Ўзбекистон Республикаси Президентининг 30.08.2023 й. ПҚ-289-сон "Ўзбек миллий мақом санъатини янада ривожлантириш ва соҳа вакиллари фаолиятини қўллаб-қувватлаш чоралари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

30.08.2023 й.

N ПҚ-289

ЎЗБЕК МИЛЛИЙ МАҚОМ САНЪАТИНИ ЯНАДА

РИВОЖЛАНТИРИШ ВА СОҲА ВАКИЛЛАРИ

ФАОЛИЯТИНИ ҚЎЛЛАБ-ҚУВВАТЛАШ

ЧОРАЛАРИ ТЎҒРИСИДА

Халқимиз маданий меросининг ажралмас қисми бўлган миллий мақом санъатини кенг тарғиб этиш, унинг ўзига хос ижро мактаблари ва анъаналарини янги босқичда равнақ топтириш ҳамда халқаро нуфузини ошириш йўлида меҳнат фаолиятини олиб бораётган ходимларни қўллаб-қувватлаш мақсадида:

1. Қуйидагилар:

2023 йил 1 октябрдан бошлаб Ўзбек миллий мақом санъати маркази (кейинги ўринларда - Марказ) ва унинг ҳудудий бўлимлари бошқарув, илмий ва ижодий ходимларининг янгиланган ойлик иш ҳақи миқдорлари 1 ва 1а-иловаларга мувофиқ;

2024 йил 1 январдан бошлаб Ўзбек миллий мақом санъати маркази ҳузуридаги Марғилон шаҳар мусиқали мақом театри давлат муассасасининг маъмурий-бошқарув, бадиий, ижодий ҳамда мутахассис ходимларининг янгиланган ойлик иш ҳақи миқдорлари 1б-иловага мувофиқ тасдиқлансин.

2. Иқтисодиёт ва молия вазирлиги уч кун муддатда Марказнинг ўзбек миллий мақом санъатини ривожлантириш бўйича алоҳида шахсий ғазна ҳисобварағини (кейинги ўринларда - Ҳисобварақ) очсин.

Қуйидагилар Ҳисобварақ маблағларини шакллантириш манбалари этиб белгилансин:

Марказнинг концерт-томоша тадбирларини ташкил этиш ва маданий тадбирларни ўтказишдан олинадиган даромадлари;

халқаро молия ташкилотлари, хорижий давлатлар ва бошқа донорларнинг кредитлари, грантлари ва техник кўмаклашиш маблағлари;

Ҳисобварақнинг вақтинча бўш турган маблағларини тижорат банкларининг депозитларига жойлаштиришдан олинадиган даромадлар;

қонунчилик ҳужжатларида тақиқланмаган бошқа манбалар.

3. Белгилансинки, Ҳисобварақ маблағлари қуйидаги йўналишларга сарфланади:

маҳаллий ва хорижий гастроль сафарларини ташкил этиш;

оммавий ахборот воситалари ва ижтимоий тармоқларда мақом ва бастакорлар асарларини тарғиб этиш;

либослар, мусиқа чолғулари ва овоз кучайтиргич ускуналарни харид қилиш;

Марказ ва унинг ҳудудий бўлимлари моддий-техника базасини ривожлантириш;

Марказ ходимларини моддий рағбатлантириш;

мақом санъатини ривожлантиришга қаратилган бошқа тадбирларни молиялаштириш.

4. Ўзбекистон Республикаси Бош вазири (А.Н. Арипов) бир ҳафта муддатда Ҳисобварақни молиявий қўллаб-қувватлаш мақсадида 100 миллиард сўм маблағнинг молиявий манбаларини аниқлаб, тижорат банкларининг депозитларига жойлаштирилишини таъминласин.

Белгилансинки:

Ҳисобварақ маблағлари Марказнинг бош директори томонидан бошқарилади;

мазкур банднинг биринчи хатбошисида назарда тутилган маблағларни тижорат банкларининг депозитларига жойлаштиришдан олинган даромадлар Ҳисобвараққа йўналтирилади.

5. Марказ ходимлари фаолиятининг қуйидаги йўналишларида эришилган натижалари асосида Ҳисобварақ маблағлари ҳисобидан меҳнатга ҳақ тўлаш жамғармасининг бир баравари миқдоригача устамалар белгилаш тартиби жорий этилсин:

республика ҳудудларида ва хорижий давлатларда гастроль концерт-томоша тадбирларида қатнашиш;

мумтоз мусиқа йўналишида мақом намуналарига хос асарларни яратиш ва уларни нотага олиш;

мақом ва бастакорлар томонидан басталанган асарларни такомиллаштириш;

оммавий ахборот воситалари ҳамда ижтимоий тармоқлар орқали соф ва мукаммал ижродаги мақомларни тарғиб этиш;

мумтоз мусиқа меросига оид илмий мақолалар чоп этиш, изланишлар олиб бориш, китоблар ва тўпламлар яратиш;

мақом ва бастакорлар томонидан басталанган асарларнинг замонавий оҳангдаги караокеларини яратиш;

"устоз-шогирд" анъаналари давом эттириш;

мақом санъатини ривожлантиришга қаратилган бошқа йўналишлар.

Маданият вазирлиги бир ой муддатда Марказ бошқарув, илмий ҳамда ижодий ходимлари фаолияти самарадорлигининг асосий кўрсаткичлари рўйхати ва уларнинг ижросини баҳолаш тартибини тасдиқласин.

6. Қуйидагилар:

2023-2024 йилларда Ўзбек миллий мақом санъати маркази ва унинг ҳудудий бўлимлари мақом ансамблларининг маҳаллий гастроль сафарларини ташкил этиш режаси 2-иловага мувофиқ;

2023-2024 йилларда Ўзбек миллий мақом санъати маркази ва унинг ҳудудий бўлимлари мақом ансамблларининг корхона ва ташкилотларга гастроль сафарларини ташкил этиш режаси 3-иловага мувофиқ;

2023-2025 йилларда Ўзбек миллий мақом санъати маркази ва унинг ҳудудий бўлимлари мақом ансамблларининг хорижий гастроль сафарларини ташкил этиш режаси 4-иловага мувофиқ тасдиқлансин.

7. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари:

ушбу қарорга 2 - 4-иловалар билан тасдиқланган гастроль сафарларини ташкил этиш режаларида назарда тутилган тадбирларни юқори бадиий савияда ўтказиш учун шахсан масъул этиб белгилансин;

бошқа ҳудудларга ёки хорижий гастроль сафарларини амалга ошириш билан боғлиқхаражатларнинг50 фоизи тегишли маҳаллий бюджетларнинг қўшимча манбалари ҳисобидан молиялаштирилишини таъминласин.

8. Маданият вазирлиги, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари:

ушбу қарорга 2 - 4-иловалар билан тасдиқланган гастроль сафарларини ташкил этиш режаларида назарда тутилган тадбирларни ўтказиш жойи, вақти, иштирок этадиган ижодкорлар ҳақида оммавий ахборот воситалари ва ахборот тарқатишнинг бошқа манбалари орқали, шу жумладан тадбир ўтказиладиган ҳудудлар аҳолисини олдиндан хабардор қилиш тизимини йўлга қўйсин;

Ўзбекистон миллий телерадиокомпанияси ҳамда Ахборот ва оммавий коммуникациялар агентлиги билан биргаликда тадбирларни оммавий ахборот воситаларида ёритиш ишлари алоҳида ишлаб чиқилган медиа-режа асосида мунтазам ташкил этилишини таъминласин.

9. Вазирлар Маҳкамасининг 2008 йил 1 августдаги "Республика олий таълим муассасалари ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида"ги 164-сон қарори 4-бандининг олтинчи хатбошиси "Ўзбекистон давлат консерваторияси ҳамда унинг Нукус филиалида" сўзларидан кейин ", Юнус Ражабий номидаги Ўзбекистон миллий мусиқа санъати академиясида" сўзлари билан тўлдирилсин.

10. Мазкур қарорнинг 1-бандида назарда тутилган тадбирларни амалга ошириш билан боғлиқ қўшимча харажатлар 2023 йилда Вазирлар Маҳкамасининг захира жамғармаси маблағлари ҳисобидан амалга оширилсин ҳамда 2024 йилдан бошлаб Давлат бюджети параметрларида назарда тутилсин.

11. Мазкур қарорнинг ижросини самарали ташкил қилишга масъул ва шахсий жавобгар этиб маданият вазири О.А. Назарбеков белгилансин.

Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президенти                                  Ш. Мирзиёев

Ўзбекистон Республикаси

Президентининг

2023 йил 30 августдаги

ПҚ-289-сон қарорига

1-ИЛОВА

Ўзбек миллий мақом санъати маркази

бошқарув, илмий ва ижодий ходимларининг

ойлик иш ҳақи миқдорлари

         

        

           

Ўзбекистон Республикаси

Президентининг

2023 йил 30 августдаги

ПҚ-289-сон қарорига

1а-ИЛОВА

Ўзбек миллий мақом санъати марказининг

ҳудудий бўлимлари бошқарув, илмий ва ижодий

ходимларининг ойлик иш ҳақи миқдорлари

        

       

Ўзбекистон Республикаси

Президентининг

2023 йил 30 августдаги

ПҚ-289-сон қарорига

1б-ИЛОВА

Ўзбек миллий мақом маркази ҳузуридаги

Марғилон шаҳар мусиқали мақом театри давлат

муассасасининг маъмурий-бошқарув, бадиий,

ижодий ҳамда мутахассис ходимларининг

ойлик иш ҳақи миқдорлари

         

          

Ўзбекистон Республикаси

Президентининг

2023 йил 30 августдаги

ПҚ-289-сон қарорига

2-ИЛОВА

2023-2024 йилларда Ўзбек миллий

мақом санъати маркази ва унинг ҳудудий

бўлимлари мақом ансамблларининг маҳаллий

гастроль сафарларини ташкил этиш

РЕЖАСИ

          

          

Изоҳлар:

Маданият вазирлигига заруратга кўра ушбу режа-жадвалда кўрсатилган ҳудудлар ва муддатларга ўзгартириш киритиш ҳуқуқи берилади.

Режа-жадвалга асосан гастроль сафарларини ташкил этиш билан боғлиқ харажатлар маҳаллий бюджет, меценатлик кўмаги, ҳомийлик хайриялари ва қонунчиликда тақиқланмаган бошқа манбалар ҳисобидан қопланади.

        

         

Ўзбекистон Республикаси

Президентининг

2023 йил 30 августдаги

ПҚ-289-сон қарорига

3-ИЛОВА

2023-2024 йилларда Ўзбек миллий мақом

санъати маркази ва унинг ҳудудий бўлимлари мақом

ансамблларининг корхона ва ташкилотларга

гастроль сафарларини ташкил этиш

РЕЖАСИ

    

         

Изоҳлар:

Гастроль сафарларини ташкил этиш билан боғлиқ сарф-харажатлар корхона ва ташкилотларнинг ташаббусига кўра улар томонидан қопланади.

Гастроль сафарларига юбориладиган мақом ансамбли жамоасининг таркиби Маданият вазирлиги томонидан тасдиқланади ҳамда тадбир бошланишидан олдин тегишли корхона ва ташкилотларга етказилади.

Маданият вазирлиги, заруратга кўра, Вазирлар Маҳкамаси билан келишган ҳолда ушбу режага ўзгартириш киритиши мумкин. Шунингдек, гастроль сафарлари бошқа корхона ва ташкилотларнинг ташаббусига кўра улар учун ҳам ташкил этилиши мумкин.

         

         

Ўзбекистон Республикаси

Президентининг

2023 йил 30 августдаги

ПҚ-289-сон қарорига

4-ИЛОВА

2023-2025 йилларда Ўзбек миллий мақом

санъати маркази ва унинг ҳудудий бўлимлари

мақом ансамблларининг хорижий гастроль

сафарларини ташкил этиш

РЕЖАСИ

          

          

Изоҳлар:

Маданият вазирлиги, заруратга кўра, ушбу режа-жадвалда кўрсатилган давлатлар ва муддатларга ўзгартириш киритиши мумкин.

Гастроль сафарлари Ўзбек миллий мақом санъати марказининг ўзбек миллий мақом санъатини ривожлантириш бўйича алоҳида шахсий ғазна ҳисобварағи маблағлари ва қонунчилик ҳужжатлари билан тақиқланмаган бошқа манбалар ҳисобидан амалга оширилади.

                

             

Қонун ҳужжатлари маълумотлари миллий базаси (www.lex.uz),

2023 йил 5 сентябрь