ВСЕ ЗАКОНОДАТЕЛЬСТВО УЗБЕКИСТАНА
ЎзР Конунчилиги / Иқтисодиётнинг айрим соҳалари / Савдо. Умумий овқатланиш. Маиший хизмат кўрсатиш / Аҳолига маиший хизмат кўрсатиш /Ўзбекистон Республикаси Вазирлар Маҳкамасининг 23.02.2023 й. 77-сон "Қашқадарё вилоятининг Шаҳрисабз ва Қамаши туманларида хизматлар соҳасини ривожлантиришга доир қўшимча чора-тадбирлар тўғрисида"ги Қарори
Полный текст документа доступен в платной версии. По вопросам звоните на короткий номер 1172
ЎЗБЕКИСТОН РЕСПУБЛИКАСИ
ВАЗИРЛАР МАҲКАМАСИНИНГ
ҚАРОРИ
23.02.2023 й.
N 77
ҚАШҚАДАРЁ ВИЛОЯТИНИНГ ШАҲРИСАБЗ
ВА ҚАМАШИ ТУМАНЛАРИДА ХИЗМАТЛАР
СОҲАСИНИ РИВОЖЛАНТИРИШГА ДОИР
ҚЎШИМЧА ЧОРА-ТАДБИРЛАР ТЎҒРИСИДА
Қашқадарё вилоятининг Шаҳрисабз ва Қамаши туманларининг туристик-рекрацион салоҳиятини ошириш, хорижий ҳамда маҳаллий туристлар учун муносиб шарт-шароитлар яратиш, хизмат ва савдо объектларини инфратузилма билан таъминлаш орқали аҳолининг даромадини ошириш мақсадида Вазирлар Маҳкамаси ҚАРОР ҚИЛАДИ:
1. Қуйидагилар:
Германия халқаро ҳамкорлик ташкилоти (GIZ) кўмагида хорижий экспертларни жалб қилган ҳолда Шаҳрисабз ва Қамаши туманларининг мастер-режаларини ишлаб чиқиш бошланганлиги;
Ўзбекистон Республикаси Президентининг "Иқтисодиётда давлат иштирокини янада қисқартириш ва хусусийлаштиришни жадаллаштиришга оид қўшимча чора-тадбирлар тўғрисида" 2022 йил 18 мартдаги ПҚ-168-сон қарорига 2-иловага мувофиқ Шаҳрисабз ва Қамаши туманларидаги кўчмас мулк объектларининг оммавий савдолар орқали сотилиши (кейинги ўринларда - Шаҳрисабз ва Қамаши туманларида оммавий савдоларда сотиладиган кўчмас мулк объектлари) белгиланганлиги маълумот учун қабул қилинсин.
2. Ўзбекистон Республикаси Давлат активларини бошқариш агентлиги, Қашқадарё вилояти ҳокимлиги Шаҳрисабз ва Қамаши туманларида оммавий савдоларда сотиладиган кўчмас мулк объектлари негизида замонавий хизмат кўрсатиш ҳамда туризм объектларини ташкил этишни назарда тутсин.
3. Қашқадарё вилоятининг Шаҳрисабз ва Қамаши туманларида йўл-транспорт ва муҳандислик-коммуникация тармоқларини ривожлантириш чора-тадбирларининг манзилли рўйхати иловага мувофиқ тасдиқлансин.
Бунда ушбу манзилли рўйхатда назарда тутилган объектларни қуриш-таъмирлаш ишлари бўйича:
ичимлик сув ва оқова сув тармоқларини қуриш, реконструкция қилиш ва таъмирлаш ишлари бўйича - "Сув таъминоти ва канализация объектларини қуриш бўйича инжиниринг компанияси" унитар корхонаси;
автомобиль йўлларини қуриш, реконструкция қилиш ва таъмирлаш ишлари бўйича - Автомобиль йўллари қўмитаси ҳузуридаги буюртмачи корхоналар;
электр энергияси билан таъминлаш ишлари бўйича - "Ҳудудий электр тармоқлари" АЖнинг ҳудудий филиаллари буюртмачи этиб белгилансин.
4. Қашқадарё вилояти ҳокимлиги, Ўзбекистон Республикаси Давлат активларини бошқариш агентлиги, Иқтисодиёт ва молия вазирлигининг Шаҳрисабз ва Қамаши туманларида оммавий савдоларда сотиладиган кўчмас мулк объектларини "E-AUKSION" электрон савдо платформасида аукцион савдолари орқали сотишдан тушган маблағларни (баҳолаш ва сотиш харажатлари, Давлат активларини бошқариш, трансформация ва хусусийлаштириш жамғармасига йўналтирилиши белгиланган қисми бундан мустасно) қарорга иловадаги чора-тадбирларни молиялаштиришга йўналтириш тўғрисидаги таклифлари маъқуллансин.
Мазкур маблағлар Қашқадарё вилояти ҳокимлиги ҳузуридаги Тадбиркорлик инфратузилмасини ривожлантириш жамғармасида жамланган ҳолда, истисно тариқасида, қарорга иловадаги чора-тадбирларни молиялаштиришга йўналтирилиши белгилаб қўйилсин.
5. Ўзбекистон Республикаси Президентининг "Хизматлар соҳасини ривожлантиришга оид қўшимча чора-тадбирлар тўғрисида" 2022 йил 27 январдаги ПҚ-104-сон қарорига асосан "Ўзмиллийбанк" АЖ ва тижорат банклари туризм салоҳияти юқори бўлган ҳудудларда замонавий меҳмонхона мажмуалари ва дам олиш зоналари, маданий-соғломлаштириш, савдо-кўнгилочар ва туризм аҳамиятидаги бошқа объектларни қуриш учун кредитларни белгиланган тартибда ажратсин.
6. Ўзбекистон Республикаси Қурилиш ва уй-жой коммунал хўжалиги вазирлиги мазкур қарорга иловада келтирилган объектларда қурилиш, реконструкция ишларини амалга оширишда лойиҳа-смета ҳужжатларини белгиланган тартибда давлат экспертизасидан ўтказиш, қурилиш-монтаж ишларининг сифатли бажарилиши устидан давлат назоратини ўрнатсин.
7. Ўзбекистон Республикаси Табиат ресурслари вазирлиги ташаббускорлар томонидан қурилиши, таъмирланиши ҳамда реконструкция қилиниши режалаштирилган объектларнинг экологик талабларга мувофиқлиги юзасидан лойиҳа материалларининг ишлаб чиқилиши ва қонунчиликда белгиланган тартибда давлат экологик экспертизасидан ўтказилишини таъминласин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров ҳамда Қашқадарё вилояти ҳокими М.Б. Азимов зиммасига юклансин.
Ўзбекистон Республикасининг Бош вазири А. Арипов
2023 йил 23 февралдаги
77-сон қарорига
ИЛОВА
Қашқадарё вилоятининг Шаҳрисабз
ва Қамаши туманларида йўл-транспорт
ва муҳандислик-коммуникация тармоқларини
ривожлантириш чора-тадбирларининг
МАНЗИЛЛИ РЎЙХАТИ
Изоҳ. Лойиҳа-смета ҳужжатларига асосан ажратиладиган ишлар ҳажми ва ажратиладиган маблағлар миқдори қайта кўриб чиқилиши мумкин.
Қонун ҳужжатлари маълумотлари миллий базаси (www.lex.uz),
2023 йил 24 февраль