"Ўзбекистон Республикаси чорвачилик фидокори" кўкрак нишони тўғрисида Низом (ЎзР ВМ 27.09.2022 й. 526-сон қарорига 2-илова)

Функция недоступна

Вазирлар Маҳкамасининг

2022 йил 27 сентябрдаги

526-сон қарорига

2-ИЛОВА

"Ўзбекистон Республикаси чорвачилик фидокори"

кўкрак нишони тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом "Ўзбекистон Республикаси чорвачилик фидокори" кўкрак нишони (кейинги ўринларда - кўкрак нишони) билан тақдирлаш тартибини белгилайди.

2. Кўкрак нишони билан мамлакатимиз чорвачилигини ва унинг барча тармоқларини барқарор ривожлантириш, чорва молларининг наслини яхшилаш, озиқа базасини мустаҳкамлаш, наслчилик йўналишидаги чорвачилик ҳўжаликлари фаолиятини ҳамда чорвачилик маҳсулотларини етиштиришда йирик тадбиркорлик субъектлари кўпайтирилиши, наслчилик-селекция ишларини юритишнинг илмий асосланган инновацион услубларини жорий этиш, сунъий уруғлантиришни тизимли ташкил этиш, соҳага оид илм-фан ютуқларини амалиётга жорий этиб, замонавий технологиялардан самарали фойдаланишга муносиб ҳисса қўшган Ўзбекистон Республикаси фуқаролари тақдирланади.

3. Кўкрак нишони билан тақдирлаш тартиби мазкур Низомга иловада келтирилган схема бўйича амалга оширилади.

2-БОБ. КЎКРАК НИШОНИ БИЛАН ТАҚДИРЛАШ УЧУН

ҲУЖЖАТЛАРНИ ТАҚДИМ ЭТИШ ВА КЎРИБ ЧИҚИШ

4. Давлат органлари ва ташкилотлари, шунингдек, нодавлат нотижорат ташкилотлари кўкрак нишони билан тақдирлаш учун номзодлар бўйича таклифларни Ўзбекистон Республикаси Ветеринария ва чорвачиликни ривожлантириш давлат қўмитасига (кейинги ўринларда - Қўмита) ҳар йили 1 июлга қадар тақдим этади.

Номзод бўйича тақдим этилган таклифга номзод ҳақида маълумотнома, унинг сўнгги уч йил давомида чорвачилик ва унинг барча тармоқлари, шу жумладан, наслчилик соҳасини ривожлантириш борасида амалга оширган ишлари акс эттирилган тавсифнома илова қилинади.

5. Кўкрак нишони билан тақдирлашга оид таклифларни кўриб чиқиш учун Қўмита раиси томонидан беш нафардан иборат таркибда комиссия (кейинги ўринларда - Комиссия) ташкил этилади.

6. Комиссия таркиби ва Комиссия тўғрисидаги низом Қўмита раиси томонидан тасдиқланади.

7. Кадрлар бўлими Комиссиянинг ишчи органи ҳисобланади.

8. Комиссия томонидан номзодларни кўриб чиқишда қуйидагилар инобатга олинади:

номзодларнинг мамлакатимизда йирик ва майда шохли чорва моллари бош сонини кўпайтириш, озиқа базасини мустаҳкамлаш, наслчилик ишларини яхшилаш ҳамда соҳага инновацион ишланмаларни жорий қилиш борасидаги фаолияти;

хорижий мамлакатлар билан чорвачилик соҳаси бўйича ҳар тарафлама ҳамкорликни ривожлантириш борасидаги фаолияти;

эпизоотик осойишталик, озиқ-овқат маҳсулотлари хавфсизлигини таъминлаш, соҳага оид илм-фан ютуқларини амалиётга жорий этишга, замонавий технологиялардан самарали фойдаланишга муносиб ҳисса қўшганлиги.

9. Комиссия томонидан номзодларнинг ҳужжатлари ўрганилиб, ҳар йили 1 августга қадар энг муносиб номзодлар бўйича якуний хулоса қабул қилинади.

3-БОБ. КЎКРАК НИШОНИ БИЛАН ТАҚДИРЛАШ ТАРТИБИ

10. Комиссия хулосаси асосида Қўмита раисининг кўкрак нишони билан тақдирлаш тўғрисидаги буйруғи ҳар йили 20 августга қадар чиқарилади.

11. Кўкрак нишони ҳар йили 1 сентябрь - Мустақиллик байрами арафасида Қўмита раиси (ёки унинг топшириғига мувофиқ бошқа масъул шахслар) томонидан тантанали тарзда топширилади.

12. Кўкрак нишони билан тақдирланганларга базавий ҳисоблаш миқдорининг тўрт баравари миқдорида бир йўла тўланадиган пул мукофоти ёки эсдалик совғалари берилади.

Бир йўла тўланадиган пул мукофоти ёки эсдалик совғалари Қўмитанинг Ветеринария хизмати ва чорвачиликни ривожлантириш жамғармаси маблағлари ҳисобидан тўланади.

13. Кўкрак нишони билан тақдирлаш, истисно тариқасида, Қўмита раиси буйруғига асосан алоҳида ҳолатларда ҳам амалга оширилиши мумкин.

14. Кўкрак нишони билан тақдирланганлар рўйхати Қўмитанинг Интернет жаҳон ахборот тармоғидаги расмий веб-сайтида ва бошқа оммавий ахборот воситаларида эълон қилинади.

15. Бир шахс кўкрак нишони билан бир марта мукофотланади.

16. Кўкрак нишони давлат мукофотларидан кейин кўкракнинг чап томонига тақилади.

4-БОБ. ЯКУНЛОВЧИ ҚОИДАЛАР

17. Қўмита ушбу Низомга мувофиқ кўкрак нишонига тавсия этилган номзодлар ҳужжатларининг холис кўриб чиқилиши учун бевосита масъулдир.

18. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Низомга

ИЛОВА

"Ўзбекистон Республикаси чорвачилик фидокори"

кўкрак нишони билан тақдирлаш

СХЕМАСИ

Қонун ҳужжатлари маълумотлари миллий базаси (www.lex.uz),

2022 йил 28 сентябрь