Ўзбекистон Республикаси Президентининг 01.06.2023 й. ПФ-82-сон "Аҳолига сифатли ижтимоий хизмат ва ёрдам кўрсатиш ҳамда унинг самарали назорат тизимини йўлга қўйиш бўйича комплекс чора-тадбирлар тўғрисида"ги Фармони

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

01.06.2023 й.

N ПФ-82

АҲОЛИГА СИФАТЛИ ИЖТИМОИЙ ХИЗМАТ

ВА ЁРДАМ КЎРСАТИШ ҲАМДА УНИНГ САМАРАЛИ

НАЗОРАТ ТИЗИМИНИ ЙЎЛГА ҚЎЙИШ БЎЙИЧА

КОМПЛЕКС ЧОРА-ТАДБИРЛАР ТЎҒРИСИДА

Сўнгги йилларда аҳолининг ижтимоий ҳимоясини кучайтириш, давлат томонидан фуқароларга ижтимоий хизмат кщрсатиш кўлами ва турларини кенгайтириш бўйича тизимли ишлар амалга оширилмоқда.

Жумладан, ижтимоий дастурларни молиялаштириш харажатлари ЯИМга нисбатан 2 бараварга ошиб, кам таъминланган нафақа олувчи оилалар қамрови 5 баробарга кўпайди ҳамда ногиронлиги бўлган шахслар ва ногиронлиги бўлган болаларнинг парвариши билан банд бўлганлар учун янги нафақа турлари жорий этилди.

Янги таҳрирда қабул қилинган Конституцияда меҳнатга лаёқатсиз ва ёлғиз кексалар, ногиронлиги бўлган шахслар ҳамда аҳолининг ижтимоий жиҳатдан эҳтиёжманд бошқа тоифаларининг ҳуқуқлари давлат ҳимоясида бўлишининг белгиланганлиги мазкур соҳани ягона ёндашув асосида ислоҳ қилиш зарурлигини тақозо этмоқда.

Хусусан, давлатнинг ногиронлиги бўлган шахсларнинг ишга жойлашиши ва таълим олишига кўмаклашиши бўйича конституциявий мажбуриятлари бажарилишини таъминлаш мақсадида мазкур йўналишда амалга оширилаётган чора-тадбирларни самарали мувофиқлаштириш тизими жорий этилиши талаб этилмоқда.

Янги таҳрирдаги Конституцияда эълон қилинган "ижтимоий давлат" тамойилларини инобатга олган ҳолда, фуқароларнинг ижтимоий ҳимояга оид ҳуқуқларини ва манфаатларини сўзсиз таъминлаш, аҳолига ижтимоий хизматларни кўрсатиш сифатини тубдан ошириш ҳамда мазкур соҳага илғор халқаро стандартларга асосланган мутлақо янги бошқарув тизимини жорий этиш мақсадида:

1. Қуйидагилар давлат томонидан аҳолини манзилли ҳимоя қилишнинг асосий йўналишлари этиб белгилансин:

комплекс ёндашув асосида профессионал ижтимоий ҳимоя тизимини жорий қилиш;

ижтимоий ҳимоя тизими самарадорлиги ва манзиллилигини ошириш орқали аҳолининг кўмакка муҳтож қатлами ижтимоийлашувини таъминлаш;

ижтимоий ҳимояни маҳалла даражасигача ташкил этиш, оғир ҳаётий аҳволга тушиб қолган аҳолига индивидуал ёндашувга мувофиқ ижтимоий хизмат ва ёрдам кўрсатишни йўлга қўйиш;

аҳолининг ижтимоий суғурта механизмлари билан қамраб олинишини кенгайтириш;

хавф гуруҳларига тушиб қолган оилаларни аниқлаш ва комплекс ижтимоий хизматлар кўрсатиш орқали уларнинг оғир ижтимоий аҳволга тушиб қолишининг олдини олиш;

ногиронлиги бўлган шахсларнинг ҳаёт кечириши учун қулай муҳит яратиш.

2. Ўзбекистон Республикаси Президенти ҳузурида Ижтимоий ҳимоя миллий агентлиги (кейинги ўринларда - Агентлик), шунингдек, унинг Қорақалпоғистон Республикаси, вилоятлар ва Тошкент шаҳар бошқармалари ҳамда туман (шаҳар)ларда "Инсон" ижтимоий хизматлар марказлари ташкил этилсин.

3. Қуйидагилар:

Ўзбекистон Республикаси Президенти ҳузуридаги Ижтимоий ҳимоя миллий агентлиги фаолиятининг устувор йўналишлари 1-иловага мувофиқ;

Ўзбекистон Республикаси Президенти ҳузуридаги Ижтимоий ҳимоя миллий агентлиги томонидан вазирлик ва идораларнинг мувофиқлаштириладиган ва мониторинг қилинадиган фаолият йўналишлари 2-иловага мувофиқ тасдиқлансин.

4. Қуйидагилар Агентлик тузилмасига ўтказилсин:

а) 2023 йил 15 июндан бошлаб Камбағалликни қисқартириш

ва бандлик вазирлиги тизимидан:

Тиббий-ижтимоий экспертиза инспекцияси ва унинг ҳудудий бўлинмалари;

Ногиронлиги бўлган шахсларни реабилитация қилиш ва протезлаш миллий маркази ҳамда унинг ҳудудий марказлари;

Аёлларни реабилитация қилиш ва мослаштириш республика маркази ҳамда унинг ҳудудий бўлимлари;

Одам савдоси жабрдийдаларига ёрдам бериш бўйича республика реабилитация маркази;

кексалар ва ногиронлиги бўлган шахслар учун "Мурувват" ва "Саховат" интернат-уйлари;

Уруш ва меҳнат фахрийлари учун республика пансионати;

кексалар, ногиронлиги бўлган шахслар, уруш ва меҳнат фахрийлари учун санаторийлар;

б) 2024 йил 1 январдан бошлаб:

Соғлиқни сақлаш вазирлиги тизимидан болалар уйлари;

Мактабгача ва мактаб таълими вазирлиги тизимидан меҳрибонлик уйлари;

маҳаллий ижро этувчи ҳокимият органлари тизимидан вояга етмаганлар билан ишлаш секторлари ҳамда оилавий болалар уйлари;

в) 2024 йил 1 августдан бошлаб:

Мактабгача ва мактаб таълими вазирлиги тизимидан алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатлар, кўп тармоқли ихтисослаштирилган мактабгача таълим ташкилотлари ҳамда ихтисослаштирилган ўқув-тарбия муассасалари;

Олий таълим, фан ва инновациялар вазирлиги тизимидан имкониятлари чекланган шахслар учун ихтисослаштирилган касб-ҳунар мактаблари;

г) 2025 йил 1 январдан бошлаб:

Ички ишлар вазирлиги тизимидан муайян яшаш жойига эга бўлмаган шахсларни реабилитация қилиш марказлари;

Иқтисодиёт ва молия вазирлиги тизимидан Ижтимоий суғурта жамғармаси.

Ўзбекистон Миллий паралимпия қўмитасининг Паралимпиячиларнинг матонат мактабини 2023 йил 15 июндан Агентлик тузилмасига ўтказиш ҳамда Паралимпия спорт турлари бўйича мутахассисларни тайёрлаш институтининг фаолиятини ҳамкорликда мувофиқлаштириш бўйича таклифи маъқуллансин.

Белгилансинки, мазкур бандда кўрсатилган ташкилотлар ва таркибий тузилмалар амалдаги молиялаштириш манбалари, штат бирликлари, ҳуқуқ ва мажбуриятлари, мол-мулки ҳамда бошқа товар-моддий бойликлари билан биргаликда тўлалигича Агентлик тузилмасига ўтказилади.

5. Ижтимоий хизматларни маҳалла даражасида ташкил этиш мақсадида 2023 йил 1 июлдан бошлаб Агентликнинг туман (шаҳар)лардаги "Инсон" ижтимоий хизматлар марказларида ижтимоий ходимлар гуруҳлари ташкил этилсин ва қуйидагилар уларнинг асосий вазифалари этиб белгилансин:

ҳар бир хонадон аҳволини ўрганиб, оилалардаги ҳақиқий ҳолатни ҳамда уларнинг ижтимоий хизматлар ва ёрдамга бўлган эҳтиёжини аниқлаш;

оилаларнинг иқтисодий-ижтимоий ҳолати ва эҳтиёжларини ўрганиш натижасида уларнинг ижтимоий паспортларини шакллантириш;

эҳтиёжманд аҳоли билан, шу жумладан кейс-менежмент усулини қўллаган ҳолда самарали иш ташкил қилиш, улардан ижтимоий хизматлар ва ёрдам олиш бўйича буюртмалар қабул қилиш, заруратга қараб буюртмаларни масъул вазирлик ва идораларга юбориш;

оғир аҳволга тушиб қолган ва оғир аҳволга тушиб қолиш хавфи юқори бўлган оилаларни мунтазам равишда мониторинг қилиб бориш, улар учун ижтимоий хизмат ва ёрдамларни ташкил этиш.

6. Белгилансинки:

Агентлик аҳолини ижтимоий ҳимоя қилиш ва ижтимоий хизматлар кўрсатиш соҳасидаги ягона давлат сиёсатини ишлаб чиқиш ва амалга ошириш бўйича ваколатли давлат органи ҳисобланади;

Агентлик ўз фаолиятини бошқа давлат органлари ва ташкилотлари,

уларнинг мансабдор шахсларидан мустақил равишда амалга оширади.

7. Агентлик ҳузурида қуйидагилар ташкил этилсин:

Ижтимоий инспекция ҳамда унинг Қорақалпоғистон Республикаси, вилоятлар ва Тошкент шаҳри бошқармалари;

Ижтимоий ҳимоя тизими ходимларининг малакасини ошириш маркази;

Ижтимоий ҳимояни ривожлантириш институти;

Тиббий-ижтимоий экспертиза инспекцияси ва унинг бўлинмалари негизида Агентлик марказий аппарати таркибида Ногиронлиги бўлган шахсларнинг функционаллигини баҳолаш бошқармаси ҳамда унинг ҳудудий бўлимлари.

8. Ўз вазифаларини амалга оширишда Агентликка қуйидаги ҳуқуқлар берилсин:

ваколатли давлат органларига аҳолини ижтимоий ҳимоя қилиш бўйича дастурлар талабларини бажармаганлиги учун қонунчилик ҳужжатларида белгиланган чора-тадбирларни қўллаш бўйича тақдимномалар киритиш;

ўз ваколатлари доирасида умуммажбурий бўлган норматив-ҳуқуқий ҳужжатлар қабул қилиш;

ўз ваколати доирасида маъмурий жавобгарликни келтириб чиқарадиган ҳолатлар юзасидан маъмурий ҳуқуқбузарликлар тўғрисида баённомалар тузиш;

ўзига юклатилган вазифаларни амалга ошириш учун давлат органлари ва ташкилотларининг маълумотлар базасидан реал вақт режимида фойдаланиш;

давлат органлари ва ташкилотларидан зарур статистик, таҳлилий ҳамда бошқа маълумотларни сўраш ва олиш;

ижтимоий ҳимояга муҳтож қатлами вакиллари учун давлат олий таълим муассасаларига давлат гранти асосида имтиёзли тарзда ўқишга қабул қилиш параметрларини белгилаш;

ўз ваколатлари доирасида маслаҳат-кенгаш органлари ва эксперт комиссияларини ташкил этиш;

ўзига юклатилган вазифаларни амалга ошириш мақсадида махсус касбий билимларни талаб этадиган масалаларни кўриб чиқиш учун давлат органлари ва ташкилотларининг мутахассисларини жалб этиш;

ижтимоий ҳимоя тизимини ривожлантириш бўйича халқаро ҳамкорлар, халқаро ташкилотлар ва экспертлар билан ҳамкорлик юзасидан ва бошқа шартномаларни тузиш.

9. Ўзбекистон Республикаси Президенти Администрацияси тузилмасида:

Ўзбекистон Республикаси Президентининг ижтимоий ҳимоя масалалари бўйича маслаҳатчиси - Ўзбекистон Республикаси Президенти ҳузуридаги Ижтимоий ҳимоя миллий агентлиги директори лавозими киритилсин;

Ижтимоий ҳимоя масалалари бўйича шўъба ташкил этилсин.

10. Агентлик:

а) 2023 йил 15 июлга қадар ЮНИСЕФнинг экспертларини жалб қилган ҳолда ва уларнинг дастурларига мувофиқ ижтимоий ходимларни қайта тайёрлаш ва уларнинг малакасини ошириш тизимини йўлга қўйсин.

Бунда, хорижий ва маҳаллий малакали экспертларни жалб қилган ҳолда аҳолига маҳалла даражасида профессионал ижтимоий хизмат кўрсатиш мутахассисларини тайёрлашга эътибор қаратсин;

б) 2023 йил 1 августга қадар Олий таълим, фан ва инновациялар вазирлиги билан биргаликда олий таълим муассасаларининг бакалавриат ва магистратурасида ижтимоий ходимларни ўқитиш дастурларини қайта кўриб чиқсин;

в) 2023 йил 15 августга қадар аҳолини ижтимоий хизматлар ва ижтимоий ёрдам кўрсатиш дастурлари бўйича, шу жумладан уларнинг мобил алоқа воситаларига маълумот юбориш орқали хабардор қилиш амалиётини жорий этсин;

г) 2023 йил 1 сентябрга қадар ногиронлиги бўлган шахслар учун қулай муҳитни ташкил қилиш бўйича таклиф киритсин;

д) қуйидагиларни:

2023 йил 1 июлга қадар аҳолига ижтимоий хизматлар ва ёрдам кўрсатиш вазифалари Агентликка ўтказилиши муносабати билан бошқа вазирлик ва идоралар, шу жумладан маҳалла даражасида фаолият юритаётган тузилмаларнинг такрорловчи функцияларини бекор қилишга оид норматив-ҳуқуқий ҳужжат лойиҳасини;

2023 йил 1 августга қадар Камбағалликни қисқартириш ва бандлик вазирлиги ҳамда Иқтисодиёт ва молия вазирлиги билан биргаликда аҳолининг ижтимоий муаммоларини маҳалла даражасида ҳал этишга қаратилган профессионал хизмат кўрсатиш тизимини жорий этиш бўйича чора-тадбирлар дастурини;

2023 йил 1 сентябрга қадар манфаатдор вазирлик ва идоралар билан биргаликда Агентлик тузилмасига ўтказилган ижтимоий муассасалар ва ташкилотларнинг фаолиятини такомиллаштириш ҳамда ривожлантириш бўйича таклифларни;

2024 йил 1 январга қадар меҳнатга лаёқатли аҳолини ижтимоий суғурта механизмлари билан қамраб олиш даражасини оширишга оид таклифларни Ўзбекистон Республикаси Президенти Администрациясига киритсин;

е) 2024 йил 1 июлга қадар:

давлат томонидан кафолатланган ижтимоий хизматларни кўрсатиш стандартларини ҳамда уларнинг ижросини мониторинг қилиш мезонларини;

ногиронлиги бўлган шахсларни уйда парваришлаш билан банд бўлган оила аъзоларига кўмаклашиш бўйича ижтимоий ҳимоя механизмларини ишлаб чиқсин;

ж) нодавлат нотижорат ташкилотлари ва фуқаролик жамиятининг бошқа институтлари билан ҳамкорликда ижтимоий шериклик лойиҳалари амалга оширилишини йўлга қўйсин;

з) ижтимоий ҳимоя соҳасидаги муаммо ва таклифларни муҳокама қилиш, янги лойиҳаларни ишлаб чиқиш бўйича жамоатчилик вакилларидан иборат кенгаш ташкил этсин.

11. Агентлик Рақамли технологиялар вазирлиги, Адлия вазирлиги, Иқтисодиёт ва молия вазирлиги, Камбағалликни қисқартириш ва бандлик вазирлиги, Соғлиқни сақлаш вазирлиги ҳамда Мактабгача ва мактаб таълими вазирлиги билан биргаликда 2023 йил 1 октябрга қадар "Ягона миллий ижтимоий ҳимоя" ахборот тизимини ишга туширсин унинг зарур идоравий ахборот тизимлари ва маълумотлар базалари билан интеграциясини ва доимий такомиллаштириб борилишини таъминласин.

12. Белгилансинки:

а) 2023 йил 1 октябрдан бошлаб:

"Ижтимоий ҳимоя ягона реестри" ахборот тизими Агентлик тасарруфига ўтказилади;

аҳолига кўрсатиладиган барча турдаги ижтимоий хизматлар ва ёрдамлар, шу жумладан кам таъминланган оилалар болалари учун нафақа ва моддий ёрдамлар бўйича аризалар "Ягона миллий ижтимоий ҳимоя" ахборот тизими орқали қабул қилинади;

б) "Ягона миллий ижтимоий ҳимоя" ахборот тизимини жорий этиш доирасида:

Агентлик сўровига асосан "Рақамли Ўзбекистон - 2030" стратегиясини амалга ошириш бўйича мувофиқлаштириш комиссияси томонидан вазирлик ва идораларнинг электрон маълумотлар базалари интеграцияси таъминланади;

аҳолига ижтимоий хизматлар ва ёрдам кўрсатиш, фуқаролардан мурожаатларни қабул қилиш, кўриб чиқиш учун электрон тарзда мутасадди вазирлик ва идораларга юбориш ҳамда жараённи мониторинг қилиш асосида амалга оширилади;

мазкур бандда назарда тутилган электрон ахборот базалари маълумотлари асосида ҳар бир фуқаронинг иқтисодий-ижтимоий ҳолати, эҳтиёжлари ва мавжуд имкониятларини акс эттирадиган ижтимоий паспортлар жорий этилади;

2024 йил 1 январдан бошлаб "Меҳр дафтари", "Саховат ва кўмак", "Ёшлар дафтари" ва "Аёллар дафтари" орқали кўрсатиладиган ижтимоий ёрдам ва кўмаклар қамраб олинади.

13. Ўзбекистон Республикаси Президенти ҳузурида Ижтимоий ҳимоя миллий агентлиги фаолиятини ташкил этиш ҳамда ижтимоий хизматлар ва ёрдам кўрсатиш тизимини ривожлантириш бўйича 2023-2025 йилларга мўлжалланган чора-тадбирлари дастури 3-иловага мувофиқ тасдиқлансин.

14. Ҳар ҳафтанинг жума куни "Меҳр ва саховат куни" сифатида белгиланиб, барча давлат органлари ва ташкилотлари эҳтиёжманд аҳоли, ногиронлиги бўлган шахслар ҳамда ёлғиз кексалар ҳолидан хабар олиш, уларга ғамхўрлик қилиш ҳамда хайрия тадбирларини ўтказсин.

15. Агентлик ҳузурида 2023 йил 1 октябрдан бошлаб Ижтимоий ҳимоя давлат жамғармаси ташкил этилсин ҳамда жамғарма маблағларининг харажатлари йўналишлари 4-иловага мувофиқ тасдиқлансин.

16. Агентлик 2023 йил 1 сентябрга қадар Ижтимоий ҳимоя давлат жамғармаси тўғрисидаги Низомни тасдиқлаш учун Вазирлар Маҳкамасига киритсин.

Бунда, Ижтимоий ҳимоя давлат жамғармаси маблағларини олувчилар ҳамда молиялаштириш манбаи кесимида маълумотлар шаклланиши ва харажат қилинишининг очиқлиги ва шаффофлигини таъминлаш механизмини жорий этиш кўзда тутилсин.

17. Ўзбекистон Республикаси Президентининг айрим фармонларига 5-иловага* мувофиқ қўшимча ва ўзгартиришлар киритилсин.

18. Мазкур Фармоннинг ижросини назорат қилиш Ўзбекистон Республикаси Президенти Администрацияси раҳбари С.У. Умурзаков зиммасига юклансин.

Ўзбекистон Республикаси Президенти                                             Ш. Мирзиёев

*) 5-илова берилмайди.

Ўзбекистон Республикаси

Президентининг

2023 йил 1 июндаги

ПФ-82-сон Фармонига

1-ИЛОВА

Ўзбекистон Республикаси Президенти ҳузурида

Ижтимоий ҳимоя миллий агентлигининг

асосий фаолият йўналишлари

               

I. Аҳолини ижтимоий ҳимоя қилиш соҳасида давлат сиёсати ва чора-тадбирларини ишлаб чиқиш ва амалга ошириш йўналишида:

аҳолини ижтимоий ҳимоя қилиш соҳасида ягона давлат сиёсатини ишлаб чиқиш ва уни амалга ошириш;

ижтимоий ҳимояга муҳтож шахслар ва оилалар бўйича ижтимоий ёрдам дастурларини ишлаб чиқиш;

кафолатланган ижтимоий хизматлар стандартларини ишлаб чиқиш, уларнинг амалга оширилишини мониторинг қилиш;

аҳолининг турли гуруҳлари билан ишлайдиган профессионал "ижтимоий иш" хизматини ташкил этиш;

ижтимоий шерикликни кенгайтириш, нодавлат сектор ва маҳаллий ҳамжамиятларни турли хил хизматлар кўрсатиш ва аҳолининг заиф қатламларини қўллаб-қувватлашга янада фаол жалб қилиш учун рағбатлантириш чораларини яратиш;

соҳани рақамлаштириш орқали ижтимоий ҳимоя тизими шаффофлигини таъминлаш ва жараёнларни аҳоли учун қулай тарзда ташкил қилиш.

II. Ногиронлиги бўлган шахслар билан ишлаш тизимини такомиллаштириш йўналишида:

ногиронликни баҳолаш ва аниқлашнинг тиббий моделидан ижтимоий моделига босқичма-босқич ўтишни таъминлаш;

ногиронлиги бўлган шахсларни юқори сифатли протез-ортопедия маҳсулотлари ва реабилитациянинг техник воситалари билан таъминлаш;

ногиронлиги бўлган шахсларни реабилитация ва абилитация қилиш соҳасини ривожлантириш ва соҳага замонавий технологияларни жорий қилиш;

жамиятда ижтимоий мослашув ва интеграция учун шароит яратиш, ногиронлиги бўлган шахсларни бандлигини таъминлашга кўмаклашиш, инклюзивликни таъминланишини мувофиқлаштириш ҳамда уларга қулай муҳит шакллантирилганлигини назорат қилиш;

ижтимоий ҳимояга муҳтож шахслар, шу жумладан ногиронлиги бўлган шахсларга нисбатан жамият онгида соғлом фикрни шакллантириш;

ногиронлиги бўлган шахсларнинг мустақил ҳаёт кечиришини қўллаб-қувватлаш бўйича чора-тадбирларни амалга ошириш, уларга уй шароитида ижтимоий хизматларини ташкил қилиш;

ногиронлиги бўлган шахслар билан ишлайдиган ихтисослаштирилган интернат, таълим муассасалари ва реабилитация марказлари фаолиятини такомиллаштириш.

III. Вояга етмаган болаларни ҳимоя қилиш йўналишида:

болаларга нисбатан зўравонликнинг олдини олиш дастурларини ишлаб чиқиш ва амалга ошириш;

васийлик ва ҳомийлик тизимини такомиллаштириш, шу жумладан оилага асосланган болаларни парвариш қилишнинг муқобил шаклларини ривожлантириш;

фарзанд асраб олиш тизимини такомиллаштириш;

ижтимоий ҳимояга муҳтож болалар ҳуқуқлари, эркинликлари ва манфаатларини ҳимоя қилишни ташкил этиш;

ҳимояга муҳтож болаларни даволашни ташкил қилиш тизимини такомиллаштириш.

IV. Аёлларни ҳимоя қилиш тизимини такомиллаштириш йўналишида:

аёлларни зўравонлик ва жинсий зўравонлик таъқибидан ҳимоя қилишда профессионал ёрдам кўрсатишни ташкил этиш;

зўравонликдан азият чеккан аёлларни қўллаб-қувватлаш, шу жумладан бошпана (шелтер) ва реабилитация марказлари ишини ташкил қилиш.

V. Оғир ҳаётий вазиятга тушиб қолган оилалар билан ишлаш йўналишида:

оилаларга ижтимоий хизмат ва ёрдам кўрсатиш, болаларни оилалардан ажратишнинг олдини олиш, ота-оналарнинг кўникмаларини ривожлантириш;

оғир ҳаётий вазиятда бўлган ҳомиладор аёллар, ёлғиз ота-оналар ва ёш болали оилаларни қўллаб-қувватлаш тизимини ташкил қилиш;

оғир ҳаётий вазиятларда бўлган оилалар фарзандлари учун ижтимоий хизматларни ривожлантириш;

паллиатив ёрдамни ташкил қилиш.

VI. Ёшлар билан ишлаш йўналишида:

психосоциал хизмат кўрсатиш тизимини ташкил қилиш;

алоҳида таълим эҳтиёжлари бўлган болалар учун ихтисослаштирилган таълим муассасалари биттирувчиларини турли ташкилотлар томонидан тақдим қилинган ижтимоий хизматлар, йўлланма ва сўровлари асосида психологик саломатлик, зарур кўникма ва таълим олиш, касбга, ишга ва тадбиркорлик қилишга йўналтириш тизимини йўлга қўйиш.

VII. Якка ёлғиз ва кексалар билан ишлаш йўналишида:

уйда парвариш қилиш ва қўллаб-қувватлаш хизматларини ташкил қилиш;

қариялар уйлари ва бошқа муассасалар негизида профессионал хизмат кўрсатиш тизимини ташкил қилиш;

зўравонликдан ҳимоя қилиш.

VII. Ижтимоий таъминот дастурлари йўналишида:

ижтимоий суғурта тизимида ягона давлат сиёсатини юритиш;

аҳолини ижтимоий суғурта тизимига жалб қилиш бўйича рағбатлантирувчи механизмларини ишлаб чиқиш.

         

         

Ўзбекистон Республикаси

Президентининг

2023 йил 1 июндаги

ПФ-82-сон Фармонига

2-ИЛОВА

Ўзбекистон Республикаси Президенти

ҳузуридаги Ижтимоий ҳимоя миллий агентлиги

томонидан вазирлик ва идораларнинг

мувофиқлаштириладиган ва мониторинг

қилинадиган фаолият йўналишлари

              

          

           

Ўзбекистон Республикаси

Президентининг

2023 йил 1 июндаги

ПФ-82-сон Фармонига

3-ИЛОВА

Ўзбекистон Республикаси Президенти

ҳузурида Ижтимоий ҳимоя миллий агентлиги

фаолиятини ташкил этиш ҳамда ижтимоий хизматлар

ва ёрдам кўрсатиш тизимини ривожлантириш бўйича

2023-2025 йилларга мўлжалланган

ЧОРА-ТАДБИРЛАРИ ДАСТУРИ

               

           

              

Ўзбекистон Республикаси

Президентининг

2023 йил 1 июндаги

ПФ-82-сон Фармонига

4-ИЛОВА

Ижтимоий ҳимоя миллий агентлиги ҳузуридаги

Ижтимоий ҳимоя давлат жамғармаси маблағларининг

харажатлари йўналишлари

            

а) 2023 йил 1 октябрдан бошлаб:

"Мурувват" ва "Саховат" интернат-уйларида, кексалар, ногиронлиги бўлган шахслар, уруш ва меҳнат фахрийлари учун санаторийлар ҳамда пансионатларда ижтимоий хизматларни ташкил этиш;

аҳолини протез-ортопедия буюмлари ва реабилитация техник воситалари билан таъминлаш;

протез-ортопедия буюмлари ва реабилитация техник воситалари ишлаб чиқаришни модернизация қилиш ва технологик янгилаш дастурлари ва лойиҳаларини молиялаштириш;

ногиронлиги бўлган шахсларни реабилитация қилиш марказлари фаолиятини ташкил этиш ва такомиллаштириш;

ногиронлиги бўлган шахсларнинг имтиёзли ҳамда бепул стационар даволанишини таъминлаш;

ногиронлиги бўлган шахсларни ўқув, дидактик ва бошқа муқобил материаллар билан таъминлаш;

ногиронлиги бўлган шахсларни маданий тадбирлар ва спортга жалб этиш;

ногиронлиги бўлган шахсларнинг транспорт, озиқ-овқат маҳсулотлари ҳамда дори-дармон воситаларини сотиб олиш харажатларини қисман қоплаш;

ногиронларни иш билан таъминловчи корхоналарни субсидиялаш;

ногиронлиги бўлган шахслар учун ихтисослаштирилган иш жойларини ташкил этиш харажатларини қоплаш;

ногиронлиги бўлган шахслар учун тенг имкониятлар ва қулай муҳит яратишга қаратилган дастур ва чора-тадбирларни молиялаштириш;

Агентлик ва унинг таркибий бўлинмалари ва хизматларининг моддий-техника базасини такомиллаштириш, шу жумладан асбоб-ускуналар, инвентарь, автотранспорт воситалари, диагностика воситалари, ихтисослаштирилган тиббий-реабилитация ускуналари ҳамда ўқув материаллари ва бошқаларни харид қилиш;

Агентлик ходимларини моддий рағбатлантириш ва ижтимоий ҳимоя қилиш, шартнома асосида жалб қилинадиган юқори малакали, шу жумладан хорижий мутахассисларнинг харажатларини (меҳнатга ҳақ тўлаш, яшаш, транспорт харажатлари ва бошқалар) молиялаштириш, ходимларни тайёрлаш, қайта тайёрлаш, малакасини ошириш ва стажировкадан ўтказиш, конференциялар, семинарлар ва бошқа тадбирлар, шу жумладан чет элда ўтказиладиган тадбирларни ташкил қилиш ва иштирок этиш билан боғлиқ бошқа тадбирлар;

107 қисқа рақамли туну кун фаолият кўрсатадиган хизматни ташкил этиш ва такомиллаштириш;

"Ижтимоий карта"ларни жорий этиш бўйича тадбирларни молиялаштириш;

халқаро маслаҳатчилар, консалтинг ва тадқиқот компанияларини ёллашни молиялаштириш, илғор хорижий тажрибани ўрганиш ва жорий этиш чора-тадбирлари;

жойларда ижтимоий хизматларни ташкил этиш;

ногиронлиги бўлган шахслар ва ҳаракатланиш имконияти чекланган шахслар учун, шунингдек, аҳолининг бошқа ижтимоий ҳимояга муҳтож қатламларига "Ижтимоий такси" хизматини ташкил этиш ва такомиллаштириш;

ижтимоий ҳимоя соҳасини автоматлаштириш ва рақамлаштириш тадбирларини молиялаштириш;

ногиронларнинг функционал имкониятларини баҳолаш хизматини ташкил этиш, шу жумладан, уларнинг моддий-техника базасини яхшилаш бўйича лойиҳа ва дастурларни молиялаштириш;

кам таъминланган оилаларга болалар нафақалари ва моддий ёрдамлар тўлаш;

бир марталик ёрдам пуллари тўлаш;

б) 2024 йил 1 январдан бошлаб:

ёшга доир, ногиронлик ва боқувчисини йўқотганлик нафақаларини тўлаш;

ногиронлиги бўлган болаларни парваришлаётган оналар учун нафақаларни тўлаш;

бола туғилиши учун бериладиган нафақалар (суюнчи пули)ни тўлаш;

дафн маросими харажатларини қоплаш;

етим ва чин етим болаларни уй-жой билан таъминлаш;

Меҳрибонлик уйлари ва болалар уйлари фаолиятини ташкил этиш ва такомиллаштириш;

вояга етмаган болаларга ижтимоий-ҳуқуқий ёрдам кўрсатиш хизматларини молиялаштириш;

"Меҳр дафтари"га киритилган етим ва ота-она қарамоғисиз қолган болаларга ёрдам кўрсатиш;

етим ва чин етимларни озиқ-овқат, кийим-кечак ва санитария-гигиена воситалари билан таъминлаш;

ижтимоий ҳимояга муҳтож оилаларнинг иқтидорли болаларини қўллаб-қувватлаш билан боғлиқ тадбирлар харажатларини қоплаш;

етим ва чин етим болаларнинг соғлигини сақлаш, саломатлигини тиклаш, уларни ҳаётга тайёрлаш, таълим бериш, касб-ҳунарга йўналтириш ва ишга жойлаштириш тадбирларини ташкил этиш;

жиноят содир этган ва жиноий жавобгарликнинг энг кичик ёшига етмаган болаларга психологик ёрдам кўрсатиш, уларни касбга ўқитиш ва тарбиялаш тадбирларини ташкил этиш;

қаровсиз ва бошпанасиз қолган болалар, зўравонлик қурбони бўлган болалар, жиноят қурбонлари ва гувоҳлари, жиноят содир этган ва жиноий жавобгарлик ёшига етган ҳамда фуқаролик процессида иштирок этаётган болаларнинг ижтимоий ва ҳуқуқий ҳимоясини ташкил этиш;

вояга етмаганларга ижтимоий-ҳуқуқий ёрдам кўрсатиш марказлари ва республика таълим муассасаларининг лойиҳа ва дастурларини молиялаштириш;

оилаларда (ҳомийликка олинган) тарбияланаётган ҳар бир етим болалар ва ота-она қарамоғидан маҳрум бўлган болаларнинг ижтимоий ҳимоясини ташкил этиш;

в) 2024 йил 1 июлдан бошлаб:

ижтимоий ҳимояга муҳтож оилаларнинг 18 ёшга тўлмаган фарзандларига алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатларда овқатлантириш харажатларини қоплаш;

ижтимоий ҳимояга муҳтож оилаларнинг фарзандларига давлат мактабгача таълим ташкилотлари хизматлари учун ҳақ тўлаш харажатларини қоплаш;

ижтимоий ҳимояга муҳтож оилаларнинг фарзандларини кийим-кечак, ўқув қуроллари, дарсликлар, иш юритиш материаллари билан таъминлаш;

эҳтиёжманд аҳоли қатламига тиббий, психологик ва бошқа хизматлар кўрсатиш;

уй-жойга муҳтож, ота-онасидан ёки улардан биридан маҳрум бўлган вояга етган қизлар, шунингдек ёлғиз она, ёлғиз ота ёки ўзгалар қарамоғида бўлган чин етимларни уй-жой билан таъминлаш;

"Аёллар дафтари"га киритилган хотин-қизларга моддий ёрдамлар тўлаш, ижтимоий ҳимояга муҳтож хотин-қизларга юридик ёрдам ва давлат божини тўлаш харажатларини қоплаш;

ОИВ инфекцияси ва бошқа ҳаёт учун хавфли ва сурункали ноёб (орфан) касалликлар билан касалланган 18 ёшгача бўлган болаларга моддий ёрдам кўрсатиш;

"Ёшлар дафтарига" киритилган ёшларга бир марталик моддий ёрдам пули тўлаш;

оғир ижтимоий аҳволдаги оилаларга бир марталик моддий ёрдам ва субсидиялар бериш, уларнинг куз-қиш мавсумида коммунал тўловлари ва иситиш ёқилғисини харид қилиш харажатларини қисман қоплаш;

ижтимоий ҳимояга муҳтож шахсларнинг ўқиш ва даволаниш билан боғлиқ харажатларини қисман қоплаш;

ижтимоий ҳимояга муҳтож шахсларнинг жамоат транспортидан фойдаланиш харажатларини қоплаш.

г) 2025 йил 1 январдан бошлаб:

Ижтимоий суғурта жамғармаси маблағлари ҳисобидан ҳомиладорлик ва туғиш нафақаларини тўлаш;

паллиатив ёрдам кўрсатиш марказлари ва шелтерлар фаолиятини ташкил этиш бўйича лойиҳалар ва дастурларни молиялаштириш, шунингдек, доимий яшаш жойига эга бўлмаган шахсларни реабилитация қилиш, ижтимоий ошхоналар ташкил этиш;

алоҳида таълим эҳтиёжлари бўлган шахсларнинг ҳаёт тарзини яхшилаш ва уларга хизмат кўрсатиш мақсадида кўп тармоқли ихтисослаштирилган мактабгача таълим ташкилотлари, "Имкон" реабилитация марказига эга кўп тармоқли ихтисослаштирилган мактабгача таълим ташкилотлари, алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатлар, имкониятлари чекланган шахслар учун ихтисослаштирилган касб-ҳунар мактаблари лойиҳалари ва қўллаб-қувватлаш дастурларини молиялаштириш.

Қонун ҳужжатлари маълумотлари миллий базаси (www.lex.uz),

2023 йил 5 июнь

"Халқ сўзи", 2023 йил 3 июнь