Ўзбекистон Республикаси Вазирлар Маҳкамасининг 28.07.2023 й. 320-сон "Вазирлар Маҳкамасининг "Қишлоқ хўжалигига мўлжалланган ер участкаларини ижарага бериш тартибига доир норматив-ҳуқуқий ҳужжатларни тасдиқлаш тўғрисида" 2021 йил 24 ноябрдаги 709-сон қарорига "Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга ер участкаларини ажратиш ҳамда уларнинг бандлигини таъминлашга қаратилган ўзгартириш ва қўшимчалар киритиш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

28.07.2023 й.

N 320

ВАЗИРЛАР МАҲКАМАСИНИНГ

"ҚИШЛОҚ ХЎЖАЛИГИГА МЎЛЖАЛЛАНГАН ЕР

УЧАСТКАЛАРИНИ ИЖАРАГА БЕРИШ ТАРТИБИГА ДОИР

НОРМАТИВ-ҲУҚУҚИЙ ҲУЖЖАТЛАРНИ ТАСДИҚЛАШ

ТЎҒРИСИДА" 2021 ЙИЛ 24 НОЯБРДАГИ 709-СОН ҚАРОРИГА

"ЁШЛАР ДАФТАРИ" ВА ХОРИЖДАН ҚАЙТИБ КЕЛГАН

МЕҲНАТ МИГРАНТЛАРИ РЎЙХАТИГА КИРИТИЛГАН

ЁШЛАРГА ЕР УЧАСТКАЛАРИНИ АЖРАТИШ ҲАМДА

УЛАРНИНГ БАНДЛИГИНИ ТАЪМИНЛАШГА ҚАРАТИЛГАН

ЎЗГАРТИРИШ ВА ҚЎШИМЧАЛАР КИРИТИШ ҲАҚИДА

Пахта ва ғалладан қисқартирилаётган ер майдонларида боғдорчилик, узумчилик, полиз ва сабзавотчилик, дуккакли ва мойли экинларни етиштиришда фуқароларга, "Темир дафтар", "Аёллар дафтари" ва "Ёшлар дафтари"да рўйхатда турган эҳтиёжманд оилаларга ҳамда хориждан қайтиб келган меҳнат мигрантларига деҳқон хўжалигини юритиш учун ер участкаларини очиқ электрон танлов орқали ижарага бериш тизими жорий этилган.

Шу билан бирга, "Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга деҳқон хўжалигини юритиш учун ер участкаларини ажратишда очиқ электрон танловларда устуворликни таъминловчи мезонларни такомиллаштириш зарурати мавжуд.

"Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга ер участкаларини ажратиш ҳамда уларнинг бандлигини таъминлаш мақсадида Вазирлар Маҳкамаси ҚАРОР ҚИЛАДИ:

1. Вазирлар Маҳкамасининг "Қишлоқ хўжалигига мўлжалланган ер участкаларини ижарага бериш тартибига доир норматив-ҳуқуқий ҳужжатларни тасдиқлаш тўғрисида" 2021 йил 24 ноябрдаги 709-сон қарорига қуйидагиларни назарда тутувчи ўзгартириш ва қўшимчалар киритилсин:

"Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга деҳқон хўжалигини юритиш учун ер участкаларини очиқ электрон танлов орқали ижарага бериш;

очиқ электрон танлов орқали "Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга ер участкаларини ажратишда соддалаштирилган тартибни жорий этиш.

2. Мазкур қарорнинг бажарилишини назорат қилиш Ўзбекистон Республикаси қишлоқ хўжалиги вазири А.Б. Воитов зиммасига юклансин.

Ўзбекистон Республикасининг Бош вазири                                        А. Арипов

Вазирлар Маҳкамасининг

2023 йил 28 июлдаги

320-сон қарорига

ИЛОВА

Вазирлар Маҳкамасининг "Қишлоқ хўжалигига

мўлжалланган ер участкаларини ижарага бериш тартибига

доир норматив-ҳуқуқий ҳужжатларни тасдиқлаш тўғрисида"

2021 йил 24 ноябрдаги 709-сон қарорига киритилаётган

ўзгартириш ва қўшимчалар

1. 1-иловада:

а) қуйидаги мазмундаги 4-2-банд билан тўлдирилсин:

"4-2. "Ёшлар дафтари" ва хориждан қайтиб келган меҳнат мигрантлари рўйхатига киритилган ёшлар деҳқон хўжалигини юритиш учун ер участкаларини очиқ электрон танлов орқали ижарага олиши мумкин.

Бунда ёшлар етакчиси "Ёшлар дафтари" ва хориждан қайтиб келган меҳнат мигрантлари рўйхатига киритилган ёшларга оид маълумотларни "E-AUKSION" электрон савдо платформасида шакллантиради ва ЭРИ билан тасдиқлайди";

б) 9-банднинг "б" кичик банди иккинчи хатбошиси "жисмоний шахслар" сўзларидан кейин "ёки "Ёшлар дафтари" ва хориждан қайтиб келган меҳнат мигрантлари рўйхатига киритилган ёшлар" сўзлари билан тўлдирилсин;

в) 24-банднинг учинчи хатбошиси қуйидаги таҳрирда баён этилсин:

"Талабгор, ёшлар етакчиси ҳамда маҳалладаги ҳоким ёрдамчиси томонидан савдо платформасига киритилган маълумотлар, шу жумладан, танлов таклифларининг ҳаққонийлиги учун маълумотларни киритган шахслар жавобгар ҳисобланади";

г) 26-банд қуйидаги мазмундаги иккинчи хатбоши билан тўлдирилсин:

"Ёшлар дафтари" ва хориждан қайтиб келган меҳнат мигрантлари рўйхатига киритилган ёшлар ўртасида ўтказиладиган очиқ танловларда иштирок этган талабгорларнинг жамғарган балларини ҳисоблашда ушбу Регламентга 4-илованинг "А" блок ҳамда "Б" блокнинг 4 ва 5-бандлари ҳамда "В" блокнинг 7-бандидаги баллар ва қўшимча имкониятлар берувчи коэффициент қўлланилмайди".

2. 3-1-иловада:

3-банд қуйидаги таҳрирда баён этилсин:

"3. Жисмоний ва юридик шахслар томонидан танловда ижара ҳуқуқини ютиб олиш учун кўпроқ балл тўплаш мақсадида ихтиёрий равишда ўз зиммасига олинган қўшимча тўловлар қишлоқ хўжалигига мўлжалланган ер участкаларининг ижара даври муддатига тенг тақсимланган ҳолда тўланади ва тегишли туман (шаҳар) бюджетига йўналтирилади".

Қонун ҳужжатлари маълумотлари миллий базаси (www.lex.uz),

2023 йил 31 июль