Нодавлат таълим ташкилотларида давлат буюртмаси асосида касаначилик фаолияти билан шуғулланиш истагини билдирган ишсиз ва банд бўлмаган фуқароларни касбга ўқитиш тартиби тўғрисида Низом (ЎзР ВМ 14.10.2022 й. 596-сон қарорига 3-илова)

Функция недоступна

Вазирлар Маҳкамасининг

2022 йил 14 октябрдаги

596-сон қарорига

3-ИЛОВА

Нодавлат таълим ташкилотларида давлат

буюртмаси асосида касаначилик фаолияти

билан шуғулланиш истагини билдирган ишсиз

ва банд бўлмаган фуқароларни касбга

ўқитиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Мазкур Низом меҳнат бозорининг жорий ва истиқболдаги эҳтиёжлари асосида шакллантирилган давлат буюртмасига мувофиқ давлат ва нодавлат таълим ташкилотларида фуқароларни касаначилик йўналишида касбга ўқитиш ҳамда уларга малака сертификати беришни ташкил этиш тартибини белгилайди.

2. Ушбу Низомда қуйидаги асосий тушунчалардан фойдаланилади:

давлат ва нодавлат таълим ташкилотлари - давлат буюртмаси асосида ишсиз ва банд бўлмаган шахсларни касаначилик йўналишида касбга ўқитиш бўйича хизмат кўрсатувчи ташкилотлар;

ишсиз ва банд бўлмаган шахсларни касаначилик йўналишида касбга ўқитиш бўйича давлат буюртмаси (кейинги ўринларда - давлат буюртмаси) - меҳнат бозорининг жорий ва истиқболдаги эҳтиёжлари асосида ишсиз ва банд бўлмаган шахсларни касаначилик йўналишида касбга ўқитиш учун бериладиган буюртма.

3. Касаначилик фаолияти билан шуғулланиш истагини билдирган ишсиз ва банд бўлмаган шахслар (кейинги ўринларда - касаначилар)ни касаначилик йўналишида касбга ўқитиш қуйидаги ҳолларда амалга оширилади:

касби мавжуд бўлмаганда;

мавжуд касбий кўникмаларига мақбул иш йўқлиги сабабли касбни ўзгартириш зарурати бўлганда;

касбий кўникмалари мавжуд бўлмаганлиги ёки етарли бўлмаганлиги, касбига доир талаблар ўзгартирилганлиги боис малака ошириши зарур бўлганда;

аввалги касби бўйича иш бажариш қобилияти йўқотилганда.

4. Касаначиларни касбга ўқитиш:

Ўзбекистон Республикаси Бандлик ва меҳнат муносабатлари вазирлиги тизимидаги "Ишга марҳамат" мономарказлари, касб-ҳунарга ўқитиш марказлари ҳамда маҳаллаларда ташкил этилган касбга ўқитиш масканларида;

вазирлик ва идоралар тизимидаги профессионал таълим ташкилотларида ташкил этилган қисқа муддатли касб-ҳунарга ўқитиш курсларида;

нодавлат касб-ҳунарга ўқитиш ташкилотларида амалга оширилади.

2-БОБ. ДАВЛАТ БУЮРТМАСИНИ

ШАКЛЛАНТИРИШ

5. Давлат ва нодавлат таълим ташкилотларида давлат буюртмаси асосида касаначиларни касбга ўқитиш ушбу Низомга иловада келтирилган схемага мувофиқ амалга оширилади.

6. Туман (шаҳар) ҳокимликлари, туман (шаҳар) аҳоли бандлигига кўмаклашиш марказлари Маҳаллабай ишлаш ва тадбиркорликни ривожлантириш маркази билан биргаликда келгуси йил учун жорий йилнинг 10 декабрига қадар:

ҳудудларда фаолият юритаётган давлат ва нодавлат ташкилотларининг касаначилик йўналишларида малакали кадрларга бўлган талаб ва эҳтиёжларини ўрганади;

касбга ўқитишга эҳтиёжи бўлган фуқароларнинг касаначилик фаолияти йўналишлари бўйича касблар бўйича давлат буюртмасини ишлаб чиқади;

ишлаб чиқилган давлат буюртмасини тасдиқлаш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Касбий малака ва билимларни ривожлантириш бўйича ҳудудий кенгашларига (кейинги ўринларда - ҳудудий кенгашлар) тақдим этади.

7. Ҳудудий кенгашлар тақдим этилган давлат буюртмаларини умумлаштириб, таҳлил қилади ва беш кун ичида тасдиқлайди.

Давлат буюртмасига тегишли ўзгартириш ва қўшимчалар киритиш ҳудудий кенгашлар томонидан амалга оширилади.

3-БОБ. ДАВЛАТ БУЮРТМАСИ АСОСИДА

КАСАНАЧИЛАРНИ КАСБГА ЎҚИТИШГА

ЙЎНАЛТИРИШ

8. Қорақалпоғистон Республикаси Бандлик ва меҳнат муносабатлари вазирлиги, вилоятлар ва Тошкент шаҳар бандлик бош бошқармалари Маҳаллабай ишлаш ва тадбиркорликни ривожлантириш марказлари билан биргаликда:

ушбу Низомнинг 4-бандида кўрсатилган касбга ўқитиш бўйича белгиланган давлат ва нодавлат таълим ташкилотларининг йиллик ўқитиш эҳтиёжларидан келиб чиққан ҳолда ўқитиш тақсимотини ишлаб чиқади;

ўқитиш тақсимотига асосан давлат ва нодавлат таълим ташкилотларида касаначиларни касаначилик йўналишида касбга ўқитиш ишларини ташкил этади;

касбга ўқитиш жараёнларини мониторинг қилиб боради;

касбга ўқитилган касаначиларни касаначилик фаолияти йўналишлари бўйича касбий малака даражасини баҳолаш учун малакани баҳолаш марказларига юборади.

4-БОБ. ДАВЛАТ БУЮРТМАСИ АСОСИДА

КАСАНАЧИЛИК ЙЎНАЛИШИДА КАСБГА

ЎҚИТИЛГАН КАСАНАЧИЛАРНИ МАЛАКА

ДАРАЖАСИНИ БАҲОЛАШ

9. Қорақалпоғистон Республикаси Бандлик ва меҳнат муносабатлари вазирлиги, вилоятлар ва Тошкент шаҳар бандлик бош бошқармалари давлат буюртмаси асосида давлат ва нодавлат таълим ташкилотларида касбга ўқиган касаначиларнинг малака даражасини баҳолаш учун уларни малакани баҳолаш марказларига, шу жумладан, "Ишга марҳамат" мономарказларида ташкил этилган малакани баҳолаш марказларига юборилишига кўмаклашади.

Бунда нодавлат таълим ташкилотларида касбга ўқиган касаначилар малака даражасини баҳолатиш учун ўзлари ихтиёрий равишда мурожаат қилиши мумкин.

10. Малакани баҳолаш марказлари томонидан:

Ўзбекистон Республикаси Президентининг 2020 йил 31 декабрдаги ПҚ-4939-сон қарори билан тасдиқланган Малака даражаларига эришиш схемаси асосида касбга ўқитилган касаначилар малакаси баҳоланади;

баҳолашдан муваффақиятли ўтган касаначиларга ўн кун ичида малака сертификати берилади.

5-БОБ. КАСАНАЧИЛАРНИ КАСАНАЧИЛИК

ЙЎНАЛИШИДА КАСБГА ЎҚИТИШНИ

МОЛИЯЛАШТИРИШ

11. Касаначиларни касбга ўқитиш билан боғлиқ фаолият Ўзбекистон Республикаси Бандликка кўмаклашиш давлат жамғармаси маблағлари ҳисобидан тасдиқланган харажатлар сметаси доирасида молиялаштирилади.

Бунда нодавлат таълим ташкилотларида касаначилик йўналишида ўқув курсларини тамомлаган ҳар бир битирувчига касбга ўқитиш учун сарфланган харажатларнинг 70 фоизи, бироқ ҳар бир битирувчига базавий ҳисоблаш миқдорининг 4 баробаридан ошмаган миқдори давлат томонидан қоплаб берилади.

6-БОБ. ЯКУНЛОВЧИ ҚОИДА

12. Мазкур Низом талабларининг бузилишида айбдор бўлган шахслар қонунчиликда белгиланган тартибда жавоб берадилар.

Низомга

ИЛОВА

Давлат ва нодавлат таълим ташкилотларида

давлат буюртмаси асосида касаначилик фаолияти

билан шуғулланиш истагини билдирган ишсиз ва

банд бўлмаган фуқароларни касбга ўқитиш тартиби

тўғрисидаги низомга илова Давлат ва нодавлат таълим

ташкилотларида давлат буюртмаси асосида касаначилик

фаолияти билан шуғулланиш истагини билдирган

ишсиз ва банд бўлмаган фуқароларни касбга

ўқитишни амалга ошириш

СХЕМАСИ

Қонун ҳужжатлари маълумотлари миллий базаси (www.lex.uz),

2022 йил 15 октябрь