Ўзбекистон Республикаси Президентининг 14.12.2023 й. ПҚ-389-сон "Қашқадарё вилоятини 2024-2025 йилларда комплекс ижтимоий-иқтисодий ривожлантириш бўйича қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

14.12.2023 й.

N ПҚ-389

ҚАШҚАДАРЁ ВИЛОЯТИНИ 2024-2025 ЙИЛЛАРДА

КОМПЛЕКС ИЖТИМОИЙ-ИҚТИСОДИЙ

РИВОЖЛАНТИРИШ БЎЙИЧА ҚЎШИМЧА

ЧОРА-ТАДБИРЛАР ТЎҒРИСИДА

Қашқадарё вилоятининг мавжуд ижтимоий-иқтисодий, шу жумладан ишлаб чиқариш ва инвестиция салоҳиятидан самарали фойдаланиш, ҳудудда муҳандислик-коммуникация, ижтимоий ва ишлаб чиқариш инфратузилмаларини яхшилаш, иқтисодиёт тармоқларини барқарор ривожлантириш, шу асосда аҳоли бандлигини таъминлаш ва турмуш даражасини ошириш мақсадида:

1. Қуйидагилар Қашқадарё вилоятини 2024-2025 йилларда ижтимоий-иқтисодий ривожлантиришнинг асосий мақсадли кўрсаткичлари этиб белгилансин:

биринчидан, вилоятда 2024-2025 йилларда ялпи ҳудудий маҳсулот ҳажми тегишлича - 5,8 фоизга ва 6 фоизга, саноат маҳсулотлари ишлаб чиқариш ҳажми - 8 фоизга ва 8,5 фоизга, қишлоқ хўжалиги маҳсулотларини етиштириш ҳажми - 4,5 фоизга ва 5 фоизга, бозор хизматлари ҳажми - 14 фоизга ва 15 фоизга ўсишини таъминлаш;

иккинчидан, 2024 йилда 550 минг ва 2025 йилда 600 минг нафар аҳолининг бандлигини таъминлаш;

учинчидан, 2024 йилда республика бюджетидан 100 миллиард сўм ажратиш ҳисобига 90 километр, 2024-2026 йилларда халқаро молия институтлари ва хорижий давлатлар маблағлари, шу жумладан Хитой Халқ Республикасининг имтиёзли кредитлари ҳисобидан 316 километр, жами 406 километр каналларни бетонлаштириш. Шунингдек:

2024-2030 йилларда 11 минг километрдан зиёд тупроқ ўзанли хўжаликлараро ирригация тармоқларини тўлиқ бетонлаштириш ёки уларни лоток тизимлари ва ёпиқ қувурларга ўтказиш;

2024-2025 йилларда вилоятдаги суғориладиган ер майдонларини лазерли текислаш ва бунинг натижасида, қишлоқ хўжалиги маҳсулотлари етиштиришда унумдорликни 20 фоизга ошириш;

тўртинчидан, 2024 йилда ҳудудларни ижтимоий-иқтисодий ривожлантириш учун назарда тутилган маблағлар ҳисобидан 220 миллиард сўм ажратиш ҳамда 2024-2026 йилларда халқаро молия ташкилотларидан 122,5 миллион АҚШ долларини жалб қилиш ҳисобига жами 364 километр, шундан 189 километр умумий фойдаланишдаги ва 175 километр ички автомобиль йўлларини таъмирлаш;

бешинчидан, 2024 йилда республика бюджетидан 52 миллиард сўм ажратиш ҳамда халқаро молия ташкилотларидан 31 миллион АҚШ долларини жалб қилиш ҳисобига жами 321 километр ичимлик сув тармоқлари ва 18 та сув иншоотини қуриш орқали ичимлик сув таъминоти қамровини 73,6 фоизга етказиш;

олтинчидан, 2024 йилни Қашқадарё вилоятида "Мактаб таълими ва тиббиёт йили" деб эълон қилиш ҳамда бу борада зарур чора-тадбирларни амалга ошириш.

Бунда, 2024 йилда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида 390 миллиард сўм ажратиш ҳисобига 64 та умумтаълим мактабида қурилиш, реконструкция қилиш, мукаммал таъмирлаш ва жиҳозлаш ишларини амалга ошириш;

еттинчидан, туризм йўналишида режалаштирилаётган лойиҳаларни молиялаштириш учун вилоятга 500 миллион АҚШ доллари миқдоридаги инвестиция маблағларини жалб қилиш ҳисобига 4 миллион нафар маҳаллий ҳамда 500 минг нафар хорижий турист ташрифини ташкил қилиш.

Бунда, 2024 йилда Тикланиш ва тараққиёт жамғармаси ҳисобидан 50 миллион АҚШ доллари ҳамда 2024-2025 йилларда жами 500 миллион АҚШ доллари эквивалентида марказлашган ва хорижий инвестицияларни жалб қилиш.

2. Қуйидагилар:

Қашқадарё вилоятида 2024-2025 йилларда аҳоли бандлигини таъминлашнинг режа кўрсаткичлари 1-иловага мувофиқ;

Қашқадарё вилоятидаги норуда фойдали қазилма конлари жойлашган ер майдонларига бўлган ҳуқуқларни аукцион савдоларига чиқариш графиги 2-иловага мувофиқ;

2024-2025 йилларда Қашқадарё вилоятидаги суғориладиган ер майдонларини лазерли текислашнинг режа кўрсаткичлари 3-иловага мувофиқ;

Қашқадарё вилоятини 2024-2025 йилларда комплекс ижтимоий-иқтисодий ривожлантириш бўйича ишларни ташкил этиш ва мувофиқлаштириш юзасидан республика ишчи гуруҳи таркиби 4-иловага мувофиқ;

Қашқадарё вилоятининг туманларига (шаҳарларига) бириктирилган вазирлик, идора ва тижорат банклари раҳбар ходимлари рўйхати 5-иловага мувофиқ тасдиқлансин.

3. Иқтисодиёт ва молия вазирлиги ҳамда Қашқадарё вилояти ҳокимлигининг Инвестициялар, саноат ва савдо вазирлигининг ҳудудий тузилмалари штат бирликларини мақбуллаштириш ҳисобига Қашқадарё вилояти ҳокимлиги ҳузурида 10 та штат бирлигидан иборат Саноатни ривожлантириш лойиҳа офисини (кейинги ўринларда - Лойиҳа офиси) ташкил этиш тўғрисидаги таклифи маъқуллансин.

Лойиҳа офисига қуйидаги асосий вазифалар юклансин:

саноат соҳасида фойдаланилмаётган захираларни аниқлаш ва уларни сафарбар этишни назарда тутувчи Саноатнинг жадал ривожланиши концепциясини ишлаб чиқиш ҳамда вилоятнинг ҳар бир туманини (шаҳарини) ўзаро узвий ҳолда ривожлантириш орқали вилоятни республикада саноати ривожланган ҳудудга айлантириш;

замонавий конструкторлик ва тажриба бюроларига эга бўлган "Илдам ривожланувчи инновацион саноат зоналари"ни барпо этиш ҳамда инновацион ва юқори технологияли саноат маҳсулотлари ишлаб чиқаришни йўлга қўйиш.

Қашқадарё вилояти ҳокимлиги мазкур тадбирларни амалга ошириш учун бир ой муддатда зарур тажрибага эга бўлган нуфузли халқаро консалтинг компаниясини жалб қилсин.

Бунда, халқаро консалтинг компаниясига "Илдам ривожланувчи инновацион саноат зонаси"ни ташкил этиш концепциясини ёки мастер-режасини инвесторларни жалб қилган ҳолда ишлаб чиқиш вазифаси юклансин.

Бош вазир ўринбосари Ж. Қўчқоров ушбу мақсадлар учун республика бюджетидан 10 миллиард сўм маблағ ажратилишини таъминласин.

4. Лойиҳа офиси Иқтисодиёт ва молия вазирлиги, халқаро консалтинг компанияси билан биргаликда:

биринчи босқичда, хомашё ва меҳнат ресурслари, атрофдаги ҳудудларда жойлашган йирик саноат корхоналари ва саноат зоналари билан кооперация алоқаларини ривожлантириш имкониятлари ҳамда бошқа омиллардан келиб чиқиб, белгиланган ҳудудлар доирасида ишлаб чиқариш корхоналарининг мақбул жойлашувини белгилаш бўйича таклифларни ишлаб чиқсин;

"яшил", инновацион ва рақамли технологияларга ҳамда юқори қўшилган қиймат яратишга асосланган товарларнинг истиқболдаги бозор конъюнктураси асосида ишлаб чиқариш йўналишлари ва маҳсулот турлари бўйича таклифларни шакллантирсин;

иккинчи босқичда, Олий таълим, фан ва инновациялар вазирлиги ҳамда Инвестициялар, саноат ва савдо вазирлигини жалб қилган ҳолда ҳудудларнинг ривожланишига туртки берувчи, илғор илмий ишланмалар ва инновацион технологияларга асосланган юқори қўшилган қиймат яратувчи салоҳиятли инвестиция лойиҳа таклифлари рўйхатини шакллантирсин;

инвестиция лойиҳаларининг мақбул жойлашувини таъминлашни инобатга олган ҳолда ер майдонларини алоҳида ва йирик лотларга ажратиш орқали мулк ва ижара ҳуқуқи асосида очиқ аукцион савдоларига чиқариш бўйича таклифлар тайёрласин;

инвесторлар орасида қизиқишни кучайтириш мақсадида ҳар бир ҳудудга таниқли хорижий компанияларни (брендларни) жалб қилиш чораларини кўриш бўйича таклифлар ишлаб чиқсин;

якуний босқичда келгуси 5 йилда вилоятда саноат маҳсулотлари ишлаб чиқариш ҳажмини камида 2 баробарга ошириш, 2024-2025 йилларда камида 400 миллион АҚШ доллари миқдоридаги 30 та йирик (асосий фармацевтика маҳсулотлари, электротехника маҳсулотлари) ва катта (кимё маҳсулотлари, электр ускуналари) бизнес лойиҳаларини амалга ошириш ҳамда экспорт салоҳиятини 3-4 баробарга оширишнинг иқтисодий асосларини тайёрлаган ҳолда мазкур тадбирларни амалга оширишни назарда тутувчи Ҳукумат қарори лойиҳасини ишлаб чиқиб, Вазирлар Маҳкамасига киритсин.

Бунда, вилоят саноати, инвестиция ва экспорт салоҳиятини ривожлантиришга қаратилган тадбирлар учта босқичда, хусусан биринчи босқич олти ой муддатгача, иккинчи босқич бир йилгача ҳамда якуний босқич икки йилгача бўлган даврда амалга оширилади.

5. Сув хўжалиги вазирлиги Инвестициялар, саноат ва савдо вазирлиги, Иқтисодиёт ва молия вазирлиги билан биргаликда уч ой муддатда Қашқадарё вилоятидаги сув хўжалиги ташкилотлари ҳисобидаги 406 километр суғориш тармоқларини манзилли дастур асосида босқичма-босқич бетонлаштириш ишларини назарда тутувчи тегишли қарор лойиҳасини Вазирлар Маҳкамасига киритсин.

Бунда, суғориш тармоқларини бетонлаштириш ишларининг молиялаштириш манбаи этиб, 2024 йил учун Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасидаги маблағлар ҳамда Хитой Халқ Республикасининг имтиёзли кредит маблағлари белгиланиши назарда тутилсин.

6. Сув хўжалиги вазирлиги, Қашқадарё вилояти ҳокимлиги, Иқтисодиёт ва молия вазирлиги уч ой муддатда Қамаши ва Ғузор туманларидаги 25 минг гектар суғориладиган ер майдонларининг сув таъминотини яхшилаш мақсадида "Пахтаобод" каналини модернизация қилишга Жаҳон банкидан зарур маблағларни жалб қилиш бўйича тегишли музокаралар ва тадбирларни амалга оширсин.

7. Қишлоқ хўжалиги вазирлиги Ўсимликлар карантини ва ҳимояси агентлиги, Қашқадарё вилояти ҳокимлиги, Ўзбекистон фермер, деҳқон хўжаликлари ва томорқа ер эгалари кенгаши билан биргаликда қишлоқ хўжалиги ерларида тупроқнинг озуқа моддалари билан таъминланганлик даражасини аниқлаш мақсадида 2024 йилда қўшимча равишда 10 та мобиль лаборатория фаолиятини ташкил қилган ҳолда 150 минг гектарда тупроқнинг агрокимёвий таҳлили харитасини ишлаб чиқиб, унинг ердан фойдаланувчиларга етказиб берилишини таъминласин.

8. Бош вазир ўринбосарлари Ж. Қўчқоров, А. Раматов ва Ж. Ходжаев Қашқадарё вилояти ҳокимлиги, Иқтисодиёт ва молия вазирлиги, масъул вазирлик ва идоралар билан биргаликда икки ҳафта муддатда мазкур қарорнинг 1-бандидаги асосий мақсадли кўрсаткичларга эришишни таъминлаш мақсадида Қашқадарё вилоятини 2024-2025 йилларда комплекс ижтимоий-иқтисодий ривожлантириш дастурини тасдиқлаш бўйича Ҳукумат қарори лойиҳасини ишлаб чиқиб, белгиланган тартибда Вазирлар Маҳкамасига киритсин.

Бунда, белгиланадиган ҳар бир чора-тадбир бўйича масъул ижрочилар, амалга ошириш механизми ва муддатлари аниқ кўрсатиб ўтилсин.

9. Мазкур қарорга 5-иловадаги вазирлик, идора ва тижорат банклари раҳбар ходимларининг асосий вазифалари этиб қуйидагилар белгилансин:

ҳудудни ижтимоий-иқтисодий ривожлантириш ҳамда экспорт салоҳиятини ошириш, мавжуд захира ва имкониятлардан самарали фойдаланган ҳолда аҳолининг доимий даромадли меҳнат билан бандлигини таъминлаш, янги иш ўринларини ташкил этиш;

ҳудудни комплекс ривожлантириш мақсадида қабул қилинган фармон, қарор ва топшириқлар ижросининг ўз вақтида ва сифатли таъминланишини ташкиллаштириш;

белгиланган вазифаларни амалга ошириш жараёнида вужудга келган муаммо ва камчиликларни бартараф этиш юзасидан масъул вазирлик ва идоралар билан бирга зарур чораларни кўриб бориш.

10. Белгилансинки:

а) мазкур қарор ижроси:

ҳар олти ойда бир марта Ўзбекистон Республикаси Бош вазири А. Арипов томонидан Вазирлар Маҳкамаси Раёсатида;

ҳар чоракда бир марта Республика ишчи гуруҳи (Ж. Қўчқоров) ва Қашқадарё вилояти ҳокимлиги томонидан халқ депутатлари Қашқадарё вилояти Кенгаши йиғилишида;

ҳар ойда камида бир марта туманларга (шаҳарларга) бириктирилган масъуллар томонидан халқ депутатлари туман (шаҳар) Кенгашлари йиғилишида мутасадди вазирликлар, идоралар, хўжалик бирлашмалари ва маҳаллий ижро этувчи ҳокимият органлари иштирокида танқидий муҳокама қилинади;

б) Республика ишчи гуруҳи (Ж. Қўчқоров) ва Қашқадарё вилояти ҳокимлиги ҳар чорак якуни билан Ўзбекистон Республикаси Президентига мазкур қарор ижроси юзасидан ахборот киритиб боради.

11. Олий Мажлис Сенатига халқ депутатлари Қашқадарё вилояти, туман (шаҳар) Кенгашлари билан биргаликда мазкур қарор ижросини назорат қилиб бориш тавсия этилсин.

12. Мазкур қарорнинг ижросини самарали ташкил қилишга масъул ва шахсий жавобгар этиб Қашқадарё вилояти ҳокими М.Б. Азимов ва унинг ўринбосарлари белгилансин.

Қарор ижросини муҳокама қилиб бориш, масъул ташкилотлар фаолиятини мувофиқлаштириш ва назорат қилиш Ўзбекистон Республикасининг Бош вазири А.Н. Арипов зиммасига юклансин.

Ўзбекистон Республикаси Президенти                                               Ш. Мирзиёев

Ўзбекистон Республикаси

Президентининг

2023 йил 14 декабрдаги

ПҚ-389-сон қарорига

1-ИЛОВА

Қашқадарё вилоятида 2024-2025 йилларда

аҳоли бандлигини таъминлашнинг

РЕЖА КЎРСАТКИЧЛАРИ

           

           

         

Ўзбекистон Республикаси

Президентининг

2023 йил 14 декабрдаги

ПҚ-389-сон қарорига

2-ИЛОВА

Қашқадарё вилоятидаги норуда фойдали қазилма

конлари жойлашган ер майдонларига бўлган

ҳуқуқларни аукцион савдоларига чиқариш

ГРАФИГИ

         

           

Изоҳ:

*) мазкур ер қаъри участкаларини аукцион савдоларига чиқаришдан олдин, ушбу ерларнинг тоифаси белгиланган тартибда ўзгартирилиб, Тоғ-кон саноати ва геология вазирлигига доимий фойдаланиш ҳуқуқи асосида ўтказилади.

Ўзбекистон Республикаси

Президентининг

2023 йил 14 декабрдаги

ПҚ-389-сон қарорига

3-ИЛОВА

2024-2025 йилларда

Қашқадарё вилоятида суғориладиган ер

майдонларини лазерли текислашнинг

РЕЖА КЎРСАТКИЧЛАРИ

   

гектар

         

          

Ўзбекистон Республикаси

Президентининг

2023 йил 14 декабрдаги

ПҚ-389-сон қарорига

4-ИЛОВА

Қашқадарё вилоятини 2024-2025 йилларда комплекс

ижтимоий-иқтисодий ривожлантириш бўйича ишларни

ташкил  этиш  ва  мувофиқлаштириш  юзасидан

РЕСПУБЛИКА ИШЧИ ГУРУҲИ ТАРКИБИ

       

       

Изоҳ. Республика ишчи гуруҳи аъзолари бошқа ишга ўтган тақдирда, унинг таркибига ушбу лавозимга янгидан тайинланган шахслар киритилади.

         

          

Ўзбекистон Республикаси

Президентининг

2023 йил 14 декабрдаги

ПҚ-389-сон қарорига

5-ИЛОВА

Қашқадарё вилоятининг туман (шаҳар)ларига

бириктирилган вазирлик, идора ва тижорат

банклари раҳбар ходимлари

РЎЙХАТИ

         

              

Изоҳ: туман (шаҳар)ларга бириктирилган масъуллар бошқа ишга ўтган тақдирда, ушбу лавозимга янгидан тайинланган шахслар рўйхатга киритилади.

Қонун ҳужжатлари маълумотлари миллий базаси (www.lex.uz),

2023 йил 15 декабрь