Ўзбекистон Республикаси Президентининг 15.03.2023 й. ПҚ-96-сон "Япония халқаро ҳамкорлик агентлиги (JICA) иштирокида "Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳасини амалга ошириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

15.03.2023 й.

N ПҚ-96

ЯПОНИЯ ХАЛҚАРО

ҲАМКОРЛИК АГЕНТЛИГИ (JICA)

ИШТИРОКИДА "МЕВА-САБЗАВОТЧИЛИК

ТАРМОҒИДА ҚЎШИЛГАН ҚИЙМАТ ЗАНЖИРИ

ЯРАТИШНИ РИВОЖЛАНТИРИШ (2-БОСҚИЧ)"

ЛОЙИҲАСИНИ АМАЛГА ОШИРИШ

ЧОРА-ТАДБИРЛАРИ ТЎҒРИСИДА

         

          

Республикада мева-сабзавотчилик тармоғини жадал ривожлантиришга қаратилган чора-тадбирларни ўз муддатида самарали амалга ошириш, қишлоқ хўжалиги корхоналарининг молиявий барқарорлигини таъминлаш, рақобатбардош мева-сабзавот маҳсулотлари ишлаб чиқаришни ривожлантириш ҳамда Япония халқаро ҳамкорлик агентлиги (JICA) билан ҳамкорликни янада кенгайтириш мақсадида:

1. Қуйидагилар:

а) 2022 йил 29 августда Ўзбекистон Республикаси ва Япония халқаро ҳамкорлик агентлиги (JICA) ўртасида Ўзбекистон Республикасида "Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳасини (кейинги ўринларда - лойиҳа) молиялаштириш учун 200,0 млн АҚШ доллари, жумладан:

кредит линияси учун 15 йил муддатга, 5 йиллик имтиёзли давр билан йиллик SOFR + 1,25 фоиз ставкада 194,240 млн АҚШ доллари;

консалтинг хизматлари учун 15 йил муддатга, 5 йиллик имтиёзли давр билан йиллик SOFR + 1,25 фоиз ставкада 5,760 млн АҚШ доллари миқдоридаги қарз ажратилиши бўйича Қарз битими имзоланганлиги;

б) лойиҳанинг умумий қиймати 323,019 млн АҚШ долларига тенг эканлиги, шундан:

200 млн АҚШ доллари Япония халқаро ҳамкорлик агентлиги (JICA) қарзи;

58,272 млн АҚШ доллари қўшилган қиймат солиғини қоплаб бериш ва божхона тўловлари бўйича имтиёзлар бериш шаклида Ўзбекистон Республикасининг лойиҳани амалга оширишдаги улуши;

64,747 млн АҚШ доллари лойиҳа иштирокчиларининг (кредит олувчи лойиҳа ташаббускорларининг) улушидан иборат эканлиги;

в) лойиҳани амалга ошириш даври 6 йилни (2023-2028 йиллар) ташкил этиши маълумот учун қабул қилинсин.

2. Шундай тартиб ўрнатилсинки, унга мувофиқ:

Лойиҳада иштирок этувчи молия ташкилотларига кредитлар ўзбек сўмида тақдим этилади;

АҚШ долларига нисбатан ўзбек сўмининг валюта курси тебранишлари туфайли юзага келадиган харажатлар (кейинги ўринларда - валюта хатари) Ўзбекистон Республикасининг республика бюджети ҳисобидан қопланади;

лойиҳа доирасида лойиҳа ташаббускорларига миллий валютада ажратиладиган кредитлар лойиҳа ташаббускорларига Марказий банкнинг асосий ставкасида ажратилади;

кредит маблағлари лойиҳа ташаббускорларига маҳсулот етиштириш, сақлаш, қадоқлаш, қайта ишлаш, шок усулида музлатиш, логистика (жумладан юк ташиш техникаларини харид қилиш) ва бошқа қувватларни яратиш, озиқ-овқат саноати лойиҳаларига, шунингдек, айланма маблағлар учун ажратилади.

3. Белгилансинки:

лойиҳа Ўзбекистон Республикасининг барча вилоятлари ва Қорақалпоғистон Республикасида амалга оширилади;

Қишлоқ хўжалиги вазирлиги ҳузуридаги Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази (кейинги ўринларда - Марказ) лойиҳанинг ўз вақтида ва тўлиқ амалга оширилиши, уни мувофиқлаштириш ва бошқариш, шунингдек, лойиҳани амалга ошириш жараёнида мониторинг ва ҳисоботни юритиш учун масъул ижро этувчи орган ҳисобланади;

Ўзбекистон Республикаси Ташқи иқтисодий фаолият миллий банки Япония халқаро ҳамкорлик агентлигининг (JICA) қарзига хизмат кўрсатувчи молиявий агент (банк) ҳисобланади;

Лойиҳа доирасида қарзнинг умумий миқдоридан 0,2 фоиз (400 минг АҚШ доллари) миқдоридаги бир марталик олдиндан тўлов Ўзбекистон Республикасининг республика бюджети ҳисобидан тўланади, шундан 388,48 минг АҚШ доллари лойиҳада иштирок этувчи молия ташкилотлари билан қайта кредитлаш тўғрисидаги битимлар имзолангандан сўнг улар томонидан қоплаб берилади.

4. Қуйидагилар:

"Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳасининг асосий техник-иқтисодий кўрсаткичлари 1-иловага мувофиқ;

"Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳаси бўйича Япония халқаро ҳамкорлик агентлиги (JICA) қарзини қайтариш схемаси 2-иловага мувофиқ;

"Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳаси доирасида Япония халқаро ҳамкорлик агентлиги (JICA) қарзи бўйича асосий қарзни қайтариш, воситачилик ҳақи ва фоиз тўловларини тўлаш прогноз жадвали 3-иловага мувофиқ;

"Мева-сабзавотчилик тармоғида қўшилган қиймат занжири яратишни ривожлантириш (2-босқич)" лойиҳасини амалга ошириш бўйича "йўл харитаси" 4-иловага мувофиқ тасдиқлансин.

5. Марказ:

Иқтисодиёт ва молия вазирлиги ҳамда Марказий банк билан биргаликда икки ой муддатда сублойиҳаларни танлаш, уларни баҳолаш, кредитни қайта молиялаштириш муддатлари, фоиз ставкалари (валюта хатарларини инобатга олган ҳолда) ва бошқа шартларни назарда тутувчи Япония халқаро ҳамкорлик агентлиги (JICA) томонидан ажратилган қарздан фойдаланиш тартиби тўғрисидаги низомни (кейинги ўринларда - Низом) ишлаб чиқиб тасдиқласин;

молиялаштирилган сублойиҳалар тўғрисида, шунингдек, уларнинг ўз вақтида ва самарали амалга оширилиши устидан мониторинг натижалари юзасидан ҳар чорак якуни бўйича Иқтисодиёт ва молия вазирлиги ҳамда Вазирлар Маҳкамасига ҳисобот киритиб борсин.

6. Қишлоқ хўжалиги вазирлигининг Япония халқаро ҳамкорлик агентлиги (JICA) қарзи ҳисобидан молиялаштириладиган лойиҳаларни самарали амалга ошириш, уларнинг натижадорлиги устидан доимий мониторинг олиб бориш, тадбиркорлик субъектларига зарур маслаҳатлар бериш, юзага келадиган муаммоларни бартараф этиш вазифасини лойиҳанинг биринчи босқичи доирасида ташкил этилган Лойиҳани амалга ошириш гуруҳига юклаш тўғрисидаги таклифига розилик берилсин.

Лойиҳани амалга ошириш гуруҳи фаолиятини молиялаштириш учун лойиҳада иштирок этувчи тижорат банклари томонидан олинаётган қарз суммасининг 0,5 фоизи миқдорида бир марталик тўловлар тўлаб берилиши назарда тутилсин.

7. Иқтисодиёт ва молия вазирига Ўзбекистон Республикаси номидан Қишлоқ хўжалиги вазирлиги, Марказ ва лойиҳада иштирок этувчи тижорат банклари билан Япония халқаро ҳамкорлик агентлигининг (JICA) қарз маблағларини қайта кредитлаш битимларини имзолаш, шунингдек, зарур ҳолларда ушбу битимларга ўзгартиришлар ва қўшимчалар киритиш ваколати берилсин. Бунда, қайта кредитлаш битимларининг шартлари Низомга асосан белгиланади.

8. Ушбу қарорда белгиланган чора-тадбирларнинг самарали ва ўз вақтида амалга оширилишини таъминлаш мақсадида:

а) қишлоқ хўжалиги вазири А. Воитов:

икки ҳафта муддатда Қорақалпоғистон Республикаси Вазирлар Кенгаши Раиси ва вилоятлар ҳокимлари билан биргаликда лойиҳа доирасида маблағлардан фойдаланиш бўйича ҳудудлар кесимида "Йўл хариталари"ни тасдиқласин;

Инвестициялар, саноат ва савдо вазирлиги, Иқтисодиёт ва молия вазирлиги, Марказий банк билан биргаликда бир ой муддатда лойиҳани амалга оширишга масъул бўлган ходимлар учун хорижий консультантларни жалб қилган ҳолда икки кунлик семинар ташкил қилсин;

лойиҳа доирасида иқтисод қилинган маблағлар молиялаштиришнинг устувор йўналишларидан келиб чиқиб, Иқтисодиёт ва молия вазирлиги ҳамда Япония халқаро ҳамкорлик агентлиги (JICA) билан келишилган ҳолда қайта тақсимланишини таъминласин.

Қишлоқ хўжалиги вазирига, зарур ҳолларда, ушбу қарорга 1- ва 4-иловаларга Иқтисодиёт ва молия вазирлиги билан келишган ҳолда ўзгартириш ва қўшимчалар киритиш ҳуқуқи берилсин;

б) Қорақалпоғистон Республикаси Вазирлар Кенгаши Раиси ва вилоятлар ҳокимлари бир ой муддатда лойиҳаларни амалга оширадиган тадбиркорлар рўйхатини шакллантириб, лойиҳа доирасида амалга ошириладиган чора-тадбирлар юзасидан тақдимотлар ўтказсин.

9. Коррупцияга қарши курашиш агентлиги лойиҳа доирасида ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатсин.

10. Ўзбекистон Республикаси Президентининг айрим қарорларига 5-иловага мувофиқ ўзгартириш ва қўшимчалар киритилсин.

11. Мазкур қарорнинг ижросини самарали ташкил қилишга масъул ва шахсий жавобгар этиб қишлоқ хўжалиги вазири А.Б. Воитов белгилансин.

Мазкур қарор ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Бош вазир ўринбосари Ж.А. Ходжаев зиммасига юклансин.

        

      

Ўзбекистон Республикаси Президенти                                  Ш. Мирзиёев

       

        

Ўзбекистон Республикаси

Президентининг

2023 йил 15 мартдаги

ПҚ-96-сон қарорига

1-ИЛОВА

"Мева-сабзавотчилик тармоғида

қўшилган қиймат занжири яратишни

ривожлантириш (2-босқич)" лойиҳасининг

АСОСИЙ ТЕХНИК-ИҚТИСОДИЙ

КЎРСАТКИЧЛАРИ

        

          

         

Ўзбекистон Республикаси

Президентининг

2023 йил 15 мартдаги

ПҚ-96-сон қарорига

2-ИЛОВА

"Мева-сабзавотчилик тармоғида қўшилган

қиймат занжири яратишни ривожлантириш

(2-босқич)" лойиҳаси бўйича Япония

халқаро ҳамкорлик агентлиги

(JICA) қарзини қайтариш

СХЕМАСИ

       

млн АҚШ доллари

         

          

Ўзбекистон Республикаси

Президентининг

2023 йил 15 мартдаги

ПҚ-96-сон қарорига

3-ИЛОВА

"Мева-сабзавотчилик тармоғида

қўшилган қиймат занжири яратишни

ривожлантириш (2-босқич)" лойиҳаси доирасида

Япония халқаро ҳамкорлик агентлиги (JICA) қарзи

бўйича асосий қарзни қайтариш, воситачилик

ҳақи ва фоиз тўловларини тўлаш

ПРОГНОЗ ЖАДВАЛИ

          

         

          

минг АҚШ долл.

         

*) Мазкур тўлов лойиҳа кучга киргандан сўнг 60 кун ичида тўланиши лозим.

**) Тўлов суммалари қарзларнинг амалда ўзлаштирилишидан келиб чиқиб аниқланади.

         

          

Ўзбекистон Республикаси

Президентининг

2023 йил 15 мартдаги

ПҚ-96-сон қарорига

4-ИЛОВА

"Мева-сабзавотчилик тармоғида

қўшилган қиймат занжири яратишни

ривожлантириш (2-босқич)" лойиҳасини

амалга ошириш бўйича

"ЙЎЛ ХАРИТАСИ"

            

          

         

Ўзбекистон Республикаси

Президентининг

2023 йил 15 мартдаги

ПҚ-96-сон қарорига

5-ИЛОВА

Ўзбекистон Республикаси Президентининг

айрим қарорларига киритилаётган

ўзгартириш ва қўшимчалар

           

1. Ўзбекистон Республикаси Президентининг 2015 йил 21 сентябрдаги "Халқаро тикланиш ва тараққиёт банки иштирокида "Ўзбекистон Республикасида мева-сабзовотчилик секторини ривожлантириш" лойиҳасини амалга ошириш чора-тадбирлари тўғрисида"ги ПҚ-2410-сон қарори 1-бандининг тўртинчи хатбошисидаги "9 йил (2015-2023 йиллар) мобайнида" сўзлари "10 йил (2015-2024 йиллар) мобайнида" сўзлари билан алмаштирилсин.

2. Ўзбекистон Республикаси Президентининг 2017 йил 16 февралдаги "Иқлим ўзгаришига мослашиш ва Орол денгизи ҳавзаси учун унинг оқибатларини юмшатиш дастури" лойиҳасини Халқаро тараққиёт уюшмаси иштирокида амалга ошириш чора-тадбирлари тўғрисида"ги ПҚ-2784-сон қарорининг рус тилидаги матнида:

а) 1-банднинг тўртинчи хатбошиси қуйидаги таҳрирда баён этилсин:

"период реализации проекта определен в течение 9 лет (2017-2025 гг.)";

б) 2-бандда:

учинчи ва тўртинчи хатбошилардаги "Министерство сельского хозяйства" сўзлари "Международный центр стратегического развития и исследований в сфере продовольствия и сельского хозяйства при Министерстве сельского хозяйства" сўзлари билан алмаштирилсин;

в) 6-банднинг учинчи хатбошисидаги "с Агентством по реализации проектов в области агропромышленного комплекса и продовольственного обеспечения" сўзлари "с Международным центром стратегического развития и исследований в сфере продовольствия и сельского хозяйства" сўзлари билан алмаштирилсин;

г) 8-банднинг биринчи хатбошисидаги "за счет кредита MAP" сўзлари "за счет кредитных и грантовых средств MAP" сўзлари билан алмаштирилсин.

3. Ўзбекистон Республикаси Президентининг 2021 йил 22 декабрдаги "Озиқ-овқат ва қишлоқ хўжалиги соҳасида ислоҳотларни тадқиқ қилиш, стратегик режалаштириш ҳамда бошқариш тизимини янада такомиллаштириш чора-тадбирлари тўғрисида"ги ПҚ-58-сон қарори 8-бандининг ўн иккинчи хатбошиси қуйидаги таҳрирда баён этилсин:

"Марказ директорига Инвестициялар, саноат ва савдо вазирлиги, Иқтисодиёт ва молия вазирлиги ҳамда ХМИ ва ХҲМТ билан келишилган ҳолда амалга оширилаётган лойиҳалар доирасида Марказ ҳамда унинг ҳузуридаги лойиҳаларни амалга ошириш гуруҳлари ходимларининг ойлик иш ҳақларини икки баробарга ошириш ҳуқуқи берилади (бундан ойлик иш ҳақини хизматлар кўрсатиш ва қўшимча грант маблағларини жалб этиш ҳисобига ошириш мустасно)".

4. Ўзбекистон Республикаси Президентининг 2022 йил 27 апрелдаги "Қишлоқ хўжалиги маҳсулотларини етиштириш харажатларини молиялаштириш ва уларни харид қилиш тизимини такомиллаштириш чора-тадбирлари тўғрисида"ги ПҚ-225-сон қарорининг 1-банди қуйидаги таҳрирда баён этилсин:

"1. Қишлоқ хўжалиги вазирлиги, Иқтисодиёт ва молия вазирлиги ҳамда Қишлоқ хўжалигида хизматлар кўрсатиш агентлигининг (кейинги ўринларда - Қишлоқ хўжалигида хизматлар агентлиги) мева-сабзавотчилик соҳасини давлат томонидан қўллаб-қувватлаш учун ажратилиши кўзда тутилган маблағлар ҳисобидан Боғдорчилик ва иссиқхона хўжалигини ривожлантириш жамғармасига 12 ой муддатга, шу жумладан 11 ойлик имтиёзли давр билан 2022 йилда 300 миллиард сўм, 2023 йилда 100 миллиард сўм бюджет ссудасини йиллик 10 фоиз ставкада ажратиш тўғрисидаги таклифи маъқуллансин.

Иқтисодиёт ва молия вазирлигига қайтарилган маблағлар ҳисобидан йил давомида Қишлоқ хўжалигида хизматлар агентлигининг буюртмаси асосида қўшимча бюджет ссудаси ажратиб борилишини таъминлаш вазифаси юклатилсин. Бунда, ажратилган бюджет ссудаси бўйича қарздорликнинг жами суммаси мазкур қарор доирасида 2022 йилда 300 миллиард сўмдан, 2023 йилда 100 миллиард сўмдан ошиб кетмаслиги белгилаб қўйилсин".

5. Ўзбекистон Республикаси Президентининг 2022 йил 6 октябрдаги "Қишлоқ хўжалиги маҳсулотлари етиштиришни молиявий қўллаб-қувватлашнинг қўшимча чора-тадбирлари тўғрисида"ги ПҚ-387-сон қарорида:

а) 1-банд қуйидаги таҳрирда баён этилсин:

"1. Қишлоқ хўжалиги вазирлиги, Иқтисодиёт ва молия вазирлиги ҳамда Қишлоқ хўжалигида хизматлар кўрсатиш агентлигининг (кейинги ўринларда - Қишлоқ хўжалигида хизматлар агентлиги) мева-сабзавотчилик соҳасини давлат томонидан қўллаб-қувватлаш учун ажратилиши кўзда тутилган маблағлар ҳисобидан Боғдорчилик ва иссиқхона хўжалигини ривожлантириш жамғармасига 12 ой муддатга, шу жумладан 11 ойлик имтиёзли давр билан қўшимча 200 миллиард сўм бюджет ссудасини йиллик 10 фоиз ставкада ажратиш тўғрисидаги таклифи маъқуллансин.

Иқтисодиёт ва молия вазирлигига қайтарилган маблағлар ҳисобидан йил давомида Қишлоқ хўжалигида хизматлар агентлигининг буюртманомалари асосида қўшимча бюджет ссудаси ажратиб борилишини таъминлаш вазифаси юклатилсин. Бунда, ажратилган бюджет ссудаси бўйича қарздорликнинг жами суммаси мазкур қарор доирасида 200 миллиард сўмдан ошиб кетмаслиги кераклиги белгилаб қўйилсин";

б) 2-банднинг биринчи хатбошиси, 3-банд, 5-банднинг биринчи ва учинчи хатбошилари, 6-банднинг биринчи хатбошиси ҳамда 14-банднинг биринчи хатбошисидаги тегишли келишикдаги "Боғдорчилик агентлиги" сўзлари тегишли келишикдаги "Қишлоқ хўжалигида хизматлар агентлиги" сўзлари билан алмаштирилсин.

         

         

Қонун ҳужжатлари маълумотлари миллий базаси (www.lex.uz),

2023 йил 16 март