Ўзбекистон Республикаси Вазирлар Маҳкамасининг 19.05.2022 й. 268-сон "Наманган ва Фарғона вилоятларида тажриба-синов тариқасида мактабгача таълим ташкилотлари раҳбар ва педагог кадрлари малакасини ошириш бўйича мактабгача таълим кластерлари фаолиятини ташкил этиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

19.05.2022 й.

N 268

НАМАНГАН ВА ФАРҒОНА ВИЛОЯТЛАРИДА

ТАЖРИБА-СИНОВ ТАРИҚАСИДА МАКТАБГАЧА

ТАЪЛИМ ТАШКИЛОТЛАРИ РАҲБАР ВА ПЕДАГОГ

КАДРЛАРИ МАЛАКАСИНИ ОШИРИШ БЎЙИЧА

МАКТАБГАЧА ТАЪЛИМ КЛАСТЕРЛАРИ

ФАОЛИЯТИНИ ТАШКИЛ ЭТИШ ЧОРА-

ТАДБИРЛАРИ ТЎҒРИСИДА

Мактабгача таълим ташкилотлари раҳбар ва педагог кадрларининг касбий билими, кўникмалари ва маҳоратини узлуксиз ривожлантириб боришнинг янги тизимини тажриба-синовдан ўтказиш, шунингдек ўқув-тарбия жараёнига замонавий педагогик технологияларни, таълим ва тарбиянинг самарали шакллари ҳамда усулларини жорий этиш мақсадида Вазирлар Маҳкамаси ҚАРОР ҚИЛАДИ:

1. Мактабгача таълим вазирлиги, Олий ва ўрта махсус таълим вазирлиги, Вазирлар Маҳкамаси ҳузуридаги Таълим сифатини назорат қилиш давлат инспекцияси, Наманган ва Фарғона вилояти ҳокимликларининг Наманган ва Қўқон шаҳарларида тажриба-синов тариқасида мактабгача таълим ташкилотлари раҳбар ва педагог кадрлари малакасини ошириш бўйича юридик шахс бўлмаган мактабгача таълим кластерлари фаолиятини ташкил этиш тўғрисидаги таклифига розилик берилсин.

2. Белгилансинки:

а) Наманган мактабгача таълим кластери Наманган давлат университети, Наманган педагогика коллежи ва Наманган шаҳридаги 60-сонли давлат мактабгача таълим ташкилоти;

б) Фарғона мактабгача таълим кластери Қўқон университети, Қўқон педагогика коллежи ва Қўқон шаҳридаги 2-сонли давлат мактабгача таълим ташкилотининг ўзаро ҳамкорлиги тўғрисидаги шартнома асосида ташкил этилади;

в) тажриба-синов даврида малака ошириш курсларининг умумий давомийлиги 36 соатни ташкил этади;

г) тажриба-синов уч ой давомида ўтказилади;

д) мактабгача таълим кластерларида Наманган ва Фарғона вилоятларидаги давлат мактабгача таълим ташкилотлари раҳбар ва педагог кадрларининг малакасини ошириш билан боғлиқ харажатларни молиялаштириш Мактабгача таълим вазирлигининг Мактабгача таълимни ривожлантириш жамғармаси маблағлари ҳисобидан амалга оширилади.

Бунда, Мактабгача таълим вазирлиги ва Молия вазирлиги томонидан раҳбар ва педагог кадрлар малакасини ошириш учун сарфланган ўртача харажатдан келиб чиқиб, бир нафар тингловчи учун тўланадиган маблағ миқдори белгиланади ҳамда тегишли маблағлар ҳисоб-китоблар асосида Наманган давлат университети ва Қўқон университетига Мактабгача таълим вазирлиги билан тузилган шартнома асосида ўтказиб берилади;

д) мактабгача таълим кластерлари доирасида:

Мактабгача таълим вазирлиги Олий ва ўрта махсус таълим вазирлиги билан биргаликда мактабгача таълим ташкилотлари раҳбар ва педагог кадрларининг малакасини ошириш жараёнларини ташкил этади;

Наманган давлат университети, Қўқон университети - малака ошириш курсларига профессор-ўқитувчиларни ва хорижий мутахассисларни жалб қилади, таълим-тарбия жараёнини методик таъминлайди, дарс жадвалларини тузади, ўқув жараёни сифати бўйича жорий назоратни олиб боради, тегишли кафедраларни кластерларнинг ўқув-меъёрий ва илмий-методик фаолиятига масъул этиб белгилайди, курсларни муваффақиятли тугатган тингловчиларга белгиланган давлат намунасидаги сертификатларни беради;

Қўқон ва Наманган педагогика коллежлари - малака ошириш курслари ўқув жараёнини олиб боришга ўқитишнинг замонавий техник воситалари билан жиҳозланган аудиторияларни ажратади, коллежнинг моддий-техник базасидан ўқув жараёнида фойдаланиш имкониятларини тақдим этади ҳамда таълим жараёнига миллий рух ва ватанпарварлик ғояларини сингдиради;

давлат мактабгача таълим ташкилотлари - малака ошириш курсларининг ўқув режасида белгиланган амалий машғулотлар учун тажриба майдончасини ташкил этади.

3. Наманган вилояти ва Фарғона вилояти ҳокимликлари Наманган педагогика коллежи ҳамда Қўқон педагогика коллежи ҳудудларини ободонлаштириш, ижтимоий-иқтисодий ва транспорт инфратузилмасини яхшилаш, шунингдек коллежлар бино ва иншоотлари моддий-техник базасини мустаҳкамлаш, уларни зарур ўқув адабиётлари ва таълим воситалари билан таъминлаш чораларини кўрсин.

4. Мактабгача таълим вазирлигининг Наманган ва Фарғона вилоятларининг чекка ҳудудларидаги давлат ва нодавлат мактабгача таълим ташкилотлари раҳбар ва педагог кадрлари учун сайёр малака ошириш курсларини ўтказиш мақсадида Мактабгача таълим вазирлигининг Мактабгача таълимни ривожлантириш жамғармаси маблағлари ҳисобидан 2 та "Мобил методик ёрдам автобуслари" фаолиятини йўлга қўйиш тўғрисидаги таклифига розилик берилсин.

"Ўзавтосаноат" АЖга Мактабгача таълим вазирлиги томонидан ишлаб чиқилган лойиҳа асосида "Мобиль методик ёрдам автобуслари"ни жиҳозлаш ишларини амалга ошириш тавсия этилсин.

5. Мактабгача таълим вазирлиги Олий ва ўрта махсус таълим вазирлиги, Вазирлар Маҳкамаси ҳузуридаги Таълим сифатини назорат қилиш давлат инспекцияси, Наманган вилояти ҳокимлиги, Фарғона вилояти ҳокимлиги билан биргаликда 2022 йил 1 октябрига қадар тажриба-синов натижаларини ҳисобга олган ҳолда ижобий тажрибани республиканинг бошқа ҳудудларига босқичма-босқич татбиқ этишнинг мақсадга мувофиқлиги юзасидан таклифларни белгиланган тартибда Вазирлар Маҳкамасига киритсин.

6. Мазкур қарорнинг бажарилишини назорат қилиш Ўзбекистон Республикаси мактабгача таълим вазири А.В. Шин зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.

Ўзбекистон Республикасининг Бош вазири                               А. Арипов

Қонун ҳужжатлари маълумотлари миллий базаси (www.lex.uz),

2022 йил 20 май