Ўзбекистон Республикаси Президентининг 25.01.2023 й. ПФ-14-сон "Республика ижро этувчи ҳокимият органлари фаолиятини самарали йўлга қўйишга доир биринчи навбатдаги ташкилий чора-тадбирлар тўғрисида"ги Фармони

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

25.01.2023 й.

N ПФ-14

РЕСПУБЛИКА ИЖРО ЭТУВЧИ

ҲОКИМИЯТ ОРГАНЛАРИ ФАОЛИЯТИНИ

САМАРАЛИ ЙЎЛГА ҚЎЙИШГА ДОИР

БИРИНЧИ НАВБАТДАГИ ТАШКИЛИЙ

ЧОРА-ТАДБИРЛАР ТЎҒРИСИДА

Ўзбекистон Республикаси Президентининг 2022 йил 21 декабрдаги "Янги Ўзбекистон маъмурий ислоҳотларини амалга ошириш чора-тадбирлари тўғрисида"ги ПФ-269-сон Фармонига мувофиқ, шунингдек, вазирлик ва идоралар фаолиятини самарали ташкил қилишга йўналтирилган биринчи навбатдаги чора-тадбирларни белгилаш мақсадида:

1. Республика ижро этувчи ҳокимият органлари - вазирликлар, қўмиталар, агентликлар ва инспекциялар (кейинги ўринларда - вазирлик ва идоралар) ҳамда улар ҳудудий ва туман (шаҳар) бўлинмаларининг Давлат бюджети ҳамда бюджетдан ташқари жамғармалари маблағлари ҳисобидан молиялаштириладиган жами бошқарув ходимларининг умумий чекланган сони 1-иловага мувофиқ тасдиқлансин.

Вазирлик ва идоралар тизимида жами 17 447 та штат бирликлари қисқартирилаётганлиги маълумот учун қабул қилинсин.

Вазирлик ва идораларнинг бюджетдан ташқари жамғармалари маблағлари ҳисобидан қўшимча бошқарув штат бирликларини киритиш қатъиян тақиқлансин.

2. Республика ижро этувчи ҳокимият органлари - вазирликлар, қўмиталар, агентликлар ва инспекцияларнинг ягона рўйхати ҳамда уларнинг тўлиқ (расмий) ва қисқартма номлари 2 ва 2а-иловаларга мувофиқ тасдиқлансин.

Ўзбекистон Республикаси Президентининг 2003 йил 9 декабрдаги "Республика давлат бошқаруви органлари тизимини такомиллаштириш тўғрисида"ги ПФ-3358-сон Фармони ўз кучини йўқотган деб ҳисоблансин.

3. Вазирлик ва идоралар раҳбарлари уч ҳафта муддатда ҳар бир вазирлик ва идора фаолиятини мутлақо янги тизим асосида ташкиллаштиришни назарда тутувчи Ўзбекистон Республикаси Президенти ҳужжати лойиҳасини киритсин. Бунда, қуйидагилар назарда тутилсин:

вазирлик ва идораларнинг аниқ асосий фаолият йўналишларини белгилаш, қабул қилинган ривожлантириш дастурлари, стратегиялар ва концепцияларни амалга ошириш;

соҳаларда ҳал қилиниши лозим бўлган масалаларга ечим топишга йўналтирилган ташкилий-ҳуқуқий ва молиявий чора-тадбирлар, аҳоли учун қулай шароитлар яратиш, фуқароларнинг тизимли муаммоларини ҳал этиш;

бюджет маблағларидан мақсадли ва оқилона фойдаланиш, давлат харидлари шаффофлигини ошириш, шунингдек, тадбиркорлик субъектлари учун тенг имкониятлар яратиш орқали давлат харидлари жараёнида рақобатни ривожлантириш;

энергияни тежаш, унинг самарадорлигини ошириш ва соҳага қайта тикланувчи энергия манбаларини кенг жалб қилиш;

тегишли соҳаларда давлат-хусусий шериклик ва аутсорсинг механизмларини кенг жорий қилиш, 2023 йилдан бошлаб вазирлик ва идоралар ҳамда уларнинг тизим ташкилотларининг айрим функцияларини босқичма-босқич хусусий секторга ўтказиш;

лицензиялаш ва рухсат бериш тартиб-таомилларидаги бюрократик тўсиқларни бартараф этиш бўйича таклифлар тайёрлаш. Бунда, лицензия ва рухсат бериш хусусиятига эга ҳужжат талаб этиладиган фаолият тури, уларни бериш учун талаб этиладиган ҳужжатлар сони, хизмат кўрсатиш вақти ҳамда уларни бериш учун тўловлар (йиғимлар) миқдорини камайтириш;

тадбиркорлик фаолиятини ривожлантириш (уларга хизмат кўрсатиш, давлат томонидан субсидия тақдим этиш, имтиёз бериш ва бошқача тартибда қўллаб-қувватлаш) ҳамда аҳолини ижтимоий қўллаб-қувватлаш тизимини такомиллаштириш;

соҳани ривожлантириш дастурлари учун жалб қилинадиган грант ва техник кўмак маблағларининг прогнози ҳамда унинг аниқ йўналишларини белгилаш, инвестиция лойиҳаларини амалга ошириш гуруҳлари фаолиятини қайта кўриб чиқиш;

вазирлик ва идоралар тизимидаги давлат унитар корхоналари (муассасалари), масъулияти чекланган жамиятлар ҳамда давлат улуши бўйича акциялар пакети бошқарувига берилган хўжалик юритувчи субъектларнинг фаолиятини қайта кўриб чиқиш, шунингдек, улардаги давлат улушини хусусийлаштириш бўйича таклиф тайёрлаш;

вазирлик ва идоралар ҳамда уларнинг тизимидаги ташкилотлар томонидан назорат функцияларини "хавфни таҳлил этиш" тизими натижалари асосида амалга ошириш тартибини такомиллаштириш, шунингдек, уларни мувофиқлаштириш ва назорат функцияларини мақбуллаштириш;

вазирлик ва идоралар ҳамда уларнинг тизимидаги ташкилотлар томонидан тадбиркорлик субъектлари ва аҳолига давлат хизматлари кўрсатишнинг моделини такомиллаштириш;

вазирлик ва идораларда ҳамда улар таркибига кирадиган ташкилотлар кесимида коррупция авж олган соҳаларда унинг ривожланиш сабаблари ва шартларини ўрганиш асосида ушбу соҳаларнинг ҳар бирига "ташхис қўйиш" ҳамда коррупция омилларини бартараф этиш;

соҳага ахборот-коммуникация технологияларини кенг жорий этиш, шу жумладан вазирлик ва идораларнинг иш жараёнини рақамлаштириш;

соҳада фаолият кўрсатаётган ходимларнинг касбий маҳорати ва масъулиятини ошириш, тизим ташкилотларига ташаббускор, фидойи, садоқатли, ўз устида доимий ишлайдиган кадрларни жалб қилиш ҳамда уларнинг салоҳиятини доимий равишда ошириб бориш;

вазирлик ва идораларнинг ташкилий тузилмаларини тасдиқлаш, улар таркибига киритилган муассасаларнинг фаолиятини такомиллаштириш;

қонунчилик ҳужжатларини тўлиқ хатловдан ўтказиш, ўзгартириш ва қўшимчалар киритиш зарур бўлган норматив-ҳуқуқий ҳужжатларни бир-бирига мувофиқлаштириш.

4. Республика ижро этувчи ҳокимият органлари - вазирликлар, қўмиталар, агентликлар ва инспекцияларда таркибий бўлинмаларни шакллантириш ҳамда лавозимларни жорий этишга оид ягона талаблар 3-иловага мувофиқ тасдиқлансин.

Вазирлик ва идоралар раҳбарлари штатлар жадвалларини ишлаб чиқиш ва рўйхатдан ўтказишда мазкур Фармон билан тасдиқланаётган ягона талабларга қатъий амал қилсин.

Иқтисодиёт ва молия вазирлиги (Ш. Кудбиев) Камбағалликни қисқартириш ва бандлик вазирлиги (Б. Мусаев) билан биргаликда 2023 йил 1 декабрга қадар вазирлик ва идораларга юклатилган вазифаларни хатловдан ўтказиш ҳамда ишлаб чиқариш ва ёрдамчи ходимларни киритиш бўйича штат нормативларини тасдиқлашни назарда тутувчи Ҳукумат қарори лойиҳасини Вазирлар Маҳкамасига киритсин.

5. Вазирлик ва идоралар раҳбарлари белгиланган вазифаларининг бажарилишини ҳамда давлат хизматлари кўрсатилишининг узлуксизлигини таъминлаш мақсадида уч кун муддатда ўз раҳбарлари ўринбосарлари ўртасида аниқ вазифалар ва функцияларни тақсимлаб, улар фаолиятини самарали ташкил қилсин, шунингдек, ажратилган маблағлар доирасида вазирлик ва идораларнинг марказий аппарати, ҳудудий ва туман (шаҳар) бўлинмаларининг вақтинчалик тузилмаларини, штат бирликларини ҳамда низомларини тасдиқласин. Бунда:

қайта ташкил этилган, бўйсунуви ўзгартирилган ва тугатилган давлат бошқаруви органларининг тузилмаси ва штат бирликлари инобатга олинсин;

иш ҳақи ва бошқа харажатлар вақтинчалик харажатлар сметаси доирасида амалга оширилсин.

Иқтисодиёт ва молия вазирлигига вазирлик ва идораларда штат бирликлари мақбуллаштирилиши натижасида ходимлар билан ойлик иш ҳақлари бўйича якуний ўзаро ҳисоб-китобларни амалга ошириш мақсадида вазирлик ва идораларнинг вақтинчалик харажатлар сметасида, истисно тариқасида, зарур маблағларни 2023 йилнинг 1-чораги учун режалаштиришга рухсат берилсин.

Иқтисодиёт ва молия вазирлиги (Ш. Кудбиев) вазирлик ва идоралар раҳбарлари томонидан тасдиқланган штат бирликлари доирасида иш ҳақи ва бошқа харажатлар учун белгиланган тартибда маблағ ажратилишини таъминласин.

6. Ўзбекистон Республикаси Президенти ҳамда Вазирлар Маҳкамасининг ҳужжатлари билан тасдиқланган вазирлик ва идораларнинг марказий аппаратлари, ҳудудий ва туман (шаҳар) бўлинмаларининг тузилмалари ўз кучини йўқотган деб ҳисоблансин.

7. Камбағалликни қисқартириш ва бандлик вазирлиги (Б. Мусаев) маъмурий ислоҳотлар доирасида янги ташкил этилган вазирлик ва идораларга штатлар жадвалини тузиш, ходимларни ишга қабул қилиш, меҳнат муносабатларини давом эттириш ва бекор қилишни расмийлаштириш бўйича тушунтириш ишларини, шунингдек, меҳнат қонунчилиги талабларига риоя этилиши устидан назоратни амалга оширсин.

Белгилансинки, қўмиталар, агентликлар ва инспекцияларда янги раҳбарият шакллангунга қадар ходимларни ишга қабул қилиш ва меҳнат муносабатларини расмийлаштириш ишлари мазкур идораларда амалда фаолият юритаётган раҳбарлар (раҳбарлар мавжуд бўлмаса уларнинг ўринбосаридан бири) томонидан амалга оширилади.

8. Белгилаб қўйилсинки:

янги ташкил қилинган ва қайта ташкил қилинган вазирлик ва идоралар фаолияти тугатилган ёки қайта ташкил қилинган вазирлик ва идораларнинг тегишли ҳуқуқ ва мажбуриятлари бўйича ҳуқуқий вориси ҳисобланади;

2023 йил 1 январдан бошлаб қайта ташкил этилган ва фаолияти тугатилган давлат органларининг иш юритувида бўлган лицензиялаш, рухсат бериш, хабардор қилиш ва бошқа давлат хизматларини кўрсатиш тўғрисидаги ҳужжатлар ва аризалар тегишлилиги бўйича янги ташкил этилган ҳамда тугатилаётган ташкилотнинг тегишли функциялари ўтказилган вазирлик ва идоралар томонидан амалга оширилади;

давлат унитар корхоналарида ходимлар сони, уларнинг меҳнатига ҳақ тўлаш ва рағбатлантириш шартлари ҳамда хизмат автотранспорт воситаларининг чекланган сони ва турларини тасдиқлашда Иқтисодиёт ва молия вазирлиги билан мажбурий равишда келишилади.

Адлия вазирлиги (А. Ташкулов) Рақамли технологиялар вазирлиги (Ш. Шерматов) билан биргаликда уч кун муддатда:

барча янги ташкил этилган вазирлик ва идоралар Ягона интерактив давлат хизматлари порталига ва "Лицензия" ахборот тизимига уланишини;

Ягона интерактив давлат хизматлари портали ва "Лицензия" ахборот тизими орқали келиб тушган ва кўриб чиқиш жараёнида бўлган ҳужжатлар ва аризаларнинг тегишлилиги бўйича янги ташкил этилган вазирлик ва идоралар орасида қайта тақсимланишини таъминласин.

9. Иқтисодиёт ва молия вазирлиги (Ш. Кудбиев) 2023 йил 1 августга қадар:

юридик мақомга эга бўлган жамғармалар ижро этувчи органларининг (дирекциялар, бошқарув қўмиталари ва департаментлари ҳамда бошқалар) фаолиятини тугатиш, уларнинг функцияларини тегишли вазирлик ва идораларга ўтказиш;

вазирлик ва идораларда хизмат автотранспорт воситаларидан фойдаланиш тизимини илғор тажриба асосида танқидий таҳлил қилган ҳолда, уларнинг сонини ва сақлаш харажатларини қисқартириш, мазкур вазифани аутсорсинг тизими асосида ташкил этиш юзасидан норматив-ҳуқуқий ҳужжат лойиҳасини Вазирлар Маҳкамасига киритсин.

10. Адлия вазирлиги (А. Ташкулов) вазирлик ва идоралар билан биргаликда икки ой муддатда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида Вазирлар Маҳкамасига тегишли норматив-ҳуқуқий ҳужжатлар лойиҳаларини киритсин.

11. Мазкур Фармоннинг ижросини назорат қилиш Ўзбекистон Республикаси Бош вазири А.Н. Арипов ва Ўзбекистон Республикаси Президенти Администрацияси раҳбари С.У. Умурзаков зиммасига юклансин.

         

        

Ўзбекистон Республикаси Президенти                                                       Ш. Мирзиёев

Ўзбекистон Республикаси

Президентининг

2022 йил 23 январдаги

ПФ-14-сон Фармонига

1-ИЛОВА

Республика ижро этувчи ҳокимият

органлари - вазирликлар, қўмиталар, агентликлар

ва инспекциялар ҳамда улар ҳудудий ва туман (шаҳар)

бўлинмаларининг жами бошқарув ходимларининг

умумий чекланган сони

           

         

Изоҳлар:

1. Фавқулодда вазиятлар вазирлиги, Ички ишлар вазирлиги, Мудофаа вазирлиги ҳамда Мудофаа саноати агентлигининг штат бирликлари алоҳида норматив-ҳуқуқий ҳужжатлар билан белгиланади.

2. Тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман (шаҳар) ҳокимининг ёрдамчиси, маҳаллалардаги хотин-қизлар фаоллари, ёшлар етакчилари ҳамда ёлғиз кексалар ва ногиронлиги бўлган шахсларга уйида хизмат кўрсатувчи ижтимоий ходимлар штат бирликлари мазкур иловада инобатга олинмаган.

3. Қорақалпоғистон Республикаси вазирликларининг вазир ўринбосарлари мазкур иловада инобатга олинмаган.

4. Бошқарув штат бирликларининг умумий чекланган сонида ишлаб чиқариш штат бирликлари инобатга олинган (норматив асосида киритиладиган ишлаб чиқариш штат бирликлари бундан мустасно).

5. Вазирликлар, қўмиталар, агентликлар ва инспекциялар ходимларининг умумий чекланган сони таркибида қуйидаги ташкилотларнинг штат бирликлари инобатга олинган:

5.1. Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармасини бошқариш департаменти, Бюджетдан ташқари Пенсия жамғармаси;

5.3. Камбағалликни қисқартириш ва бандлик вазирлиги тизимида Ташқи меҳнат миграцияси агентлиги, Оила ва хотин-қизларни қўллаб-қувватлаш давлат мақсадли жамғармаси, Жамоат ишлари жамғармаси, Хорижда меҳнат фаолиятини амалга ошираётган фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси;

5.4. Қишлоқ хўжалиги вазирлиги тизимида Қишлоқ хўжалиги техникаси ва технологияларини сертификатлаш ва синаш давлат маркази, Қишлоқ хўжалиги экинлари навларини синаш маркази, Қишлоқ хўжалигида билим ва инновациялар миллий маркази, Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази;

5.5. Ўсимликлар карантини ва ҳимояси агентлиги тизимида Республика агрокимёвий таҳлил маркази, "Биосифат" республика маркази, Чигиртка ва тут парвонасига қарши кураш хизмати;

5.6. Сув хўжалиги вазирлиги тизимида Марказий диспетчерлик, коммуникация ва кадастр хизмати ҳамда Ахборот-таҳлил ва ресурс маркази;

5.7. Транспорт вазирлиги тизимида Транспорт ва логистикани ривожлантириш муаммоларини ўрганиш маркази;

5.8. Автомобиль йўллари қўмитаси тизимида "Автойўлинвест" агентлиги;

5.9. Энергетика вазирлиги тизимида бюджетдан ташқари Тармоқлараро энергияни тежаш жамғармаси;

5.10. Рақамли технологиялар вазирлиги тизимида Ахборот-коммуникация технологияларини ривожлантириш жамғармаси;

5.11. Экология, атроф-муҳитни муҳофаза қилиш ва иқлим ўзгариши вазирлиги тизимида Атроф муҳитни муҳофаза қилиш соҳасида ихтисослаштирилган аналитик назорат маркази ҳамда Доривор ўсимликларни етиштириш ва қайта ишлаш илмий-ишлаб чиқариш маркази;

5.12. Ўрмон хўжалиги агентлиги тизимида Миллий табиат боғлари ва овчилик бошқармаси;

5.13. Гидрометеорология хизмати агентлиги тизимида Гидрометеорологияда ахборот технологияларини ривожлантириш маркази;

5.14. Мактабгача ва мактаб таълими вазирлиги тизимида Ўқувчиларни касб-ҳунарга йўналтириш ва психологик-педагогик республика ташхис маркази, Республика таълим маркази;

5.15. Ихтисослаштирилган таълим муассасалари агентлиги тизимида Педагогик маҳорат ва халқаро баҳолаш илмий-амалий маркази;

5.16. Олий таълим, фан ва инновациялар вазирлиги тизимида Рақамли таълим технологияларини ривожлантириш маркази ҳамда Илғор технологиялар маркази;

5.17. Инновацион ривожланиш агентлиги тизимида Илм-фанни молиялаштириш ва инновацияларни қўллаб-қувватлаш жамғармаси;

5.19. Кинематография агентлиги тизимида Миллий кинематографияни ривожлантириш маркази;

5.20. Адлия вазирлиги тизимида Юридик хизмат кўрсатиш марказлари ва Давлат хизматлари марказлари;

5.21. Ташқи ишлар вазирлиги тизимида Ўзбекистон Республикасининг хориждаги дипломатик ваколатхоналари ва консуллик муассасалари, "Дунё" ахборот агентлиги ҳамда Таржимонлар бюроси;

5.22. Давлат активларини бошқариш агентлиги тизимида Бўш турган объектлардан самарали фойдаланишни ташкил этиш маркази ҳамда Хусусийлаштириш ва давлат активларини бошқариш муаммоларини тадқиқ этиш маркази.

6. Иқтисодиёт ва молия вазирлиги, Инвестициялар, саноат ва савдо вазирлиги ҳамда Қурилиш ва уй-жой коммунал хўжалиги вазирлигининг Тошкент шаҳри ҳудудий бошқармалари ҳамда Тошкент шаҳри туманларидаги бўлинмалари штат бирликлари мазкур вазирликлар умумий штат бирликлари сонига киритилган.

7. Энергетика вазирининг ўринбосарларининг 1 штат бирлиги Атом энергетикасини ривожлантириш агентлигининг 1 штат бирлиги ҳисобидан ташкил этилган.

8. Вазирлик ва идоралар раҳбарларига, зарур ҳолларда, мазкур иловада келтирилган бошқарув ходимларининг умумий чекланган сони доирасида тегишли тизим ташкилотларининг тузилмаларига ўзгартиришлар киритиш ҳуқуқи берилади.

         

Ўзбекистон Республикаси

Президентининг

2022 йил 23 январдаги

ПФ-14-сон Фармонига

2-ИЛОВА

Республика ижро этувчи ҳокимият

органлари - вазирликлар, қўмиталар, агентликлар

ва инспекцияларнинг ягона рўйхати*

                  

         

Жами - 69 та, шундан:

вазирликлар - 21 та;

қўмиталар - 12 та, шу жумладан алоҳида мақомга эга мустақил қўмиталар - 2 та;

агентликлар - 25 та, шу жумладан, алоҳида мақомга эга мустақил агентликлар - 4 та;

инспекциялар - 11 та.

*) Республика ижро этувчи ҳокимият органлари - вазирликлар, қўмиталар, агентликлар ва инспекциялар тўғрисидаги низом Вазирлар Маҳкамаси қарори билан тасдиқланади.

        

          

Ўзбекистон Республикаси

Президентининг

2022 йил 23 январдаги

ПФ-14-сон Фармонига

2а-ИЛОВА

Республика ижро этувчи ҳокимият

органлари - вазирликлар, қўмиталар, агентликлар

ва инспекцияларнинг қисқартма номлари

               

       

Изоҳлар:

1) 2023 йил 1 мартдан бошлаб йиғилиш ва видеоселектор баёнлари, хизмат ёзишмалари, таҳлилий ва бошқа материалларда (қонунлар ҳамда бошқа норматив-ҳуқуқий ҳужжатлар лойиҳаларининг қарор қисмлари бундан мустасно) вазирлик ва идораларнинг қисқартма номларини кўрсатиш амалиёти жорий қилинади;

2) вазирлик ва идораларнинг қисқартма номларидан фойдаланиш тартиби Адлия вазирлиги ва Давлат хизматини ривожлантириш агентлиги томонидан белгиланади ҳамда Вазирлар Маҳкамаси томонидан тасдиқланади.

        

         

Ўзбекистон Республикаси

Президентининг

2022 йил 23 январдаги

ПФ-14-сон Фармонига

3-ИЛОВА

Республика ижро этувчи ҳокимият

органлари - вазирликлар, қўмиталар, агентликлар

ва инспекцияларда таркибий бўлинмаларни

шакллантириш ҳамда лавозимларни

жорий этишга оид ягона талаблар

       

      

I. РЕСПУБЛИКА ИЖРО ЭТУВЧИ ҲОКИМИЯТ

ОРГАНЛАРИНИНГ МАРКАЗИЙ АППАРАТЛАРИ

         

         

Изоҳлар:

*) раҳбар ходимлар лавозимларининг аниқ номланиши қонунчилик ҳужжатларига мувофиқ белгиланади;

**) белгиланган масъул ходимлар штат бирликлари сони 20 ва ундан ортиқ бўлган ҳолларда вазирликларда департамент ташкил этилиши мумкин. Бунда, департамент бошлиғининг 2 нафаргача ўринбосари (шу жумладан, 1 нафар биринчи ўринбосар) лавозими киритилиши мумкин;

***) белгиланган масъул ходимлар штат бирликлари сони 7 ва ундан ортиқ бўлган ҳолларда ташкил этилади. Бунда, бошқарма бошлиғининг 1 нафар ўринбосари лавозими киритилиши мумкин. Департамент таркибидаги бошқармаларда бошқарма бошлиғи ўринбосари лавозими киритилмайди;

****) белгиланган масъул ходимлар штат бирликлари сони 2 ва ундан ортиқ бўлган ҳолларда ташкил этилади. Штат бирликлари сони 5 нафар ва ундан ортиқ бўлган бўлимларда 1 нафар бўлим бошлиғи ўринбосари лавозими киритилиши мумкин. Бошқарма таркибидаги бўлимларда бўлим бошлиғи ўринбосари лавозими киритилмайди;

*****) белгиланган масъул ходимлар штат бирликлари сони 1 нафардан иборат бўлганда бош мутахассис лавозими киритилади ҳамда меҳнатга ҳақ тўлаш шартлари бўйича бўлим бошлиғига тенглаштирилади.

Бунда:

а) марказий аппаратларнинг таркибий бўлинмалари ва уларнинг штат бирликларини шакллантиришда раҳбар ходимлар (раҳбар ва унинг ўринбосарлари, Вазир котибияти бошлиғи, департамент бошлиқлари ва ўринбосарлари, бошқарма бошлиқлари ва ўринбосарлари, бўлим бошлиқлари ва ўринбосарлари) ва ижрочилар (бош мутахассис, етакчи мутахассис, мутахассис) марказий аппарат бўйича камида 1/3 нисбатда бўлиши лозим;

б) марказий аппаратлар ва ҳудудий ҳамда туман (шаҳар) бўлинмалари тузилмалари тегишли раҳбарлар томонидан тасдиқланади ҳамда ходимларнинг белгиланган умумий сони ва ажратилган бюджет маблағлари доирасида мустақил ўзгартирилиши мумкин;

в) марказий аппаратларда стратегик режалаштириш ва методология, жамоатчилик билан алоқалар (ахборот хизматлари), инсон ресурсларини ривожлантириш ва бошқариш, ахборот таҳлил ва ижро интизоми, мурожаатлар, ахборот-коммуникация технологияларини жорий этиш ва рақамлаштириш, юридик таъминлаш, коррупцияга қарши курашиш, молия-иқтисод, халқаро ҳамкорлик ва рейтинглар, биринчи бўлим таркибий бўлинмалари (лавозимлари) ташкил этилиши мажбурий ҳисобланади.

Бунда, стратегик режалаштириш ва методология, жамоатчилик билан алоқалар (ахборот хизматлари), коррупцияга қарши курашиш, халқаро ҳамкорлик қилиш ва рейтинглар таркибий бўлинмалари (лавозимлари) фақатгина вазирлик ва бошқа мустақил идораларда ташкил қилиниб, ушбу йўналишларда улар ягона сиёсатни амалга оширади. Тизим ташкилотлари кўп бўлган вазирликлар ҳузуридаги қўмиталар, агентликлар ва инспекцияларда Ўзбекистон Республикаси Президенти Администрацияси билан келишилган ҳолда алоҳида бўлинмалар (лавозимлар) ташкил қилиниши мумкин;

г) вазирларнинг фаолиятини стратегик вазифаларни ҳал этишга йўналтириш ҳамда кунлик (жорий ишлар) иш юкламасини мақбуллаштириш мақсадида улар фаолиятини ҳуқуқий, ташкилий-техник, ахборот-таҳлил, назорат ва протокол жиҳатдан таъминлайдиган Вазир котибияти ташкил қилиниши мумкин.

Вазир котибияти бошлиғи ҳамда раҳбар маслаҳатчиси меҳнатга ҳақ тўлаш шартлари бўйича департамент бошлиғига тенглаштирилади;

д) вазирликлар ҳузуридаги қўмиталар, агентликлар ва инспекциялар марказий аппарати ва уларнинг ҳудудий ҳамда туман (шаҳар) бўлинмалари ходимлари учун меҳнатга ҳақ тўлаш разрядлари тегишлича вазирлик марказий аппарати ходимлари учун белгиланган меҳнатга ҳақ тўлаш разрядларидан бир поғона паст миқдорда қўлланилади;

е) бошқарма бошлиқлари учун меҳнатга ҳақ тўлаш разрядлари бўлим бошлиқлари учун белгиланган меҳнатга ҳақ тўлаш разрядларидан, департамент бошлиқлари учун эса бошқарма бошлиқлари учун белгиланган меҳнатга ҳақ тўлаш разрядларидан бир поғона юқори миқдорда қўлланилади.

      

        

II. РЕСПУБЛИКА ИЖРО ЭТУВЧИ ҲОКИМИЯТ

ОРГАНЛАРИ - ВАЗИРЛИКЛАР, ҚЎМИТАЛАР, АГЕНТЛИКЛАР

ВА ИНСПЕКЦИЯЛАРНИНГ ҲУДУДИЙ ҲАМДА

ТУМАН (ШАҲАР) БЎЛИНМАЛАРИ

            

          

Изоҳлар:

*) раҳбар ходимлар лавозимларининг аниқ номланиши қонунчилик ҳужжатларига мувофиқ белгиланади;

**) белгиланган масъул ходимлар штат бирликлари сони 5 ва ундан ортиқ бўлган ҳолларда ташкил этилади. Туман (шаҳар) бўлинмаларида киритилмайди;

***) белгиланган масъул ходимлар штат бирликлари сони 2 ва ундан ортиқ бўлган ҳолларда ташкил этилади;

****) белгиланган масъул ходимлар штат бирликлари сони 1 нафардан иборат бўлганда бош мутахассис лавозими киритилади ҳамда меҳнатга ҳақ тўлаш шартлари бўйича шўъба бошлиғига тенглаштирилади.

Ҳудудий ва туман (шаҳар) бўлинмаларининг штат бирликларини шакллантиришда раҳбар ходимлар (раҳбар ва ўринбосарлари, бўлим бошлиқлари ва ўринбосарлари, шўъба бошлиғи) ва ижрочилар (бош мутахассис, етакчи мутахассис, мутахассис) бўлинма бўйича камида 1/3 нисбатда бўлиши лозим.

          

         

Қонун ҳужжатлари маълумотлари миллий базаси (www.lex.uz),

2023 йил 25 январь

"Халқ сўзи", 2023 йил 26 январь