Овчилик назоратининг жамоатчи инспектори тўғрисида Намунавий низом (ЎзР ВМ 20.11.2023 й. 609-сон қарорига 1-илова)

Функция недоступна

Вазирлар Маҳкамасининг

2023 йил 20 ноябрдаги

609-сон қарорига

1-ИЛОВА

Овчилик назоратининг жамоатчи инспектори тўғрисида

НАМУНАВИЙ НИЗОМ

1-БОБ. УМУМИЙ ҚОИДАЛАР

            

1. Ушбу Намунавий низом ҳайвонот дунёсини муҳофаза қилиш ва ундан фойдаланиш соҳасидаги тадбирларни амалга оширишда овчилар жамоат бирлашмаларига аъзо бўлган фуқароларнинг (кейинги ўринларда - жамоатчи инспекторлар) жамоатчилик асосида иштирокини ташкил этиш тартибини, уларнинг вазифалари, ҳуқуқлари ва мажбуриятларини белгилайди.

2. Ушбу Намунавий низом қоидалари овчилар жамоат бирлашмалари бўлмаган нодавлат нотижорат ташкилотлари ва фуқароларнинг ўзини ўзи бошқариш органларига нисбатан татбиқ этилмайди.

3. Жамоатчи инспекторларнинг фаолияти белгиланган тартибда адлия органларида давлат рўйхатидан ўтказилган овчилар жамоат бирлашмалари таркибида ташкил этилиши мумкин.

4. Жамоатчи инспекторлар сони овчилар жамоат бирлашмалари томонидан юритиладиган овчилик хўжаликлари сони ва уларнинг майдонига, чегараолди минтақасида ва муҳофаза этиладиган табиий ҳудудларда жойлашувидан (агар уларнинг муҳофаза режимида ов қилиш назарда тутилган бўлса) келиб чиққан ҳолда белгиланади.

Мазкур банднинг биринчи хатбошисидаги мезонларга асосан овчилар жамоат бирлашмалари томонидан жамоатчи инспекторлар гуруҳи тузилиши мумкин.

Жамоатчи инспекторлар таркиби, биринчи навбатда, овчилар жамоат бирлашмалари томонидан юритиладиган овчилик хўжаликлари штатида егерлар ёки бошқа штатдаги ов мутахассислари мавжуд бўлмаган ёки етишмайдиган овчилик хўжаликларида шакллантирилади.

Жамоатчи инспектор вазифаларини бажариш фуқарони овчилар жамоат бирлашмасига аъзоликка доир мажбуриятларни бажаришдан озод қилмайди.

Жамоатчи инспекторлар ўз фаолиятини жамоатчилик асосида амалга оширадилар, улар билан меҳнат шартномаси расмийлаштирилмайди ва иш стажи ҳисобланмайди.

Овчилар жамоат бирлашмалари аъзолари жамоатчи инспектор вазифасини бажаришга фақат иш жойидан бўш вақтларида жалб этилиши мумкин.

5. Жамоатчи инспекторлар таркиби ов қилиш қоидаларини, шу жумладан, ёввойи ҳайвонларнинг яшаш муҳитини, бўлиш ва урчиш жойларини, уларнинг кўчиб ўтиш йўлларини муҳофаза қилиш, ов қилиш учун рухсат этилган ҳамда тақиқланган жойларни, ёввойи ҳайвонларнинг турларини ҳамда ов қуроллари ва усулларини, ов қилиш учун белгиланган муддатларни, овланган ёввойи ҳайвонлар ва уларнинг яшаш фаолияти маҳсулотлари ҳисобини юритиш тартибини, ҳайвонот дунёсидан фойдаланиш қоидаларини бузганлик учун жавобгарлик чораларини, шунингдек, овчилик хўжаликлари ва уларга туташган ҳудудларни яхши биладиган, интизомли, ташкилотчилик, кучли ирода, топқирлик, ташаббускорлик қобилиятларига ва аҳоли ўртасида обрў-эътиборга эга овчилар жамоат бирлашмалари аъзоларидан ихтиёрийлик тамойили асосида шакллантирилади.

6. Жамоатчи инспектор бўлиш истагини билдирган овчилар жамоат бирлашмаси аъзоси овчилар жамоат бирлашмаси раҳбарлик органига ариза билан мурожаат қилади.

Ариза овчилар жамоат бирлашмаси раҳбарлик органи томонидан Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ва унинг ҳузуридаги Ўрмон хўжалиги агентлиги (ов қилиш жойлари ўрмон фондига кирмайдиган ерларда жойлашган бўлса) ҳамда ҳудудий ички ишлар органларининг вакиллари иштирокидаги йиғилишда ариза келиб тушган кундан эътиборан ўттиз кундан ошмаган муддатда кўриб чиқилади. Бунда аризани кўриб чиқиш натижалари баён шаклида расмийлаштирилади.

Номзоди маъқулланган фуқарога овчилар жамоат бирлашмаси раҳбарлик органи йиғилиши баёнига мувофиқ овчилар жамоат бирлашмаси раҳбарининг буйруғи билан ушбу Намунавий низомга 1-иловага мувофиқ шакл бўйича уч йил муддатга жамоатчи инспектор гувоҳномаси берилади.

7. Жамоатчи инспектор гувоҳномаси тартиб рақамига эга бўлади, овчилар жамоат бирлашмаси томонидан ушбу Намунавий низомга 2-иловага мувофиқ шаклда юритиладиган алоҳида ҳисобга олиш журналида қайд этилади ҳамда гувоҳнома олувчига журналга имзо қўйдирган ҳолда топширилади.

Бунда гувоҳнома рақами ҳисобга олиш журналидаги тартиб рақамга мос келиши керак.

Ҳисобга олиш журнали овчилар жамоат бирлашмаси раҳбарига шахсан бириктирилган махсус сейфда сақланади.

Ҳисобга олиш журнали белгиланган намунага мос, қаттиқ жилд билан муқоваланган ҳамда варақлари рақамланган, тикилган, овчилар жамоат бирлашмаси раҳбари имзоси ва муҳри билан, варақлари ва унинг юритилиши бошланган санаси кўрсатилган ҳолда тасдиқланган бўлиши керак.

2-БОБ. ЖАМОАТЧИ ИНСПЕКТОРЛАРНИНГ

АСОСИЙ ВАЗИФАЛАРИ, ҲУҚУҚЛАРИ

ВА МАЖБУРИЯТЛАРИ

           

8. Қуйидагилар жамоатчи инспекторларнинг асосий вазифалари ҳисобланади:

овчилик хўжаликларида ҳайвонот дунёсини муҳофаза қилиш ва ундан фойдаланиш соҳасидаги қонунчилик ҳужжатларига юридик ва жисмоний шахслар томонидан риоя этилишини ўрганиб бориш ҳамда аниқланган ҳуқуқбузарликлар юзасидан табиатни муҳофаза қилиш давлат органлари ҳамда овчилар жамоат бирлашмасини хабардор қилиш;

овчилик хўжаликларида ҳайвонот дунёсини муҳофаза қилиш ва ундан фойдаланиш соҳасидаги ҳуқуқбузарликларнинг олдини олиш ва аниқлаш, қонунга хилоф равишда ов қилишга (браконьерликка) қарши курашиш бўйича табиатни муҳофаза қилишга масъул инспекторлар томонидан ўтказилаётган патруллик рейдлари ва бошқа тадбирларда иштирок этиш;

овчилик хўжаликлари, биринчи навбатда, чегараолди минтақаларида ва муҳофаза этиладиган табиий ҳудудларда ҳамда уларга туташ ҳудудларда жойлашган нотаниш, шубҳа уйғотувчи шахсларнинг пайдо бўлиши, қурол-аслаҳани, ўқ-дориларни, гиёҳвандлик воситаларини, бошқа тақиқланган ашёларни олиб ўтиш ёки яшириб қўйиш, жамоат хавфсизлигига таҳдид соладиган ёки таҳдид солиши мумкин бўлган ўзга ҳолатлар юзасидан ҳуқуқни муҳофаза қилувчи органларни хабардор қилиш;

ваколатли давлат органлари, фуқароларнинг ўзини ўзи бошқариш органлари ва нодавлат нотижорат ташкилотлари томонидан овчилик хўжаликлари ҳудудида ҳайвонот дунёсини муҳофаза қилиш ва ундан фойдаланиш соҳасидаги давлат дастурларини ҳамда бошқа дастурларнинг амалга оширилишига кўмаклашиш;

овчилик хўжаликлари ҳудудида табиий офатлар, ёнғинлар ва бошқа фавқулодда вазиятлар хавфи туғилганда ваколатли давлат органларини, овчилик хўжаликлари ходимларини ва аҳолини ўз вақтида хабардор қилишда ва ушбу ҳолатларни бартараф этишда қатнашиш;

фуқароларда атроф табиий муҳитга нисбатан эҳтиёткорона муносабатни шакллантиришда, табиат тўғрисидаги билимларни тарғиб қилиш ва оммалаштириш ишларини амалга оширишда, табиатни муҳофаза қилишга доир танловлар, кўргазмалар ва бошқа оммавий тадбирларни ўтказишда иштирок этиш.

9. Жамоатчи инспекторлар ўз зиммасига юкланган вазифаларни бажаришда қуйидаги ҳуқуқларга эга:

овчилик хўжаликлари ҳудудида бўлиб турган шахслар томонидан ҳайвонот дунёсини муҳофаза қилиш ва ундан оқилона фойдаланиш қоидаларига риоя этилишини бевосита кузатиш, аниқланган ҳолатлар бўйича белгиланган тартибда маълумотномалар ва ахборотлар тўплаш ҳамда ваколатли давлат органларига киритиш;

овчилик хўжалиги ҳудудини айланиб чиқиш (патруллик қилиш), ҳуқуқбузарлик ҳолатларини аниқлаш ва расмийлаштириш учун хизмат ҳайвонлари ва транспорт воситаларидан, видеокузатув ҳамда кузатувнинг бошқа техник воситаларидан фойдаланиш, юкланган вазифаларни махсус кийим-бошда (формада) бажариш;

овчилик хўжаликларидан, табиатни муҳофаза қилиш органларидан ҳамда овчилик хўжалиги ҳудудида бўлиб турган шахслардан юкланган вазифаларни бажариш учун зарур бўлган ахборотларни олиш;

табиатни муҳофаза қилиш давлат органлари ва ҳуқуқни муҳофаза қилиш органлари ходимлари томонидан овчилик хўжаликлари ҳудудида ўтказилаётган инспекторлик рейдлари ва бошқа тадбирларда иштирок этиш, ҳуқуқбузарликлар ҳолатларига аниқлик киритишда ва уларни расмийлаштиришда қатнашиш;

овчилик хўжаликлари ҳудудида аниқланган ҳуқуқбузарликлар, шубҳали ҳолатлар ва шубҳа уйғотувчи шахслар хусусида ваколатли давлат органларига ахборот бериш ва маълумотлар киритиш;

аҳолининг табиатни муҳофаза қилишга доир маданияти ва билимини ошириш ишларида иштирок этиш;

ҳайвонот дунёсини муҳофаза қилиш ва ундан оқилона фойдаланишга оид фаолият бўйича қонунчиликни такомиллаштириш ва яхшилаш юзасидан овчилар жамоат бирлашмасига таклифлар киритиш;

муҳим жамоат тадбирларида фаол иштирок этиш ва ҳайвонот дунёсини муҳофаза қилиш ҳамда ундан оқилона фойдаланишга оид талаблар бузилишининг олдини олиш, уни аниқлаш ва унга чек қўйиш, айбдорларни жавобгарликка тортишда кўмаклашгани учун давлат органларидан, овчилар жамоат бирлашмалари ёки бошқа нодавлат нотижорат ташкилотларидан мукофотлар олиш.

Жамоатчи инспекторлари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

10. Жамоатчи инспекторлар:

ҳайвонот дунёсини муҳофаза қилиш ва ундан оқилона фойдаланишга доир ҳамда бошқа норматив-ҳуқуқий ҳужжатларнинг, шунингдек, ушбу Низом ва овчилар жамоат бирлашмаси уставининг талабларига амал қилиши;

юкланган вазифалар доирасида табиатни муҳофаза қилиш ва ҳуқуқни муҳофаза қилувчи органларга амалий ёрдам кўрсатиши;

овчилик хўжаликлари фаолиятига аралашмаслиги;

овчилик назорати жамоатчи инспектори гувоҳномасини ўзининг ёнида олиб юриши ва овчилик хўжаликлари ҳудудида бўлаётган шахсларнинг талаби бўйича тақдим этиши;

ўзига ишониб топширилган техник воситаларни, махсус кийим-бош (форма) ва бошқа мол-мулкни эҳтиёт қилиши ҳамда уларни соз ҳолатда сақлаши лозим.

3-БОБ. ЖАМОАТЧИ ИНСПЕКТОРЛАР

ФАОЛИЯТИНИ ТАШКИЛ ЭТИШ

             

11. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Ички ишлар вазирлигининг ҳудудий бўлинмалари ҳамда овчилар жамоат бирлашмалари қонунчилик ҳужжатларида белгиланган ваколатлари доирасида жамоатчи инспекторлар фаолиятига услубий раҳбарлик қилади.

12. Жамоатчи инспекторлар ўз фаолиятини овчилар жамоат бирлашмаси раҳбари томонидан тасдиқланган режалар асосида амалга оширади.

Режаларда жамоатчи инспекторларга бириктирилган ҳудудларнинг номи ва аниқ чегаралари, уларни айланиб чиқиш (патруллик қилиш) тартиби ва давомийлиги, юзага келаётган вазиятни кузатиб бориш билан боғлиқ бўлган асосий ҳамда алоҳида вазифалар, овчилар жамоат бирлашмаси, табиатни муҳофаза қилиш давлат органлари ва ҳуқуқни муҳофаза қилувчи органларнинг мансабдор шахслари билан ахборот алмашинувини таъминлаш қоидалари, амалга оширилаётган ишлар юзасидан ҳисобот бериш тартиби назарда тутилиши мумкин.

13. Жамоатчи инспекторларни ўқитиш, фаолиятини амалга ошириш давомида уларга йўриқнома ўтказиш ва вазифаларни белгилаш овчилар жамоат бирлашмаси раҳбари, заруратга кўра эса Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Давлат экологик назорат инспекциясининг ҳамда ҳудудий ички ишлар органлари ходимлари томонидан амалга оширилади.

Жамоатчи инспекторлар зиммасига ушбу Намунавий низомда ва бошқа қонунчилик ҳужжатларида белгиланмаган вазифаларни юклаш ёки топшириқлар бериш, уларни давлат сирларини ташкил этувчи ҳужжатлар билан таништириш тақиқланади.

14. Жамоатчи инспекторлар давлат органлари ва овчилар жамоат бирлашмалари ёки бошқа нодавлат нотижорат ташкилотлари томонидан рағбатлантирилиши мумкин.

15. Жамоатчи инспекторлар фаолият юритиши учун шароитлар яратиш, уларни ўқитиш ва малакасини ошириш билан боғлиқ харажатлар овчилар жамоат бирлашмалари маблағлари ҳисобидан молиялаштирилади.

16. Жамоатчи инспекторлар ўзига юкланган вазифаларни бажариши учун овчилар жамоат бирлашмалари томонидан махсус кийим-бош (форма) билан бепул таъминланади.

Махсус кийим-бош (форма) намуналари овчилар жамоат бирлашмаси раҳбарлик органи томонидан тасдиқланиши мумкин.

17. Жамоатчи инспекторларга юкланган вазифаларнинг хусусиятларидан келиб чиқиб, уларга овчилар жамоат бирлашмалари томонидан хизмат ҳайвонлари, транспорт ва алоқа воситалари, видеокузатув ҳамда кузатувнинг бошқа техник воситалари вақтинча фойдаланиш учун берилиши мумкин.

4-БОБ. ЯКУНЛОВЧИ ҚОИДАЛАР

18. Жамоатчи инспектор гувоҳномасининг амал қилиш муддатини узайтириш ёки амал қилишини тугатиш ушбу гувоҳномани беришга доир умумий тартибда амалга оширилади.

19. Жамоатчи инспектор гувоҳномасининг амал қилиш муддати жамоатчи инспекторнинг аризаси асосида узайтирилади.

20. Жамоатчи инспектор гувоҳномаси амал қилишини тугатишга қуйидагилар асос бўлади:

гувоҳноманинг амал қилиш муддати тугаганда;

жамоатчи инспекторнинг аризасига мувофиқ;

жамоатчи инспектор унга юкланган вазифаларни бажармаганда ёки лозим даражада бажармаганда ёки унинг фаолиятида қонунчилик ҳужжатларига зид хатти-ҳаракатлар аниқланганда;

жамоатчи инспектор суд томонидан жиноят ёки маъмурий ҳуқуқбузарлик (ов қилиш ва балиқ овлаш қоидаларини бузганлик) содир этганликда айбдор деб топилганда;

жамоатчи инспектор овчилар жамоат бирлашмасининг устави талабларини қўпол равишда бузганда ёки овчилар жамоат бирлашмаси аъзолигидан чиқарилганда;

жамоатчи инспекторга ов қуролини сақлаш ва олиб юришга доир берилган рухсатноманинг амал қилиши тугатилганда ёки бекор қилинганда, агар унинг жамоатчи инспектор мажбуриятларини бажариши ов қуроли билан бевосита боғлиқ бўлса.

Амал қилиши тугатилган гувоҳнома жамоатчи инспектор томонидан уч кун муддат ичида уни берган овчилар жамоат бирлашмасига қайтарилиши шарт.

21. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

        

          

Низомга

1-ИЛОВА

Овчилар жамоат бирлашмаси томонидан

бериладиган овчилик назоратининг жамоатчи

инспектори гувоҳномасининг

ШАКЛИ

Гувоҳноманинг муқоваси

         

       

Гувоҳноманинг ички томони

        

        

       

Изоҳ:

1. Гувоҳнома муқоваси тўқ яшил рангли бўлиб, 60 х 90 мм катталикда чарм ёки чарм ўрнини босувчи материалдан тайёрланади. Ички ҳар ярим қисмининг ўлчами - 60 х 85 мм.

2. Гувоҳнома бланкаси 60 х 85 мм ҳажмга, ҳар ярим қисми оч сарғиш рангдаги ҳимоя қилувчи сеткага эга бўлади.

           

            

Низомга

2-ИЛОВА

Овчилик назоратининг жамоатчи

инспектори гувоҳномасининг берилишини

ва қайтарилишини ҳисобга олиш

ЖУРНАЛИ

___________________________________________________________________________

(овчилар жамоат бирлашмасининг номи)

          

            

              

Қонун ҳужжатлари маълумотлари миллий базаси (www.lex.uz),

2023 йил 21 ноябрь