Ўзбекистон Республикасининг 27.12.2023 й. ЎРҚ-890-сон "Ўзбекистон Республикасининг айрим қонун ҳужжатларига ўзгартиришлар ва қўшимча киритиш тўғрисида"ги Қонуни (Қонунчилик палатаси томонидан 05.09.2023 й. қабул қилинган, Cенат томонидан 25.11.2023 й. маъқулланган)

Функция недоступна

ЎЗБЕКИСТОН РЕСПУБЛИКАСИНИНГ

ҚОНУНИ

27.12.2023 й.

N ЎРҚ-890

ЎЗБЕКИСТОН РЕСПУБЛИКАСИНИНГ

АЙРИМ ҚОНУН ҲУЖЖАТЛАРИГА

ЎЗГАРТИРИШЛАР ВА ҚЎШИМЧА

КИРИТИШ ТЎҒРИСИДА

Қонунчилик палатаси томонидан 2023 йил 5 сентябрда қабул қилинган

Cенат томонидан 2023 йил 25 ноябрда маъқулланган

Кейинги йилларда мамлакатимизда аҳоли бандлигини таъминлаш ва камбағалликни қисқартириш, оилавий тадбиркорликни ривожлантириш, аҳолини спорт билан шуғулланишга кенг жалб этиш, шаҳарсозлик фаолиятини такомиллаштириш бўйича чора-тадбирлар амалга оширилмоқда.

Шу билан бирга оилавий тадбиркорликни янада ривожлантириш, спорт-таълим ташкилотларини давлат томонидан қўллаб-қувватлашни кучайтириш мақсадида, шунингдек қурилиш соҳасида давлат хизматлари кўрсатиш тартиби жорий этилганлигидан келиб чиққан ҳолда мазкур соҳалардаги муносабатларни тартибга солувчи қонун ҳужжатларини қайтадан кўриб чиқиш зарурияти юзага келмоқда.

Мазкур Қонун билан "Оилавий тадбиркорлик тўғрисида"ги Ўзбекистон Республикаси Қонунига юридик шахс ташкил этмаган ҳолдаги оилавий тадбиркорлик субъектларига беш нафаргача доимий ходимни улар билан меҳнат шартномасини тузган ҳолда ёллаш ҳуқуқини, шунингдек бир оилавий корхона иштирокчисига бир вақтнинг ўзида бошқа оилавий корхона иштирокчиси бўлиш ҳуқуқини берувчи ўзгартиришлар киритилмоқда.

Бундан ташқари Ўзбекистон Республикасининг Божхона кодексига давлат ҳамда нодавлат спорт-таълим ташкилотлари томонидан ўз эҳтиёжлари учун импорт қилинадиган махсус спорт кийим-бошлари, пойабзал, спорт анжомлари, жиҳозлари ва ускуналарининг эллик фоизи учун божхона божини тўлашдан озод этиш тарзидаги имтиёзлар берилишини назарда тутувчи ўзгартиришлар киритилмоқда.

Ўзбекистон Республикасининг Шаҳарсозлик кодексига маҳаллий ижро этувчи ҳокимият органларининг шаҳарсозлик фаолияти объектларини қуриш тўғрисида қарорлар қабул қилиш бўйича ваколатлари бекор қилинишини назарда тутувчи ўзгартиришлар киритилмоқда.

Ушбу Қонун архитектура ва қурилиш соҳасидаги ортиқча бюрократик тартиб-таомилларни бартараф этишга, оилавий тадбиркорликни янада ривожлантиришга, шунингдек спорт-таълим ташкилотларининг моддий-техника базасини яхшилашга хизмат қилади.

1-модда. Ўзбекистон Республикасининг 2012 йил 26 апрелда қабул қилинган "Оилавий тадбиркорлик тўғрисида"ги ЎРҚ-327-сонли Қонунига (Ўзбекистон Республикаси Олий Мажлиси палаталарининг Ахборотномаси, 2012 йил, N 4, 111-модда; 2013 йил, N 4, 98-модда; 2015 йил, N 8, 312-модда; 2016 йил, N 12, 385-модда; 2019 йил, N 3, 166-модда; 2020 йил, N 1, 2-модда, N 7, 449-модда, N 11, 652-модда; 2021 йил, 4-сонга илова) қуйидаги ўзгартиришлар киритилсин:

1) 3-модданинг бешинчи қисмидаги "уч нафаргача" деган сўзлар "беш нафаргача" деган сўзлар билан алмаштирилсин;

2) 5-модданинг:

биринчи қисмидаги "Оила бошлиғи, унинг хотини (эри)" деган сўзлар "Эр, хотин, уларнинг" деган сўзлар билан алмаштирилсин;

учинчи қисми чиқариб ташлансин.

2-модда. Ўзбекистон Республикасининг 2016 йил 20 январда қабул қилинган ЎРҚ-400-сонли Қонуни билан тасдиқланган Ўзбекистон Республикасининг Божхона кодекси (Ўзбекистон Республикаси Олий Мажлиси палаталарининг Ахборотномаси, 2016 йил, 1-сонга илова; 2017 йил, N 9, 510-модда; 2018 йил, N 4, 224-модда, N 7, 433-модда, N 10, 670-модда; 2019 йил, N 1, 5-модда, N 2, 47-модда, N 5, 267-модда, N 9, 589-модда, N 10, 671-модда, N 12, 880-модда; 2020 йил, N 10, 593-модда; 2021 йил, 4-сонга илова, N 10, 969-модда; 2022 йил, N 2, 75-модда, N 7, 666-модда, N 12, 1190-модда) 297-моддасининг иккинчи қисми қуйидаги мазмундаги 15-банд билан тўлдирилсин:

"15) Ўзбекистон Миллий олимпия қўмитаси, Ўзбекистон Миллий паралимпия қўмитаси, олимпия ҳамда паралимпия спорт турлари бўйича федерациялар (ассоциациялар) таклифлари асосида белгиланган тартибда Ўзбекистон Республикаси Ёшлар сиёсати ва спорт вазирлиги томонидан шакллантириладиган ҳамда Ўзбекистон Республикаси Вазирлар Маҳкамаси томонидан тасдиқланадиган рўйхат бўйича давлат ҳамда нодавлат спорт-таълим ташкилотлари томонидан ўз эҳтиёжлари учун хориждан импорт қилинадиган, Ўзбекистон Республикасида ишлаб чиқарилмайдиган махсус спорт кийим-бошлари (экипировкалари), пойабзал, спорт анжомлари, жиҳозлари ва ускуналари учун белгиланган божхона божи ставкасининг эллик фоизига".

3-модда. Ўзбекистон Республикасининг 2021 йил 22 февралда қабул қилинган ЎРҚ-676-сонли Қонуни билан тасдиқланган Ўзбекистон Республикасининг Шаҳарсозлик кодексига (Ўзбекистон Республикаси Олий Мажлиси палаталарининг Ахборотномаси, 2021 йил, N 2, 145-модда; 2022 йил, N 6, 570-модда, N 11, 1061-модда) қуйидаги ўзгартиришлар киритилсин:

1) 21-модда биринчи қисмининг:

бешинчи хатбошиси чиқариб ташлансин;

олтинчи - ўн олтинчи хатбошилари тегишинча бешинчи - ўн бешинчи хатбошилар деб ҳисоблансин;

2) 22-модда биринчи қисмининг:

тўққизинчи хатбошиси чиқариб ташлансин;

ўнинчи - ўн иккинчи хатбошилари тегишинча тўққизинчи - ўн биринчи хатбошилар деб ҳисоблансин.

4-модда. Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин;

ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

5-модда. Ушбу Қонун расмий эълон қилинган кундан эътиборан кучга киради.

Ўзбекистон Республикасининг Президенти Ш. Мирзиёев

Қонун ҳужжатлари маълумотлари миллий базаси (www.lex.uz),

2023 йил 28 декабрь

"Халқ сўзи", 2023 йил 28 декабрь