ВСЕ ЗАКОНОДАТЕЛЬСТВО УЗБЕКИСТАНА
ЎзР Конунчилиги / Ҳуқуқ-тартиботни муҳофаза қилиш. Хавфсизлик. Маъмурий ва жиноий жавобгарлик / Коррупцияга карши курашиш /Ўзбекистон Республикаси Президентининг 11.05.2022 й. ПҚ-240-сон "Давлат бошқаруви соҳасида коррупциявий хавф-хатарларни бартараф этиш механизмларини такомиллаштириш ва ушбу соҳада жамоатчилик иштирокини кенгайтириш чора-тадбирлари тўғрисида"ги Қарори
Полный текст документа доступен в платной версии. По вопросам звоните на короткий номер 1172
ЎЗБЕКИСТОН РЕСПУБЛИКАСИ
ПРЕЗИДЕНТИНИНГ
ҚАРОРИ
11.05.2022 й.
N ПҚ-240
ДАВЛАТ БОШҚАРУВИ СОҲАСИДА
КОРРУПЦИЯВИЙ ХАВФ-ХАТАРЛАРНИ
БАРТАРАФ ЭТИШ МЕХАНИЗМЛАРИНИ
ТАКОМИЛЛАШТИРИШ ВА УШБУ СОҲАДА
ЖАМОАТЧИЛИК ИШТИРОКИНИ КЕНГАЙТИРИШ
ЧОРА-ТАДБИРЛАРИ ТЎҒРИСИДА
Мамлакатимизда давлат органлари ва ташкилотларининг коррупцияга қарши курашиш борасидаги фаолиятини такомиллаштириш доирасида уларга юкланган вазифа ва функцияларни амалга оширишда коррупциявий хавф-хатарларни баҳолаш тизими изчил жорий этилмоқда.
Шу билан бирга, Янги Ўзбекистон шароитида коррупциявий омилларни аниқлаш, баҳолаш ва бартараф этиш жараёнида тегишли соҳаларни рақамлаштириш ва таъсирчан жамоатчилик назоратини йўлга қўйишга эътиборни янада кучайтириш зарурати вужудга келмоқда.
Давлат бошқаруви соҳасида коррупциянинг олдини олиш юзасидан давлат органлари томонидан ўз функцияларини амалга оширишда коррупциявий хавф-хатарларни баҳолаш ва бартараф этиш тизимини янги босқичга олиб чиқиш мақсадида, шунингдек, 2022-2026 йилларга мўлжалланган Янги Ўзбекистоннинг тараққиёт стратегиясига мувофиқ:
1. 2022 йил 1 сентябрдан бошлаб, қуйидагиларни назарда тутувчи "Е-Антикоррупция" лойиҳаси (кейинги ўринларда - Лойиҳа) тўлиқ ишга туширилсин:
давлат ҳокимияти ва бошқаруви органлари, шу жумладан уларнинг ҳудудий бўлинмалари, давлат унитар корхоналари ва муассасалари, давлат улуши 50 фоиздан юқори ташкилотларнинг (кейинги ўринларда - давлат ташкилотлари) фаолиятида коррупциявий хавф-хатарларни мажбурий аниқлаш ва баҳолаш;
коррупциявий хавф-хатарларни аниқлаш ва баҳолаш натижалари бўйича ушбу хавф-хатарларни бартараф этиш чораларини тизимли равишда кўриш мақсадида "Коррупцияга мойил бўлган муносабатлар электрон реестри"ни (кейинги ўринларда - Реестр) шакллантириш ва юритиш;
коррупциявий хавф-хатарларни қонунчилик ҳужжатларини такомиллаштириш, инсон омилини қисқартириш ва тегишли тартиб-таомиллар ва функцияларни рақамлаштириш, шаффофликни таъминлаш, жамоатчилик назоратини йўлга қўйиш орқали бартараф этиш.
Белгилансинки:
Лойиҳа "E-Anticor.uz" электрон платформасида амалга оширилади;
Реестрни шакллантириш ва юритиш Коррупцияга қарши курашиш агентлиги (кейинги ўринларда - Агентлик) томонидан амалга оширилади ва Интернет тармоғида очиқ эълон қилиб борилади.
2. Шундай тартиб ўрнатилсинки, унга мувофиқ коррупциявий хавф-хатарларни аниқлаш ва баҳолаш доирасида:
давлат ташкилотлари томонидан уларга юкланган ҳар бир функция коррупциявий хавф-хатарларни аниқлаш юзасидан Агентлик ва Адлия вазирлиги томонидан тасдиқланадиган Коррупциявий хавф-хатарларни баҳолаш услубиётига мувофиқ таҳлил қилиб борилади;
давлат ташкилотлари томонидан ўзига юкланган функциялар ва уларни амалга ошириш механизмлари юзасидан маълумотлар шакллантирилиб, очиқ эълон қилиб борилади;
эълон қилинган маълумотлар юзасидан фуқароларнинг таклифларини онлайн режимда қабул қилиш имконини яратган ҳолда ижтимоий сўровлар ва мустақил экспертлар иштирокида муҳокамалар ўтказилади;
ҳар бир функциянинг коррупциявий хавф-хатар даражаси "паст", "ўрта" ва "юқори" ўлчовларида "E-Anticor.uz" электрон платформасида баҳолаб борилади;
ҳар бир функция бўйича аниқланган коррупциявий хавф-хатарларнинг тавсифи ва даражаси, уларни бартараф этиш бўйича чораларни ўз ичига олувчи коррупциявий хавф-хатарлар харитасини тузиш амалиёти йўлга қўйилади;
коррупциявий хавф-хатарларни баҳолаш натижалари бўйича тузиладиган коррупциявий хавф-хатарлар хариталари асосида Реестр юритилиб, коррупциявий хавф-хатарларни бартараф этиш тадбирларини бажариш ҳолати "E-Anticor.uz" электрон платформасида эълон қилиб борилади.
3. Шундай тартиб ўрнатилсинки, унга кўра:
давлат ташкилоти фаолиятида коррупциявий хавф-хатарларни (йиллик) баҳолаш ва коррупциявий хавф-хатарлар хариталарини Реестрга киритиш ҳар йили 1 мартга қадар амалга оширилади;
коррупциявий хавф-хатарларни баҳолаш давлат ташкилотлари таркибий бўлинмалари раҳбарларини жалб қилган ҳолда коррупцияга қарши ички назорат тузилмалари томонидан ташкил этилади. Бунда, коррупцияга қарши ички назорат тузилмалари мавжуд бўлмаган давлат ташкилотларида коррупциявий хавф-хатарларни баҳолаш учун уларнинг таркибий бўлинмалари раҳбарларидан иборат ишчи гуруҳлар ташкил этилиши мумкин;
коррупциявий хавф-хатарларни мустақил баҳолаш мақсадида давлат ташкилотининг фаолияти ушбу ташкилот билан келишилган ҳолда мустақил ташкилот томонидан ташқи баҳолашдан ўтказилиши мумкин. Бунда, тегишли давлат ташкилоти фаолиятида коррупциявий хавф-хатарларни баҳолаш қониқарсиз амалга оширилган деб топилган тақдирда, Агентлик кўрсатмасига асосан унинг фаолияти ташқи баҳолашдан ўтказилиши шарт;
давлат ташкилотларининг раҳбарлари ўзларига юкланган функцияларда коррупциявий хавф-хатарларни баҳолашни ўз вақтида ва сифатли ўтказиш учун шахсан жавобгардир.
4. Коррупцияга қарши курашиш миллий кенгаши (Т. Нарбаева) Агентлик (А. Бурханов) билан биргаликда коррупциявий хавф-хатарларни баҳолаш якунларига кўра қуйидаги чораларни кўриб борсин:
давлат ташкилотлари раҳбарларининг коррупциявий хавф-хатарларни баҳолаш ва бартараф этиш бўйича ахборотларини эшитиш ва натижасига кўра камчиликларга йўл қўйган мансабдор шахсларга нисбатан тегишли жавобгарлик чораларини кўриш бўйича таклифлар киритиш;
давлат ташкилотларининг коррупциявий хавф-хатарларни баҳолаш ва бартараф этиш борасидаги фаолиятини такомиллаштириш, ушбу йўналишда камчиликларнинг олдини олиш бўйича кўрсатмалар бериш;
коррупциявий хавф-хатарларни баҳолаш ва бартараф этишда ижобий натижаларга эришган давлат ташкилотларининг тажрибасини кенг оммалаштириш.
5. Агентлик (А. Бурханов) Адлия вазирлиги (Р. Давлетов) билан биргаликда ҳамда халқаро экспертларни жалб этган ҳолда:
уч ой муддатда давлат ташкилотлари фаолиятида коррупциявий хавф-хатарларни аниқлаш ва баҳолашнинг аниқ мезон ва усулларини назарда тутувчи услубиётни тасдиқласин;
мунтазам равишда давлат ташкилотларида коррупциявий хавф-хатарларни баҳолаш учун масъул ходимларнинг билим ва кўникмаларини ошириш бўйича ўқув-тренинг ва семинарларни ташкил қилиб борсин;
мунтазам равишда давлат ташкилотларига коррупцияга қарши курашиш бўйича чора-тадбирларни амалга оширишда услубий ёрдам бериб борсин.
6. Агентлик (А. Бурханов) Ахборот технологиялари ва коммуникацияларини ривожлантириш вазирлиги (Ш. Шерматов) билан биргаликда ҳамда халқаро ташкилотларни жалб қилган ҳолда 2022 йил 1 августга қадар Лойиҳани самарали амалга оширишни таъминлаш учун "E-Anticor.uz" электрон платформасини такомиллаштириш, шу жумладан ушбу платформа доирасида давлат ташкилотлари фаолиятида коррупциявий хавф-хатарларни баҳолаш электрон тизимини яратиш чораларини кўрсин.
7. Агентлик ва Адлия вазирлиги томонидан айрим соҳалар таҳлилдан ўтказилиб, бир қатор коррупциявий хавф-хатарлар аниқланганлиги маълумот учун қабул қилинсин.
Коррупцияга мойил бўлган муносабатларни бартараф этиш бўйича комплекс чора-тадбирлар дастури 1-иловага мувофиқ тасдиқлансин.
8. Адлия вазирлиги тизимида кадрлар билан ишлаш йўналишидаги бюрократик тўсиқларга чек қўйиш ҳамда коррупциявий хавф-хатарлар ва инсон омилини қисқартиришга қаратилган автоматлаштирилган тизим жорий этилганлиги маълумот учун қабул қилинсин.
Давлат бошқаруви органлари кадрлар билан ишлаш йўналишидаги бюрократик тўсиқларни, коррупциявий хавф-хатарлар ва инсон омилини қисқартиришга қаратилган автоматлаштирилган тизимни 2023 йил 1 январга қадар қуйидаги талаблар асосида жорий этсин:
вакант лавозимларни эълон қилишдан тортиб, танлов ўтказиш ва ишга қабул қилиш натижалари бўйича ҳужжатларни расмийлаштиришгача бўлган жараёнларни тўлиқ электрон тарзда амалга ошириш;
таркибий тузилма, штатлар, лавозимлар ва ходимлар тўғрисидаги маълумотларни ягона электрон базага жамлаган ҳолда ахборотни тўплаш ва унга ишлов бериш;
кадрларга оид иш юритув ҳужжатларини электрон рақамли имзо билан тасдиқланган ҳолда фақат тизим орқали электрон шаклда қабул қилиш ва юритиш;
ходимларнинг иш фаолияти самарадорлигини автоматик баҳолаш ва уларни масофавий ўқитиш;
кадрлар бўйича маълумотларнинг электрон архивини юритиш.
Белгилансинки, давлат бошқаруви органлари кадрлар билан ишлаш бўйича автоматлаштирилган тизимни жорий қилиш бўйича сарф-харажатларни ўзларининг бюджетдан ташқари маблағлари ҳамда қонунчилик ҳужжатларида тақиқланмаган бошқа манбалар ҳисобидан амалга оширади.
9. Агентлик Бош прокуратура Академияси ва Адлия вазирлиги ҳузуридаги Юристлар малакасини ошириш маркази билан биргаликда ҳамда халқаро ташкилотларни жалб қилган ҳолда коррупцияга қарши курашиш соҳасида илмий, услубий ва амалий ишланмаларни тарқатиш, эришилган ютуқлар ва тажриба билан алмашиш, давлат хизматчилари ва фуқароларнинг ушбу борадаги билимларини оширишда фойдаланишга мўлжалланган ягона интерактив майдонча - "Коррупцияга қарши курашиш виртуал платформаси" лойиҳасини ишга туширсин.
Бунда, ривожланган давлатларнинг коррупцияга қарши курашиш борасидаги тажрибасини ўрганиш, масофавий таълим беришнинг интерактив модулларини ишлаб чиқиш, илмий тадқиқотлар учун зарур адабиётлар базасини шакллантириш ҳамда мутахассислар билан онлайн анжуманлар ўтказиш имкониятларини яратишга алоҳида эътибор қаратилсин.
Агентлик (А. Бурханов), Бош прокуратура (Н. Йўлдошев) ва Адлия вазирлиги (Р. Давлетов) жорий йилнинг октябрь ойига қадар "Коррупцияга қарши курашиш виртуал платформаси" лойиҳасининг тўлиқ ишга туширилишини таъминлаш чораларини кўрсин.
10. Давлат бошқаруви соҳасида коррупциявий хавф-хатарларни баҳолаш ишларини ташкил этиш бўйича чора-тадбирлар режаси 2-иловага мувофиқ тасдиқлансин.
Коррупциянинг олдини олиш, шу жумладан коррупциявий хавф-хатарларни баҳолаш ишларини ташкил этиш бўйича чора-тадбирларнинг ўз вақтида, тўлиқ ва сифатли бажарилишини таъминлашга масъул этиб давлат ташкилотларининг раҳбарлари белгилансин.
11. Ўзбекистон Миллий телерадиокомпанияси (А. Хаджаев) ва Ўзбекистон Миллий ахборот агентлигига (А. Кўчимов) ушбу қарорнинг мазмун-моҳиятини ҳамда давлат бошқаруви соҳасида коррупциявий хавф-хатарларни баҳолаш ва бартараф этиш натижаларини оммавий ахборот воситалари орқали кенг ёритиш тавсия этилсин.
12. Агентлик (А.Бурханов) манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартиш ва қўшимчалар киритиш тўғрисида таклифлар киритсин.
13. Мазкур қарор ижросини самарали ташкил этишга масъул ва шахсий жавобгар этиб Агентлик директори А.Э. Бурханов белгилансин.
Қарор ижросини назорат қилиш, ижро учун масъул ташкилотлар фаолиятини мувофиқлаштириш Ўзбекистон Республикасининг Бош вазири А.Н. Арипов ва Ўзбекистон Республикаси Президентининг маслаҳатчиси Б.Д. Исламов зиммасига юклансин.
Ўзбекистон Республикаси Президенти Ш. Мирзиёев
Президентининг
2022 йил 11 майдаги
ПҚ-240-сон қарорига
1-ИЛОВА
Коррупцияга мойил бўлган муносабатларни
бартараф этиш бўйича комплекс
ЧОРА-ТАДБИРЛАР ДАСТУРИ
Т/р |
Чора-тадбирлар номланиши |
Амалга ошириш механизми |
Ижро муддати |
Масъул ижрочилар |
1. |
Давлат харидлари жараёнида тендер, танлов ва бошқаларни ўтказишда манфаатлар тўқнашуви ва коррупциявий омиллларнинг мавжудлигини аниқлашни рақамлаштириш. Жумладан, харид жараёнларида ҳужжатлар айланишини автоматлаштириш, "комплаенс-назорат" ўтказишни йўлга қўйиш. |
Ташкилий-ҳуқуқий чора-тадбирлар |
2022 йил сентябрь |
Молия вазирлиги (Т.Ишметов), Қурилиш вазирлиги (Б.Зокиров), Коррупцияга қарши курашиш агентлиги (А.Бурханов) |
2. |
Бюджет ташкилотларида қурилиш ва монтаж ишларини амалга ошириш устидан жамоатчилик назоратини ўрнатиш мақсадида қурилиш ва монтаж ишлари тўғрисидаги маълумотларни очиқлаш ва баҳолаш механизмларини жорий этиш. "Шаффоф қурилиш" миллий ахборот тизимида фуқаролардан ноқонуний қурилиш ҳолатлари юзасидан мурожаатларни онлайн қабул қилиш имконини яратиш. |
Ташкилий-ҳуқуқий чора-тадбирлар |
2022 йил август |
Қурилиш вазирлиги (Б.Зокиров), Коррупцияга қарши курашиш агентлиги (А.Бурханов) |
3. |
Давлат ва хўжалик бошқаруви органлари, давлат корхоналари ва устав капиталида давлат улуши бўлган корхоналар балансидаги товар-моддий бойликларни хатловдан ўтказиш ҳамда уларни ташкилот балансидан чиқаришнинг очиқ ва шаффоф электрон механизмини ишлаб чиқиш. |
Ташкилий-ҳуқуқий чора-тадбирлар |
2022 йил август |
Молия вазирлиги (Т.Ишметов), Марказий банк (М.Нурмуратов), Коррупцияга қарши курашиш агентлиги (А.Бурханов) |
4. |
Олий таълим муассасаларига ўқишга кириш учун (касбий) ижодий имтиҳонларни ҳамда олий таълим муассасаларини битиришда якуний давлат аттестация синовларини топширишда шаффофликни таъминлаш ва коррупциявий хавф-хатарларни бартараф этиш. |
Ташкилий-ҳуқуқий чора-тадбирлар |
2022 йил декабрь |
Давлат тест маркази (М.Каримов), Таълим сифатини назорат қилиш давлат инспекцияси (У.Ташкенбаев), Олий ва ўрта махсус таълим вазирлиги (А.Тошкулов), Коррупцияга қарши курашиш агентлиги (А.Бурханов) |
5. |
Олий таълим муассасаларига ўқишга кириш учун берилган имтиёзларни хатловдан ўтказиб, қайта кўриб чиққан ҳолда ягона ҳужжатда уларнинг қатъий рўйхатини шакллантириш ҳамда ушбу имтиёзларни умумий квотага киритмаслик тўғрисидаги қоидани белгилаш. Бунда: олий таълим муассасаларига ўқишга кириш учун имтиёзлар беришни тўлиқ рақамлаштиришва электрон платформа орқали амалга оширилишини йўлга қўйиш; олий таълим муассасаларига ўқишга кириш учун имтиёзлар беришнинг шаффоф тартибини белгилаш. |
Норматив-ҳуқуқий ҳужжат лойиҳаси |
2022 йил декабрь |
Олий ва ўрта махсус таълим вазирлиги (А.Тошкулов), Таълим сифатини назорат қилиш давлат инспекцияси (У.Ташкенбаев), Давлат тест маркази (М.Каримов), Коррупцияга қарши курашиш агентлиги (А.Бурханов), Адлия вазирлиги (Р.Давлетов), вазирлик ва идоралар |
6. |
Олий таълим муассасаларида талабаларни турар жой (ётоқхона) билан таъминлаш ва талабаларни жойлаштиришнинг электрон тизимини жорий этиш. |
Ташкилий чора-тадбирлар ва электрон тизим |
2022 йил август |
Олий ва ўрта махсус таълим вазирлиги (А.Тошкулов), Коррупцияга қарши курашиш агентлиги (А.Бурханов) |
7. |
Олий таълим муассасалари талабалари ўқишини кўчириш ва қайта тиклаш (шу жумладан хорижий ОТМлардан) жараёнини рақамлаштириш, шунингдек, иккинчи ва ундан кейинги олий таълимга ҳамда хорижий ОТМлар билан ҳамкорликдаги қўшма таълим дастурларига қабул қилиш ва талабалар ҳисобини юритишда шаффофликни таъминлаш. |
Ташкилий чора-тадбирлар |
2022 йил август |
Олий ва ўрта махсус таълим вазирлиги (А.Тошкулов), Таълим сифатини назорат қилиш давлат инспекцияси (У.Ташкенбаев), Давлат тест маркази (М.Каримов), Коррупцияга қарши курашиш агентлиги (А.Бурханов) |
8. |
Корхона ва ташкилотлар ишчи ва хизматчиларига давлат тасарруфидаги санаторий ва бошқа дам олиш масканларига йўлланма бериш жараёнининг очиқлигини таъминлаш. |
Ташкилий-ҳуқуқий чора-тадбирлар |
2022 йил август |
Молия вазирлиги (Т.Ишметов), Коррупцияга қарши курашиш агентлиги (А.Бурханов), Ўзбекистон касаба уюшмалари Федерацияси (Қ.Рафиков) |
9. |
Бюджет ташкилотлари ва устав капиталида давлат улуши бўлган корхона ва ташкилотларда суғурталаш жараёнларининг шаффофлигини таъминлаш мақсадида ушбу жараёнларни рақамлаштириш ва рақобат муҳитини шакллантириш. |
Ташкилий-ҳуқуқий чора-тадбирлар |
2022 йил август |
Молия вазирлиги (Т.Ишметов), Адлия вазирлиги (Р.Давлетов), Коррупцияга қарши курашиш агентлиги (А.Бурханов) |
10. |
Жазони ижро этиш муассасаларида сақланаётган маҳбуслар учун давлат хизматлари, шу жумладан нотариат хизматларини электрон шаклда кўрсатиш имкониятларини яратиш бўйича таклифларни ишлаб чиқиш. |
Норматив-ҳуқуқий ҳужжат лойиҳаси |
2022 йил октябрь |
Ички ишлар вазирлиги (П.Бобожонов), Адлия вазирлиги (Р.Давлетов) |
11. |
Қонунчиликда белгиланган мол-мулк ва автотранспорт воситаларига тақиқ қўйиш ва ундан чиқаришнинг электрон тартибини жорий этиш ҳамда фуқароларга тақиқ мавжуд ёки мавжуд эмаслигини онлайн текшириш имкониятини яратиш. |
Норматив-ҳуқуқий ҳужжат лойиҳаси |
2022 йил июнь |
Адлия вазирлиги (Р.Давлетов), Ички ишлар вазирлиги (П.Бобожонов), Марказий банк (М.Нурмуратов), Кадастр агентлиги (Ф.Пулатов), Коррупцияга қарши курашиш агентлиги (А.Бурханов), Молия вазирлиги (Т.Ишметов), вазирлик ва идоралар |
12. |
Мавжуд автобекатларни хатловдан ўтказиб, улар жойлашган ер участкаларининг ҳуқуқий мақомини аниқлаштириш, шунингдек, автобекатларда тадбиркорлик объектларини жойлаштиришга рухсат беришнинг шаффоф электрон механизмларини яратиш ва улардан фойдаланишнинганиқ талабларини белгилаш. |
Норматив-ҳуқуқий ҳужжат лойиҳаси |
2022 йил сентябрь |
Транспорт вазирлиги (И.Маҳкамов), Автомобиль йўллари қўмитаси (А.Абдувалиев), Монополияга қарши курашиш қўмитаси (Ш.Шорахметов), Адлия вазирлиги (Р.Давлетов), Кадастр агентлиги (Ф.Пулатов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари |
13. |
Ташқи реклама объектларини жойлаштириш билан боғлиқ барча муносабатларни рақамлаштириш орқали инсон омилини қисқартириш ҳамда онлайн аукцион тартибига қатъий риоя этган ҳолда жамоатчилик назоратини кучайтириш. |
Норматив-ҳуқуқий ҳужжат лойиҳаси |
2022 йил сентябрь |
Адлия вазирлиги (Р.Давлетов), Монополияга қарши курашиш қўмитаси (Ш.Шорахметов), Тошкент шаҳар ҳокимилиги (Ж.Артикходжаев) |
Президентининг
2022 йил 11 майдаги
ПҚ-240-сон қарорига
2-ИЛОВА
Давлат бошқаруви соҳасида коррупциявий хавф-хатарларни
баҳолаш ишларини ташкил этиш бўйича
ЧОРА-ТАДБИРЛАР РЕЖАСИ
Қонун ҳужжатлари маълумотлари миллий базаси (www.lex.uz),
2022 йил 11 май
78-150-11-72 
Мобильная версия сайта