Шахсларни ишсиз деб эътироф этиш ва уларга ишсизлик нафақасини тайинлаш бўйича электрон давлат хизматини кўрсатиш тўғрисидаги Регламент (АВ томонидан 31.10.2023 й. 3472-сон билан рўйхатга олинган камбағалликни қисқартириш ва бандлик вазирининг 06.10.2023 й. 75/2023-сон буйруғи билан тасдиқланган)

Функция недоступна

Ўзбекистон Республикаси

Адлия вазирлигида

2023 йил 31 октябрда 3472-сон

билан рўйхатга олинган

Ўзбекистон Республикаси

камбағалликни қисқартириш

ва бандлик вазирининг

2023 йил 6 октябрдаги

75/2023-сон буйруғига

ИЛОВА

Шахсларни ишсиз деб эътироф этиш ва уларга

ишсизлик нафақасини тайинлаш бўйича электрон

давлат хизматини кўрсатиш тўғрисидаги

РЕГЛАМЕНТ

Мазкур Регламент шахсларни (бундан буён матнда ариза берувчи деб юритилади) ишсиз деб эътироф этиш ва уларга ишсизлик нафақасини тайинлаш бўйича электрон давлат хизмати (бундан буён матнда давлат хизмати деб юритилади) кўрсатиш тартибини белгилайди.

1-БОБ. УМУМИЙ ҚОИДАЛАР

1. Давлат хизмати Ўзбекистон Республикаси Ягона интерактив давлат хизматлари портали (бундан буён матнда ЯИДХП деб юритилади) орқали Ўзбекистон Республикаси Камбағалликни қисқартириш ва бандлик вазирлигининг туман, шаҳар бўлинмалари - Камбағалликни қисқартириш ва бандликка кўмаклашиш бўлимлари (бундан буён матнда маҳаллий меҳнат органлари деб юритилади) томонидан кўрсатилади.

2. Давлат хизматини кўрсатиш мазкур Регламентнинг 1-иловасидаги схемага мувофиқ амалга оширилади.

2-БОБ. МАҲАЛЛИЙ МЕҲНАТ ОРГАНЛАРИ

ТОМОНИДАН АРИЗА БЕРУВЧИГА ДАВЛАТ

ХИЗМАТИНИ ЯИДХП ОРҚАЛИ КЎРСАТИШ

3. Ариза берувчи давлат хизматидан фойдаланиш учун ЯИДХПдан рўйхатдан ўтади.

4. Ариза берувчи давлат хизматидан фойдаланиш учун ушбу Регламентнинг 2-иловасига мувофиқ шаклдаги сўровномани тўлдиради.

5. Ариза берувчи ЯИДХП орқали сўровномани тўлдиргандан сўнг маълумотларнинг тўғрилигини текширади. Бунда, сўровномани электрон рақамли имзо билан тасдиқлаш талаб этилмайди.

Ариза берувчи томонидан тўлдирилган сўровнома ЯИДХП орқали автоматик равишда доимий яшаш жойи ёки вақтинча турган жойидаги маҳаллий меҳнат органига юборилади.

6. Маҳаллий меҳнат органи сўровнома келиб тушган кундан эътиборан бир иш куни ичида ариза берувчини иш қидираётган шахс сифатида рўйхатга олади ҳамда Ўзбекистон Республикасининг "Аҳоли бандлиги тўғрисида"ги Қонунининг 45-моддаси биринчи қисми тўртинчи - ўнинчи хатбошиларига мувофиқ ариза берувчини ишсиз деб эътироф этиш бўйича рад қилиш учун асослар мавжуд ёки мавжуд эмаслигини "Бандлик хизмати" ахборот тизими орқали вазирлик ва идораларнинг ахборот тизимлари маълумотлари асосида текширади.

Бунда, қуйидагилар ариза берувчини ишсиз деб эътироф этишни рад қилиш учун асос бўлади:

ариза берувчи таълим муассасаларида ва ташкилотларида ишлаб чиқаришдан ажралган ҳолда таҳсил олаётган бўлса, бундан таълимнинг сиртқи шаклида таҳсил олиш мустасно;

қонунчиликка мувофиқ пенсия таъминоти ҳуқуқига эга бўлса (пенсия туридан қатъи назар);

бола икки ёшга тўлгунига қадар уни парвариш қилаётган, ишламаётган аёл бўлса;

ишини ўзгартирмоқчи бўлган, лекин маҳаллий меҳнат органларида рўйхатдан ўтиш пайтида, ташкилий-ҳуқуқий шаклидан қатъи назар, ташкилотларда ишловчи бўлса ёки уларнинг штатида ҳисобда турган бўлса;

суднинг ҳукми билан озодликдан маҳрум этиш ёки ахлоқ тузатиш ишлари тарзидаги жазога ҳукм қилинган бўлса;

фермер хўжалигининг раҳбари ёки ходими, оилавий корхонанинг иштирокчиси, деҳқон хўжалигининг раҳбари ёки аъзоси, шунингдек якка тартибдаги тадбиркор бўлса;

ўзини ўзи банд қилган шахс бўлса.

7. Ишсиз деб эътироф этишни рад қилиш учун мазкур Регламентнинг 6-банди иккинчи - тўққизинчи хатбошиларида белгиланган асослар мавжуд бўлмаган тақдирда, ариза берувчи маҳаллий меҳнат органига келиши лозимлиги тўғрисида ёзма ёки электрон шаклда у иш қидираётган шахс сифатида рўйхатга олинган кундан бошлаб бир иш кунида маҳаллий меҳнат органи томонидан хабардор қилинади.

Бунда, ариза берувчи иш қидираётган шахс сифатида рўйхатга олинган кундан эътиборан ўн кун ичида маҳаллий меҳнат органига мақбул келадиган иш (фуқаро бажаришга қодир бўлган, фуқаронинг олган маълумоти йўналиши ва ихтисослигига, малакасига, касбий тайёргарлигига, иш тажрибасига, соғлиғининг ҳолатига кўра мос келадиган, яшаш жойини ўзгартиришини назарда тутмайдиган, унинг доимий яшаш жойидан унчалик узоқ бўлмаган ҳамда меҳнатга ҳақ тўлашнинг белгиланган энг кам миқдоридан кам бўлмаган иш ҳақини кафолатлайдиган иш) юзасидан таклиф олиш учун бориши керак.

8. Маҳаллий меҳнат органи томонидан ариза берувчини ишсиз деб эътироф этиш тўғрисидаги қарор у иш қидираётган шахс сифатида рўйхатга олинган кундан эътиборан ўн биринчи кундан кечиктирмай қуйидаги асосларга кўра қабул қилинади:

ариза берувчи иш қидираётган шахс сифатида рўйхатга олинган кундан эътиборан ўн кун ичида мақбул келадиган иш юзасидан таклиф олиш учун маҳаллий меҳнат органига келса;

таклиф этилган мақбул келадиган ишни иш қидираётган шахс сифатида рўйхатга олинган кундан эътиборан ўн кун ичида узрли сабабсиз (касаллик ёки ҳужжатлар билан тасдиқланган бошқа ҳолатлар мавжуд бўлмаганда) икки марта рад этмаса;

ариза берувчига у иш қидираётган шахс сифатида рўйхатга олинган кундан эътиборан дастлабки ўн кун ичида мақбул келадиган иш таклиф этилмаган бўлса;

маҳаллий меҳнат органи ариза берувчи ишга жойлаштириш учун юборилган ташкилотдан рад жавобини олган бўлса.

9. Маҳаллий меҳнат органи ариза берувчини ишсиз деб эътироф этиш ва унга ишсизлик нафақасини тайинлаш тўғрисида қарор қабул қилинганлиги ҳақида QR-код қўйилган хабарномани мазкур Регламентнинг 3-иловасига мувофиқ, шунингдек ариза берувчини ишсиз деб эътироф этиш рад этилганлиги тўғрисида QR-код қўйилган хабарномани мазкур Регламентнинг 4-иловасига мувофиқ расмийлаштиради.

Бунда, маҳаллий меҳнат органи хабарномани қарор қабул қилинган кундан эътиборан икки кундан кечиктирмай ариза берувчининг ЯИДХП даги шахсий кабинетига юборади.

10. Давлат хизмати кўрсатилганлиги учун тўлов ундирилмайди.

3-БОБ. ЯКУНЛОВЧИ ҚОИДАЛАР

11. Маҳаллий меҳнат органлари ўз фаолиятини амалга ошириши натижасида олинган маълумотларнинг махфийлигини таъминлайди.

12. Ариза берувчилар маҳаллий меҳнат органлари ходимларининг хатти-ҳаракатлари ёки ҳаракатсизлиги юзасидан юқори турувчи ташкилотларга ёки судга шикоят қилишга ҳақли.

13. Ушбу Регламент талабларининг бузилишида айбдор бўлган шахслар қонунчилик ҳужжатларига мувофиқ жавоб беради.

Регламентга

1-ИЛОВА

Шахсларни ишсиз деб эътироф этиш ва уларга

ишсизлик нафақасини тайинлаш бўйича

электрон давлат хизматини кўрсатиш

СХЕМАСИ

            

Регламентга

2-ИЛОВА

Шахсларни ишсиз деб эътироф этиш ва уларга

ишсизлик нафақасини тайинлаш бўйича

давлат хизматидан фойдаланиш учун

СЎРОВНОМА

               

Регламентга

3-ИЛОВА

Шахсни ишсиз деб эътироф этиш ва унга

ишсизлик нафақасини тайинлаш бўйича

қарор қабул қилинганлиги тўғрисида

ХАБАРНОМА

     

белгиланган тартибда ва муддатларда Сизнинг 20__ йил "___" __________даги

                                                                                                                       (йил, кун, ой)

____________________-сон сўровномангизни кўриб чиқиб, Ўзбекистон Республикасининг "Аҳоли бандлиги тўғрисида"ги Қонунининг 44-моддасига мувофиқ, ________________________ туман (шаҳар) Камбағалликни қисқартириш ва бандликка кўмаклашиш бўлимининг ________ -йилдаги _______-сон буйруғи билан (ариза берувчининг Ф.И.О.)ни ишсиз деб эътироф этиш ва унга ишсизлик нафақасини тайинлаш тўғрисида қарор қабул қилинди.

Ишсиз деб эътироф этилган шахс учун зарур бўлган ахборотлар:

1. Ишсизлик нафақаси ______санадан бошлаб ҳисобланади ва унинг миқдори _______ сўмни ташкил этади.

2. Ишсиз деб эътироф этилган шахснинг ________________________ туман (шаҳар) Камбағалликни қисқартириш ва бандликка кўмаклашиш бўлимига қайта рўйхатдан ўтиш учун мажбурий келиш санаси - кк.оо.йййй гача.

3. Ишсиз деб эътироф этилган шахснинг ҳуқуқ ва мажбуриятлари:

ишсиз деб эътироф этилган шахс ишсизлик нафақасини ҳар ойда ва маҳаллий меҳнат органининг буйруғида белгиланган миқдорда олиш;

ишсизлик нафақасини олиш даврида ишсиз шахс касал бўлган тақдирда ишсизлик нафақасини ишсиз шахснинг қариндошлари (отаси, онаси, эри (хотини), вояга етган болалари) ёки белгиланган тартибда расмийлаштирилган ишончнома асосида ишсиз шахснинг бошқа ишончли шахслари томонидан олишга йўл қўйилади;

ишсизлик нафақасини олиш даврида ишсиз шахс иш қидириши ва ишга жойлаштиришга доир йўлланма ёхуд касбга тайёрлашга, қайта тайёрлашга ёки малакасини оширишга йўлланма олиш учун икки ҳафтада камида бир марта маҳаллий меҳнат органига мурожаат қилиши шарт.

4. Ишсизлик нафақасини олиш шартлари ва жойи:

ишсизлик нафақаси ўн икки ойлик давр ичида кўпи билан йигирма олти календарь ҳафта давомида тўланади;

ишсизлик нафақасининг энг кам миқдори - меҳнатга ҳақ тўлаш энг кам миқдорининг камида етмиш беш фоизига тенг;

ишсизлик нафақаси ишсиз деб эътироф этилган шахсга у маҳаллий меҳнат органида иш қидираётган шахс сифатида рўйхатга олинган биринчи кундан эътиборан ҳисобланади ва тўланади.

Жорий ойда ишсизлик нафақасини тўлаш ўтган ой учун амалга оширилади.

Ишсизлик нафақасига солиқ солинмайди.

Маъсул ижрочи Ф.И.О:

Туман (шаҳар) Камбағалликни қисқартириш ва бандликка кўмаклашиш бўлими номи ва телефон рақами:

           

           

Эслатма: Мазкур хабарнома бўйича эътирозларингиз бўлса, доимий яшаш ёки вақтинча турган жойингиздаги Камбағалликни қисқартириш ва бандликка кўмаклашиш бўлимига мурожаат қилишингиз мумкин!

Регламентга

4-ИЛОВА

Шахсни ишсиз деб эътироф этиш

рад қилинганлиги тўғрисида

ХАБАРНОМА

белгиланган тартибда ва муддатларда Сизнинг 20__ йил "___" __________даги

                                                                                                                       (йил, кун, ой)

____________________-сон сўровномангизни кўриб чиқиб,

Рад этиш асослари (Ўзбекистон Республикасининг "Аҳоли бандлиги тўғрисида"ги Қонунининг 45-моддаси биринчи қисмида белгиланган ҳолатлар):

1.

2.

3.

Ахборот тариқасида маълум қилинадики, Ўзбекистон Республикасининг "Аҳоли бандлиги тўғрисида"ги Қонунининг 45-моддаси иккинчи қисмига мувофиқ ишсиз шахс деб эътироф этиш рад қилинган шахс таклиф этилган ишни рад этган пайтдан ёки мақбул келадиган иш бўйича таклиф олиш учун маҳаллий меҳнат органига узрли сабабсиз келмаган пайтдан эътиборан ўттиз календарь кун ўтганидан кейингина иш қидираётган шахс сифатида такроран рўйхатдан ўтиш ҳуқуқига эга.

Эслатма: Мазкур хабарнома бўйича эътирозларингиз бўлса, доимий яшаш ёки вақтинча турган жойингиздаги Камбағалликни қисқартириш ва бандликка кўмаклашиш бўлимига мурожаат қилишингиз мумкин!

Қонун ҳужжатлари маълумотлари миллий базаси (www.lex.uz),

2023 йил 1 ноябрь