Шаҳар автобус йўналишларининг бошланғич нархини аниқлаш ва тасдиқлаш тартиби тўғрисида Низом (ЎзР ВМ 18.03.2023 й. 116-сон қарорига 2-илова)

Функция недоступна

Вазирлар Маҳкамасининг

2023 йил 18 мартдаги

116-сон қарорига

2-ИЛОВА

Шаҳар автобус йўналишларининг

бошланғич нархини аниқлаш ва

тасдиқлаш тартиби тўғрисида

НИЗОМ

        

      

1-БОБ. УМУМИЙ ҚОИДАЛАР

         

1. Ушбу Низом шаҳар автобус йўналишлари бўйича очиқ тендерларни ўтказишда бошланғич нархни аниқлаш ва тасдиқлаш тартибини белгилайди.

2. Мазкур Низомда қуйидаги асосий тушунчалар қўлланилади:

бошланғич нарх - шаҳар автобус йўналишларида йўловчиларни ташиш учун хизмат қиладиган ҳар бир автобус томонидан босиб ўтилган ҳар 1 километр масофа учун тўланиши лозим бўлган маблағларнинг энг юқори миқдори;

ваколатли орган - Қорақалпоғистон Республикаси Транспорт вазирлиги, вилоятлар ва Тошкент шаҳар транспорт бошқармалари;

давр харажатлари - бевосита ишлаб чиқариш жараёни билан боғлиқ бўлмаган харажатлар, шу жумладан бошқарув харажатлари, маҳсулотни сотиш харажатлари, солиқлар (йиғимлар) ва умумхўжалик аҳамиятига эга бўлган бошқа харажатлар (маъмурий бино-иншоотларни сақлаш, бошқарув ходимлари меҳнатига ҳақ тўлаш ва ҳ.к.).

иқтисодиёт ва молия органи - Қорақалпоғистон Республикаси Иқтисодиёт ва молия вазирлиги, вилоятлар ва Тошкент шаҳар иқтисодиёт ва молия бош бошқармалари;

рентабеллик - соф фойда миқдорини йўловчиларни ташиш хизматининг (ишлаб чиқариш) таннархига бўлиш йўли билан ҳисоблаб чиқиладиган корхона фаолиятининг самарадорлик (фойдалилик) кўрсаткичи;

ҳаракат таркиби - муайян йўналишда хизмат кўрсатадиган шаҳар автобусларининг жамланмаси.

3. Мазкур Низом талаблари чекланган тарифлар бўйича йўловчи ташишни брутто-шартнома (gross cost contract) асосида ташкил этиш ва молиялаштириш тартиби жорий этиладиган шаҳар автобус йўналишлари учун бошланғич нархни аниқлаш ва тасдиқлашда қўлланилади.

Бошланғич нархни пасайтириш шаҳар автобус йўналишларининг ташувчиларини аниқлаш бўйича электрон тарзда ўтказиладиган очиқ тендерларда қатнашчиларнинг таклифларини баҳолашнинг асосий мезонларидан бири сифатида белгиланади.

2-БОБ. БОШЛАНҒИЧ НАРХНИ

ШАКЛЛАНТИРИШ ТАРТИБИ

          

4. Бошланғич нарх ваколатли органлар томонидан ҳар бир шаҳар автобус йўналиши учун унинг паспорти ва йўналишга қўйилган талаблар асосида алоҳида шакллантирилади.

5. Бошланғич нархни шакллантириш Вазирлар Маҳкамасининг 1999 йил 5 февралдаги 54-сон қарори билан тасдиқланган Маҳсулот (ишлар, хизматлар)ни ишлаб чиқариш ва сотиш харажатларининг таркиби ҳамда молиявий натижаларни шакллантириш тартиби тўғрисидаги низом ва бошқа нархни шакллантириш соҳасидаги норматив-ҳуқуқий ҳужжатларга мувофиқ амалга оширилади.

6. Бошланғич нарх йўловчиларни ташиш хизматининг (ишлаб чиқариш) таннархи, давр харажатлари, молиявий фаолият билан боғлиқ харажатлар, фойдадан тўланадиган солиқ ва соф фойдадан шакллантирилади.

Бошланғич нархни шакллантиришда автобусларда йўловчиларни ташиш фаолияти билан боғлиқ бўлмаган харажатлар, зарарлар ва капитал қўйилмалар инобатга олинмайди.

3-БОБ. БОШЛАНҒИЧ НАРХ ТАРКИБИ

      

7. Бошланғич нарх қуйидагилар ҳисобидан шаклланади:

йўловчиларни ташиш хизматининг (ишлаб чиқариш) таннархи;

давр харажатлари;

молиявий фаолият билан боғлиқ харажатлар;

фойдадан тўланадиган солиқлар ва соф фойда.

8. Йўловчиларни ташиш хизматининг таннархи таркибига қуйидаги харажатлар киради:

а) ёқилғи (бензин, дизель ёқилғиси, суюлтирилган ва сиқилган газ, электр энергияси ва бошқалар) материаллари. Ушбу харажатларнинг ҳисоб-китоби мазкур Низомга 1 ва 1а-иловаларда келтирилган шаклда амалга оширилади.

Ваколатли органлар томонидан ёқилғи сарфи меъёри энг кам ва энг кўп сарфлаш диапазонларида тасдиқланган тақдирда, бошланғич нархни ҳисоб-китоб қилишда уларнинг ўртача кўрсаткичи ёқилғи сарфи меъёри сифатида қабул қилинади.

Йўналиш учун бошланғич нархни ҳисоблашда:

автобус тури (маркаси) - йўналишнинг паспорти ва йўналишга қўйилган талабларга мувофиқ белгиланади;

ёқилғи тури (бензин, дизель ёқилғиси, суюлтирилган газ ва сиқилган газ) - тегишлилиги бўйича Қорақалпоғистон Республикаси, вилоятлар ва Тошкент шаҳрида (кейинги ўринларда - ҳудуд) рўйхатга олинган жами автобуслар сонидаги муайян ёқилғи турида ҳаракатланадиган автобуслар сонининг улушига мувофиқ белгиланади. Бунда электробуслар ҳисобга олинмайди;

ёқилғининг нархи - бензин, дизель ёқилғиси ва суюлтирилган газ бўйича бошланғич нарх шакллантирилаётган даврдаги ўртача биржа котировкаларида, сиқилган газ ҳудуддаги газ қуйиш шохобчаларидаги ўртача нархда белгиланади;

б) ҳаракат таркибини тасарруф этиш, таъмирлаш ва техник кўрик харажатлари. Бунда ҳаракат таркибини тасарруф этиш харажатларининг ҳисоб-китоби мазкур Низомга 2-иловада келтирилган шаклда, таъмирлаш ва техник кўрик харажатларининг ҳисоб-китоби мазкур Низомга 3-иловада келтирилган шаклда амалга оширилади;

в) ҳайдовчи ва чиптачиларнинг меҳнатига ҳақ тўлаш билан боғлиқ харажатлар. Ушбу харажатларнинг ҳисоб-китоби мазкур Низомга 4 ва 4а-иловаларда келтирилган шаклда амалга оширилади.

Ҳайдовчиларнинг ойлик иш ҳақи миқдори Статистика агентлиги томонидан соҳалар бўйича эълон қилинадиган чораклик иш ҳақи миқдорлари тўғрисидаги маълумотлар асосида шакллантирилади.

Чиптачилар учун ойлик иш ҳақи харажатлари йўналишнинг паспорти ва йўналишга қўйилган талабларда ушбу йўналиш учун катта сиғимдаги (узунлиги 12 метр ва ундан ортиқ) автобуслар ҳаракатланиши назарда тутилган ҳолларда кўзда тутилади.

Чиптачилар учун иш ҳақи харажатлари ҳайдовчиларнинг иш ҳақи харажатларининг 60 фоизи миқдорида қабул қилинади.

г) ҳаракат таркибининг амортизация суммаси. Ушбу харажатларнинг ҳисоб-китоби мазкур Низомга 5-иловага мувофиқ амалга оширилади.

Ҳаракат таркибининг амортизацияси унинг таркибидаги асосий воситаларнинг бошланғич қиймати, уларнинг фойдаланиш муддатлари ҳамда улар учун Ўзбекистон Республикаси Солиқ кодексида белгиланган амортизация нормасидан келиб чиқиб ҳисоб-китоб қилинади.

Ҳаракат таркибидаги автобусларнинг бошланғич қиймати ишлаб чиқарувчи ва (ёки) уларни етказиб берувчи диллерлик ташкилотлари томонидан тақдим этилган прейскурантлар асосида ҳисобланади;

д) ташувчиларнинг фуқаролик жавобгарлигини, иш берувчининг фуқаролик жавобгарлигини ва транспорт воситалари эгаларинг фуқаролик жавобгарлигини мажбурий суғурта қилиш билан боғлиқ харажатлар. Ушбу харажатларнинг ҳисоб-китоби мазкур Низомга 6-иловага мувофиқ амалга оширилади;

е) йўловчиларни шаҳар, шаҳар атрофида ва шаҳарлараро микроавтобус ва автобусда ташиш хизматини кўрсатишга лицензия учун давлат божи тўлови. Ушбу харажатларнинг ҳисоб-китоби мазкур Низомга 7-иловага мувофиқ амалга оширилади;

ж) автотураргоҳ ва ёрдамчи бино-иншоотларни сақлаш харажатлари. Ушбу харажатларнинг ҳисоб-китоби мазкур Низомга 8-иловага мувофиқ амалга оширилади.

Бошланғич нархни ҳисоблашда автотураргоҳ ва бошқа ёрдамчи бино-иншоотларни сақлаш харажатлари уларни ижарага олиш шартлари асосида ҳисобланади.

Ижара тўловининг миқдори:

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан тасдиқланган ҳамда бошланғич нархни ҳисоблаш вақтида амалда бўлган давлат кўчмас мулкидан фойдаланганлик учун қўлланиладиган ижара тўловининг энг кам ставкалари асосида;

энг кам ставканинг йўналиш амалга ошириладиган ҳудуд учун тасдиқланган миқдори бинонинг қурилиш тури, туташ майдонлардан фойдаланиш имконияти, тижорат учун фойдаланишда қулайлик ва бошқа коэффициентларни инобатга олмаган ҳолда ҳисобланади.

Ҳаракат таркиби учун ижарага олиш талаб этиладиган автотураргоҳ ва бошқа ёрдамчи бино-иншоотларнинг майдони йўналишда ҳаракат қилиши назарда тутилган автобусларнинг сиғими ҳамда мазкур Низомга 9-иловада назарда тутилган меъёрлардан келиб чиқиб аниқланади;

з) ишлаб чиқариш аҳамиятига эга бўлган бошқа харажатлар.

Бошланғич нархни ҳисоблашда мазкур харажатлар йўловчиларни ташиш хизмати (ишлаб чиқариш) таннархининг (ишлаб чиқариш аҳамиятига эга бўлган бошқа харажатларни инобатга олмаган ҳолда) 1 фоизи миқдорида инобатга олинади.

Ваколатли органга ҳудуддаги шаҳарда йўловчиларни автобусда ташиш фаолияти билан шуғулланувчи корхоналарнинг молиявий кўрсаткичларидан келиб чиқиб, мазкур харажатлар миқдорини таннарх харажатларининг 3 фоизигача ошириш ҳуқуқи берилади.

9. Бошланғич нархни ҳисоблашда давр харажатлари миқдори ҳудуддаги шаҳарларда йўловчиларни автобусда ташиш фаолияти билан шуғулланувчи корхоналарнинг давр харажатлари йиғиндисининг ишлаб чиқариш таннархи йиғиндисига нисбатининг ўртача арифметик кўрсаткичидан келиб чиққан ҳолда мазкур Низомга 10-иловага мувофиқ ҳисобланади.

Ҳудуддаги шаҳарларда йўловчиларни автобусда ташиш фаолияти билан шуғулланувчи корхоналар бўйича давр харажатларининг ишлаб чиқариш таннархига нисбати уларнинг охирги ҳисобот давридаги "Молиявий натижалар тўғрисидаги ҳисобот" (2-сон шакл) шаклидаги кўрсаткичлари асосида аниқланади.

10. Молиявий фаолият билан боғлиқ харажатлар йўналишнинг паспорти ва йўналишга қўйилган талабларга мувофиқ мазкур йўналишга тўғри келадиган автобус маркаси ва унинг нархи, Марказий банк томонидан эълон қилинган миллий валютадаги банк кредитлари бўйича ўртача ажратилган фоиз ставкалари ҳамда автобуслардан фойдаланиш муддатларидан келиб чиққан ҳолда мазкур Низомга 11-иловага мувофиқ ҳисобланади.

Автобуслардан фойдаланиш муддатлари Ўзбекистон Республикаси Солиқ кодексида мазкур транспорт воситалари учун белгиланган амортизация нормасидан келиб чиқиб аниқланади. Бунда, кредитларни қайтариш муддатлари автобуслардан фойдаланиш муддатларига мутаносиб бўлиши лозим.

Бошланғич нархни шакллантиришда автобуслардан фойдаланиш муддатларига (беш йил) мос келадиган кредитлар бўйича Марказий банк томонидан охирги эълон қилинган миллий валютадаги банк кредитлари бўйича ўртача ажратилган фоиз ставкалари асос сифатида қабул қилинади.

Фоиз харажатларини ҳисоблаш кредит бўйича бошланғич бадал суммаси автобус қийматининг 25 фоизи миқдорида, асосий қарзни қайтариш бўйича имтиёзли даврларсиз ҳамда кредит бўйича тўловларни аннуитет усулида қайтариш шартлари асосида амалга оширилади.

11. Бошланғич нархни ҳисоблашда рентабеллик даражаси, яъни соф фойда миқдорининг йўловчиларни ташиш хизматининг (ишлаб чиқариш) таннархига нисбати 10 фоиз миқдорида инобатга олинади.

Ҳаракат таркибини янгилаш ва йўловчиларни ташиш соҳасидаги бошқа капитал қўйилмалар, шунингдек, дивидендларни (фойдадан ажратмаларни) тўлаш соф фойда ҳисобидан молиялаштирилади.

4-БОБ. ЙЎНАЛИШДА БОСИБ ЎТИЛАДИГАН

ЖАМИ ЙИЛЛИК МАСОФАНИ

ҲИСОБЛАШ ТАРТИБИ

         

12. Йўналишда босиб ўтиладиган жами йиллик масофа мазкур Низомга 12-иловага мувофиқ аниқланади.

Йўналишда босиб ўтиладиган жами йиллик масофани ҳисоблашда автобусларнинг йўналишни бошлаш (автотураргоҳдан биринчи бекатгача бориш) ҳамда якунлаш (охирги бекатдан автотураргоҳгача қайтиш) босқичининг ҳар бирида босиб ўтиладиган масофа 10 км миқдорида қабул қилинади.

Йўналиш паспорти ва йўналишга қўйилган талабларда автобуслар ва қатновлар сонини ҳафта кунлари, байрам кунлари ва дам олиш кунларига қараб ўзгартириш назарда тутилган бўлса, йўналишда босиб ўтиладиган жами йиллик масофа ўзгартирилган кўрсаткичлар асосида ҳисобланади.

Йўналиш паспорти ва йўналишга қўйиладиган талабларга асосан қатновларни амалга ошириш учун бир кунда йўналишга чиқариладиган автобуслар миқдорининг энг кўп сони ҳаракат таркибидаги автобусларнинг энг кўп миқдори ҳисобланади.

Автобуслар ва қатновлар сони ҳафта кунлари, байрам кунлари ва дам олиш кунларига қараб ўзгартирилган йўналишларда ҳаракат таркибидаги автобусларнинг ўртача сони мазкур Низомга 12а-иловага мувофиқ аниқланади.

Автобуслар ва қатновлар сони ҳафта кунлари, байрам кунлари ва дам олиш кунларига қараб ўзгартирилмаган йўналишларда ҳаракат таркибидаги автобусларнинг ўртача сони ҳаракат таркибидаги автобусларнинг энг кўп миқдорига тенг бўлади.

5-БОБ. БОШЛАНҒИЧ НАРХНИ

ТАСДИҚЛАШ ТАРТИБИ

         

13. Бошланғич нарх мазкур Низомга 13-иловага мувофиқ ваколатли орган томонидан аниқланади.

14. Ваколатли орган томонидан бошланғич нарх ва унинг ҳисоб-китоб материаллари, шунингдек, йўналиш паспорти ва йўналишга қўйилган талаблар йўналиш бўйича очиқ тендер ўтказиш тўғрисидаги эълонни ахборот тизимига ҳамда оммавий ахборот воситаларига жойлаштиришдан камида ўттиз кун олдин иқтисодиёт ва молия органларига келишиш учун тақдим қилинади.

15. Иқтисодиёт ва молия органлари икки ҳафта муддатда бошланғич нархни тақдим этилган ҳужжатлар ва материаллар асосида кўриб чиқиб, уни тақдим этилган даражада тасдиқлаш ёки ўзгартириш тўғрисидаги хулосани ваколатли органга юборади.

Иқтисодиёт ва молия органлари томонидан бошланғич нархнинг ҳисоб-китобларида хато ва камчилликлар аниқланган тақдирда, уни ижрочига қайта ишлаш таклифи билан қайтариш тақиқланади.

Бунда, иқтисодиёт ва молия органлари томонидан бошланғич нарх ваколатли орган билан биргаликда қайта ҳисобланади ҳамда тасдиқлаш учун ваколатли органга юборилади.

16. Бошланғич нарх Қорақалпоғистон Республикаси Транспорт вазирлиги, вилоятлар ва Тошкент шаҳар транспорт бошқармалари бошлиқлари томонидан иқтисодиёт ва молия органининг тегишли хулосаси олган кундан бошлаб икки иш куни давомида мазкур Низомга 14-иловага мувофиқ тасдиқланади.

Ҳар бир йўналиш учун тасдиқланган бошланғич нарх ва мазкур Низомга 1 - 13-иловаларда назарда тутилган ҳисоб-китоб материаллари, шунингдек, иқтисодиёт ва молия органларининг тегишли хулосалари йўналишнинг тендер ҳужжатлари таркибида сақланиши лозим.

6-БОБ. ЯКУНЛОВЧИ ҚОИДА

          

17. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

          

          

Низомга

1-ИЛОВА

______________ автобус йўналишида

йўловчиларни ташиш билан боғлиқ бўлган

ёқилғи материаллари харажатларининг

ҲИСОБ-КИТОБИ

           

         

*) Йўналишнинг паспорти ва йўналишга қўйилган талаблар, шунингдек ҳудудда рўйхатга олинган мазкур йўналишга тўғри келадиган автобусларнинг маркасидан келиб чиқиб аниқланади.

**) Ҳудудда рўйхатга олинган автобуслар сонидаги муайян ёқилғи турида ҳаракатланадиган автобуслар сонининг улушига мутаносиб равишда мазкур Низомга 1а-иловага мувофиқ ёқилғи турларига тақсимланади.

        

         

Низомга

1а-ИЛОВА

______________ вилоятида рўйхатга

олинган шаҳар автобуслари тўғрисида

МАЪЛУМОТ

           

         

*) Ҳудудда рўйхатга олинган автобуслар сонидаги муайян ёқилғи турида ҳаракатланадиган автобуслар сонининг улушига мутаносиб равишда ёқилғи турларига тақсимланади.

         

        

Низомга

2-ИЛОВА

______________ автобус йўналишида

ҳаракат таркибидаги автобусларни

тасарруф этиш харажатларининг

ҲИСОБ-КИТОБИ

           

          

*) Йўналишнинг паспорти ва йўналишга қўйилган талаблар, шунингдек ҳудудда рўйхатга олинган шу йўналишга тўғри келадиган автобусларнинг маркасидан келиб чиқиб аниқланади.

**) Ишлаб чиқарувчилар томонидан автобусларнинг техник ҳужжатларида ва бошқа норматив техник ҳужжатларда белгиланган миқдорлардан келиб чиқиб белгиланади.

***) Хизмат кўрсатувчи ва (ёки) маҳсулот етказиб берувчи ташкилотлар тақдим этган прейскурантлар асосида аниқланади.

        

         

Низомга

3-ИЛОВА

______________ автобус йўналишида

ҳаракат таркибидаги автобусларни таъмирлаш

ва техник кўрик харажатларининг

ҲИСОБ-КИТОБИ

           

          

*) Ишлаб чиқарувчилар томонидан автобусларнинг техник ҳужжатларида ва бошқа норматив техник ҳужжатларда белгиланган миқдорлардан келиб чиқиб белгиланади.

**) Хизмат кўрсатувчи ва (ёки) маҳсулот етказиб берувчи ташкилотлар тақдим этган прейскурантлар асосида аниқланади.

         

          

Низомга

4-ИЛОВА

______________ автобус йўналишида

ҳайдовчи ва чиптачиларининг меҳнатига

ҳақ тўлаш билан боғлиқ харажатларнинг

ҲИСОБ-КИТОБИ

            

       

*) Йўналишнинг паспорти ва йўналишга қўйилган талаблар, шунингдек ҳудудда рўйхатга олинган шу йўналишга тўғри келадиган автобусларнинг маркасидан келиб чиқиб аниқланади.

**) Ушбу Низомга 4а-иловага мувофиқ ҳисобланади.

         

           

Низомга

4а-ИЛОВА

______________ автобус йўналишида

ҳар 1 км босиб ўтиладиган масофа учун

ҳайдовчи ва чиптачиларининг меҳнатига

ҳақ тўлаш билан боғлиқ харажатларнинг

ҲИСОБ-КИТОБИ

          

        

*) Йўналишнинг паспорти ва йўналишга қўйилган талаблар асосида ҳисобланади.

**) Ҳайдовчилар сони 0,5 аниқликкача яхлитланади (яхлитлашда бирлик сондан кейин ҳосил бўлган 0,25 гача бўлган сонлар инобатга олинмайди, 0,25 дан 0,74 гача 0,5 миқдорида қабул қилинади, шунингдек 0,74 дан ошган сонлар бутун сон сифатида қабул қилинади).

***) Ҳайдовчилар иш ҳақи миқдори Статистика агентлиги томонидан соҳалар кесимида эълон қилинадиган чораклик иш ҳақи миқдорлари тўғрисидаги маълумотларга кўра эълон қилинган охирги чорак учун "Ташиш ва сақлаш" соҳаси ходимлари учун назарда тутилган иш ҳақи миқдорига 1,2 коэффициент қўллаш орқали аниқланади.

        

        

Низомга

5-ИЛОВА

______________ автобус йўналишида

ҳаракат таркибидаги автобусларнинг

амортизация суммасининг

ҲИСОБ-КИТОБИ

           

        

*) Автобусларнинг бошланғич қиймати ишлаб чиқарувчи ва (ёки) уларни етказиб берувчи диллерлик ташкилотлари томонидан тақдим этилган прейскурантлар асосида аниқланади.

        

         

Низомга

6-ИЛОВА

______________ автобус йўналиши бўйича

ташувчиларнинг фуқаролик жавобгарлигини, иш

берувчининг фуқаролик жавобгарлигини ва транспорт

воситалари эгаларинг фуқаролик жавобгарлигини

мажбурий суғурта қилиш билан

боғлиқ харажатларнинг

ҲИСОБ-КИТОБИ

         

       

*) Ишлаб чиқарувчилар томонидан автобусларнинг техник ҳужжатларида ва бошқа норматив техник ҳужжатларда белгиланган миқдорлардан келиб чиқиб белгиланади.

**) Ташувчининг фуқаролик жавобгарлигини мажбурий суғурта қилиш қоидалари, Иш берувчининг фуқаролик жавобгарлигини мажбурий суғурта қилиш қоидалари ҳамда Транспорт воситалари эгаларининг фуқаролик жавобгарлигини мажбурий суғурта қилиш қоидаларига мувофиқ аниқланади.

         

         

Низомга

7-ИЛОВА

______________ автобус йўналиши

учун йўловчиларни шаҳар, шаҳар атрофида

ва шаҳарлараро микроавтобус ва автобусда

ташиш хизматини кўрсатишга лицензия

учун давлат божининг

ҲИСОБ-КИТОБИ

           

         

*) Йўналишнинг паспорти ва йўналишга қўйилган талаблар асосида аниқланади.

         

          

Низомга

8-ИЛОВА

______________ автобус йўналиши учун

автотураргоҳ ва ёрдамчи бино-иншоотларни

сақлаш харажатларининг

ҲИСОБ-КИТОБИ

              

           

*) Мазкур Низомга 9-иловада белгиланган меъёрлар асосида аниқланади.

**) Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан тасдиқланган давлат кўчмас мулкидан фойдаланганлик учун қўлланиладиган ижара тўловининг энг кам ставкалари асосида ҳисобланади.

         

           

Низомга

9-ИЛОВА

Ҳаракат таркиби учун ижарага олиш

талаб этиладиган автотураргоҳ ва ёрдамчи

бино-иншоотлар майдонининг

МЕЪЁРИ

         

         

           

Низомга

10-ИЛОВА

______________ автобус йўналиши

бўйича давр харажатларнинг

ҲИСОБ-КИТОБИ

         

         

           

Низомга

11-ИЛОВА

______________ автобус йўналиши

бўйича молиявий фаолият билан

боғлиқ харажатларнинг

ҲИСОБ-КИТОБИ

           

         

*) Ишлаб чиқарувчи ва (ёки) уларни етказиб берувчи диллерлик ташкилотлари томонидан тақдим этилган прейскурантлар асосида аниқланади.

**) Автотранспорт воситалари учун Солиқ кодексида белгиланган амортизация нормасидан келиб чиқиб, автобусларнинг фойдаланиш муддатига мутаносиб равишда белгиланади.

***) Марказий банк томонидан охирги эълон қилинган автобуслардан фойдаланиш муддатларига (5 йил) мос келадиган миллий валютадаги банк кредитлари бўйича ўртача тортилган фоиз ставкалари.

****) Кредит қайтариш графиклари асосида ҳисобланади.

        

         

Низомга

12-ИЛОВА

______________ автобус йўналишда

босиб ўтиладиган жами йиллик масофанинг

ҲИСОБ-КИТОБИ

           

        

*) Йўналиш паспорти ва йўналишга қўйилган талаблар асосида календарь йил давомида кузатиладиган кунлардан келиб чиқиб кўрсатилади.

        

         

Низомга

12а-ИЛОВА

______________ автобус йўналишда ҳаракат

таркибидаги автобусларнинг ўртача сонининг

ҲИСОБ-КИТОБИ

            

       

*) Автобусларнинг ўртача сони 1 аниқликкача яхлитланади (яхлитлашда бирлик сондан кейин ҳосил бўлган 0,55 гача бўлган сонлар инобатга олинмайди, 0,55 ошган сонлар бутун сон сифатида қабул қилинади).

         

           

Низомга

13-ИЛОВА

______________ автобус йўналиши

учун бошланғич нархнинг

ҲИСОБ-КИТОБИ

         

           

           

Низомга

14-ИЛОВА

        

______________ автобус йўналиши

учун бошланғич нархнинг

МИҚДОРИ

          

                     

Изоҳ. Бошланғич нарх миқдори бўйича _________ вилоят иқтисодиёт ва молия бошқармасининг "___" ___________ 202__ йилдаги ____-сон хулосаси олинган.

            

                 

Қонун ҳужжатлари маълумотлари миллий базаси (www.lex.uz),

2023 йил 22 март