахборот воситалари билан алоқалар бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим, марказ, бўлинма ва хизмат бошлиғи;

матбуот котиби;

бош мутахассис;

бош муҳаррир;

бош режиссёр;

бош продюсер;

бош инспектор;

етакчи ва катта мутахассис;

муҳаррир;

муҳаррир ўринбосари;

муҳим топшириқлар бўйича инспектор;

мутахассис-мухбир;

мухбир ва оператор;

оператор;

кичик инспектор;

мутахассис.

7. Таълим муассасалари бўйича:

таълим муассасаси бошлиғи (директори);

(катта) илмий ходимлар;

кафедра бошлиғи ва ўринбосари;

факультет бошлиғи ва ўринбосари;

цикл ва марказ бошлиғи;

профессор;

доцент;

катта ўқитувчи;

ўқитувчи;

кабинет бошлиғи.

8. Тиббиёт хизматлари бўйича:

бошқарма, бўлим, стоматологик поликлиника, лаборатория, госпиталь, санаторий, (бош) марказ, касалхона бошлиқлари;

бошқарма, бўлим, стоматологик поликлиника, лаборатория, госпиталь, санаторий, (бош) марказ, касалхона бошлиқларининг ўринбосарлари;

ҳарбий тиббий комиссия раиси;

бош шифокор (ўринбосари), фармацевт-провизор, дорихона бошлиғи, тиббий омборхона бошлиғи, амбулатория бошлиғи, фармацевт ассистенти, лаборант, тиббий рўйхатчи, фельдшер, тиббий ҳамшира, шифокор-эпидемиолог ёрдамчиси, санитария шифокори ёрдамчиси.

9. Юридик хизмат бўйича:

бошқарма, бўлим, бўлинма бошлиғи;

бошқарма бошлиғи ўринбосари;

бош, етакчи, катта юрисконсульт ҳамда юрисконсульт;

муҳим топшириқлар бўйича инспектор.

10. Кинология хизмати бўйича:

бўлим ва бўлинма бошлиғи;

лаборатория бошлиғи;

ветеринария хизмати бошлиғи;

ўқитувчи;

ветеринар-шифокор;

хизмат итларини амалиётда қўллаш бўйича илмий ходим;

кичик инструктор-кинолог;

кичик инспектор-кинолог;

кинолог, фельдшер, лаборант, ветеринар-фельдшер, ветеринар;

отлиқ отряд ветеринар-шифокори, ветеринар-фельдшер.

11. Маданият саройи ва оркестр бўйича:

маданият саройи бошлиғи-бадиий раҳбар;

маданият саройи бошлиғининг ўринбосари-қўшиқ ва рақс ансамбль бошлиғи;

ансамбль бошлиғи ўринбосари;

ансамбль бошлиғининг ёрдамчиси;

олий, биринчи, иккинчи ва учинчи тоифали артист;

оркестр бошлиғи - бош дирижёр;

оркестр бошлиғининг ўринбосари - дирижёр;

оркестр бошлиғининг тарбиявий ишлар бўйича ўринбосари;

оркестр бошлиғининг ёрдамчиси;

концертмейстер;

(катта) мусиқачи.

12. Халқаро ҳамкорлик бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим ва бўлинма бошлиғи;

бош инспектор;

муҳим топшириқлар бўйича инспектор.

13. Хавфсиз туризм бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим ва бўлинма бошлиғи;

бош ва муҳим топшириқлар бўйича инспектор;

марказ бошлиғи;

катта мутахассис;

катта инспектор-навбатчи;

ЙПХ (катта) инспектори;

(катта) инспектор.

14. Миграция ва фуқароликни расмийлаштириш бўлинмаларининг электрон ахборот тизимлари ва ахборот хавфсизлиги йўналиши бўйича:

бошқарма бошлиғи;

бўлим (бўлинма, гуруҳ) бошлиғи;

бош ва катта инспектор;

муҳим топшириқлар бўйича инспектор;

инспектор.

15. Ахлоқий-психологик таъминлаш бўлинмалари бўйича:

бўлинма бошлиғи;

бош психолог;

етакчи мутахассис-психолог;

етакчи мутахассис-психолог-полиграфолог;

катта психолог;

катта психолог-полиграфолог;

психолог;

криминалист-психолог.

Йўриқномага

4-ИЛОВА

Ички ишлар органларига хизматга қабул қилишда

алоҳида антропометрик параметрлар белгиланадиган

бўлинмалар ва лавозимлар

РЎЙХАТИ

1. Бўйининг баландлиги 175 см. дан паст бўлмаган эркаклар ва 170 см. дан паст бўлмаган аёллар қабул қилинадиган лавозимлар:

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати бўлинмаларининг йўл-патруль хизмати сафарбарлик гуруҳи командирлари;

йўл-патруль хизмати (катта) инспекторлари.

2. Бўйининг баландлиги 170 см. дан паст бўлмаган эркаклар ва 165 см. дан паст бўлмаган аёллар қабул қилинадиган лавозимлар:

а) Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати бўлинмаларининг ушбу Рўйхатнинг 1-бандида кўрсатилган лавозимлардан ташқари барча лавозимлари;

б) Ўзбекистон Республикаси Ички ишлар вазирлиги Жамоат хавфсизлиги департаменти Жамоат тартибини сақлаш бўлинмаларининг:

бригада, батальон ва отряд командирлари ҳамда уларнинг хизмат бўйича ўринбосарлари;

гуруҳ командирлари;

ҳайдовчи-ходимлар (бундан навбатчилик қисмлари ва таъминлаш бўлинмалари ҳайдовчи-ходимлари мустасно);

сафдор ходимлар;

отлиқ ходимлар;

ижтимоий-сиёсий, оммавий-маданий тадбирларни ўтказишда хавфсизликни таъминлаш батальони ва отрядларнинг барча лавозимлари.

Йўриқномага

5-ИЛОВА

             

       

       

А Р И З А

Сиздан, ички ишлар органларига хизматга кириш учун ўтказиладиган танловда номзод сифатида иштирок этишимга рухсат беришингизни сўрайман.

      

               

Хизмат заруриятига кўра лозим топилган ҳудудда хизмат қилишга тайёрман. Хизмат бўйича менга маълум бўлган давлат, ҳарбий ва хизматга оид маълумотларни сир сақлашга ваъда бераман.

Йўриқномага

6-ИЛОВА

Ички ишлар органларидаги хизматга номзодларни

танлаб олиш тадбирларини ташкил этиш ва ўтказиш

бўйича қабул комиссиясининг намунавий

ТАРКИБИ

Йўриқномага

7-ИЛОВА

Номзодни дастлабки ўрганиш

ВАРАҚАСИ

         

"Қарор билан танишдим ва юқорида қайд этилган маълумотлар тўғрилигини тасдиқлайман":

Йўриқномага

8-ИЛОВА

Номзодларнинг жисмоний тайёргарлик даражасини

БАҲОЛАШ МЕЗОНЛАРИ

1. Эркак жинсидаги номзодлар учун:

2. Аёл жинсидаги номзодлар учун:

      

Йўриқномага

9-ИЛОВА

Номзодларнинг жисмоний тайёргарлик

даражаси натижалари бўйича

ҚАЙДНОМА

20__ йил "____" ____________.

1. Эркак жинсидаги номзодлар учун:

2. Аёл жинсидаги номзодлар учун:

Йўриқномага

10-ИЛОВА

Психологик тест натижаларини ҳисоблаш

ЖАДВАЛИ

*) Изоҳ: Жадвалда кўрсатилган вазифаларнинг (тегишли шкалалар билан бирга) ҳар бири бўйича ички ишлар органларида хизматга тавсия этиш учун зарур бўлган натижани қайд этган номзодларгина хизматга тавсия этилади. Бунда, вазифаларнинг (тегишли шкалалар билан бирга) ақалли биттаси бўйича қониқарсиз натижа қайд этган номзод хизматга тавсия этилмайди.

Йўриқномага

11-ИЛОВА

Психологик тест синовлари натижалари бўйича

ҚАЙДНОМА

20__ йил "____" ____________

Йўриқномага

12-ИЛОВА

Танлов натижалари бўйича

ҚАЙДНОМА

Қонун ҳужжатлари маълумотлари миллий базаси (www.lex.uz),

2022 йил 9 март