Ўзбекистон Республикаси Вазирлар Маҳкамасининг 07.11.2022 й. 648-сон "Бухоро вилояти умумий ўрта таълим ташкилотларида сув таъминотини барқарор ташкил этиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

07.11.2022 й.

N 648

БУХОРО ВИЛОЯТИ УМУМИЙ ЎРТА

ТАЪЛИМ ТАШКИЛОТЛАРИДА СУВ

ТАЪМИНОТИНИ БАРҚАРОР ТАШКИЛ

ЭТИШ ЧОРА-ТАДБИРЛАРИ ТЎҒРИСИДА

Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларида ичимлик сув ва канализациядан фойдаланиш имкониятини ташкил этиш мақсадида Вазирлар Маҳкамаси ҚАРОР ҚИЛАДИ:

1. 2020-2022 йиллардаги марказлашган ичимлик сув таъминотига уланмаган умумий ўрта таълим ташкилотларида сув таъминотини комплекс ташкил этиш тўғрисидаги ҳомийлик лойиҳалари (кейинги ўринларда - ҳомийлик лойиҳалари) доирасида 16 та умумий ўрта таълим ташкилотлари "Манба-фойдаланиш-тозалаш" сувдан фойдаланиш тамойили асосида ичимлик суви ва канализация тизими билан таъминланганлиги маълумот учун қабул қилинсин.

2. Уй-жой коммунал хизмат кўрсатиш вазирлиги, Халқ таълими вазирлиги, Бухоро вилояти ҳокимлиги ва "Ўзсувтаъминот" АЖнинг 2022-2025 йилларда Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларида "Манба-фойдаланиш-тозалаш" сувдан фойдайланиши тамойили асосида қуйидагиларни назарда тутувчи сув таъминотини барқарор ташкил этиш бўйича тажриба лойиҳасини (кейинги ўринларда - тажриба лойиҳаси) амалга ошириш тўғрисидаги таклифи маъқуллансин:

ер ости сув манбаларини чиқариш (қазиб олиш) ва ичиш учун тайёрлаш ҳамда улардан фойдаланиш ва фойдаланишдан кейин локал тозалаш тизимини ташкил этиш;

марказлашган ичимлик сув таъминоти ва оқова сувларини чиқариб юбориш тизимига улаш, ичимлик сувидан фойдаланиш ва оқова сувлари тозаланишини ташкил этиш.

3. Қуйидагилар:

Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларини сув таъминотини барқарор ташкил этиш имкониятини аниқлаш учун танлаб олиш режа-жадвали 1-иловага мувофиқ;

Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларини тажриба лойиҳасида иштирок этиш учун танлаб олиш схемаси 2-иловага мувофиқ;

Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларида тажриба лойиҳаси доирасида сув таъминотини барқарор ташкил этиш схемаси 3-иловага мувофиқ;

Бухоро вилоятидаги марказлашган ичимлик сув таъминотига уланмаган умумий ўрта таълим ташкилотларида тажриба лойиҳаси доирасида сув таъминотини барқарор ташкил этишнинг мақсадли кўрсаткичи 4-иловага мувофиқ тасдиқлансин.

4. Белгилансинки:

тажриба лойиҳасини амалга ошириш доирасида "Ўзсувтаъминот" АЖ буюртмачи функциясини бажаради;

ҳомийлик лойиҳалари ва тажриба лойиҳаси (кейинги ўринларда - сув таъминоти лойиҳалари) доирасида барпо этилган инфратузилмани жорий таъмирлаш, бошқариш ва эксплуатация қилиш (кейинги ўринларда - эксплуатация хизматлари) Халқ таълими вазирлигига юкланади;

халқ таълими тизими ташкилотларига эксплуатация хизматларини кўрсатиш бўйича "Ўзсувтаъминот" АЖнинг тизимига кирувчи ташкилотлар (кейинги ўринларда - ҳудудий ташкилотлар) билан тўғридан-тўғри шартнома тузишга рухсат берилади;

эксплуатация хизматлари нархи Молия вазирлиги ва Монополияга қарши курашиш қўмитаси билан келишилган ҳолда белгиланади;

сув таъминоти лойиҳалари доирасида барпо этилган инфратузилмада тозаланган сувлардан экология ва атроф-муҳитни муҳофаза қилиш ҳамда санитария-эпидемиологик осойишталик ва жамоат саломатлиги органлари билан келишилган ҳолда суғориш учун фойдаланилиши мумкин.

Бунда тажриба лойиҳасини амалга ошириш доирасида "Ўзсувтаъминот" АЖ ва унинг ҳудудий ташкилотлари ушбу қарор доирасида пуллик асосда товарларни етказиб берувчи ва хизматларни кўрсатувчи (ишларни бажарувчи) ҳисобланади ҳамда солиқ қонунчилигида белгиланган тартибда солиқ тўловларини амалга оширади.

5. Тажриба лойиҳасини амалга ошириш бўйича қуйидагилар молиялаштириш манбаси этиб белгилансин:

а) грантлар ва бошқа турдаги беғараз ёрдам (кейинги ўринларда - беғараз ёрдам) ва ҳомийлик хайриялари;

б) Молия вазирлиги ҳузуридаги Сув таъминоти ва канализация тизимларини ривожлантириш жамғармаси маблағлари:

инфратузилмани барпо этиш, шу жумладан қурилиш (реконструкция қилиш)ни назарда тутувчи лойиҳаолди ва лойиҳа ҳужжатларини ишлаб чиқиш ҳамда шаҳарсозлик экспертизасидан ўтказиш ва келишиш қисмида;

"Лойиҳалар ва импорт контрактларини комплекс экспертиза қилиш маркази" ДУКнинг инфратузилмани барпо этиш, шу жумладан қурилиш (реконструкция қилиш)ни назарда тутувчи лойиҳаолди ҳужжатларини экспертизадан ўтказиш қисмида;

г) қонунчиликда тақиқланмаган бошқа манбалар.

Бунда, тажриба лойиҳаси доирасида инфратузилмани барпо этиш, шу жумладан қуриш (реконструкция қилиш) турли манбалардан молиялаштирилишига рухсат этилади, шунингдек, уларга аҳоли пунктларида давлат капитал қўйилмалари ҳисобига молиялаштириладиган ичимлик сув таъминоти ва оқова сув хизмати объектларини қуриш ва реконструкция қилишни ташкил этиш тартиби татбиқ этилмайди.

6. "Ўзсувтаъминот" АЖ томонидан тажриба лойиҳасини молиялаштириш учун 20 миллиард сўмдан кам бўлмаган беғараз ёрдам ва ҳомийлик хайриялари жалб этилганлиги маълумот учун қабул қилинсин.

Инвестициялар ва ташқи савдо вазирлиги Уй-жой коммунал хизмат кўрсатиш вазирлиги, Ташқи ишлар вазирлиги, Халқ таълими вазирлиги ва "Ўзсувтаъминот" АЖ билан биргаликда тажриба лойиҳасини амалга ошириш учун қўшимча беғараз ёрдам жалб этиш чораларини кўрсин.

7. Иқтисодий тараққиёт ва камбағалликни қисқартириш вазирлиги Молия вазирлиги билан биргаликда тажриба лойиҳаси бўйича лойиҳаолди ва лойиҳа ҳужжатларини ишлаб чиқиш ҳамда шаҳарсозлик экспертизасидан ўтказиш ва келишиш учун талаб этилаётган бир миллиард сўм маблағни 2022 йилги ижтимоий ва ишлаб чиқариш инфратузилмасини ривожлантириш дастури доирасида Молия вазирлиги ҳузуридаги Сув таъминоти ва канализация тизимларини ривожлантириш жамғармасига йўналтирилган капитал қўйилмалар ҳисобидан ажратилишини таъминласин.

8. Молия вазирлиги:

2023 йил ва кейинги йиллардаги Ўзбекистон Республикаси давлат бюджети параметрларини шакллантиришда ушбу қарорнинг 5-банди "б" кичик бандида назарда тутилган харажатлар учун республика бюджетидан маблағлар ажратилишини;

халқ таълими тизими ташкилотларининг ҳар йиллик харажатлар сметасида сув таъминоти лойиҳалари доирасида барпо этилган, шу жумладан қурилган (реконструкция қилинган) инфратузилмаларга эксплуатация хизматларини кўрсатиш харажатларини қоплаш учун республика бюджетидан маблағлар ажратилишини таъминласин.

9. Қуйидагилар:

Уй-жой коммунал хизмат кўрсатиш вазирлиги тажриба лойиҳаси тадбирларини амалга оширишга жалб қилинган вазирлик ва идоралар фаолиятини мувофиқлаштириш учун маъсул этиб ҳисоблансин;

тажриба лойиҳасини сифатли ва ўз вақтида амалга ошириш учун уй-жой коммунал хизмат кўрсатиш вазирининг биринчи ўринбосари С.И. Саифназаровга шахсий жавобгарлик юклатилсин.

10. Уй-жой коммунал хизмат кўрсатиш вазирлиги Мактабгача таълим вазирлиги, Соғлиқни сақлаш вазирлиги, Халқ таълими вазирлиги, Ёшлар ишлари агентлиги ва "Ўзсувтаъминот" АЖ билан биргаликда 2023 йил 1 августга қадар тажриба лойиҳасини амалга оширишнинг оралиқ натижалари асосида марказлашган ичимлик сув таъминотига уланмаган ижтимоий соҳасидаги ташкилотларда сув таъминотини барқарор ташкил этиш бўйича Вазирлар Маҳкамасига таклифлар киритсин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов ва уй-жой коммунал хизмат кўрсатиш вазири Ш.С. Хидоятов зиммасига юклансин.

Ўзбекистон Республикасининг Бош вазири                                         А. Арипов

Вазирлар Маҳкамасининг

2022 йил 7 ноябрдаги

648-сон қарорига

1-ИЛОВА

Бухоро вилоятидаги марказлашган ичимлик

сув таъминотига уланмаган умумий ўрта таълим

ташкилотларини сув таъминотини барқарор ташкил

этиш имкониятини аниқлаш учун танлаб олиш

РЕЖА-ЖАДВАЛИ

            

Изоҳ. Мазкур режа-жадвалда белгиланган ўрганиш муддатлари Вазирлар Маҳкамаси билан келишилган ҳолда Уй-жой коммунал хизмат кўрсатиш вазирлиги томонидан узайтирилиши мумкин.

Вазирлар Маҳкамасининг

2022 йил 7 ноябрдаги

648-сон қарорига

2-ИЛОВА

Бухоро вилоятидаги марказлашган ичимлик сув

таъминотига уланмаган умумий ўрта таълим

ташкилотларини тажриба лойиҳасида

иштирок этиш учун танлаб олиш

СХЕМАСИ

              

*) Мактабнинг сув таъминоти инвестиция, грант ва бошқа дастур ҳамда лойиҳалар доирасида ташкил этилаётган бўлса, кейинги тадбирлар амалга оширилмайди.

**) Мактабнинг сув таъминотини барқарор ташкил этиш имконсиз бўлса, кейинги тадбирлар амалга оширилмайди.

Вазирлар Маҳкамасининг

2022 йил 7 ноябрдаги

648-сон қарорига

3-ИЛОВА

Бухоро вилоятидаги марказлашган ичимлик сув

таъминотига уланмаган умумий ўрта таълим

ташкилотларида тажриба лойиҳаси доирасида

сув таъминотини барқарор ташкил этиш

СХЕМАСИ

        

*) Мазкур босқич тадбирлари ТИҲКни экспертизадан ўтказиш учун "Лойиҳалар ва импорт контрактларни комплекс экспертиза қилиш маркази" ДУКга тақдим  этилиши лозим бўлган ҳолдагина амалга оширилади.

**) Тадбирни амалга олишириш халқ таълими вазирининг буйруғи қабул қилингандан сўнг 15 кун давомида бошланади.

***) ТИҲК экспертизадан ўтказиш учун "Лойиҳалар ва импорт контрактларни комплекс экспертиза қилиш маркази" ДУКга тақдим этилиши лозим бўлса, лойиҳа ҳужжатлари ТИҲКга мувофиқ ишлаб чиқилади.

****) Ушбу тадбирлар ҳудудий ташкилотига топширилган сув таъминотини барқарор ташкил этиш учун зарур инфратузилмага нисбатан амалга оширилмайди.

Вазирлар Маҳкамасининг

2022 йил 7 ноябрдаги

648-сон қарорига

4-ИЛОВА

Бухоро вилоятидаги марказлашган ичимлик сув

таъминотига уланмаган умумий ўрта таълим

ташкилотларида тажриба лойиҳаси доирасида

сув таъминотини барқарор ташкил этишнинг

МАҚСАДЛИ КЎРСАТКИЧИ

      

Изоҳ. Мақсадли кўрсаткичи грантлар ва бошқа турдаги беғараз ёрдамнинг зарур суммаси мақсадли кўрсаткичга эришишнинг тегишли санасига қадар жалб қилинган тақдирда эришилади.

Қонун ҳужжатлари маълумотлари миллий базаси (www.lex.uz),

2022 йил 7 ноябрь